［大家只睇到金融嘅胸部，睇唔到金融嘅凶暴］如是我聞。忽然間隻嘢就跌三成架啦，個市冇事冇幹喎，下調收入指引幾個巴仙之嘛。

TLDR：一隻股票跌咗三份一，係要升返五成。呢條數我到而家都唔知點計。同場加映—財經演員的自我修養（我估好多人係睇呢part）（＃）

1. 其實冇乜特別，但友台 有米落鑊 - 馮宏遠阿米講起，又有啲啟示。呢隻Fastly（FSLY），上星期前我係聽都未聽過的。原來又係雲計算，OK。當旺。高峰都係100億美金市值左右，唔算太大。

2. 重點係，做乜之前（星期四）忽然急跌？原來係下調咗第三季收入指引（美股好多公司都會畀）。點解下調？因為最大個客幫襯少咗。邊個係最大嘅客？ByteDance 字節跳動。仲唔知係乜？Tik Tok．仲唔知係乜？即係抖音（＊）

3. 最大嘅客被美國搞，股價跌唔奇。奇在而家先忽然跌。仲有，唔係字節跳動唔再幫襯，只係收入少咗。具體嚟講，之前收入指引係75.5-73.5m美金，而家係70-71m—7%不夠，但股價就跌三成。

4. 固然，收入跌7%，利潤跌幅可以遠超於此。但重點並唔係呢樣，正如阿米所講，股價高處不勝寒，之前升咗5倍（2019年5月先上市），市場期望極大，就絶對容不下少少出錯空間了。況且仲要係細公司，仲要係蝕緊錢，margin of safety極細，稍為有小小問題，大家就即時散水。你又唔係有乜護城河，升咗5倍我點解唔沽？

5. 股價連跌兩日，就已經冇咗35%—亦留意第一日裂開低開三成咁滯，根本冇得你走。總之就係你一開就見到股價冇咗三成幾。

6. 但我其實最想講嘅係，一個小學數學問題，困擾咗好多人好多年，亦係投資嘅真諦，畢菲特法則嘅第一條（同埋第二條）

7. 請問，一隻股票跌咗35%後，要升返幾多先回家？答案唔係35%，係54%。呢個實在令人好困擾

8. 然後又係撫心自問時間，唔好計你買波買馬贏到10倍100倍啦，講真你贏十皮嘢都唔會改變到你任何生活水平（一球嘢……就應該有啲影響）。

9. 計serious money，有幾多人，一隻股票賺到50%？唔使答我，自己諗。更加唔好講，咁多隻夾埋搵到50%

10. 而一隻股票忽然間輸你35%，係一晚嘅事。仲要係冇乜特別事，唔係雷曼爆煲，唔係世紀疫症，唔係中美開戰。只係一個冇乜特別嘅消息。

11. 但你，就been left a mountain to climb了。贏返五成，慢慢。我更唔知如果話「堅守止蝕」嗰啲係咪星期四開市就打靶，根本一百個有九十九個都唔會啦。（但話說回頭，星期四即斬，真係輸少啲喎）

12. 當然冇人知，可能之後Fastly升返幾倍呢，有幾出奇。你睇返亞馬遜2000年嗰時啲股票？坐幾多年先返家？Never Say Never

13. 但愚見認為呢，真係唔使咁多招式。畫撚埋一大堆圖呀，又水星逆行呀，又睇當撈侵八字呀，又聽KOL講中美大戰呀乜鬼，23000買 25000止賺 穿 22000就止蝕呀咁炒上炒落（＊＊），十居其九係浪費時間。固然有人咁發達，但一般都唔係你。

14. 簡簡單單，買隻大企長渣，有幾難？固然而家甚麼FAAMG之類開始樹大招風，富不與官鬥，但佢地就被人目上了。但仲有好多其他公司，Tech嘅，大把人買Tesla Netflix之類，PayPal VISA我亦寫過（VISA都Tech？）。Non Tech嘅，ig有貼啦，Black Rock，LVMH，Nike都創新高。仲有讀者提過啲咩Domino呀，Papa John呀之類—增長快過Google添！

15. 之後可能都會出多啲短啲嘅文（可惜呢篇個後記又長過正文，耐唔耐會咁，有得我），刷下存在感同收視。大家鍾唔鍾意？正路多數係答長短唔重要，最緊要有用。但，邊有咁多時間？永遠都係idea太多，時間唔夠。可能都要學下另一隔離台 規佬筆記 Compliance Notes 咁多啲短打（係喎，其實虧佬同阿米會同埃汾一齊食飯的，「嚟嚟去去都係嗰班友」）

16. 循例叫下大家，想支持埃汾嘅，最好就join Patreon（https://bit.ly/31QmYj7）．唔想科水嘅亦理解，咁記得share like and comment（煩，但很重要）。另外，Instagram都多嘢睇的說（@ivanliresearch），我甚至懷疑太多嘢睇會自己打自己。

------------------------------------------------------------------
（＃）好多次都有人話啲（＊）好睇過正文，「咁不如以後埃汾寫（＊）得啦」。Nonono，唔得嘅。正如餐廳賣酒水利錢高，但總唔可以只賣酒水嘛！共生的。亦正如我都寫過，航空公司下面嘅里數計劃仲值錢過航空公司本身，基本上好多航空公司係負市值，由里數計劃貼住（https://bityl.co/41iN）—但邊係咁簡單呢？否則間間都摺埋唔使飛只做里數計劃啦，兩者共生嘛。拿，又學到嘢啦，訂Patreon啦（https://bit.ly/31QmYj7）

（＊）正如WeChat唔同微信，嚴格嚟講TikTok真係唔同抖音，你在香港都用唔到TikTok但用到抖音。但至於Hungry Jack's係咪即係Burger King…….就睇你點定義咯。

（＊＊）Bonus：其實我由頭到尾都唔覺得自己係財演，但你鍾意叫亦冇乜所謂。你叫我死仆街我都唔會少咗一個仙身家的。亦正如 李兆富/利世民 （已豹隱）同 高明 話頭，咩係財演？你在電視報紙見到嘅咪財演。所以畢菲特，陸東，索羅斯都係財演，李嘉誠都係。咁邊個唔係？李德義呀（唔係唔識呀？），鞋王呀之類咪唔係財演，唔係有意外（老婆搞上黃長X梗係意外，唔通愛到入城大要分開預計之中咩）（我到而家都唔知呢句歌詞填乜撚），佢地點會上報？想講返，我真係仲有上電視，畀觀眾問冧把嘅年代，真係有啲人打嚟會問，「呀李生我呢40蚊買咗隻1919呀而家點算好呢」（＊＊＊）。「除咗叫你安息我都唔知講乜好」。但同時亦有人真係打嚟話「呀李生我呢50蚊買左隻騰訊呀而家應該點好呢」，我懷疑呢啲人係反社會人格打嚟演嘢的。無論如何，可以話畀你知，嗰啲節目絶對唔造假唔使做媒，因為真係好Q多人打上嚟問！以前電台節目，有啲友FAX份10頁長嘅嘢嚟問！根本唔使做媒。（＊＊＊＊）

（＊＊＊）即係舉例，其實40蚊買1919嗰個係我，以前講過

（＊＊＊＊）BTW 不吐不快講多次，好多人屌呢啲節目浪費大氣電波，我都同意。打去嘅無聊，答嘅無聊，主持又無聊，觀眾齊齊受罪。2.4買啦升穿3蚊可以take profit跌穿2.2扯蝕。我自己上去，都唔知做乜撚嘢。但—呢個係一個獎勵虛偽嘅社會。因為絶大多數人，都係將「答得快」「大聲」「唔使諗」當係自信」，然後將「自信」當為有料到。所以好似埃汾呢啲introvert係好難適應呢個社會的（＊＊＊＊＊）。我試過「講真話」架！「呀埃汾點睇呢隻乜乜動力呢」「er…….完全唔知間公司做乜」（＊＊＊＊＊＊）。結果？多幾次，電視台/電台高層就畀啲壓力架啦，喂，屌你，條友乜撚嘢唔知嘅？係咪路架，個CFA呃返嚟架（係喎，有人以為CFA係記股票冧把的，即係洗衣機壞咗你老母都叫你整啦，讀IT嘛你）

（＊＊＊＊＊）即使我啲朋友，聽到埃汾自稱係introvert，都當係笑話。但我不是杰丁，我是斯維爾。我遠遠見到識嘅人好多時都會繞路走。一大班人食飯食完飯，我總係「有下一場」，其實多數我係怕要同啲唔熟嘅人一齊搭車然後中途諗話題做small talk，「玩電話又唔多尊重人咁」「但未有電話玩嘅年代更加惡夢」

（＊＊＊＊＊＊）香港千鳩兩千幾間上市公司，我真心佩服啲行家可以隻隻知道做乜—但更神奇係好多時啲觀眾都知！幾時都話，香港地使撚「投資者教育」？街市劏雞嘅都知咩叫引伸波幅縮vol，我肯定全世界都冇一個地方係咁。我唔撚信在築地劏吞拿魚嗰啲知道點解日經指數冇任天堂份。

-------------
Instagram @ivanliresearch．七成金融（短打）兩成嘢食一成其他嘢。

----------------------------------
Ivan Patreon 狼耳街華人，一星期至少三篇港美市場評點，其他免費好文推介，每日一圖，仲有FB Page post summary．一個月一舊水唔使，開張兩個月已 600人訂，仲有兩篇免費試睇：https://bit.ly/31QmYj7

------------------------------------------------------
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010
內容:
*軟件股IPO狂潮
*買平台股好過
*人民幣強勢買咩好?
本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145

［日本風情畫］戲院股價，差不多創新高。乜料？

英美嘅戲院股就跌八九成，但東寶就差不多歷史新高。當然就係國情不同。

1. 東寶，應該近乎無人不識吧。就算唔睇戲，都總睇電視，總睇過動畫，成日會見到東寶個嘜頭。

2. 圖中就係東寶嘅股價，好得人驚。差不多返返年初嘅高位，離歷史新高都唔夠10%。

3. 要知道，電影/戲院行業的確係十分大鑊。其實未爆肺炎之前已經有啲大鑊，因為而家啲人太多娛樂，加上又有Netflix，好多戲可以唔使在戲院睇（所以好多人不能理解我落樓下睇《天若有情》，或者我可以去電影節睇《旺角卡門》）。另外我相信戲院睇戲呢啲，都係老嘢先做。你叫啲新一代坐定定兩粒幾鐘唔講嘢唔玩電話，怕且都幾難

4. 加埋今年爆肺炎，就不用多講添啦。除咗你表面睇到嘅閂戲院，隔位坐。仲有一個更大嘅問題：就係冇戲上！呢個係個惡性循環，片商見坐唔滿或者啲人冇意慾去睇，索性唔上啲大片。但冇大片上，就更加少人入戲院。遲下詳解

5. 所以你見美國啲戲院股就香晒，Cineworld年初至今跌左九成，仲要摺埋啲戲院。AMC就跌一半。但東寶就同年初高位差不多，好似冇事發生過，仲要離歷史新高不遠。咩事？

6. 就梗係國情不同了

7. 首先，日本係世界第三大嘅電影市場，中國同美國之後。主要係人口OK多，而又富裕。你見其他過一億人口嘅，多數都相當窮下。中國就實在堅係太多人。

8. 另外，亦因為日本控制疫情比較好（相對鬼佬啦下），戲院都可以坐返滿—但就不能食嘢飲嘢咁解。

9. 仲有一樣好重要嘅嘢：日本國產電影（邦畫）票房係高過外國片嘅。原因係乜可以另行討論，可能日本人唔識英文，或者日本人愛國，或者日本片近年水準提升。任你慢慢講。唯一要解補係：呢個現象唔係自古皆然，係雷曼兄弟爆煲之後先係咁（唔知有冇關，但年份上係咁）。雷曼爆煲前嘅幾年，外國片票房係國產片幾倍。

10. 然後仲有一樣特別嘅嘢：東寶嘅壟斷地位。戲院佢佔咗兩成，而佢又同時拍戲戲。在香港都好似仲可以（黃百鳴？），但美國就唔得的，Anti Trust嘛

11. 正係因為日本人（而家）愛睇本土片多過外國片，而東寶自己又拍埋戲，又有好多戲院—所以因利成便，插多啲本土片上。你荷里活啲戲改期唔關我事，仲好，最好你唔好上，我播晒自己啲戲。而觀眾係OK的（或者唔OK嘅就自己在屋企睇Netflix）

12. 不過講咗咁多，話冇影響就假嘅，只係影響冇咁大。如果計8月東寶票房，按年都係跌咗六成。但股價仲咁硬淨，奇怪。

13. 呢篇文出得夠合時，因為星期二（13號）東寶就出業績，到時就知真章。有個別分析員就話而家應該沽空喎。

14. 又，間東寶市值唔細的，8000億日圓。即係幾大？大過間大和證券咯，大過日航添（十分奇怪，日航並唔係日經指數成份股，但市值係夠的）

15. 又又，認真的，多唔多人有興趣投資日本股市？（日本樓就唔關我事）。有嘅，有機會有啲合作傾到，亦可以寫多啲。

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7

——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145

［匯控已死！維基當立！］昨日又升11%！8蚊都見過。何止10蚊不是夢，直頭見14蚊啦

明報專欄- 李聲揚：博港視一年內入「港版納指」（https://bit.ly/3f6ETXn）

最底亦有copy成篇過嚟，反正免費（但慣例我都會隔一日先貼，請大家支持下明報）

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TL：DR 上星期先寫過王維基（https://fbook.cc/3Cxz），不長，但唔睇亦不太影響。當時話破頂，就破了頂。都話10蚊不是夢。不如就大貪啲，估升一個開。就夠入港版納指！做第二隻香港成份股（第一隻係ASM太平洋，已入，當唔當香港公司就隨你）

1. 昨日港版納指就登場，前世今生我寫過（https://fbook.cc/3Cxu），主要都係睇有冇被動基金有冇ETF有冇期指有冇輪，而又好取決於呢堆ATMX之類之後係咪仲有得升，定好似08後嘅中資金融股咁打回原型。至於如果真係有產品，咁炒邊隻股，亦都寫過，教埋你點解（https://fbook.cc/3Cxv）。就梗係唔係睇騰訊。「比重最高基金要追喎」。係丫，但根本騰訊日日都多人買。唔係話騰訊唔抵得買，但炒呢樣嘢就要睇啲本身成交（相對於在指數比重）細嘅東西。咁寫過係ASM太平洋（522）啦

2. 今篇寫乜？就大膽啲。我話嘅，王維基隻HKTVMALL香港電視（1137），一年內入呢個指數。到時入到嘅，記住全香港係本人最早寫（＊）。如果入唔到？咪入唔到咯。點呀？唔通我賠錢畀你？

3. 好啦，講下理據。「就即係睇好香港電視升一倍咯」．「其實如果批次股的話唔使升一倍添」。自己參透下呢句。

4. 我在明報文有寫，港版納指同正版，好似鬥十三張咁。大家擺個頭先，人地有FAAMG，港版有ATMX，當然港版都細過人地，影響力亦冇咁大。但至少都仲叫做勉強同一個級別。

5. 但落到後面，「二道」同尾，就爭好遠了。咩FAAMG之下，正版仲有Netflix呀Nvidia呀Tesla之類，港版就爭好遠了。

6. 可以睇下港版納指，最尾嗰幾隻，網龍（777），易鑫（2858），丘鈦（1478）。120億上市咁上下架咋，唔好以為真係好大。正如周顯話齋，其實係未夠班整30隻嘅指數。你見成個中國，都居然未有30隻勁嘅科技股（＊＊）。搞到連啲120億市值（港紙呀下）都入到。不過另一方面，你見好多人質疑點解冇香港公司　—　咪畀你見到，香港連一間120億市值嘅科技公司都冇咯！（除咗ASM太平洋，當然係咪”香港＂都可以研究）。

7. 但唔緊要！今日冇，第日會有！計過數啦，香港電視HKTVMALL，而家64億市值。其他嘢不變的話，升一個開，120億市值，咪夠過榜尾嗰三隻嘢頭咯！成交亦都應該夠的。咁冇理由網購唔係科技下話！光頭佬Amazon係全球首富，FAAMG之首喎！我知有AWS，但唔通冇咗AWS佢就唔係科技股？咪玩

8. 至於點升一個開？「其實唔難」，Tesla都升六倍啦大佬！不要問，只要信。最好就集眾人之力推入指數，然後打劫啲被動基金（因為入咗指數佢地要追）（＊＊＊）

9. OK，正經啲。疫情受惠股大家知啦。另外，埃汾太話我知HKTVMALL 調高咗免運費門檻（真係學彼德林治咁生活投資法咁喎！林治都係老婆報料），即係變相加價。生意好到做唔完。當然，我好似舊文都寫過，分分鐘業績後又批下新股。咁對股價可能壞事，但對市值就可能好事！（因為股數多咗）

10. 之前出咗盈喜，半年都賺9000萬啦，我估分分鐘係第二季先賺。好進取咁annualize，分分鐘一年有幾億純利。咁120億市值，唔係好過份咋？

11. 不過最大嘅敵人，反而係時間！當然咁細間公司，要炒上實在唔係太難。但真係時間係敵人！點解？因為指數成份股呢樣嘢，唔止不進則退，仲要係不停有人挑戰你。

12. 講得白啲，指數就30隻，而家個最低門檻係120億市值，但兩年後仲係唔係？未必。就唔講呢堆嘢升定跌都好，仲有個問題：有啲巨無霸係好大市值的！情況正如咩工行建行嗰啲嚟上市，你見啲舊嘅藍籌就踢走—但有啲根本個市值增長不錯的，但個門檻已高咗好多。同一道理，到咩螞蟻集團呀，滴滴呀，抖音呀嗰啲一嚟香港上市，你榜末嗰幾隻一定踢走，無論係易鑫定香港電視。

13. 所以，就睇香港電視升得快，定係螞蟻爬得快了。

14. 其實仲有個好有趣嘅問題：咩先叫科技公司？點解中移動唔係科技公司冇入指數？香港電訊（6823）或者電訊盈科（8）市值肯定夠入港版納指喎。富士康呢？Tesla係，點解Toyota 福士唔係？Toyota福士都會做/有做電動車吧。比亞迪（1211，唔係285）一樣係電動車喎，市值大過285添。況且，電動車係科技，電油車就唔係科技？咁做飛機呢？Day Day Cook 又係咪科技股？咁Blue Apron呢？Netflix最初可能係科技股，但而家變咗內容為主，點解佢係科技股迪士尼又唔係？或者下篇文講。有意見嘅可以講，但其實呢篇文主要講王維基隻HKTV MALL。

（＊）又認真，呢種心態都有啲多餘，切戒。偶然自揩下可以，但最忌係衰咗拎嚟呻。你同人講你香港乜鬼MyCar最早整，又如何？係咪鬥早先？蘋果速銷早過王維基添。蘋果之前一早有松日mp3，有台灣Tablet，有智能電話添。又如何？你潘蘇通去日日酸蘋果，「明明我整mp3機先」。Get a life啦，阿嬌阿Sa都嫁人又離婚啦。仲風箏與風咩。

（＊＊）咁當然，其實好過好多國家，之前咪寫過，德國講嚟講去都係得SAP同埋Wirecard – 後者仲要係騙局爆埋煲。（https://fbook.cc/3Cxw）（https://fbook.cc/3Cxx）

（＊＊＊）咪講笑，之前美國連登reddit啲友真係玩呢味。炒得不亦樂乎，例如隻Virgin Galactic 勁升都係咁玩法：人人推高個市值，咁啲期權商被迫就要開產品同埋被迫要買貨。有機會寫下

———————————————————————

李聲揚：博港視一年內入「港版納指」

【明報專訊】今天是俗稱「港版納指」的「恒生科技指數」面世。上星期公布詳情後，引起了一陣討論，也令相關股份瘋炒了一天（就只是一天）。

已有不少人提出，恒指近年估值低殘，沒有最平只有更平，表現大落後，原因之一是欠缺科技股。很長時間恒指內只有騰訊（0700）一隻科技股，勉強計入聯想（0992）（已被剔出），甚至手機設備股之類。但中國是不是沒有科技公司？也不是。部分公司如阿里巴巴（9988），以前因為「同股不同權」而選擇在美國上市，現在不少已經回歸。恒指公司在諮詢後（時機掌握得不錯），決定「同股不同權」公司也可以加入恒指。變相就代表8月阿里巴巴、美團（3690）和小米（1810）可以入恒指。

比較有趣的是，幾年前恒指公司將中移動（0941）也加入國企指數，已令恒指和國指愈來愈相似。現在恒指有一堆科技股，但另外又搞一個港版納指，三者相似度頗高，難免令人認為像特餐常餐快餐般。當然有陰謀論是元祖的恒指將被邊緣化，大家拭目以待。

有產品配合 新指數自然炒旺
還記得2006年，中資金融股當炒，恒指公司也推出了「中資金融股指數」（俗稱「五行三保指數」）。金融海嘯後，中資金融股表現不振，自然就無人再提此指數。希望港版納指不要重蹈覆轍。

前景方面，香港投資者及媒體，是「輸打贏要」的常客。科技股近幾年升個不停，當然就怪罪恒指為何不納入，給我科技股，不要銀行地產。但萬一不幸地科技股之後大瀉，又會有人說給我穩陣的銀行地產，不要估值極貴的泡沫科技股。指數成功與否，就看科技股是否生性——這點小弟仍是較樂觀，未來幾年科技股應仍能跑贏舊經濟股。

另一重點是，到底有否產品配合？否則，即使媒體日日報港版納指屢創新高，和投資者有何關係？恒指國指有大量產品配合，ETF、期貨、窩輪、牛熊證，任君選擇。買入港版納指的目的，就像餐廳套餐內八道菜，你卻只想要某幾道。若有ETF或其他被動基金追蹤此指數，自然會炒旺。到時小弟會再寫文，教大家如何捕捉機會（同文陸振球兄稱之為「打劫」指數基金，十分貼切）。

投資者十分現實，定會比較港版和正版。那港版納指和正版相比如何？數目上當然不能相比，正版2000多隻，港版30隻。比質素又如何？小弟認為是像「十三張」一樣：打頭陣的，正版有FAAMG，我們有ATMX（阿里、騰訊、美團、小米），市值當然不及，但也算竹門對竹門。可是再到「二道」和尾門，正版就完勝港版了。正如同文周顯所言，現在港版納指納入30隻股票，有點勉強。排到最尾的如易鑫（2858），市值才126億元。

那誰可以成為港版納指新貴？小弟認為think big，相信愛股王維基的香港電視（1137），一年半載內可望打入指數。若真的成事，記住小弟是全香港第一個說的。讀者可能說這想法瘋狂，但香港電視現在市值已64億元，成交額也比易鑫為多。其他不變的話，香港電視只要升一個開，就夠資格進入港版納指。

科技巨企上市 或推高指數門檻
港視升一倍，是否天方夜譚？未必。公司早前已發盈喜，半年賺9000萬元，但相信盈利都是在第二季賺回來，下年全年盈利突破3億元，也不出奇。120億元市值，約等於40倍市盈率，當然不廉宜，但並非不可能。

公司當然是近期疫情再爆發的受惠股。此外，內子也提到港視最近上調了免運費門檻，也就是變相加價，明顯地公司的生意好到應接不暇。唯一要留意的是，8月中期業績後，公司會否再配新股？這對股價可能是壓力，但對市值卻很大機會有幫助！（因為股數多了）

當然了，另一問題是，指數的門檻往往愈來愈高。巨無霸如螞蟻集團、字節跳動、滴滴等等來香港上市後，必然會踢走榜末的公司。所以就看看是港視升得快，還是巨企上得快。
——————————————————————————

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145