慎入！這是一個網絡送死Post 今日睇到《立場新聞》嘅新聞，記者表示希望响選舉前席約倫敦市長Sadiq Khan做訪問，可惜四次都被「放飛機」，然後出文詳細講解時序。係人都知本人（暫時）係傾向支持保守黨，不過唔打算從工黨或者保守黨政治立場或者方向去討論呢件事，因為咁樣好容易跌入「工黨奶啦」或「保守黨幫香港人加油」呢啲自圓其說嘅心態。 坦白講，傳媒响選舉前約見候選人係好正常嘅事，而因為可以利用傳媒做曲線競選廣告，候選人多數都願意去迎合。作為响當地新建立嘅媒體，呢個算係一個好開始，不過，要清楚嘅係英國有無數咁多傳媒，剩係全國性印刷版嘅報紙，大大少少超過十份，計埋地區性免費或者收費嘅就多到數唔到（倫敦就特別多）。如果網媒嘅話，其本上就好似肉麻愛情故事語錄一樣「恍如天上繁星」。咁呢個就係業內競爭，而唔係「點解唔理我」嘅問題。 如果講到競選連任嘅Sadiq Khan嘅愛理不理「甩底」姿態同保守黨候選人Shaun Bailey好似黃大仙有求必應嘅態度好唔同，咁到底有無了解過倫敦市場嘅職務係咩？當地選民注重嘅議題係乜？現時競選嘅形勢同生態又係點？ 倫敦市長嘅職責同特首或者以前港督好唔同嘅，係交通、治安、社區福利（唔係市民福利）、旅遊推廣等等嘅民生事務，而廿個候人裡面最有機會嘅只有三個，民意支持度最高嘅仍然係工黨嘅Sadiq Khan（45%以上，容易啲明嘅就睇賠率1/50），排第二嘅係保守黨嘅Shaun Bailey（26%，20賠打外），而排第三嘅係自由民主黨嘅Luisa Porritt（8%，66賠過外），新進黑馬就係右翼藝人鬧交界KOL Laurence Fox（唔知點解民調好低但賠率都有60賠）。 先唔好講選情，剩係競選政剛，Sadiq Khan主要係希望疫情後注重投放資源簡化大型公共設施出入，推廣倫敦旅遊業順便幫助就業不足嘅市民重投工作。而Shaun Bailey需然都係後疫情民生議題，但就多咗一項針對現任嘅Sadiq Khan，要解決治安問題，除咗加強警力之外就係配合保守黨嘅政策令警察可以容易"stop and search"（左翼因為怕警權過大係唔多鍾意嘅）。Laurence Fox就再特別啲，反對市長「抗疫L」政策同倫敦左膠思潮。 唔想用「睇唔起香港人囉」去理解，因為係英國地方選舉視角問題。首先，香港人佔倫敦幾多人口？雖然「每一票係好重要」係人都識講，但競選現實係睇邊個，接近贏硬嘅Sadiq Khan要嘅係保住現有嘅支持者，响倫敦講慘講難生活，數到腳趾尾都未輪到香港人（亦相信無人想）。如果大家係Sadiq Khan，你會選擇同本地傳媒解釋自己唔係左膠，亦都重視治安同警務，還是同香港傳媒講「香港人加油」或者旅遊廣告一樣講晒廣東話咁「我代表倫敦歡迎你」？相反，作為挑戰者嘅Shaun Bailey就真係一票都不能少，咁緊係會有唔同態度吧。 講到尾，香港人去到英國（或者倫敦）生活，乜唔係應該當自己係一個英國人，選市長或者區議員改善整個社區嘅民生問題咩？點解要全個地區遷就「香港人乜乜乜」呢？咁係為個地區好，對地極少數嘅香港人著想，還是為聽句口號爽？地方政府喎，唔係下議院有外交、內政、房屋政策權㗎，如果硬係要嘅話，點解唔去聯絡唯一下議院補選嘅Hartlepool嘅候選人？再唔係，點解唔試下揾有機會或者可能成為蘇格蘭獨立後第一個總理Nicola Sturgeon，問下佢蘇格蘭萬一獨立後嘅外交姿態，或者會唔會特別照顧香港人？ 最後，可以好坦白咁講，唔好話香港人，就算整個華人社區，因為從來對社區或者政府參與度太底，現時响英國政治力量係細到睇唔到。如果要擴大影響力嘅話並唔可以永遠「賣慘」或者情緒勒索然後打飛機。大把來自其他國家移民（難民）無論响祖家或者响英國都慘到爆，況且永遠做求人嗰個係無用嘅，更可悲嘅係大把人排前面求緊，而齋有錢亦都唔係大晒，除咗要用時間融入社區，更現實嘅係要技術、金錢同政治技巧再加選票（唔係圍內，仲要令當地人投票支持）... #如果講真話希望有改變係放負的話 #呢個肯定係放負Post #可以批鬥我了