三十歲唔結婚，就會死（上） . 我叫阿花，今年二十九歲，未婚。 . 更準確地講，係二十九歲零三百六十四日，聽日我就三十歲，我就會死。 . ， 2100年，一種超智能晶片面世，愈嚟愈普及，直至強制每個嬰兒腦部都要植入晶片，監測所有行動。 . 然後，政府設定規例，將大家嘅人生安排好。 . 每人畢業後，就要搵工，如果搵唔到，政府會按專長分配工作，每份工嘅人工都係一樣嘅，按年資提升。 . ， 工作後，大家就要拍拖結婚，政府會分配住屋。 . 如果到二十八歲都未有對象，可以去公營配對公司進行Speed Dating。 . 總之，所有人都要喺三十歲前結婚。 . 仲有，結婚後要生2-3個小朋友，生完第三個就要去結紮。 . ， 一切一切，都由晶片去監測。 . 如果出現嚴重違規，例如唔肯返工、三十歲唔結婚、婚後嘗試避孕、虐待兒童……晶片會喺腦裡面爆炸，馬上死亡。 . 唔係靠嚇，我有幾次出街，都見到有人突然死咗，只係唔知佢哋衰咩。 . ， 有咗晶片之後，社會和諧咗好多。 . 所有人嘅人工都一樣，住嘅地方都一樣大，亦都冇機會上進，自然冇爭執。 . 而且，一旦犯下「破壞社會和諧」嘅罪行，就會直接被晶片殺死，冇人敢搏。 . ， 但我唔開心，我覺得好悶。 . 或者我天生就係所謂嘅「藝術家性格」，我想創作，我想睇新嘢。 . 政府認可嘅工作裡面，都有一份工叫「作家」，每個月都要交指定數量嘅作品。 . 我覺得，佢哋嘅作品好似工廠製作嘅罐頭一樣，只有生產日期係唔同。 . 畢業後，我都有申請成為作家，但我嘅中文成績唔夠好，最後我被分派為一個文員。 . ， 我嘅工作重覆又重覆，冇一絲樂趣可言。 . 按照晶片規定，唔係作家嘅成年人，都冇權創作文章。 . 我唯一嘅愛好，就係放假嗰陣，去睇吓嗰啲作家嘅新作品，然後合埋眼幻想，假如當年我可以成為作家，我嘅作品一定好過佢哋。 . ， 廿九歲，我忽然意識到，自己已經去到結婚嘅deadline。 . 我參加咗幾次Speed Dating，每個男人都想同我結婚，唔係因為佢哋有幾欣賞我，而係佢哋都係廿八、九歲，唔結婚就會死，所以佢哋想同任何一個正常女人結婚。 . 可惜，我接受唔到，哪怕為咗生存，我都冇辦法嫁一個面目模糊嘅男人。 . 我知道，過咗今晚，我就三十歲。 . 三十歲唔結婚，就會死。 . ， 時間一分一秒咁過去，午夜十二點，我冇死到。 . 我幾乎懷疑我個鐘壞咗，我彈起身上網，確定已經到咗第二日。 . 點解晶片冇殺我？我惴惴不安咁拎起支筆，寫咗幾句對社會制度不滿，要求取消晶片嘅說話。 . 跟住，我冇死到。 . ， 我再三試探，確定咗一件事，我嘅晶片壞咗！ . 即係話，我可以做晒所有違規嘅行為，而唔驚被晶片殺死。 . 從今日起，我就係自由㗎啦。 . ， 我懷住興奮嘅心情瞓著咗，第二朝起身，阿媽打嚟：「你同你老公ok嗎？」 . 我差啲想答「我未結婚」，話未出口，我成個人醒一醒。 . 點解阿媽唔係問我結咗婚未？因為三十歲未結婚就會死，我既然生存緊，就代表我應該結咗婚。 . 連結婚嘅對象都差唔多，喺晶片監控下，大家都唔衰得去邊，所以阿媽甚至冇興趣問我老公係咩人。 . ， 或者，另一個原因係，阿媽都唔係咁關心我。 . 逼於無奈地結婚，再逼於無奈地生出嚟嘅女，唯獨感情，唔可以逼於無奈地產生。 . 佢盡咗責任去養大我，只係大家一向都冇咩交流。 . ， 我意識到，我唔可以畀任何人知道，我嘅晶片壞咗。 . 一旦被舉報，政府一定會同我裝個新嘅晶片，到時呢種千年難得一遇嘅自由，就唔再屬於我。 . 所以，我要假裝，我嘅生活仲喺晶片控制之下。 . 我答：「ok啊，我哋幾好。」 . 「咁就好啦。」阿媽講完就收咗線。 . 待續... . #短故 #短篇 #小說 #陳美濤 #廣東話 #粵語 #tomatochan #三十歲唔結婚就會死

人生一條龍（下） . 我仔細一諗：「『人生一條龍』唔止係提供選擇，甚至幫人做埋選擇？」 . 兄弟神色凝重咁點頭。 . 我唔明：「佢哋到底想點？想控制大家生活？」 . 兄弟答：「可能係，『人生一條龍』引起太多跨國財團嘅注意，如果可以控制晒每個人嘅選擇，即係可以控制呢個世界。」 . 我更加唔明：「選擇少咗，使用者無發現唔妥？」 . 「有㗎，有人投訴。後來『人生一條龍』派咗一堆優惠券、現金券，就無乜人投訴啦。」 . ， 我突然諗起，幾年前，有人要收購我嘅股份嗰陣，我想退休，想去旅行。 . 但我點解想去旅行？好似係嗰段時間，我喺我嘅「人生一條龍」度，見到特別多靚嘅旅行相。 . 會唔會係收購嘅人，hack咗我嘅帳號，特登令我睇到咁多旅行嘢，勾起我退休嘅慾望，就賣晒啲股份？ . 我得唔到答案，甚至我做唔到咩改變，我年紀已經唔細，無幾耐，我就死咗。 . ， 死後，我變成咗一隻鬼，見證世事變更。 . 我見到，「人生一條龍」由「好少選擇」變成「無選擇」。 . 因為家長會用「人生一條龍」管理小朋友，所以小朋友自細就習慣咗無選擇嘅生活。 . ， 後來，「無選擇」變成「強制性」。 . 各國政府為咗方便控制人民，立例規管，大家要接受「人生一條龍」嘅安排，安排你讀邊間學校、做咩工，甚至同咩人做朋友。 . 隨住科技發達，到處都裝咗監控鏡頭同錄音機，監控設備亦同「人生一條龍」結合。 . 如果你唔按照「人生一條龍」嘅安排去行動，就會受到懲罰。 . ， 我好驚好後悔，我初初只係諗住賺錢，同改善大家嘅生活，點解會搞成咁？ . 不過，依加我係鬼，唔會再受到「人生一條龍」嘅監控。 . 我兒孫滿堂，佢哋都有燒冥鈔畀我，我就去地府嘅托夢部，交咗托夢費，同我個孫朗朗聯絡。 . ， 朗朗一直都知，我係「人生一條龍」嘅創始人。 . 但佢唔知道，「人生一條龍」一開始係點，甚至......個世界一開始係點。 . 我將事情嘅始末講晒畀朗朗知，佢好震驚：「即係話，我哋原本可以揀做咩工、中午食乜嘢、同咩人做朋友？」 . 我點頭，然後問：「你可唔可以幫我，令件事重歸正軌、令大家有番自己嘅選擇？」 . 「即係改變個世界？我點做到？」朗朗反問。 . 我答：「我都唔知，不過首先，你要唔被控制。」 . ， 我同朗朗商量，點樣脫離「人生一條龍」嘅控制，雖然法例規定要接受安排，但都主要係講大事，例如讀書搵工，並唔係所有嘢都強制性。 . 比如「人生一條龍」叫你今日著粉紅色衫，你著咗紫色，都唔會犯法。 . 我哋搵咗好多法律罅，打算先令朗朗習慣，唔被「人生一條龍」控制嘅生活。 . ， 過咗一個月，我再托夢畀朗朗，問吓佢咩情況。 . 點知佢好唔開心，佢話畀我聽，生活事事不順，女友同佢分手，好多朋友都同佢絕交。 . 原來，朗朗開始拒絕「人生一條龍」嘅選擇後，雖然未到違法，但「人生一條龍」都偵測到佢嘅抗拒，於是透過其他人嚟向朗朗施壓。 . 我問：「即係話，你啲朋友嘅Apps度，『人生一條龍』叫佢哋同你絕交？」 . 朗朗點頭：「一般人都唔會拒絕『人生一條龍』嘅建議，阿爺，不如算啦......」 . ， 朗朗承受唔住壓力，佢打算回復番被控制嘅生活，反正佢自細都被控制。 . 我好失望，我托夢去搵其他子孫，睇吓有邊個肯同我合作，做一番大事。 . 搵咗一段時間，有一次，我去地府銀行撳錢交「托夢費」，點知戶口無錢，原來好耐無子孫燒冥鈔畀我。 . ， 我輾轉打聽咗好耐，先知道，雖然「人生一條龍」監測唔到鬼魂，但朗朗曾經發開口夢，叫我「阿爺」。 . 「人生一條龍」偵測到，朗朗發夢叫過「阿爺」後，就企圖反抗「人生一條龍」。 . 查一查出生記錄，就知道朗朗嘅阿爺係我，已經死咗嘅我。 . ， 掃墓、燒冥鈔呢啲嘢，一向都係「人生一條龍」安排。 . 「人生一條龍」透過更改我啲子孫嘅時間表，令佢哋唔再幫我掃墓、唔再燒冥鈔畀我。 . 所以，我由一隻鬼，變成一隻窮鬼。 . 無錢，我亦無辦法再托夢畀任何人。 . ， 呢個世界，好多嘢嘅發展，都同初衷唔一樣。 . 你以為可以令世界變得更好，點知反而令事情變成更壞。 . 但即使有再多唔如你所願嘅事情發生，你總要記得，你嘅初衷係乜嘢， . 唔好被世界改變，成為一個你自己都唔鍾意嘅人。 . －完－ . #短故 #短篇 #小說 #陳美濤 #廣東話 #粵語 #tomatochan #人生一條龍

人生一條龍（上） . 呢個世界，有人好平凡，一世都寂寂無名；有人好有影響力，改變咗成個世界。 . 但好有影響力嘅人，都曾經寂寂無名。 . 無人估到得到，自己嘅未來會點。 . 正如我，依加我只係一個新入行嘅地產經紀，想開多幾張單，賺多啲錢。 . ， 我今日好開心，因為有個客買咗層樓，呢個客好爽快，睇一次樓就拍板買樓。 . 我當然對佢好殷勤，希望之後仲有生意嘛。 . 個客突然問：「係呢，你哋有無幫人買傢俬㗎？」 . 「買傢俬？」我唔係好明。 . 個客皺一皺眉：「買傢俬好煩㗎，又要度位又要揀又要等送貨，我做嘢好忙，唔想搞呢啲嘢。你哋有無得幫我買？當然會畀中介費。」 . ， 地產舖無買傢俬服務，但既然有錢賺，我自己都可以幫手嘛，仲可以同個客打好關係。 . 我好爽快咁應承咗，問個客對傢俬有咩要求。 . 「正正常常，普普通通，住得人就得啦。」個客擺擺手，連鎖匙都畀埋我。 . 我幫佢打點好一切，連床單都鋪好埋。 . 個客好滿意，畀咗唔少中介費我，亦同我做咗朋友。 . ， 後來，個客嘅老婆有咗，佢想請陪月，都叫我幫佢搵。 . 我開始思考，其實唔少現代人都好忙，唔想處理啲瑣碎嘢。 . 如果有個Apps，係一條龍咁幫你揀晒所有嘢，應該會幾受歡迎？ . 我搵咗幾個識寫Apps嘅朋友，一齊商量呢件事。 . ， 我哋發現，其實已經有好多Apps，幫人揀唔同嘅嘢，揀學校、工人、美容院...... . 但呢啲Apps都係獨立嘅，即係話，你想幫個仔揀學校，你就要下載揀學校嘅Apps，輸入你嘅資料同要求，例如你住邊區； . 聽日你想美容，又要下載另一個美容院Apps，重新輸入資料。 . 我哋要做嘅，就係整合呢啲Apps，做一條龍服務。 . ， 每個人嘅需要都大同小異，就好似你買咗樓，就要買傢俬，分別只在於你鍾意咩風格。 . 無幾耐，我哋就推出咗一個叫「人生一條龍」嘅Apps。 . 由你畢業開始，幫你搵工、買嘢、租樓、買傢俬、安排婚禮、產前檢查、產後陪月、買奶粉尿布，再幫你個仔搵托兒所、幼稚園...... . 我哋無向用戶收費，而係向商戶收廣告費。 . ， 營運咗一輪，我哋發現，「人生一條龍」最重要嘅，唔係廣告費，而係數據。 . 從用戶嘅選擇，Apps可以推測到佢嘅性格，從而影響佢未來嘅選擇。 . 例如有個客租劏房住，但偏偏揀咗一場豪華婚禮，佢好可能係一個無乜錢，但鍾意炫耀嘅人。 . 所以，佢好可能會鍾意廉價嘅奶粉尿布（炫耀唔到），但會希望個仔讀名牌幼稚園，自細就學琴學畫畫學奧數。 . 咁嘅性格，佢都好容易超支，仲可以計算佢嘅收入同支出，適當時候推薦借貸服務。 . ， 有咁精細嘅數據，我哋唔再需要硬生生咁植入廣告。 . 我哋可以等客戶需要嗰種服務，再推薦服務，客戶好可能會接受，甚至覺得好貼心。 . 而唔再係你明明想聽音樂，無啦啦有個借錢廣告彈出嚟。 . 改咗廣告系統後，「人生一條龍」嘅使用人數大幅提升。 . 有唔少新嘅商戶，都搵我哋合作，例如婚介公司，亦令一條龍服務更完善。 . ， 估唔到，用戶透過Apps中嘅婚介服務，好多人都搵到合適嘅伴侶，比例遠遠多過婚介公司本身做嘅生意。 . 可能係因為「人生一條龍」有「真」資料，即係你去搵婚介公司，大家都會將自己描寫得好正氣，愛好睇書、睇電影、行山。 . 婚介公司根據呢啲興趣，幫你介紹「同樣鍾意睇書、睇電影同行山」嘅對象，但你哋總係唔夾，因為你所謂「鍾意睇書」，可能只係睇八卦雜誌。 . 「人生一條龍」就知道你真正鍾意乜嘢，如果你成日買點數卡、睇遊戲攻略，就幫你配對鍾意打機嘅對象，甚至係玩同一隻Game。 . ， 三十年後，「人生一條龍」已經成為人人必備嘅Apps。 . 我亦發咗達，後來，另一間公司高價收購我手上嘅股份。 . 我有少少猶豫，我唔知道，一個對人民生活咁大影響力嘅Apps，應唔應該就咁賣畀人。 . 但我年紀都唔細，開始想退休，同老婆仔女去吓旅行。 . 所以，我都係賣咗股份，將公司轉手。 . ， 我環遊世界，幾年後先返嚟，有個當年同我一齊搞Apps嘅兄弟，同我講，「人生一條龍」有啲唔妥。 . 以前嘅「人生一條龍」，係畀你用最方便嘅方法，作出比較同選擇。 . 雖然個Apps會整理你以前嘅選擇，作出推薦，但你都仲可以揀其他。 . 例如你一向鍾意粉紅色衫，所以一撳買衫，Apps就會推薦你買粉紅色，但如果心血來潮想買紫色衫，都可以搵紫色衫。 . ， 但公司轉手後，「人生一條龍」提供嘅選擇愈嚟愈少。 . 你鍾意粉紅色衫，今日突然想買紫色衫，但就搵唔到紫色衫，可能要撳半個鐘，load好耐先搵到。 . 面對呢種情況，好多人會怕麻煩，買番粉紅色衫就算。 . 至於出街買衫？更加唔方便，因為大家已經習慣用「人生一條龍」買嘢，所以時裝店都少咗好多門市。 . 待續... . #短故 #短篇 #小說 #陳美濤 #廣東話 #粵語 #tomatochan #人生一條龍