【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21661-Q21680）

Q21661：

老師您好，本人已經第二次請問老師，十分感謝老師既無私指導；本人有閱讀唔同股票書本及購買老師既書，真係獲益良多，若老師繼續出新書，本人一定購買！

現本人再持續更新自己的投資計畫及就老師早期的建議及書本上的知識，望老師賜教!

背景：

本人28歲，月入大約3萬，能每月約儲1萬5。

現時有現金5萬和儲蓄保險(供5年，已供4年，每年5萬，即已供20萬，回報率由5.5%下跌至4.5%) ，現股票投資左約55萬，按老師的水桶模式投資法的方式，

手持股份共14種，詳細如下：

快速增值（潛力股）（成本：25萬）
1. 比亞廸（500股，39.3買入）
2. 小米（600股，11.8買入）
3. 比亞廸電子（1500股，38.79買入）
4. 贛鋒鋰業 （1000股，88.07買入）
5. 平安好醫生 （1000股，88.02買入）

平穩發展（增長股）（成本：18.8萬）
1. 恒基地產（3000股，29.87買入）
2. 盈富（1500股，24.87買入）
3. 金沙中國（800股，34.6買入）
4. 長江基建（1000股，36.64買入）
5. 安碩恒生科技（500股，16.81買入）

收息資產（收息股）（成本：11萬）
1. 中華煤氣（2050股，12.71買入）
2. 置富產業信託（6000股，8.61買入）
3. 中國飛機租賃（5000股，7.33買入）
4. 港燈（500股，7.95買入）

幸好，經細閱及留意老師的Facebook的建議，本人成功以低價買入比亞廸及小米，其他股票亦參考老師的書籍，

潛力股獲超過40%及增長股有25%增長（約等於20萬獲利），令本人的第一個一百萬的目標非常接近，十分開心。

提問：

1. 本人知道年紀算年輕，應大量投放於潛力股，請問比例可以為潛力股：增長股：收息股 = 7：2：1？這樣是否風險能夠分散嗎？

2. 持有14種股票是否過多嗎？如是，我應該賣出那些股票？

3. 比亞廸及小米分別於39.3及11.8超低價買入，相信現在無可能會再跌至我買入價，如我現再增持比亞廸及小米，咁我係咪等同放棄手上既利潤嗎？

定我應該發掘/ 增持其他潛力股如中國生物製藥（1177）/ 贛鋒鋰業（1772）/ 比亞廸電子（285）？

4. 如果我成功儲到一百萬，以我現在的收入，我是否應該沽出所有股票提現，做500萬按揭買樓嗎？本人計劃購買馬鞍山的二手樓宇的，可實現與男朋友同居的目標或將屋租出去？

龔成老師︰

1) 你現時比例，大致係可以。但留意中華煤氣(0003)和中國飛機租賃（1848）算是平穏增長股，而非收息股。

而收息股增長力較弱，唔建議你再加注。你主要投資在平穏增長股和潛力股，長線比例維持大約各5成就可以。

中國飛機租賃（1848）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

其實佢業務有獨特性，在行內有規模，有長線投資價值。但投資注碼不能多。只能小注。

現時大市只係合理水平，現金佔比重大約3-5成。故新資金唔好盡用，要留有部份，等大跌市出現，才加大力度掃貨。

至於儲蓄保險，由於就快供完，你可以照供埋佢。但未來時間，你將資金集中係優質股，個效益相信會更好。

2) 以你組合金額計，有少少多，但這些股票都有質素，不用沽出。長線，你集中翻係10隻左右，咁就可以。

3) 表面上看來，你再入貨，會拉高左比亞廸(1211)及小米(1810)的平均價。但這2隻股票，都係好有質素，長線相信會繼續上升。

你本身的概念有錯，你停留在過往的買入價，而我地應該著重將來的增值。例如投入該資金後，怎樣為你組合帶來長遠的增長效果。

如果你手上持貨過少，反而會影響成個長線增值效果。因此，我地應以平均配置角度去考慮，只要現時價格合理，而你預定投入這些股票的資金，又未用盡，你係可以考慮加注。

但現時比亞廸(1211)及小米(1810)都係偏貴，前者要回到$135才算較合理，而後者最好等回多1,2成才考慮加小注。

當然，你講的另外3隻股票，都有投資價值。但只有中生(1177)勉強算係合理區頂，其餘都偏貴，相入貨要等等。

4) 如果你有實際自住需要，係可以考慮。但大前題，最好在置業同時，都留有一定優質股作增值，這樣才可以維持成個財富組合的平均性。

若你係為投資，以現時租金回報率計，值博率回投資股市咁高。因此，我唔建議你唔洗太急去置業。

除非你發現旬盤，租金回報率高，又有唔錯增長潛力，你才考慮出手。

------------------------------------------------

Q21662：

龔sir,你好！本人今年36歲，與媽媽及11歲兒子住綠表公屋，為家中經濟之柱。每月收入$22000，剛好夠生活上各項開支，沒有多餘錢儲蓄。

本人家庭有兩個物業，一個是自住綠表公屋，每月供$13000，還欠按揭$190萬，還餘14年，市值$300萬。

另一市區唐樓劏房單位，於數年前花$50萬裝修，每月供$9000，還欠按揭$120萬，還餘13年，市值$700萬。劏房單位共約收租$21000，差不多夠供兩物業的按揭。

本人多年來積極理財創富，為退休作準備。但現在流動資金不足，生活上有點壓力，加上又有負債要清還。

持股 939@20000股，3@4000股，700@100，3690@200。股票加現金約$30萬。另有40萬負債要清還。

兩物業都不能加按，每月只夠開支，請問我可以如何處理目前的財務問題(不想賣樓，因供完後，收租足夠退休生活。)懇請賜教！

龔成老師︰

你現時物業不用沽出，因為一間係自住樓，另一間租金回報率都理想，可長線持有。

但你現時財富組合，已經好偏重係物業。所以係累積財富時候，我地會優先投入係其他資產類，例如優質股，以免太集中單一資產，而造成風險。

你現時持股票，都係優質股。但建行(0939)增長力較弱，主要係收下息。以你年紀，應以增值為主，先去累積一筆財富。

你可以將部份建行(0939)沽出，換碼至以下有增長力之股票，並長線持有。

另外，你現時生活只處於收支平衡，唔係咁理想。你要審視翻自己開支，有無一些不必要部份，盡力去刪減。同時間，你睇下有無一些兼職、網上小生意等，去提升收入。

最終目標，每月能空出一定資金，去月供上述有增長力的股票。

而負債，你要睇翻佢利率高唔高，如果較高，就應先清還，才開始投資計劃，會較理想。

------------------------------------------------

Q21663：

龔sir, 你好。本人現在正上緊你的股票班，想好好學習股票投資，但是我有一個買樓上的問題想請教你。

我犯了一個錯誤，我在2019年高位時買入筲箕灣新樓，現在市價已經下跌了多過10%。

我現在供樓上沒有問題，樓是自住的，但是看到筲箕灣升值潛力不大，租值亦不算高，想請教未來應該如何部署？

是否應該等平手才考慮賣出而再投資其他升值潛力較好物業？買樓有需要止蝕嗎？謝謝！

龔成老師︰

香港島的物業，始終都有一定投資價值，因為長線供應相對較少。

筲箕灣其實不差的，但新樓一般有溢價，因此較易出現樓價下跌的情況。

你現時的物業，持有就得，問題唔算大的。

同埋，這個物業是你自住樓，所以你只要供得起，咁就可以。

由於你成個財富組合，已經有物業類，相信佢佔你成個組合，都會係一個較大比重。

所以，你再有新資金，應先考慮其他優質資產，好似優質股類，避免太集中單一資產，而造成過度集中風險。

------------------------------------------------

Q21664：

Hello 龔先生，本人見最近一直跌市，買了以下股票，請問是否應該放左先，先止蝕。。還是一直keep 住，因有啲股票已跌穿很多。謝謝你

股票號加買入價：

2638 $7.61 （500股）
2800 $28.44 (2500股）
700 $618.4 (500股）
1972 $23.1 (400股）
1398 $5.33 (4000股）

388 $435 （應在什麼價格再入市較適合呢）
1810 $24.75 (400股）
3067 $17.12 (300股）
3088 $10.34 (200股）
9988 $222.7 (200股）

3690 $290.17 (200股）
1211 $157 (500股）

見中國股一直下滑，在以上的股票，我有需要先離場嘛，很多都跌很多了，求指教

龔成老師︰

唔好受大市氣氛影響，同埋唔好將個焦點，放左係買入價，或者帳面賺虧身上。

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持有股票，都係有質素，不用理會這些中短期波動，可長線持有就可以。

但有個較大問題，就係你現時股票，潛力股佔左大多數(0700, 0388, 1810, 3067, 3088, 9988, 3690, 1211)。

這類股票，增長潛力高，但同時間波動性都較大。若你係年青人至中年，可以佔最多5成。但若你偏年長少少、投資經驗較弱，比重要再向下調。

未來時間，你要慢慢調節翻個組合比重，令潛力股比重重回正常水。你可以唔一定要沽持股，用新資金去令成個組合平衡翻就可以。

港交所(0388)現價都仲係有D貴，最少回多1,2成，先考慮加注。

------------------------------------------------

Q21665：

龔sir, 你好

1) 我今年25歲，由中學畢業已開始做freelance、投資及工作存錢，現存股票及現金大約存到400K

打算在30-33歲置業，距離現時有5-8年投資時期，想問如在現價，將大部分股票及現金投資3067或吉利可行嗎?

2) 另外個人工作問題想請教一下，現時人生有兩份工作選擇 工作A為現時工作，月薪約4-5萬，比較難有大的升幅。

工作B為新的工作機會，月薪始約3萬，穩定的政府工。 工作B到35歲先會回到月薪4萬，40歲大約5萬元，45歲6萬元，大約最多可到退休前升至9-10萬。

B的強積金亦較A多，但發展機會不大，個人覺得十分難選擇，希望能分享小小建議，謝謝 感激不盡!!!

龔成老師︰

1) 這2隻股票，都有質素。吉利(0175)現價算合理區中上，而安碩恒生科技(3067)則在合理區上部，現價都可以先首注。

但我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你25歲，建議你用「平穏增長股」 + 「潛力股」作組合。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只在合理區，現金和股票應各佔一半。餘下一半現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2) 單從薪金長線升幅去計，工作B會係較好選擇。但每個人人生目標，都不一樣。有人希望安穏收人工，有人希望工作有突破。

雖然工作A人工較少，但長線能在工作A中，學到一些有用技能或經驗，令你能增升到另一個層，其實你可以選工作A。

當然，這個世界並不只有工作A和工作B。你要認清自己去向，放自己在一條合適的跑道。就算而一刻可能人工較少，但可以累積經驗，令你將來工作或者事業有更大發展，我地都應該要考慮。

總之，你要先了解自己長線目標，未來5年、10年、20年係想過點樣的日子，才計劃今天的路，該如何走。

------------------------------------------------

Q21666：

龔Sir你好！先交代下背景，我26歲，最近一年收入減至約$15000-20000，暫時無經濟負擔，每月可草$10000，希望滾大資金今年年底開始做生意及將來置業。

2019年中，我由約15萬本金開始投資，之前從股市中賺了約20萬，加上每月儲蓄，2021年年頭時資產約50萬，但最近3個月帳面蝕了接近10萬，我有d唔知點算好。

我留意了你專頁一段時間，見你話要控制現金比例，慢慢分注入市，但我今年2、3月時入市太心急了，在比較貴的時候入了很多貨，去得太盡，

留的現金不多，希望老師比下意見我，現時應該止蝕減持還是可以繼續長線持有？

現時持有：

9988阿里巴巴 $250 x 200股
1810小米 $26.8 x 800股
3067安碩 $17.85 x 3200股
6862 海底撈 $59 x 1000股

1579 頤海 $90.6 x 2000股
520呷哺呷哺 $15 x 3500股
1858 春立醫療 $53 x 500股

持有現金：約5-8萬

另外，最近我亦心郁郁想入285/3690作長線持有，我應該點分配同安排呢？

謝謝！

龔成老師︰

首先，你年底要開始新生意，由於時間太短，不宜投資。這部份所需資金，要先扣起，才開始投資計劃。

現時大市只在合理，最理想係現金和股票比例，大約各一半。

雖然你現時股票比例較多，而且有部份出現帳面虧損，但唔代表一定要沽貨。

我地持有一隻股票與否，應用其質素作考慮。如果質素係無變，依然優質，就算中短期出現股價波動，我地都唔洗太在意，長線持有就可以。

你現時有股票，都有長線投資價值，照持有就可以。春立醫療(1858)這股不確定較高，不宜有太多，暫時不要再加注。

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，現價算係合理區頂部，可小注。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂。若投資，一定不能大注。小小注，是較好的做法。

但你成個組合，有一個較大問題，就係你全部都係潛力股。佢雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你要加大翻平穏增長股部份，令組合更平衡。

------------------------------------------------

Q21667：

你好啊,阿sir，我曾經上過你堂，亦都關注你既fb好耐。但最近實在係忍唔住，有個問題好困擾我。

我今年32歲，穩定工作都係得兩萬一個月。大約得廿幾萬股票，有十幾萬現金

我家人話人地個仔買到樓有出色，有大志，有骨氣。為左各式各樣事情，為左佢既面子問題，日嘈夜嘈，唔知係米我心裡質素既問題，我真係覺得好難受。

我依家諗緊好唔好賣走哂d股票再同我家姐買樓？但我本身積蓄又唔多，人工又唔高，依家股市又跌緊，我真係好迷茫。

龔成老師︰

首先，每個人的人生規劃和價值觀都不同，所以唔需要同人地去比較，最重要係盡最大努力，做好自己。

你是一個成年人，成件事要用獨立思考，去理性分析，唔好過份受別人影響，因為只有你自己，才最清楚自己目標和個人能力。

講翻你現況，如果你無客觀置業需要(例如要結婚，需要一個屬於自己家庭的生活空間。)，我地就用投資角度，去分析而件事。

首先，你現有資金不多，現時香港整體樓價唔平，租金回報率唔算吸引。所以，投資在優質股，相對值博率會較高。

如果你有自住需要，長遠可考慮買樓，先買細價樓先，但你如果與家人合資買樓，要好小心，因為日後總會出現麻煩事。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時30歲去計，可用「平穏增長股」和「潛力股」，去創造一個增值平台。建議你用每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有十幾萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定金額、有生活需要，或者樓市值博率開始吸引，你才再考慮樓市部份，咁會較為穏當。

------------------------------------------------

Q21668：

龔sir，必瘦站甘高利潤行業，而業務簡單，我覺得之後會好大競爭。

但我諗唔到必瘦站護城河在那裏，怎樣去在內地競爭，按理護城河應該系品牌，但佢品牌又唔覺有咩好口碑。

龔sir認為佢既護城河在那？

我之前4蚊入左10萬股，覺得roe好高，業務又簡單。

龔成老師：

其實佢旗下有好多過品牌，同埋都算儲多一定的客戶群，當客戶用開佢的產品，而又覺得不差，就會一直用，這是好多美容都有的模式。

佢已經建立左一個唔差的營運模式及網絡，要打進都不是絕對容易。

另外，佢有不少較新的美容儀器，這是較細公司未必有資源做到的。即是在某些產品上，其實有優勢的，這是中小型公司無的。你長線持有就得。

------------------------------------------------

Q21669：

老師你好，我係你學生，聽完你堂絕對認同你嘅理念，本人現50歲對投資完全不懂，現只有一層已供完樓，每月可動用4萬作投資以部署60歳退休，

想以月供股票形式供股，但手續費都吾平，請問有什麼方法可以再減低成本？1928、2388、0012、0066、0388以上股票如供.股的話，如何分配比例？？

多謝老師

龔成老師︰

你現時已有一個物業，係財富增值角度，未來資金，我地應集中翻係股票身上，去令成個財富組合更平衡。

以你50歲年齡，其實已開始為退休做準備，但同時，財富仍有增長力（但不是進取）。

由於你對投資完全不懂，對價值點定平貴，未必太了解。我建議你先利用月供模式，去建立一個股票組合。雖然成本較高，但可以減低買貴貨風險。

當然，你一手手買都可以做到月供效果，只要你現金平均地慢慢入市(如保持住每月定額買一手)就可以。2個方法都可以，一手手買更節省了銀行月供收費，但你必需確保自已可以有自律性地進行。

假設你用月供，你每月可以先用一半資金，即係$20000。其餘就先儲起，去等大跌市機會。

比例上，可以每隻佔20%。但就隨著年齡增加，你要慢慢加入一些收息股，去令組合更平穏。到退休時，收息股應佔全組合的100%。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21670：

龔sir, 你好我係股票新手，看了你的教學片一段時間，未睇你的教學前買入的股票都係跌得好多，一路唔敢放，但一直冇升返，甚至繼續跌，

剛睇完你最新的片提到劣質股票應該賣出，不知可否給我一點意見？

以下這些是劣質股嗎？請問我應繼續持有，等回升再放出，還是止蝕較合理？謝謝你寶貴的意見

以下是我持有的股票：持股量不多

00410 ， 買入價$3.81
01382，買入價6.12
02007，買入價17.6
00005，買入價63.7

龔成老師︰

ＳＯＨＯ中國（0410）集團主要從事投資房地產開發、物業租賃和物業經營。

這企業過往生意增長力不強，同時無乜錢賺，如果扣除了投資物業重估因素，見佢有時出現虧損。投資價值不高，可考慮沽出。

互太紡織（1382）這股不差的。佢主要從事紡織產品之製造及貿易。

佢與主要品牌擁有人如Ｃａｌｖｉｎ　Ｋｌｅｉｎ、Ｌｉｚ　Ｃｌａｉｂｏｒｎｅ、Ｍａｉｄｅｎｆｏｒｍ、

馬莎、黛安芬、ＵＮＩＱＬＯ、ＶＦ　Ｉｎｔｉｍａｔｅｓ及Ｖｉｃｔｏｒｉａ’ｓ　Ｓｅｃｒｅｔ。

以及中國著名品牌如安踏體育與愛慕已建立了緊密而長期的關係，令集團能夠獲得穩定之購買訂單。

佢成品包括超過５０００款設計及規格，並暢銷世界各地，出品布料廣泛應用於各類紡織品，而成衣包括男裝、女裝、童裝、運動服、泳衣及內衣。

業務穩定，但增長力不高。這股可以作為收息股，但就唔好對股價有太大期望。

碧桂園(2007)，業務都算不差，但負債高，風險略高。由於你現時只係小注，持有係可以，但唔好再加注。

匯控(0005)質素比過往減少左，但不是無質素，但你預佢只係收息，唔會有太高增長力。

------------------------------------------------

Q21671：

Dear 龔成老師！本人今年约50歲，巳有一物業约6百萬已冇按揭，收緊租金，及约有股票200萬左右，現金不多。

我仍和家人居住，但想找多点空間。現仍在職，每月收入约萬零蚊。如想退休，現在是否可行？

or 待多少年才可達到財務自由呢？ many thanks

龔成老師︰

其實要睇你本身，對退休生活的要求。

由於你已有住居所，自住部份已經無問題。另外，你有一層收租樓，為你提供穏定現金流，可以支援退休生活上開支。

若你現時即時退休，你可以這200萬換成收息股，以6%股息率計，你每月就可以從這200萬收息股中，獲得1萬現金流。

如果這1萬，再加上你租金收入，係足夠支持你生活，基本上你已算是財務自由。

若你覺得未足夠，我地可以用這些股票，去繼續增值。我假設投資回報有10%（連股息再投資），10年後大約會增值至500萬。

同樣，我地將這500萬換成收息股，以6%股息率計，你每月就可以從這500萬收息股中，現在可以獲得2.5萬現金流。

如果你希望搬出自住，可能你需要收回放租單位，那你就要扣除收租部份收入，去計算你財務自由時間表。

你可以用以上方法，審視一下你退休方向，從而對投資計劃作出調整。

------------------------------------------------

Q21672：

龔Sir，你好！ 我是你去年九月投資班的學生。 想請教，騰訊已在$600以下， 我已留意這隻股票一段時間，

我用你提供的價值網去分析， 安全邊際以去到合理， 股價的中位數是大約$580，低位是$540。問題是中央政府的政策長遠會否令到騰訊難以發展。

現在是否合適時候購入？ 還是分段購入或者其他策略？ 謝謝回覆！

龔成老師︰

近期不少中央政策，都反映大型企業，可能面對內地監管進一步收緊，因此風險度增加左。

不過，我相信長線對騰訊(0700)影響唔會太大。內地政府不是不想佢賺錢，只是想規管佢。

佢已建立好完整的賺錢模式，加上大數據資料支持，長線發展係正面。但由於現時監管多左，你預都可能影響少少賺錢能力。

現價算係合理區頂部，無貨可先小注，其長線持有。或者你想穏陣D，用月供去儲貨，都係可以。

------------------------------------------------

Q21673：

龔Sir 你好,我是股票班學生, 剛上完第二課, 獲益良多, 聽完你對銀娛比對澳博既地段的長遠發展後, 我有以下想請教:

我看過你三本80後投資, 當中談及買樓最重要是地段, 地段, 再地段, 而香港買樓, 地段大家都知道是港島, 九龍市區, 啟徳發展區之類, 價格亦非常高,

但我套用到銀娛的理論, 現時東涌樓會不會是有濳力升值的地段? 東涌或屯門值得投資樓市？還是都是以高尺價買回一般人所共知的市區樓? 例如以大概500-600萬的預算。謝謝老師

龔成老師：

東涌的確有很多地發展，但你都要明白，最核心的區域，很難有太大改變，中環是核心商業區，九龍是第二個核心商業區，當中的發展及配套十分成熟，要取代根本很難。

最多只是，日後明日大嶼的發展，政府表平將會是香港第三個核心商業區，如果這計劃落實，東涌及屯門，的確會受惠，但你都要明白，當發展商業地的概念，配套成熟可分重要，這比起旅遊因素更加重要，加上澳門本身好細（澳門整個地方，也不及香港島的大小），地域因素始終較少。

而香港，當從事商業活動，就要考慮更多因素，商業活動往來，以及考慮人們近工因素，客戶等因素。

另外，東涌的供應始終較多，因此在整體的投資價值上，只是中等。

------------------------------------------------

Q21674：

龔sir,你好~有些關於事業上的事想問下你的意見
是這樣的~

現職工作自從上級離職後，工作量變得十分繁忙，亦十分吃力。

工作上又要兼做上司的工作，又要做本身的工作。身體亦出現了壓力大的徵狀例如:心口痛，個人比較想休息，調理身體

你覺得係呢個經濟環境，祼辭會不會很不智?另，如果裸辭後在家，家人很難相處，與家人相處不來，會否覺得兩頭唔到岸?如果你係我，你會點選擇呢?

龔成老師：

最好當然是找到另一份工作，先決定辭職，這是較穩健的方法。

另外，你亦可以在這刻，同步發展副業，利用放工等時間，當見到副業有發展時，就辭職。

當然，如果你本身已儲左一定的資金，而你身體開始支持不到現時的工作，就可以考慮辭工，休息一段時間，尋找自己發展方向，再出發。

------------------------------------------------

Q21675：

Hello 老師你好，我一路有留意你既專頁 不過投資上仲係新手，想請教老師我黎緊既儲蓄同投資方向

我宜家30歲, 月入大約$23,000, 家用$5,500,
出年有機會買樓同結婚 未知會唔會生小朋友 不過買樓會由男友支付 結婚亦無須洗費 但想保留部分資金作日常及將來生活洗費

以下係現有股票既平均買入價, 另外有現金100萬, 希望將來可以有機會自己有能力買樓收租,

請問老師以下股票係咪可以繼續持有，同埋點樣既投資/儲蓄既策略，可以令我既資產有所增值（月供股票較好？），謝謝

已有股票：
0002 $74.1@500
00012 $33.6@1000
00388 $539@200
02388 $21.3@500
02800 $26.95@1500
03067 $19.82@100
09988 $259.56@200

龔成老師：

如果買樓等支出，都會由男友處理，你現時的資金，就可以集中在財富增值，雖然你打算日後買樓收租，但這動作不用急，第一，你資金不算多，第二，你男友方面會買樓，如果以你地作為一個整體去考慮，你地不用太急同時買兩層樓，可以買完第一層樓後，隔多5-8年才買第二層，會比較好。

因為能有效平衡經濟週期、樓市週期等風險。

因此，你這刻可以好好利用這段時間，去進行財富增值，現金$100萬都可以部分投資股票，提升財富增長率。

現時的股票，有質素的，你可以長期持有。

至於現在的$100萬，你暫時可動用$30萬，分注投資股票，餘下資金再等機會（如果不懂分注買入，或無信心，就月供）。同時，你可以將每月儲到的現金，例如$10000，月供股票。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21676：

龔sir，感謝你的回覆。我屬於可以承受較高風險嘅類型，想計劃將每月儲蓄的$8000作以下 月供：

0066 （$3000）
2800 （$2000）

餘下$3000月供1830 或3067 又是否合適？

比亞迪近期回調咗好多，心思思想再入貨，而家$145係咪好時機？

等我8月出約滿酬金後，就會報讀你嘅基礎班課程呀，到時會唔會繼續有優惠價呢？

龔成老師︰

以你50歲計，用$3000去供安碩恒生科技（3067），都勉強可以。但你要明白，這類潛力股風險較高，當你越近退休之年，比重就要慢慢下調，去做平衡。

而必瘦站（1830）長遠有發展，本身有一定的質素。但本質上較波動，無貨可以接近$4時，開始小注，但月供就唔係咁建議。

比亞迪(1211)近期回左唔少，現價可以月供，但直接買的話，最好等到$120才開始。

另外，由於佢同3067一樣，都係潛力股。以你年紀，潛力股最多佔組合2成左右，就好了。

現時大市只在合理區，資金唔好盡用。最好留有部份，等大跌市出現時，可以用來掃貨。

至於股價班（基礎班），現時造緊優惠價$8800，相信今年都會有這優惠的，放心。

------------------------------------------------

Q21677：

你好龔成老師，本人30歲，每月收入大概$16000，現金流有20餘萬，每月儲$5000，手持30餘萬股票如下：

941中國移動：1500股@49.7
1211比亞迪：1000股@157.1
1343偉源：[email protected]
2318中國平安：1000股@85.5
6622兆科眼科：2000股14.7

我想問一下價格是否都不合理？

我想入手27銀娛，這樣組合是否適合我年齡？

持有以上或加持，想35歲能夠達成100萬的目標是否做到？感謝

龔成老師︰

你現時持股，大部份都係有質素，買入價太致都可以，你可長線持有，但要留意以下3隻。

中國移動(0941)有質素，但只係收息股，增長力唔會好高。而你係偏年青，應先做好增值部份，因此此股不要持有太多。

兆科眼科（6622）係一間眼科製藥公司，致力於療法的研究、開發及商業化。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注。你現時小注投資下好了，不要加注，同時要明白當中的風險。

特別要留意的，就是偉源控股（1343）。這類股票要十分小心！過往股價曾經極高！

過往5年，生意都無特別增長，中期業績更生意下跌，並出現虧損。

這股在過往，一年盈利只有幾百萬坡元，一年盈利平均只有波幣$3000萬，佢增長力一般，從事建築工程等業務，這類股一向估值都不太高，市盈率可能只有8-10倍。

過往曾被推高至近市值$40億！超誇張的價！

加上這股上市年期不久，上市時市值細，這是無原因之下上升，與之前的問題類股玩法一樣，小心！

現時市值$1億、$2億，表面唔貴，但這類股，根本對小股東不利！投資價值當然不高！

銀娛(0027)是平穏增長股，適合你年紀，現價合理，可分注或月供儲貨。

我假設投資回報有10%（連股息再投資），你每月投資$5000 + 現有資產50萬(現金和持股)，5年後大約會增值至110萬，故這樣安排相信很大機會達至你的財務目標。

但大前題係，你要做好月供，和好好整理好股票組合。質素差的，要換走。再加入一些合適又有增長力的優質股(以下股票，都適合你，可以參考下。)，才會較大機會做到。

另外現時大市只在合理區，20萬現金唔洗急住入市，可以等大市有明顯回調，才出手，並長線持有。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

------------------------------------------------

Q21678：

成哥，今次有一個腦袋急轉問題，我而家巴士司機工作十年了，如一日，好想離職，而家進修 英文程度小三，

以前唔讀書今年35歲了，股票投資美股，$60 萬。$20 萬現金。$10 萬比特幣，前路忘忘，求指點

龔成老師︰

當你覺得對現時生活不滿，落實行動去改變，係一件好事。

除了進修外，你可以再想清楚，你希望未來5年、10年、20年係過怎麼樣的生活。如果你想過這種生活，具體你要點做，才去有效率地重點做好準備。

其實你可以嘗試做小生意，一開始不要投入太多資金，慢慢成功先加大投入。

投資方面，以你35歲，投資應以增值為主。美股都有不少優質股票，你可以睇翻佢地質素，同增值潛力，去決定是否持有。

而20萬現金，你可以先儲起，等大跌市時，才出手入平貨。

至於虛擬貨幣，我不是這方面的專家，所以我太大意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

------------------------------------------------

Q21679：

老師，我係學生黎，因為最近我做緊一份功課，係關於小米股票，我唔係咁明點計算佢地流動比率，速動比率. 感謝老師

龔成老師︰

流動比率 = 流動資產 / 流動負債

流動比率︰主要用於分析短期償債能力的高低

速動比率 = 流動資產(但要扣除埋"存貨"部份) / 流動負債，

速動比率︰是比流動比率更嚴謹的要求，主要用於分析企業持有可用作償債的高流動性資產。

這些數字，你可以在年報中找到。你唔肯定自己計算指標是否正確，可以到一些財經網站(例如中銀網)，可以找到這些指標，來比對自己計算結果。

------------------------------------------------

Q21680：

老師，我每月七除八扣只可儲到$3000,目前成副身家得廿幾萬，持股狀況如下：

003。 32%
066。 21%
1810。 8%
3067。 5%

可用現金60000。 34%

應該如何好好分配同調整以上資金比例呢？

龔成老師︰

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

（而這個%，是建基於股票組合上，並不是整個財富組合上，例如持有股票值$100萬，單一股票最多$15萬）。

你現時持股都有質素，適合年青至中年人士。但你個別股票，好似煤氣(0003)、港鐵(0066)都佔比過重，令風險過高。

你可以沽出部份，換至其他優質股。或者透過新資金，去慢慢平衡翻個比重，都可以。

現時大市只在合理區，餘下現金我地就等機會，有大跌市，才出手入貨。

另外，你要努力審視翻個開支，有無地方可以改善。盡力空出更多資金，去提升財富增長力。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19001-Q19020）

Q19001：

老師 我係你學生，分析489東風集團股份。

我大致用左評估表既第一版輕輕咁睇左佢過往5年既財務數據 （2016-2020/6中期）因為2020未完 所以用左4年黎睇

營業額：有輕微下降既趨勢
股東應佔溢利：近兩年都比2016-2017下跌
每股盈利：趨向下跌
毛利率算平穩
ROE: 平均5年都有12%）
市值>10億
總負債/股東權益：大致<100% (除2019年 （2019年非流動負債增約一倍，睇番年報 主要因為2019多左資產抵押債券）

每股盈利增長：近2年負數
市盈率：2.76-5.54
流動資產>流動負債
負債增長平均每年～20%
不多供股合股 只有派息紀錄
上年年期>2年
核數師無保留意見

綜觀以上黎睇
1）賺錢能力
營業額，盈利，ROE均有下降
係咪意味着競爭力開始下降？

2) 流動性/穩健度
流動資產可以cover流動負債同總負債
負債比率都平均有約20%增長 但流動資產都有增長 暫時都尚算穩健？

希望老師可以俾啲意見 歡迎糾正同補充

除左上堂以外，哩個係第一個有跟評估表去做分析指標 但我發覺有時資料太多唔知點樣篩選好 同時未去到好似老師咁 可以賦予數據具體既意義 老師有冇咩方法可以分享？

龔成老師：

你分析不差，能應用課堂的所教及評估表的部分指引。

東風集團股份（0489）不過不失，但不是高增長類別。

睇翻佢過往財務數據，無特別增長（當我地分析時，最好睇長少少的情況），數年間生意與盈利保持大致水平，增長力不強。

同時，你要解讀數據，要將財務數據配合大環境及佢自己的情況去分析，唔好只表面分析數字。

如果比起行業情況，佢唔算特別強，多年來的發展都只是一般，過往產品未能帶動佢生意大增，同時賺錢能力亦無法提高。

其實你在上述分析中，講出了財務數據的重點，但就「解讀」唔到。你要分析翻背後的意思，所以點解我叫你要睇5年年報，同時要分析管理層講話，就是兩者要配合的。

佢的財務數據不算差，大致都合格，但未見有好強的地方，同埋業務唔算有自己的獨特性。

佢之後業務能否增長，要好睇好發展，中國車市長遠正面，都會利好佢，但未能確定佢是高增長類。這股都算有投資價值，現價合理。

當你用評估表時，最重要是先消化這公司的情況，大環境、管理層、財務數據，你要有立體的解讀，而評估表就是一個指引。你先做第1、2頁先，之後到第3-6頁，就跟跟表中的指引，慢慢從年報中找翻答案，但首先要消化整體公司的營運情況。

------------------------------------------------

Q19002：

老師，我想幫媽媽買兩隻收息股，因為佢已經退休，有大約十萬...

想請教一下6823，548，778， 三隻是否都係穩健同優質？如果想買兩隻，老師會建議邊兩隻？

同埋咩位置為之合理區中間或中下，甚至平？謝謝老師

龔成老師：

如果選投其中兩隻，可選香港電訊（6823）、置富（0778），這兩股都是不差的收息股，現時都在合理區水平，6823，中間，778中下，都可投資。

------------------------------------------------

Q19003：

龔sir 你好，想請問你1093石藥嘅問題。

我買入10000股石藥@$16.36，係第一次送紅股5送1，股數增至12000，當上到當時高位$17.8，賺$5萬。我本想長線持有，當宣佈第二次派紅股，買5送3，股數增至19200。現股價$8左右上落，現蝕$1萬。

請教龔sir，為何第一次送紅股股價會升？第二次會跌咁多？石藥是否不應再持有？

現在應該點操作？應該上望幾多定係止蝕離場？大方向黎講，係咪應該拎左紅股就走一走？多謝指教

龔成老師：

根本無得解釋，佢的升跌與送股無關，股價其實本身都會因市場力量，以及中短期的消息影響，有時只是市場情緒化的結果，根本唔需要理會。

你唔應該因為短期股價波動，影響左長線的策略，你最重要是睇企業的質素，長線持有就得。

------------------------------------------------

Q19004：

老師，1211升左好多。感謝老師的教導，改變自己過去無知的投資方法。

買到一間有質素的公司要堅信不疑，長線等待。

其實我自己本身入行做保險，最近有一位同學找我替她的小孩買儲蓄計劃，我竟然叫他留下10萬學習投資

因為她小孩今年21歲，沒有負擔，應該趁年輕學習其他理財，就算要交學費還輸得起。

老師常常教導我們保險只需有基本已可以，其餘涉及投資還是操控在自己手中。

我告訴他先買盈富基金，再慢慢研究學習，也推介老師網站。

其實每日見到老師post好多正面訊息，好有鼓勵性質，也轉介給自己的女兒細心閱讀。真心感謝你，並非因為1211，而是自己開始了解多些理財，可以教育我的小朋友。

見到網友話老師多才多藝，上至理財下及愛情顧問，真係覺得書到用時方恨少。更加鼓勵自己小孩要吸收不同層面的知識，人生才會活得有意義。

謝謝老師，祝福你和家人一切安康。

龔成老師：

你的方向正確，你為客人提供正確的理財是最好的，有時放眼前的利益，之後往往會有更大的利益。

同埋，我好相信「共贏」的思維，唔好只想在別人身上找著數，最重要是幫到人，自然能創造「你的價值」，長遠對你最有利，我自己都是用這一套的。

大家加油！保持進步！

------------------------------------------------

Q19005：

我本人37歲，收入尚算穩定，月入3萬，但只係識得儲錢，保守又唔識投資，唔敢炒炒賣賣高風險，通常都係買下銀行嗰啲基金，賺少少息。

但係好幾年追唔番個本金同手續費，目前有65萬銀行基金，個本蝕緊十萬左右（市值55萬），如計埋收咗嘅息應該只係蝕5萬，我成日有問銀行RM,佢話唔好放，長線投資先會有回報。

另外，有聽你講買吓2800當儲錢，平均價$24.5入（已有5000股）無咩上落，我當長線儲錢。另外自己有份退休儲蓄保險 （月供$3000），同埋$65萬現金流。

目前年年咁儲都追唔到通脹，我份工已經去到頂新點暫時加人工無望，我成日想將現金投資，請問最穩陣係咪要買樓？

我怕自己資金好似唔夠，單身又怕銀行借唔到錢，請問有咩投資方案建議？

龔成老師：

如果你長遠有自住需要，就可以把握香港經濟轉弱，樓價可能下跌（不會大跌），去買樓，但如果無自住需要，就不用急買樓。

另外，「自己的供款能力」好重要，如果供得太勉強，就唔好買，投資其他工具仲好。

如果最後決定再買樓，你可以保持月供盈富（2800），另外，可以考慮加多少少優質股去供：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

慢慢月供就得。

同時，你應該增加投資知識，你37歲，仍是財富有增長力的年齡，應該增加知識，然後好好運用現金（暫時唔好心急用，或只用少少，等你有知識先投資更加好。

------------------------------------------------

Q19006：

老師，多謝你細心分析股票呀！如果我唔識你我係香港個market 又會亂咁買！

我計過現在股票每月差不多收一萬元息！好開心
thank youuuuu! Have a nice day !

龔成老師：

好呀！

我地最重要是「建立長期的優質股組合」，你的方向正確，保持進行就得。

要留意，組合要「平衡」，同時你要留有一定的現金在手

------------------------------------------------

Q19007：

龔sir 你好，我今年28，大概有現金30萬左右，從未買過股票，收入$24000，先生收入$22000，扣除每月開支，大概有$16000剩，現想嘗試開始月供股票，已開滙豐股票戶口。

1. 請問喺咩平台買賣股票最好？

2. 每月應該投資落邊幾隻股票，每隻幾錢？

3. 希望可以30歲前有100萬
感激麻煩龔sir 可給我一些指引

龔成老師：

1）銀行及證券行，其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。匯豐都得。

2）以你年齡，可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

做月供股票，每月$10000。

你可以考慮盈富（2800）$4000。

另外再加3隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

3）要完成目標，你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，做月供股票。

原理如同儲錢，不過就不是儲現金，而是儲股票。計劃要長期進行。

另外，盈富是不差選擇，因為是一個組合，適合絕大部分人投資，風險不高，長期儲貨可助你財富平穩增值，記住要長線持有。

第三，當你有知識，同月供左幾個月後。就可以開始正式利用現金，如果見到大市下跌，就可以同時把握機會，增加你投資回報率。

我相信如果你跟上述三點去做，$100萬不是問題，只是30歲，還是31、32歲的問題。

------------------------------------------------

Q19008：

龔sir 有拜讀您的作品同留意您的資訊 獲益良好 有一個問題想請教 由於家人（後輩）完全無儲蓄習慣 不懂任務投資

如果我想迫他買份儲蓄基金會否是一個好選擇 佢入場費1400$一個月 供五年 第12年回本 後面基本7%息回報 ！還是用同樣本金做其他東西比較好？

月供股票暫時不考慮 因他真心不懂股票類東西
盼望回覆 感謝您

龔成老師：

$1400並不算多，雖然該工具回報不算高，但可以逼佢儲錢，我相信適合佢的。

這是鼓勵佢理財的第一步，因此可以進行。

到佢有更多理財知識，有理財習慣，日後再對股票有興趣，先再加上月供。現時投資上述工具，可以。

------------------------------------------------

Q19009：

你好，想請教：以下股票中伏，持有數量多，現在有什麼建議

1733 $1.05
1029 $0.3
1393$0.6
1165 $3 以上，好多年前記唔清楚
1101 $2 以上，記唔清楚

龔成老師︰

易大宗（1733），如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

鐵貨（1029）年年虧損，如你有留意佢的股價，長期下跌的。

令人擔心的，就是核數師報告，曾經出現「不表示意見」，這反映核數師對盤數「有疑問」。此股無投資價值，建議沽出。

華榮能源（1101）、順風清潔能源（1165）和恒鼎實業（1393），同樣沒有質素，不適合投資，賣出較好。

在你再投資前，建議你先吸取多些相關知識才再開始。你也可以睇我寫架"財務自由行"和"股票勝經"，會對你有幫助。

------------------------------------------------

Q19010：

你好。想投資新經濟、新能源、ESG、電動車、醫藥、生物科技、AI和雲計算的版塊，應該買入相關的主題式ETF或基金或個股？

如買入相關的主題式ETF，應如何選擇？有何推介？

謝謝你。

龔成老師︰

如果你有選股和定平貴能力，我會建議你選擇個股。好似新能車的比亞迪（1211）、醫藥就中生（1177），新經濟就阿里巴巴（9988）、騰訊（0700）等。

（當然，要小心平貴度！部分股已貴！）

若你無太多投資經驗，但又睇好個別板塊。你可以利用月供，或者分注形式，去買入相關ETF，好似新經濟的安碩恒生科技（3067）。

咁做可以用平均價格，去減少你買貴貨風險之外。這些ETF都係一籃子相關股份，可以助你分散風險。

GX中國機智（2807），追蹤中國機械人及人工智能相關指數
三星中國龍網（2812），追蹤中國互聯網相關指數
GX中國生科（2820），追蹤中國生物科技相關指數
GX中國雲算（2826），追蹤中國雲端運算相關指數

GX中國電車（2845），追蹤中國電動車相關指數
平安智能及機械人（3023），追踨納斯達克人工智能及機械人相關指數
GX中國半導（3191），追蹤中國半導體相關指數

------------------------------------------------

Q19011：

老師,我睇緊1881,778同435,

1881同778依2隻派息都唔錯,我想問邊1隻值得入? thanks

龔成老師：

其實3隻都是不差的優質股，如果你想入一隻可以選置富（0778），因為佢持有的物業是民生類，這會對經濟週期影響較少，因此會較為穩健。

------------------------------------------------

Q19012：

大灣區樓點睇？

龔成老師：

大灣區長遠發展正面，中央投入資源及政策配合，要發展世界級的灣區，長遠唔會差。

不過，都要睇翻個別地區，當地的交通配套，經濟發展，以及租合回報率，如果回報率過低，反映投資價值唔算高。

------------------------------------------------

Q19013：

龔sir! 我好想多謝你！

我8月尾果陣買左我人生既第一層樓！

我本身想黎緊兩三年內買樓，也開始留意樓市，之後我買左你果本「5年買樓4步曲」，好快咁就睇曬，你教既先買細價樓，揀會升值既地區，再等時機升值再換樓

咁岩COVID-19 人人不敢買樓，而我在公司的股票裏儲了5年錢，可以做到首期再加上自己每月的儲蓄，剛好夠100萬，周圍去睇樓，最後揀左元朗單棟細價樓！終於成功上車！

多謝你成日講機會係比有準備既人，雖然香港樓市係好高，但係響疫情環境下，各國都印銀紙，變相現金貶值不少

最保值都係股資買磚頭，最初我身邊既朋友，什至父母都不鼓勵我這時候買樓的，係你令我有膽去買樓，宜家成功上車，真心多謝你既分享同買樓心得。

龔成老師：

恭喜你！

我地唔短中短期的樓價走勢，但銀紙永遠貶值，香港樓需求大，所以長遠仍向上，你長期持有無問題的。

當然，最重要是注意「供得起」原則，要有一定的備用現金在手。

------------------------------------------------

Q19014：

龔sir你好,我手上而家有幾隻股票.想長線持有，你認為可以嗎？

1299，1810，270各1手.981 2手
如果要換馬,有邊隻值得投資?可以長線投資.

多謝你一直嘅回覆

龔成老師：

上述都是有質素的股，我會建議你長線投資。

中芯國際（0981）就比較波動少少，如果想套現，你可考慮賣出一手。

不過，現時新經濟股都唔平，你賣出後最多只建議買入舊經濟股。

恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，現時股價都合理，你可以了解下這些股票，然後從中選股。

------------------------------------------------

Q19015：

老師，你本股票勝經即將睇完，不過都係需要時間去消化。

港鐵、領展、小米、中生、金沙、舜宇，香港交易所而家是合理價位嗎？

盈富之前買入，平均價大概為25蚊買入，有2500股，是否可以繼續增持？

香港寬頻（1310）之前係$9.59買，有10000股，是繼續持有比較好？還是賣出轉其他股票？

唔該曬！

龔成老師：

上述的股票，都是有質素的，港交所（0388）略貴，而中生（1177）、舜宇（2382）就在合理區頂，其餘幾隻就合理。

盈富（2800）你保持長期月供就得，這是最好的策略。

香港寬頻（1310）本質不差的，業務穩定，現金流強，不過就增長較弱，長遠亦唔見到有大的增長。優質度是有的。現價合理，可投資，但主力是收息，唔好對股價有太大期望。所以，是否持有與否，要睇你的投資目標。

------------------------------------------------

Q19016：

老師 美團值得入手嗎？ 呢隻唔明點解可以升到咁....
ATMXJ 有alibaba

應入美團 /京東嗎？
定留錢入388港交所？

Thanks!

龔成老師：

美團（3690）因為市場對佢有好大期望，所以升好多，佢業務的確是強確，加上高增長，市民更接受這種外賣模式，都有利長遠發展。不過現價都唔平。

阿里（9988）有質素的。

其實你上述所講的股，都有質素，不過都唔平，你可以等下，睇下邊一隻跌得較多，先考慮都得。

美團的風險會高少少。

------------------------------------------------

Q19017：

龔sir, 我同先生兩年前之前轉按咗層樓（自住），本來想買套現買多一間作投資用途，點知遇上社會運動和疫情，於是不敢買樓。

有一半錢（1M) 是Mortage link 收息，另一半再同銀行借貸，買過bond, US bond fund, and multi income fund. 依家埋單（計埋借錢成本和收息），已蝕咗4 萬多。

我想問下應該點樣處理資金好？銀行叫我轉買 US Tech equity fund 和 China equity fund. .. 我先生40 多歲

龔成老師：

最重要是睇翻你地的大方向，如果你最初是方向是買另一層樓，而你地的負擔能力無問題，財富無集中風險，其實仍可以考慮這計劃。

至於這類債券基金，我已經收到唔少網友反映出現賺息蝕價的情況，你要睇翻自己的風險承受能力，因為當中涉及借貸投資，就將風險放大左。

以你地的年齡，轉買 US Tech equity fund 和 China equity fund，是可以的。

當然，我會建你想清楚長期的投資方向，建立一個長期的組合，唔好轉來轉去。

------------------------------------------------

Q19018：

我今年21歲 對理財非常有興趣
我今年7月開始挽股票 現在大概賺了3萬 本來有更多利潤 不過我一開始目標是短線 所以虧損了一部分利潤

現在想了解一下長線的投資
老師你是以長線投資為主嗎？

老師 請問你點睇3868？可長揸嗎？

你開的班係咪都係香港？
我係澳門的

同埋老師 1810 現在價錢合理嗎？

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，但不能投資太多，因為佢業務都有風險的，要注意股價波動，如分注長線都可以投資。現價合理區頂。

小米（1810）有質素的，可長線持有，不過現價開始有少少貴。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q19019：

龔Sir,這一年來所持的舊經濟股下跌了很多，覺得這些股票增長潛力不算大，所以想著好不好賣出(部份或全部)，換馬買入潛力較大的新經濟股。

持有領展(1000股, 成本價76.11), 煤氣(4415股, 成本價12.22), 盈富基金(2547股, 成本價26.28)

想等機會買入平安好醫生，阿里巴巴等新經濟股。

有甚麼意見。
謝謝！

龔成老師：

唔好因為中短期的股價表現，而認為一隻股無質素。我地最重要睇企業本質，睇長期。

你持有的股票不是無質素，不過，如果你是年齡唔算大，你過往如果集中在上述股，就是配置有問題。

簡單來該，你持有的該幾隻股都無問題，但你可能有配置問題。

你要平衡翻潛力股、平穩增長股、收息股，你自己的大方向如何。如果大方向想有少少增長力，就可以加入新經濟股，上述兩隻都是好優質的，但坦白講，現價貴，你要注意風險，小注好了。

------------------------------------------------

Q19020：

你好，想問下941和2628的前境

龔成老師：

中移動（0941）不差的，不過，5G雖然對佢有正面影響，但中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，唔好對股價有太大期望，增長力不算強，這股有長線投資價值。

中人壽（2628）有質素的，這股都有長線投資的價值，不過，增長力就不及過往年代，所以唔好對股價有太大期望。算是平穩增長型。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

股票投資如何解讀三大財務報表？重點會計項目與邏輯
投資股票如何財報分析？什麼樣的知識是必備的？瞭解三大財報中重要的會計項目與邏輯，重點解讀財務報表！
‣‣財報分析#3：https://youtu.be/gBIzFETh1aU

財報分析影片列表：
https://www.youtube.com/playlist?list=PLZLWHjkSUj6aZuwEieIDuPaAwTBlXbNgL

▬▬▬▬▬▬▬▬▬▬▬▬▬▬▬▬▬▬▬▬▬▬

▶︎訂閱 Jade 投資理財 ◀︎
https://www.youtube.com/c/Jade投資理財

‣‣ Instagram :
https://www.instagram.com/jadefintech/
‣‣ Facebook :
https://www.facebook.com/jadeho258

▬▬▬▬▬▬▬▬▬▬▬▬▬▬▬▬▬▬▬▬▬▬

⟳ 影片結構⟳

0:18 資產負債表架構
0:49 流動資產 流動負債
2:36 固定資產 長期負債
4:30 股東權益
4:44 損益表架構
6:07 商品獲利
6:30 營業獲利
7:45 本業外獲利
9:01 最終獲利
9:22 現金流量表

▬▬▬▬▬▬▬▬▬▬▬▬▬▬▬▬▬▬▬▬▬▬

▶︎相關內容◀︎

‣‣唯一可閉眼投資的商品？ETF特性與心法
https://youtu.be/m1Q74X83Sr0
‣‣股票學習第一步！用老闆思維了解股票本質
https://youtu.be/zGcpT0jmQwE
‣‣股票分析基本功！三大財報財架構與關係
https://youtu.be/wa8xh0tVOF0
‣‣如何解讀三大財務報表？重點會計與邏輯
https://youtu.be/DZzaR1Ty0hQ
‣‣一招讀懂財務比率！財報獲利性分析
https://www.youtube.com/watch?v=gBIzFETh1aU
‣‣股票投資安不安全？財報穩健性分析
https://youtu.be/ExO-GQkGjqc

Icon made by Eucalyp from www.flaticon.com
#財報分析 #會計 #理財 #股票 #價值投資