【龔成問答信箱】（Q21901-21920）

Q21901：

你好龔sir，多謝你無私既教導，係2019年6月我只月供股票，多謝你不停叫我們一定要留有資金等大市跌入貨，

終於我係疫情期間買了比較便的股票，有部分合理價，由賺第一個10萬，到而家賺到$70萬，離100萬差小小，開心到不得了，

有個2問題想請教龔sir, 因黎緊諗住同女朋友買樓投資，可能要賣出部份股票先夠，手頭上資金大約10萬，及我持有以下股票：

2手1211 @34.9
3手1830 @2.4
2手9988 @218
10手1177 @7.8
2手3319 @29

8手3067 @16.5
6手1928 @29
12手 1972 @19
1手270 @11.5

1）潛力股同平穩增股差唔多5:5，我在考慮如果需要買樓我應那種隻股票較好？請教老師幫忙

2）我睇過龔sir 既買樓4部曲，所以想將股票投資細物業，等將來換有能力再換Dream house,我們睇左2個細單位

佐敦$570萬 250呎 15年樓齡 2分鐘行到地鐵站，附近多食肆交通方便 / 西九龍 $530萬 280呎 4年樓齡，地區旺中帶靜，行8分鐘到地鐵站，附近食肆林立

兩個單位都係一房一廳

如果以投資角度是否佐敦升值會好啲？

龔成老師︰

1) 其實你最重要的分析點，是「餘下的組合，之後的長遠發展情況，怎樣配置對你最有利」。

這些股票都有質素，最理想係長線持有。但若真的要動用，可以從估值著手，先沽出較貴，變相無咁高值博率的股票。

比亞迪(1211)和完美醫療(1830)現價都偏貴，由於佢地升左唔少，令佢地佔你組合比重都偏高，你可以優先沽少少。記住，一定要留部分在手，不能無貨。

其餘股票，你按比例沽就可以。但緊記只係沽出部份，唔好沽晒，必需留有一定持股，去維持股票類的增值。

如果你想組合增長力較強，就賣出一些增長力相對無咁強的，例如太古地產（1972）。

2) 初步睇，2個物業投資價值都相若。佐敦較接近旺角，人口較密集，感覺會比較迫和雜，會扣少少分。（因為從自住的角度考慮）。

而且，西九龍呎數較高，同時較新，整體投資價值，可能會好少少。

------------------------------------------------

Q21902：

啊sir 我想請問你點解可以咁厲害。咁多人問你咁多唔同行業股票 你都可以講到咁多評論同深度分析

龔成老師：

因為我每日就係花時間，研究企業及行業，這是我的全職工作。

我幾年前職去銀行工，做全職投資者，所謂的全職投資者，並不是日日睇住個市睇股價，真正專業的投資者，是花時間研究企業，睇企業年報，大行報告，行業研究，我的工作就是「研究企業」。

我未必比人叻，但我每一間企業、每一個行業，研究的時間都比人多，自然對企業有更深入的了解，投資成續都較好。

------------------------------------------------

Q21903：

早晨呀！龔Sir, 我有2隻股票想請教你呀！

1. 快手(01024): $315時入左一手, 衰貪心高位時無放, 跌緊時又無止蝕, 請問我現在應否止蝕 或 再持有等高位再放呀？若等, 大概咩價位放？

2. 華泰(06886): 抽新股時$24.8抽中一手, 到現在一直回不到招股價, 請問我應該止蝕呢？

希望得到你回覆寶貴意見. 謝謝！

龔成老師︰

1) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。你現貨可以長線持有，但你預佢短期股仍會十分波動。

2) ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強。若你只有一手，你可守住先，等下次大市狂熱期才沽出。

------------------------------------------------

Q21904：

你好！龔成老師，我今年27歲，月入$25k，三年前睇左你既著作，就開始月供股票，一開始都係$1-2千咁供。最後悔係大概$60既時候放左比亞迪！

依家我都有維持月供既習慣，以下係我既股票組合，想請你比少少意見

股票/持股數/月供金額

2800 盈富/1757/ $1000
1928 金沙/999/ $2000
9988阿里巴巴/47/ $2000
1299 友邦/77/ $1000

0052大快活/1000/- -
1310 香港寬頻/2000/ - -
3067安碩恆生科技/200/ - -
1297 中國擎天軟件/ 2000/ - -

暫時手頭上現金不多，9成儲蓄都用作投資股票市場

黎緊我會加大儲錢力度，每月大概可儲$15000，如果我希望5年內滾存到120萬或更多，請問我可以如何部署？

我已經錯過左比亞迪呢隻潛力股，龔老師，可以請你再推薦一隻潛力股給我嗎？

另外我想提升自己選股能力，由其是企業估值方面的能力，可以為我推薦一些學習途徑嗎？

龔成老師︰

緊記，一間企業再優質都好，成長係要時間。所以，當你持有一隻優質股，就要比時間佢慢慢成長。唔好急於為左10-20%回報，就急住放。我地要長線，爭取係以倍計的回報。

比亞迪(1211)現時依然係有質素的潛力股，有長線投資價值。但現價已經偏貴，要回到$135才算合理少少。如果月供，最好再等回少少先，或者只宜月供好小注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲年紀，應集中在財富增值部份。你現時持股，大致都適合你，長線持有就可以。

當中中國擎天軟件（1297）本質不差的，但規模較細，以及行業存有風險，唔建議太過大注。

香港寬頻（1310）則只係收息股，增長力欠奉，唔適合你。

你還很年青，應該好好把握時間優勢，去盡力做好財富增值。你現時月供組合係可以，但以你年紀，有少少保守。建議你加入一些潛力股，去增升增長力。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

若你目標係5年增值至120萬，我假設年增長率為10%，你就需要每個月投入$16000，才可以做到。

而學習方面，你可以多讀投資相關書本、年報，新聞和課程。

你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21905：

龔sir,（1）請問龔sir，＃1988 民行還是＃1658 郵儲銀行好？

（2）另外，其實我一直想入9988，聽龔sir 教阿里都好正面，請問應該咩價位入好？近期都升了不少了

＃823 一直响$70邊，想佢跌少少再入，但又唔跌
＃1810已經揸住差不多10萬蚊，均價都係$28左右，想溝（現價$24邊），但會唔會重倉左？

我持有 823 好少貨，如果想入173 嘉華，會唔會有重覆呢？173 既前景如何？龔sir 建議入嗎？

龔成老師：

1）民行（1988）及郵儲（1658）都不差的，而郵儲略好。

郵儲銀行（1658）有質素，佢業務包括公司銀行、零售銀行及資金業務，以「自營＋代理」的營運模式。

佢共有4萬個營業網點，有一定的規模及網絡，過往發展正面，都有增長力，但就未必是高增長型。

現價合理，有收息及增長，都有投資價值。

2）阿里（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中上部。

領展（0823）現價合理，如果你本身持貨不多，現價加注可以。

小米（1810）雖然有質素，但如果你已有一定的持貨%，就不要再加了。

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

佢同領展，算是有部分重覆左類別，因此合共的比例不能太多。

------------------------------------------------

Q21906：

老師你好，看過你的書及網頁後，明白行動重要性，感謝你的分享，現想請教關於置業及財務自由問題，先簡單講一下我們情況

家庭成員：我41歲，丈夫43歲，兩名小朋友3歲半及10個月

每月家庭收入：$64,000
每月家庭支出：$40,000
流動現金：$2,600,000
股票：$80,000
物業：已供滿荃灣2房單位，約值450萬

現想購買第二物業作投資，樓價預算400-500萬左右，3-5年後希望換同區3房單位作自住，現有物業放租，老師建議應該如何步處，選樓時又應該注意甚麼地方？

理財一向過於保守，近一年才開始月供股票，每月$6,000，以盈富基金及比亞迪為主，長遠希望可以製造每月2萬現金流，獲得財務自由，應如何投資比較好？謝謝

龔成老師︰

如果你希望長遠會有每月2萬蚊現金流，以股息率6%計，你需要本金400萬。

現時，你可以利用月供股票和現有資金，去累積這筆資產。以你41歲年紀，你現時月供組合係可以。

但比亞迪(1211)這類潛力股，波動性較大，不宜持有太多。潛力股，佔組合4成左右好了。若你投資經驗較少，最好下調至2成大右。

而且，比亞迪(1211)現價略貴，月供係可以，但小小注好了。以下是其他適合你的股票，供你參考。

現時大市只在合理區，每月你可以用儲蓄一半，去做月供﹐另一半儲起。而現有現金，都可以用部份，去分注買入上述股票。餘下資金，就用來等大跌市機會。

至於買收租樓，係可以。但我地財富組合除左要有增長力和質素外，平衡性都好重要。

你現時已有一個物業，若再加一個，會令你組合有少少偏重左係物業類，會產生過度集中性風險。

而且，現時香港樓市唔平，若從投資角度計，股市值博率會較高。除非你找到一個增長潛力不錯、租金回報率理想的旬盤，否則你先用優質股去做增值，會較有效率。

因此，買樓收租這一步，方向可以伴，但未必一定要太急進行。

------------------------------------------------

Q21907：

龔成老師你好，我今年32歲，今年開始偶然間留意到老師個Facebook page，認識到長期投資嘅威力，之前多數都係短炒，蝕左唔少錢，

宜家想好好設計自己長期投資組合，想問下老師如何改善同部署。多謝老師！

基本資料：

32歲，月入22K，有一自住物業，一個小朋友，月供連家用13K，每月可儲5K。

股票本金$148,000

水桶1 $69913 ：47.24%
1177 $7.56 中生製藥 1手 藥品 $7560 ：5.11%
9928 $7.13 時代鄰里 1手 物業管理$7130 ：4.82%（打算$7放）
3067 $18.28安碩恒生科技 6手 ETF$10968：7.41%
6690 $30.8 海爾智家 1手 家用電器$6160 ：4.16%
981 $22.65 中芯國際 1手 半導體$11325 ：7.65%
658 $5.08 中國高速傳動 1手 環保$5080 ：3.43%
2618 $45 京東物流 1手 倉儲物流$4500 ：3.04%
6060 $38.65 眾安在線 2手 線上保險$7730 ：5.22%
6618 $103.2 京東健康 1手 線上醫療$5160 ：3.49%
1773 $4.3 天立教育 1手 教育$4300 ：2.91%

水桶2 $78090 ：52.76%
1313 $8.9 華潤水泥 1手 建築材料$17800 ：12.03%
688 $18.5 中國海外1手 地產發展$9250 ：6.25%
3868 $3.7 信義能源 1手 替代能源$7400 ：5%（打算$4放）
270 $11.5 粵海投資 1手 水務供應$23000 ：15.54%
3718 $1.29 北控城市 4手 環保$20640 ：13.95%（打算$1.3放2手）

1.唔係好識分咩係潛力股咩係平穩，唔知有冇分錯，覺得增長好似有啲慢，應該投資多啲優質股嗎？將來想集中投資係電動車/環保/再生能源/京東/阿里/小米。

2.會太過分散嗎？如果會老師建議賣邊隻？本人可以接受風險！

3.三年後有機會增值到50萬嗎？因想再投資物業自住，原物業放租，及計劃會再生多個小朋友。

龔成老師︰

1) 我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你現時水桶分類，大致都正確。除了海爾智家(6690)和天立教育(1773)算係水桶1至2之間。

而你持有的股票，都有投資價值。你唔好太過在意中短期回報，我地要睇長線。這企業都有質素，你只要長線持有，就自然會有唔錯架回報。

至於你將來集中投資的行業和股票，都係偏向潛力股類別。佢地有較高增長潛力，但同時間風險都唔細。

以你32歲計，潛力股佔最多5成左右好了，否則會令成個組合風險過高。若你投資經驗較一般，你更要將比重進一步下調。

其餘部份，你應該配置在平穏增長股，組合才算平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

2) 你現時組合的確有點散亂，以你組合金額來計，大約持有5-10隻會較理想，會比較易於管理。

但由於佢地都有投資價值，我唔建議你沽出任何一隻。但將來時間，你最好集中翻係5-10隻較有質素的股票，會相對較好。

中國高速傳動(0658)質素較中等，而眾安在線(6060)和京東健康(6618)不確定性較大，這3隻股票，都不宜持有過多。

3) 我假設投資回報有10%（連股息再投資），若你每月能投資$10000 + 現有持股約15萬，3年後大約會增值至60萬。

但3年只係一個中短期時間，最終回報的波動性會較大，你要明白這個風險。

而且，你現時已有一個物業，若你勉強再去買多一個物業收租，你會令成個財富組合，偏重晒係物業類，會有過度集中性風險。

因此，我建議你先用優質股做增值。到你財富累積到一定水平，係足以買入新物業之餘，都有一定優質股留底作增值，你才出手會較好。

------------------------------------------------

Q21908：

龔成老師你好，自從上年同你第一次對話之後已經開始月供計劃，明白財富需要時間去累積，所以我都學識唔好成日望住個市，多謝你無私教導！

現時開始緊每月供款如下:

$2000 @ 盈富 (2800)
$1000 @ 新鴻基地產 (00016)
$1000 @ 比亞迪 (1211)

想問如果想加0388港交所，其實月供係咪唔使太在意現價？1211依家咁貴係咪應該停一停？謝謝你！

龔成老師︰

以你30歲計，現時月供組合係適合的。

其實月供，我地同樣都要用平貴去定策略。只係月供有平均價格的效果，相對直接買貨，風險會較細，所以個價格可接受空間，會稍稍較大。

但若果佢價格水平，係太貴，我都會需要控制月供注碼，甚至係停供。

比亞迪 (1211)現價偏貴，月供勉強可以，但只可小小注，故你維持住$1000先。但佢再升，你就可能要減供款，甚至停供。

至於港交所(0388)現價略貴，但無比亞迪咁嚴重，你現時做月供係無問題。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21909：

我每年大概要給9萬保費（連家人），我唔想草係銀行到，近一年都有月供股票，月供2800@6千，9988@4千，另外每月1手3067

剛剛草10萬現金，以家想草多5-8千，做月供股票for每年繳9萬保費，保費要供20年。當中有2份醫療，3份危疾供20年，1份年金供10年

龔成老師︰

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時要支付的年金保單，如果係你較年長家人持有，係可以。但若你係這類3X歲的偏年青人士，就不太適合。

另外，你要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

你唔諗住年頭不停月供去儲股票，之後年尾就沽晒佢，去交保費。因為優質股係要長線持有，才會有理想效果，長線係講緊3-5年，甚至更長。

短期投資回報，會好波動，如果你用這個模式去操作，好易會失預算。

我建議你維持現時月供習慣，並將這些股票長線持有。而交保費部份，你另外以現金模式儲起就好了。

你現時月供計劃係可以，現時大市只在合理區，每資金唔好盡用。最好留有部份，等大跌市出現時，可以用來掃貨。

至於現有10萬資金，可先動用一半入，餘下一半同樣等大跌的機會。

------------------------------------------------

Q21910：

老師我想月供股票，但我間證券行無提供月供股票服務，如果我將自己的資金自動分配，
e.g. A, B, C, D 股票，
一月 A
二月 B
三月 C, D
四月 A
五月 B
六月 C, D
如此類推，請問可以嗎？

龔成老師：

可以。

月供股票的目的，就是將買入價平均，減少一次過在高位買入的風險，你上述的投資策略，都有類似的作用，因此可以進行。

------------------------------------------------

Q21911：

請問6969有前景嗎
請問北水流出流入什麼意思？

龔成老師︰

思摩爾國際（6969）係霧化科技解決方案提供商。近期國家衛健委表示電子煙並不健康，相信對佢會有影響。

先講佢業務，第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

相信，中國將加強行業監管，對佢有核心不利，這點都會影響企業估值，加上這股一向唔平。

基本上業務不算差，有當中的獨特性，以及長遠有增長力。不過，現價唔算平，加上監管風險，如投資，要小心控制注碼，真的小注好了，而這股有長線投資價值的。

北水流出流入，是坊間指內地投資資金，進出"滬深港股通"的意思。

------------------------------------------------

Q21912：

你好龔成，現正拜讀您的新書-千萬富翁，因剛剛已成為了百萬富翁！haha!

多謝您！我好感恩有您教導香港人正確投資方法，而不是炒炒賣賣。您真的影響左好多香港人，而家多左甘多百萬千萬富翁一定有人係因為受您影響！包括在下。

除了多謝您都不知說什麼好，同埋我好tang您開心，深信愛股比亞迪長遠有高增長，擁抱價值投資法，不理坊間閒言閒語，經過多年努力投資，今日成為千萬富翁，吐氣揚眉，恭喜您！

您將會成為億萬富翁，只是時間問題。

大家香港人一起努力

龔成老師︰

多謝你的支持

我都係希望透過自己知識分享，去幫助更多人，去真正理解投資理財這件事。

看到你能成功成為百萬富翁，真係好開心。但緊記，長線投資要做得好，除左用正確方法之外，必需要保持學習，令自己一直進步，這點是很重要的。

我相信，不久將來，你都會和我一樣，成為千萬富翁，甚至走得更遠，加油。

------------------------------------------------

Q21913：

龔sir，唔好意思呀，又想問問小米1810, 我30.5買， 2000股，早前升到最高去番30.45 但我冇放到，下星期我係咪應該蝕放，等佢跌番落去先再入番呢？ 謝謝解答

龔成老師︰

你係投資理解上，存在一些好核心性的問題。

首先，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔會係做短炒，去賺差價。

另外，我地投資唔好去"估走勢"，無人知你沽左貨之後，會唔會一如你預期咁再跌，佢可能會反而大升，到時你就會進退失據。

我地投資應該係先了解企業質素和前景，當確認係有優質，就再審視佢平貴，去定入市策略。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線持有，但你預佢股價會較波動。

------------------------------------------------

Q21914：

你好，龔sir, 現有276萬現金，但1年後要比200萬我家姐，請問呢1年內買咩可要賺取高息又保本

龔成老師︰

坦白講，只有1年時間，要保本和收息，那200萬部份最穏當選擇就係做定期。

因為，就算係再保守的收息股，都會有機會出現價格波動，令你出現賺息蝕價的情況。

至於餘下76萬，你可以因應你人生階段、投資經驗和風險承受能力，去作出配置。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

大市現處於合理水平，那76萬資金，可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21915：

我其實是你的學生，但我於上年開始follow你的post，從中學到很多投資股票上面或人生的導向的知識，真的獲益良多，希望你介意我稱呼你為老師！

我在幾年前因被公司遣散，之後適逢社運之係又疫情，所以順理成章專心做家庭主婦照顧家人。我一向有投資股票的。

但過往買的真是一些垃圾股，過去的就不再提了，當是一個教訓。 自上年我在fb認識到你。我都買了你的一本著作[股票勝經], 仍在努力中，希望盡快睇完這本再睇第二本。

你常常提醒我們{買股票不是買佢的股價，是買佢的企業，若是優質有質素的企業，就算跌市也不用怯}，同時買股票都要有耐性不能心急，要長期不是短視。

我之前就是中哂這些錯誤的方法。1、2月時幾次大跌市，我手上有2382，175，2333，3690，因跌好多，好驚越跌越蝕得多，所以忍痛蝕走。但之後市回返就升返上來。

可能你睇到依度都會話我蠢、傻！。 依家我會時時刻刻都記住你的真言。若是優質的企業就不用怕。

sorry, 好長篇。想借此機會多謝你。 同時有幾點想請教你

1. 怎樣知道是股票是優質不優質？

2. 我現有3993，358，是優質股嗎？ 3993 > 6.28 算高位入358 > 21.5 算高位入，兩隻可繼續持有嗎？

3. 另外，想幫我仔（剛成年）月供股票，心目中想供1810或1211，兩者邊隻較適合？但兩者現價又升返上來！同時不知道怎樣月供股票？可否賜教？非常感激!

龔成老師︰

你過往所經歷的，絕對唔係你個人問題。其實很多初階投資者，都會經歷的，係一件平常事。重點係，你有無從中吸取到教訓，之後再重新上路。

1) 要分析一間企業，有無質素。過程比較複雜，好難三言兩語就講到，就算在我的股票班，都要講數小時。

簡單來說，你要考慮企業本身質素、行業發展、財務狀況等，去分析一個結論出來。

2) 洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較難分析。

另外，這股的股價較為波動，這股不是不能投資，但不宜大注。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

這2隻股票，若佔你組合比重不高，可以守。但若果係較高，我建議你沽少少，去平衡個風險。

3) 月供其實好簡單，你去銀行或者證券行開個可月供的投資戶口。你睇下個月供費用，同埋邊個方便你自己，就可以。

你仔仔較年青，投資可以進取少少。你所選的2隻股票，都係適合的。

但現時比亞迪(1211)偏貴，要月供的話，只宜小小注。而小米(1810)現價開始月供，係無問題。

另外，我建議都加入一些平穏增長力股，在月供組合。因為畢竟潛力股(1810, 1211)風險都係較高，佔組合比重太多，唔係咁理想。

你仔仔在潛力股和平穏增長股，最好約各佔一半，就算得上平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市算在合理水平，每月資金唔好盡用，大約可以動用一半做月供。餘下一半就等大跌市出現時，可以用來掃貨。

------------------------------------------------

Q21916：

上完你堂， 特別係最後一堂，覺得好有意思。

原來會將間屋當wallpaper唔係得自己，不過我係自己間鐵皮屋，日日提醒自己連普通人都算唔上。

好記得你27歲果陣就有一百萬，我都岩岩到數，不過行的路同實現的方法同你都唔同。我過去係靠基金都努力甘捱到宜家33K人工。

來緊會多用你方法，希望你我最後都可以有自己想要的物業，對你來講可能果個係自己的一個小天地，對我來講物業反而係代表我的存在價值。

共勉之。多謝你搞呢D Course比我地。

龔成老師︰

你無需要這樣想，在這個世界，每個人都是一個獨立個體，無得定義話邊D係普通人，邊D係唔普通人。

我地做人，最重要係對自己內心負責。你唔需要同別人比較，因為你就是你。只要找一條自己合適的路走下去，咁就可以。

你27歲，相當之年青。只要你好好學習，用正確投資方法(記得溫書)，持之以恆。我好有信心，你一定可以擁有自己理想中的物業。

加油，保持努力!!!

------------------------------------------------

Q21917：

想問問中國白銀集團00815 前景點睇

中國海洋石油00883。10.18@17000，中國鐵塔1.23@64000，呢2隻止蝕離場定可以長揸..？Thanks

龔成老師︰

中國白銀集團（0815）的質素不太好，因為佢的業務較為波動，之前亦出現了虧損，佢主要於中國從事製造及銷售白銀及其他有色金屬；黃金、白銀及珠寶產品的零售及批發等。

這股又不是完全無價值，現價合理，但只宜好小注。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。若佔你組合不多，可持有。但若佔你組合較多，建議沽出部份。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線持有。不過，潛力度比過往略減。

------------------------------------------------

Q21918：

老師你好， 想問一問如果我還是投資初學者，但準備下年到加拿大移民， 當我移民後，應該繼續研究香港股票市場，還是美股？ 繼續研究香港上市公司買港股投資應該較易掌握？

龔成老師︰

預期未來一段時間，中國和美國會係全球最重要的經濟體系。因此港股和美股，都係有投資價值。

而你投資那一個市場，就要視乎你對相關市場的了解。基本上，研究2個市場的企業方法，都係好接近，無話邊個較易掌握。當然，你本身係香港人，相信會較了解香港和內地文化，在分析港股行業時，會有優勢。

如果你想投資港/美股，但現時對港/美股又唔係好認識，你可以先投資係佢的相關ETF。以下3隻股ETF，都係不錯的選擇。

當中，QQQ波動性會較高，要注要風險。

盈富(2800)係包括58間質素不錯上市公司股票的組合，有長線投資價值。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21919：

龔sir，本人現56歲，月入19,000（近乎月光族）, 每月供樓約6,000作自住（最後供款期為小弟73歲），流動資金40,000，現想開始月供股票，每月投放約1,000-1,500。

小弟有以下問題想請教：

1. 以我現時情況，如開始月供股票，應否選擇增長型股票，還是選擇穩健型股票？ 以下股票合適可選嗎？

0016 新鴻基地產
0066 港鐵
1211 比亞迪
1810 小米
9988 阿里巴巴
2382 舜宇光學科技

2. 因樓按要供至73歲，應否於加息週期開始時，將樓按改為最後供款期為65歲，這樣更改去減小利息開支，做法是否明智？ 還是將月供股票財富，到最後幾年才提早贖回按揭？

龔成老師︰

1) 以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

你選擇的股票，係有質素。但組合過於進取，除了新地(0016)和港鐵(0066)是平穏增長股，較合適外。其餘都係潛力股，對你而言，風險太高，我都太建議。

而且，你現時每月可以資金好了，供太多隻，會令個股月供成本過高，咁係唔理想。

你可以暫時先隻中供新地(0016)和港鐵(0066)，到你有再多資金，才月供以下股票。至於現有資金，可以先用一半。餘下一半，就等大跌市時，才動用。

但由於你已近退休之年，這2隻「平穩增值股」唔適合一直供落去。你要隨著年齡增加，慢慢換碼，去增加收息股的比例。到退休時，收息股應佔100%。

2) 這個要視乎加息多少，因為只要你長期平均回報率和借貸息率，係存在一個明顯息差，你係應該維持現有還款計劃。

但若果加息比較多，可能息差以收窄(不足2%)，你就可以考慮用較多新資金，去做還款。

不過，我唔建議沽貨去清還貨款。因為我地無人知個市場環境會點走，你一次過清晒成個股票組合，其實係好高風險。

------------------------------------------------

Q21920：

老師好，最近很迷失，想問以下幾隻股票應該怎安排好。

136,
369,
769,
1029,

1705,
1830
3800,
6988

龔成老師︰

完美醫療（1830）和樂享互動（6988）有一定的質素，現貨照長線持有。但現價偏貴，不宜加注。

恒騰網絡（0136）都算有質素，但不確定性高。而賓仕國際（1705）質素較一般，2者都不宜持有太多。

永泰地產(0369)、中國稀土（0769）投資價值好一般，長線換至其他優質股，會較好。

鐵貨(1029)無乜投資價值，建議沽出。

保利協鑫能源(3800)比較麻煩，現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

我地投資一隻股票，就等同投資一間企業，我地必須認真分析佢的質素、行業前景、財務狀況等，才好做投資。

我見你過往選股，大部份質素都唔係太理想。如果你選股能力較弱，我建議你買一些ETF，好似盈富(2800)。

它是包括58間質素不錯上市公司股票的組合，這些股票有升有跌，但長期計，都有不錯的回報。買入盈富主要有兩個回報(分別是股價升幅，加上股息回報)，股息不多，大約只有3%。

而股價升幅，其實有升有跌，每年都會波動，但長期平均計，都有5%-10%，當然，這是不一定的。若你以月供股票，買入的價格就能平均，不用擔心一次過在高位買入的風險。

雖然盈富(2800)增長力，唔算十分高。但佢係一籃子優質企業的組合，對於選股能力較弱的初學者，絕對係一個唔錯的選擇。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21701-Q21720）

Q21701：

你好，龔老師，我是你的學生，我想通過比較同行PE來預測#1448福壽園的合理P/E範圍。

#922 安賢園，#1448福壽園，#6966中國萬桐園最近5年P/E範圍分別為2-47， 25-31， 9-22。

#6966中國萬桐園成交量少，2020年度平均成交量93萬，有76日更是0成交量，收入捨棄2019年有一個客戶貢獻2400萬的收入的因素（因為2020年已經不再有這個收入），

其收入維持穩定不變，i.e. 無增長，但其5年內P/E範圍可達9-22， 是否代表市場對這股票過於樂觀，高估其價值，

成交量少另我擔心這股票是否可以賣出或者其P/E是否可參考。

對比#922 安賢園，其收入每年都有上升，但P/E每年下降，甚至只有3倍P/E， 遠遠低於#6966中國萬桐園和#1448福壽園，請問是否代表市場對這股票過於悲觀，相較之下為何有這麼低P/E.

以上，個人簡單分析似乎都得不出可靠的P/E 範圍，請老師指教本人分析是否有誤， 對於#1448福壽園的合理P/E範圍，是否只能參考其自己的歷史P/E範圍，行業內P/E 無法參考？感謝賜教。

龔成老師︰

我地係計算行業PE在參考時，數據除了要係集中在同業，更重要係一些質素相近，甚至盈利規模等等，都接近的企業。

中國萬桐園(6966)和安賢園(0922)規模好細，品牌優勢、市佔都明顯不及龍頭企業福壽園(1448)，作比較價值不高。

因此，你可以集中翻用集團歷史市盈率去做參考。2014-21年中間4年市盈率，大約為27.5 - 30倍。

但由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，個市盈率都要打折，你預大約15 - 20倍（當然，這數有主觀成份）。

至於每股盈利，我地可以用較近的5年平均數，再加這5年的年均增長率(約16%)去做參考，大約係HKD$0.374。

你預合理價格，大約係HKD5.6 - 7.5。

雖然增長力弱左，但由於佢本身係行業龍頭，有一定質素。而且行業市佔好分散，令佢有很大潛在發展空間，故依然係一隻相當有潛力的股票。

現價在合理區頂，無貨可小注。

------------------------------------------------

Q21702：

多謝你，你好有heart. 股票班最後一堂基礎班，聽你分享聽到眼濕濕，不過我同意，沒有捷徑，只有努力。

一兩年前，我未上你基礎班前開始睇你的本書和Facebook（未睇其他幾本），睇你解答學生或任何人的問題，解答得清楚唔馬虎，開始買月供股，每個月供一萬蚊，再一份full time 一份part time teaching教三日書，一星期做六日，過程是辛苦但有回報。

上年我終於儲夠錢去加拿大讀書，有幸在下個月走之前能完成你的基礎課程。感謝。

我下一個目標是五年後在加拿大買樓，我會帶埋啲note 去認真再溫習。多謝。安好！

龔成老師：

太好了，你都完成了「儲夠錢去加拿大讀書」的目標，之後就要完成加拿大買樓目標。

我相信每個人都有佢想做的事，可惜一般人會面對現實而放棄，但我唔會，我都希望你能堅持。

希望你過左加拿大，都會保持研究股票，應用課程所學，加油！期待你好快同我讀完成買樓目標！

------------------------------------------------

Q21703：

老師您好，早前買入了1833 平安好醫生 $94.25 @500股，怎知買入後一直跌不停，每天都先升後回，連跌十多天，是否需要訂立止蝕位？

每天看著其他股（例如阿里健康京東健康都是升的），很想賣掉，但一賣掉又立即蝕錢，現在我是否應該不理會股價，待他慢慢回升？

我本來看好平安好醫生的前景，但每天看到股價不斷下跌，有點氣餒及害怕自己判斷錯誤

龔成老師：

有時同一行業，由於企業的發展不同，股價表現都會不同，而我地最重要是集中該企業的分析。

平安好醫生（1833）長遠有發展力。只要你持貨不過多，可持有。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動。

------------------------------------------------

Q21704：

阿sir,再問下你，你認為做地產經紀算唔算係創富嘅一樣野？同埋想問如果真係做得起，又算唔算係一個專家嘅項目？

睇左大半本千萬富翁，我應該試下先？

講返少少我背景，我30歲，得毅進證書，本來一心諗住讀完去考政府工，但睇完本千萬富翁就覺得係咪應該試下做銷售？

我現金同股票大約有2m,股票約1.1m，近來亦發現左一個直銷嘅機會（岩岩開始左半個月），雖然初期回報唔高，不過相信做幾年都有一定可觀回報（因為可以靠下線去幫賺佣金，令自己有一個銷售團隊）

其實有嘅儲備夠我捱到起碼幾年嘅時間，只不過我好怕做左地產會冇收入（唔知成交易唔易，同埋搵客可能好耐先有一位肯成交）

雖然我支出唔算大（大約每月8000-10000），不過都係有少少擔心入不敷支

龔成老師：

正如《80後千萬富翁》所講，地產類晨創富的其中一個方法，而當中不少職業，如地產經紀，都是可以突破的職業，你可以考慮下。

至於是否發展成專家，可以的，但要求你的條件更高，不是不可，但起碼要成為一個專業的地產經紀先。

你要有心理準備，的確有可能有一段時收入不高，但如果你的決心大，我會鼓勵一試。當然，你可以先儲多少少錢，等你較安心，之後先入行。

你30歲是黃金年齡，但就睇你決心有多大！

------------------------------------------------

Q21705：

本人31歲，因患有情緒病導致未能長時間工作，只能半職，每月6000蚊，我想請教……

1）31歲先學理財及投資會否太遲？

2）可以有咩理財嘅方法？

3）如果每個月只能拎出1000-1500蚊，可以點樣投資？
感謝龔成老師

龔成老師：

1）有心唔怕遲，你現時仍是好年青的時期，是累積財富的黃金期，絕對可以開始。

2）我不清楚的情緒病的因素，但我怕投資市場上落大，你會有較大的心理壓力，因此，如果投資股票，就要好好想清楚是否適合自己，如果自己較怕風險，就不要強行投資股票。

3）你可以投資一些較低風險的產品，例如銀行的月供計劃，買一些低風險類別（當然回報未必高）。

如果你能承受風險，就考慮每月供$1000盈富（2800）。

同時，你要留到一定的現金。

理財要一步步，不要急，從基本的儲蓄著手。

------------------------------------------------

Q21706：

老師你好，請問1686新意網你有咩看法？

另外再想請教2138醫思健康，有潛力嗎？

龔成老師：

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂至略貴。如投資，小注分注都可。如本身有貨，可長線。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。

------------------------------------------------

Q21707：

老師請問我這九隻股票能夠長期月供?
2、823、3、6、1038、6823、66、11、2800

剛剛供了兩個月，從朋友口中得知老師的Facebook，所以想請教一下，每隻每月供10,000，目標10年一千萬作收利息退休用

希望老師能指點指點，小弟只期望效果係保本及收利息，方法可行嗎？

龔成老師︰

首先你要明白，若你目標係保本及收利息，定期存款會較合適。

因為，就算再優質和保守的股票，都會有價格波動，只是個波動會較少，唔會完全無，唔會去到保本的地步。

若你可以承受少少價格波動風險，你可以用收息股，去作為月供目標。

你現時月供股票，都係有質素。你每月可以儲$90,000，基本上，就算沒有增長，10年後都能累積到1000萬。

你組合當中領展(0823)、盈富(2800)、煤氣(0003)、港鐵(0066)息率唔算高，但有基本增長力，所以波動性會有少少比純收息股為高。

若你不想承受這程度風險，你可以將這4隻平穏增長股，轉為其他收息股。

以下是一些較優質收息股，佢地主要係收息，波動性唔會好高。但因為始終係股票，價格波動點都會有，你可以從中選擇。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21708：

你好老師 我係最近follow你既讀者 想請教下你有關投資既問題。

本人呢十年一直係外國 所以現時只係通過某cfd平台買賣港股同美股。

本人收入同財產如下

28歲 工作收入： 20000港幣/月左右

副業： 3400 港幣/月左右

有一層唔需要供既樓正在出租： 租金收入 扣曬所以開支大約有4500港幣/月左右 （樓可以賣 而家大約值190-200萬hkd）

每月必要開支： 供自住樓連水電上網 大約21000/月左右

老婆現時收入 17000/月左右

但老婆仲有三個月左右就生，所以之後會無咩收入 或者轉做全職家庭主婦

現金流而家有35萬左右

最近幾個月先開始有做小小投資, 所以唔係好多錢入左股票, 而且比較雜

大約如下

美股
Tesla - 3000usd @ 601
Berkshire hathaway 1000usd @ 286
Baidu - 640usd @ 270
Apple - 500 usd @ 134.5
Microsoft - 500 usd @258.7

港股
9988 - 1150usd @ 213.99
700 - 985usd @ 635.5
00388 - 一手 @ 460 （屋企人代買）
0968 - 一手 @ 14.5 （屋企人代買）

目標：

1. 如你所見 如果老婆唔做野既話 基本上會頂得好辛苦 因此想睇下有咩投資組合可以減輕小小之後既經濟壓力

2. 希望投資平穩有儲錢功能既股票 主要係抗通漲又可以跑贏小小就好（我個平台買唔到2800， 唔知咩原因⋯)

3. 有睇開 比亞迪 但係一直都好高唔夠膽買 最近好似回落左d 想請問一下你認為大約幾錢左右入手會比較合理？

4. 有睇過d高息股 例如中電, 領展, 中銀 同 中移動. 當中得中移動個股價有所回落。 呢幾間值唔值得月供長渣？

5. 700, 9988 係想當潛力股咁買 但買完都係一直咁跌 而家呢個價位應該再入手嗎？

6. 間樓係可以賣 因為而家計落回報率唔夠3% 好似好雞肋咁 如果真係賣左有190-200萬現金 你會建議點樣去投資好？

7. 其實美股同港股既玩法會唔會有好大差別？ 我而家投資左一陣就覺得美股上落差比港股大同密, 但除此之外 我唔太清楚有咩分別

可能一次過問得太多問題， 唔好意思。 唔該曬老師。

龔成老師︰

1) 以你28歲，我一般建議先做好增值部份。之後，到累積到有一定財富，才慢慢換成提供現金流的收息資產。

但由於你預計將來一段長時間，家庭開支壓力會唔細，希望透過投資去加大每月現金流，作為幫補。

因此我建議你新資金，集中投資一些「平穏增長股」 。佢地增長力唔係最高，但都會有平穏增長，而且會有一定派息，可以幫補你生活上支出。

但你唔好預好多，大約3-4%股息率左右。但相信這個方法，較可以平衡你增值需要，和家庭支出壓力。

2) 上述平穏增長股，已可以做到你要效果，若你買不到盈富(2800)，你可以買其他幾隻。只要平衡咁買，唔好太集中個別1,2隻，咁就可以了。

3) 比亞迪(1211)若要直接買，你預$120才算合理區頂，才可小注。若你係月供，現價開始係無問題。

但這隻是潛力股，派息好少，而且你預要持有一段較長時間，去讓等它自然增值。以你狀況，未必適宜持有太多。

4) 這幾隻都可以，但中電(0002)和中移動(0941)係純收息股，佢派息普遍會比平穏增長股多，但增長力好弱，係佢缺點。

而領展(0823)和中銀(2388)，就係有上面講的平穏增長股。

這4隻你都可以投資，現價都合理，可以分注。你要自己從「現金流」和「增值」2者間，作出一個平衡。

5) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔洗理。

這2隻股票，依然係有質素。阿里(9988)算係合理區中上，而騰訊（0700）則是合理區頂，由於你有貨在手，建議有明顯回調，才再加注。

同埋，你預這2隻股票較波動。佢地增長潛力強，但派息係極少，甚至係無。以你現時情況，不建議持有太多。

6) 以香港物業回報來計，接近3%算係可接受的回報率(若你物業在海外，則作別論)。由於出售物業，都有一定成本。

物業本身是一種資產，同優質股一樣，都具有增值能力。而且佢能提供穏定現金流，對減輕你生活開支壓力，都有幫助。

記住，我地財富增值組合，除了講質素外，都講平衡性，唔可以偏晒係股票類。若你物業係有質素，其實持有係無問題。

若你最終覺得，都係沽出物業較好。這筆資金，你都可以用來投資「平穏增長股」。

當然，你唔一定要100%去投資落「平穏增長股」。

若你想增值能力高少少﹐你可以加入一些「潛力股」。相反，你希望創造多一點現金流，去減低生活開支壓力，則可以加一些「收息股」在組合內。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

現時大市只是合理區，200萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

另外，由於你就快有小朋友出世，預期有一定額外洗費。加上你太太短期內不能工作，你要先預留半年左右開支，作為應急之用，才開始投資計劃，會較為穏當。

7) 其實投資港股定美股，個重點都係睇企業質素。若有質素，我地再從佢平貴，組合平衡性、是否適合自己投資策略等，去定買入計劃﹐咁就可以了。

------------------------------------------------

Q21709：

你好 最近4.53買左隻1571 13000股 系做汽車內飾既本身覺得隻股手頭有大約5年訂單 而且還多左tesla 蔚來 同小鵬汽車既訂單

埋e加好多汽車，電動車既既第一季季報出左出貨量都仲系增加緊，買果陣市盈率得11倍左右。但得四離多利息，

本身預佢疫情過後，會隨住電動車既增長而增長。同資本開資慢慢減少派息都越來越多，未來一兩年內有豐厚既收益，

但e加大跌到3.96我開始懷疑我買貴左好多，請問我仲keep 唔keep得過？

龔成老師︰

當我地進行企業分析時，要睇一些長期因素，中短期情況不要太過著重，要睇核心。同時在估值上，市盈率低過10倍不一定平，每間企業都有佢自己合理的市盈率，如果企業本身獨特性唔夠強，就未必值得高市盈率。

信邦控股 (1571)業務主要係為中國供應載客車輛的汽車內飾電鍍零件。

業務上，佢都算有投資價值。但睇翻佢過去1,2年表現，未見好突出，唔算好受惠於新能車發展。

初步睇佢都有投資價值，但只是中等。現價算合理區頂位，你投資此股，但若持貨太多，建議沽部份，去平衡風險較好。

------------------------------------------------

Q21710：

老師你好，本人42歲, 月入$25000現金約50萬, 持有以下股票︰

0012 - 1000 @27.90
6823 – 1000 @10
0003 – 1000 @11.5
0002 - 500 @70.5
0016 – 500 @99.95

1833 – 200 @80.7
2382 – 300 @193.4
9988 – 200 @244.5
3067 – 600 @17.7

1928 – 1200 @37
1810 – 2000 @23.7
388 - 200 @469.7
6993 - 2000 @11.92

另月供盈富$2500現大約有1850股及領展 $1500, 約360股

請問以上組合可以嗎? 不同股票會否持有太多，如想加貨應該加那一隻。我收入不多有機會做到財務自由嗎? 有何策略?

謝謝解答

龔成老師︰

其實每個人財務自由定義都不同，你睇翻你自己目標。

但相同地方是，大家都要透過財富增值，先去累積一筆資金。到有一定金額，就換成收息資產去創造現金流，去達成這個財務自由目標。

我們運用的方法，就是「先增值，後現金流」，其實你這刻年齡未大，應該著重財富的增值，到了一定的年齡及擁有一定財富後，才將持有的財富，配置到現金流類別，利用現金流去達到財務自由。當你的被動收入，大過基本支出時，就稱為財富自由。

你現時持有股票，都係有質素，都適合你。

但比重上，有少少偏重左係潛力股(1833, 2382, 9988, 3067, 1810, 0388)，令組合風險偏高。

但由於佢地都有質素，而且唔好高左好多。你只要新資金，集中翻係平穏增長股，令潛力股比重慢慢回落至4成，就可以。

現時大市只在合理區，你月供部份無問題、照做就可以。但最好每月除了月供外，都有一定資金可以儲蓄。

而這些儲蓄，就連同50萬一齊等大跌市機會，才出手掃貨，並長線持有。

------------------------------------------------

Q21711：

龔 sir, 近來開始睇你的FB及書，了解更多理財知識，獲益良多，現請教怎樣步處退休安排。本人预期下年退休， 有物業自住及資產如下:

現金: 約300萬

股票:
煤氣 17,000 股
中銀香港 2,000 股
港鐵 1,000 股
海爾智家 1,400 股

請問怎樣安排可達至每月有現金流$12,000 - $15,000?

可否月供收息股加少許潛力股，如 3067?

感激萬分

龔成老師︰

如果你希望退休後，每月有1.5萬蚊現金流，以股息率6%計，你需要本金300萬。

因此，你現時資金，基本上數字已足夠達至退休目標。

由於你退休所需資金己經存在，其實你已可以為你退休組合，開始進行配置。

至於你現時持有的股票，基本上都有質素，而煤氣（0003）、港鐵（0066）、中銀（2388），雖然未算完全的收息股類股，但風險不高，都可留在退休組合。

另外，你可以將這$300萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

至於現有持股和你提議的安碩恒生科技(3067)，雖然有質素，但由於佢地作用主要係增值。而作為退休人士的你，增值已經不太重要，重點反而係創造穏定現金流。

所以，你可以開始慢慢將現有持股，換碼至收息股中，去增大你組合產出現金流的能力。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$300萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21712：

Hello. 睇完你的選股勝經及股票勝經後. 發現自己有幾隻股票 係因為人性因數而買入而非理性分析.

例如美團3690 係240 有一手. 後來經估值後 PE合理區間為 $132 - $240 左右. DCF 方法為 $167 - 213. 對於重新檢視後發現 因為買入在昂貴區,

我地應該點樣應對? 我明白買賣在於企業本身的質素. 但考慮整體組合, 我應該持有定出售，去張資金放入另外有經分析過又合理區下的股票?

龔成老師︰

我地投資一隻股票前，必需先做好分析和估值，之後出手，才算正確方法。

但由於你已買入，我地就應審視翻，這隻股票有無質素，去決定是否持有。因為已買入，所以重點已經係睇質素，買貴左，定平左，而一刻唔會係我地持有與否的理由。

若分析後，發現此股係有質素。我地就要了解，佢是否適合我地成個財富配置。

以美團(3690)為例，佢係潛力股類，但不確定性較高。若你係退休人士，就不適合持有，有質素都要沽。

若你係年青人，這股適合。但佢佔你組合比重好高，我地就要沽少少，去平衡個風險。

美團本身係有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴。

你持有此股係可以，但此股暫時不宜太大注。

------------------------------------------------

Q21713：

老師，我男朋友之前入左4手中國碳中和(1372)，在5.5買入，你覺得這股票有前景嗎，長線持有可以嗎？謝謝你

另外，我都睇好新能源股，老師對於大唐新能源01798有咩看法？可以分注吸納長線持有嗎？

龔成老師︰

中國碳中和(1372)主要在香港從事土木工程項目、樓宇建造和保養；以及開發、生產及銷售汽車發動機。

企業規模唔算好大，股價、營業額和盈利都十分波動。過去有多年出現虧損，加上過去幾年，核數師都比出「無保留意見 (修定報告)」

雖然唔一定有問題，但我地對這類股票，就要保守少少。

整體而言，此股投資價值不高，你勉強可以好小注持有。但長線計，換至其他優質股較好。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細。現價合理區中上部，可分注，但唔建議投資太大注。

------------------------------------------------

Q21714：

Sir：這些年來不斷看老師的書和 Facebook post，使我的理財和投資知識增長不少。

今次想請老師你看看我的投資組合，給予我一些意見。

我現年27歲，全職+freelance月入為$3萬至$3.5萬，扣除開支每月可儲約$2萬元。

目標在5年後Full Pay買入市值$300萬以下的村屋單位自住，並於40歲前財務自由過半退休生活。

現時手持$20萬現金和總值約$40萬股票，組合如下：

2 中電 117 @$74.89
5 匯豐 835 @$43.83
66 港鐵 257 @$42.10
1810 小米 1000@$26.54
2800 盈富 363 @$27.19
9988 阿里 1036@$250.36
ARKK 27@USD$140.46
TSM 34@USD$125.93
PYPL 10@USD$253.40

中電、匯豐、港鐵和盈富月供$2000，阿里就$3000。

因為尚算年輕，所以股票組合側重於增長股。最近科技股回調不少，雖然有時會因而感到憂慮，但憂慮過後明白波動只是一時，應該把目光放遠。

比較擔心的是ARKK，高位買入太多了，現正盤算是否應全數賣出轉做現金，然後等待時機買入VOO，還是在低位時再加貨？

老師認為我的組合還有其他地方需要作出調整嗎？

另外，我正考慮購買儲蓄保險/年金，希望40歲後有固定收入/一筆錢用作日常開支，你認為儲蓄保險還是年金會比較適合我？

老師對我的40歲前財務自由計劃還有其他意見嗎？
Thanks!

龔成老師︰

不論是置業，還是你財務自由目標，都尚有一定時間，係而一刻我地應先做去增值部份，累積一筆財富，為這2個目標作準備。

你現時持股和月供選股，都係有質素。但中電(0002)和匯控(0005)主要係收息，增長力唔高，不宜持有太多。

而儲蓄保險和年金，這類產品，都不太適合用於財富增值。

以你現時27歲去計，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，除了盈富(2800)和港鐵（0066）這類平穏增長股，你都可以投資同是平穏增長股的VVO、金沙（1928）、恆基（0012）、平安(2318)、中銀（2388）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半儲蓄和$20萬現金，我地就等機會，當大市出現較大回調，就加大力度掃貨，然後作長線投資。

至於ARKK，係有質素。但你預佢股價較波動，係潛力股類，要控制整體注碼。但現貨唔洗沽，長線持有就可以。

我假設投資回報有10%（連股息再投資），你每月投資$20000 + 現有資產60萬(現金和持股)，5年後大約會增值至240萬。

但我唔建議你用FULL PAY去買屋，因為現時係低息環境。若你有一定投資知識，應用借貨模式買入物業，以便留下較多資金去做增值。

假設你動用一半資金去置業，之後再用同一方法去增值至40歲，大約可累積到500萬。

再將佢換成6%收息資產，每月大約可以創造2.5萬現金流。

你可以用我以上預算作為參考，因應自己情況和目標，再作調整，去提高達成你目標的可能性。

------------------------------------------------

Q21715：

老師你好，本人持股2318，貨量唔多，長線看好，但睇返新聞先知有華夏事件，我在87蚊買的，適宜在81蚊多買一注嗎？

另外亦有939，有20000股，在2018年買入，一直跌，買入價7.8左右，宜繼續買入，定收住息先？

手上有中國人壽20000股，16.3買入，長線看好這公司嗎？

龔成老師︰

華夏幸福(600340)公司出現流動性緊張，平安(2318)為其第二大股東，在此公司投資額約為540億。

以平安資產規模計，算唔上一個大投資，而且集團最終損失，都不是以這個投資額作準。

因此，這個問題唔算係好嚴重。反而要留意，將來會不會陸續出現同類問題。如有，就反映平安係投資決策上，可能有不足之處，那就有需要扣分。

暫時睇平安質素依然存在，你可長線持有。但再加注，最好相隔10-15%，所以建議等人回多少少先。

建行(0939)有質素，但主要係收下息。若你目標係收息的話，不用理股價波動，照持有就可以。

中國人壽（2628）並不是無質素，不過增長力唔強。同埋企業的賺錢能力不及過往年代。

相信這股唔會再大跌，但要佢大升都不易，長線持有價值都算有，但暫時唔好對股價有太大期望。

若你持貨不多，係可以。相反你持貨佔組合較多，建議沽出部份，換至其他優質股﹐去平衡風險。

------------------------------------------------

Q21716：

老師，我又來請教你了，因為我多了月供的預算，以及媽媽聽我說願意把自己只懂得放在銀行的其中10萬儲蓄嘗試給我幫她投資，

為了保險起見，還是想問問你的意見~另外我也看了你的財務自由行，80後百萬富翁，五年買樓四部曲，50優質潛力股等書！

現在排緊預約你的股票勝經呢在100多名後哈哈。

我今年剛滿27歲，打算幾年後結婚置業，現在月供緊：

2800盈富1000
0027銀娛1000
3067 安碩恆生科技1000

另外有兩手3067和一手小米

1. 過多一段時間，我供完自己讀書後，每個月會再多出7000可投資，總共每月可投資金額1萬。因為老師你說要預留些資金，所以打算每月儲蓄4000，投資6000

（還是可以再多些？因為我今年才開始投資股票，起步較晚）。

請問以下6000的投資方案哪個較好？是方案一分散投資，或方案一集中etf投資，因為手續費的問題，或者老師你可以建議我怎樣調整我的投資方案嗎？

我還年輕，可承受風險較高，那麼舊經濟股和新經濟股可一半一半嗎？甚至新經濟股比例可再更高？因為想五年內可買細價樓投資。

方案一:
2800盈富2000
0027銀娛1000
3067 安碩恆生科技1000
1810小米1000/或港交所好？
1177中生1000

方案二：
2800 盈富2000
0027 銀娛 1000
3067 安碩恆生科技 3000


2. 另外，我媽媽（佢年齡唔算大，相信仍可財富增值），佢願意拿儲蓄其中10萬給我嘗試投資，不過她說虧了我就要賠給她成本，贏了就算我的哈哈。

她比較保守，我打算買收息股，現在幫她買了一手0548深高速@8.020，剩餘84000左右，打算會繼續買收息股如港燈、香港電訊、工行、置富等老師你說過的收息股。

那麼，我媽媽是否應該將其中一半投資平穩增長股如盈富、領展、港鐵等呢？還是收息股比較穩當，因為我不能虧了她本金哈哈。若賺了我還是會分她一半的。

謝謝老師你的無私分享，問題比較長，希望不要介意，繼續向你學習！

龔成老師︰

1) 你現時月供$6000，儲蓄$4000，根據大市平貴水平而言，已經係可以，唔建議再調高每月供款。

你現在還很年青，操之過急，反而會對你不利。只要用對方法，長線持有這些優質股，自然會有不錯回報。

其實方案1和2都適合你，選擇重點會係月供成本和你對這些股票的認識。

若你係特別睇好小米(1810)、港交所(0388)和中生(1177)，你可用方案1。

小米(1810)、港交所(0388)都係好優質，你可以視乎個人喜好和認知程度，去做決定。

如果你想月供成本少D，或者你唔係咁熟這些潛力股，又或者想分散D個風險，方案2會較合適。

2) 至於你母親，雖然以佢年紀計，的確好似你所講，係有一定增值需要。

但由於佢個人比較保守，風險承受能力不高。我建議你照她意願，集中係收息股，會比較適合。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

但緊記，係你創建收息組合時，唔好太集中係個別企業和行業，以免有過度集中性風險。

------------------------------------------------

Q21717：

老師想請教下你，3883及2233、799邊隻較有質素？現價邊隻較抵買？

龔成老師︰

其實3隻股票，性質好唔同。我建議你除了價格值博率外，都要因應自己風險承受能力，去選股。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，現價合理，但此股風險較高，唔建議大注。

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。

比較吸引的是現價唔貴，但長遠對佢增長就唔好有太大期望，可以視為收息股。這類股唔建議太大注投資。

IGG（0799）業務上都有質素的，但卻是有風險的類別。

雖然佢財務數據不差，但業務本質的不確定性大，軟件及遊戲都是變他較大的行業，這種不確定性可以令企業好勁或好弱，因此你要明白這點。

佢股價上落大是正常的，如果你投資要明白這點，就算長遠企業價值向上，都要明白股價波動。這股不是無質素，現價算合理。但由於有風險，因此唔建議大注。

------------------------------------------------

Q21718：

龔sir，可否分析一下現在經濟狀況，是否偏向滯帳。

現在由於（1）疫情，資源生產受影響，（2）另加上多國量寬政治，引致資源價格大升，不只是大升，是創歷史新高。

但另一方面，經濟重啟亦受各地疫情影響，經濟停滯不前。通脹升溫，而經濟沒跟上，引致滯脹危機風險，現在是否很高。

以往，很少出現滯脹，但印象中，有一次，是所有資產價格會下跌包括股票，物業，債券。。。那時是現金為王。

可否聽聽龔sir你的看法。

龔成老師︰

各國係疫情期間，加大印銀紙速度，令市場預期通漲會進一步升溫。引至滯脹機會，係存在。

但我地係制定投資策略時，應集中在企業層面去作考慮。而唔係估會否出現滯脹，或者出現後，成個大市會點走向。

我地做架事，其實應該係偏向被動，而唔係去預估將來。只要市場出現變化，令價格調者至有利位置，我地就可以有策略地出手。

當然，宏觀經濟唔係完全唔理，但只會佔較少比重。較要留意，這類宏觀因素變化，會唔會影響到企業長線發展，咁就可以。

------------------------------------------------

Q21719：

龔sir你好，睇完思維篇之後，有幾題問題想請教老師

（1） 書中提及過辭職，我想問當時你同上司講辭職原因係咩？

（2） 書中提及進攻型思維，前提係都要有基本防守，我股票組合大約$30萬，當中大部分都係水桶2，想問咁算唔算防守？

（3）本身月供緊1177，2800，788，066，下個月將788變成供1211(如果唔貴的話)，算唔算增加進攻？可行嗎？

（4） 如果我強項及興趣在於股票/理財/投資/數學，應否全面集中提升這些技能既實力，還是都要發展其他技能？

（5）小弟幾鐘意數學，但數學能力其實可唔可以幫助理財/投資？

謝謝龔sir指導

龔成老師︰

1) 同佢講我想尋找其他發展，首先想休息下，之後再轉其他工作。（但其實，當時我已經寫緊書，已經建立了出面的副業，但無同上師講）。

2) 你現時26歲，係財富增值的黃金時期。而且你年輕，風險承受能力，理應較高。

水桶2，係要有，但大約佔組合一半好了。因為水桶2有增長力，但唔算最高，主要係幫你穏中求勝。

其餘部份，應投入水桶1股票，去做進攻。但我唔係要你盲力地加大比重，因為始終水桶1要求投資知識較多，風險也較大。

如果你經驗較淺，可以先小注，大約佔組合3成左右。此期間，你要努力學習，去提升自己投資知識水平。到你有一定知識和經驗，你可以投資到約5成比重。

3) 要睇你供款比例，水桶1(1177, 1211, 0788)和水桶2(2800, 0066)，應大約各佔一半，當然你視乎投資能力，去再作調整。

4) 我建議你先集中係自己強項，但唔代表其他唔理。就好似我自己，投資商業/股票較強，所以會先集中這部份。

但同時間，我都會學習其他地方，令擴闊自己知識之餘，都看看其他地方，有無發展機會。

5) 坦白講，係有D幫助，但唔會好大。除非係會計方面，個幫助就會較直接。

------------------------------------------------

Q21720：

龔成老師，近期股市調整令股票資產-30% 心理上有壓力，本人持有 9988，3690，1810，175，6690，2400

請問以上是否有質素的股票？是否應該長期持有？現在應唔應該溝貨？感謝

龔成老師︰

你持有股票都係有質素，可以長線持有。你要明白，就算優質股都會有波動，唔好太受個買入價影響判斷，要從企業質素去諗，到底隻股票值唔值得長線持有。

但我發現，你持有的股票，都是近半年較熱門的類別，反映你在選股時，只跟著市場較多人投資、近期較多人談論的類別去選股，而這類股（近期熱門類），一般都已經炒起左，因此一般都貴。

如果你日後都以這方法投資，往後仍是好易買貴貨的情況出現。

但好彩的是，上述持股，不少都有質素的。

另外，我想你留意，以下幾個問題。

首先，你組合中除了海爾智家(6690)，全部都係潛力股。佢地雖然有增長潛力，同時風險都較高，不宜持有過多。

特別係心動公司(2400)、美團(3690)這類不確定性高的公司，投資時不可以佔組合太高比重。

就算你現時好年青，風險承受力較高，潛力股都最多都只可以佔約5成，餘下應投資平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

對於你想再加注，我就唔建議。

因為本身你組合已經風險偏高，就算再平，暫時都唔建議加注在這些潛力股。到你組合開始大，個比例回復正常，你才考慮是否加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21581-Q21600）

Q21581：

你好，龔sir ,有啲迷惘，想請教下；由於疫情持續、生意收入大減一半、現在每個月收入勉強只能養活一家四口、已經沒有額外金錢作投資...

手頭上有三份保險，大人那兩份供了10年及小朋友的只供了兩年....

我諗緊應唔應該cut 左份保單....用來供股又好、其他投資也好....

現在保險變成好似每個月的消耗品、好大負擔⋯⋯兩公婆以前沒有考慮周長便買左，一供便供了10 年....

小朋友成長，開去只會越來越多，生意不滯下、開始愈來愈擔心

希望老師能夠比小小意見或方向，屋企得我一個人搵錢。開始感到有壓力

龔成老師︰

其實"保險"主要係用來防守，透過當中保障，去將你的人生風險分左比保險公司。因此，保險你係要買的，但只要買足夠保障就可以。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。但用來做財富增值，效率就不算太理想。

你要先了解翻，你保險係保障，還是儲蓄類。如果係保障，我建議保留。因為你取消左，唔一定可以用以往條件買翻。

如果係儲蓄類，又就供完，我建議你供埋佢較好。

若你覺得保險供款，對你造成好大壓力。你可以了解翻你持有保單，有無短期停供的方法。如果有，你可以考慮短期停供，去減輕你生活壓力，詳細你可以向保險公司了解。

另外，你要記住我地投資，永遠都係先做好防守，才會去進攻。

記住，成個財富增值，係一個全面和長線計劃，當中包括考慮你家庭開支、生意、和其他投資項目等。

現時你收入受疫情影響，資金應優先處理好日常生活部份，再預留半年開支，作應急錢。

你唔好急住去投資，要先處理好家庭。之後，就係你生意部份。最後再有餘力，才用優質股去增值。總之，你唔好操之過急。

你要明白，一盤生意做得好，回報係會比投資優質股大。所以，我會建議將生意，放在較前位置去考慮。

現時疫情造成的經濟問題，相信只會係中短期，長線會重回正軌。只要你保持正面心態，事情就會自然變好，加油。

------------------------------------------------

Q21582：

老師早晨！我是投資新手，2月頭開始接觸股票。入手了1137（$15），0175（$25）和3690

（$396）。不幸地入手不久後就開始跌。由於第一次接觸股票即失利，心情十分徬徨！

究竟應該止蝕離場還是堅守？而它們的前景又如何？求老師你為我指點指點。

龔成老師︰

投資前，做好估值去避免買貴貨，係重要。

但當你已入貨（不論買平左，定貴左），其實你都唔應該太睇重"買入價"。因為當你買入一隻股票之後，你是否繼續持有，關鍵位應該係企業質素、前景。買入價，已變成一個心理因素。

這3隻股票都有質素，有長線投資價值。吉利（0175）無問題，但美團（3690）架業務係較新，不確定性都高，持有無問題，但不建議太多，同時要明白股價上落較大。

而香港電視（1137）則有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

另外，這企業現時搞網購，有增長力的，但同時存有一定的未知數。。

佢多年來不斷在燒銀紙，雖然佢的業務的確增長中，並初見盈利，但長線能否維持，還需觀察。

所以，這2隻股票不宜太大注。如果佢地只佔你組合很少比重，長線持有係無問題。

------------------------------------------------

Q21583：

龔成老師，你好，我今年33歲，搵$22000一個月，我之前有短炒港股，但計返玩左咁耐，無乜點贏，宜家買左你本股票勝經，想學多啲投資知識

我有買美股作長遠投資，每月會買3-4股，因為美股可一股一股買，成本低，可輕易設組合，等同月供股票咁。

以下組合唯獨百度高位入左，現在跌左近30%，未知要唔要調一調倉，同埋我個組合新舊經濟都有，唔知啱唔啱，麻煩老師比少少意見，感謝感謝。

股票如下；

百度265 入
嗶哩嗶哩 110 入
愛奇藝 16.7 入
ARKK 123.99入
AMC 9.69 入

台積電 118.55 入
美國運通147 入
卡夫亨氏 38.9入
可口可樂 51.9 入

龔成老師︰

我想你先清晰2個概念，首先，我地投資股票，係希望買入一些優質企業，透過佢自然增長，達至財富增值目的。

重點係長線持有隻優質股﹐唔係去做短炒，因為中短期走勢無人知。但長線持有，企業質素一定會反映在股價當中。

第二，唔好覺得買入一隻股票入場費低，就係抵。我地是否買一隻股票，要從質素作考量，而唔係買入成本。

若你買的是優質股，可能1手要5萬蚊，入場費係貴，但因為有質素，所以可以再升。相反，如果係劣質股，就算入場費只要$100，都可以再跌。

所以，我地重點應放係「質素」上。

我唔係話你1股股買美股，當係做月供儲貨的方法有問題。只係想提提你，唔好用買入成本多少，去判斷投資價值，而是要以「質素」來作判斷。

你組合中股票，大致上都係有質素，可以長線持有，不過科技相關股的持股比例開始有少少多，你要注意會否出現集中風險。

另外，有以下3隻，想你留意翻。

愛奇藝(IQ)有質素，但現時尚在未有盈利階段，不確定性較大，不宜持有太多。

AMC Entertainment Holdings(AMC.NYSE)業務主要是經營劇院，市場包括美國、多個歐洲國家、沙特阿拉伯等。

質素都算有，但唔係好高。近年受疫情影響，2020年出現大幅度虧損，出現破產風險。

此股有一定風險存在，投資與否，你要自己衡量。同時，你預佢中短期都會較波動，長線才會慢慢轉好。整體而言，此股只宜小注投資。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左。

雖然你係高位入左貨，但此股長線有增長力，只要唔係佔你組合太高比重，持有係無問題。若佔比重偏高，就最好沽少少，去平衡下個風險。

------------------------------------------------

Q21584：

Hello ar sir！剛剛完成了你的8堂基礎班，坦白講，放工後再上3至4個鍾堂真係幾攰，不過8堂我都非常專心，至少比我以往讀書專心，哈哈。

首先課程係自己揀，我亦知道內容甚至影響一生。

黎緊呢個月要再重溫整合你的筆記，謝謝你既分享。雖然我唔敢講課程能夠令我馬上致富，但以下幾點對我最大影響：

1. 你個句“要將數字意義化”，我覺得係精粹，意義化即係分析，分析不單能夠解讀過去，甚至預判將來。不只股票投資，工作生活等事情上同樣有幫助。

2. 分散投資，考慮風險再考慮回報。

3. 耐性同堅持。等機會入巿，等企業成長，有耐性同堅持既人比較大機會成功。

4. 我喜歡你的正面思想及不斷吸收別人的長處為已用。我跟你一樣公屋出身，我的親友都係基層巿民，我細個就發現我d親友一d都唔蠢，

至少係賭錢同出古滑上佢地係高手，但佢哋不敢訂立大目標，沒有偉大的理想，結果貧窮限制他們的發展。

我覺得除了理財的書籍，我覺得你亦十分適合寫勵志書或舉辦人生規劃課程。城市生活令人壓抑，不少人多多少少都有d情緒病，精神健康欠佳或缺乏人生方向。

相信你能幫到這些人。

希望以上既回饋，可以比到你參考，繼續在課程內容或者你既教學範疇上更進一步。

龔成老師︰

無錯，就算係日常生活，好多事情我地都唔好只睇表面。要認真了解眼前資訊，在背後所代表的意義。

其實好多人都有目標，知道未來想自己變成一個怎樣的人。但實行上，未必用對正確方法。

特別係投資範疇，好多人希望透過投資股票致富，但認知上，都停留係大部份散戶，那種「一般人」的思維。

因此，希望透過課程，灌輸一些經驗、正確投資理念和知識。希望可以幫助佢地，從「一般人」思維，跳進「有錢人」思維，從而增高成功致富機會。

我好多謝你寶貴的意見，但因時間關係，相信未來一段時間內，我都會先以投資理財作主導。希望先從我專業範疇，去幫助有需要的人。

但你的建議好有意思，我會認真考慮，謝謝你。

加油，記得多溫書，保持進步！

------------------------------------------------

Q21585：

你好 龔老師，之前有睇開你的理財真人SHOW，直至今年2月先開始投資股票。我經富途牛牛買股票，想學習老師講嘅長線投資 ，應該放邊幾隻或增持邊幾隻。

我的資產分佈及投資未來方向可以點改善。謝謝老師

25歲

港股:
6690.HK: 1000股 $32.86 (想沽)
6993.HK: 2000股 $11.08 (想沽)
2382.HK: 100股 $160.40
3067.HK: 600股 $17.58

美股:
AAPL.US: 10股 $134.30
DIS.US: 5股 $188
JNJ.US: 5股 $162
TME.US: 40股 $19.575 (想沽)
ARKX.US: 30股 $20.875 (想沽)

另打算增加個別港美股
1177.HK
1810.HK
BRK.B.US

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你應以增值為主，可以用一些「平穏增長股」和「潛力股」作目標。

你現時持有股票，都係有質素，建議你長線持有。至於3隻新增目標，都可以考慮。

但留意，ARK Space Exploration & Innovation ETF(ARKX)不確定較大，不宜持有太多。

另外，藍月亮集團（6993）、海爾智家（6690）其實都有質素的，你都可以長線持有，只要貨不過多就得。在你衡量是否持有一隻股票時，不要著重短期的股價表現，要睇翻長期的企業價值。

由於你無太多投資經驗，未必對平貴估值方法，有太深了解。建議你先用月供，去儲優質股，這樣有助你降低買貴貨風險。

你每月先用5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時投資經驗不多，可以先集中係平穏增長股，甚至盈富(2800)。到你有一定投資經驗﹐才慢慢加大潛力股比重，最多佔組合3-5成，視乎你當時投資經驗和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21586：

老師你好,本人現年33歲 有兩子 想用他們的利是錢投資 (約30000)應該買那隻長線股好？

另外正在開始月供股票 (2000盈富) 尚有1000元可用 但銀行無3067月供。

龔成老師︰

小朋友儲錢方面，你可以儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

現價計3067無得月供，你可以每2個月自行買1手，都可以做到月供效果。

但緊記，現時大市只在合理區，每月儲蓄不要盡用。要儲起部份，等大跌市時才出手。

------------------------------------------------

Q21587：

早晨，龔sir 請問2158應現在放嗎?

係64蚊買完話跌到32，今日升返上45應該止蝕嗎

龔成老師︰

唔好太睇重"買入價"，因為當你購入一隻股票後，你是否繼續持有，關鍵位是企業質素、前景。買入價，只係一個心理因素。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

若你現時持貨不多，無問題，作長線投資就可以。但如果佔比重較高，最好沽少少，去平衡翻個風險。

------------------------------------------------

Q21588：

龔sir，你好!Follow咗你個page好耐，學咗好多野同埋亦深受你的鼓勵，今次係第一次pm你。

我想問吓你對VR產業未來嘅睇法係點? 我認為佢嘅發展不會差於電動車，雖然現在大多只用於娛樂，但係未來在教育，醫療層面的使用相信也不少。

但是距離技術成熟還有一段路。請問阿SIR如果我看好這個產業，會推薦投資哪一間公司?

謝謝!

龔成老師︰

其實現時虛擬實境(VR)產業，除了娛樂，已應用在不少行業上，例如建設、設計、教育等方面。

這種技術可塑性好高，相信不久將來，會有更多不同行業和場景，會應用到VR技術，前景是正面的。

暫時我未有特別研究，唔清楚邊間企業，會較直接受惠。

但你可以從不同行業，特別係已應用VR技術的行業中找尋。有邊D企業或行業，會因為VR技術，令佢本身價值或者成個營運效益有較大提升。

你可以進一步研究，了解佢是否有投資價值。

------------------------------------------------

Q21589：

龔大哥，求教 493 同9997點玩好 兩隻都炒落咁款 我想玩反彈岩唔岩？

龔成老師︰

我地投資股票，係希望買入一些優質企業，透過佢自然增長，達至財富增值目的。

重點係長線持有優質股﹐唔係去做短炒。我地唔會去估走勢，因為中短期走勢好難估。佢可以受好多因素影響，好似資金流向、市場氣氛等等。

但長線持有，企業質素一定會反映在股價當中。

國美零售（0493），從過往分析，質素只是一般。

企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是創始人黃光裕回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。

此股不宜持有太多，若你持股較多，應先沽出部份。餘下的持股，可以守。

康基醫療（9997）睇翻佢的資料，佢係中國最大的國內微創外科手術器械及配件(MISIA)平台。

根據資料，按銷售收入計，2019年中國MISIA市場規模達到人民幣185億元，集團在國內廠商中排名第 一，在所有廠商（包括國際和國內廠商）中排名第四，所佔市場份額為2.7%。

根據資料，2019年銷量計，集團在中MISIA市場的多個細分領域，包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。

佢不是無質素，現時回調，主要係因為上市定價唔平，現時只係回調至較合理水平，但都仲有少少貴。

若你持貨不多，可以守。但持貨較多的話，建議你沽出部份，去平衡個風險。

------------------------------------------------

Q21590：

龔sir，你好。今年30，月入35000，得我一人收入，有两個小朋。

太太就間唔中就買下，手上都有隻2186綠葉制藥6000幾股。

佢之前放咗幾隻唔知咩股蝕咗4萬幾

而我自己就冇乜投資經驗，但都會睇你facebook同下財經新聞以及同聽身邊啲人取下經

因為以前又冇乜點理財同儲錢習慣，宜家我哋就開始想學習你嘅長遠投資組合當儲蓄。 希望學習到同得到一個好嘅理財習慣。

常見龔sir你都推介2800盈富基金，3067安碩恆生，1177中國生物做月供

而我都有幾隻想請教阿sir你提議下可否做月供?

1308海豐國際
2269 藥明生物
1810小米
5滙豐控股

2800盈富基金
3067安碩恆生
1177中國生物

請阿sir指教月供邊隻好，月供咩組合好?

同月供每隻供嘅資金分布係幾多，每月應該可抽$8000月供。

最後一問太太隻2186可以放出。

龔成老師︰

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

由於你無投資經驗，用月供會以避免左買貴貨的風險。只要你月供組合，係選對一些優質，而又適合你的股票，其實成個增值效果，已經會係唔錯。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主。你所講的月供股票，都有質素。但匯控(0005)只係收息股，增長力唔高，唔建議你用。

而你組合當中，不少係潛力股類別(2269, 1810, 3067, 1177)。佢地增長力高，但同樣波動性都好大，你投資經驗不多，不宜太大注。

月供配置上，你可以先用$4000供盈富(2800)，用佢作主力。再月供$1000海豐國際(1308)和其中3隻潛力股。

現時大市只在合理區，除了月供$8000外，你都要額外預留一些資金，等出現大跌市時，可以動用來買平貨。

至於綠葉製藥（2186），都有質素。佢主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。

若你持股佔組合比例唔多，你可以長線持有。如果佔比重較大，就最好沽少少，去平衡個組合風險。

------------------------------------------------

Q21591：

你好！我們一家四口，現金有$100萬，沒有自住物業。

現在有2難，應否拿100萬作首期買樓？

但用了便沒有餘錢投資。

如果月供股票，那隻較好？

龔成老師︰

每個人都有自住需要，長遠最好都有一個自住居所，以免承受租金波動的影響。

但由於你現時資金不多，如果買樓後，完全不能維持投資增值，就唔係咁理想。

我建議你先用優質股，去累積一筆資金。之後，再去考慮買自住居所，咁會較好。(詳細方法，你可以睇我本"5年買樓4步曲")

月供方面，你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於「潛力股」係需要一定經驗，如果你經驗較淺或較年長，只宜小注，大約3成左右。若你係較年青，而且已有一定經驗，你可以投資到約5成比重。

餘下現金，我地就是等大跌市時，才出手掃平貨。

------------------------------------------------

Q21592：

我每月可以儲$8500，比例上咁安排適合嗎

3067，$5000
2800，$2000
現金，$1500
每月月供

因為我本身係中銀月供，但中銀冇3067可月供

頭先上網search過有間XX證券行有3067可月供，免存倉費，佣金收0.0675%，比其他證券行平

Sir，唔好意思比較多問題，頭先上網睇過證券行同銀行比較月供股票，如果係證券行月供股票，會有風險，有機會倒閉。

但銀行又月供唔到3067，只可一手手買，但銀行買，手續費貴。可否比d建議如果想供3067應該點做。

龔成老師︰

其實香港對金融機構監管係唔錯，證券行出問題機會，唔算好大，可以用佢作投資渠道。

如果你都係覺得銀行穏陣D，安碩恒生科技（3067）你每月直接一手手買就可以，都做到月供效果。

至於你資金分配上，有少少進取。以你近30歲年紀，安碩恒生科技（3067）這類潛力股，最多佔5成左右好了。

若你自問投資經驗較一般，最好再調低多少少(至3-4成)，到你有經驗才重新調高。

因為潛力股增長力係有，但風險同樣高，故不建議初階投資者持有過多。

而預留現金比例，都可以調高翻少少。因為大市未算開始平，只係合理水平，不宜投入過大資金比重。

------------------------------------------------

Q21593：

我用咗幾萬元買咗1653 Mos House，當初係喺1.13買入，但現時價位已跌到0.41！

1. 請問呢隻股穩陣的嗎？

2.你覺得是否老仟股？

3.我現時已蝕了幾萬元，請問我現正是否應該放嗎？還是放住喺度先？

龔成老師：

MOS HOUSE（1653）於香港銷售及供應外國製瓷磚，即石英、陶質及馬賽克瓷磚。此外，亦銷售衛浴潔具（浴缸、臉盆及其他配件）。產品均由意大利及西班牙進口。

企業無乜獨特性，加上近年出現虧損，而佢過往一直都唔太賺錢，整體的投資價值不高。

你的買入價明顯只炒作的價，佢根本唔會值該價，現時的股價算是合理價，你等佢有反彈宜減持部分，之後再等機會賣晒。這股長線持有的價值不高。

------------------------------------------------

Q21594：

龔成老師，上年我買左掃管笏Oma by the sea 一個471尺兩房的單位，584萬，老師覺得嗰區發展如何?

會唔會有機會升到$17000，一尺?

我諗住長線投資的，謝謝老師的分析和建議！

龔成老師︰

屯門是大型的住宅區，商業活動少。始終離市區較遠，因此樓價與市區有距離。

但隨屯門港鐵通車，屯門區交通變得便利。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力有少少，但唔會話好高。因為所有的利好因素其實已經反映左，而掃管笏各方的配套都唔會再有明顯改善。

------------------------------------------------

Q21595：

Sir,還有一個買賣問題想請教下，如果一隻股票賺了錢，賣取一部分獲利，一部分持有，這是容易做到的。但相反買入一隻股票賠了錢，應該要怎樣做

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業，重點永遠都係企業質素。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q21596：

龔sir 你好。有個疑問想問,本人現時已月供股票$4000 領展同盈富

如果每個月還有$6000剩。咁月供日本樓收租好還是加碼月供股票好呢？thx

龔成老師︰

日本樓，我無特別研究，你可以從佢租金回報率和對日本樓認知度，去決定是否投資。

而日本樓認知度，會是你投資的其中一個關鍵，到底你有多認識這項目?「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視。

你應該了解當地貨幣過去的變化，以及將來的強弱分析。

如果你對日本樓唔係咁了解，或者回報唔算高的話，你$6000用來月供股票會較好。

現時大市在合理區，每月儲蓄唔好盡用。這$6000中的$4000，建議先儲起，用來等大跌市機會。

而餘下$2000，你可以因應你年紀，去決定加入邊隻股票去月供。

若你係年青人，可加入一隻潛力股。如果你中年至退休人士，或者你投資取態較保守，你可以加一隻平穏增長股。

------------------------------------------------

Q21597：

龔成老師，有一些問題很急切的想請教您：

我好朋友的父親，在十幾年前某些原因，所以將部分資金轉移到他的妹妹（中銀），即我朋友姑姐的戶口。

但存摺和提款卡和密碼，以及買賣股票的密碼都在她父親手上，所以十幾年來都能賣買，但她爸爸幾個月前突然離世，搞父親的遺產需要一段時間。

現在已知的是父親有一個股票戶口（中銀），另外幾個儲蓄戶口，和大陸有一個定期戶口。

現在能動用的資金可能就是她姑姐戶口的股票，不過，這十多年來，世伯已買入不少股票，而她初步問過銀行，整個股票戶口不能直接轉名。

世伯離世後，她姑姐有說過可以繼續用她戶口買賣，但伯母對錢很擔心，很想轉回戶口的股票，又不知能否全部轉名，或者是先賣出一些比較不優質的，

然後再轉名，而她們對這些又不太熟悉，又不知該問誰，所以，很想請教一下您的意見。

以下是她"爸爸"這十多年來買的股票，以及買入價：

0123 越秀 40000股 買入價：20000股1.67、20000股0.99
0386 中國石油化工股份 2600股 買入價；2000股7..19
0536 貿易通 30000股 買入價：1.96
0579 京能清潔能源 4000股。買入價：3.42
0732 信利國際 6000股 買入價：3.69
1171 兗州煤業 6000股 買入價：2000股11.86、4000股13.62
1415 高偉電子 10000股 買入價：2.1
1418盛諾集團 20000股 買入價：1.23
1508 中國再保險 3000股 買入價：2000股2.51、1000股2.49
1569民生教育 10000股 買入價：1.8
1618中國中治 3000股 買入價：2.3
2038 富智康集團 6000股 買入價：1.42
2369酷派集團 16000股 買入價：8000股3.79，另外8000唔知買入價
2638 港燈-SS 1000股 買入價：5.23

由於她爸爸之前一直都是賣出一些賺錢的股票來維持生計，而她看過以上的股票大部分都未到買入價，帳面已蝕十幾萬，

想問問老師以上那些股票可賣出吐現、止賺、止蝕。以及那些是優質股票，那些值得保留，以及轉名等等。

還是她可以以現價賣出，然後再用另一戶口以現價買入，這樣會不會蝕很多？她們現在很惆悵，真的很需要老師的意見，懇請老師幫忙。

另外，以下是她"媽媽"股票戶口的股票，也是世伯幫她買的，想問問老師那些可以賣出止蝕，以及保留一些優質的股票：

0005 匯豐控股 713股 買入價：買了多年，我找不到買入價
0718 莎莎國際 6000股 買入價：1.73
0347 鞍鋼股份 5200股 買入價：8.93
0476 中國動力控股 10000股 買入價：找不到買入價
0536 貿易通6000股 買入價：2.030
0732 信利國際 4000股 買入價：3.69
1398工商銀行 6000股 買入價：6.15
1415高偉電子 10000股 買入價：4000股3.74、6000股2.99
1638 中國中治 4000股 買入價：2.3
1638佳兆業集團 2111股 買入價：3.45
1898中媒能源 6000股 買入價：3.25
2362 金川國際 6000股 買入價：1.23
2800盈富基金 2500股 買入價：28.1
2845 GX中國電車 50股 買入價：123.8
3067 安碩恆生科技 200股 買入價： 19.26
3338中國龍工 5000股 買入價：4.49

她這幾個月實在很徬徨無助，所以，盼望老師能幫忙。

謝謝老師。

龔成老師︰

全部轉名到你朋友媽媽戶口，係可以。一般用這個方法，費用會較平。但你要問翻中銀，因為每間銀行和證券行收費，都不一樣。

若你打算用同時間一買一賣，去變相轉戶，都係一個方法。但變相要支付雙倍經紀佣金，而且可能買入和賣出價未必一致，會有價格波動的風險。

另外，你要緊記一個投資重點。我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

唔係因為佢帳面賺，就覺得佢長線一定好。唔好因為而一刻帳面蝕，就覺得此股無投資價值。記住我地係睇質素，唔係睇價位去做決定。

先講你朋友"爸爸"戶口︰

京能清潔能源（0579）、信利國際（00732）、兗州煤業股份(1171)、高偉電子（1415）、中國中冶（1618）、富智康集團（2038）質素較一般或者波動性偏高，都不宜持有太多，建議最少要減持部份。

盛諾集團(1418)投資價值不高，換至其他優質股，長線會較理想。

酷派集團（2369）在幾年前我已經有點怕佢，第一，玩財技，第二，2016年核數師意見為「不表示意見」，2017年為「保留意見」，反映核數師對盤數有問題，第三，非常多散戶炒這股，而散戶永遠是輸的一方，因此我對這股一直有保留，就算數年前有讀者問我都是。

佢之前仲要停過牌，其中一個原因，是由於賬目問題，我見佢2018年度的核數師部分，出現「修定報告」，反映盤數有可能有小小古怪，投資價值不算高，建議沽出較好。

你朋友"媽媽"戶口︰

鞍鋼股份(0347)、信利國際（00732）、高偉電子（1415）、中國中冶（1618）、佳兆業集團(1638)、中煤能源（1898）、金川國際（2362）、中國龍工(3339)質素較一般或者波動性偏高，都不宜持有太多，建議最少要減持部份。

中國動力控股(0476)佢營業額好細，而且一直處嚴重虧損狀態，暫時唔見有明顯投資價值。

其餘無提及的股票，都有質素，她長線持有就可以。當中絕大部份，都係提供現金流的收息股。

由於持有目的係收息，所以佢不需要太在意帳面賺蝕，只要長線持有收息，就可以了。

------------------------------------------------

Q21598：

其實我都唔明，你隻1211，自己都計到股價貴，點解你之前唔放大部份？

龔成老師：

因為無人能預期股價升跌，如果我賣出，而佢股價一直唔跌，當企業價值不斷向上，我就會買唔翻，佢會由貴去翻合理。

我擔心買唔翻的風險，多過股價跌的風險，我著重資產，不著重短期股價。記住，現金不是真財富，資產才是。

------------------------------------------------

Q21599：

龔sir,請問我地應該點樣解讀股東增持，同減持嘅動作？
同睇好/吾睇好企業有冇關？

龔成老師：

如果股東增持或減持的%好少，就不用理會，佢可能自己都要取現金，或現金多想投資。

但如果%較大，就反映佢都睇好/睇淡公司，或反映現價處平/貴。

這些動作，參考下好了。我地一定以「企業」作為分析的核心。

------------------------------------------------

Q21600：

成哥，第一次膽粗粗傳訊息俾你，我只有26歲，今年我快29歲了。咁就3年，時間真不留人。

當年26歲，戶口只有10萬現金，一份供梗既儲蓄保，0股票。今日，我快29歲了，戶口中有38萬現金，18萬左右港股，5萬8左右美股，總資產為60多萬港元。

儲蓄保險亦供完，當然並不是一個咩大數，或者一件咩值得驕傲既事，只係隨住時月，我除左老左之外，戶口都叫隨年漸長，都係一件值得安慰既事。

多謝你當年啟發左我，3年來我都係用月供股票既方式買入股票，不論港股或美股，由買入果一刻開始就無放過。

結果，感恩既係我付出既時間好少，甚至我一個月先打開個股票戶口睇一次，但每次睇都會見到有賺。

反而身邊短線投資既朋友，會跟住個市場買入GME丫，晚晚睇住個市，但都仲蝕梗本金。就好似我一年前既訊息所言﹕「身邊聲音煩擾，但我步伐仍舊」。

講講下，好似打日記咁，多謝你繼續睇到呢度。

我想問下下一步我應該點樣做，或者除左股票以外，我仲可以投資D咩去令我既資產平穩增值？

收入﹕4萬多
支出﹕15000
港股(月供金額)﹕盈富($4000)、煤氣($1500)、港交所($1500)、領展($1500)
美股(每月手動買一手，約$9000多)﹕VOO、QQQ、ARKK、SQ、MCD

成哥，我相信好人有好報，多謝你詳細解答陌生人既問題。衷心祝你身體健康，生活幸福美滿。

龔成老師︰

我教的理財知識，只係為你提供一個指引和方向。最終能變成點樣，其實很大程度，係睇你本身所付出的努力，我純粹係助你一把。

我經常講，投資一定係做長線，但其實好多人會唔明白，唔相信。因為佢地依然停留係賺差價的思維。

你身體力行，去證明左長線投資價值，才是最有效的財富增值方法。

希望你保持學習，令自己一直進步之餘，都用你的故事，去感染依然短炒中的朋友，幫佢地重回正軌。

你現時投資組合，係可以。但緊記現時只係合理區，每月資金唔好盡用，要儲起部份。連同現有資金，一齊等大跌市機會出現，才入市掃平貨。

而我地成個財富配置，係講求增長力就餘，都要有平衡性。除了優質股外，都要加入一些其他不同資產，如物業類。

但由於你現時資金不多，可先用優質股增值住先。到有較多資金，可以考慮買較小型物業作跳板，最後買大屋。

我本<5年買樓4步曲>，會有較詳細解釋，你可以買黎睇下。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【立即觀看hket TV 足本影片】https://bit.ly/30TtRQx
【立即下載《香港經濟日報》App】http://onelink.to/hketapp2021
---------------------------------------------------
【香港經濟日報】《香港經濟日報》專欄作者石鏡泉（石Sir）推介麗珠醫藥（01513），另亦會分析江西銅業股份（00358）、香港交易所（00388）、中國生物製藥（01177）、中國飛機租賃（01848）及海爾智家（06690）最新部署，詳情待石Sir為你分析。……（更多內容：https://inews.hket.com/article/2947518?r=mcsdyt）

足本版：https://video.hket.com/video/2945652/
有云「五窮六絶七翻身」，港股今年五月窮不窮？中薇證券黃偉豪為你分析。
【同場加映】
- 今日板塊分析：新經濟股
#阿里巴巴 #騰訊700​​​ #美團3690​ #金融整改 #平台經濟
​【今日答股】
#友邦1299​​​ #​海爾智家6690​ #中電信728 #中國財險2328 #好孩子國際1086​ #康希諾生物6185 #思摩爾國際6969

【立即觀看hket TV 足本影片】https://bit.ly/30TtRQx​
【立即下載《香港經濟日報》App】http://onelink.to/hketapp2021

#港股 #股票 #恒生指數 #五窮六絶七翻 #香港經濟日報 #ET開市直擊
【立即觀看hket TV 足本影片】https://bit.ly/30TtRQx
【立即下載《香港經濟日報》App】http://onelink.to/hketapp2021
---------------------------------------------------

足本版：https://video.hket.com/video/2945652/
人民銀行、銀保監會、證監會、外匯局等金融管理部門，聯合對部分從事金融業務的網絡平台企業進行監管約談。騰訊 （00700） 、京東 （09618） 旗下京東金融、字節跳動、美團 （03690） 旗下美團金融等13家網絡平台企業實際控制人或代表參加了約談。對新經濟股有何影響？中薇證券黃偉豪話你知。
【同場加映】
- 今日板塊分析：新經濟股
#阿里巴巴 #騰訊700​​​ #美團3690​ #金融整改 #平台經濟
​【今日答股】
#友邦1299​​​ #​海爾智家6690​ #中電信728 #中國財險2328 #好孩子國際1086​ #康希諾生物6185 #思摩爾國際6969
【立即觀看hket TV 足本影片】https://bit.ly/30TtRQx​
【立即下載《香港經濟日報》App】http://onelink.to/hketapp2021
#港股 #股票 #金融整改 #新經濟股 #網絡平台經濟 #騰訊 #阿里 #美團 #香港經濟日報 #ET開市直擊
【立即觀看hket TV 足本影片】https://bit.ly/30TtRQx
【立即下載《香港經濟日報》App】http://onelink.to/hketapp2021
---------------------------------------------------