十六天眨眼之間就過去，閉幕禮嘅結束正式為2020東京奧運畫上句號。 作為一個觀眾，我地喺呢半個月裡面欣賞咗好多精彩嘅比賽，特別係好多我地平時都未必接觸到嘅運動；我地見證好多運動員創造一個又一個新嘅記錄，為到佢地可以突破自己而歡呼鼓掌；我地睇到每個團隊互相合作所擦出嘅火花，深信佢地喺舞台上所展現出來嘅默契，係佢地無數次練習得來嘅成果；我地睇到好多比奧運獎牌更寶貴嘅價值同信念，亦了解到好多運動員風光背後嘅辛酸同難處。佢地為咗登上呢個奧運嘅舞台而付上嘅代價，比我地所想嘅可能更沉重。 喺閉幕典禮眾多環節當中，最令我深刻嘅係呢個由好多發光微粒所組成嘅奧運五環—— 光之五環。 喺呢個浩瀚嘅宇宙之間，我地都好似微塵一樣，好渺小，好有限。但當唔同種族、文化、語言嘅人聚集起來，一齊投入喺整個奧運會裡面，當中所凝聚嘅力量係好大好大。各國嘅運動員經過漫長嘅路程來到東京，各人可能帶住唔同嘅目標同夢想，但佢地都一樣地投入喺自己享受嘅運動裡面，發揮團結嘅力量，展現「不輕易放棄」、「友誼第一，比賽第二」嘅體育精神，同時又帶着彼此尊重嘅態度喺運動場上競技。雖然只有少部份人可以贏得獎牌，但其實能夠登上奧運嘅舞台絕不容易，得到參賽嘅資格已經係一個對佢地嘅能力好大嘅肯定。我相信更加寶貴嘅係，各國嘅運動員都收穫到好多自己國民嘅支持同喝采（除咗某個強大嘅國家嘅運動員落敗後只係被國民踐踏同謾罵）。就好似我地香港一樣，平時商場人山人海都只係因為大家要揾餐廳食飯；但當我地香港運動員有賽事嘅時候，商場就企滿希望透過電視直播欣賞比賽嘅香港市民。我地出去商場睇唔係因為屋企冇電視機，而係我地好珍惜我地「香港人」呢個身份認同，所以我地好想聚集起來，同一班可能係互不相識，但都有着同一個身份嘅香港人，一齊隔空表達對香港運動員嘅支持，展現我地對香港嘅歸屬感。 一點亮光或者唔足以照亮世界，但當我地集合埋好多點亮光，就能夠拼湊出呢個閃耀又完整無缺嘅奧運五環。如果缺少任何一部分，我相信今次嘅奧運都唔能夠順利完成。特別當我地身處呢個疫情蔓延全球嘅時代，稍一不慎都可以令奧運舞台成為病毒傳播嘅温床。所以我真係衷心地欣賞主辦國日本謹慎小心嘅安排同規劃，無論係防疫定環保，都睇到日本花咗好多心機去籌備今次奧運會；仲有多謝每個參與其中嘅義工，一個計劃幾周詳都好，關鍵都係將計劃實行嘅人，睇到呢班義工都喺自己嘅崗位上盡好本份；多謝每個竭盡全力嘅運動員，仲有付出好多心力培育佢地嘅教練⋯最後，今次東京奧運會可以順利完滿地落幕，都要多謝世界上每個坐喺電視機前面同一班運動員一齊緊張、一齊興奮、一齊落淚嘅觀眾。我諗奧運選手佢地雖然唔可以親眼見到成個場館佈滿來自世界各地嘅人民嗰種震撼，唔可以親耳聽到千萬觀眾嘅喝采聲，唔可以親身感受到觀眾嘅支持，但因為佢地深信攝影機所捕捉嘅畫面，係全球各地好多對眼睛正在注視，佢地先可以帶住更多信心同動力去參與每一場比賽。 最後嘅最後，我好深刻有運動員喺得獎之後，冒住被國際奧委會追究嘅險，犯規高舉交叉手勢。佢事後表示呢個舉動係有著「所有受壓迫者的交滙點」嘅含意，希望為「世界上所有在抗爭而沒有平台發聲的人」帶來希望。無論係香港運動員喺今次奧運所創造嘅歷史，定係2019年香港人展現出來嘅「Be water」革命意志，都俾到全世界嘅人睇，香港雖然只係一個好細嘅地方，但香港人會竭盡所能捍衛自己嘅屋企，保護我地作為「香港人」嘅身份認同。香港唔係一片荒土，呢度唔單至孕育咗好多有能力登上國際舞台嘅人才，更加盛載好多獨特珍貴嘅本土文化。希望留下來嘅人都可以好似運動員一樣，盡力參與呢場賽事去到最後一刻，唔好輕易認輸。一日未到最後一刻，奇蹟都仲可以喺呢度發生。 殘奧會將會喺8月24日揭幕，有24個香港運動員會代表香港出戰各個項目，香港人記住撐佢地呀！