呢排周末經過海港城，雖然再沒有充斥強國旅客，但依然很熱鬧。

賣甜品嘅食店，排晒隊。

美心嘅美中鴨子，排晒隊。

黃衛兵見狀，可能會好嬲，更有衝動走埋去，大叫：（藍㗎，仲食？）

但係嗰啲客人，可能係藍，可能係不問世事的港豬，又可能係對黃色經濟圈心淡，再唔會去分顏色去消費。

係，我有啲blogger朋友，而家都去返美心集團嘅餐廳，但唔敢post上FB，我諗驚比人X。

黃色經濟圈發展咗差唔多兩年，延伸到而家疫情，以立場嚟作招徠，起初的確惹來不少人支持，路遙知馬力，有立場但無實力者，開始陸續退場；那間食店經常爆鑊，導致客人流失，規模日漸萎縮，這間小店出品不錯，價錢合理，喺呢個疫市期間，連開分店。

我就比較好彩，又或者識得揀，好少喺黃店瀨嘢，但係我有啲朋友，去十間黃店，有八間唔好食，又有啲朋友本身好黃，但絕少光顧黃店，因為佢飲食習慣係去開高級餐廳，試問有邊間高級少少嘅餐廳，有話過自己係黃？

你話搵一間同聲氣茶餐廳咖啡店車仔麵，好容易，但係，如果我想食餐好啲嘅法國菜，Omakase呢？

逸東酒店都無話過自己係咩顏色啦，只係佢做嘅舉動，係令人覺得係同一陣線；Involtini、大坑Pheromone，已經喺某個香港人群組入面嘅一啲網民們，屬於要儲錢去食嘅級別。

所以佢哋話要杯葛Black Sheep集團，行C餐要安心，人哋真係睬你都傻，主要客源係老外ABC中產，好聽話用安心出行嘅，你有你杯葛，對方根本唔會郁到一條毛。

去到呢個地步，唔表態就唔會再表態㗎喇，只係想喺艱難嘅時刻，繼續食下好西啫。

。
。
。
。
。

老實講，就算唔分顏色去食中菜，都未致於去美心啩，迴轉壽司嘅話，我會選擇去壽司郎。