世界盃準決賽第二場，由英格蘭對克羅地亞。隨住法國以一個死球 (以及四平八穩嘅踢法) 氣走比利時，無論「三獅兵團」抑或「格仔兵團」打入決賽，都會扮演 underdog 嘅角色。英格蘭今場獲編配著主場嘅白衫，克羅地亞著作客嘅黑色波衫，符合佢哋「黑馬」嘅角色。

克羅地亞連續兩場淘汰賽都踢足 120 分鐘，先至憑互射十二碼擊敗丹麥同俄羅斯，但球隊正選名單大致維持不變，只係由波索域取代卡馬歷，加強中場控制力。英格蘭繼續沿用 3–5–2 (或說 3–3–3–1) 陣式，以史達寧輔助哈利簡尼攻堅。

不過今場嘅第一位主角其實係查比亞，呢位效力熱刺嘅右翼衛開賽五分鐘就喺鵝眉月頂主射罰球打開紀錄。其實喺呢場波之前，查比亞喺國家隊未有入波，喺球會級賽事，八個球季嘅罰波入球亦只得四個，認真係禾稈冚珍珠。

查比亞作為英軍今屆嘅死球專家，平均每 90 分鐘就為球隊創造 0.6 次「餐士」，當中透過死球嘅製造嘅埋門機會就超過 0.4 次，遠遠拋離其他隊友。呢個數字喺今屆世界盃一眾球員當中排第三，僅次於尼馬同迪布尼。當巴西同比利時靠 Keyman 或 Playmaker 創造機會嘅時候，英格蘭就真係用自己嘅方式贏波。

根據英國《金融時報》 (你冇睇錯， Ivan Li 李聲揚 - 華麗后台 今屆周不時引用 FT 嘅報道同分析，而你睇返香港嘅《信報》⋯⋯) ，英格蘭今屆賽事平均每場創造嘅機會只係排第七至九左右，當中超過一半來自死球 (其他過五成嘅球隊包括巴拿馬、葡萄牙、俄羅斯同克羅地亞同烏拉圭 ) 。

咁其實無可厚非嘅，呢支被譽為近代最無星味、實力最弱嘅英格蘭，的而且確唔似得法國或者比利時咁擁有才華橫溢嘅球員。 90 年代初有加斯居尼， 90 年代尾有碧咸， 2000 年後有朗尼⋯⋯而家講腳法，最好嗰個可能叫史達寧 (如果唔係中堅史東斯的話) 。咁限米就當然要煮限飯，專門用罰球同角球去搵機會入波，又真係唔犯法嘅。

Malcolm Gladwell 嘅暢銷著作《大衛與哥利亞》其中一個例子，都係講一位名叫 Ranadivé 嘅教練，點樣帶領一支資質平庸少年籃球隊爆冷贏波。佢用嘅係相當另類嘅戰術：全場前場壓迫防守，喺學界咁玩法係可以令對方五秒內開唔到波而違例，於是自己就可以打斷對方進攻節奏，並利用體能優勢以弱勝強。

不過喺世界盃上，英格蘭想要單憑一個罰球入波而晉級，又邊有咁容易？上半場佢哋同克羅地亞尚算互有攻守，史達寧今場冇再獨食或者浪費機會，令佢作為鋒線爛頭卒、第一點控定來球畀隊友後上再組織嘅功用相對地明顯。如果哈利簡尼或者連加特好好把握機會，英格蘭有條件領先兩球返更衣室嘅。

下半場戰局都係比較膠著，直至克羅地亞喺中段開始壓上，第二位主角出場：效力國際米蘭嘅佩利錫。佢喺由左邊入楔，喺卡爾獲加身後接應傳中，以打踺腳射入，為克羅地亞扳平。之後佩利錫乘英格蘭班後生仔陣腳亂一亂，左輔位射遠柱彈出，喺十二碼點嘅列比錫唔太為意而求其一腳射返畀門將碧福特。

英格蘭大難不死，將比賽帶到加時階段。克羅地亞加時上半場縮得較後，應該係體力下降之下，迫不得已嘅選擇。英格蘭差啲憑一次角球攻勢再度領先，可惜史東斯嘅頭槌喺遠柱被敵衛維沙高解圍。臨完加時上半場，佩利錫及後左路傳中畀文素基治，不過碧福特及時出迎擋出射門，但已經為英軍敲響警號。

如果睇返英格蘭換人嘅調動，大家都應該明白英軍實力已經見底：華舒福入替史達寧、丹尼路斯入替艾殊利楊格、迪亞入替軒達臣，後兩個調動基本上都係對位換人，而華舒福出嚟上腳推進，喺隊友跟進乏力嘅情況下就顯得有啲孤掌難鳴。

加時下半場克羅地亞再次採取主動，佩利錫乘英軍解圍不遠，壓住呢場波頭威頭勢嘅查比亞頭槌二傳，文素基治反應快一步擺脫史東斯入楔，近門射破碧福特十指關，反先二比一。

英格蘭最後一個換人名額係華迪取代卡爾獲加。卡爾獲加踢右中堅呢個方法，無疑令佢同查比亞兩位先後效力熱刺嘅右後衛可以並存，並且以速度彌補另外兩位拍檔轉身慢嘅弱點。不過針冇兩頭利，邊衛移入中路嘅身高同位置感好多時都會出現問題，之前卡爾獲加對哥倫比亞已經幾乎出事，去到四強先至畀佩利錫偷雞，其實遲咗。

查比亞最後傷出，英格蘭以十人戰到最後。全場英格蘭一千零一個埋門，正正係查比亞開紀錄嘅罰球。或者都說明咗，英格蘭以咁樣嘅陣容殺到入四強，其實已經超額完成，就好似 2012 年歐洲國家盃意大利喺不被看好嘅情況下打入決賽一樣 (雖然最後畀西班牙炒四粒好慘情) 。雖然喺四強輸畀「黑馬」克羅地亞係令人比較難接受，但係球迷將期望一步一步推高，最終結果不似預期，又可以怪邊個？兩年後嘅歐洲國家盃，可能先至係英格蘭嘅舞台。

#全城最快