話說早幾日先講完尼斯派個香港展覽，有個細路女走左上去件藝術品度，搞到一地油漆。你以為係個別事件？原來係衰開有條路，更早排海港城的Harbour Art Fair出事，其中一件展於馬哥孛羅香港酒店的藝術作品《不開心樂園餐 (Unhappy Meal)》就好順手咁俾清潔工人扔左入垃圾桶。

事實上，好多地方都曾經有呢啲藝術作品被清潔工破壞的例子。德國曾經有一個好盡責的外判清潔工，將《當天花板滴水 (When It Starts Dripping From the Ceilin)》特意噴上油漆、用來「接水」的兜省乾淨。就係咁，呢件價值700萬港元作品也就報銷了。另外，意大利都唔輸蝕，另一件藝術裝置《Where are we going to dance this evening?》特色就係散落一地的香檳瓶、紙碎和派對用品，點知好死唔死，間博物館當晚真係有Party，結果清潔工人傻傻不分清，在活動結束後，順手清理埋呢堆藝術品了。但是各位環保人士不用擔心，他們係有做到分類回收，所以玻璃無去到堆填區（誤！）。

不過，講到叻，真係叻唔過我地香港。我仲記得幾年前，香港政府帶頭叫清潔工人剷走Invader數以十計的街頭塗鴉作品，在外國呢啲作品全部有價有市，多少人求神拜佛希望自己棟大廈被Invader塗鴉一下，除了美化環境外，就會即時升值唔止一百萬。人地外國清潔工唔識都算啦，我地咁大個政府都搞成咁，你話點搞？

結果，在香港咪淨返呢葵芳85萬古墓的糟糕藝術品囉！點解？因為實剷唔走嘛！呢件野玩完之後，我強烈建議捐去美國波士頓「糟糕藝術博物館」，該博物館「有常駐展品500件，都是「糟糕至極而讓人難以忽略」的作品」而我認為我地香港呢壇野有機會成為他們的鎮館之寶。

返黎正題，唔好怪個清潔工人，首先應該問左主辦方有冇認真同所有員工做好講解同培訓先？講真，如果個event本身係希望向公眾推廣藝術，點解唔係優先向自己員工推廣？如果去到最尾，連最前線的員工都唔了解那些藝術品，大家能期望那些參觀者可以認識到幾多？外國唔少中小型藝術館，連看更都可以隨時同你講解到幾句，香港其實唔缺藝術展覽，但極度缺乏相關的教育。香港係一個文化沙漠，只要一日唔改善土壤，你注再多水落去，全部都會流走。

#其實最後張圖唔關事
#只係每次我聽到藝術品要修復我都會諗起呢單野
#我知道我唔應該笑
#另外今次被扔的藝術品價值364美金
#好彩唔駛賠太多
#但藝術品的價值和價格並不一定成正比哦

我唔食小龍蝦同大閘蟹喇～～～

俗務纏身，十月頭講到要寫食物安全與健康，本來早兩日打算寫小龍蝦，但無耐就有新聞話江蘇既大閘蟹受二噁英污染而要回收。咁樣樣，我就一炮過寫下生活係淡水既大閘蟹同小 - 龍 - 蝦蝦蝦！

早幾個月前有人北上食小龍蝦然後病左，據報係患上「橫紋肌肉溶解症」(Rhabdomyolysis)。網上於是不斷有人 old news is so exciting 咁翻兜舊 post (主要係 Content Farm)，話小龍蝦靠食腐維生，專門食埋D動物屍體於是佢地好污糟，叫人唔好食小龍蝦。

呢個題目，睇來好似好簡單：小龍蝦食垃圾 > 污糟> 食完會病 > 唔好食。於是，好多人就會話：洗乾淨D啦、食有來源保證既貨啦、煮熟D殺菌啦...

喂喂喂，你地中學有無讀科學或者生物架？蟹同所謂既小龍蝦，係叫做bottom feeder，佢地一向都係靠食沉積係水底既腐爛生物為生架啦，你今日先知？Bottom feeder 仲有螺、貝類、海參、比目魚、鰈魚、鯰魚等等。

我唔贊成食來自中國既大閘蟹同小龍蝦，絕對唔係因為佢地係食水底腐爛物，而係另一個原因，等我慢慢解釋。

首先講下「橫紋肌肉溶解症」。「橫紋肌肉溶解症」既病因有好多種，最主要係重金屬及毒素，或者病毒或細菌感染引起，而先天既新陳代謝問題啦、激烈運動啦、體溫過高啦、甚至乎由自身免疫性疾病 (autoimmune disease) 都可以引發「橫紋肌肉溶解症」。

2012年，中國學者係學術期刊 Internal Medicine 撰文報告華東有人因為食小龍蝦而引發哈夫病 (Haff Disease)。哈夫病就係食用河／海鮮24小時內引發橫紋肌肉溶解。文章確認患者係極短時間內病發，而所食用既小龍蝦已經完全煮熟，所以懷疑病因係由某種毒素(toxin)引起，因為該毒素應該耐熱(heat stable)，經過烹煮後依然存在。呢單野，南京日報都有報導。呢個發現，大體上都排除病毒或細菌感染呢個原因，因為患者煮到熟一熟來食，一樣中招。

講到 heat stable toxin，大家記得雪卡毒嗎？香港成日有人食深海魚而中雪卡毒。雪卡毒(ciguatoxin)係一種耐熱毒素，由雙鞭毛藻產生。深海魚食左呢D藻類，日積月累佢地既身體就會含有雪卡毒，呢個機制叫 bioaccumulation。

中國既大型淡水湖好多都係華東淮河流域，例如洪澤湖、白馬湖、昭陽湖、駱馬湖、高郵湖。佢地都會出產好多淡水魚同小龍蝦，供應中國或者香港。上面 Internal Medicine 既文章已經確認病因係由某種不明耐熱毒素引起，而毒素如果唔係藻類產生然後經 bioaccumulation 存於小龍蝦體內，就肯肯定係工業毒素。呢D污染物，任憑你點洗隻小龍蝦，煮到佢點熟都無用，佢都會存於小龍蝦體內。至於食安中心話大閘蟹受二噁英污染，二噁英就係化學污染物，通常由農田過量既殺蟲劑，或者金屬冶煉同化工廠廢料流入湖泊同海洋。

咁，即係咪話養小龍蝦既淮河流域湖泊，同養大閘蟹既長江流域湖泊例如洞庭湖、太湖、鄱陽湖等受到嚴重污染呢？噢，咁又等我講講。

2008年，江蘇省環境科學院係《環境監測管理與技術》期刊發表左一篇叫《江蘇省12大湖泊水環境現狀與污染控制建議》既文章。文章提到江蘇省全省受污染水域面積超過98%！12個湖泊因為經濟發展快速及工業化偏重，排放污染物既量大過所有湖泊既承載力，於是水質惡化，面積減少，富營養化 (eutrophication)，藻類大增降低水含氧量，而同時水入面既氮同磷含量都好高(會使富營養化惡化，藻類數量大增)。當時出產小龍蝦既高郵湖同邵伯湖，上游既白馬湖同洪澤湖，水質屬劣V等，水體發黑發臭，不能飲用。高郵湖同邵伯湖既水質於是已經惡化到變成 V 等，即係只能用於農業或者一般景觀要求，不能飲用。水唔飲得，咁飲呢 D 水既小龍蝦你話應唔應該食？

然後，2015年，南京林業大學研究員係《長江流域資源與環境》發表左《江蘇省淺水湖泊表層沉積物中重金屬污染特徵及其風險評價》。文中提到，江蘇省8個淺水湖泊表層沉積物最主要既污染重金屬係鎘(Cadmium)。大家知道鎘係咩呀？鎘有劇毒，會破壞肝同腎，會致癌，會死人 der。鎘係做電池既材料，又用於金屬電鍍、生產顏料、油漆、染料、印刷油墨。其中，高郵湖既鎘污染屬中度污染，有三種以上既重金屬。

重金屬同嚴重富營養化，呢堆淮河流域同長江流域既湖泊已經污染到一個極點。咁有無菌有無病毒又 who the F care 呢？(細菌係高濃度重金屬環境中都不能生存 der)

（圖，左上角起順時針方向：(1) 有新移民開小龍蝦店，向中國戰略合作伙伴取貨；(2)戰略合作夥伴：揚州高郵湖生態漁業有限公司／江蘇省高寶邵伯湖漁管辦；(3)美國都有小龍蝦，點解美國既可以食？(4)太湖大閘蟹含二噁英；(5)「橫紋肌肉溶解症」。)

陳詠燊 Sunnyhahaha X 黃天頤 廣播劇《唐七太空站》連載小說版

上回提要：

阿朱及時想起電視台的素人嘉賓「麵包男」阿奶，希望可以說服對方一起上車，買下盛傳收購的唐樓單位，還沒有待「麵包男」弄清發生何事，阿朱已經一手把他推進車內。

「小姐，你……你……要拉我到那𥚃？」

「去實現夢想呀！」

1.3~ 朱：唐七著陸

「麵包男」還未來得及反應，便一頭霧水的被我拖著走。我當然會將我的上車大計告訴他，但關鍵時刻真的沒空再解釋，唯有用「實現夢想」來交代。上車，難不成不是香港人的夢想？至少，在節目裡我和他也表態了想買樓的心願。

我在路旁隨手攔下了一輛的士，把「麵包男」推進去。

「往哪兒？」的士司機和「麵包男」差不多同一時間問。

「麻煩你，五台街。」

關上車門，咱們二人擠在的士內的焗促空間裡。

近距離觀看下，「麵包男」原來有濃濃的眉毛，而兩行眉毛間已看不見空位，因為他正緊皺雙眉，一臉疑惑的看著我。我只好壓低聲線儘快在他跳車前向他解釋我的上車大計。

「不要把眉緊皺到一個點！是這樣的，我有一個做地產的朋友，她收到可靠消息，那就是政府很快就會收購五台街的一幢唐樓。剛好我這個經紀朋友現在手上有一個單位，叫價三百萬。初步估計，到政府以市價收購的時候，少說也可以賺個一、二百萬！是不是很吸引？但，因為我手上的流動資金不足，你剛才在節目上說想儘快上車令我靈機一觸，想到……不如跟你合資！要是你有興趣就快點，『等埋發叔』就遲了！」

「買樓？！」他雙眼瞪得像卡通人物般大。

「嘩，買樓那麼厲害！」的士司機聽到「買樓」兩個字立時把頭側了側，吐出了這句沒有意義的說話。

的士司機真是十分奇怪的生物，你叫他時，他沒有反應；你沒有叫他時，他卻反應奇快。我沒有回應司機，以免節外生枝，然後把聲線再壓低多一點，慎防被偷聽到這個絕世上車大計。

「噓……不用那麼大反應！信我，這次可以說是必賺的。試想一想，如果單靠你打工儲錢，要何時才儲到首期？還有，你剛才在節目上不是說你女朋友常強調『嫁，是給女生一個家』嗎？現在，你只需要拿五六十萬出來，一轉手就可以賺到一百萬，連本帶利再買另一個屬於你倆的單位。一百萬呀！你要打幾多份工，捱幾多麵包才可以儲下來？」

我連珠炮發地向這位潛力拍擋分析為何要以小博大，還動之以情拿來人家的女朋友來說服他。

從「麵包男」的眼神可以看出，他開始動心了，因為他的眉頭開始放鬆。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
的士嗖一聲停在一條內街，下車的位置正好就是五台街的路牌。兩旁的店舖不是沒開門，便是一些五金雜貨、廢紙回收、收賣舊物的古舊店舖。街上的行人稀少，除了那個剛好走出來收拾紙皮進鋪內的大叔外，還有一個百無聊賴的老婆婆正駐足觀看著周圍。老婆婆看見我們下車，拋下了一個疑惑的眼神又走開了。短短的一條橫街充斥著一種不屬於香港的寧靜，有半秒，我的腦內飄來了一個念頭：其實住在這裡也頗舒服。

在手機上再三確認地址後，我們便走進街上唯一一間士多。士多內又是一位白髮斑斑的老伯，老伯似乎知道我們的來意，象徵式地問我們買不買飲品後，就徑自走到凍櫃旁。舊式士多的凍櫃內仍是各種的玻璃裝汽水及紙包飲品，我隨手拿起了一包由小到大都愛喝的朱古力奶，放下了五元硬幣後便報上Mary的名字及來意，果真老伯轉眼手上已經拿著一串鑰匙了。

沿著士多門牌的數目一直倒數，終於找到了手機上Mary傳給我的地址位置。抬頭一看，是一條長長暗暗的樓梯。我隱約聞到唐樓的樓梯間散發著一股獨特的霉味，而這霉味令我頓時憶起小時候跟媽媽去探望一些住在舊樓的長輩。

當我想提步上樓梯的時候，「麵包男」仍然是放空似的站在原地。

「來，快點上去看看！」我像母親鼓勵小孩踏出他學行的第一步。

呼吸著霉舊的空氣，我們踏上了唐樓的梯級。梯級上不少邊緣都是殘缺的，鋪在上面的小磚塊也零碎的散落。四周的顏色都像是蒙上了一層灰調子，牆上的油漆看得出早就掉得七零八落，整個看上去就是一幅用時光畫的山水畫。

我們經過了數次一模一樣的樓梯轉角，爬得汗流浹背。緊隨我後面的阿奶在地下一樓出發的時候還喋喋不休地追問著這幢唐樓的身世，但，沿途下來，就只剩下彼此微喘的呼吸聲，以及越來越慢的腳步聲。

終於，來到了唐七樓。

<續>

#唐七太空站連載