#小榛果 來露露相～這孩子其實也有招牌大鼻子呢！ 這幾天日子忽然閒了～忙碌超過大半年的氧氣機也安靜了，還好大木籠來剛好讓自己有點事做也不錯！

疫情之前 都不會關心血氧含量的問題 現在疫情😷期 體溫機 氧氣機 血氧機 酒精 根本就是人人必備的東西 #武漢肺炎⚠️ #covid_19 #bodytemperature #thermomter #oxygen #pulseoximeter

遲大到嘅完晒實習分享（上）#staycutewardsharing 四月最後兩個星期出咗社康護士實習，嗰兩星期主要去咗一啲好舊嘅公屋單位（樓齡>40年）上門探訪同提供各種護理。例如有啲係上門洗傷口，有啲就可能睇糖尿病控制成點⋯啲case大多數係長者：有獨居嘅，有兩老相依為命嘅，有同仔女同住嘅；有啲長者要獨力肩負照顧身體較弱嘅老伴嘅重擔，有啲就有工人姐姐照顧，都有啲係由同住嘅仔女/孫仔女擔當照顧者嘅角色⋯⋯ 有時見到好多好温馨嘅場面，都會令我覺得「愛呢樣野真係好偉大好靚呀」；但當睇到一啲好悲哀嘅情況，真係有種難以言喻嘅無力感。 仲記得有一日中間有個病人因為有啲突發情況，所以我地留咗喺嗰度特別耐。呢個單位住咗一對公公婆婆，實際年齡我冇睇到file，但目測都七十歲以上。嗰兩星期我地去咗佢地度三次（唔係日日同一個護士上去），主要係幫個婆婆做傷口護理。婆婆有末期肺癌，因為有Pleural effusion （胸腔積液，俗稱肺積水，留言有不專業嘅簡單解釋），佢右邊肋骨下面有條引流管用來定期抽肺水用。姑娘上門主要係洗下條喉仔嘅出口位置，睇下有冇滲，換下紗布咁；另外大髀都有個傷口，要日日上去洗，驚佢發炎。 但呢幾次上門探訪令我比較印象深刻嘅唔係個婆婆，而係個伯伯。 話說婆婆今次出院返屋企，因為肺功能差咗，要開始駁氧氣機聞氧氣，加上精神差咗，活動能力好有限，大部份時間都只係瞓喺木梳化上面。伯伯要肩負照顧婆婆起居飲食嘅重擔，加上要做家務呀清潔屋企呀乜乜乜，言談之間都透露自己好多憂慮同壓力。最深刻係我第一次上去嗰陣，見到伯伯左腳小腿有個傷口，但佢冇用紗布包好，只係用膠紙痴咗個膠匙羹蓋住個傷口。個伯伯可能都知道要俾個傷口抖下氣，所以佢喺個膠匙羹度拮咗好多個窿。雖然有個羮遮住，但都隱約見到傷口邊緣紅紅腫腫咁。問返先知原來伯伯之前淥到隻腳，姑娘上次見到已經好好咁幫佢洗過傷口，蓋返紗布，但伯伯之後都冇特別睇醫生，亦冇好好處理個傷口，只係用返膠匙羹。嗰陣望住伯伯草草處理自己嘅傷口，全神貫注咁睇住姑娘幫婆婆洗傷口，問姑娘好多關於婆婆情況嘅問題，真係感受到佢作為照顧者身上背負緊嘅重量，係重到佢將成副心機擺晒落病重嘅太太身上，連自己都唔係好得閒理。 講返嗰日，我地上到去幫婆婆探熱，額頭探到37.9度，夾個手指發現婆婆血含氧量得88%（已經聞緊3L氧氣）。婆婆個樣抖氣抖得好辛苦，要打側一邊瞓（肺積水嘅常見徵狀）。姑娘見婆婆聞緊氧氣都抖唔到氣，就估都係肺積水嘅問題，但距離下次覆診抽肺水仲有成個幾禮拜，而婆婆嘅情況咁危急需要即時處理，所以姑娘就想說服伯伯即刻call救護車送去急症室。點知伯伯唔肯，佢話婆婆唔想入醫院，又話：「佢上次就係因為入院出返來先搞到宜家咁，本來佢都好地地。」「唔駛去醫院喇，佢一時時架咋，一陣就會冇事架喇⋯」「唔好去醫院啦，我琴晚成晚都冇瞓過覺呀⋯」伯伯不停拒絕，婆婆又話唔要，但睇住佢抖氣愈來愈辛苦，姑娘唯有打俾阿女解釋宜家婆婆嘅情況點解要即刻送院。說服咗好耐，阿女都幫口說服伯伯，最後伯伯先勉強同意。 其實我都好明白點解伯伯咁抗拒送婆婆入院，講真，好多時啲好精靈嘅公公婆婆住得耐病房，都會話「喺呢度冇病都鬱到有病」：喺病房好多時因為安全嘅問題唔可以俾啲行路唔係好叻嘅病人自己落床，加上疫情關係，屋企人想探病都有好多限制。有時啲好精靈嘅住幾日都變咗呆呆地；本身入來已經唔係好精神嘅，就真係會愈瞓愈頹咁⋯ 拿，我唔係話入院係件唔好嘅事，有病痛緊係需要專業嘅治療同護理，只係住院同時難免會影響病人嘅精神同心境。 睇住伯伯話自己前一晚成晚冇瞓，但當救護員上到來送婆婆入院，伯伯都即刻擺低屋企嘅野帶住疲倦嘅身軀跟埋去，中間仲成日諗住屋企有咩未搞掂未做好。我諗起上年我媽半夜好唔舒服，話搭的士去急症室，阿爸就叫我跟埋去。講真，作為阿女我都好擔心，亦都覺得應該陪佢去；但我好記得我嗰日本身來m又唔係幾舒服，十點幾已經諗住瞓覺，點知十一點要出門陪阿媽去急症，仲要知道有排等，嗰下真係好崩潰。心入面覺得我好攰呀，但又會覺得我係應該要陪架喔，唔陪就好似我唔孝順咁⋯最後去到凌晨三點幾阿媽上咗病房，我先攰到嘔白泡地返屋企。所以當我睇到呢個伯伯，我真係好理解佢嘅疲累，都好同情佢嗰種面對婆婆嘅重病無能為力，但又因為背負住責任而唔可以放鬆嘅矛盾同壓力。 待續⋯