［聯儲局101系列］教埋你睇聯儲局經濟預測

1. TLDR：聯儲局預零息去到2022年底，你係咪醒過佢？

2. 不經不覺去到6月中，又係聯儲局議息。有乜咁特別？冇乜特別。唔通加息咩！明明就唔會。但亦唔會減到負利率（暫時唔會）。咁原本，好似係例行公事？就唔係啦。

3. 話說，其實聯儲局一般一年議息8次（長知識啦？），一早（一年前？）定晒日期，咪個半月一次。

4. 咁上次議息，其實係4月尾（咪話個半月前）。嗰次係叫做肺炎大爆發大股災後第一次議息，嗰次就真係例行公事。唔通加息咩！但又唔會減到負（住）。

5. 咁點解今次重要？因為，每年8次議員，有4次，係叫做特別唔同。以前係呢4次先有記者會，所以以前有人「認定」呢4次先有機會加減息（＊）。後來（都係懶搵，好似舊年開始）就次次有記者會，亦都講明次次有機會加減。

6. 但仲有一樣嘢冇變，就係一年四次，聯儲局會有所謂嘅projection materials經濟前瞻．講下佢地對經濟增長，失業，通脹，以及息口嘅預測咁。份嘢唔太長，唔太難明，主要都係數字，唔使玩閱讀理解。（議息聲明就要玩閱讀理解）。有興趣嘅慢慢睇（https://bit.ly/2YB426v），但最重要嘅，就係呢張圖

7. 咁你話，一年四次嘛，上一次呢？正係3月中。應該記得咩事啦。原本3月18號議息，結果聯儲局3月頭先減半厘息，到15號再減一厘！提早射晒子彈。咁3月1號嗰次議息呢？係無聲無息咁八萬五咗，自然記者會都冇，亦都個經濟前瞻都自動消失埋。評乜鬼丫。既然可以忽然開會（唔通銀行爆煲仲話未到開日期唔理住？），咁當然可以隨時取消。2008都係咁

8. 所以，嚟到6月中，先係今年第一次嘅projection materials。就係呢個表。上面咩經濟增長，失業率，通脹，其實好易明，有機會寫多篇文。入面啲數，就係聯儲局十幾丁友自己嘅意見。唔肯定，但應該係暗票，唔使齊齊對答案拎共識。

9. 而三個column，基本數學嘢，median，十幾丁友排中間嗰個數。Range不用解。Central tendency 呢？好似跳水定蹓冰定體操（是但）比分咁，頭三尾三唔要，拎中間（我諗起……片頭切腩撈粗）。

10. 實務上，搞咁多嘢，睇median得了。咁你見到了，2020，2021，2022。預測聯邦基金利率，係零，零，同埋零。Central tendency都係。留意Range，其實十幾丁友，有人（唔超過三個）估2022會加到息．其實係兩個。點知係兩個？有機會再解，仲有其他圖。但十幾丁友都覺得2022年仲係零息。呼

11. 最底嗰行嘅，係12月尾時，對上一次（都話3月取消咗）嘅預測。所有嘢都彷如隔世了。「不過指數同12月時差唔多」，係脫離實體經濟的。

12. 所以，寫咁多嘢，除咗教你睇同埋增長你知識外，好簡單，就係話你知，今年，下年，同埋正路地2022年，都完全唔會加息。咁對資產市場對公司有乜影響，相信大家都估到，不用多講。估咩加息供樓壓力大增嘅，講咗十年（其實唔止，2008年講起），分分鐘講到廿年。

13. 當然要講嘅係，呢度嘅息口，只係聯邦基金利率。並唔係你見開嘅咩LIBOR（美金銀行同業拆息，香港版港紙就叫HIBOR），或供樓利率，更加唔係長債（甚麼美國10年國債）嘅息率。聯儲局理論上只係郁短息，然後令佢慢慢傳導開去。

14. 咁傳導失靈呢？係會的。3月你咪見過係咁，因為市場太驚，銀行驚對家爆煲，係都唔係借錢出街，聯儲局減息到零，但拆息不停抽升。咁會點？你見到了，聯儲局可以用好多方法，直接去干預其他息口，可以印錢啦，可以直接借錢畀企業啦，可以直接買債券啦。亦都見到佢地係會勇於咁做。

15. 所以正常嚟講，咩prime嗰啲就唔會有得升，HIBOR就好可能再落。落到幾多？去到接近0咯。未試過咩？金融海嘯後嗰期咪係咁。係咪好後悔冇買樓？

16. 當然，只係聯儲局官員預期。事實係隨時可以變，3年後嘅嘢邊個知。你睇12月啲預計都即時大改啦，古語有云，”When the facts change, I change my mind - what do you do, sir？”。聯儲局先唔得閒理你芒果日報話佢變臉轉軚。

17. 所以，如果下年啲經濟數字靚返（今年實唔會啦），可能會慢慢引導市場，話畀你知，拿，2022可能加息。

18. 不過實務上，我甚至唔使理經濟云云。你睇得到的，聯儲局近十幾廿年，都係減息快，加息慢。印錢快，縮表慢。加少少，減多多。縮幾百億，印幾萬億。

19. 所以，雖然3年可以發生好多事（你望下3/4月發生幾咁多事？），但真係估去到2022都唔加息，應該都幾合理。

20. 相信都仲有人暗小甚至明小，搞錯呀，有冇咁屈機，又係呢招？又係減息印錢呢招？真係火星人打到嚟都係呢招。

21. 係喎，一樓都係呢招架啦。由2008年，去到今年2020年。我不客氣咁問句：你冇學到任何嘢？畀足十幾年你學喎。咁唔緊要，繼續睇呢度嘅文啦。返工途中嘅你，今日又比別人知得多啦。

22. 拿，今次呢篇唔勵志唔講人生道理啦，滿意啦。

23. 舊文好多好多篇都寫過下聯儲局之類，不再一一列返。不過可能睇呢幾篇比較好，順時序：

聯儲局忽然減息半厘，但公信何存？（https://bit.ly/3hiLikr）
技術文；聯儲局忽然減息，拆息市場都相當波動（https://bit.ly/37hyZAg）
港美息差咁大，卒令金管局出手　（https://bit.ly/3fdi70w）

（＊）當然呢個「以前」唔係好耐，可能係金融海嘯後，懶搵。但例如2005年，係連加8次息的。

———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。

請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。