【龔成問答信箱】（Q21721-Q21740）

Q21721：

龔sir,你好
想請教下如何有效咁儲錢

我人工只有17000
分期還緊卡數，
找完數每個月只剩下3000蚊

每個月都清，儲唔到錢
如何可以處理現況，或增值儲錢方法？

沒有任何投資經驗
謝謝

龔成老師：

第一，你要定目標，如果無目標，就無動力去做。不用太誇張，但就要適合自己，例如一年儲$50000，5年儲$50萬等。

第二，減少用信用卡。

第三，習慣每天記低花了多少錢，不是要求你不花錢，而是要知。

第四，分清想要同需要。

第五，如果你本身自控能力較弱，可參加銀行、保險公司，月供基金、月供儲錢、月供股票等計劃。

就算每月只供$2000，長遠都能累少成多的。

你可以睇我的書《80後百萬富翁》，適合你的。

------------------------------------------------

Q21722：

龔成老師，老公最近係書局睇到你既書，買了回來，覺得好大啓發同鼓勵，謝謝你！

我地剛結婚，而家有地方住，但因長遠想有小朋友所以想地方大啲，諗緊買樓，想請教一下你的意見：

老公同佢屋企大概有350萬首期，我自己就大概有80萬資金，我地一年前開始睇樓，但因為疫情反覆加上老公轉工，一直未决定到點買同買咩，而呢段時間樓巿都升了不少；

老公黎緊7月會返新工，我地呢排都睇緊樓；

你覺得我地應該進取啲買9xx萬既樓，定保守啲老公買7xx萬的，我自己則另外搵細價樓（如500萬下）投資？

另外因為老公7月先返新工，你覺得係咪應等到下半年先買？不過近來樓巿交投暢旺，下半年會否要更貴？

抱歉問了很多問題，謝謝你！

龔成老師︰

由於你地現時有地方住，距離你實際需要目標新屋，其實都有一定時間去準備，所以唔需要急。

目標係"9XX萬的自住物業"，定係"7XX萬的自住物業 + 5XX萬收租樓"，我會偏向前者。

我地做決定時，要考慮成個財富組合的配置，如果你係"自住物業 + 收租樓"，你成個組合會偏左係物業類。

當樓市出大問題時，你成個財富組合，會有嚴重影響。這不是價格，或者配搭上考慮，要係講成個財富組合的平衡性。

因此，你應該係置業之餘，都要同時留有一定股票，進行財富增值，成個財富組合才算健康。

由於有一定時間去準備，你可以先用一半資金，去投資優質股作增值。

你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，你可以先用一半資，分注買入上述股票。餘下一半，我地就等機會，當大市出現較大回調，就加大力度掃貨。

此期間，若你發現合適單位，價格又唔錯，而且你們有信心，長線都係「供得起」，就可以考慮動用這筆資金入市。

------------------------------------------------

Q21723：

龔成老師你好：我就尼26歲，女，月入扣除強積金供款約$40000，每月俾父母家用共$10000

月供$2000儲蓄保險，供左1年，仲要供多4年

月供2份住院保險共$3300，供10-15年後可全數本金取回$515000

銀行存款約港幣$60萬，另有價值共$13萬的外滙

有一份現值$115000的派息基金，每月約派息$670

想投資一個$250萬的為於大角咀的新工廠大廈單位，你認為好不好？只係比較擔心樓價會跌。

如果唔好，你認為投資咩最好？月供股票？

你覺得依家適唔適合買樓？

同埋我已經幫父母買哂醫保，將來即使有健康問題都不太擔心醫療費用，我亦暫時未有結婚念頭。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你26歲年紀計，你應該先做好增值部份。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

現有儲蓄保險，你可以保留，但未來唔建議再投資太多這類儲蓄產品，因為會拖低你財富增長力。

13萬的外滙，你可以睇翻有無實際用途，如果無，你可以換回港幣去投資。

至於基金，暫時派息率都可以。但要了解清楚，這個派息率是否保證。同時，你個基金會唔會出現"賺息蝕價"的情況，才決定是否持有。

其實工廈，近年的回報率不高，投資價值只屬中等。投資與否，你應睇翻佢租金回報率，來作決定。

另外，近期興起的在家工作模式，有機會影響到工廈、寫字樓等的潛在需求。影響有大，係一個未知之數，但會多左一個潛在風險。

現時從投資角度出發，整體上投資股市，相對投資樓市，值博率會係較高。

當然，如果你這個工廈，係肯定租金回報率較高，又有升值潛力，其實都可考慮。

否則，我建議你月供和現有資金，去投資優質股，咁會較好。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21724：

龔sir你好，以前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

因為我對理財投資係完全零認識，所以我亦買曬全套的富爸爸窮爸爸，唸住睇曬先再睇你的書，起碼有d底先，再睇投資類畫會好d。

見到你都會有解答讀者的一些問題，就睇下我會唔會咁好彩，你會見到我message~

本人29歲，以前係做會展, event類工作的，都唔知好彩定唔好彩，2年前轉行做了department admin, 一過試用期就疫症，

眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整0

。好多熟d的director 都同我講，有得走就好走，呢個係死位。。 同埋覺得呢份工真係唔適合我，做左2年都係覺得好辛苦，好頹，

甚至1年前因工作而抑鬱而差d自尋短見，d人成日羨慕我份工咁hea唔洗做福利又好，但我真係覺得好辛苦，無成就感，無嘢係我負責的感覺好唔鐘意，

如果我係有家庭或等退休，咁呢份係絕世好工。。。有試過搵工，但依家個market好似無咩地方請人。。 同埋最驚係，再遲d 過慣退休生活，會出唔返去。。

連我男朋友都話我似足佢退休ge阿媽。。因為我日日真係唔洗用腦，唔洗點做嘢，返去坐。。。同埋連自己都覺得，真係蠢左。。。哥下先恐怖。。

以下係本人財務訊息：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，自覺出年已29＋1。。先發現財政狀況實在可怕，但感到唔知點算好。。。。

因為現時財政係負債緊，亦唔敢轉工。。。因為依家有醫療福利，交通津貼，食飯津貼。。 但真係好辛苦，好驚自己會抑鬱落去。。但又唔敢辭職。。

希望參考下龔sir你的意見。謝謝。

龔成老師︰

基本上，我99%留言都會回覆，想盡量珍惜大家互動溝通機會。但由於近排比較多讀者發問，所以最少都要好幾日，先至可以回應到。

睇完你的留意，我覺得你係一個成熟的人，很會為自己長遠作打算。

我相信你對前途，已經係有一個想法。只是礙於現時疫情，再加上現有債務上負擔，令你唔敢去改變現狀。這一點，係完全可以理解。

的確，現時求職市場唔係咁理想，你而一刻去作出改變，風險會唔細。但我地唔係無野可以做，你可以想清楚，自己未來10年、20年的路。

我地唔係要而一刻，立即全面去改變。但我地可以為未來去準備和舖路，等待時機出現，我地就可以更有效率和本錢地，作出行動。

例如，你要學什麼野技能，才可以做到心目中的理想工作。你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

記住，我地係要睇長線，只係對長線發展有利，短期可能人工較低架工作機會，我地都應該要考慮。

至於你財富增值方面，你要先處理好信用咭負債部份，因為佢利息好高，會拖垮你投資回報。

同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。

已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油。

------------------------------------------------

Q21725：

老師你好，近日睇完你新作，同埋睇左好多有關吸引力法則既書。我知道要盡快行動！

我根據自己既專業成立左一個專頁，目的系分享，希望做第一步。唔知老師有冇咩提議呢？

因為專頁會叫你俾錢做宣傳，想問下老師一開始整專頁時有冇咁做呢？

龔成老師︰

其實整專頁，同做生意一樣。

除左你要比人睇到你的專業外，這個專頁對讀者有無創造價值，令讀者可以從中獲益。

另外，你要突出你個專頁獨特之處，跟其他競爭對手，有什麼不同，為什麼要睇你，唔睇其他人。

你從讀者方向去想，怎樣才會造成雙嬴，人流就會自然增多。

我最初無特別比錢做宣傳的，之後就有。

你最初可以透過身邊人去做宣傳，叫佢地幫手，同時初期你可以問翻身邊人意見，睇下點樣先較受歡迎。你要找市場歡迎的，不是自己盲目比資訊出去。

------------------------------------------------

Q21726：

龔sir，一直有留意你嘅文章，有東西想請教。本人37歲，月入10萬左右，扣除各方開支，月儲2萬左右（其中1萬會預留交稅）。現想找方法投資，希望60歲退休每月有3萬蚊息收下。

1. 想過月供股票，但亦有聽過，其實月供股票到最尾係會輸錢/回報十分低。比如說，2015年到2020年，如月2800，其實際回報只低於3％。如果係咁，有乜方法建議呢？

2. 如月供股票可很，想請教有關組合及操作方式。
謝謝

龔成老師：

1）月供股票是一個穩陣的方法，但的確不是最高回報的方法，但我一向會建議初階者先月供，因為初階者根本無法把握買賣時機及企業估值，如果做錯決定，就會有負回報。

因此，我建議你每做月供，每月$1萬，同時學投資知識，到了有一定的投資知識，就不用月供。

至於選股，最初你可以選ETF，如2800、3067，到你有一定的投資知識，就可自行選股。

2）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q21727：

老師你好，首先多謝你，我跟你價值投資法，購入6隻股票，只有一隻9988未賺錢，不過我會strong hold！

今次有幾個問題想問，我覺得電動車係黎緊大趨勢，想問你有無電動車股推介？之前你推介過的2845好似現價略貴？

另外請問吉利汽車現價處於合理區嗎？
謝謝

龔成老師：

現時電動車的佔比仍好少，而這是大方向，因此仍有一定的潛力。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區中上部，股價波動，有貨可長線。如果現價入貨，小注都得。

------------------------------------------------

Q21728：

龔成老師，多謝你回覆，我係依幾個月入左少量股票如下:

3067~600股@18.24
1177~4000股@7.905
0066~500股@43.7
0014~1000股@29.2
2800~545股 (月供)
0027~43股 (月供)

現正打算月供3000蚊0027，3000蚊1810，請問會唔會太散亂？

本人年紀30中，另外打算再投資多10萬蚊落股票，請問點樣配置會比較好？謝謝你無私分享

龔成老師：

唔會亂，你上述持有的，都是有質素的股票，同時隻數不過多，你預一般組合，10隻股票都可以的，反而過份集中一隻股，會出現集中風險。

上述都是有質素的股票，可長線持有。

而你的年齡，可投資潛力股+平穩增長股，如果你有實力，潛力股可較多，若實力不足，潛力股不宜過半

你月供的兩隻股，無問題，可以長期進行，當然，如果想組合更加平衡，就加入ETF，如盈富（2800）、恆生科指ETF（3067）。

至於$10萬，你要留有一定的現金，餘下可考慮盈富（2800）、恆生科指ETF（3067）、港鐵（0066）、中國電車基金（2845）。

------------------------------------------------

Q21729：

龔Sir您好：經過了3個多月的新手學習(不斷睇你的FB和讀你的書)，慢慢有了基本的投資概念，現時手頭上有的股票：

銀河 71.35x27股
比亞迪電子 45.1x43股
領展 68.6x100股
比亞迪 208.6x9股

舜宇光學 181.4x10股
盈富 29.4394x163股
GX中國電車 114x50股
安碩 18.8619x2400股

老師，請問安碩會否過於集中，而其他又太零散呢？有什麼建議可以給我嗎？

龔成老師：

你持有的股票，基本上都是有質素的，但就有幾個問題。

第一，部分股價在貴的價位買入，反映你未有企業價值概念，建議你加強這方面的學習，同時，在未掌握前，多用分注、月供等這類方法，將買入價平均，能有效減少你一次過在高位買入的風險。

第二，潛力股都佔了一定比例，潛力股長遠當然對我地財富有較好回報，但同時要求你的投資實力較高，因此，暫時潛力股比例，不宜過多。

第三，你部分有集中行業風險情況，例如電動車及手機相關，佔了一定的比例，你日後要注意翻。

至於你所講的安碩集中情況，問題不大。而整個組合不算散。

你要同時留有現金，唔好太快去一次過買入太多股票，慢慢立一個長遠平衡的組合。

------------------------------------------------

Q21730：

成哥你好，有個有關失業貸款嘅問題想問你，希望可以得到解答

小弟今年廿中，雖然我而家失業但我之前都儲左筆錢可以應付到一段時間嘅生活，最近政府出左個失業貸款年利率1%好似幾吸引咁，可以分6年還錢，如果我申請到失業貸款再將呢筆錢放落股票市場會唔會係一個明智嘅方法？

如果我拎呢筆錢拎黎買美股voo（因為呢筆錢係借所以揀呢個風險最低嘅黎投資），根據數據一年平均都有1x%嘅增長

變左我可以將呢筆錢去增加我嘅現金流/總資產，而且在預定還款期末或之前還清全部貸款和利息後。

龔成老師：

唔建議。

其實你這樣即是借貸投資，雖然利息低，但始終借貸投資都是有風險的，加上你本身無收入，如果投資不幸出現損失，對你的影響會好大。

美股VOO，近年回報的確不差，但你不能以這數據去推算往後都不錯，現時美股唔平，如果出現較大調整，對你不利。

另外，借貸投資只合高階投資者，因此如果實力未到最強，暫時就不要動用。

同時，借貸投資只會在市況好平，及恐慌期才會動用，而這刻，並不算。

------------------------------------------------

Q21731：

龔Sir之前抽中一手百度50股，但一直跌，点算好

仲有阿里巴巴$271買入300股，都係咁跌，点算好

麻煩龔sir有時間回覆，感謝

龔成老師︰

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

百度在規模和質素上係有，但你預佢中短期會較波動。現貨若佔組合不多，唔需要太過擔心，一直持有就可以。

阿里巴巴(9988)近期面對內地監管可能收緊，風險度增加左，令佢出現波動。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。你買入價係略貴，但唔算好多，現貨可長線持有。

------------------------------------------------

Q21732：

阿sir 你好，參考左你之前嘅意見，最近開始左月供股票，加上上緊股票班中，上你堂好開心，學好多野，整理左自己嘅投資組合：

基本資料27歲，月薪$4萬，現時每月儲蓄2萬（因上股票班時你建議最好儲蓄人工嘅一半，就唯有慳啲）現有15萬現金，及10萬股票，希望3年後100萬，目標買樓。

月供股票$8000:
盈富基金：$3000
領展 ：$2000
阿里巴巴：$2000

之前買左：
盈富基金： $ 24.3 ，1500
海吉亞： $65 ,800
東京健康：$157， 300

希望阿sir 可比少少意見，謝謝！

龔成老師：

現時你方向正確，你27歲，是累積財富的黃金期，所以努力儲蓄，把握機會投資增值，絕對有價值的。

我相信你要3年後完成目標，絕對有可能。

但要留意，由於你打算3年買樓，因此投資時間唔算好長，你最好不要100%投資潛力類企業（因為這些公司增長需時）。

另外，到你接近買樓的6-12個月，就要開始賣股票，為資金作出準備，因此，你其實投資的年期唔算長。

現時你持有的，其實都是有質素的股票，海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到300億。初步睇佢股價在一個十分高水平，所以風險不少。如果投資，小注好了。

其實現時組合無乜問題，最重要是你之後的配置，要考慮翻我上述所講，因為買樓的因素，而不要太過進取。

------------------------------------------------

Q21733：

您好，本人年41歲，月入25000元 + 兼職 12000元至 13500元 （未扣除MPF）。月供股票：港燈2000元．盈富基金6000元、港鐵2000元及恆基 4000元，由去年12月開始月供，加上其他股票，合共超過170000元。

另外持有現金480000元，每月可儲蓄超過一半。內地有物業，正等待通關後出售後可得到大約100萬港元。

由於本人和丈夫在香港沒有物業，居所是奶奶提供，其實沒有迫切自住需要，究竟我拿著資金，應該置業放租 / 投資？ 還是繼續投資股票 / 收息股票?

丈夫他53歲，也有100多萬現金，他最近改變主意，覺得沒有下一代，買房子日後無人繼承，不如手持現金? 但我又不認同，覺得是投資工具嘛，或是購買車位也可以考慮。

龔成老師：

其實你最重要的，就是財富的配置，物業、股票、銀行產品、現金等，都是配置的其中一部分。

由於你地無自住需要，因此，物業對你地來說，是一個投資工具，雖然可作為財富配置的其中一部分，不過，如果以現時香港樓的投資值博率計，只是一般。

不是無投資價值，但如果從長遠的增長力來說，投資股票會較好。

因此，這刻可以先投資股票，令財富增值，但不代表不能投資物業，若然樓市出現下跌，有一定的投資吸引力，都可以考慮。

另外，我地進行財富配置，—平衡都是一個因素，因此你若果股票比例較多，而你有較多資金想投資物業，這方向其實都可以，但就不一定好急去進行。

------------------------------------------------

Q21734：

你好呀，龔成老師，我想買隻高息股，考慮緊中石化、中海油、農業銀行、中國電力，請問可以比啲意見我邊隻比較前景/增長力，現價入唔入得過？

謝謝

龔成老師：

其實上述的，都是可考慮的收息股，我會建議你建立一個組合，唔好單考慮一隻。

中國電力（2380）、中石化（0386）、農行（1288）都可以的。現價合理的。

另外，你可以可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21735：

你好,龔成老師
本人今年28歲，上個月剛開始月供股票
$2000 恆基
$2000 盈富
$2000 騰訊

另外，有基金$50000
上年ibond 3手
儲蓄保險供左$100000
住院保供左$100000
儲蓄約有$500000
月入$50000

今個月開始見到股價回落，尤其騰訊，之前見股價跌，我又諗緊入唔入，但我其實本身已經月供緊

我應該加入咩股票月供好，但諗過港燈收息都好
唔該老師

龔成老師：

你現時持有太多防守性工具，以28歲來說，未必好適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

在理財上，當然要攻守兼備，但守的部分，其實不用太多，你ibond、現金都太多，而保險如果有需要，則無問題。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂，小注或月供可以。你唔好買入得太急，保持月供就得，除非有更大回落，先考慮一手手去加注。

至於港燈（2638），並不是對你最理想的投資。

由於你投資知識不算高，建議你加大月供至$20000一個月，但暫時就不用一手手去買入股票。

除了上述原有的股票，可加大金額去供外，你同時可以加入優質的平穩增長股，及潛力股，去長期月供。

------------------------------------------------

Q21736：

老師，我又有野想請教你了
本身12.9 入左一手00270
想問依隻是否適合月供？

我見佢現在價位長期處於11個幾，我地揀月供係咪要揀依d無咁大上大落既股票？

但我有追開你fb ,我諗住月供1211 ，每月2000蚊，但見佢股價又上返150蚊 ，想問而家開唔開始月供好？

我現在32歲，有一個小朋友，穩定工作
以下是我的投資組合

00978 20000股
00005 2400股
00012 3000股
01816 30000股

00548 6000股
01038 1000股
00939 7000股
00435 10000股

00386 10000股
02689 2000股
00006 500股
00270 2000股
00175 1000股
00778 2000股

我想加d潛力股，所以已set好下個月開始月供1211，每月2000蚊，想問埋現在可否月供阿里1000蚊？ 唔該晒老師

龔成老師：

月供股票，最重要是供一些「優質股」，不用刻意供一些無大上大落的，粵海（0270）、比亞迪（1211）你都可以供，至於供那一隻，就要睇翻你自己的風險承受能力，以及投資配置。

記住，月供是長期的，是一個持續儲貨的狀態，因此不用理短期股價。

比亞迪只要你月供金額不過多，都可以供的。至於阿里（9988），都可月供的。

至於你現時持有的股票，大部分都是有質素的，但增長力的確不強。你可以加入一些潛力股，最簡單是分注投資：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於現時持有，增長力較低的股，如一些收息類股，其實可以減部分。

------------------------------------------------

Q21737：

你好龔sir，我同太太現時30歲，共月入$6萬，餘下儲蓄都用作月供股票。已購入一自住物業，按揭還款尚欠$693萬，每月大約還$24500。持有現金$110萬，另持有大約$30萬股票，詳細持貨如下:

心通醫療 2000股x$15.26
金沙中國 800股x$32.8
完美醫療 8000股x$2.86
阿里巴巴100股x$216.8
水發興業能源 6000股x$3.44

萬國數據200股x$81.8
福壽園2000股x$7.43
富力地產1200股x$9.6
同仁堂2000股x$5.46
比亞迪111股x$80
平安好醫生100股x$87.5

另外月供緊以下股票每隻$3000，現時持有:

銀河447股x$60
領展403股x$66.2
中生3347股x$7.38
盈富997股x$27

我有以下問題想請教:

1. 負債比率是否過高？應唔應該加快還款？

2. 下個目標係想買第二個物業收租，但如何係高負債下做到？

3. 股票組合是否太分散？有冇咩要執？

4. 110萬現金現時存放在mortgage link，應如何使用？

5. 如果想10年內財務自由有可能嗎？現時有咩可以做？

唔好意思問題比較多，多謝你耐心解答

龔成老師：

1）要睇你物業價值。

除非你較高位買物業，否則，以你現時的整個財務情況計，應該問題不大，你30歲，可承受風險，同時現時低息環境，你還錢不一定有利。

2）如果太急買第二個物業，就會令你過度集中在物業比例，以及令你負債太高。所以，暫時建議你以股票等資產去累積財富，到你有一定的股票比例，到時再將部分轉去物業，就較平衡。

如果要做高負債，其實唔建議，如果真的要做，就要同另一人名買樓及有足夠的收入做按揭。

3）勉強可以，建議你唔好太心急買一些上市不久的股票，除非有較大的獨特性及優質度。

現時月供的，可保持進行。

4）可以將其中$30萬-$50萬，投資優質股，善用現金，以你的年齡，其實可投資一定的潛力股比例。

5）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以加入一些潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q21738：

龔Sir你好，本人38歲，已婚，有兩個小朋友，一個4歲，一個快1歲。 每月家庭收入8萬幾，開支大約4~5萬，現金200萬，定期 50萬，另持有以下股票：

2800 x 2500股 ($25)
1299 x 200股 ($79.5)
2638 x 6000股 ($7.9)
3918 x 4000股 ($8)
3067 x 300股 ($15.92)

近半年睇你facebook 後開始知道投資的重要性，過往都係持有現金/做定期。

希望55歲退休，到時每月能夠有4~5萬生活費。請問以我而家既狀況有機會/ 點先可以達到？係咪需要放多d 資金去投資？如果係，請問咩投資組合適合？

開始明白投資心態的重要性，有基本會計知識，不過投資上就係初哥，請問邊本書適合睇？

而家習慣每日起身睇你專頁，漸漸被您既正能量感染，感謝您！

龔Sir, 另外，仲想幫兩個小朋友做投資，請問係咪應該月供2800?

謝謝您


龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲去計，應先努力做好增值部份。定期這類定息產品，不適合你年紀。

另外，持股中的港燈(2638)是收息股，增長力好弱﹐都不宜持有太多。

未來投資，你可以集中在「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。到你有一定投資經驗﹐潛力股比重才慢慢調升至約3-5成。

現時大市只是合理區，你現有250萬資金可以先投入約50-80萬，用"分注"形式，慢慢買貨。餘下資金和每月所儲倒的資金，就等大市出現較大調整，才慢慢大力度掃貨，然後長線投資。

如果你希望55歲退休後，每月有5萬蚊現金流，以股息率6%計，你需要本金1,000萬。

我假設投資回報有10%（連股息再投資），你每月投資$30000 + 250萬本金，14年後大約會增值至1900萬，故相信以上安排，很大機會達至你的財務目標。

書本上，我建議你先我寫架"80後百萬富翁"、"財務自由行"和"股票勝經"，會適合初學者。

而小朋友增值部份，由於佢地還很年幼，可增值時間較長，故計劃上會相對簡單。

你可以幫佢地儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上2隻股票都係可以，但你明白當中風險。

------------------------------------------------

Q21739：

男神，我去咗國外先留意到你既專頁，想報你啲班都無機會住，書又買唔到，而家只可以叫朋友買完寄比我

我想問吓，我有一百萬現金，應該點分配可以做到目標五年翻五倍？

仲有想問吓你對中國鐵塔同埋中國移動有咩睇法？ 好似見你比較少提呢兩隻

我中國鐵塔$2入咗， 去到2.2無放就擺到而家

請指教指教

龔成老師︰

我地做財富增值，一般希望做到架合理回報，係每年增長10-15%。你現時這個目標五年翻五倍，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。雖然你買入價偏貴，但此股有質素，你可以守。這股長遠仍算有發展力，不過，潛力度比過往略減，要回到你買入價，相信要點耐性。

中移動（0941）都質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，較適合年長或好守的投資者。這股有長線投資價值﹐現價合理，可以分注。。

------------------------------------------------

Q21740：

你好, 龔 sir, 我係你既學生, 想問下關於睇年報既問題, 岩岩睇2800(盈富基金)既年報, 有小小問題想問:

1. 點樣分析盈富基金? (我見佢唔會有市盈率/ 市賬率呢類資訊)

2. 呢類基金係用咩方式黎做估值

3. 見佢全年係虧損, 咁會唔會影響對佢既估值?

4. 係年報 P.19 (投資淨(虧損)/收益呢部份, (未變現投資收益之變動) - 意思係咪即係手持而未賣出之股票既市價減去購入價之賬面上既利潤?

5. 另外, 龔 sir, 我岩岩嘗試做 303(VTECH) 既分析, 但我搵唔到相關行業既競爭對手做比較, 咁我係咪只可以用返佢過往數據黎做分析?

感激回答!!

龔成老師︰

1) 盈富基金(2800)就係追蹤恆指，所以你用大市水平，去評估佢平貴就可以。

以往市盈率大約10倍開始平，但由於近期成份股加入不少新經濟股，故要上調少少，大約13.5倍開始算平。

2) ETF你可以用返佢追蹤的指數，去參考平貴。好似盈富基金(2800)，你就要睇恆指水平。

當你分析時，你不應集中分析盈富的報表，而是分析恆生指數，了解恆指平貴，又或以盈富頭10大持股，去計算這些企業的估值，從而計算翻恆指平貴（當然，這只是一個參考方法。

3) 佢係一籃子的企業，分析時唔可以好似一般企業咁，睇個損益表。這類ETF，你直接用佢相對指數，去做估值就可以。

盈富報表所顯示的，只是一些會計上報表問題，你不用分析。

4) 你可以簡單理解為，佢組合中持有或已賣出的股票價值變動。但我地分析盈富基金(2800)價值時，這個不是重點。

5) 如果無直接競爭對手，可以作比對。我地就用佢過去數據來分析，但你都要留意，大環境有無改變。如果無大變，過去數據才有參考價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20621-Q20640）

Q20621：

老師你好，我係你舊生，為了加强分析能力，我分析了一間公司：太興

雖然只上市兩年 但公司適逢
2019 社會事件
2020 新冠肺炎
雖然令營業大幅倒退 但2021.3.1 發盈喜預計淨利潤增長40-55%

所以對此公司管理層有信心 只要限聚令放寬 回復自由行 相信未來2年有不錯增長，我考慮左兩個情況的年份推算，得出了不同的答案

請老師再比意見 睇下今次會否太進取
（過往市盈率我同左你上堂講的方法，以過往多年作推算）

based on 2021/3/1 news said that TH Net profit growth rate from 40-55%
assume growth rate 50%

2020e EPS will be ：087*1.50
2021eEPS will be：0.195，0.163*1.5

industry PE：17-21
TH PE ：14-20

price range：（1.82-2.6）0.13*14-0.13*20
price range：（2.73-3.9）0.195*14-0.195*20

龔成老師：

太興集團（6811），是一間源自香港的多元品牌休閒餐飲餐廳集團。

除旗艦品牌「太興」外，集團透過自創、收購及授權成功壯大品牌組合，當中包括「茶木」、「靠得住」、「敏華冰廳」、「錦麗」、「東京築地食堂」、「漁牧」、「飯規」及「夫妻沸片」。

佢的餐廳網絡有過百間餐廳，香港、中國內地、澳門及台灣都有。

此外，集團於香港火炭營運一間食品廠房，亦於中國內地東莞營運一間食品廠房。

整體質素，算是不差，品牌價值相有，業務增長力中等，但賺錢能力不算強，成本轉嫁能力有不足的地方。現價算是合理價，中短期較弱，長遠會好翻D，都可考慮投資，但又未值得去到好大注。

至於你的估值方面，你計的方法方向雖然正確，你用了兩年的數據去進行參考，但要留意，由於這企業上市年期不算長，加上上市後面對了較多特殊情況，所以參考價值會減左。

因此，我地會集中翻佢過往，正常經營環境情況下的生意與盈利，這些財務數據會更有參考價值。

如果我睇翻佢過往正常環境下的盈利，2016-2018，盈利大約為$1億、$1億、$3億，由於企業在2019年上年，因為，有可能因為上市要「整靚盤數」，所以令到2018年的盈利增長較多，所以我地會保守少少，參考2016、2017年的數據較多，2018年參考價值會少左。

因此，可以推算一個有代表性的盈利，大約為$1.5億（當然這不是好準，但可以作為參考基礎），即是每股盈利為$0.15。

至於所用的市盈率，可以用翻14-20倍，因為我地在估值時，會偏向保守D，就可以計出佢的估值為$2.1-$3.0。

如果再考慮一些中短期疫情及經濟等不利因素，就會將這個估值再調低少少。

你在估值時，假設佢盈利增長50%，由於這幾年較特殊，這個假設唔算有實在的基礎，所以我地應該考慮翻一些長期同核心的因素。

其實這企業不差的，你見佢的品牌都有一定的價值，同時佢有創造品牌的能力，這的確能加分。但同時，香港人的特性是貪新鮮，有時品牌可以一下子唔受歡迎，這都是風險因素之一，所以，這企業整體上是有質素，但股價上落都會較大，這點都要留意。

------------------------------------------------

Q20622：

您好，龔先生，follow了由您的專頁有一段日子，我有點理財問題想請教您。

本人36歲，一家之主，有兩個BB, 家庭固定開支包括租金、保姆費用、保險、BB平均每月開支及日常洗費約72000港幣，做小生意月入約25-35萬港幣，後面會租舖做生意月租$24000。

所有積蓄壓在貨物算是有200多萬資產。2018年初基本沒有積蓄，現時積蓄（貨物）都靠這三年存款所得。

生兩個bb時用左好多錢，而且2020-2021年這一年才平均月入有20萬以上，之前兩年大約收入230萬左右，收入是愈來愈豐厚所以才打算開門店。

由於做生意必須囤貨，我基本上都是以囤貨當儲蓄。

我希望幫助分析一下我可以每月有什麼理財方法能增加我另一個投資方法楚來分散風險，穩步上揚。

望得到您的關注和回覆，謝謝。

龔成老師︰

首先，你做生意一定有不確定性，所以點都要保守一的現金，計好數，餘下的才可以進行平衡配置。

因此，你現時每月都能儲蓄，我會建議你先留一定的現金，作生意備用，餘下先「投資」。

同時，如果你生意發展得不差，在理論上，將資金投資到自己生意得到的回報，其實會比你投資其他工具更好。

當然，我地都要考慮平衡風險，將所有財富集中在一盤生意，是有風險的，所以如果財富許可，就建議你投資其他類別。特別是一些流動性較強的項目，如股票。

除了你現時生意外，你可以透過每月閒置資金，去投資一些優質股，來進行財富增值。同時間，你財富增值，都唔會完全偏重晒係生意，從而令你風險降低。

我地係投資前，必需先做好防守部份，特別係你類做生意人士。因為現金流，對經營一盤生意係好重要。

我建議你在投資前，先儲起一筆等同半年基本生活開支的應急錢。另外，也儲起一筆生意上的營運資金，以備不時之需。

以下我以「閒錢」的角度去幫你做配置。

你可以用你每月餘下的現金流，以「月供股票」模式，去為財富進行增值。

策略上，你可以投資「平穏增長股」和「潛力股」。你先用每月5成儲蓄做月供，其餘5成就儲起，用一邊月供一邊儲蓄的策略。

由於你係做生意，每月收入可能有波動。你可以用一整年架平均月入，去計算月供金額，咁就可以。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20623：

你好，龔成老師，呢排開始有留意你fb，亦好認同你對股票既睇法及教導，令我扚起心肝想重新重組過我既股票。

請教一下，請問應該持有還是止蝕。
005，3200股，53.45入
1711，20000股，1.5入
1716，6000股，7.6入
1810，1400股，30.95入
2328，8000股，6.39入
3309，2000股，13.98入
9988，100股，250.4入
感謝解答

龔成老師：

以質素來說，並不是差，但要改善。

匯豐（0005）你預只是收息，增長力不強，持有多少比例，要睇翻你自己的年齡與投資目標。

歐化（1711）質素一般般，有較大反彈宜減。

毛記葵涌（1716）質素一般般，有較大反彈宜減。

希瑪眼科（3309）過往一直貴，股價要大升不易，最好上翻D減持少少先。

至於另外幾隻股，都有質素，無問題。

你日後可以加入一些ETF，如盈富（2800），如果能承受風險，想有潛力就加恆生科指ETF（3067）。

------------------------------------------------

Q20624：

老師你好，本人36歲，月入3萬，早年替親人還債無咩錢儲到。係近年終於還清，慢慢儲番少少錢。現時手上現金只有10萬，股票5萬。扣除租金，家用每個月儲到約1萬5千。

0005 1手 （62買入）
01398 3手 （4.5買入）
03988 8手 （3 買入）

我唔係好有興趣投資，但真係擔心退休生活。想請老師比D建議我手上嘅錢同每月萬五蚊可以點儲點增值，唔該老師。

龔成老師：

現時的現金$10萬，你可以動用其中的$5萬，去投資，但不要一次過用，要分注慢慢用。

另外，你現時過份集中在銀行股，已出現了行業集中風險，最好等股價上翻D減持，部分轉其他。

你36歲，其實唔需要太保守。而你現時集中在收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以自行分注，或做月供股票，每月$10000。

你可以考慮盈富（2800）$4000。

另外再加2隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可供3067。$2000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

雖然你對理財興趣不大，但在長遠，會對你財富有巨大影響，因此，一定要學習當中知識。

------------------------------------------------

Q20625：

龔成老師請問現在適合樓換樓嗎？

詳情如下，本人29歲，現職護士，月入4萬2，長線有700股阿里巴巴（9988）228蚊，1500股長和（0001）55蚊，4000股置富（0778）7.45蚊，另有20萬蚊環球基金。

先生30歲，現職專業人士，月入5萬8，長線3000股長和（0001）50蚊，1000股長實（1113）43蚊，500股領展（0823）73蚊，另有40萬分別在美股及基金。

二人合資，先生單名於2017年買入天水圍嘉湖550呎單位，買入價485萬，現值約600萬，欠銀行約360萬，另mortgage link 戶口有50萬存款。

有計劃下年生小朋友，現在適合賣樓及套現部分資產用作購入1000萬以下，8成按揭的單位嗎？謝謝你

龔成老師：

如果換樓，一般都不用太分析樓市，反而分析自身的情況，是核心。

將現時物業賣出，能套現$240萬，連同股票、基金、現金，大約$350萬-$400萬。

首期方面無問題。

假設借$800萬按揭，30年，2%，月供約$3萬，你地都可以負擔的。

相信，你地都可以考慮$1000萬以下的物業，如果有實質需要，都可以進行換樓這動作。

------------------------------------------------

Q20626：

老師, 剛睇到你既文章話不要停留舒適圈, 有個唔係關係股票既問題都想請教下,

我而家做緊一份非常舒適既工差不多4年,人工不高得19K, 但勝在十分穩定, 基本福利齊全, 而且公司同自己屋企同區, 車錢時間都可以慳唔少, 但問題是人工既上升空間好有限, 去年什至因疫情要凍薪及無bonus無雙糧乜都無

而家有另一個option, 係朋友介紹一份corporate sales, 底薪比現職工作少幾千只有15-18K, AL18日變7日, 地點遠好多

另只有少量基本福利, 但公司氣氛好, 好願意教我呢D無經驗既新人, 收入方面計commision既話捱完頭一年之後上升幅度好大機會比現在高, 可以第2年開始也有20K以上,而且朋友都係入面做, 有信心是穩陣的公司

我而家好煩惱, 應不應該放棄而家穩定的現況去接觸未知又不穩的領域, 因為都想學習和見識更多, 還是應該再等一等, 發拙/等待第3可能性?

我背景係今年29歲, 無家庭經濟負擔, 但只有10萬剛投資在股票基金, 另有10萬現金, 剛開始月供$2K盈富3個月, 可能2年後會結婚需要現金支持 謝謝老師!

龔成老師：

你最重是從長遠的角度去想。

你要想想，5年後，10年後，留在現時公司怎樣？如果你跳出來又會怎樣？

你要問自己，長遠想自己變成點，想自己做甚麼？過怎樣的生活？

你現時29歲，有選擇權，到你過10年、20年，你再變的空間就會少，這刻要好好想清楚。

你有兩個選擇，第一，留在現時公司但要同時發展副業，不能永遠停在原地。

第二，跳出去。

有時跳出去，當訓未必最好，但有可能成為之後更好的踏腳石。

加油！

------------------------------------------------

Q20627：

老師 想問宜家個市要點樣部署？

科技股最近跌 係調整 定係熊？？ 我有9988 9618 1810係手 應該清倉先嗎？

另外大部分係月供緊收息股 66， 2800，388，823， 1299 ，我會繼續月供 不過會就住個市去改供款數目

仲有兩手2號仔 諗住收完末期息就賣哂佢
請問咁做岩嗎？

龔成老師：

第一，唔好因為股價下跌而影響配置。

第二，唔好太著重分析之後的股價走勢。

第三，你最重要持有優質企業，長線投資。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述持有的，都是有質素的股票，基本上無乜野要改。除非你持有新經濟股的比例好多，就減少少。

你月供的，保持月供，金額都不用太大改變。

至於中電（0002）是收息股，如果這股在你組合收息類比例適合，其實不用改變。

------------------------------------------------

Q20628：

龔sir你好:我從你的著作中，拜讀到水桶投資法一說。坦白說，起初不甚了了。但就像一顆種子一樣，埋藏心中。沒想到真的有生根發芽的一日。

某一天，靈機一動，心領神會，領略到水桶投資的精髓所在。

我靠這個觀念，以$12.44的2013, 升至$18.12放出一半，用盈餘再買入700及9988, 建立一個組合，打算長期持有。

現在這個組合，不但優質，而且全部低位入貨，前景無限。原來這就是正確的投資方法，比頻繁炒出炒入的太多。

讀書真的是最好的投資。你不知道那年那日，對人生產生決定性的作用。

龔成老師：

對，我地從來不是炒賣，是一個配置，資金的運用，平衡，以及平貴的分析。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20629：

老師 我三十萬成本 輸淨50000
買什麼都輸 可否介紹一隻股票比我 我就黎跳樓
不過收息安全股

我要搏反黎 再輸我要死啦 老師 救一救我
而家啲錢入晒3311
點算

啲錢仲要係屋企人嫁
我真係冇晒辦法 所以先求你救救我
感激不盡 老師

龔成老師：

財不入急門，你「要搏反黎」的心態是錯的。

你集中一隻股是錯的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

中國建築國際（3311）由中國海外發展（0688）以介紹形式分拆上市，業務主要分為樓宇建築及土木工程。

佢參與所取得建築工程項目的日常管理及實施。一般透過競投過程取得項目工程。將部分建築工程外判予分包商，並於建築工程進行時負責客戶或他們的顧問、分包商及供應商之間的協調工作。

過往生意與盈利都穩定，但增長力就不強，現價合理，不過唔好對股價有太大期望。目標是收息。

建議你將部分賣出，轉其他。

最簡單是轉盈富（2800）、港鐵（0066），小注恆生科指ETF（3067）。你要睇長遠，唔好太在意短期賺蝕數。

------------------------------------------------

Q20630：

你好，老師，本人31歲，剛剛學習投資，過往無乜儲蓄，因為家庭負擔較重。現在情況較為理想，手上可動資金雖然不多，但仍想由月供股票開始學習投資增值財富。

每月想大約投資$1500-$2000，先集中一至兩隻潛力，第一隻比較平穏增長，屬意盈富（2800）、金沙（1928）或粵海（0270）

第2隻比較增長力強，屬意中生製藥（1177）或中海油（0883）。請問以上組合較適合嗎? 或者可有其他建議? 謝謝!

龔成老師：

第一隻，盈富（2800）。因為盈富這是一個「平衡組合的工具」，當中有52隻成份股，對股票組合有平衡作用。

盈富當然不是高增長的項目，但就能平穩增長。

第二隻，你可考慮中生（1177）或安碩恒生科技（3067），有長線投資價值。

3067這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20631：

Hello成哥，我啱啱開始睇你專頁，對月供股票好有興趣，想請教一下，如果我一個月可供5-7000，港交所係咪一個好選擇？

另外中國銀行會唔會都合適？
謝謝你

龔成老師：

港交所（0388）可以，我地進行月供，一定要選優質股，這股適合，因為原理就是長期儲貨。

不過，你最好建立一個平衡的組合，唔好只集中在一隻股。

中行（3988）是收息股，你預佢增長力不強，投資與否，就要睇翻你的投資目標。

如果不懂選股，最簡單是加入ETF，如盈富（2800）。

------------------------------------------------

Q20632：

龔sir, ,本人47歲, 單身, 月入90K, 每月可儲35K-40K, 有一自置物業 約10M,剩1.8M要供約55歲供完, 想供完後55歲考慮退休

1. 手上股票如下:

HSBC : 9000股, 平均買入48
1398: 400股, 平均買入4.855
2800: 9500股, 平均買入26.9
9988: 1000股, 平均買入248
0941: 10000股 , 買入55.6
1928: 1250 股, 平均買入38
0388: 1000 股, 平均買入497
1024: 100股, @116
0066:1000股, @28
2388: 1000股票@8.5

2.現金: 160萬

3.人民幣定期:40萬

4.基金產品:80萬(己停供, 但要待55歲才可取回)

5. 自願供款退休金扣稅計劃: 供5年,每年供約5萬,已供1年

6. 保險公司儲蓄產品: 供5年,已供4年, 每年6萬

以上安排理想嗎? 有什麼可善地方? 0941是否持太多, 或增持那一個比較好

本人希望退休時每月有2萬收入. 謝謝

龔成老師：

整個財富組合，基本上都平衡的，問題不大。

如果要優化，可以加強少少增長力。

你47歲，可以投資一些平穩增長類的項目。你可以加強翻這類（但就唔需要太進取）。

現時你已有物業，最好的方法是加強翻股票部分。現時股票，你持有較多銀行股，想信已經足夠，之後唔好再加太多。中移動（0941）亦較多。

原有股票，基本上都有質素的，可持有。只要往後可投資「平穩增長類股」，到你近退休時，可以慢慢轉為收息股。

現時的$160萬，可以動用$50萬-$80萬，投資平穩增長股類別。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20633：

Halo，龔sir
我大概有8萬現金

想係三年內有明顯增長
現時有小米600股，莎莎4000股，中海油2000股，剩餘既
我應該去月供盈富嗎？謝謝

龔成老師：

如果你想在3年內有明顯增長，例如1倍或更高的回報，你就要集中投資潛力股。不過，這同時會令你面對更高的風險，你自己衡量是否用這策略。

莎莎（0178）、中海油（0883）、盈富（2800）都只是平穩增長股，你如果想高增長，就宜轉其他，當然，風險會提高。

這幾隻都是有質素的，月供盈富都是正確的。問題是你要思考自己的投資策略，想穩中求勝，還是高增長，以這去進行配置。

至於小米（1810），潛力股，你可持有。

如果想投資潛力股，可考慮：舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q20634：

老師，岩岩睇左你其中三本著作，改變左我對投資嘅心態

而家我想開始投資，有諗住係主力美股
但有人話最近美股跌，唔應該入市

但我打算係每月分注咁入市，唔知有冇影響？

龔成老師：

第一，你要選優質股。

第二，唔好太著重中短期股價，最重要是睇翻企業價值。企業長遠的質素、平貴。

所以你要首先鎖定優質股，之後睇下現時平與貴，去衡量投資策略（而不是股價將會升跌）。如果現價唔平，投資就要小心控制注碼，或等下先。

如果不懂企業估值，就可以用月供或小注分注去慢慢收貨。

------------------------------------------------

Q20635：

你好龔Sir, 現時持有以下股票，請問是否繼續持有。

1928： 38.1 x 400
6060: 70.5 x 200
9618: 415 x 100

另外
9618咩價位合理可以入？

龔成老師：

持有，這些都是有質素的股票，唔好因為短期股價上落而影響左長期的策略。

金沙（1928）無問題。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

佢做這類互聯網保險公司，的確有潛力，同時背後有支持，所以有發展，這部分產生了「概念價值」。

初步睇，企業有發展力的，不過風險同時存在，因此唔建議太大注投資，所以，唔好心急加注。

至於京東集團（9618）正面的。可持有，如果要加注，現價小小都得，未貴，或回翻1成更有投資值博率。

------------------------------------------------

Q20636：

如果現倉：
823:$59（2手）
1810:$28（4手）
1516:$27（1手）
1316:$13.76（1手）
1024:$385（1手）
9992:$91（2手）
1117: $2.95（1手）
1833: $134（1手）

以上有冇問題？可以守？價值面冇變？
謝謝
因大部分都洩緊
不用止洩吧？
有建議嗎？
700現價可入？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你現時的持股，都有質素的，根本無問題。

整體上，組合可以持有，部分股雖然你在貴的價位入，但這股有得守的。我完全見唔到這些股的基本面有變。

但你太過集中新經濟股及近期熱炒股，這是最大的風險，你應該建立更平衡的組合，例如加入盈富（2800）、港鐵（0066）等。

另外，你唔少股的買入都在貴，反映你投資時機不懂掌握，在較多好消息時（股價一定貴）追入。建議你日後多用分注或月供模式進行投資。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂至略貴，不過月供可以。或小小注。

------------------------------------------------

Q20637：

龔sir，想問下點睇1475 同3800 ？
1475 6.77 買入
3800 3.56買入
需止蝕嗎？

龔成老師：

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，你可守。這股可長線的。

保利協鑫能源（3800）有增長力，但業務不穩，質素中等。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果持貨較多，宜減。如不多就持有住先。

------------------------------------------------

Q20638：

龔Sir，我係最近先開始學玩股票，但人已中年（30），工作多年但月月清無乜積蓄，而家手上得幾萬蚊想發奮圖強，但睇你啲野真係學到好多，謝謝你

其實我係澳門人，我了解過澳門可以做月供的銀行不多，中國銀行已經係最多股票可供選擇的一間，但佢都係無3067，所以我揀左823，1810做月供，但耐何我收入不多又有個人固定支出

所以我每月只能用3-4千元做月供，因為另外仲想草資金留住散買其他股，我每月供款咁少其實會唔會無乜作為？我揀呢個月供組合可唔可以？我也有想過將823換做1177的，期待你的建議，thank you

龔成老師：

30歲仍是一個黃金時間，盡你能力儲蓄、投資、增加知識。要努力追翻。

小米（1810）、領展（0823）可月供的，你長期進行就得。而3067如果無得供，你可自己，久不久買入1、2手，都做到慢慢儲貨的效果。

中生（1177）是潛力股，如果你加入，會令你的組合好集中在潛力股。因此，暫時建議供領展，遲D先變。

------------------------------------------------

Q20639：

hi sir
點睇而家股市+樓市? Thanks!

龔成老師：

新經濟股略貴，但長遠仍正面，不過預期會好波動。華舊經濟股，則慢慢好轉，長期正面的。

至於香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

------------------------------------------------

Q20640：

龔sir 本人現有農夫山泉 $64入，思摩爾$86入 同京東集团$415入，全部蝕價中，三隻股是不是可繼續等待定換碼？請分析

龔成老師：

上述的3隻股，都有質素的，但之前貴，股價波動，就算最近跌左，股價仍略貴，要有心理準備仍波動。

這些股都可長線，都可以守，因為質素都不差，但股價上落大，唔建議持有太過多，如果你貨不多，可守住先，如果貨多，太集中在這3股，同時無現金，就建議減少少平衡翻個組合。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18821-Q18840）

Q18821：

你好龔Sir, 真係要讚下你。我而家睇緊年報勝經，開始去到財務報表嘅時候，真係有啲擔心會睇唔明。因為我係數學白痴，見到一堆數字就頭暈

但係你喺書中用不同嘅例子舉例說明，簡單易明，令我好有興趣一路睇落去，你真係一個好好嘅老師，勁啊

龔成老師：

我盡力用簡單方法等大家明白，其實這都是我的強項，我就算在股票班，都盡量用最簡單的說話去講比大家聽。

因為財務報表、投資，其實是一些較沉悶，同深的知識，一般人一聽就怕，所以我的作用，就是盡量用大家能夠明白的語言比表述。

書雖然較為入門，但內裡的知識其實唔簡單，你要慢慢消化，而我就盡量用圖、例子，這些較易明的方法，去教大家。

------------------------------------------------

Q18822：

你好呀，最近先認識你，見到40 歲100 萬呢個post ,
想請教，我係無橫財命的，多次證實，所以一直無作任何投資，2800 真的穩陣？

如果想投資物業，只係目標幾十萬首期，買到的應該租出定放租，現時都只是租住

龔成老師：

你可以用以下方法，唔需要靠運，靠自己，一步步累積財富。

首先，我地投資不是炒賣，是配置，買入優質股、優質資產，長線投資。

如果你資金多，可以進行「股樓並行」的配置，同時持有兩類資產。

如果你現時的資金都可買到樓，就了解下樓市，買樓收租是可以的，香港樓長期仍向上，不過中短期可能較弱。

如果資金不多，可以集中累積股票先，你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800），又或自行分注投資。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q18823：

老師 想問下 點樣先知道個股價合唔合理呀？有時睇d股價 都唔知從何入手

同埋想聽你建議去做月供股票 盈富基金個價而家做月供合理嗎？

我嘗試左第一次投資股票 雖然未放得出 不過已經係蝕緊錢 有d失望覺得自己好咋

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

另外，你買入股票後，出現短期賬面虧損，其實唔需要擔心，因為中短期股價上上落落，好正常，這個與實力無關，你要學習的，就是「平常心面對」。

我會建議你長期供盈富（2800），現價合理，你以持續儲貨的模式進行，就得。

------------------------------------------------

Q18824：

老師，你好，本人股票輸多贏少，近期有留意老師專頁，亦有買老師書學習。

我今年29歲，月入3萬5，即將供樓用18000。我想將10000開始月供股票，並長揸唔放。

能否對以下組合給予意見？

港鐵 （0066） $4000
恒基 （0012）$3000
盈富 （2800）$3000
謝謝

龔成老師：

由於你要供樓，在負擔上增加左，因此要先留有一定的現金，餘下的才投資，這會比例較陣。

上述所選的月供，都是有質素的股票，可進行，如果想優化，最好加大盈富（2800）的金額，減少另外兩隻的金額。月供保持長期進行就得。

------------------------------------------------

Q18825：

龔老師，想請教你，我現在係悉尼一間西餐飲食集團做office 剛3月入職

主要負責團餐 但因肺炎沒有旅遊 有感職位不安全 有機會被炒

同時我係公司唯一中國人 覺得埋唔到堆 沒有朋友 想自己同朋友做小生意

朋友是土生土長的華裔澳洲人 任職marketing specialist 我地想做一d唔洗開鋪 利用網絡既生意 你有提議嗎？

我們位於悉尼市中心 但見好多鋪頭已經因肺炎倒閉 所以不知道從何入手

龔成老師：

你可以從需求去想想，現時疫情，市民都有不同的需求，除了醫療方面外，有些市民減少外出，但這不一定不想消費，你可以從這方面著手。

當然，這些可能只是中短期的生意，如果要長遠發展，就要想一些長期需求的生意。例如你可以定目標客戶是當地的華人，佢地其實與你一樣，面對一些華人的需求，你就嘗試解決這些需求。

利用網上銷售是方向，你可以從這些方向去想想。

------------------------------------------------

Q18826：

想請問龔 sir ，如果我現在買樓，1700 萬的，稅項255 萬。你會替我開心或替我擔心？

自己名下有一物業，是早年，2003 年買下給長輩用，自己租樓近十年，

之前經歷過97，2003， 2008 買樓，唯97&2008 買的已經賣咗，落錯了車。

由2011 年租樓到現在，希望等吓樓價跌，事實大家都知，今次疫情，經濟結構同2003不同，感覺樓價仍然是歷史高位....

想亞sir 你比啲意見。謝謝

龔成老師：

從你過往的經歷，已睇得出你的問題所在，因為你「估高低」，你一定要明白一點，無人能預測走勢，無人能捉到最高最低位。

因此，你錯過一些低位，根本不是問題，另外你2011年賣樓，正正是估當時已到高位，樓市會跌，賣出等跌打算再買。

唔好再試估高低，從你的需求著手就得。買入後只要你「供得起」就得，不用擔心樓價之後的上落。

不過，你要比15%的重稅去買樓，就未必值得，這個成本太高，你最好想一些方法，能以一些節省稅務的方式買樓。

------------------------------------------------

Q18827：

你好, 想請教一下老師覺得係澳門投資地鋪好還是住宅好? 謝謝 !!

龔成老師：

兩類是不同的投資項目，住宅會較入門，同時金額一般較細，至於地舖，要求你的投資與法律知識較多，同時金額一般較大。

另外，地舖會較易經濟影響，敏感度較高，而澳門住宅有一定的需求，因此樓價相對大跌機會較少。

現時疫情，有危有機，如果一些地舖價格有明顯的下跌，而你分析該地點長遠不差的，都有投資價值。

------------------------------------------------

Q18828：

龔成老師，兩夫婦40歲左右，有600萬現金，沒有任何投資，每月使費約6萬。 請問應該如何配置才可以做到財務自由?

謝謝你的時間及解答!

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這年齡，其實仍是財富增值的時間，因此，我會較建議你仍投資有增長力的項目，不用太早追求財務自由及現金流。

不過，如果這刻好想財務自己，都可以用以下方法：

你可以將這$600萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q18829：

龔成老師你好，上年大約2019年7月嘅時候開始做月供股票

分別係 2800 0066 1211

因為我仲係一個學生 每月最多供到4000 最少1000
加上疫症 返唔到part time 就冇供到
宜家有大約$42000嘅港股

而我嘅1211 只係買左大概150股
而平均買入價都係$40-45左右
見到佢近期都升得好多

但是恒生戶口中 賣買碎股 好像都要500股才可以做交易

我知道升一倍賣一半 但是現在股數不足以賣出，以現在買入價亦是高位，應該怎樣做？

1. 如何買賣碎股？
2. 該怎樣做？1211繼續做月供？ 還是先不理會，等待便宜價再月供？
3. 現在再購入1211的話 就會令醉均買入價升高太多，該怎樣做？

龔成老師：

1）如果要賣出碎股，部分銀行的網上系統都有提供，你可以照賣，有些則要打電話去先賣到。其實同賣正股原理一樣，不過股價就會低少少。

不過，上述都是優質股，你不用賣出，持有就得。

2）比亞迪（1211）$100以上就停一停先，唔好供住，原有貨就持有。

3）等待。

同時，你可以儲下現金先，以及留意下其他股票。

------------------------------------------------

Q18830：

老師請教一下 關於你對澳門銀河0027的睇法，我是一位澳門人，知道銀河是香港公司，並正在發展中，遲點佢可能會開銀河第3/4期

再加上有一個輕軌站一落車就到銀河

我想買銀河 但入門好高，差唔多要4-5萬，請問一下你認為銀河的合理價/便宜價是什麼？

龔成老師：

銀娛（0027）有質素，可以長線投資，但你預佢中短期較一般，長遠仍無問題，有質素，有發展。

最好的方法當然月供，但好似澳門月供手續費較貴，你可了解下先。

如果要一手手入，你可以等佢回多5%-10%先，如果月供就可以開始。

------------------------------------------------

Q18831：

龔sir 你好, 我留意你的Facebook 一段日子，謝謝你一直以來用心的分享。

我早年買落很多股票，但很多都蝕住等返家鄉，現共有大約100萬嘅股票組合，分配如下：

11 恒生 500股
1 長和 1000股
3311 中國建築 30,000股
3383 雅居樂 20,000股
1378 中國宏橋 19,500股

1548 金斯瑞生物科技 12,000股
1612 永勝醫療 36,000股
1810 小米 14,600股
2382 舜宇 300股
3377 遠洋集團 10,000股

1726 HKE HOLDINGS 225,000股
1800 中交建 2,000股
1337 雷蛇 7,000股
144 招商局 4,000股
945 宏利 500股

想問吓, 應該點樣重組？
謝謝你解答

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

整體來說，持有都不是劣質，但質素都不是好強，同時無乜增長力，你要慢慢調整翻。

中國建築國際（3311）、中國宏橋（1378）、金斯瑞生物科技（1548）、遠洋集團（3377）、中國交通建設（1800），質素較一般。不是劣質，但不是高質，可以等反彈賣出，但不用立刻賣，等時機先。

永勝醫療（1612）、雷蛇（1337）是較為風險類，唔建議持有太多。

HKE HOLDINGS（1726），質素則較弱，要等機會賣出。

至於其他，都可以守有的，但不少的增長力都唔強。

之後，就慢慢建立翻一個更有質素及有增長力的組合。

------------------------------------------------

Q18832：

Hi 我想問我岩岩開始投資
應該睇咩書先？

而家休息緊
手上持有中銀 地鐵 建設 煤氣

每隻大約幾萬
而家手上有d 現金
應該買邊隻？

龔成老師：

你要做二樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你現時持有的，都是有質素的股票，不過增長力不強，建議你暫時慢慢入（即是以月供模式）去投資盈富，同時，你要增加知識，之後，就可以開始投資較有增長力的股票。

------------------------------------------------

Q18833：

您好啊！我想請教一下你，現在手頭上有130萬，冇樓，租住一個251呎的單位，月租7000。

我看了一下樓價，現時住緊的樓賣緊380萬，53年樓齡，要比4成首期，再月供一萬。咁其實我係咪租划算過買啊。

龔成老師：

可以用「租金回報率」去計下就得。

$7000X12，一年的租金就是$84000，而現時樓價$380萬，即是租金回報率為2.2%。

這個回報率，比起現時一般的單位較低，反映有兩個可能性，第一，佢收你的租較平，第二，物業唔值$380萬，可能只值較低。

當然，$380萬可能包了其他的因素，因為被收購的可能性，但這個可能性高還是低，則要真正睇先知。

你可以話現時租好過供，不過，所有事情都是睇長遠的。

------------------------------------------------

Q18834：

老師你好, 我今年30歲, 做左2,3年正職之後就一直做freelance 4,5年, 收入唔穩定, 疫情手停口停, 無乜正職經驗好難搵工, 好傍偟, 如果想40歲有100萬, 可行嗎？

龔成老師：

你要從「收入」方面著手，疫情只是中短期，你只要之後做好理財就得。

你freelance要盡量做到填滿時間，如果有時間剩，就要多增值自己，睇書、發展一些專業技能、小生意，都是一些方向。

收入時多時少唔緊要，但我希望你能定出一些儲蓄計劃，例如每月平均儲到$6000-$10000。當疫情過後，回到正常時，你就要開始這計劃。

同時，要適當投資，如果無投資知識就月供股票。

相信要40歲有$100萬，並不難，你肯定目標就做到！

------------------------------------------------

Q18835：

龔sir你好。我今年三十歲出頭，月入五萬多，扣除家庭開支，月儲約三萬，因為性格保守，我一直唔敢投資

每次有朋友游說我置業/買月供股票/保險儲蓄，我都會將「可能會蝕」呢個風險睇得好重，擔心萬一有急事拎唔到現金出嚟，以致財富一直未能增值。

最近因為同伴侶租屋住，開支大了，而另一半收入唔穩定，同時有幸朋友介紹你的專頁俾我

先明白到再只揸現金係件唔理想嘅事情，所以好希望得到你賜教，使財富可以持續增值，萬一另一半失業/退休，都唔使咁閉翳。

直到現在，我儲了約一百七十萬現金，當中有部分係美金。同時無持有過任何股票。

另外，好多謝你常常無私分享你嘅知識，令好多無相關知識經驗嘅人有好大得著，多謝你

龔成老師：

你要做三樣野，第一，增加知識，你之前怕投資，原因是你不知道真正的投資方法。你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

當你愈了解投資，你理財就會愈做得穩健，同時能有一定的回報。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

你現時有一定的現金，點都要將部分現金轉為股票。

第三，分注投資優質股，暫時你可以動用$30萬，開始投資先，唔好太急用$140萬。暫時分注用$30萬先。

你的年齡，其實可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18836：

你好，龔老師，本人有以現時飾金價格計算約30萬飾金，同當年買入價平手，想對回現金投資，請問建議投資什麼？thanks!

龔成老師：

其實可以係整個財富組合裡，持有一定的貴金屬，所以你不一定要賣晒。加上現時股票市場，又不是特別平，因此又不用好急要投資。

假設你賣出，可以部分持有現金等機會，部分套現，部分則可分注投資優質股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18837：

龔sir，過去8月上左初階班，真係令我投資知識增加左不少，嚟近有個大目標，想問下你意見，可能有小小煩，希望你唔好介意。

1.先講背景，我同先生36歲，有1個小朋友，家庭月入$4萬，一路都想置業，明白手上資金不足，但最近有個念頭，想移居台灣，約用10年時間去完成，現在先訂立一個小目標，3年可擁有100萬資產，再用錢搵錢，加快資產增值速度，請你指教一下

2.我本身有股票如下：
金沙 400 股@29
福壽園 1000股@6.6
小米 200股@ 21
蘋果 200股 （約總值20萬，只會一直持有，暫不會再增加）
VOO 2 股（剛開始買，主要想平衡風險）
盈富基金 $3000（月供已有1年）
中生製藥 $2000 （今個月開始月供）
現金$10萬

3. 我每月可儲現金5千，再加月供上述股票，由於上堂後已基本概念，會打算邊儲現金邊留意持有股票，當合理價時便會分批吸納爭持，你覺得可行嗎？

4. 另外有一份長達20年月供基金，大概於47歲時便有百多萬可取回，由於小時候不懂，所以選擇這投資法，但眼見只剩下10年完成，又不想白白浪費

5. 分析過舜宇光學科技，金界控股及楓葉教育，但眼見舜宇光學值博率高，另外2隻比較高風險，如果價格合理時會打算買入，你覺得如何呢？

龔成老師：

3）可以，你整個方向的正確，上述持有的都是有質素的股票，你只要保持進行就得，現金$10萬就留現金，到有大跌市出現先動用。

要3年有$100萬，機會一半半，因為單靠上述的方法，仍未必得，你要提握到機遇先得，但大跌市無人知會否出現。

4）這類產品在理財中都有質用的，你現時保持進行就得。

5）這3隻都是有質素的，舜宇光學（2382）的確較好，這股可以長線投資，現價在合理區中上部，都可以分注投資。

------------------------------------------------

Q18838：

龔成老師你好，想請教你

（1）其實參加股東大會有用嗎？老師有否參加過?

(2) 想問環保股3718同1257應如何取捨？邊隻值博率較高？

（3）788可以長遠月供，還是有其他更好既選擇？

（4）如果稅貸做到低息同拉長還款期，用於投資同清還信用卡數，借唔借得過？

（5） 25歲，做左4年，月入$20000，工作穩定，福利銀行假雙糧花紅都有，公司唔會炒人，但辛苦工而且冇咩前景，最多再晉升多一次

本身入職時都幾開心,但過左4年到今日，都有少少麻木，呢排疫情比較難搵工，老師有咩建議或者心得可以提供？我必定虛心學習

龔成老師：

1）我都有參加過，你都可以試下去，不過，作用不算好大。

2）北控城市資源（3718）會較好，這股有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。

3）這股都可月供的，盈富（2800）或安碩恒生科技（3067）都可月供。

4）如果你本身的卡數多及要比高息，就可考慮用這方法處理，不過，你都要明白這是消費性負債，始終不建議太多。

至於借錢投資，除非你的投資實力較高，以及現時大市好平，否則不太建議，這而這刻大市未算平。

5）你要用長期的角度分析，10年後，你想做甚麼？事業發展如何？收入如何？過怎樣的生活？

你先想清楚這些問題，之後就想想，現時的工作，是否能幫到你向這目標進發？如果要做到這目標，應該轉工還是怎樣？

------------------------------------------------

Q18839：

我睇"年報勝經" 既速度比起"股票勝經"慢得多, 是正常的嗎?

因為我覺得年報勝經入面既知識, 對於初階的我, 比較難消化, 我要不斷重覆閱讀才明白老師所說的概念...

龔成老師：

正常，因為《年報勝經》較深的，你最好慢慢睇，同時睇兩次。

如果你未能掌握，可以睇多幾次《股票勝經》，打好基礎先。

------------------------------------------------

Q18840：

Voo/qqq比2800更有投資價值嗎？

龔成老師

voo/qqq，有投資價值，VOO與盈富（2800）類似，都是平穩增長型，各有各好，無話邊個更有價值。因為VOO是美國地區企業，盈富則較多是中國地區，而這兩個國家長遠的發展都是正面。

至於QQQ，增長力強，但風險會高D，都可以長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。