【TVB WEEKLY】

【娛樂熱話】

《法證先鋒IV》

全城睇大結局　終極Boss揭盅

《法證先鋒IV》播出以來，一直廣受觀眾歡迎，成為城中熱話，收視節節上升，第1至29集平均直播收視為32.4，第1至24集平均7天跨平台總收視高達35.8點，逾2,339,000人收看，第21至25集收視再創佳績，7天跨平台總收視為36.8點，成績斐然。

為與觀眾一同迎接大結局，TVB於上星期五（3月27日）舉行《法證先鋒IV》「大結局最強對決」活動，演員黃浩然、譚俊彥、陳煒（煒哥）、朱晨麗、鄭俊弘、張曦雯、海俊傑、張頴康、電視廣播有限公司副總經理（節目及製作）杜之克、製作部（戲劇合拍）總監劉家豪、製作部（戲劇合拍）總監暨《法證先鋒IV》總監製梅小青等，雲集將軍澳電視廣播城二廠，齊齊欣賞大結局。會上，即將榮休的梅小青與一眾演員，分享一直以來劇集得到觀眾支持的感受，亦在台上擺出心心甫士，答謝觀眾對劇集欣賞及支持。

觀眾最關心終極big big boss是誰，結果令人驚喜，原來張曦雯所演的高善就是終極boss。梅小青為大結局解畫，說張曦雯自細被小丑捉走，加上與身為殺人犯的哥哥張頴康一齊成長，所以也扭曲成殺人狂魔。最後一個凶案有四具小丑屍體出現，他們各自拿著不同物件，分別是針筒、鎚仔、手槍和菜刀，其中一人張開手掌，就是有「法證先鋒5」的意思。作此安排，是否為開拍第五輯留下伏線？梅小青大賣關子，說留待公司決定。

■■■期待《法證先鋒V》■■■

#梅小青

#陳煒 #煒哥

#水慧明

#Queen姐

#法證部科學鑑證主任

#法證先鋒IV

《法證先鋒4》大結局唔係大結局，可以向宮崎駿致敬，退休無限loop！

～ 結局又係小丑案，仲特登舉起五隻手指，擺明有第五季，但小青已經宣布退休，點算呢？可以換監製嘅，不過邊個敢接？一接衰了收視豈非千夫所指，最理想當然係小青姐退休後又復出啦，小青姐有麥玲玲的福氣加持，縱使劇情香港及國內都有大量抨擊，依然收視強勁，這種正能量，第五季點可以無佢監製呢！復出這件事很易辦，打正旗號向宮崎駿致敬，退休可以無限loop，只要小青姐身壯力健，十季也可以。

～ 張頴康件案真係摸不著頭腦，為乜呢？陳敏之殺人因為有李漫芬，她那種橫蠻無理，真係有晒殺人動機，人格分裂又係嚴重精神病，喪失常性去殺人合乎情理。但張頴康因為張曦雯救過佢，輸過血俾佢，就要殺晒欺負她的人，有甚麼必然關係呢？張患上情緒病，需要服食氟西汀，這藥主要針對抑鬱症，強迫症或者暴食症(見維基)，這類藥主要有防止自殺功效，暴力傾向增強是其中一種副作用，但Michael最後的情況已經是精神錯亂，攬炒仲合理過而家，講句阿妹原來最錫愛，就咁死左，好奇怪？我理解力低啦，呢件案由殺人動機開始，已經唔明佢搞乜。

～ 你有個妹個肚俾人插左一刀，留左成灘血，會唔會咁冷靜，好似知道一定無事咁，留低响現場向啲同事解釋案情呢？仲要成屋每個角落都細心觀察一番，兇徒已經走左，現場環境完整，又沒有一定要第一時間搜證的證據，唔可以去左醫院睇住個妹先咩？一直講到黃浩然好錫、好錫、好錫兩個妹，點解突然變左有點冷血？

～ 昨天Queen喊晒口拒絕King，今晚爆車一幕證明了她昨天的憂慮是對的，做警察隨時死㗎，嫁唔過！點知佢又喊晒口咁接受番King，前後矛盾到呢！點解咁，大家都知，夠鐘結局嘞，唔好再玩啦。但個人接受Queen這種變化喎，首先，女人絕對有權利反覆無常，但唔好單純以為是情緒問題，有理論基礎的，否定阿King後再否定自己，King的大量追求行動改變了Queen的本質(唔愛變愛)，知道King唔當她是女友(質變)，立刻化成力量去維持本質，質量互動，抗拒有危險的婚姻又變成接受婚姻應該有危險，既矛盾又統一。這段似是疑非的文字其實充滿「矛盾論」味道，用來作「共產主義」理論基礎我唔多明佢講乜？不過用來解釋女性的特質又相當有用。

～ 一講大佬昇就有大佬昇、一知道有洗潔精成份就見到「洗碗至尊」，史丁同阿King又突然瞬間移動出現救人，已經是這劇無得解的特色，不再講了。

～ 靚湯變了肥湯，難怪小青姐要佢減肥，睇嚟張曦雯無期補拍，所以兩個無碰面，至於她和黃浩然突然感情大躣進，都係過句，夠鐘完嘞！

～ 估計結局原本只是有堆小丑死屍，張曦雯啲鏡頭是夾硬剪入去的，真係開第五季先再諗劇情。

～ 之前我信報導小青姐會退休，法證系列真係完，又見劇中有咁多對未婚男女，諗住個結局係電影《家有喜事》咁，四對主角著晒婚禮服飾出嚟「恭喜發財」㗎，而家諗錯左添😅

～ 施嬅有演出大結咩？睇唔到，完全睇唔到，拒絕承認睇過😭

《法證先鋒4》－「小丑案」的黑人問號？

等待了九年的「小丑案」完結了，大家滿意嗎？蝦條對野豬的感情，是兄弟情還是hehe呢？這只是個小問號，另外還有一些「黑人問號」？

－ 第五集小丑案的案發，野豬如何一人搬三條屍去中環碼頭呢？碼頭海邊位置離路邊有一段距離，一個人要續條屍拖十幾廿米去那位置，然後仲要佈置環境，綁汽球在死者身上，插多兩刀搞一輪，中環碼頭真係會無人任佢搞？放屍時間不會太夜，因佈置完屍首，野豬仲call蝦條回荒僻的鐵皮屋蔵身點，蝦條無厘頭離開去探女友時，那時天未黑，劇情說他在醫院等了幾個鐘，雖無明言等多久，但第八集講了女友是做宮外孕手術，照計三至五小時一定完成，當蝦條五至六點去醫院，更誇張手術做夠八小時，兩點完夠夜未，那麼野豬做案時間應是十二至一點，因藏身點偏僻揸車回去估計要一小時，十二至一點中環碼頭會一個人都無？好疑問？另外野豬向蝦條解完畫後，還即刻搵大飛祥，(因為二人無換衫)，野豬被差人發現逃走跳海，蝦條逃回藏身點，剛收埋鑽石就俾差人拉，這一晚實在太長了，長到難入信！都係當佢第二晚走佬啦！

－ 點解差人知道蝦條是劫匪？邊個篤灰又係一大問號！五個劫匪，當日死了三個，另一個野豬當日或翌日受傷跳海走佬，現場兩個軍裝是偶然發現野豬，又無發現蝦條，知道蝦條身份及藏身點的人死晒走晒，差佬點知蝦條有份參與和匿響鐵皮屋？

－ 誰告訴野豬何志堯是幕後黑手？ 野豬因勒索何志堯被殺很奇怪，他和蝦條是局外人，案發時才知原來會殺人，不久野豬更殺了知情的三個劫匪，到底他如何知道幕後主使是何志堯呢？而且，明知蝦條收埋五千萬鑽石，仲要去包艇出海勒索何志堯一百萬？幾奇怪下，真係衰大貪咯！

－ 編劇寫錯時間？野豬十月十二日被何志堯殺死，蝦條十月二十三日出獄，第六集譚俊彥十一月問何志堯和𣪧紅口供，問二人上個月十月十二日的不在場證據，敫紅用偽造時間相證明不在場，但不久譚俊彥突然入靚湯房發現電腦𣪧紅的斷甲相時，靚湯回答是「今個月八號」，你以為是十一月八日，但之後朱晨麗查到殷紅十月九日去修甲，引證靚湯的相，咁到底是編劇寫錯時間，還是靚湯背錯對白呢？

－ 黃浩然望過蝦條個水壼一眼，居然記得咁多野令大家嘖嘖稱奇？但更奇怪的第八集的黃長興臨死時，無端端為乜吞粒兩卡鑽石落肚？蝦條殺左人成個星期，仲保留件兇器，唔去毀滅證據亦都很離奇？鐵皮屋殺人現場，居然有兩個咁大的真空袋？木蚤太多蝦條要躲到入面睡覺？

－ 案情有不少細節位未補完，但第六集整左十幾分鐘講秋姐生腦癌，第八集也花了半集交代譚俊彥的過去和深情洗碗，都是睇到人充滿問號！

＃法證先鋒4 #小丑案 #黑人問號