【我明白你！】

前天早上，我負責當值。
一位60餘歲的先生上來，要求借助行架。
看他懊惱的模樣，知他心情很不好！
果然，阿肥姑娘的猜測沒有錯！

我微笑向他介紹自己，他黑面表明他的來意。
邊說邊發晦氣：「我本來買咗個新嘅俾佢㗎！但佢之前唔駛用，嫌阻掟要我送俾人！宜家又要我上嚟借！」

我勸他先稍安無躁，借用手續十分容易，但問題是我必須先協助他重新登記資料，因他手持那張四年前登記的護老者證，過期了！

他再一次黑面：「吓？咁快過期？」

我耐心解釋：「係！之前同事應該出過信通知過你嚟續會，但你冇嚟到，所以取消咗！」

他：「我冇收過任何通知！！」

我：「係？唔緊要！我等陣再幫你了解，但宜家先幫你登記多次先！」

被照顧的是他太太，年紀比他大一年，他今年63。

一登記，發現四年前替他登記的同事，把他太太的姓名寫錯了！

他再次表現不滿：「有冇攪錯？連我太太個名都寫錯？」

我再次誠懇道歉：「好對唔住！我都覺得『有冇攪錯？』但同事真係寫錯咗！」

他見我知錯能改，遂不再發難下去！

「你太太身體點樣？除咗借助行架之外，有冇其他服務可以幫到你？」

「冇！你哋完全幫我唔到！你哋啲服務根本離哂地！只係點綴，淨係識得攪埋啲乜嘢講座旅行，根本完全幫我唔到！！！」

他一針見血！我表示同意！

「我都覺！好多護老者服務都十分表面，完全唔明白護老者嘅困難同需要！講真，護老者最需要金錢同時間，但呢啲服務根本完全幫唔到！仲有，交通！復康巴都收緊埋，唔夠五個人就未俾你約車；覆診約易達巴同非緊急又難，成日約唔到，約到又要遊車河，真係淨係搭車都心力交瘁！」

他感到很愕然！瞬間眼泛淚光！他完全想不到，為了照顧洗腎太太而辭去廚師工作四年、每星期要帶太太到醫院洗血三次，每次四小時，常有車去沒車返的他，竟遇上了一個年紀比他輕廿年，但照顧經驗比他多十年的社工姑娘！

他的表情和態度明顯軟化，由敵視變為友善，由不屑轉為尊重！

我向他透露了我的雙重身份，表示明白他所面對的壓力與難處，希望和他一起想辦法，盡量減輕他沉重的負擔.....

於是，我由洗血陪診開始講起、到傷殘津貼和護老者津貼、再到復康器具推薦和購買、再到出入交通安排、私營院舍和長期護理服務申請等，逐一向他解釋和解答。

最後，我作出總結：「政府增撥咗資源，中心增聘咗人手，宜家護老者服務由一隊同事專門負責，兩間中心共六位社工同事幫手；我見佢哋好努力咁構思服務，相信會比以前好；你唔介意嘅話，我想將你嘅情況話俾負責同事聽，等佢哋主動聯絡你，盡力幫輕吓你；至少，搵個義工上嚟幫你睇住太太，等你可以行開一陣都好！」

「唔介意！多謝你！多謝妳幫我咁多！未知點樣稱呼妳？」

「我叫阿肥姑娘！」其實剛看見他，我已自我介紹過！

「祝福你同太太！我哋一齊努力吖！」

「多謝妳！」他拿著助行架轉身，匆匆趕回家去了！