【龔成問答信箱】（Q22461-Q22480）

Q22461：

老師，阿里巴巴講話警告稅率會轉變，對佢影響有幾大？

龔成老師︰

其實而個講法只係預警，暫時都未知到底最尾會發展成點。

阿里(9988)以往被視之為「國家重點軟件企業」，稅率只需10%。如果中國政府除去佢「國家重點軟件企業」質素，佢就要好一般企業一樣，支付25%所得稅。

當然，未必係佢全部子公司，都要支付25%所得稅。因為部份分部(如天貓、淘寶中國等)，本身同時受惠於「高科技企業」或「認定的軟件企業」稅務優惠，就算失去10%的優惠，都唔會一下子跳到25%咁高。

當然，會否全部稅務優惠，都全部被移除，都無人知。

若果成事，有機會令阿里每年增加過百億稅務支出，由於稅務因素，會影響集團長線盈利能力。若真的發生，估值上就有需要下調。

現階段只能說，此股現價合理，但估值有機會要再調整。在有較多不確定因素下，此股暫時不要大注。

------------------------------------------------

Q22462：

老師，我現時20歲 想問一問你我的持倉是否合理。1351 是在不理性時買入的 希望你比啲意見

持有：
3067 十四手 $均價16.48
9988 一手 $204.8
1313 一手 $7.87
1448 一手 $7.33
1351 一手 $2.7

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時20歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

現時你持有股票，都係有增長潛力和質素，你可以照持有。

當中，輝煌明天（1351）係中國的廣告公司，主要提供以下兩類移動廣告服務。

（1）中介服務：擔任客戶的廣告代理，將客戶與其指定的媒體發佈商相連接並投放廣告；該等廣告以不同形式發送，包括動態消息廣告、應用程序商店廣告及視頻形式廣告。

（2）精準廣告服務：為客戶計劃及進行廣告投放，並負責整個廣告流程；該等廣告通常以在媒體發佈商營運的移動應用程序出現的彈屏廣告等形式展示。

佢主要為客戶宣傳的5大服務或產品類別包括移動互聯網服務、移動工具程序、金融服務、手機遊戲及電商。

睇翻過往財務數據，業務都有增長的，不過盈利就有少少波動，反映好受市場環境影響，對經濟較敏感。規模較細，未見有好大獨特性。你只有一手，照持有都可以，但不建議加注。

但在平衡配置上，你有地方可以改善。現時組合，你係好偏重左係潛力股(3067, 9988, 1313, 1448)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

現有持股不用沽出，只要未來時間，慢慢加大翻平穏增長股部份，令組合回復平衡，咁就可以。

最後，我建議你把握年青，去努力學好投資知識。要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q22463：

龔成老師你好 我今年35歲，已婚並育有1子（4歲）我已拜讀你7本書籍，但對自身面對的問題仍然感到迷茫，望老師對我的情況做作指點和評價。

我為家庭唯一收入來源，月入約70000－80000。最近把所有資產轉為現金約1200萬。

雖看似不錯，但現有工作最壞情況只能再維持2－3年，之後可能只有20000－30000月入（收入不可靠進修或個人努力改變，除非創業）。

現有生活質素為租住約1200萬單位和為有車人士。兒子學費約15000一個月。家庭沒有其他特別消費。

如果希望將來生活能夠至少保持現有質素，請問老師會你會如何步處？

感謝老師指導

龔成老師︰

其實你都算年青，除了創業外，我相信你努力，都有機會找到一些較高收入工作。

以你35歲，我一般會建議先利用「平穩增值股」+「潛力股」作投資目標，做好財富增值部份。

由於你係家中收入唯一來源，在進行任何投資前，你應先儲起最少半年開支，作應急之用。

以現時大市合理區狀況，你可以先用一半資金，慢慢"分注"買入優質股。餘下一半，就等大跌市機會。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

但若果你真係預期用盡方法去開源節流，未來都有好大機會，長時間出現入不敷支的狀況。你可以將部份資金，用來買收息股，去補助你每月現金流。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，每個人都有自住需要，建議你長線都要計劃添置一間自住物業，以免受租金波動風險所影響。

------------------------------------------------

Q22464：

您好龔sir,我想請問下3868信儀能源,2号公報業績,想請教您有何見解,謝謝

龔成老師︰

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。

而佢派息高的，因為管理層話會用高派息政策。

投資價值都有，但不能投資太多，因為佢業務都有風險的，要注意股價波動，如分注長線都可以投資。現價已經係略貴，回多1,2成才好開始小注。

------------------------------------------------

Q22465：

龔sir , 想請教下你既投資部署。我老公早年買股票損手，虧蝕了好多，現時佢投資組合以下，想你比比意見。

佢40歲，月入12萬左右，佢行業黎緊有些不確定性，帶機會帶來重大變化，有一層剛買的自住物業 ，月供23000左右

3878 420000股 平均成本3.4
1833 400股 平均成本97.4
3808 4000股 平均成本13.5
6060 2100股 平均成本29

9988 1000股 平均成本180
3067 200股 平均成本15.9
1024 400股 平均成本120

有100萬現金在手 ，想拎其中30萬再投資股票 ，以上股票需要減持d嗎？ 另外建議買咩股票較理想？或者建議投資什麼？

龔成老師︰

首先你要明白，我地唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

近期中央不斷有新政策出台，令大市氣氛轉差，不少股票都出現大幅回調。但我地要考慮地方，唔係佢跌幾多，而係D企業長線質素，有無被影響。

睇翻你老公持有股票，全都都係有質素，而且整體買入價，大致都係合理，都唔見質素上有明顯轉差，可照持有。

但要留意翻，以下幾個重點問題。

首先，較大問題係VICON HOLDINGS(3878)，佢主要於香港及澳門提供地基工程及配套服務，此股市值唔高，每年盈利都只是1至2千萬。

這企業唔係話無質素，但始終規模唔大，你預佢股價會較波動，此股不宜太大注。

而且，就算一隻股票再優質都好，我地都唔好太偏重係佢身上，成個組合要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

現時這股佔組合太重，必需要減持部份，換至其他優質股上。

另外，眾安在綫(6060)、平安好醫生(1833)盈利能力未穏定，甚至係未有盈利。唔係話佢地無投資價值，只係不確定性較高，不宜持有太多，暫時唔好再加注。

最後，你先生而家組合，太偏重左係潛力股(全部持股都係)，佢地雖然有增長潛力，同時風險都較高，不宜持有過多。

以你先生40歲年紀，潛力股可佔約4成，餘下應用以下平穏增長股。若你先生投資經驗較淺，潛力股比重，要再調至2-3成以下。到他學到一定投資知識，才慢慢調高。

但唔需要沽出現有持股，只要未來時間，你先生慢慢加大翻平穏增長股部份，去令組合回復平衡，咁就可以。

你現時個30萬和沽出3878資金，可以分注買入以上平穏增長股，它們現價都合理。餘下70萬，我地就等大跌市出現，才去入平貨。

------------------------------------------------

Q22466：

你好龔Sir！唔好意思打攪您，有d投資分配上既問題想請教您。

本人32歲單身，月入月50K，沒有太多家庭負擔。2017年同家人合份於觀塘月華街買一50+年齡頂樓單位作收租投資，用本人一人名下購入，最近租約將到期，

現在家人結婚想自己另外買樓，需要資金，正考慮將觀塘單位賣出同家人分拆，抑或買下家人果一半業權

考慮因素包括：

-本人大部分資金現在壓係股票上大概120萬
-如果買下另一半業權可考慮賣出部分股票定將單位作按揭換取流動資金去買呢
-舊樓頂樓存在滲水甩牆漆等問題，日後長期維修保養手尾多
-觀塘現在正重建，亦都有大型新樓落成，該舊樓單位會否有升值潛力呢
-抑或賣出單位再物色另一個，或換得流動資金買股票好呢

以上希望聽下您意見/建議哦！感謝您！

龔成老師︰

觀塘因為坐落東九，政府計劃將來將東九發展成一個大型商區，附近地區樓價必然有一定支持。

但問題係你間屋已經50+年，又出現較多維修問題。如果保留放租，長線你維修成本，可能會慢慢蠶食你租金回報。

50+年樓本身已經較難做長期按揭，對新買家吸引力都較弱。

而且現時市況，優質股值博率明顯較高。因此，我偏向建議你沽出物業，套現去投資優質股作增值，相信會較好。但現時大市只在合理區，資金唔好盡用，要留少少等大跌市機會。

當然，如果你此期間，發現有質素又超值的旬盤，你都可以用套現資金去投資。

------------------------------------------------

Q22467：

龔sir，睇左你專頁一段時間，遇到跌市，心境比從前平靜多了，可以不用常常看股價，但看到數天的波動，不禁有點擔心，雖然已留有現金待入貨，但手持的股票跌了一半有多，應該繼續持有嗎？

788 @ 1.49
2126 @34.6
2131 @ 9.6
3908 @ 18.9
6618 @ 111

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。如果想組合增長力較強，可考慮上翻D，部分轉其他。

藥明巨諾（2126）、云想科技（2131）、京東健康（6618）都是有風險有潛力類別，這類股，你要有心理準備上落大，不宜持有太多。

中金公司（3908）質素算是不差，增長力都有。

業務包括投資銀行：提供股權融資、債務及結構化融資、財務顧問（包括併購、戰略聯盟及公司重組等）及新三板服務。

以及股本銷售及交易：包括經紀業務及資本中介業務。

固定收益、財富管理服務、投資管理都是佢業務。

佢主要在中國國內經營業務，亦在香港、紐約、倫敦及新加坡設立網絡。

其實佢不是無生意，盈利都有，增長力都不差，可持有。

------------------------------------------------

Q22468：

龔sir, 我係投資新手，之前$380買了1手美團， $290入左1手阿里巴巴，已經跌左3，4成，到底我應該點做好？ 唔想止蝕，但我又唔急住套現，但想問你覺得呢兩隻股質素如何 ?

現時投資策略又應該點做？應該分段買入溝貨定係買下其他股票平衡配置風險? 儲蓄還有大概40萬現金左右

如果買入其他股票又有什麼建議？

還是投資美股etf 仲好？

同埋都想知港股開始進入熊市未？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，你一手就守住先，但預佢上落大。

至於阿里（9988），買入價貴，暫時只有守住先，之後會好翻D，但要上翻去，要耐心。

美股港股，最重要是尋找優質股，中資股雖然有政策風險，但如果捉到政策方向，反而可變成好有利的工具。

至於牛熊，現世代的作用已大減，你集中分析「企業長遠質素」就得。

------------------------------------------------

Q22469：

龔sir想請問隻1024快手点睇？本人2OO買入，点解好多股票跌咗多年都冇法升返以前价位？係咪唔識唔好買股票？

龔成老師：

如果投資經驗不多，應該考慮一些較穩健的，例如ETF、港鐵（0066）、恆基（0012）等，快手（1024）是較高風險類，估值好難，所以股價上落大，如果持貨多，可能要減少少，如不多，就守住先。

但佢不是無質素的，佢係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍未平，可稱為合理區中上部至頂，但短期股仍會十分波動。

------------------------------------------------

Q22470：

老師 的想問關於存貨周轉率 跟返進階班第三課 文字版資料 六福銷售成本應該系7910751除平均存貨8427334=0.94（次）之後

存貨周轉日360除0.94=383（天）但系另一份筆本第30頁，顯示存貨周轉日系274日 是不是我計錯左條數，

另外我想問問銷貨收入，系邊一個部份，可以搵到呢條數，唔該哂呀sir

龔成老師︰

你計算係正確，用我上堂教的方法，答案會係383日。而274日係中銀網資料，佢提取存貨價值的模式，同我上堂的有不同。

如果你有留意1,2堂，我都有提翻同學，其實網站有時個計算方法，或者提取資料等，有機會各有不同，所以會出現誤差。

所以，你最好只係作參考。要較精準地計算一些數據，有時係要我地自己動手計算，才可以得出較有意義的數字。

"銷貨收入"一般就係指你個"營業額"，你可以係損益表中找到。

------------------------------------------------

Q22471：

龔sir ，最近有件事比較煩惱，現時自住樓已供完，銀行估值約$450萬（河畔花園），小妹一直都想住村屋 可以種植物，又無特別要求那區（工作九龍區），但都想住近d市區。

Sir你可以建議那些地區村屋比較有增值或環境比較理想，和我應該如何做按揭？應該fullpay 或比首期？

龔成老師︰

你可以考慮在沙田區找找，當中都有一些村屋的，相信會較適合你，你可以睇下當地的地產代理。第一，沙田這區我睇好，第二，近你現時的地點，第三，近你九龍返工。

住村屋的人，一般都係希望有較好環境，或者入場費架平的人。你預增值能力唔會高，如果交通較便利和接近市區，會係一個加分位。

但留意買村屋有好有壞的，好處是村屋除了呎價較低外，實用率一般達9成，比較實用。而且，適合飼養寵物或值物人士。

但村屋要注意的事項比較多，村屋不設入伙紙，只有滿意紙，而買入前要確保有滿意紙（因為不少村屋是個別業主自己興建，質素存有疑問，是否有滿意紙都未知）。

同時，村屋可能涉及丁權、地契等複雜問題，甚至有過路費、業權、僭建等問題，買入前一定要了解清楚。

此外，連天台或花園的村屋，要清楚是否入契。

至於按揭方面會較低，一般60%至85%不等，成數不及一般的住宅物業，買入前要預較多首期，更由於成交疏落，銀行估值可能會較低，買入前一定要做估值，而按揭年期最高為25年。

而按揭成數，愈高愈好，因為而家借貸息率低。你應該盡借，再用空出資金去作投資增值，咁會較理想。

------------------------------------------------

Q22472：

龔成老師你好，首先想多謝你一直以來為眾多位讀者解答問題和鼓勵我們，多謝你。

本人37歲，已婚，月入2.8萬，太太月入1萬，每月儲現金$10,000,基金供款共$4000, 其他開支14,000.

基金現金價值70萬，現金儲蓄5萬，股票26萬。(分別阿里巴巴20萬, 中國鐵塔2萬,建設銀行3萬，保利協鑫1萬)

我有幾個問題想問的:

1. 發現基金操控上得不到最大利潤(有大約20%增長)，有需要放手兑現，作其他投資嗎？

2. 如果現階段想買樓兩公婆住，又應該如何部署？買樓後，是否不能做到財務自由？

3. 另外父母在內地有物業，想兑現，但疫情關係又唔想親自上去，有什麼辦法作買賣？然後又如何把錢帶回香港？

先多謝老師的耐心解閲，萬分感激。祝身體安康！

龔成老師︰

1) 你可以衡量基金的投資策略，所投資的資產類別、投資策略、風險程度、市場、費用成本、

以及過往的表現(可以睇佢過往5-10年，如果回報係比主要投資市場高，才值得繼續投資)。

2) 其實我地做財富增值，就係儲優質資產。物業都係其中一種。每人都有買自住樓需要，否則就要一直承受租金變動風險。

但如果你要資金盡用，去買物業，就會令你成個財富組合，偏晒係物業類，咁係唔理想。

最好係你用優質股，再累積更多財富。到你可以置業同時，留有一定優質股增值，和每月供樓後，都能留有一定資金作投資，才實行置業大計，咁會可以維持增值能力，以達財務自由目標。

當然，如果你實際生活上，係有必要即時置業，你都可以入市，只要長線肯定係可以"供得起"，咁就無問題。

3) 內地物業買賣程序，我無研究。

------------------------------------------------

Q22473：

老師，我個仔剛出世，想幫佢用佢嘅利事錢買隻股票，大約5萬，放十年，有無咩介紹？ 謝謝

龔成老師︰

小朋友由於可投資時間長，策略上十分簡單。你可以儲指數基金，盈富(2800)、美股的VOO都得。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

------------------------------------------------

Q22474：

多謝老師之前回覆，我有少少地方唔明想問清楚少少：

（1）我查左個貸款息率大概1.3%左右，最多可以拖長到十五年還，咁我即係應該拖到最長黎還，中間就攞自己既人工去投資，

但係要記得留定一筆錢用黎做後備資金喺需要既時候還款？

（2）估值部分你話「而重點係佢當年有一部分虧損，來自終企業務」咁係咪即係如果做估值果陣見到有個唔尋常既數字，就應該搵番果年既年報仔細睇清楚原因？

（3）如果想用評估表做外國既股票估值有冇乜野特別需要注意既部分？定係同香港公司一樣睇番份年報就可以？

再次唔該阿sir幫忙睇左份評估表同埋詳細解釋！

龔成老師︰

1) 這個利率很低，有一定值博率。還款年期，你用最長15年。

現時大市在合理水平，你獲得資金可分注入市，但要保留3-5成資金。唔係用來還款，而係用來等大跌市時機，去入平貨。而每月還款，你就係每月人工中預留一筆現金，去支付。

至於投資邊類股票，你就睇翻自已投資經驗和風險承受能力。較高的話，可投資"平穏增長股"，較弱就投資"收息股"，或者你從2者中取個平衡。

例如收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

2) 無錯，這一點很重要。其實你係年報，發現任何異常數字(特別係個數字都大)，我地一定要了解當中原因，才可以做出一個穏妥的估值。

3) 大同小異，睇年報都係差不多做法。但當然外國市場和文化，始終都會同香港有所不同，係評估一間企業時，都要多了解數字以外因素，以免決定出現偏差。

------------------------------------------------

Q22475：

你好，龔sir。我現持有︰

中海油（2000股）
小米（600股）
VESYNC 1000股
安碩恒生科技 400股
朝雲集團 500股

現股市不穩定。應減持或增持？謝謝解答

龔成老師︰

你要記住，投資唔好受大市氣氛影響，你要客觀分析。到底隻股票，係下跌同時，佢長線質素有無變差。如果無，下跌反而係造就我地入平貨機會。

你現時持有股票，雖然近期有較大回調，但唔見長線投資價值，有明顯轉壞，你照持有就可以。

VESYNC（2148）有少少潛力的，但不確定性高，不宜大注。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。所以投資時，同樣不宜太大注。

------------------------------------------------

Q22476：

老師早晨，我有34000股互太，均價8.67，轉倉去朗廷1270係咪更具值博率

原因互太是高位入，即使疫情完結，我諗去返高位既機會好低

反而朗廷因為疫情同社運，跌到0.98，疫情後股價更有機會去返疫情前水平（唔係高位）

老師，1448去到$7.03，你係咪會加注？

同埋1448去到幾多先算平？我計合理價係6.4-7.5

龔成老師︰

互太紡織（1382）這股不差的。佢主要從事紡織產品之製造及貿易。

朗廷（1270）係香港持有酒店的投資信託，重點位於亞洲的已落成酒店，現時酒店組合包括香港朗廷酒店、香港朗豪酒店及香港逸東酒店等。

現時股息率計(1270用2019年股息率計)，朗廷（1270）值博率係較高。

以上2隻都係收息股，我地持有目的係收息，為自己創造穏定現金流。這類股票，比較適合年長/己退休人士，或者風險承受力較低人士。

如果你係較年青，這2隻股票，都唔適合你。

另外，雖然朗廷（1270）現時值博率係較高，但我地唔會因為咁，就將互太全部換晒去朗廷個邊。我地要做個平衡配置，唔好令成個組合偏重係個別幾隻股票身上。

所以，如果你想投資朗廷（1270）的話，你可以將部份持股，換碼過去，但唔係全部。

福壽園(1448)現價在合理區頂，如果你有貨，建議等佢回多10-15%倒，才加下一注。

合理價你計算都接近，你預大約HKD5.5 - 7.5左右。

------------------------------------------------

Q22477：

龔sir，我係股票班學生，我快速計左一下700既合理價 可以俾d意見嗎

我用7年數據︰

2014 35.93市盈 3.23EPS
2015 39.51 3.71
2016 36.04 4.9
2017 31.33 8.97
2018 40.43 9.46
2019 31.14 10.96
2020 27.42 18.37

我將七年市盈由細到大排 然後計中間三年即係 31.33-36.04，至於EPS果到 應該要點拎好。

因為佢個波幅都大 如果take7年 average 就計到 8.51就係 合理價266-306 好似有啲離地

然後我去中銀個網 搵吾同機構對2022既預測EPS 拎機構入面預測EPS最低果個14.81去計合理價，計出為 463-533 好似合理d

龔sir, 想問我甘計有無問題 希望可以指教下

龔成老師︰

你市盈率計法，可以就用這個3年數字(31.33-36.04)。

而EPS，由於企業和行業本身，都係近年才快速增長，因此我地會拿近少少，5年平均EPS作基礎會較準。因應佢增長潛力，上調多25%左右。

再加上10%緩衝區(這個課堂有教，唔記得係乜，就要溫翻初班第5堂SLIDE26)，合理值大約係︰HKD373 - 547。

至於機構預測，你都可以作為參考，睇下會唔會同自己答案差太遠。如果有太大落差，就要找出原因。

------------------------------------------------

Q22478：

龔Sir你好，最近對於複利有d問題諗唔明，希望你有空可以解答

複利係指一隻股票收到的利息再投資返係同一隻股票，咁如果我哋手動做股息再投資，應該點做？

假設一:
我有一隻A股票每個月月供緊1000蚊，而今個月收到500蚊股息，咁我係將呢500蚊係下個月再加落月供度，變成1500蚊去供A股票？咁我第三個月又變返月供1000蚊？

假設二:
咁如果我長揸緊既股票，並無做緊月供，咁我每次收到既股息應該點做股息再投資從而產生複利效應？

謝謝回答！

龔成老師︰

1) 唔洗咁複雜，你月供金額可以不變，只要另外將新收到股息，再買翻股票，就會有複利效果。但有時個股息不多，你可以儲起先，等有一定金額才再買貨。

2) 長揸和月供都無分別，收到股息先儲起，夠1手，而當時價格又合理，就再買。其實成個做法，都係一樣。

可能你會想問，有些股票佢係零派息，咁係唔係就無複息效果呢?

答案︰唔係。因為除了派息再投資外，企業賺到錢，將這些資金重新投入在業務上，都會有複息效果。

當然我地都要考慮翻，企業不派息，去為本身業務再投資，到底係唔係有更高效益。如果係有，就有投資價值。如果再增值效率不高，其實佢派息，才代表管理層做法理智。

------------------------------------------------

Q22479：

龔Sir你好呀。我有計劃明年年中移民,因稅務問題可能要在離開之前賣清股票，以往一直跟隨龔Sir教既方法長期投資

今年年初自律性低左買貴左新經濟股,所以你見到我坐住左幾隻，現在市況唔穩定,心裡其實有D壓力。所以想問問龔Sir我用咩策略去賣清D股票比較好

Current Portfolio

5 - 1,200 @ Avg 51.25
11 - 300 @ 114.91
27 - 4,000 @ 43.79
241 - 2,000 @ 22.05
285 - 2,000 @ 8.58

388 - 200 @ 190.36
700 - 200 @ 587.69
868 - 2,000 @ 7.79
1211 - 2,500 @ 40.05
1317 - 48,000 @ 2.59

2158 - 400 @ 49.63
6618 - 200 @ 136.58
8083 - 8,000 @ 3.57
9988 - 500 @ 241.3

多謝指點龔Sir!

龔成老師︰

其實買新經濟股唔係唔得，只要你唔係近退休人士，按自己年紀和風險承受力，作出合適配置，咁就可以。

但由於你明年中就要移民，需要清空持股。因此，你現時唔好再入貨，反而要慢慢開始分段沽貨。

唔好等到走個一刻，先一次過沽，因為無人知個陣個市，是好是壞。所以，你要分段咁沽，去平衡價值波動性風險。

你不要著重那一個「賺蝕數」而決定留或賣，是重要考慮質素，上述的股票，較高風險或質素較一般的，要先賣出，例如醫渡科技（2158）、中國有贊（8083），另外，另外的，可以分段去賣。

------------------------------------------------

Q22480：

Ar sir, 近日港股市場下跌好大輻度，科網股還有長線投資價值？3690同9988前景質素如何？

想詢問現時700,1810,3690,9988四隻論值博率，邊隻好？

龔成老師︰

近期受中央政策和大市氣氛影響，不少科技股都有較大回調。但我地要睇翻，這些政策到底對相關科技股，有無造成長遠影響。

美團(3690)和阿里(9988)都受反壟斷政策，造成不同程度的影響。你預中短期會較波動，但長線相信這些企業，適應了相關法規後，會慢慢轉好。

因此，若你有持貨，可以照長線持有。但美團(3690)始終不確定性較高，不宜佔組合太大比重。

至於"輪"這類短炒工具，我唔建議你買。因為中短期股價，受好多因素影響，基本上係無得估。所以，我建議你買正股，作長線投資會較好。

而正股值博率，以現價計騰訊（0700）和阿里(9988)係會較高。而小米(1810)和美團(3690)就相若，但質素上小米(1810)會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17301-Q17320）

Q17301：

Sir, 我係股票班舊生, 用阿Sir這8堂所教知識去分析了1830/必瘦站（包括跟同行比較～發現必瘦站比2138及1827更有發展及優質, 之後填寫6張企業分析表）覺得此企業屬於優質股。

～分析如下（有時間慢慢睇, 唔使急， 謝謝🙏）

目標客戶以中產以上人士為收入來源（屬中高檔次, 有能力將成本轉嫁給客人）睇過他們過去5年的年報, 發現他們現金流非常強，而財務穩建, 沒有向銀行借貸。

營業額～ 除2017年（-13.89％）2016 2018 2019都有增長， 當然2020年疫情下仍然有4％增長已經算係唔錯。

1）管理層積極進取, 拓展海外發展（包括2020年2月在澳洲開業, 表現理想,

2）還想在今年進攻美國美容市場）。但疫情下可能會較謹慎考慮開店舖問題 （或者趁疫情下以平價的租金買或租舖, 去發展美國美容業務）。

3）另外, 亦看了2019 2020 年報， 他們都積極發展大陸市場（包括大灣區）

但集團仍然以香港為主要發展重心地區。

4）至於男士美容業務（講了2年仍沒開始, 可能待2021年才推出）

5）流動比率～過去5年介乎177％～205％（合格）

6）ROE～5年內有增長， 今年53.04％

7）總負債/股東資金比率～今年91.35％ 算合格嗎？過住4年51％～74％

8）投資活動～ 過去5年都有投資發展企業（例如擴充香港及澳門/中國業務）（租舖/買機器/增加員工人手。。等等）

9）其中評估表內（估值～行業市盈率）

我以2138/香港醫思醫療集團的市盈率（12.43～12.85）及1827/卓珈控股的市盈率（28～30）比較, 好似太高, 所以用回必瘦站市盈率（7～9）

過住市盈率～亦以（7～9）

推算合理市盈率～ 以8～10計算估值, 所以推算約$1.44～2.20（這個股價合理區範圍正確嗎）如有錯請賜教！

必瘦站應該不屬於資產型企業， 所以市盈率及市賬率分析應對其分析平貴指標作用不大, 對嗎？

預估下年派息會減少, 因為疫情可能負增長（中國/澳門及澳洲）,但香港營業額應該不會太過差

最後發覺分析1隻股票, 起碼7至14日時間（包括睇年報, 所以我非常佩服你）。 必瘦站的年報算是簡單, 如果地產/銀行或大型企業, 肯定要1個月時間。

非常感謝你細閱以上分析, 已將8堂所學的僅餘嘅投資分析及知識盡量發揮。

龔成老師：

你的分析不錯，基本上已掌握了課堂所學，並講出了重點。

1）2）3）佢的發展方向，以香港為重心，並同時會發展中國，相信中國是其中一個管理層會重點發展的地方。

但由於管理層由的表態曾經出現反覆（你睇佢多年年報的管理層講話就明），過往一直用高派息政策，反映發展心態唔算強，但都會發展。

到近年，曾經表示想大減派息大力發展中國市場，最後，派息後保持高水平，有時都難以完全掌握管理層的方向。

4）暫時唔好有太大期望。

5）6）7）對，合格。但由於高派息比率，ROE無反映到再投資回報率，因此只反映原有資金回報率。

8）相信佢仍會保持發展。

9）你的方向正確，我會比你估值計算出的高少少，主要因為現金流強，派息高同時仍有增長力。加上佢就算在疫情期間，都無虧損，這點令人有驚喜。

另外，由於之前派左大額股息$0.34，因此我地計算出來的估值後，都要減翻相關數目，以反映企業現金的實際流出。

大約$2.X是合理區，去到$1.7以下是平。

------------------------------------------------

Q17302：

疫情人工黎緊幾個月都要減四分一，開始迫我面對之前一直打算做既網上小店副業同埋真係報左幾個課程增值自己。

同埋我更清晰自己一直只有打工都係死路一條，人要多把刀比自己用。性格問題囉，我最討厭停滯不前既感覺。

但萬事起頭難 ，岩岩起步又要儲stock ，要用啲資金。唉 ，好多不確定令我開始有擔心既感覺。

幸運既係 仲有份工頂住，

前兩年我睇過相，批過命 ，又話我無股票運 又唔好同人夾份做生意，所以呢句野一直有啲影響我...好既係我無再玩短炒。

龔成 我都係80後 你真係好叻又努力。無㗎，我單純想呻下 ，我諗你都睇過秘密呢本書 ，我相信呢種力量。加油！

龔成老師：

加油！我地總會面對困難，而我成日同自己講，困難是我令進步的因素，短期當然會辛苦，但長遠反而更加好。

最重要是保持進步，同時要對自己有信心。

《秘密》這書當然有睇過，我的書都有講吸引力法則，因為這的確對我地有影響。網上小店保持發展啦，好多野要試先有答案。

------------------------------------------------

Q17303：

老師，因隻932而差點永不超生既我。因為最近既疫情問題反而令我增加了收入，現在手上既流動現金差不多有十多萬，想捉緊今次機會突破返，將失去既時間同金錢追返晒。

但因為國安法，而中美又會產生太多不明朗因素恐怕引發蝴蝶效應，所以近期前我都未會採取買入資產既行動

想請問老師意思，呢段時間除左留有現金外仲應該要點準備機會來臨？

龔成老師：

順騰國際控股（0932）生意無增長，年年虧損，加上2019年的核數師意見有少少問題，這都反映企業本身的投資價值唔高。你要多從企業的角度去分析。

你唔好太著重中短期分析，唔好太著重事件的分析，要著重翻企業的價值，以及財富組合的配置。同時要長線投資。

現時的大市，你唔好100%現金，雖然有些版塊熱炒，但同時有些版塊較合理，只要你以分注投資進行，仍是可以的。如果你擔心，就唔好入太多貨，但唔能夠無貨。

------------------------------------------------

Q17304：

老師你好，恕我冒昧想問一下關於我的狀況如何投資。

我4X歲，月入$35,000，剛離婚要自己搬出來，暫時租住朋友一間的房屋月租$15000，每月可儲蓄大概$7000

打算短期內購買一間500多萬的房屋，手上流動資金大概10萬元，請問我應該如何部署往後的資金？

龔成老師：

如果你想買一層$500萬樓，就算9成按，都要有一定的金額，你要盡力加大儲蓄，希望每月可以儲到$1萬以上。

你要計算計自己打算幾時買，如果中短期，就未必適合將資金投資，如果是中長期，資金就可以適度投資，但都要投資較穩健的股，平穩增長型，如盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q17305：

你好呀，我一路以來都追開你嘅書 係你嘅fans 呢一兩年都有參考著你嘅書投資 首先想講返聲多謝 因為睇完你嘅建議再去睇年報 最尾成功係比較平嘅位買入恆基兆業

呢排自己睇到金沙中國價錢都嘅吸引 市盈率係15-16咁又見金沙城洒店改建嘅倫敦人就開幕 覺得有潛力 想慢慢分注買入 想問下你嘅意見！唔該曬

龔成老師：

恆基（0012）有質素的，不過增長力比過往減左少少，但長遠仍有投資價值。

至於金沙（1928），現價合理，中短期這股會較弱，始終疫情令佢生意影響，但我地投資股票一定是睇長遠的，因此這股可以長線投資。現價有投資值博率，全注已可以。

但都要同時留有現金，唔好心急用盡資金。

------------------------------------------------

Q17306：

龔老師你好，本人47歲，從事電梯維修判頭，太太家庭主婦，有2幼稚園小孩。本人因上年中風、所以現時身體影響工作。不能夠長時間開工。本月收入不太穩定。

現租住近女兒學校荃灣市區3房單位，租金$18000。早幾年放售物業約5百萬現金。暫未有上車。

現手持5百萬現金，應該買入那些收息股可用來幫補家庭開支及租金？ 謝謝你

龔成老師：

由於你收入唔穩定，加上有一定的家庭負債，投資唔建議進取。持有的$500萬要小心運用。

你最好以「低風險，穩陣，現金流」為資金配置的主軸。你可以將這$500萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

另外，小部分投資盈富（2800）都可以，而收息的ETF，如ＧＸ恒生高股息率基金（3110）都可考慮。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$500萬資金，平衡地分配在上述的項目上，對你來說是最好平衡風險，同時有穩定的現金流。

如果你能承受到小小風險，就可投資較多平穩增長股，即是銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。這部分要睇你的家庭情況，以及風險承受能力決定。

------------------------------------------------

Q17307：

老師你好！我準備24歲，月入$25000，手持現金33萬（先前用來作定期存款）。而今年開始每月月供匯豐股，每月$10000，已供半年，最近亦開始接觸股票。

而我看到老師在fb都建議月供盈富，我是否應改變現時月供匯豐？

另外，現時想開始學習買股票，應如何入手？以及現時有什麼有質素的股推介？謝謝你！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）以你的年齡來說，並不適合。你應該先投資盈富（2800），月供可以。如果有能力，就加少少其他股，甚至潛力股，但如果選股能力不強，就暫時供盈富先。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。你可以睇《股票勝經》或上堂都得。

------------------------------------------------

Q17308：

你好，本人29歲，有穩定職業，月薪約四萬，扣除開支後大約可月儲二萬八千，現時大約有儲蓄八十多萬。

請問如想盡早開始投資股票的話，應該選擇那些股票呢？

本人屬於低風險和保守的性格，每月投資股票應佔每月可儲收入多少成呢？謝謝。

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，加上你是較低風險，因此這刻不用急著投資潛力股。你可以集中在平穩增值股先。

你可以自行分注或月供，每月預算大約投資$15000。

你可以考慮盈富（2800）$8000。

另外再加幾隻（每隻$3000）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於現時的$80萬，暫時只能動用$20萬，分注投資上述的股都得。

------------------------------------------------

Q17309：

龔老師,我係投資新手 想打算用15萬去投資收息股 想買中銀香港,長和,中國神華,中移動呢4個 分散投資好定係買晒其中一個好呢?

龔成老師：

分散是較好的，因為你並不是「賭」某一股的表現，而是要建立一個組合，要做好「配置」。

你可以投資中銀香港（2388）、長和（0001）、中移動（0941），都是可投資收息的股。神華（1088）業務有潛在波動，以長遠收息的角度，未必是最適合。

另外，你可以同時考慮香港電訊（6823）、置富（0778），都是不差的收息股。

------------------------------------------------

Q17310：

想問如何計算便宜的價格去買股票？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q17311：

老師你好，想請問如果我想月收股息15000

我以家30歲每月只可用2000黎供股我又咩都唔識咁我供哂盈富基金先同埋想學投資又冇時間想堂咁淨係靠睇書得嗎老師有咩書可推介比新手睇?

因為我住離島以家有個女又好困身以家暫時都係買電子書睇咩都做唔到。請老師指點迷津

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你這刻應著重「增值」。

其實你這個年齡，仍是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以先增加知識，可以不斷睇書，《股票勝經》是很好的入門書，你睇完這本再睇其他。

------------------------------------------------

Q17312：

龔成老師，你好 我係你以前股票班的學生，我睇左你本新書《5年買樓4部曲》，覺得老師你分析得好詳細，好活學活用。

我同我女朋友拍拖6年, 打算兩年內有結婚買樓, 我地兩個加埋月入HKD65k, 暫時有HKD1.7m liquidity cash，用作首期及裝修費。

我地亦問左銀行做初步審批按揭，可以做到9成按揭同買700萬左右的樓。因為我地係初階投資者，prefer 大型屋苑/ 藍籌屋苑，有升值潛力，實用面積大概300-400呎，比較鐘意海景。

由今年4月份開始睇樓, 包括大型藍籌屋苑 e.g. 黃埔花園, 將軍澳新都城, 南豐新村, 德福花園, 淘大花園等等。

睇過咁多屋苑, 我地prefer大角咀港灣豪庭, 港島南區置富花園同將軍澳中心. 三區都算近返工地點(中環/ 鰂魚涌), 同返娘家(西環)都比較分便. 想問龔成老師會點選擇?

以下係本人少少分析, 請老師作出指點:-
大角咀港灣豪庭優點:-

- 樓齡17年, 唔算舊
- 位於大角咀, 鄰近栢景灣, 維港灣, 帝柏海灣等豪宅
- 屋苑樓下有個小型商場
- 部份單位有海景
- 鄰近返工and 娘家 (20-40 分鐘車程)

大角咀港灣豪庭缺點:-
- 位於港鐵奧運站同南昌站中間, 交通不算太方便, 由港鐵站往返港灣豪庭需時行10-15分鐘, 中途全程露天步行
- 鄰近九龍殯儀館
- 要買生活必需品要過旺角/ 奧運
置富花園優點:-
- 景觀開揚，部分會有海景
- 比起市區呎價平
- 未來會受惠於南港島線北段(華富站)
- 鄰近返工and 娘家 (30-45 分鐘車程)
- 校網唔錯

置富花園缺點:-
- 大廈外牆正進行維修, 要額外分期灘還到2022年第一季，入住初期要忍受環境差
- 樓齡41年
- 交通往返其他地區遠, 冇會所
- 華富邨將會重建，會影響將來的海景同重建時會影響將來的居住環境

將軍澳中心優點:-
-樓齡較新 (17年樓齡)
-有會所
-交通方便, 鄰近將軍澳站
-鄰近大型商埸 (i.e. PopCorn), 容易買生活用品

將軍澳中心缺點:-
-人口稠密度高
-返工放工等繁忙時間港鐵超多人
-如果港鐵有任何事故, 出市區比較困難
- 離娘家(西環) 比較遠 (45-60分鐘車程)
- 校網一般
仲有兩條問題想請教老師

Q1: 我地prefer買有升值潛力, 會考慮受惠於南港島綫（西段）的樓盤, 知道老師推介田灣, 但係該區單幢樓比較多同樓齡比較舊, 請問老師有冇推介既樓盤? 如果冇, 置富花園會唔會都係一個唔錯的選擇?

Q2: 根據我地現時睇樓既經驗, 比較好的樓盤通常一個月內賣出, 所以議價空間比較少,賣出價一般都比銀行估價高少少。我地應該等市況靜D再壓價, 但係又擔心等等下樓價又升, 定係貼近銀行估價都可以買樓?

龔成老師：

1）就上述的3個屋苑，置富花園及港灣豪庭較好，始終對你的方便程度較高。

兩者中，港灣豪庭的升值潛力會高D，至於置富花園，由於就算將來起南港島線西段，相信都唔會經過置富，只會行下面的華富。

但如果只考慮方便你自己的程度，可能置富又會好少少。

中短期維係問題唔好太在意，最重要是睇長期。

另外，你可以睇下黃竹坑的金寶花園，雖然不是大型屋苑，但近黃竹坑地鐵站，加上將來隔離會有商場，生活配套會慢慢齊。不過呎價都唔算平，但你可以睇睇。

2）如果你可以等得，最好是耐心少少，但你要睇多D盤，要有心理準備有D盤會無左，但有耐性是較易買到好野的。

但現時樓市唔跌，的確較難買到平野，所以只要你認為合理價，有得平少少，都可以考慮。

------------------------------------------------

Q17313：

老師你好，本人買股票已有十多年，不過都係蝕嘅多。
目前的組合也不樂觀，所以想請教你怎樣處理現時的股票。

年初時好不容易才等到2899紫金礦業返到家鄉，放出後以83蚊買入1000股823領展，目前仍持有中，該長線持有嗎？

另外還有以下股票：

9988阿里巴巴 100股，買入價176
3323中國建材 10000股，買入價12.7
1618中國中治 10000股，買入價4.97
1333中國忠旺 25200股，買入價5.85

想問下以上除9988外、其他點處理好、該止蝕轉換成其他股票嗎？謝謝！

龔成老師：

阿里（9988）可以長線。至於領展（0823），有質素的，可以守。

至於另外的3隻，質素與增長力都不算好高，雖然不是劣質，但持有的價值不是好高類別。

中國建材（3323）如貨不多，可守，但預佢增長力唔強。中國中冶（1618）長遠應該賣出。中國忠旺（1333）長遠都應該賣出，但由於不是零質素，因此唔一定要立刻賣，可以等上翻D先。

長遠來說，你應該轉換成更優質、更高增長力的組合。

你有三大問題。第一，選股能力不強，你要考慮企業在行業裡的優勢，以及長遠行業的發展力，唔好只著重當刻的情況。

第二，太過著重買入價，其實你應該著重資產質素，要建立平衡與優質的組合。

第三，無用平均的買入方法，除非你掌握到企業估值，否則，以平均入市的模式進行，這樣能有效減少買入價的風險。

------------------------------------------------

Q17314：

老師，我從上年八月開始買入領展的月供股票，現在佢既市盈率係負數，咁我應唔應該繼續供落去呢？謝謝老師

龔成老師：

我地投資股票，就是買入企業，唔好太著重中短期因素，要睇長遠的企業質素與發展。

領展（0823）有質素的，中短期香港地產市道當然較一般，但長遠仍是正面，增長力或者不及過往年代，但要平穩增長及收息是無問題。

佢市盈率出現負數只是因為物業重估因素，這只是一些會計上的數字，對業務無影響的。

另外，月供股票一定要長線進行，唔好中間轉來轉去。

------------------------------------------------

Q17315：

老師，本人47歲、3年前買咗樓平租比自己人、租同供等同！

我買咗收息股3、6、405、435、778、1038、2388、6823、大約共160萬、現金淨40萬！

月可儲$10000
請問老師覺得我仲有咩安排會比較好呢！
謝謝老師提點

龔成老師：

你持有的，都是有質素的股票，雖然增長力不算強，但以你的年齡情況，其實無問題，配置基本適合。

你現時有物業，同時股票都佔財富一部分，基本上能做到股樓平衡，配置不差。

現金$40萬，以現時的大市平貴情況，都算可以，但暫時唔好再動用這$40萬，除非出現大型跌市，否則作備用及等機會之用。

至於月供可儲$1萬，你可以投資平穩增長股，分注或月供都得，例如盈富（2800），如果你可以承受到風險，就可以將其中$3000供一些潛力股，因為你的組合現時並無潛力股。

------------------------------------------------

Q17316：

成老師！1876 怎樣看 ?

龔成老師：

百威亞太（1876）以質素來說，的確不差，佢係百威亞太控股為AB InBev Group的一部分，係亞太地區最大的啤酒公司。

佢從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

佢係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

過往股往少少貴，現時合理翻D，你預現時是合理區中上部，分注投資，長線持有都可以。

------------------------------------------------

Q17317：

龔成老師你好，我一直有留意龔成信箱，希望可以為自己制訂一套良好的投資組合，包括美股、港股、RIET、債券等，但過去5年覺得投資上走彎路，錯誤的港股投資及炒股導致數十萬損失。

因此在此希望請教一下龔成老師，以制訂一個健康的投資組合並盡快達到財務自由。以下為本人的基本資料：

今年29歲，從事穩定行業，月入約5萬，每月可儲2-3萬。另每年公司Bonus約20萬。主要資產如下:

1. 一香港物業出租，價格1000萬，做400萬按揭，每月供款約15000，租金收入24200,將來用作自住用途:

2. 香港股票50萬:包括中國石油化工股份(13%)、中國鐵塔(5%)、建設銀行(37%)、石四藥集團(8%)、藥明生物(15%)、長實集團(9%)、中銀香港(10%)、京東集團(2%)

*本人認為太集中在金融股、想調整組合加大中國鐵塔投資組合份額降低平均成本(原買入價2.13)及另外再買入吉利等增長股;

3. 美股約HKD15萬: 包括Beyond Meat、Zoom、波音等;

4. MPF17萬，另外每月額外自願供款1000

5. 現金約30萬

目標希望在40歲前每月產生4萬元現金流，現在正考慮在投資組合中加入星加坡及日本RIET，以及未來到英國置業、請問可以做到嗎?

龔成老師：

首先，你有「建立財富組合，做好配置」這是正確方向，持有優質資產長線是大前題。

不過，你這年齡，可以進取翻少少。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你應該在40歲前，著重增值，到40歲，轉為現金流類別。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，建行（0939）、中石化（0386），以你的年齡來說，並不適合。

你可以加大少少吉利（0175）及中國鐵塔（0778），長線持有。

至於外國的房託，只要有質素的都可考慮，但要留意不少房託都以收息為主，增長力不強，而你這刻應加強增長力。

------------------------------------------------

Q17318：

老師你好，我同先生每個月可以儲10000，有樓，年紀32歲，流動資金50000，請教我地怎樣投資可以做到財務自由

龔成老師：

你地的現金唔算多，建議$5萬唔好動用，除非大市有大型下跌。

至於你每月$1萬，暫時可以將一半投資，你可以月供股票或自行分注投資。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17319：

龔sir,感謝你。
又一年過去，眨下眼我26歲了。我已完成了第一個一百萬。

感激遇到你令我對財務策劃上有更多既認識令我對自己有要求有目標，雖然還未稱得上熟悉股票市場，但我仍然會保持學習的心 堅持每月供股為我的未來努力。

下年目標希望能購入一層800萬以下的自住單位。
希望我會成功

龔成老師：

加油！你已行在正確的路。

理財是長期戰，你要保持進行，方向已正確，保持努力就得。提高自己的投資知識，以及不斷儲錢。希望你能成功置業。

由於你打算在1年裡買樓，因此宜持有較多現金。

------------------------------------------------

Q17320：

老師，目前我23歲
月供2800中。

想問月供美股可考慮嗎？
有邊隻可以選擇？

我上網留意 美股可一股買賣 只需幾百元，對嗎？

龔成老師：

唔好因為入場費低而強行投資某一股。

最重要是這股有質素及長遠發展正面。

美股你可投資，只要當中是優質股，以及你熟識就得，你這年齡，可以投資增長力較高的股票，盈富（2800）可保持月供，至於美股，你可留意一下科技類的，例如GOOGLE等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15201-Q15220）

Q15201：

龔sir.睇左你幾本書..得著好多..諗通左好多..真系要多謝你..遺憾就系之前一路就吾岩時間去上你堂..！

想請教一下點樣可以容易啲判斷一隻股票既合理水平？

我跟住你教既方法..系過年前睇中左*1137*.. 4.3既時候入手..長遠點睇？

終於報左名上你堂..期待！

龔成老師：

要判斷一間企業的合理水平，就要為企業進行估值，但這不是一個容易的過程，因為就算在我的股票班，都要講約5小時，因此好難在這裡三言兩語講到。

簡單來說，就是為企業的業務價值與資產價值進行計算，有了合理的估值後，再比較現價，就可以知現價平貴。

至於香港電視（1137），這是有潛力的股票，業務增長快，行業有前景，不過，在財務數據上較弱，未有似樣的盈利，沒有估值的基破財務數據。因此，這企業估值會比較難，同時市場對佢的價值睇法不一，結果就是，股價會大幅波動。

如果你最初打算長線的話，就持有，股價波動會有心理壓力，但這是投資者要克服的。如果你本身有較多貨，可以在有一定升幅時賣出部分。

5月見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15202：

龔sir, 上年上完你股票班之後，一直儲錢等大跌市依個機會， 宜家想等到價格好吸引先分注入不同優質股， 想請教你的意見：

－ （9988） 阿里爸爸
－ （27）銀河娛樂
－ （388）港交所
－ （2388）中銀香港
－ （12） 恆基
－ （2318） 中國平安
－ （3）煤氣
－ （66）港鐵
－ （2800）盈富

上年我用左2成資金：買入煤氣，港鐵，盈富 & 中銀，所以今次大跌市主要想用8成資金買入：9988，27，388， 12 & 2318，當中9988，27 &388會重點會多d股數。

買多d 9988係因為覺得佢有大潛力增長， 有長線持有的價值；買27係因為覺得賭業股波幅大，可以待幾年後升得好高的時候就買出 （e.g. 2018試過上到$70 高峰）；而買388又係等熱炒時期賣出。而餘下股票就長線持有。

我選擇依個組合係因為當中擁有不同行業既股，而當中既股都係行業中最有實力／潛力的企業。請問以我24歲年紀， 以上組合會否過份進取？非常感謝！

龔成老師：

你的方向正確，之前大市一直唔算平，最多只是合理區，我地入市的力度不強，之前應該儲落一定的現金，現時大市開始有吸引力，雖然我地唔知中短期走勢，但在長期角度，是買入優質股長線持有的機會。

但由於大市十分波動，買入時要分注，慢慢運用，同時買入後仍要有現金剩，無人知會跌到幾多。

你的策略正確，選股無問題，你可以運用之前的現金，好好把握這次的機會，分注買入。上述都是優質股，適合你的，你已經可以開始進行，唔算進取。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15203：

龔成老師：你好，我是投資初哥，29歲，月入約四萬，每月可投資的金額約兩萬元，平常都有投資盈富、長建及中銀，有留意到很多人投資美股，或者一些美股ETF，如你都有提及的 3140。

我也有翻查資料看看，發現3140息低，股價不會大幅升跌，成交量低（為何香港人不太買ETF除了2800？），如買左之後會否難沽出？

除此之外，既然我平常已定期買開香港的股票（如上述提到的），那是否仍然需要買3140? 如建議投資，原因是甚麼？

想分散投資，等股票不需太集中係中國市場？ 感謝！

龔成老師：

領航標普五百（3140）的股息的確不高，但投資這基金，著重的是增長力。相信佢長遠仍有平穩增長力，因為佢就是追蹤最強類別的美股。

成交低的確有少少影響，這會令你買賣差價可能有時有點闊，不過，只要你長線投資，影響就會相對較少。

香港人太愛短炒，而ETF是不適合炒的，因此，這些基金不太受香港人歡迎。

你可以投資3140，作為分散風險的作用，因為可以令你的組合，更為全球化。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15204：

龔Sir，想問下，現時9成按揭去到最高800萬，如要買800萬的樓，首期要80萬，那麼雜費預40萬會足夠嗎？即total$120萬（不計裝修傢私）
謝謝喔！

龔成老師：

$800樓印花稅為3.75%，即是$30萬，經紀佣金一般為1%，即是$8萬，連用其他雜費，你預大約雜費要$40萬。

因此，你預$120萬是基本的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15205：

老師你好想問下你意見，本人岩岩畢業出黎做野冇耐，月入18k，想以增值為主
打算每月月供$5000係以下股票 :

823@1000 2800@1500 12@1000 2@1500
想知呢個組合會唔會太保守?定係將資金集中供某d股會比較好?

另外本人有約40k資金打算黎跌市時買入長遠較有實力既股票，有冇值得留意既股?
唔該老師!

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

就上述的選股來講，都是有質素，平穩增長型的股，基本上無問題。其實已經可以進行。

現金$4萬方面，暫時可持有現金，等機會，唔好心急，因為大市只是合理區，未算平宜區。你可以留意太古地產（1972）、希慎興業（0014）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15206：

阿Sir，有個關於月供0388港交所、0700騰訊嘅問題想請教：

觀察近日成交價，0388市價已經去到昂貴區（假設$190-$240合理區），0700市價亦距離合理/昂貴分隔線好近（假設$305-$385合理區）。

喺呢個環境下，需要減少月供金額、或者暫停月供呢兩隻股票嗎？

而且，留意到近期並冇對0388、0700利好嘅消息，顯得呢啲市價升高得唔合理，同時恆指升破28000亦都算高，所以我有諗有冇需要暫時賣出呢啲股票。

而家市況去到應該賣出持有股票嘅熱度嗎？
謝謝。

龔成老師：

港交所（0388）的確過了合理區，但現時只是略略貴的水平。在這水平，唔會大手入，但如果是優質股，以月供的模式進行，其實仍是可以的，除非你每月供的金額好多，就要減少少。

至於騰訊（0700）都有類似的情況。

不過，如果一隻股票有質素，有增長力，其實在月供的角度，就算持續都無問題，除非到了明顯貴的水平。

現時恆指，只是合理區中上部，未貴。市未熱。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15207：

老師，想問你清唔清楚現時支付業務的獲利模式係點？
像支付寶等。

龔成老師：

支付寶提供的支付，對消費者來說是免費的，除非通過信用卡等信用產品付款，如果在呢種種情況下，支付寶基於銀行向其收取的相關費用向商家收費。

另外，商家可以從第三方合作網站獲取站外流量，淘寶商家還可以購買高級店舖軟件幫助升級、裝飾和管理其網上店舖，成為往後的盈利。

簡單來說，就是利用一些延伸的模式去賺錢，通過同銀行及商家等分作，運用巨大的客戶基礎。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15208：

龔成老師,你好!想請教

現時按揭成數放寬, $800-1000萬的物業可造8成按揭，連首期,印花稅,裝修等的前置金額約$250萬, 我收入能過壓測可以上會的.

但每月供款達$30,000. 租住同樣單位$20,000 – 25,000 就可以了.

在現金流的角度, 租看來比較化算?

若之後我把這$250萬作5成首期用來買港島細價樓($450萬)收租, 租金約$10,000. 租金收入是大過供款的, 現在按揭利率2.5%. 租金回報4.8% (10,000 X 12 / 2,500,000). 淨回報2.3% (4.8 – 2.5%). 這樣的話我地唔洗將$250萬鎖死作”消費”, 而令資金成為”資產”帶來租金收入. 我們就會有2個物業收租, 自己就租大三房單位自住.

想請教:

1)以上操作是否可行? 有什麼事項和風險要注意嗎?

2)比較以上操作, 8成按揭買800-1000萬的物業來自住方案有什麼可取之處嗎?

謝謝!

龔成老師：

理論上，你擁有兩個細單位再租一個大單位，比起你單買一個大單位自住為好，但好的程度並不算好多。

先講點解好，細單位的租金回報率較高，例如4%，而大單住租金回報率較低，如3%，你以收4%去支付3%，加上現時按揭的利率不高，你的確有利的。

不過，在現實的情況，你要比好多費用，例如放租稅務，雜費等，同時現時細單位的租金回報率，大多不足3.5%，因此，你實際賺到的數目，並不多。而你要處理的雜項管理，會增加左，因此，數目上有少少著數，但並不多。

如果你填寫「個人資產負債表」（你可睇《財務自由行》），你就更清楚。雖然你地有兩個細單位，資產多左，但同時由於租住大單位，負債多左，因此，整體上無你想象般咁有利。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15209：

老師，其實本人打算8-10年後退休。之前只係埋頭在工作上，收入算好，是管理層，但不太懂投資。之前有買吓股票，但不算成功。有幸在FB接觸到龔sir。

覺得時間無多，要好好利用餘下幾年舖排一下投資計劃，整理手上有嘅資金/產。

日日有follow你FB同睇你嘅書，獲益良多！好欣賞你對你嘅工作咁有passion! 排除萬難，一定要achieve到定下嘅目標！

如果我早十年睇到你FB就更好！不過希望依家都唔遲！你要加油呀！幫多啲後生仔早早開始計劃佢哋嘅將來。我好認同你之前講過，為何香港教育沒有教大家投資理財的概念和重要性？這是十分重要的一科！

龔成老師：

對，香港的學校，完全無教學生重要的事，只教學生如何做好打工仔！

好多更加切身的知識都唔教，呢D反而是更重要的知識，理財就是其中之一。所以，見到唔少香港人唔識真正的買樓方法，唔懂得投資。

我出書都係希望可以幫到更多人，認識真正的理財知識。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15210：

Hi, 本人想15年後財務自由, 本身打算投資100萬(分4年350K, 150K,250K,250K), 未有買股票經驗,有上堂, 目標每月有3萬現金,大約7.2M 5里

心目中有股票 : 地鐵(005), 中銀(2388),大快活(0052). 想問用15年時間儲存到7.2M是否可行?可行的話

每年有10 - 15複利應該點樣選擇股票? 每年點樣評估是否合乎目標? 中間是否要加註金額?祝生活愉快.

龔成老師：

先講你現金的部分，如果你未有投資經驗，建議只動用部分，例如$30萬，餘下的暫時持有現金，唔好心急動用。加上現時大市只處合理區，你可以一邊投資，同時留下一定的現金，作等機會之用。

至於每月的$3萬，你可以做月供股票，上述的都可以，仇最好加上盈富（2800），以及考慮多一兩隻平穩增值股，如金沙（1928）、長建（1038）、中銀（2388）、港鐵（0066）、恆基（0012）、港交所（0388）。建立一個更全面的組合，唔好太過集中。

如果你每月投資$3萬，假設回報為10%（要將股息再投資），預期你可以滾存到$1140萬。因此，你的目標是「如何尋找每年有10%回報的股票」，上述的股票，都是企業有質素，有平穩增長力的，你向這方面去選就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15211：

龔成老師你好！請問一下由上年香港發生的社會運動到最近政府對武漢肺炎的處理手法，相信或多或少會影響香港和外國投資者對香港政府的管治能力和香港經濟前景的信心，所以我想問老師怎樣看香港股票的核心質素和未來營商環境？

另外我想問下關於投資策略的問題。本人現時20歲，持有的股票都是香港股票，分別是中國生物製藥和福壽園，我明白價值投資的重要性，所以打算作長線投資。

但是由於本人認為香港股票質素可能已經略減和已經持有不少香港股票，所以想同時投資美國股票，我想問在比例上分別大約佔多少會比較適合？

謝謝你

龔成老師：

的確，香港會因這些事件，令我地的優勢減弱，但未至於核心性，信心會慢慢因時間回復的，所以又不用太過擔心。

中生製（1177）及褔壽園（1448）都是有質素的股票，你可以持有，這兩股都是潛力股。不過，你唔能力太集中在潛力股，應該建立一個更平衡的組合。

另外，香港股票仍有質素的，我地一定要從長遠的角度分析，唔需要太比中短期的不利情況影響到。

不過，你建立一個更環球的配置，是可以的，因為有平衡風險的作用。你可以美國、香港、中國，各3分1，已經是一個平衡的組合。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15212：

龔 sir 好啊～我是你的股票班舊生，聽完書一直想投資金沙或者銀娛。

但最近澳門關閉賭場，市場亦都會有一段時間既低沈，咁而家仲入唔入市好呢？

如果入，應該大概咩價位呢？我係一手手買既，亦唔打算買太多，所以想搵個好既價位先買。謝謝～

龔成老師：

澳門關閉賭場、肺炎情況，當然會對佢地有影響，但只是中短期，因此，我地最多只需要在估值上有調整，例如先計算子正常時間的企業價值，然後減去佢中短期損失的部分。

上述兩間企業的優質度，並不因而改變，因此，我地只要考慮平貴因素，就能分析到是否投資。這兩股現時處合理區，有長線投資價值，但如果你唔打算入太多，只打算入一注資金，就最好等回落8%以上才考慮。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15213：

龔sir 你好，我35歲月入扣完mpf 27k，剛購入居屋每月供13k。另有60萬現金，以及hsbc/中人壽股票共8萬。

想問我可點運用60萬現金增長資產分擔供樓壓力。因現在市況令收入有可能變得不穩定。感謝！

龔成老師：

你已有物業，在財富分配上，應該增持翻多D股票資產，令組合更為平衡。

35歲，仍是財富增長的年齡，你可以集中投資平穩增長股。但如你本身比較保守，想較偏重於現金流，則可以投資「平穩增長股+收息股」。

你這刻可以動用$30萬，分注投資優質股，餘下則暫時持有現金，等機會投資。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15214：

龔成你好 請問岩岩開始學月供股投資，應該先買你邊一本書好呢?謝謝

龔成老師：

對初階投資者來說，月供是很好的做法，記得要長期進行，唔好被中短期的股價上落影響到。

你可以睇《80後百萬富翁》《股票勝經》。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15215：

你好龔成，我有問題想問你意見，我負債20萬，仲有8個月就還哂，每個月扣哂所有開支，只有8,000可以投資，而且我今年想買樓，係咪唔好做月供股票？

龔成老師：

對，你唔應該月供股票。

因為我地投資股票，原理就是買入企業，等企業成長，8個月只是一個短期操作，企業不夠時間成長，只能睇到時的市況而影響你有無賺蝕，這一定會為你帶來風險的。

所以，你應該集中儲現金，如果本身有需要賣出股票套現，就要在這幾個月，在合適時機賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15216：

龔成老師你好！我是你的小粉絲，小弟在讀過80後百萬富翁後十分欣賞你的致富頭腦和知識

小弟今年29歲，我的目標是2021-2022年買入第二層物業收租，奈何上年有財演話維他奶的合理價為$48，故用了部分錢在$41買了兩手維他奶，雖然它是一間穩定增長的好公司，但半年間已由$41下跌至$30水平。

以FY18-19為例子，因為純利的增速不及預期，導致維他奶的合理估值下跌，加上實際盈利下跌，致使股價於公怖業績當日大跌並開始了漫長的跌浪。

以我所知FY19-20年度，人民幣下跌並國內經濟轉差，國內對香港人乃至香港的產品仇視，應該會影響維他奶在2020年6月公怖的盈利。問題如下：

1)維他奶雖然是自由現金流按年增長，但DCF模型包含很多不同的假設，請問龔成老師是否建議我們使用DCF作估值呢？

2)如果20年6月業績公怖，股價再次重覆上年的模式，請問我應否在業績公怖和股價大跌(這是假設，我不想這個發生)重新用公怖的EPS重新計算合理價

如果仍是高估便於第二天沽出手上的所有維他奶，並於將來股價在新的合理價以下有一定安全邊際才買回？

3)你認為維他奶現價合理嗎？合理價大約在那裏？

4)你認為當東莞的新廠房正式投產，產能提升1倍，以維他奶在國內供不應求的情況下，股價有機會升4倍至破$100以上的水平嗎？

問題比較長，希望收到龔成老師的回覆，祝老師桃李滿門，能讀到老師寫的書實在是香港讀者之福！

龔成老師：

1）如果你有睇幾年前出的《50優質潛力股》，你會見到我當時分析的維他奶（0345）當時的合理價是$20以下，而當刻的股價只是$15。

這企業有質素，但增長力減左，$25以上仍是略貴。

我在估值時，會同時用幾種估值方法，無一種方法是完美的，有較多方法作配合，分析會更為立體。

2）你唔到分析「股價重覆上年的模式」，這是「預測股價」，是錯誤的投資方法。

反而，我地只會因應現時的平貴度，作投資策略的調整。

3）這刻$25以下會較合理，最多$28。

不過，如果企業的質素增加，以及增長力理想，企業價值會有所調高的。

4）比較難，產能增加當然利好企業。但企業的產品銷售情況，才是核心，如果市場的增長動力不強，就無作用。

這股有質素的，但要耐心D先守到，現時好睇佢之後的市場發展如何，這將決定了這股的增長力。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15217：

老師 你好
我想問下 如果公司出左花紅一萬

我想全部用黎買股票
我應該投資落邊隻股票比較好
因為本金有限

龔成老師：

如果你想有基本的增長力，可以考慮盈富（2800）（本金約$15000），另外，亦可考慮，領航標普五百（3140），這都是最穩健，能平衡風險的投資。

如果你想收息，可考慮置富（0778）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15218：

老師，本人現持有渣打多年，一直在月供股票的名單中，平均價約100元左近，但一直未見起色，你對他前景有什麼看法，有需要換馬嗎

龔成老師：

渣打在多隻銀行股中，算是質素比較弱的一隻，你可以睇睇佢的財務報表。近5年中，有2年出現虧損，另外有2年的盈利不太好。

企業質素只是一般，持有的價值不算高，但又未到劣質。這類股，不應佔組合的比例太高，你預佢之後的股價，都只是平穩，最多有少少增值，要上翻去$100不易。

如果持有較多貨，可以考慮賣出部分，餘下再守。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15219：

你好 請問你點睇九毛九(09922)? 而家入貨定趁再低d先入？

龔成老師：

九毛九（9922）這類半新股，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，雖然中短期因肺炎會轉弱，但長期仍不差。不過整體上，現價仍少少貴，雖然這股都有長線投資的價值，有貨就持有，無貨，就唔太建議大注投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15220：

老師，請問會否計畫再來澳門開班？會否在澳門開授進階班？

龔成老師：

預計今年會在第三季，開基礎班，至於進階班，相信要遲多1、2年，先會在澳門開。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。