期待左好耐….小小豬終於有機會嚟體驗「海洋公園水上樂園」大玩特玩。依位小朋友就緊係興奮，除左有得玩水之外，仲有兩位至愛嘅姨姨陪佢玩，咁仲唔超級盡慶。

好啦…講下我地玩左咩先，我地入到場第一時間就去左室內二樓嘅「漂流探秘」，其實就係坐水泡玩漂流，佢水泡嘅款式都有單人/雙人/幼兒雙人選擇，係落水位置就可以自由選擇。基本上穿上水泡係度漂漂下都幾Relax，間中又有啲射水設施，所以都有啲刺激，小小豬都連漂三轉先肯上水。

之後我地去戶外嘅「激流旅程」，大小朋友都著住救生衣係激流入面漂流，水流唔算急，但水力都幾大，要企定定都唔係咁易，都幾刺激嘅。不過我覺得瞓係水上面睇風景個感覺真係好正。

繼續去戶外嘅「涌浪灣」玩，小朋友著住救生衣係度玩人造浪，不過啲浪會係指定時間先有。依度啲浪就唔算大，所以嚟輕輕鬆鬆浸下身都唔錯。

嚟到必玩17m高嘅「八彩天梯」，只要夠膽同身高1.1m就可以玩，小小豬係表姨嘅鼓勵下終於肯去，而我呢……老啦…年紀大，都係企定定等影佢地好啦…哈哈！小小豬話頭向前腳在後然係瞓係水墊上SIR落去，初時都冇乜嘢，只係由水管SIR出嚟嗰下有好大嘅離心力係有啲驚，不過都係好好玩，好刺激嘅。

之後我地就去二樓嘅餐廳食午餐，以主題樂園嚟講佢嘅價錢都唔算貴，大約$65-$90左右，而且食物質素都OK可接受，唯一就係可能遊人都比較多，所以等取餐都就耐左少少。

食飽飽就繼續去室內三樓玩「天海灣」，同戶外嘅涌浪灣一樣都係人造浪池，不過依個就大好多，同埋啲浪勁好多，所以小小豬係度都玩左好耐。

最後就去隔離嘅「威威水地帶」，初時小小豬話佢大個仔唔玩BB嘢，只係行去望下，點知最後又係玩到唔願走，佢來來回回玩嗰兩條三層高嘅長滑梯，一聽到叮叮聲就衝落去個大水桶等淋水，總之就全程上上落落，睇見佢都覺得攰…哈哈！

其實仲有最刺激嗰幾個遊戲一係唔夠膽，一係超多人排隊，所以冇玩到，但整體上係好玩嘅，唔好話小小豬，我都玩完都嚴重冇電。由於今次係體驗半日場，所以小小豬話佢完全唔夠喉，未離開就已經問我幾時再去，仲叫我趁佢12歲前仲係小童價入嚟玩多幾次，最好就係買年票等佢可以隨時有得玩哦(但…..好似係冇出年票….哈哈)

等我嚟個小分享先💕💕
✨記得要預先網上預約Shuttle Bus，係海洋公園門口上車，每隔10-15分鐘一班，車程大約8-10分鐘就到。渣車人仕都要預約停車場泊位，不過樂園初期停車場好似唔開，有需要可以留意官網。
✨最好提早預約LOCKER，尤其係四人家庭，因為特大儲物櫃唔多，而我BOOK嘅個家庭款最多可放2個背包，所以要用啲方法先可以塞晒四人物品入去。
✨儲物櫃區位置就唔分男女，拎齊嘢就可以去更衣室換衫，當中有八間家庭更衣室，入面有齊洗手間同淋浴間，而且房間都幾大，都好方便嘅。
✨建議大小朋友都可以著水陸兩用鞋/扣到腳後嘅涼鞋 (唉…我有訂左兩用鞋不過送唔切落嚟，所以今次用唔到)，因為除咗 Free Fall嗰三條梯唔准着之外，其他設施都可以著住玩。如果著人字拖就要係大部份滑梯型設施都要除低，穿响對手度玩啦。
✨泳衣泳褲外面可以加TEE或防曬衣但不能有鍋釘、拉鍊或金屬扣等。不過要留意玩Free Fall就只能穿貼身泳衣同泳褲。
✨口罩除左係玩水時唔洗戴之外，任何時間都要戴住，所以建議要帶定多幾個替換或用可重複使用嘅布口罩或運動口罩。
✨大部分滑梯及設施都可以用小型防水袋放電話，咁就可以影到靚相。如果有需要用GoPro拍片就要用手腕帶扣好，唔可以使用手柄或自拍棍。

想了解更多詳情及訂票，可瀏覽官方網站 ~> https://waterworld.oceanpark.com.hk/

Special Thanks
香港海洋公園 Ocean Park Hong Kong
#WaterWorldOPHK #SplashintoAdventure #LetsGetSplashed #海洋公園水上樂園 #探索自然激浪無限 #激浪無限瞓身玩

#水上樂園 💦幼兒篇💕玩樂分享

好開心奶油爸有水上樂園正式開幕前優先體驗飛，啱晒最鍾意玩水嘅奶油仔！奶油仔未夠三歲，又差少少先100 cm，究竟有咩啱玩呢？

佢就玩左 👇🏻👇🏻👇🏻👇🏻
1️⃣漂流探秘(室內)：
坐水泡沿住河慢慢飄呀浮呀，奶油仔最愛呢個！

2️⃣威威水地帶(室內)：
分左兩邊，一邊啱幼童，一邊就小童。有好多玩水設施，噴水，水簾，滑梯等，奶油仔好鍾意屯門共融公園個玩水設施呢度都有😂
感覺如果小朋友怕水，可以先去幼童個邊熱下身，水深只係浸到腳。
不過奶油仔就有DD怕大水筒倒水(佢一向唔鍾意太大聲)，所以唔係玩左太耐就去左戶外。

3️⃣湧浪灣(戶外)
阿娘細個最愛嘅人造浪灘！而家呢個超靚，旁邊有好多沙灘椅，播住輕鬆歌，又有日落景🌄結果我地留係呢度最長時間，因為奶油仔唔捨得走😆

4️⃣激流旅程(戶外)
趁太陽落山前，玩埋戶外激流，類似室內漂流，但唔用水泡同水流較急，好快玩完一次。唔識游水穿浮衣可以都玩到。

雖然數落唔係好多樣設施，但其實非常夠奶油仔玩得盡興🥳已經不停話要再去玩過！

今次阿娘雖然無得玩埋一份，主要負責睇袋同影相，不過見到咁好玩嘅設施同咁正嘅氣氛，都好興奮！！！坐完月最想就係去玩急流漩渦😍

唔方便濕身，主要來照顧小朋友嘅家長，都有非常多好舒服嘅等候位置坐低休息～

出左story都收到大家嘅問題，官網有講嘅我就唔重覆~其餘喺度一次過happy share：

1️⃣帶BB車入園內方唔方便？
-樂園場內設計上係方便嘅， 非常多無障礙通道同有lift。唔需要兜好遠嘅路，都可以去到唔同遊樂設施。我哋今次都有帶BB車，主要因為我哋喺夜場，奶油仔習慣八點瞓，有架車掛袋同俾佢瞓會輕鬆啲～

但正式開幕後，如果人流較多，帶BB車就可能無咁方便，因為每個遊樂設施等候位置都唔大，未必夠位泊咁多架BB車，容易阻住地方。

2️⃣室內冷氣凍唔凍？
室內恆溫，怕凍嘅奶油仔完全無問題。無落水嘅阿娘就流汗😂所以唔怕小朋友凍親。

3️⃣着唔着鞋好？
着住水陸兩用鞋/涼鞋好D呀！因為奶油爸腳板底係湧浪灣個度刮到少少，無流血嘅，不過始終新起好，有D位較為未磨得平滑。

4️⃣樂園餐廳嘢食質素如何？
又唔錯喎！$100內有主食加野飲。我地食室內百味洞，環境較熱(濕左身嘅人都唔會凍親)同四圍都好大音樂同水聲。感覺黃昏時段的話，去戶外餐廳食氣氛正D~

5️⃣搭咩車去好？
我地係海洋公園搭shuttle bus去。本身想簡單一程的士入去，但有早一日去嘅朋友報料塞車塞左半個鐘，的確我地去個日，深灣道都塞左陣。

正式開幕安排以官網為準哦～記得睇清楚先出發： https://waterworld.oceanpark.com.hk/tc

謝謝收看!

題外話，爸爸電話用左防水套，但唔知係咪平野，影出來嘅相好濛，全部相自動落filter咁，我唯一嘅獨照好似80年代影咁😶

香港海洋公園 Ocean Park Hong Kong

#育兒 #育兒日記 #親子 #hkmama #hkmum #hkmami #hkmom #hkbaby #香港媽媽 #香港媽咪 #親子blogger #孕媽媽 #懷孕 #懷孕日記 #水上樂園 #親子好去處

知道好多人都準備去🌊「海洋公園水上樂園」，寫左十個溫馨提示比大家 🏖😎，特別係準備帶小朋友去既家長 👨‍👩‍👦‍👦❣️ 想比人地玩多幾樣設施，入園前必要裝備幾件事🌈:

1️⃣🔥入園前必買-兒童防割潛水鞋/沙灘防滑鞋🔥
因為好多設施都分佈係唔同既區域，有D仲係半山🏝，赤腳行來行去一定唔得 !! 最好著呢D水陸兩用鞋，9月中Decathlon 已經無晒小朋友碼， 淘寶大約$40-50有交易,
[🎬影片00:38]

想知我地買左咩鞋, 可以去專頁問,我地會PM返妳淘寶 / Tmall link(有埋淘寶相片)，我地用過質量都OK. 最重要係快送到黎香港 ‼️

註:著普通沙灘拖鞋玩,落水前一定要除或者穿返係兩隻手/交叉手捉實落水，又或者玩完水上活動又要走返好多級樓梯先拎返對拖鞋 !! 好多人玩玩下甩拖架🤦🏻

2️⃣😷 推介口罩
唔玩遊戲既時候要帶口罩帶備可重用/水洗口罩
e.g. PITTA口罩/海綿口罩/運動口罩/布口罩
不建議銅芯口罩(原因:比人誤會帶胸圍口罩就唔好啦)
我地推介用海綿口罩，隨意塞褲袋，又有彈性 ，玩完揸一揸水就可以帶返
布口罩及其他口罩濕左再放係塊面到有少少危險，小朋友呼吸唔到
[🎬影片00:29]

3️⃣帶防水袋
帶2L 防水袋及 電話防水袋 (**一定要2L 或以下**)
呢D去Decathlon 買啦~ 我地帶左個5L 唔可以揹住玩遊戲,我見有人無拎玩真係整涼濕左個電話
電話防水袋基本玩咩都可以跟身 ! 玩最勁果幾樣都可以 !!
不過會叫妳除出黎唔好掛頸/ 抱起心口位，以防衝擊力整傷身體🏄🏼

4️⃣👙入園服飾🩲
建議長袖泳衣 ! 女士最好泳衣加打底褲，小朋友亦都無咁易曬傷🔥同凍親🌬
潛泳鏡可以不用帶，無咩機會用到 ! 同埋好多都"唔比"潛水" 🏊🏼‍♀️!!潛水會比救生員警告架💥
[🎬影片06:42]

5️⃣準備小量食物🥪🌭
要預先帶備小量食物如三文治 !!小朋友肚餓可以即時食住少少野先,之後出返去先食 !! 雖然入面有野食買及價錢正常地貴，不過最大問題人手唔夠，出餐出得好慢好慢🤷🏻 !!! 買食物又要排半個鐘以上，排完隊再食已經無晒時間玩 !! 真係玩成日都得架, 玩四五小時唔夠玩架👏🏼

6️⃣🔒 儲物櫃
最好上網book 定locker🔒 (儲物櫃),準備好Barcode link 如下
https://waterworld.oceanpark.com.hk/tc/water-world-tickets/special-experience-and-service/storage-locker-rental/
國皇之家預定左標準(Regular) ， 不過覺得係偏細唔夠位. 下次預定家庭儲物櫃比較好.
三種儲物櫃Size 及費用[🎬影片07:07]
重點係:儲物櫃數量有限，先到先得。同埋如果無book 定，又要排30分鐘/等人唔用要安排到locker 個barcode

7️⃣🚌上網預約穿梭巴士/或者直接搭城巴629直到水上樂園門口
https://waterworld.oceanpark.com.hk/tc/water-world-tickets/special-experience-and-service/shuttle-bus-service/
穿梭巴士資料[影片07:11]
唔book 定去到又要排另一條無預約隊;預約左都唔駛跟死/限死邊一個班次
e.g.網上book 左9:15 , 9:30/9:00 去到，職員check 你有barcode 都可以照上巴士
極度建議大家愈早入園愈好👌🏻

8️⃣水上樂園公共交通/泊車🚕
好多唔想煩, 直接搭的士/巴士入去，🚌城巴629 都可以直接到門口 !
城巴已經開始服務
(城巴網頁未update, 不過確認早上去程/下午回程一定有得搭)
https://www.oceanpark.com.hk/tc/park-information/how-to-get-there/citybus
泊車收費:星期六日 $250/日
[🎬影片07:14]

9️⃣設施愈刺激果D設施愈要玩先💪
入去之前一定要唸好想玩邊D先， 國皇之家生活事推介愈好玩/愈刺激果D設施 😱
如:急流漩渦/沖天瀑布/極速迴環/深谷飛瀑/勇者之巔 愈要挑戰先.
我地開頭全部都唔駛點排隊，到最後好玩既已經要排最少60分鐘.
仲會差不多係完場前開始45分鐘去截龍 !! 之後好多人都已經無機會再排
[🎬影片02:09]

🔟其他個人物品
📽攝影方面不可以用自拍棍；不可以攜帶小型相機📸
GoPro / instant 360 有綁係手腕係是可以的 !! 國皇之家都係用GoPro影架 .
而小朋友唔可以帶水槍、水泡場內救生衣及水泡提供
[🎬影片06:51]

🎉最後大家睇影片加聽D尖叫聲[🎬影片02:52] 都知道大人小朋友都玩得超級開心💯 !!
希望大家都做足入園準備，買齊野入去「海洋公園水上樂園」玩得開心D 🥰‼️ 有咩留言再問 👊

#海洋公園 #水上樂園
#親子好去處
香港海洋公園 Ocean Park Hong Kong
#Decathlon #國皇之家 #gopro
#WaterWorldOPHK
#SplashintoAdventure