【龔成問答信箱】（Q14641-Q14660）

Q14641：

Hi Sir，我係你舊生，想問下關於ASM 0522既年報，我睇左2018年既年報，發現佢果年既商譽有成6億左右，會唔會太多？

雖然佢要靠收購合併黎增產，但係咪其實會計數字可以忽略就得。

其次，發現經營現金流，發覺應收帳比起2017年收少左幾倍，姐係經營現金流入應該增加，但睇返佢真正即時收既現金又唔係好多，就咁睇會唔會有啲怪？

龔成老師：

當企業收購了一些資產或公司，而這個收購價，比起佢買入資產或公司的賬面值高好多，就會出現了一個溢價，這就會入賬為「商譽」，這是正常的會計，而這個項目，就會成為這企業的資產一部分。

ASM PACIFIC（0522）見佢2018年的商譽，的確增加了$6億，但由於佢本身已好大隻，市值都幾百億，因此這個商譽數目，反而不算大，不用擔心。

如果一年內增加的商譽太多，可能佢以過高價收購資產，這時，就一定要仔細睇佢的具體買資產情況。

不過，因為我地一向明白，資產負債表內的「資產」，只係一個「會計上」的價值，因此唔會視為「就是這個價值」。大家都明白這一點的。

至於現金流量方面，你要仔細睇翻佢現金流量表先得，因為當中唔單止受到應收賬部分影響，同時，就算是「應收賬」的變動，在入賬時都唔單止睇一年的情況，而是要同時睇兩年的增減，然後成為一年變動數目去入賬，有點複雜的。

只可以簡單來說，佢現金流量其實不差，不同擔心。

------------------------------------------------

Q14642：

龔sir， 你好。想問現在有$100萬現金，請問怎樣運用，可以令到每個月有$15000~$20000被動收入呢？
萬分感謝

龔成老師：

如果每月要有$15000被動收入，即是一年要有$18萬，這刻要產生18%的回報，並不容易，如果有人教你投資收息有18%回報，背後一定有風險的，你要明白。

因此，我會建議你將$100萬先增值，希望數年後滾存資金到$200萬或更多，然後先集中現金流類別，這會更好，整個過程會更加合理。

即是運用「先增值，後現金流」作方法，這刻可以投資穩健，有基本增長力的股票，例如，盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）等這類，到增值後，先慢慢集中現金流，會比較好。

------------------------------------------------

Q14643：

師兄你好，我在《 80後2百萬富翁 》 看見你說過，你最初不使用價值投資法而選擇技術分析，其中一個原因是覺得價值投資法不合時宜。

有時覺得很有趣，每個時期都總有人說「今時不同往日」，但後來發生的事情總是和歷史驚人的相似。直到今時今日，仍能在網上看到不少說價值投資法已經過時的觀點。

所以我好奇你當時是為什麼覺得這個方法不合時宜？我想看看是否都是基於類似的心理。

謝謝

龔成老師：

我18歲開始投資股票，甚麼都不懂，只有聽坊間所謂專家所講，佢地當時話，價值投資法已經不合時宜，因為經濟變得好快，模式已同過往唔同，所以，價值投資法佢地話已經無用。

當時，我18歲，由零開始，當然會聽「專家」講，所以當時用技術分析，加上技術分析有好多圖去分析，而我數學欏A，分析圖較強，所以好中意。

幾年後，我因為用技術分析輸左好多錢。

同時，眼見巴菲特用所謂不合時宜的「價值投資法」不斷賺大錢，我開始懷疑技術分析。

最後我明白，我應該用一個賺錢的方法（即是巴菲特的價值投資法），而不應該用多人用但唔賺錢的方法（技術分析）。

從此，我不再用技術分析，並開始不斷賺大錢。

------------------------------------------------

Q14644：

龔成老師你好 我今年24歲 月入19K. 手持10買入的1177 和 85買入的中電. 想考慮月供 每月大概可儲9k-10K, 甘月供大概5-6k, 應該買入領展和盈富基金, 50%50%?

龔成老師：

你持有的股票都有質素，長線持有就得，唔好理中短期股價。

至於月供方面，建議你月供$4000盈富（2800）、$2000領展（0823），長期進行。盈富是一個50隻股的組合，因此投資比例上，多少少都無問題，如果日後收入增加，你再增加盈富的金額都可以。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14645：

我想問下我衣家持有6000股1810同4000股576...想問一問應唔應該繼續留...如果唔應該應該換邊一隻馬呢？

另外想問下2018vs舜宇同埋美團應唔應該中長線持有？

龔成老師：

小米集團（1810）其實都有質素的，佢業務及產品發展都不差，有潛力的。

但佢這刻仍處於未有理想盈利的狀態，市場仍然未能對佢完全估值，所以佢的股價仍會波動，而中短期仍未得。但要留意，這類股，有危有機，可持有，但不能持貨太多。

同時，你要耐心少少，因為不會咁快進入收成期。如果你本身持貨不多，可長線的話，但就唔建議你加注。

至於浙江滬杭甬（0576），都是有質素的，可持有，但你預佢增長力唔會強。

至於瑞聲科技（2018）、舜宇光學（2382）都有投資價值，不過後者少少貴。至於美團點評（3690），這類股有危有機，估值難，股價波動大，唔係話唔可以投資，但不能大注。

------------------------------------------------

Q14646：

龔sir，有d問題想請教，本人持有新興市場(30萬)同埋印度債券基金(28萬)，2019年7月買入，當時是銀行經紀推介的，佢話銀行睇好印度市場而且派高息(大概7%)

但印度債券基金從買入後，應該因為美金高位，同埋油價升，而價位不斷下跌，本來想守多半年等利息追到平手離場，但近日又因為美國伊朗衝突，個價不斷下滑

而家扣除利息蝕緊萬幾蚊
請問我是否應該立即離場?
因為這些是我之後打算用來投資股票的本金

因為呢個局勢不知持續到何時，而2隻都是BB級的評級，最差情況不知會否連風險本都冇法取回

我是應該繼續長期持手，定係立即放好呢？

龔成老師：

其實，債券及債券基金，要好小心分析，因為好多人以為保本，但其實不是，不少讀者都反映出現「賺息蝕價」的情況。

這類投資，會比較有危有機，但我相信好少去到唔還錢的情況，但價格下跌的風險，是存在的。

我相信美國伊朗只是中短期事件，你唔需要太擔心，你最重要是分析長期的優質度，如果長遠正面，仍可以持有。初步睇，你暫時可以持有，但如果你持有太多，可以在價格上翻去時賣出。

另外，BB級，是勉強可以投資的級別，但只有7%回報，其實在風險與回報上，不吸引。

------------------------------------------------

Q14647：

Hello, 龔sir, 我想問我在2007年買入#1053 - 以$4.95 /18000 股, 是否要放棄.........

龔成老師：

重慶鋼鐵（1053）長遠應該賣出，但不是這一刻。

首先，佢業務質素比當年的年代已弱左，同時當年是熱炒期。加上近年業務波動，有時出現虧損情況，持有的價值只是一般。

不過，這股並不是劣質，加上現價唔貴，在合理區中下部，這刻賣出又唔係最好時機。所以，我會建議你持有住先，但當出現較多反彈，例如5成以上，就要開始賣出，唔好期望佢會翻到當年高位。

------------------------------------------------

Q14648：

老師，我有關於月供股票，問問你意見
buget $15000

盈富 $6000
長建 $3000
恆基 $3000
建行$3000

可行嗎？
目標：想間中收息又可買有實力的股票

龔成老師：

可行。

上述都是有質素的股票，都是值得投資，長期月供無問題。

至於金額方面，都是適合的，盈富（2800）佔較多，正確。我相信可以達到你的目標，如果日後收入增加，可以再增加盈富。

------------------------------------------------

Q14649：

龔老師你對近期的金價和樓市抱持甚麼看法？ 面臨可能出現新的高風險傳染病，美伊緊張局勢，香港政治問題和農曆年後可能出現的結業潮和失業潮。

結合多方面的因素，我很希望能聽聽龔老師你的睇法。

龔成老師：

中短期，香港樓市會向下，但不要預期會跌好多。

因為中短期，香港經濟會轉弱，在實體經濟會慢慢反彈香港上年及現時多個不利因素，例如貿戰及社會運動，當實體經濟真正反映，人民的買樓能力減弱，樓價會受壓。

不過，這些因素不會對香港有長遠影響，加上香港樓本身有供求失衡的問題，長期的供應仍是不足，長期需求仍大，這會支持樓價向上，令香港樓中短期不會跌好多。

------------------------------------------------

Q14650：

龔成老師 ,今年21,最近加左人工想儲多少少咁,但比起儲現金冇息/定存低息,所以收想買入收息股。
現時月供緊00823($2500),

依家睇上左02388同埋00011。就想用$5000左右黎供,但就唔知集中供一隻定兩隻都供曬 ,因為唔想個銀碼太低扣太多手續費。同埋見到最近銀行業個波動都比較大唔知依家入手好唔好。

同見到 823最近表現有啲差,供左1年 ,老師咩睇法

龔成老師：

我會建議你每月合共供$5000，一隻是領展（0823），另一隻銀行股。

恆生（0011）同中銀香港（2388），你都可以考慮，可2選1，兩隻都有質素，中銀增長力略高，恆生則較穩定。睇下你本身的投資目標。

至於領展近1年，因為香港的社會運動對佢有影響，不過，這只是中短期，而月供是長期的，因此不用理會，你保持長期供就得。同埋，近年半大股東正不斷增持。

------------------------------------------------

Q14651：

老師，你書有提過利用過住數據及現時甚至之後的大環境分析，點分析法，如莎莎？

龔成老師：

其實，我地要分析大環境與財務數據的相關性。

首先分析過往的大環境，以及每年的財務數據，例如莎莎（0178），佢2015年的生意有明顯分別，這點可以在財務數據裡睇到。

我地見佢2015年前好好，賺錢能力高，2015年後轉弱，我地就要了解翻，當時的大環境發生咩事。

原來最主要是中國經濟轉弱，以及人民幣轉弱，影響了這企業的業務情。

下一步，我地就要分析這股現時與之後的大環境，中國經濟會點？人民幣會點？尋找當中的關鍵因素，從而推算財務數據。當我地掌握了預期的財務數據，就可以為企業估值。

------------------------------------------------

Q14652：

我根據以上回覆打算用2萬元作以下月供,希望能得到你嘅意見再進行

2800 $5500
0012 $2500
0066 $2500
0270 $2500
1038 $2500
1211 $1500
因月供股票中沒有1177，打算每4個月入1000股

以上組合可行嗎？（我已報了你的堂）

龔成老師：

上述的組合，可以，當中都是有質素的股票，可長線投資，月供適合。但現時市況只是合理區，不是平宜區，因此，你要同時留有現金先得。

如果你報左我的班，不如你上過課程，先開始月供，我相信咁會比較好，你可能有更好的決定。

------------------------------------------------

Q14653：

龔Sir,剛完成了3本你的著作，80後百萬富翁2,3，同財務自由行，想學習更多關於財務知識自己將來可以財務自由。

因為家人不太懂得理財，以致未來有需要多一點資金去作保險，透過你的故事令我有希望同能夠實踐，基本概念已有但愈學習愈發覺不知怎樣套用在自已身上。

1.本人36歲，做Senior Designer

太太賺錢能力同專長都比較高但因剛剛生了小孩所以暫時全職做媽咪直到仔仔一歲。

2.個人資產大慨30萬現金，20萬經保險購買基金(基本上每月供2200),

10萬左右既股票[03319 雅生活服務，00743 亞洲水泥，00763 中興通訊 ，01951 錦欣生殖，01211 比亞迪各一手另加10月開始月供盈富4000同港鐵2000]

3.每月收入35k,生活連保險大慨15K，
再给太太每月至少10k儲蓄。

4.短期目標， 一個自住單位500~700萬，因首期嘅問題所以希望藉著抽籤揀建築期去買新樓(太太有工作後，作擔保人做9成按堨)

5.長遠目標，10~15年以一千萬資產為目標，之後透過股息維持每月40k左右
收入達成財務自由。
有什麼方法嗎？

黎近開始上你的股票班，因為好初哥上课之前有沒有需要睇下什麼書令上课更容易理解？

再次感謝你故事同知識既分享，篇幅有點長，感激抽空閱讀。。。

龔成老師：

要買入單位不是不可，但這會令你地在買入之後，基本上無乜資金剩，因些，你要盡力在這段時間儲錢，部分資金不能投資，要多留現金作準備。

相信你太太工作後會比較好。

總之，買樓唔好太急，要計好數，「供得起」是原則。

至於你現時的持股，基本上無問題，但當中潛力股的比例有點多，而這類企業存有不確定性，部分可能增長需時，因此若然你要買樓，要睇翻自己之後的資金需要，而持有潛力股部分不應太多。

你完成買樓後，先正式開始下一步會較好，即是進入你長期目標$1000萬的階段。

你要運用「先增值，後現金流」作方法。

初期應投資較多增值類資產，到$1000萬後，則應投資較多保守類項目。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後已累積了相當財富後，才漸漸轉成收息型股票。

所以，你這刻先做好買樓計劃，之後就進行儲蓄投資計劃，你上完堂後，會有更具體的方向，到時有咩唔明落堂可問我，上堂前你可以睇《股票勝經》先。上堂見！

------------------------------------------------

Q14654：

你好龔老師, 想請教一下我之前有睇過你youtube片講到大快活（00052）係一隻吾錯嘅股票. 但看股價回左唔少，加上負面新聞.

想問大快活是否還是一隻優質股呢? 因為我想入手長缐持有. 謝謝.

龔成老師：

我地最緊要，分析翻股價回落原因，以及影響這企業因素，是中短期還是一些核心性的不利因素。

大快活（0052）本質不差，但這並不是增長型企業，從這類企業的估值來說，過往估值較貴，現時才是合理區。當然，這企業都受不利消息影響，從業績上可見，佢盈利有下跌情況，這主要受人工成本，以及香港社會運動影響，前者對佢有少少影響，後者為中短期事件。

整體上，佢的質素仍在，但並不是高增長型企業，現價合理，有長線投資價值。

------------------------------------------------

Q14655：

老師，我投身社會唔夠三個月就比人炒左⋯公司話肺炎，冇辦法共度時艱，仲有幾日都唔比我過埋個試用期⋯⋯

喱幾個月黎，受到你的鼓勵，我開始儲錢，睇書，計劃點善用每一蚊。但係所有野突然要止步，突然被打斷。

老師，我好唔開心，你可唔可以鼓勵下我。多謝你，多謝。

龔成老師：

每個人都會有起跌，這是好正常的。

當順境時，成功人士與一般人都是一樣，無大分別。不過，到逆境時，就是考驗那個是一般人，那個是成功人士的時候，因為成功人士面對逆境時，唔會變得負面，仍會想方法令自己進步，想方法要自己面對困難，想方法突破。

過往，我自己都面對過唔少逆境，每一次都是我突破的機會。

我曾經有一些生意拍檔的，最後大家有問題，無再合作，當刻是有點慌的，面對逆境，當時不易過，我想盡方突圍，這些方法是我之前無想過的（所以，好多野逼出來，反而更勁），當時可說是我最大的突破點，現在想翻，好彩當時有這逆境！

記住，每次逆境都是一個突破機會，你可以逃避，或尋找方法令自己進步！

------------------------------------------------

Q14656：

你好老師，你點睇現在的Tesla, 中國上海既工廠生產線岩岩開工，黎緊歐洲又有新工廠，生產目標又達成左，但感覺最近股價升得有點瘋狂

龔成老師：

Tesla正面的，這是不錯的企業，現時電動車兩大巨頭之一。

佢仍有一定的增長力，不過，估值是最難的地方，就算市場對佢的估值，「估」的成份都好大，這一定會造成股價好波動。就算這刻想入，都只能小小注。

------------------------------------------------

Q14657：

你好！龔老師
想問舜宇光學科技及瑞聲科技，邊一隻更適中長線投資？

現時兩隻股價合理嗎？
大概咩價位入會好啲？
持股多少會比較適合？

謝謝！
不好意思，仲有小米集團

龔成老師：

舜宇光學（2382）同瑞聲科技（2018），兩隻都是有質素，可長線投資的股票。前者發展會較大，不過在估值上，現價亦有少少貴，後者在合理區中上部。

因此，要睇你自己的投資目標，如投資舜宇，這刻在注碼上就要做好控制。

只至於小米（1810），有潛力的，同時現價不貴，但你就預佢股價波動較高，但業務其實唔差的。

留意翻，上述都是手機及相關股，你唔可以太集中在同一類別，要控制好比例。

------------------------------------------------

Q14658：

龔老師你好! 有投資問題想向你請教｡

我今年30歲, 手頭上有80萬流動資金可以作投資用途。一直冇咩點投資，係最近哩幾個月買過幾隻股票，包括0031, 3998, 1299, 1313。　

全部都揸左一陣就放，賺左少少，典型散戶(Hi)。最後悔係1313，買既時候8蚊依家已經10蚊了。

但新一年想買有返一個全面d既投資plan。我想問係咪應該係月供股票入手？

但個市升左唔少，好似唔太係入市時時機。　最近有睇保險既儲蓄保，想問龔老師對哩d plan有咩睇法? 謝謝!

龔成老師：

你太過著重短期分析，這最終只會令你行錯左。

第一，唔好再「賺少少就賣」，我地要做的，就是理財上的資產配置，將你現時持有的現金（永遠貶值），轉化為一個真財富組合，例如持有有質素的股票，長期持有。

另外，保險既儲蓄保是防守性產品，雖然在理財中都有其作用，但唔應該買太多。

同埋，你唔應該因為短期個市升左，就決定唔買股票，而買保險既儲蓄保，我地要進行長期的財富配置，唔應該比短期因素影響。

這刻的股票，仍處合理區，你仍可以進行月供，只要月供的同時，留有一定的現金等機會就得。

你可以每月供盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

每月供$10000-$15000可以。

總之，唔好理中短期股價，長期進行月供就得。

------------------------------------------------

Q14659：

你好龔老師，有問題想請教下你，我23歲 剛出黎做野幾個月，0投資經驗

每月可儲7000左右 因為在銀行工作，有一個員工活期户口約有5%利率（有上限）我應該先把上限存滿等大市降便宜點再入貨 （上限短期內沒法存滿）

還是邊存邊入貨 不打算月供股票 因為在澳門手續費較貴 謝謝

龔成老師：

5%是不錯的無風險回報，因此，在未有投資機會時，宜將較多的資金投資在這個高息戶。

但我不建議你完全零股票，只是在現金的比例上，你可以比一般人較多，同時會等較大機會先出手。

如果你無投資經驗，可以將2成資金，投資在盈富（2800），同時，你在這段時間好好學投資，如果大市略回落，可以再加多2成再其他優質股。

在一般的市況，你可以預留4成-6成現金，但當到了大跌市，你都要把握機會，投資股票。

你這個年齡，是財富增值的黃金時期，要好好把握，這刻最重要的，就是盡你一切的力量去儲蓄、投資、學投資知識。

------------------------------------------------

Q14660：

我想問恆大3333 現價算平嗎?
未來發現走向投資得過?

龔成老師：

現價不平宜。

中國恒大（3333）業務不差的，發展亦不錯，可能你單睇市盈率或股息率，會認為佢較平，其實並不是。

因為佢有一個好大的風險，就是負債好高，如果中國樓市保持不差情況，佢會因負債而好好賺，但如果中國樓市有較大的逆轉，對佢來說會有好大的打擊。

當市場考慮到這風險，就會將估值調低，因此，這刻處合理區中上部，唔算特別平，同時若投資這股，注碼不能太多。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13881-Q13900）

Q13881：

成哥，我讀中三，現時有6830元，應如何投資？
家人話可以幫我買。

龔成老師：

要睇你想學野，還是想合理投資。就初階者來說，投資盈富（2800）是最好的，因為這是一個基金，當中有50隻質素不差的股票，可以分散風險，不過，入場費要萬多元，但你可以問下你家人，是否可以大家夾份買。

佢一手為500股，例如你地合共買一手，你佔其中200股（約$6000。

如果你想學習，當然可以學下自己選股，這會令你知識上有更大的提升，但風險就會較高。

另外，有些股票入場費不算高，但都有質素的，例如領展（0823），入場費$8000左右。如果純收息的股，可考慮港燈（2638）。

你這個年齡，是學投資的好時機，我建議你多睇書，增加知識，反而賺蝕不是重點，因為只要你有知識，到你日後正式出來社會有收入，財富的增長會更明顯。

另外，你都可以考慮做小生意，因為這都是一個很好的與習機會，我相信中學生想買那些產品，你會比成年人更加清楚，這是你的優勢，這是你生意的切入點。

------------------------------------------------

Q13882：

老師，我之前買左了妖股，蝕左唔少錢，痛定思痛，現在想用 50萬 跟你學習投資選股

已在 39歲，買股已有10多年經驗，點知呢個月一舖清袋
扣取員工宿舍開支、mpf，淨收入3萬，希望60歲退休前投資收入可增值 200 萬！

每月其他開支約1萬，每月可儲2萬

龔成老師：

最緊要是調整心態，我地進行理財投資，是一個長期的累積過程，不能太心急，如果要求過高回報而面對過高風險，就不值得。

你要還原基本步，從儲蓄，投資優質，平穩增長類股票為主。

首先，希望你每月能儲到$20000，堅持最重要。

然後就是保持月供，每月將其中的$10000月供，盈富（2800）$5000，另外再選兩隻（每隻$2500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

至於餘下$1萬，你就先儲現金，等機會投資（長遠都是要投資的）。

如果你每月$2萬，能爭取到10%回報（連股息再投資計），20年後，你可以累積$1368萬！

只要你保持「每月儲$2萬」「每年投資回報率10%」。

------------------------------------------------

Q13883：

老師，港鐵點睇？

龔成老師：

港鐵（0066）獨特性好強，雖然中短期較弱，但以長遠來說，這股仍是有質素，有發展的。

佢近期港鐵有不少不利事件，包括新線路的安全結構問題，以及相關金額的損失等，都會對港鐵產生負面影響。

但投資者在分析時，要集中在企業的長期情況，核心的收入，長遠的發展。

當企業因短期不利事件，而對股價出現短期下跌，而事件在長遠分析，對企業核心價值影響有限，這就是投資機會，只要以長線投資為前題就得。

因為港鐵始終係一間擁有獨特優勢的企業，無論是鐵路經營權的壟斷、沿線物業的發展、物業地段優勢、獨有角色、市場化的效率提升，都令港鐵成為一隻優質股。

港鐵以鐵路加物業綜合發展模式運作，以此營運方式在香港運作多年，並創造出巨大價值，多個大型物業項目均由港鐵發展，如德福花園、杏花村、青衣城、東薈城、奧海城等。由於港鐵具獨有優勢，故長遠發展必然有利。

更重要的是，香港的長遠發展必然是向著新市鎮，鐵路系統必不可少，故將來對鐵路的依賴必愈來愈多，政府亦表示這會是發展的重點，故無論是鐵路以及相關的物業，都會保持增長，長遠計必然向好。

雖然港鐵在多方面都甚為理想，但由於再投資的回報率一般，故發展只能平穩，由於城市發展、鐵路與物業都是很長期的項目，故中短期港鐵增長動力只會一般，因此投資必然是長期或超長期的，因為港鐵的長期潛力仍在。

港鐵的股價由高由回落，現時在合理區較上部的範圍，不過已比之前較有投資價值，由於這類優質股，市場對其估值甚高，投資者很難等到平宜價，因為市場會認為「貴得有道理」，因此，最好的方法就是分注投資、月供投資。

現時已在合理區，基本上已可以開始投資，只要分注就得，投資後長線持有，慢慢等企業發展，耐心等回報出現。

------------------------------------------------

Q13884：

老師，我正在思考，其實户口應該放少少應急$，其實大約應該放幾多呢？

龔成老師：

每個人的情況都不同的，而一般來說，會預留「每月基本支出」的3-6個月數目，作為基本的現金。

我地投資，一定要長線，所以資金要確定是中短期不會用的，才會進行投資。你先有基本的現金，餘下就可以進行投資。

------------------------------------------------

Q13885：

老師，我現在30歲，想在35歲盡可有400萬，每月可儲$15000是否要找高收息的股票？或是潛力股？

現在，我有2手陽光435 ，3手中國鐵塔788，我諗緊我應該再買啲咩股去平衡好呢？
是否要買煤氣/港燈？

我常在想月供會好嗎？因為長遠投資，一隻供月股10-20年才睇到效果咁，所以之前嘅我都係睇啱價位先入，雖然暫時每隻只有好少。

希望有時間解答一下煩惱的問題

龔成老師：

坦白講，以現時的儲蓄情況，要完成目標的確不易。

除非用比較進取的方法進行，但就會有較高風險，要睇你自己點決定。

首先，要加幅增加每月儲到的現金，可以利用兼職增加收入，同時節省開求，目的令每月可剩餘的資金，大增。

第二，你要集中投資潛力股，因為單靠一般的股票，根本無法在5年內完成目標，所以你要建立一個潛力股的組合（不要只集中在一隻，要分散在多隻）。

當然，集中潛力股，一定會有風險，所以要睇翻你本身的風險承受能力。

第三，要提高你的選股、企業估值等能力。你要早市場，找出這些被低估的潛力股，然後投資，這才有機會做到。

第四，月供股票已不能完成你的目標，你一定要有把握投資時機的能力。

------------------------------------------------

Q13886：

想問一問，如果想投資太古公司，應該購買太古A(0019)定太古B(0087)比較好?

除左股權同派息方面不同，兩隻股票仲有咩大分別呢?

龔成老師：

其實兩隻都是指同一間公司，只是權數不同。

因為太古B（0087）的面值，是太古A（0019）的5分之1，所以，除了投票權外，其他方面你可以按5分1去計算。

不過，由於太古A是指數成份股，好多基金都會持有太古A而不是太古B，所以太古A會有少少溢價，如果單以股息率來計算，太古B反而會更吸引。

------------------------------------------------

Q13887：

龔成老師你好，我今年24歲 岩岩出到社會做野 想接觸投資。

想問問 我係一個投資新手 好多投資既述語都唔識
想問問老師你 我可以睇邊本書來增加自己對投資既知識？謝謝老師

龔成老師：

你可以睇《80後百萬富翁》《股票勝經》
之後再睇我的其他書。

書本在三聯、商務、大眾、誠品都有得賣。由於部分書在一些書店已斷，所以若你見唔到，想下職員就得。

以下是我的11本書：

《80後百萬富翁》（第7版）
《80後2百萬富翁》（第3版）
《80後3百萬富翁》（第2版）
《財務自由行》（第5版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（初版）
《股票勝經》（第3版）
《選股勝經》（第2版）
《年報勝經》（初版）

------------------------------------------------

Q13888：

成兄 阿里巴巴 點解咁多人都叫佢老千股既？

龔成老師：

其實這股，在2007年曾在香港上市。

當年的阿里巴巴（1688），與最近上年的阿里巴巴（9988），業務差規模並不完全一樣，但基本都是這個阿里巴巴。

當年佢上前後，熱炒，過幾年後，股價打回原形，加上當時歐債危機令市況好差，佢股價好低，最後就用一個價，私有化，買翻晒散戶的股票。

其實佢在幾年間，企業價值有所增長，但當年就利用了市況差，股價平的環境，以低過企業價值的價格，去進行私有化，令到不少散戶（特別是在熱炒期買入的散戶損失），所以有唔少人都不喜歡這股。

------------------------------------------------

Q13889：

龔成老師:本人四十歲即將一家移民，有兩個小朋友，預留一百萬生活費再到當地找工作！

香港物業放租，扣除供款開支會有9千元净收入！再打算從MPF全數提取大約二百三十萬元！

請問有什麼投資建議可以有穩定增值回報？經常閱讀你書籍知道可以投資平穩增值股同收息股！

想請問可以用部分買債券收息賺取被動收入？
老師覺得這樣理財安排合理嗎？

龔成老師：

雖然你的年齡，財富仍有一定的增長方，理應集中投資「平穩增長類股」，但由於你這刻的生活情況仍有不確定性，因此投資會保守翻少少。

等你安生活已穩定，收入等穩定，就可以轉翻平穩增長類股票。

至於這刻，應該有6成都投資收息類項目，4成則可投資平穩增長類。

因為大市唔算平，你要分注投資，同時留下一半現金。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。

至於債券，你都可以投資，但建議你只能投資「A」評級的債券，以減少風險。雖然回報不算高，但以你這刻的情況來說，是較好的做法。

------------------------------------------------

Q13890：

成哥，我想問3800，依隻股票如何？

龔成老師：

保利協鑫能源（3800）質素一般。這企業的過去盈利比較波動，成本因素令佢處於盈利不確定的狀態，這令佢處較被動位置。

另外，這股過往是散戶其中一隻炒股，我最怕就是這類。

------------------------------------------------

Q13891：

你好，我認為股樓都是能升值既投資產品，那可否集中買樓投資而不買股，1開2，2開4。

因買樓波幅比股少，感覺較安全，樓點差都可以住，股點好都只是張沙紙，但會否有集中風險？

龔成老師：

股票就是企業，企業當然有價值，只是一般散戶不明白股票。

因此，我地只要投資優質企業，其實都好穩健。

比起集中一項資產，建立平衡組合風險會更低，例如股樓並行。物業過往年代可以1變2，2變4，現時已難好多，活用股樓平衡，將會有更大的財富增值效果。

------------------------------------------------

Q13892：

老師，我記得你講過香港房地產及澳門賭業都有投資價值？

龔成老師：

首先，土地是重要的資產項，因此不少地產發展商，都元一定的價值。另外，香港本身地少人多，這是一個先天的問題，地有限，人無限，所以長遠地價只會向上，地產股，有一定規模的，都會有投資價值。

至於澳門賭業，開賭本身是高毛利行業，加上行業為寡頭壟斷，當中的企業當然有質素。

------------------------------------------------

Q13893：

你好老師，本人持有20萬現金，覺得放銀行不會増值！眼見現在的經濟和環境因素，請問，有什麽適合類型股票可以入？

龔成老師︰

首先你要明白一個概念，我地投資一隻股票就等同投資企業一樣，要考慮的關鍵位是企業質素和行業前景。經濟狀況和社會環境所造成影響，只會造成中短期波動。只要這些因素唔影響到企業核心因素，就可以不用理會。

至於入咩股，則要睇翻你的年齡。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。

如果你年青，可以"平穏增長股"+"潛力股"，但如果你已近退休之年，就應集中在"收息股"去創造平穏現金流。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）

潛力股︰比亞迪（1211）、中生（1177）或福壽園（1448）
收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

由於現時大市只在合理區，你資金可以先投入一半。餘下一半待大市出現一定程度的下跌，才大力度掃貨。然後長線投資。

------------------------------------------------

Q13894：

龔sir,你好啊，請問315現時股價已到三年低，請問現時係入市時機嗎，謝謝

龔成老師：

數碼通（0315）從本質分析，算是不過不先，而我地最緊要，是否析翻下跌（不是中短期，是長期）的原因，這些因素會否繼續，成為一些核心因素。

電訊行業結構無變，而影響佢下跌的原因，主要是近年手機銷售，以及電訊業的價格戰。先講手機銷售，數年前的智能手機都幾好賣，不少人更去炒iPhone，這正是當年這股股價被炒高的原因。

因為當年賣手機為佢帶來不少的利潤，但如今，你已經聽唔到有人去炒iPhone，智能手機亦回至正常狀態。所以，可以理解這股由高估值，回落至合理價值。

電訊業的結構始終是寡頭壟斷，因此點都唔會太差。所以，長期這方面不用太擔心。不過，增長力就唔強。

這股現時處於合理價中下部，不過中短期仍會較一般，但再大跌的空間有限，只要手機有熱潮出現，就有可能突破。不過，暫時唔能夠有太大期望，投資，收息，會是較好的選擇。

------------------------------------------------

Q13895：

老師，巴菲特咁多書，我睇邊本？

龔成老師：

其實，巴菲特無自己出過任何一本書，這些書全部是坊間的作者，綜合巴菲特的理論而寫的。現時坊間有過百本巴菲特的書，我應該睇在50本左右。

我會建議，巴菲特的書，睇得愈多愈好。

《巴菲特給股東的信》，算是巴菲特自己寫，因為佢每年都會在股東會，寫一封信比股東，講下投資理念，而這書就是集結信而成的，你有機會可買。

------------------------------------------------

Q13896：

老師，我用堂上方法試計福壽園 得出結果現價合理 請問現價有值博率嗎？

龔成老師：

福壽園（1448）係有質素、有潛力的股票，有投資價值，同時可長線持有。

以估值來說，現價仍在合理區頂至略貴水平，相信$6以下會較為合理。但由於市場都知這股的質素，因此要大跌不易，所以現價小注，其實都有值博率的。

------------------------------------------------

Q13897：

老師，長和持有港燈同長建。

如果買入或月供長和，誠哥有咩意見？
謝謝

龔成老師：

長和（0001）是整個長和系的最頂部，當中都是有質素的資產，都有投資價值，可以月供。但由於綜合企業，所以增長力會比較平穩，並不是高增長的類別。

你可以月供，但這股會偏向平穩，收息為主，唔好對股價有太大的期望。

------------------------------------------------

Q13898：

龔成老師現時我的投資組合為:

2000股 中銀香港 2388
1200股 金沙 1928
2000股 太古地產 1972
4000股 中國中藥 570
1000股 比亞迪 1211
500股 中國移動 941
現金6萬 （約20%)
請問組合可以嗎?

龔成老師：

上述持有的，都是有質素的股票。

你只要長線持有就得，不用太在意買入價、短期股價。我見上述組合都算平衡，因此無問題。

現金20%，在現時的市況，有點少，你應該再增持現金到3成，預一些現金當大跌市時可以買入（但你這刻不用賣股票）。

另外，如果日後有資金，可以加入盈富（2800），這樣會令組合更加平衡。

------------------------------------------------

Q13899：

老師：請問788 中國鐵塔同2388 中銀香港，前景如何？可繼續持有？

龔成老師：

中國鐵塔（0788）有質素的，只是近期有少少炒概念，所以這刻唔能夠太進取。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。佢現時的收入正不斷增長，盈利都保持向上，但股本回報率不高，是這股較弱的地方。

之前略貴，現價在合理區頂部，由於這股有發展力，可長線。

至於中銀香港（2388），都有投資價值，只是中短期將面對不利情況，但從本質分析，這股的賺錢能力始終不差，加上有獨特地位，因此有質素的。

------------------------------------------------

Q13900：

HI 想請教354,1257,1778 質素有冇轉弱?
仍然值得持有嗎

龔成老師：

中國軟件國際（0354）未有轉弱，不過客戶風險度提高左，長遠仍是正面。

中國光大綠色環保（1257），質素仍在，但近一年負債增加左，所以市場對佢的風險度增加，令估值減少左，不過佢的業務增長力，的確比過往弱左。不過投資價值仍在。

彩生活（1778）有投資價值，不過增長力則不及其他同業上市公司，加上佢負債高，所以市場對佢的估值都不會太高，算是平穩型的股票。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13401-Q13420）

Q13401：

龔sir你好 先講講我背境 現階段我仲係一位大學生 因為想去外國留學讀書 但係屋企經濟唔允許

我因為咁覺得好唔扺冇得追求自己理想 留學每年學費20幾萬 生活費可能可以同屋企人商量佢地俾

但係如果我而家月儲5000係咪冇可能靠股票兩年後支付到我未來4年嘅學費 現有5萬現金

我有睇你啲書但係呢個目標係咪冇可能做到 我一諗到就覺得好唔甘心 有咩辦法可以改變現況？唔該晒你

龔成老師：

以正常的理財角度，你的確較難完成目標，每月儲$5000，2年要滾存到4年學費，並不易。除非你在香港，花超過2年去儲蓄投資，滾大了一定的資金先過去留學。

不過，如果你覺得好唔甘心，你以「最大決心」去完成這目標的話，就可以利用不同的方法。

但好睇你有「幾大決心」。

有二個方法：

第一個方法，你做生意。

你可以好好利用現時的資金及每月資金，去做生意，利用網上買賣，又或不同的平台，現時有些商舖結業，有些地舖可能有較平的短租，只要你把握到一些潮流，都可以賺到一定的錢。

你要努力去找商機，試試開發你這邊的「眼」，去找尋機會，我相信你要完成目標是有可能的，但你要努力。

第二個方法，努力做高時薪兼職，同時盡你一切的能力去慳錢，令你本金大增，同時盡最大努力學投資，將所有資金集中投資潛力股（當然這會有一定的風險）。

你要努力學選股、企業分析、企業估值的能力，然後要比市場快一步，找到這些倍計上升的股票，機會一定有的，問題是你有無足夠的能力找得到，加油！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13402：

龔老師您好! 想問關於首次置業, 本人與妻子年40無兒女, 月收入40000.00 手上有30萬元股票, 70 萬余現金, 請問我們現在入市可以嗎?

如果入市我們應該考慮那個地區呢? thank you and looking forward your next class in Hong Kong!

龔成老師：

現時的樓價，可說是處合理區中上部，如果再升多少少，就有些貴。

因此，投資價值不算高，但自住的價值仍在，因為香港長期物業供應不足，長遠樓價仍向上。如果你買入自住，最重要是考慮「能否保持供款」，這點是最重要的。

因此，如果有自住需要，可考慮入市，我會建議市區，一些供應較少的地區，但你要小心唔好太高追，因為有些業主因政府政策而加價，你要用合理價買，唔好過高。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13403：

你好 龔成老師 我是最近在網上知道你的資料 所以也買了你的書來學習吸收下股票概念 現在我大約有50萬可以用 想幫2個小朋友增值做大學學費

目標是400萬 約7年時間 這個有可能做到嗎 請老師給予些建議我 如何可以通過投資進行增值 感謝你！

如果有老師最新的投資課程請也發資料給我可以嗎？

龔成老師：

如果要單單將$50萬，7年增長到$400萬，這是一個好高回報，如果你要強行達成，背後一定要承受相當的高風險，以你的家庭情況，並不建議。

因為我地投資，是在可承受風險的前題下，爭取合理的回報。

建議你除了運用現時的$50萬外，要加大資金，每月增加投資金額，才有機會滾存到較接近的數目。

如果你想增長多一點，可投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你暫時可以集中在平穩增值股先。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13404：

成哥, 謝謝你的1177!
想問下對1475有什麼評價及建議?

龔成老師：

中生製藥（1177）就算再升都好，都只能賣出部分，最好餘下部分，長線持有，這股有潛力的。

）日清食品（1475）不差的，簡單業務，有品牌。近期股價上升了不少，市場預期有一定的增長，因此這刻股價其實已反映了當中的水平，這音值博率不算高，小注好了。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13405：

想請問2588 中銀航空租賃 中長期表現如何呢?

值得長期持有嗎？我係63蚊入，會升到那一價位範圍呢？多謝回覆!

龔成老師：

中銀航空租賃（2588）可說是有風險有質素的股票，業務本質的確不錯，生意與盈利都保持理想增長，加上賺錢能力不低，同時企業有獨特性，因此企業正面。

但要留意，佢的業務原理，是利用借貸投資飛機然後放租，由於收到的租金比借貸的利息成本高，因此賺取了中間可觀的利潤。

但如果日後加息，對佢盈利有影響，同時，佢現時的負債不少，這都是風險的來源。整體來說，這股有投資價值，是潛力股類別，你可以持有，只要注碼不能過大，相信仍可以向上，但我一向不預期股價的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13406：

成哥你好，想問下每股盈利複合增長率系點計出黎的，平時系股票app見到既每股盈利增長率系咪同一意思？

謝謝睇我既問題，求回覆

龔成老師：

財經網站、APPS所指供的，只是「一年的盈利增長」，即是今年比上年度，盈利增長了多少。

而我平時所講的「每股盈利複息增長」，則是指多年的數據計出的，例如5年、10年，這要自己計，你要用數學的複利息公式去計翻，每年的平均複息增長是多少。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13407：

你好, 本人跟先生做小生意, 有二間零售店, 已經營多年, 生意尚算穩定, 二人合共月入約十萬, 現時本人手持兩個住宅物業

(二個仍在銀行貸款中, 物業A市值490萬, 銀行借貸4成, 每月收租$11000, 物業B 市值650萬, 銀行借貸6成, 每月收租$22000)

另有一FULL PAY 車位, 每月收租$4000; 先生手持物業C市值$700萬物業。現時跟家人同住, 我們想在2-3年內購入市區3房單位自住,目標是1500萬-1800萬 新樓3房, 有以下

問題:

1. 先生手持的700萬單位剛剛做了轉按, 如果我們想在2-3年內套現再買入3房單位, 現在先把單位放租, 還是在把單位放賣先套現比較適合?

因為新樓一般都是買入樓花, 如果下年有合適新樓推出, 我們都有意購入作3年後自用

2. 我們二人合共有150萬現金, $3000月供基金, 暫沒有手持股票, 主要資產投放在樓市上, 以我們現時的資產組合, 有什麼方法可在2-3年內令手頭上的現金有2倍的增長? 月供股票?

是否有其他投資選擇建議? 因主要想到時可套足夠的現金入市

3. 本人手持的物業A打算下月放賣先套現, 之後再放賣車位套現, 如果在成功購入新樓3房才放賣物業B/ C, 是否很冒險?

是否有更好的放賣次序建議和報署?

我們終極目標是希望購入市區1500-1800萬3房單位, 同時手持本人其中一個物業收租以保證正常現金流

龔成老師：

1）你可以放租，但簽約的年期不宜太長，一年生一年死約是較合適的。無人知你這刻賣樓後，一年後的樓市變化，為左將這個風險減少，你到有需要買樓前才賣出現時的物業套現，是比較好的做法。

2）月供股票要較長期才有效果，若果只有2年時間，這未必是最好的方法。所以，你不如將現金，直接投入股市，但就不能動用太多（只能一半以下），因為投資要長期才有增長效果，因此你餘下要有一定的現金。

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

3）比較好的做法，是你確認想買3房單位前的數個月，才賣出單位A，而車位則現時賣出都得。

簡單來說，我希望你盡量做一個「換樓」的過程，這可以減少風險。即是你「持有香港物業的面積」，沒有太大的改變。

至於最終目標，都是不差的財富配置，但就太則重於物業，你會出現資產集中風險，因此，如果日後持有一個自住樓加一個收租樓，最好同時後之後的財富累積上，加上其他資產的比例。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13408：

老師，想問3690這隻股票可長遠投資嗎？
謝謝你

龔成老師：

美團點評（3690）佢業務巨大，同時增長快。不過，佢仍是有危有機的股票。業務較新興，但佢現時仍在燒銀紙狀態，我比較怕這類企業，不過近期現金流有改善，所以令市場好有期望。

這類企業不是不可投資，在要控制注碼，不能大注。

因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。如此股佔組合比重唔多，現貨可繼續持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13409：

龔Sir你好，我剛大學畢業，想趁年輕開始投資。初步計劃頭幾年每月用$8000月供4隻股票 (各$2000)，再慢慢增加月供金額，目標30歲時儲到120萬以上。

如果想進取少少，想揾啲高增值能力既優質股，以下計劃你認為需要調整嗎？

暫時計劃係月供港鐵、煤氣、比亞迪三隻，再喺港交所、金沙、平保、友邦入面揀一隻，你認為邊隻較好？

港交所、平保、友邦價位好似都仲好高，尤其係後兩者，但佢哋前景又看好，應該幾時入手？雖然話月供唔洗理短期波動，但驚一開始供就跌到30歲;(，唔該晒！

龔成老師：

港鐵（0066）、煤氣（0003）、比亞迪（1211），都是有質素的股票，可以做月供，長線投資，現時已經可以開始。

至於最後一隻，因為你後生，可以進取少少，以增長力本計平安（2318）的確較好，雖然中短期計唔算平，但只要你長線投資，就無問題，考慮到增長力及值博率的問題，平安仍是較好的，現時已可以開始月供。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13410：

老師 好驚呀 公司有個大客戶言之鑿鑿說全球經濟下跌 再加上香港社會運動的骨牌效應 要盡快放晒手上股票咁話

多得平時聽你說越沒信心就越要買入 仍會繼續供地鐵 但始終心裡戚戚然
很惶恐

龔成老師：

有兩個要點你要明白，第一，所謂的分析，不一定準確，雖然經濟向下的機會的確大，但去到嚴重衰退的可能性不高，唔好單單聽人講，就認為這情況一定會發生。

第二，我地買股票就是買企業，只要企業優質，根本唔需要擔心股價波動，只要你長線投資，就算中短期股價向下，長期也會慢慢向上，因此，根本不用擔心。

好多人都會「預期股價將跌，所以放左先」，但這樣分析的人，絕大部分都會分析錯誤。

因此，還原基本步，買入優質股，長期持有就得。

至於港鐵（0066），賺錢能力好強，近期只是一些中短期的事件，無影響佢企業的長期價值。這刻反而適合去做月供。

佢收入主要有運輸、收租、地產，如果你從長遠角度，就能分析到近期的事件，對這幾方面長遠的影響都好少。

最多近期會影響了運輸收入，以及成本增加，但無影響長期情況。所以，只要你唔好理中短期股價，保持進行長期月供就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13411：

龔老師你好，我今年正踏入40, 無樓未婚家有一老要供養, 現有現金60萬和月供3萬股票 (現已累積30萬）組合如下：

中媒 $4000 新鴻基 $4000 領展 $4000 盈富基金 $8000 恒生債券基金: $4000
餘下$6000投資美股

計劃5年後移居台灣, 希望到時可有500萬資產, 請問現時投資組合可達目標嗎？如不能, 可否提供方法？萬分感謝！

龔成老師：

上述你月供的，基本上都有質素，可以長期進行，至於恆生債券基金，我就唔敢講好與壞，因為坊間有些債券基金有投資價值，有些則無，之前都有收過一些讀者，佢表平投資債券基金後出現了賺息蝕價的情況。

你每月能投資$3萬，連同原有的資金，如果以5年作滾存，大約可以去到$350萬。

如果你要打上$500萬，可以要每月再儲多$10000，然後這$1萬不要做月供股票，而是儲現金，等機會把握。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13412：

龔成老師你好
我24歲，岩岩返左工兩年

一年前用
$73.02 買左3首滙豐0005
$36.1 買左1首中銀 2388

依家貶到都唔知點樣好，本來想用黎草錢結婚，想問下應該點做？

龔成老師：

這兩股都有質素的，只要買入價處貴水平。另外，銀行股的賺錢能力比過往略有減弱，加上香港的社會運動，都令這兩股中短期的股價更弱。

要睇你打算在幾年內要結婚，如果時間在3年後先結，那麼這刻就無賣出的壓力，這兩股仍可以守的，不過要上翻去，並不是短期的事，起碼要等香港回到正常情況先得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13413：

龔sir 你好。我係一個大學生未有收入，但係大約有3萬存儲。

你建議我依家應該要做啲咩同埋可以點樣學習投資知識？你有冇書係講點分析潛力股？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

我建議你將其中的$15000，買盈富（2800），餘下留現金，等投資機會。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

我建議你睇《80後百萬富翁》、《股票勝經》，都是適合你的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13414：

你好, 我覺得撇除政治因素，港鐵於香港係地產收租股非公交股，佢而家回落咁多其實應該是低吸時機?還是觀望再候?

龔成老師：

港鐵（0066）好優質，這點不會改變，佢的主要收入包括：客運、租務、地產。其實近期的情況，都只會對佢中短期有影響，長期的賺錢能力其實無改變。

不過，這股一向都不平，現價處合理區中上部，分注投資可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13415：

龔成老師想問一下，本人29歲，只有2萬元積蓄，

1. 想買入一手1177，現在買入合理嗎？還是要等它再低價一點？（好記得之前老師在6、7元時有推介這股票，後悔當時未有入手...）

2. 另外，想用$3000月供股票，打算當中$2000供盈富基金，餘下$1000有幾個心水：金沙，比亞迪，煤氣。

我該配搭以上哪個會較好？還是有其他更好的選擇？
謝謝老師

龔成老師：

1）中生製藥（1177）雖然有潛力，但現價唔平，這刻投資的值博率不高，除非你可以收資金分成多注，現價先入一小注就可以。但如果你只夠入一手，這刻就不建議入，起碼等佢回落15%先考慮。

2）如果你可以承受少少風險，你可以月供盈富（2800）$2000、比亞迪（1211）$1000。

比亞迪中短期仍會弱，要長線投資先有作用，因此，你唔好理中短期股價，長期進行就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13416：

你好，想問問德視佳在13元買了
但在下跌

龔成老師：

德視佳（1846）這類新股，一向都唔易分析，因為新股只有3年財務數據，好易作出「修飾」，所以投資者在分析，以及進行估值時，會十分困難。

同時，新股往往股價波動，風險高，要好小心。

初步分析，佢業務波動，但不是無發展，最多只能小注投資好了，如持貨太多，宜賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13417：

阿Sir，我係你學生，因為我有月供中銀香港同埋地鐵，現時呢兩間企業被狙擊，報道有指市值大蒸發。

我想確認一點：

除非今年中銀香港盈利顯著受影響，全年平均市盈率出現明顯異常，否則仍然可以沿用之前做嘅市盈率估值法，去衡量股價平貴；咁樣諗法啱唔啱？

甚至可以話，趁住有短期不利因素，以平價入貨？
唔該晒。

龔成老師：

首先，這兩股的長期投資價值仍在，不過中短期一定波動，但我地的分析點，一定是長期，例如「3年後的業務情況如何」。

當我地計算估值時，其實有一個好簡單的方法，就是你照用之前教落的估值方法，然後下一步，就是假設這企業會受中短期影響有多大。

若假設佢受一年內都受影響，令到佢一年都完全無錢賺，當我地計算估值時，只要用之前計出的估值，然後減去佢一年的盈利，這就是一個推算出來的估值。

現時港鐵（0066）處合理區，而中銀香港處合理區中下部，都是有值博率的，你可以考慮加大少少金額，但就未到掃貨區域。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13418：

你好，龔老師，想問問如果想為父母月供股票，預大概1000，是否應該供盈富基金?
謝謝你

龔成老師：

要睇佢地的年齡與風險承受程度，如果已經退休，就未必適合，反而投資收息股更好。但如果未退休，每月仍有收入，則可以投資盈富（2800），長期月供。

另外，你月供前，記得問清楚手續費，因為你金額不多，如果手費佔已佔了一定的比例，就會好影響回報。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13419：

龔成老師, 最近見到隻百威亞太一上市係咁升, 拜讀左你既選股文章, 此股能否成為另一隻維他奶?

龔成老師：

百威亞太（1876）質素的確有的，但這股現價不算平，從投資值博率角度，這刻吸引度不足。其實維他奶（0345）都有類似的情況，業務及增長力不差，但這刻有少少貴。

我相信百威長線不差的，但如果這刻略貴，我會建議你最多只能投資小小，然後等跌先會正式入，再升就唔加注，這會比較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13420：

老師請6110咩價入点睇法

3601又怎樣

老師請問788，現買入長線，好？

龔成老師：

坦白講，滔搏（6110）、魯大師（3610）這類新股，我一向都無興，亦無研究，因為新上年的3年數據，比較易「修飾」，根本好難得出真實面。

加上股價一般都較為波動，所以風險較大。

就初步的分析，滔搏業務有一定的規模，同時本質不差，投資價值有，但估值有點貴。至於魯大師，高風險類，雖然業務有可能高增長，但只建議小注。

中國鐵塔（0788）有質素的，只是近期有少少炒概念，所以這刻唔能夠太進取。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。

由於這股有發展力，如你有貨，可長線。
但如這刻買入，就要自己衡量風險，同埋不要大注。小注分注慢慢入，都可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。