【龔成問答信箱】（Q22221-22240）

Q22221：

你好呀老師，我最近上左車，手頭現金唔夠要放手上既股票，現時佔我自己個組合最大部分就係比亞迪。

我想請問你會建議我放部分比亞迪嗎？如果放應該咩價位先放？感謝

龔成老師：

如果你有資金需要，就要賣股票，不過決定賣那一隻，並不是睇那一隻賺得多。

你要分析「之後的組合情況」，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你這刻，要假設自己賣出那些股票後，「之後的組合」會變成怎樣，這個組合是否優質，是否適合你，是否平衡。

------------------------------------------------

Q22222：

龔sir，你好呀sir 剛剛學習投資 見到有 月供股票 呢樣野。現時大約有$6000 流動現金可作投資

如果想以增長率 係未應該從 2800盈富基金 出手會比較好嗎？ 還是有其他月供股票介紹?

龔sir 我30幾歲 暫時單身 搵緊大約2萬正職收入，兼職都有1萬。而女朋友準備置業 拎左我係投資保險公司基金 大約50萬出黎幫佢

咁本身投資左 兩期ibond ，保險公司基金 大約用10000投資係裏面，

而且買左幾隻股票 （6993）$13.6 入左500股 ，（8500）$5.5 入左4000股，（8500) $2.45 入左2000股，（857）$3.64 入左200股

我諗住自己都想買層樓要黎收租，又想買車。大約有5-6千 可以拎出黎投資，而家應該方向如何?

謝謝龔sir

謝謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

你現時3X歲，應以增值為主。現有持股都算有質素，但中海油(0857)係商品類股，質素只算中等。

而天泓文創（8500）質素再弱多少少，整體只算一般，2隻股票長線都不宜持有太多。

另外，IBOND主要係創造平穏現金流，無增長力，建議你沽出，贖回現金。

而保險基金，你可以比較翻，佢是否優於大市回報，去決定是否值得持有。

未來時間，你可以用「平穏增長股」 + 「潛力股」的組合，去累積財富，以達成你的目標。

若果你現時無投資知識和經驗，對企業估值，點去定平貴未必會太了解。我都會建議，先利用月供模式去做增值。因為可以減低買貴貨風險，對你而言會較理想。

現在你每月可先用5成儲蓄做月供。其餘先儲起，用一邊月供一邊儲蓄的策略。

如果你係新手，未必對以上股票有認識，可以先指數基錢做目標。至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。


------------------------------------------------

Q22223：

你好, 龔sir! 有事想請教下你, 求你可以解答一下, 謝謝。

本人33歲, 月入2萬6, 股息平均每月3000,有層剛收樓未裝修的開放式居屋（折後150萬, 現按揭貸款約130萬）。為咗控制自己物慾,

一出糧我就將大部分錢投資在股票裡, 所以手上現金只應付當月的開支。

現持有：
2638港燈-
82000股 (扣除股息後平均價7.28元）

405越秀房託
50000股（扣除股息後平均價4.31元）

在未來1年內想用40萬裝修層樓, 所以現在要減持股票套現。想問點部署好？減持邊隻好？

龔Sir, 我知道我的投資組合有點保守, 我想聽聽你的意見, 謝謝你。

龔成老師︰

其實，你都明白到現時組合，係不太適合你年紀。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你係應先集中用有增長力股票，去做增值，而唔係去買收息股，去純收息。

若你一年用，係要動用40萬去做裝修，你現時就要開始分注沽出持股。你現時2隻收息股，都係有質素，但增長力就麻麻。你可以按比例咁，慢慢沽出部份持股。

目的係套現幫你支付裝修費外﹐同時都要將部份，換成其他有增長力的股票。

未來時間，我建議你用「平穏增長股」 + 「潛力股」作組合，去創造一個增值平台。你可以將這2隻股票的一部份，換成以下增長股。

另外，你可以用每月空出來資金，去進一步堆砌這個增長組合。每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22224：

早晨 龔sir，好耐之前聽你講買咗1211，前嗰排賺咗少少，多謝

用咗1211賺咗嘅錢買咗啲股票（1177、3319），同時亦月供緊幾隻股票（2800@$2000、1177@$2000、270@$2000）。最近恒指持續下跌，唔知你點睇1177、270、3319？？？謝謝

龔成老師︰

你建立一個「長期、優質、平衡的組合」就得。

要記住一個重要概念，我地持有一隻股票與否，關鍵位是企業質素、前景，不要被買入價或者大市升跌所影響。

買入價和大市走向，只是一個心理因素，如果企業核心因素未被影響，我地係唔需要理會。

你所持有股票，和月供組合配置，都係有質素和適合你年紀。

但緊記優質股最理想的增值方法，係長線持有。唔好賺少少就沽貨，咁會浪費左你長線增值機會。

------------------------------------------------

Q22225：

龔成老師，本人46歲，有1個小朋友，我和先生從來對投資都0興趣, 我有份文職, 自上年疫情, 公司生意差了, 便多了時間,

跟同事開始投資股票, 真是信同事講而買少少, 升少少就放, 最重要唔想虧錢, 當然之後不能咁幸運, 現買下多隻股份, 都虧錢中。

無意間係網上見到你對股票投資的答問, 覺得你的投資概念好好, 所以現在想重新整理股票組合，令財富可以穩健中増加, 想請教你, 那些應該保留, 減持或放棄？

現已投放30萬持有下列股份。

1530本來好想放, 但自己無把握好時機, 升上去時未放之後就一直跌到現在, 自己又唔想虧錢, 之前你有講過三生都有質素, 請問我可以等, 還是應該止蝕放棄, 轉投其他股份?

請提議。

今個7月開始月供共$ 5000以下股份
2800盈富基金 $3000
0066港鐵公司 $2000

現持有股份
0002中電控股 71 @1000
0270粵海投資 11.24 @4000
0388香港交易所 452 @100
9988阿里巴巴 277 @100

0941中國移動 49.75 @500
1530三生製藥 10.8 @4000
7299ＦＬ二南方黃金 7.95 @5000
7568ＦＩ二南方納指 1.54 @10000

感謝你的意見。

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，才會有最理想效果。

你要明白，就算再優質股票，中短期都會係有波動。只要佢長線質素不變，你一直持有就可以。

其實睇翻你持股，大致上都無問題。

三生製藥（1530）都有質素的，不過近年增長力有所減弱，但公司不是無錢賺的。不過，由於市場之前估值較高，現時預期佢盈利轉弱，因些股價中短期較弱。

這股都有投資價值的，你現貨可持有。不過，你預中短期一定會較弱，你預要較長線持有，才會有明顯回報。

較大問題係ＦＩ二南方納指(7568)和ＦＬ二南方黃金（7299）這2隻ETF。

ＦＬ二南方黃金（7299）當中有槓杆成份，要留意風險。升的時候你會賺多左，但跌時候你損失同樣會係雙倍。

若你係想追蹤黃金，又唔想買現貨，建議你用無槓杆成份的SPDR黃金ETF(2840)會較穏當。

ＦＩ二南方納指(7568)除了有槓杆成份的風險外，佢係係反向追蹤納指100指數每日表現。如果納指跌1%，你就會獲利2%(另扣管理費)。

但若然納指向上，你就會虧損。我對這類產品有保留，納指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

而月供方面，現時配置和組合，都係合適。

現時大市只在合理區，每月儲蓄唔好盡用。要留有部份，等大跌市機會出現時，可以用來大手掃貨。

------------------------------------------------

Q22226：

1.每注相隔大約10-15%係指升/跌都可以再入市？定係每跌多10-15%先再加貨？定係將25萬拎埋黎做月供（每月1萬）會更好

2.老師，請問0388 港交所係平穩增值定係潛力股？

3.老師，平穩增值股每手入場費都較高，買一手平穩增值 = 好幾手潛力股

按老師所講：同一行業不能高過30%，同一企業不能高過15%

但由於資金（25萬）有限，平穩增值股只可以揀幾隻，每隻都只係入到1-2手；而潛力股老師話現價可以先入一注，每注相隔大約10-15%。

由於平穩增值股每手入場費較高，以致一開始入手時成個比例會偏向平穩增值股，甚至同一企業的比例都會高於15%（甚至去到30%）咁係咪都可以接受？

龔成老師︰

1) 我意思是指，每股股票的股價計。例如，你港鐵(0066)$44入左首注，下一注就預$37.5-40左右才入。

當然，你將這25萬，平均拆落去5隻股票(每隻每月$2000)，都係可以。

2) 港交所(0388)會較偏向係潛力股

3) 其實開始時，組合金額不高，會較難做到我這個標準。所以，開始時有所偏離，都係可以接受。

但長線計，你要用這個標準作為參考，去令組合不會有過度集中問題。

另外，唔好覺得買入1手成本高，就係貴。平貴定義，應該係參考企業本身質素、行業發展等，去估算出來。

雖然平穏增長股好多1手成本唔少，但以估值角度，反而大部份平穏增長股，都尚在合理水平。

反而潛力股，現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

當然，如果你係用月供儲貨的話，你之前提過的股票，現價已經可以開始。

------------------------------------------------

Q22227：

5 1000股 @$57.7
1658 6000股@$5.73
3067 500股@$18.8
1883 1000股@$2.58

3988 1000股@$2.95
1398 1000股@$3.07
1177 2000股@$7.37

想請問成sir，我持有以上股是否收息股為多？我組合是否比較保守？我想增加一些較有潛力增長既股有咩見議？

另外因銀行股佔多數，我想放0005轉其他非銀行股，但要回到$57相當困難，你會否見議止蝕一部分轉其他高增值既股票？謝謝你

龔成老師︰

我地設計組合時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時銀行股，明顯係太多。你要沽出部份，轉至其他行業股票。匯控(0005)佢只係收息股，你唔好預佢有太大增長力，要上翻$57應該係有機會，但唔會係短期的事。

如果你唔想沽出現有持股，其實都可以。但你新資金，要先避開銀行業，去將個比重慢慢修正翻好。

至於收息股是否過多，要睇翻你年紀和風險承受能力。若你係年青人，收息股不宜太多。如果你較中年，可以升至2-3成。到你將近退休，就要至7成以上。

所以，你可以睇翻自己年紀和風險取態，去調整長線收息股比例。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22228：

老師，先多謝你回覆，我會溫翻課堂筆記，我仲有以下問題。

1. 暫時來講，令我放心，相對風險較少的潛力股是1448，同埋1177，以月供策略的話

2. 1297潛力度有1448穩定嗎？

3. 我研究緊1909，ROE達40%，5年平均EPS:0.336，5年取3年PE:12-20，合理價是4.032-6.72。

紿終業務是網上遊戲設計，風險比較大，現價3.08，雖然仍然便，但因風險大，宜月供。

相反327，5年平均EPS: 0.55X1.1=0.605
5年取3年PE:7-10
合理價: 4.235-6.05。

327的業務是做無接觸支付，業務相比1909穩定。但現價是8.93，價值偏貴。不宜大注，只能月供。

4. 345今日受到memo 事件影響令股價下跌一成，從基本因素上，是沒有受影響的，所以大跌理應是買入好機會，但維他奶高增長時期已過，

加上PE仍接近50，仍然好貴，所以不建議買入或最多只能月供，如果跌到20元才開始可以用分段增持？Memo事只是影響短期股價，對維他奶本質完全不受影響

5. 想問你企業評估表，收益和盈利有什麼分別？

6. 利息成本從哪兒看到？

龔成老師︰

1) 以月供策略，中生(1177)和福壽園(1448)有係一個唔錯選擇，可長線。

但始終佢地都係潛力股，就算再高質，都會有一定波動性，你要明白這點。

2) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。

現價其實有投資價值，但就唔建議太過大注。整體質素上，會係福壽園(1448)較好。

3) 火岩控股（1909）有質素的。佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。第二，股價上落大。

因此，你係估值時要較保守，你預現價合理區上部，投資值博率都有，但未算高。

而百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。但此股波動性風險，相對1909無咁高，估值可以上調少少，現價算合理區中上部。

其實不宜長線月供，只係適合一些好優質股票。如果要投資此2隻股票，只宜直接入貨，同時要控制注碼。

4) 維他奶(0345)短期股價一定不利，但長遠，我相信影響又未算核心性，不過好睇事情的發展，要睇管理層，以及事件發酵程度，仍有未知數，只可以話短期股價上落都大。

但此股質素上係有，佢過往一直略貴，但由於高質素，反而我地可以用月供去儲貨。

不過現價就唔平，大約為合理區頂至略貴，小注或月供可以，但回多1成投資會更有投資值博率。這股可長線的。

除非事件導致一些較長線的負面影響，否則此股值得長線持有。

5) 「收益」等同營業額，假設你係開糖水店，你賣一碗糖水係$10，個「收益」就係$10。

「盈利」就係扣除你當中一切成本(如人工、食物成本、舖租、電費等等)的淨賺金額。

6) 你可以在年報損益表中的「融資費用 / 融資成本」找到。

------------------------------------------------

Q22229：

老師，我今年30歲，現時持有以下股票:

6186 @20.35 4000股
914 @48.1 500股
241 @20.19 2000股
700 @600 200股
9618 @286.49 200股

270 @12.02 8000股
3067 @16.56 1400股
1448 @7.56 4000股
1810 @28.15 1000股
3331 @23.9 1000股

823 @60 500股
1398 @4.4 10000股

想請教老師，對於此組合，可否給予意見？是否可以守？ 有部份股票，如6186、241 帳面上已蝕20%，是否應減持？

龔成老師︰

你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持有股票，都係有質素，你照長線持有就可以。

中國飛鶴(6186)和阿里健康（0241）都係有質素，可長線持有。但佢地波動性略高，建議不要太大注。

另外，你現時30歲，應以增長為主。工行(1398)只係收息股，增長力欠奉，以你年紀不宜持有太多。

------------------------------------------------

Q22230：

我已經買下你幾本好書，但真的沒有時間開始閱讀，建議你可否把你的好書分level, 由BB初哥到高手呢?

還有我好愛港交所，但是是否好貴？幾時可以買一手入場好？建議下？還有什麼好抵的股票呢？

謝謝你龔sir

我真的覺得你幫我開發我50歲從逆境中走出來，充心多謝你，因為過往23年也一直都沒有人問津，一直蝕錢尤其股票市場上，做生意又差，又唔知怎樣開發公司生意，好慘！

雖然而家仍是逆境中，但公司每月都叫有收入及中小企貸款協助了我們過到難關，有小小希望

龔成老師︰

你可以先睇我架《80後百萬富翁》、《財務自由行》和《股票勝經》，較適合初學者。

之後，你可以再睇埋《選股勝經》和《年報勝經》。這2本會較仔細少少，講解企業估值方法和知識。最後，你才睇餘下幾本。

港交所(0388)由於有好高質素，故經常都係偏貴。現價算合理區頂至略貴，你可以考慮用月供儲貨，或現價小小注，你預回翻10-20%更有投資值博率。

我的答問，能幫到你就好。未來時間，就要繼續努力，讓自己可以走更遠。加油!

------------------------------------------------

Q22231：

老師你好，我其實一路都有密密留意你的Facebook, 特別是當股票跌的時候你便會出來穩定大家，我也是其中一受益人。

我今年將44歲，從事製衣業，估計去到年尾公司都要執，生意不好。

我有以下投資組合，請幫忙看看有否需要重整一下

5 - 423 股 - n 年前從153月供,現已停
823 - 500 - @92
1830 - 4000 - @8.8
1211 - 500 - @183.4
0003 - 約15000 - 月供
3690 - 100 - @283
669 - 500 - @101.9
9988 - 100 - @302

另外想問問2013 是否合適？

其實我知道老師有教導學生計股價的合理區位，但現實很多時股價都高過合理區位，那應該堅等至合理區位才入，還是怎樣去衡量那個位入呢？

龔成老師︰

你現有持股，都係有質素，你可以長線持有。

但我發現你有2個較大問題，第一，你好多股票的買入價，都係偏高。相信你買貨，都幾受市場氣氛所影響。

我建議你在未能定平貴前，最好用分注或者月供模式去儲貨，以減低入貴貨的風險。

第二，你而家太偏重左係潛力股，佢地雖然有增長潛力，同時風險都較高，不宜持有過多。

以你44歲計，潛力股可佔約3-4成，餘下應用以下平穏增長股。若你投資經驗較淺，潛力股比重，要再調至2成以下。到你學到一定投資知識，才慢慢調高。

但現貨不用沽出，用新資金去令佢平衡翻，咁就可以。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

至於買貨策略方面，我地係貴架水平，係唔會買貨，因為會影響長線回報。

但有部份優質股，好多時都只會停留係合理區中間，甚至頂位。係而個時候，我地就可以會策略性地入少少，或者用月供儲貨，以免錯失儲貨機會。

我唔係所有股票，都值得這樣做，要視乎股票質素和手上資金，去做一個完整的配置計劃。

------------------------------------------------

Q22232：

老師你好，本人今年30歲，每月收入36000，基本開支23000，餘下13000應該如何配置？

目標五年後達致140萬，現在現金有20萬，現持有股票如下：

175 1000股@24.75
9988 200股@209
788 32000股@1.17
2388 1000股@28.3
2845 200股@133
1833 300股@94

龔成老師：

其實好睇你的年齡、風險承受程度、投資目標，而我地一般進行人生財富累積，會用「先增值，後現金流」的方法。

你30歲，是財富增長的黃金期，可以著重「增值」，上述的股票都適合你的，你都可以長線投資，這些都是潛力股或平穩增長股。

現時現金$20萬，你可以留$10萬，餘下$10萬就投資，另外，你每月儲到$13000，可以動用$6000去月供（如果不想月供，就儲起先，久不久買入優質股都得）。

你可以考慮以下比例。

平穩增長股：潛力股
7：3
（如果你投資實力較強，可增加潛力股比例）

平穩增長股：指數基金。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22233：

龔Sir, 想問下你投資意見，我同老公都36歲，兩個加埋現金有110萬，我地本身租屋， 最近諗緊買唔買樓， 老公收入有7萬多，可買8百萬的樓，需要比1.1百首期。

我們有機會4年後移民去其他地方， 但我們找到有些盤睇好有升值能力， 例如近紅磡火車站的屋（有沙中線通車）或康城的樓。

但我記得睇過窮爸爸富爸爸寫買樓不是資產，而是負債。 如果有一間樓其實又要付厘印，mip, 管理費等等，個度去一舊錢。4年後走，我唔sure 我買的樓有呢個爆升能力。。

另一個方案就是唔買樓，用1.1萬投資在股票或其他野， 有的是流動性， 但同時一輸股票又係乜都冇。。

請問你點睇？

謝謝你閱讀及分享

龔成老師︰

其實買樓，表面上係開支，但只要係有質素的物業，我地都會視之為資產。因為你每月供樓，除了支付利息外，有一部份資金係還本金，等同儲資產一樣。

但由於係香港，買樓係一個大動作，當中買賣成本都唔細。而且，現時以租金回報率計，樓市投資價值，不及優質股高。

如果你係肯定4年後會離開香港的話，我比較建議投資在優質股，會較好。

當然，股市都會有風險，但只要我地認真選股，再策略性地投資。其實當中風險，已經會少左好多。

以你現時36歲去計，你可以投資「平穏增長股」和「潛力股」。

若你每月有一定閒錢，可以做埋月供股票，去加快財富增值。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有110萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你準備移民前1年﹐就要開始慢慢沽出持股。唔好等到走前一刻，才一次過沽貨，以減低價格波動，所造成之風險。

------------------------------------------------

Q22234：

老師，港交所我持4手，大約$350（2手），$480（2手），如果到$500，沽2手賺差價，再搵d錢去投資其他優質股，這樣做合理嗎？

另外想問，兢價時段，散戶可以買賣，對嗎？怎樣操作？

7月2日我見669 兢價時段大約$145，當時想沽，但又唔識點做。開市後，價位得大約$135，就無沽。

但覺得疑惑，兢價時段同開市價位可以差咁多?！

因為我手持388同669，佔我全部投資資金的7成（約有70萬）。所以想趁個市未大跌就沽一些先，但唔知咩價位沽好

龔成老師︰

港交所(0388)現時係升左唔少，但又未到好貴，我建議你維持持有，咁會較好。你想投資其他優質股，你可以用新資金去做。

競價時段，散戶可以買賣，就好似平時咁網上落盤。你會有分"競價盤"和"競價限價盤"，後者係指定價格範圍。

而前者，係無指定價格，所以有機會大幅偏離你心目中預期價位，你要明白這個風險。

競價時段，有時開價會偏離得好緊要，所以我一般唔會建議讀者用。最多只可用在一些大價股，如果係細價股，個波動會好大，太危險。

另外，記住我地投資唔好估走勢，無人知個市係唔係就快大跌。有機會係再向上升，你就升去增值機會。

現時港交所(0388)和創科（0669）係貴，但未到好貴。用平貴去衡量的話，其實未有減持需要。

但由於佢佔你組合比重太高，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

就算佢地現時是平定貴，你都必需減持，去平衡風險。但唔洗一次過沽到要求比重，你可以分段咁慢慢換碼。

同時，再用你新資金，去一齊慢慢修正個組合比重，咁就可以。

------------------------------------------------

Q22235：

Hi 龔成老師，我諗住今年年尾或者下年年頭買外地樓收租，要賣出部分股票套現。

我而家持有以下股票:
恆地 x 2手
港鐵 x 3手
盈富基金(月供5千) x 3156股
阿里巴巴 x 2手
QQQ x 20股
ARKK x 20股

請問你覺得我應該賣出邊類型股票套現？以上嘅股票得阿里巴巴係蝕錢。

同埋我而家每月用5千蚊供緊盈富基金，我應唔應該買樓前停供？

多謝老師付出寶貴嘅時間解答，你本80後千萬富翁好好睇呀，令我好有動力去成為有錢人。

龔成老師︰

多謝你支持我本新書!

首先，你唔好用佢現時帳面賺蝕，去判斷一隻股票。就算再優質股票，中短期都會有波動，係正常事。

你現時股票，都係有質素和適合你24歲年紀。因此，若你需要用持股套現，我建議你用平衡地賣出，咁就可以。

至於月供，除非你這$5000資金，都係需要買樓時動用，否則你維持月供會較好。

另外，你若打算投資海外樓收租，你最少要確認自已，係認識這項目，要堅守「不認識就不投資」這個方針。

如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你分析過後，覺得都有值博率，才好去入市。

------------------------------------------------

Q22236：

你好 龔成老師，近期突然留意到你個fb page觸動了我神經 啟發了我人生 開始想為自己打算一下 希望唔會太遲

本人 41歲 家庭主婦 要揍著兩個幼小孩非常捆身 只有儲蓄$hk20萬和5萬人民幣儲蓄的我每月少少支出沒有收入

現在開始有些少時間感到傍惶 眼見銀行錢越來越少又怕通帳 好想搵辦法滾大舊錢

我現在打算月供盈富$2000港交所$1000會唔會太冒險 我還有什麼可以做呢？萬分感謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你41歲，依然有一定時間，比你去做財富增值。只要你用正確方法，相信會得到理想效果。

以你年紀計，都可以用增值作為主要目標。你月供盈富$2000和港交所$1000，係有一個合適的配置。

但緊記月供係一個長線計劃，月供最少維持3年，並持有這些股票5年以上，才會有較理想效果。

當然，可以的話，最好一直持有。因為，優質股持有時間越長，財富增值效果就會越理想。

而人民幣只係貨幣一種，由於貨幣可以無限發行，長線只會貶值，唔係財富增值的理想工具。除非你有實際需要，否則你應換回港元，去進行投資。

另外，你可以用現有資金，去投資平穩增長股。

大市現處於合理水平，那20萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

另外，你要去多讀投資相關書本、年報，新聞和課程，去提升你自己的投資知識。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q22237：

老師，您好，我其實想月供2000元2800盈富基金，但好像最平都係渣打手續費每次50元, 中銀仲要每次100元，其他富途牛牛又冇，我供款少但手續費佔咁多，值得月供嗎？

但是儲三个月或半年一次過先買，謝謝賜教。

龔成老師︰

雖然月供手續費，係有點高。但作為初學者，我都係比較建議做月供。

因為，你現時無投資知識和經驗，對企業估值，點去定平貴未必會太了解。先利用月供模式去增值，可以減低買貴貨風險，對你而言會較理想。

當然，你自行按一個時間，去自已入貨，都係可以，同樣有月供的效果。但你要有自律性，同時要長期進行(最少供3年，持有5年)，才會有平衡價值波動的效果。

------------------------------------------------

Q22238：

你好老師，希望你能給我一些建議。
35歲， 有投資港股，美股，儲蓄保險

每月計劃: 2800(月供$3000) + 3067(月供$2000) & $5000 為美元存錢

目標：希望到2025年儲額外100萬

問題:

1. 我應該如何改善港股的投資

2. 每月有為年尾交10K左右保險存錢，有用這筆錢投資，差不多年尾需要賣掉一些股票來支付保險費- 這是一種錯誤的方法嗎

這是清單，計算包括股票利息:

小米1810 1,600 @24.07
阿里9988 200 @256.80- 虧錢
日清1475 5,000 @8.16- 虧錢
雷蛇1337 30,000 @2.39- 虧錢
港交所388 100.00 @196.30
HSBC 005 1,600 @62.66- 虧錢

盈富2800 513 @29.08- 虧錢
安硕科技3067 558 @17.778- 虧錢
電能006 1,500 @54.08
中電002 500 @79.80
煤氣003 2,000 @12.30

領展823 500 @75.00
置富778 3,000 @8.02
中銀3988 5,000 @4.00- 虧錢
iBond 4246 300 @100.00

正在考慮月供其他股票，例如700，1177，1810

謝謝你的幫助

龔成老師︰

1) 首先，你持股太多，雖然這些股票都係有質素。但長線計，你重點維持10隻左右，會較理想。

雷蛇(1337)不確定性較高，不宜持有咁多，建議沽少少，去平衡風險。

另外，以你年紀應以增值為主。IBOND主要係收息，唔適合你，建議沽出套現。

你現時月供組合係可以，你計劃新加的3隻都係優質股，但佢地都係潛力股，波動性會較高，以你年紀最多佔組合一半好了。

我假設投資回報有10%（連股息再投資），你每月投資$10000 + 現有持股50萬，4年後大約會增值至130萬，故這樣安排相信很大機會達至你的財務目標。

2) 保費方面，我建議你另外現金儲起去支付。因為優質股係要長線持有，而你這個方法，就等同短炒，是不正確的。

------------------------------------------------

Q22239：

龔成老師你好，想請教一下想財富更加增值應該加邊隻股票比較理想! 可否屆時inbox我~ 我怕miss左回覆~ 謝謝!

本人現時34歲, 有以下股票組合:

1. 中國銀行(3988) 4000股 ($2.71 x2000 + $2.79 x 2000)
2. 領展 (823) 100 股x $71.3
3. 盈富(2800) 800股 (之前月供股票，但現時停了)

每月可以有$3000左右騰出來(因一邊想儲多點現金平行)，以上的投資組合，是否應繼續月供盈富，或是先儲多一點再掃貨? 還是可加多一隻股票增值? 金沙 (1928) 適合我嗎?

謝謝老師!

如果安碩3067, 買幾多手可以長線持有? 謝謝!

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你34歲，應以增值為主，建議你用「平穏增長股」 + 「潛力股」作組合，去創造一個增值平台。

中行(3988)只係收息股，增長力唔明顯，不宜持有太多，建議不要再加注。領展(0823)和盈富(2800)都係適合你。

月供方面，盈富(2800)、 金沙(1928)都係可以，你可以先集$2000供盈富，或跟金沙各$1000。餘下$1000就儲起，等大跌市機會。

安碩恒生科技（3067）係潛力股，都合適你年紀。我地無話幾多手先適合，但因為佢係潛力股，有增長力之餘，都有一定波動性，故佔組合比重不可過高。

以你年紀，潛力股大約可佔4-5成。但若你投資經驗較淺，我建議2-3成好了。等你學會一定投資知識，才慢慢加翻大個比重。

------------------------------------------------

Q22240：

sir你好, 我係呢2星期先開始認識你, 有好多野想問

我40, 女性, 1個8歲小朋友, 一向唔識理財, 直至結左婚先開始學懂下理財, 辛苦儲左30幾萬, 衰左喺1間投資公司同微信女,

而家得返6-7萬積蓄, 有工作, 25000元, 但比10000家用, 同女家8成開支都係我比, 所以每月剩返嘅錢唔多, 想請教下有咩方法以令積蓄有穩定增長?

40歲人先得咁少積蓄覺得好慚愧

龔成老師︰

過去的事情，就當吸收個經驗，讓它過去吧。

現在開始正式做好投資，用正確方法，去累積資產。首先我地投資股票，就等同投資一間公司。

你必需要知道佢質素、行業發展、財務狀況、點賺錢等，才好決定是否投資。

現時你可以先做3件事﹐現價先入一手盈富(2800)，再回10-15%就再入一手，餘下資金就等大跌市機會。

另外，你要努力增加收入或者減少開支，令你每月有一定儲蓄，可以比你用來月供股票。

第三，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21241-Q21260）

Q21241：

致龔Sir，我是股票班舊生，感謝你的教導，開課前買了不少跟風炒作的新股，因為有試過贏，所以後來輸更多，完成課堂後，我就沽出沒有盈利及風險較大的B仔股止蝕，亦沽出了多年前跟風炒作，直至現在沒有盈利還大玩財技的股票，又沽出自己不懂分析的股票。

新股都是我長久以來輸得很多的類別，上課後才知這有如新樓盤一樣，能令有錢人決定售出的資產，一定貴，難怪輸多贏少。

順豐房託是我在未買就分析的新股，沒有抽新股，到現在還未持有的，我的分析如下，請賜教：

預計1.3億可分派利潤
發售基金單位：5.3億
股息率5.3％-5.9％
定價$4.98

計一計數
每股可分派約$0.25
除以股息率
估算合理價在4.23-4.72之間

雖然定價較高，但因應市況不境，還算克制，新上市即大跌一成半，證明老師所說的沒錯，股價終歸會回到合理價值

基金組合包括香港、佛山及蕪湖物業
可租面積30.8萬平方米，估值60億，出租率95.3％

2019年全年溢利1.74億
2020年全年溢利下降84.6％至267萬

集團解釋下跌主要受投資物業充值下跌及融資成本大增影響，但若撇除投資公允值變動後的運營溢利，則按年增4.5%；而同期，集團物業收入淨額，即租金收入扣除物業運營開支，則有2.16億元，按年升4.29%，增長平穩。

如果物業充值下跌只不過是會計上的估值，就應該不用擔心

展望集團在未來能透過收購併購壯大資產，或通過母公司順豐注入物業項目。

母公司順豐控股於中國50個城市擁有物業項目，規劃總建築面積440萬平方米，已竣工建築面積170萬平方米，大部分為物流綜合設施。單以後者計算，便相當於目前順豐房託可出租建築面積的5.4倍。

總結分析，派息不差，物業質素好，出租率高，幢憬未來併購及母公司注入資產，增添了普通房託缺乏的增長動力，由於未來發展只是估計，以現時資產，股價在約4元以較有投資價值。

謝謝老師看完我的分析，如分析有任何偏差及計算錯誤，請告知，定當虛心學習，進階班見！

龔成老師：

順豐房託基金（2191）質素都有，但又不是好強。

順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。

1. 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。

2. 佛山物業：為配備有智能技術及量身訂造的設施，如自動分揀及供應鏈支持設施。

3. 蕪湖物業：於2019年竣工的位於鳩江經濟開發區的現代物流地產。

比起其他房託，佢會更受經濟及物流業發展影響，因此會更加波動。以過往的數據來說，不差的。

投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。

我睇翻你的估值方法，合理，反映你已有一定的知識及明白課堂所講，我地估值時，最重要明白背後建基於甚麼因素推算，你估值的數，能反映企業價值。

而你表示展望集團在未來能透過收購併購壯大資產，或通過母公司順豐注入物業項目。這個因素將會長期帶動這房託的增長，但我地作為投資者，都要理性分析，這個情況將會怎樣發生，當中的可能性，收購的程度，到時2191幫母公司買物業，作價是否有著數還是只是正常價因素去發展，就這點，我自己不會過份樂觀，只會視這股為有質素，合理價的房託，而暫時增長力不會定義為好強。

其實你的分析不差，招股書有好多有用資料可以分析的，你可以再深入睇多D。進階班見！

------------------------------------------------

Q21242：

呀Sir, 請問你點睇00270 粵海投資呀？最近跌多唔少。投資專家睇淡。

香港人移民固然影響東江水少咗人用。但佢投資大灣區既projects 我又覺得可能一年內會升番

因為宜家我一手都冇，想趁低吸納，之後佛系式咁等升同收息。亞sir 你見解係？...

龔成老師：

粵海投資（0270）正面的，最近業績較一般，但從長遠來說，仍是有質素。佢主要因為水務以外的業務，影響左佢業績。

至於東江水，其實長遠仍是穩定的，不會大跌，當然，增長力不是強的類別，是平穩增長型。

這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

此股現時在合理區，投資時要分注進行。

------------------------------------------------

Q21243：

老師 本人係單親媽媽

過住二十年獨力帶大女兒根本無儲蓄 現女兒已出身每月可儲蓄大約2.5萬 本人一點投資知識都沒有希望十年後退休後有一千萬作生活費

現有現金十萬及每月可儲蓄2.5萬 想請教老師怎樣才可達成目標 本人今年47歲

龔成老師：

你現時47歲，在累積財富方面，可以以「平穩增長股」作為核心，到你10年後，目標是有一筆財富，再轉為現金流類別。

你可以考慮平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

每月月供$15000，餘下$10000儲現金，等機會投資。

每月$25000，一年$30萬，投資10年，如果假設回報為10%，你將會滾存到$480萬。

或者你可以增加投資年期，例如去到15年，就會滾存到$950萬，較接近你的目標。

又或者，你可以選擇加大金額，都是一個方法。

又或，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

------------------------------------------------

Q21244：

1810最近因投入大量資金造車，而造車像Tesla要10年以上才有回報，稍一不慎有機會虧本，趁高位而沽。用沽出的資金再買入其他較有潛力的優質股

本來也睇好，打算長線持有的小米，造手機及其他家电市場是有潛力的。但因把賺了的錢大量投入造車市場才引到担心影響業績，所以才打算沽出後換馬

龔成老師：

的確有你所講的風險，佢發展新業務，這一定會有不確定性，最後成功與否，無人知。

不過，如果成功，就會有倍計回報，如果你太著重這刻的回報，只集中睇眼前的分析，就會錯過了一些倍升股。

而小米（1810）佢過往的研發能力，產品定位，市場化的能力都很強，所以我對佢其實都有信心（當然，不確定性一定有）。

而我地投資者，如果要有倍計回報，就要有長遠眼光，在可承受風險的情況下，取得回報。

------------------------------------------------

Q21245：

老師你好，請問一下2269小數股東損益有$300萬這麼大負數。這個代表什麼？

是否這個負數影響2019年的每股盈利？

龔成老師：

我睇翻藥明生物（2269）2019年的年報，你所指的部分是「小數股東權益」，或叫「非控股權益」，2019年出現了$346萬的數字要扣除。

其實這個數並不是一個正式影響藥明股東的盈虧，你可以理解這是一些會計上，之前計多左，要扣除的數目。

------------------------------------------------

Q21246：

2238 的廣汽集團
2333 的長城汽車

都注重發展電動車
你認為哪一個企業會比較值得投資？

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

現價合理區頂，小注都得，如果想正式入貨，最好回少少先考慮。

其實兩隻都不差，而長遠發展，長城汽車會略好。

------------------------------------------------

Q21247：

你好老師,平時沒投資股票,有儲蓄$習慣.通常儲到一定金額去行銀買人壽一放就10年.

我返飲食行業留意近埋同事有投資,想了解股票慢慢令財富增加.睇左老師留言我月供盈富基金，

作為我返工10小時新手,好似老師當年睇好比亞迪一樣，

目標平穩增長又吾想單一月供盈富，我認同老師講法買股票是企業增長同業務，因為我新手想問去邊找到資料來做功課,從而分析企業選優質股

龔成老師︰

有定期儲蓄架習慣係好事，但儲蓄保險係財富增值角度，唔係一個理想架選項。

因為"保險"只係理財中防守部份，其實你買足夠保障就可以，增值可以留比優質資產來做。

而我地可以去決定一間企業是否優質，會從企業質素、行業前景、財務狀況等因素，多方面去作出一個全方位的分析。

相關資料，你可以睇翻公司年報、公司網站、財經新聞等地方找到。

盈富(2800)係包括55間質素不錯上市公司股票的組合，對於無選股能力的初學者，會係一個唔錯架選擇。

當然，如果你有一定經驗，可以慢慢創建一個適合自已的增值組合。但在現時經驗尚淺的時候，未懂選股前，先用盈富(2800)作為增值目標，會係較穏當架做法。

另外，你要記住，投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

長遠，你要懂分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21248：

老師好！我而家應該賣左結婚時D金器作股票投資用嗎？

龔成老師︰

我地先從黃金本質來分析，黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，不用佔財富比例太多(<3%)，而且持有的應該為實金。

如果佢佔組合太多，反而會減弱左你財富增值架效果。但由於"結婚金器"有點特別，它除左係黃金外，也存在金錢以外的意義。

所以，你係決定是否賣出用作投資前，除了從投資角度計算外，也要從金錢以外角度去作出考量。

------------------------------------------------

Q21249：

龔sir, 你好，本人三十多歲，月入$3萬，丈夫月入$7萬，收入穩定，由於過去十年投資比較保守，主要買入一些收息股票為主。如下：

港交所 2000股
領展 1000股
友邦 4000股
煤氣 1000股

讀了你文章後開始月供股票盈富基金、港鐵、恒生科技各$1萬。這些組合可以嗎？

但本人需要增長股的幫助，希望目標在五年內能買入多一層現時價$1200萬的物業作為自住，而將現住物業出租（貸款還餘$300萬）。

因為本人不知全數賣出現有股票去買$1200萬好，還是繼續買股票增值好，希望老師有時間回覆，謝謝！

龔成老師︰

若果你係打算3-5年後，才買入一個新物業。中間都尚有一段時間，可以利用用優質股作增值。到你要實行置業計劃，才慢慢分段沽出股票。

你現時持股，其實都係有一定增長力，而且都係有質素的。但有個較大問題，組合上太偏重左係港交所(0388)。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

港交所(0388)明顯係佔比重偏高，但而一刻唔需要沽出，因為佢始終係高質素。我地用將來投入架新資金，去將個組合慢慢咁平衡翻，咁就可以了。

你所講架月供組合，盈富基金(2800)、港鐵(0066)、恒生科技(3067)每月各$1萬，適合你現時情況。

其實這幾隻適合你的，有平穩增長股及潛力股（3067），如果你投資目標，希望增長方面加強翻，其實可以3067比例多翻D，不過，要留意恒生科技(3067)雖然優質，但同時都會有一定波動性，你要明白有這個風險。

另外，現時大市只在合理區，每月可儲蓄的資金唔好盡用。最好留有部份，等大跌市出現時，可以用來掃貨。

我假設投資回報有10%（連股息再投資），你每月投資$10000 + 現有持股(約值135萬)，5年後大約會增值至400萬。相信這筆資金，對你置業有一定幫助。

但緊記，在買入新物業時，股票最好唔好盡沽，必需留有部份，用作增值之用。

------------------------------------------------

Q21250：

老師，我而家30歲，頭幾年返工一直係月光族。而且，三四年前股票高位入d股票，點知買完一直跌，其後我又急住買樓蝕住賣套現，結果輸左好多錢。

我一直耿耿於懷，因為當時低位賣既優質股（700, 2318, 175等）而家已經升左好多好多，同時我買左層樓又樓價開始一直跌，我覺得自己好黑好灰心，近兩年我拒絕睇任何財經既資訊。

直至朋友介紹下認識你，買左好多本你既書，之後我決定要改變自己理財既心態，希望你俾d意見我。

1. 我想好好建立自己既財富組合，想係3年內有120萬，你覺得有可能嗎？

以下係我既財政狀況：
月入45k，供樓10k，家用及個人開支20k，每月最多可儲10-15k。

而家手頭有現金20萬，同大概9萬既股票
1177 x 4000
3319 x 500
823 x 3我200
1313 x 2000
7500 x 3000)

2.有無d現價合理又有潛力既股票？

3.我想報7月既基礎班，但會考慮有每星期一堂？

謝謝你既耐心解答，同時感激你既書令我有得益，我仲學習做一個有耐心既人

龔成老師︰

投資最重要是理性，你太過執著於過往，其實無意思，最重要是分析，這一刻怎樣建立一個優質、適合你、平衡的組合。

1) 以你現時情況，每月儲$15000 + 現有持股和現金(約29萬)。我假設回報率為10%(連股息再投資)，你3年後大致上會增值至100萬。

若你想達成這個120萬架目標，你就要加大儲蓄力度，大約提升至每月供$20000，才可以做到。

同時，你要明白3年唔算係一個長時間，中短期股價係會出現波動，影響你最終回報，你要明白有這個風險。

另外，你現時持股中，ＦＩ二南方恒指（7500）係反向追蹤恆生指數每日表現。當恆指跌1%，你就會獲利2%(另扣管理費)。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

增值策略上，你可以投資「平穏增長股」和「潛力股」。但「潛力股」由於波動性較大，所以你可較集中在平穩增長類股，至於潛力股，只宜小小注。

你每月5成儲蓄，即是用$7500做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

餘下20萬資金，可再投入多5,6萬，分注入貨。餘下資金和每月儲蓄，我地就等機會，當大市出現較大回調，就加大力度掃貨。

2) 部份潛力股已有輕微過熱情況，只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

但若然係做月供，這些潛力股都係可以。

3) 你預7,8會有機會有，你可以留意我FB公佈。

其實你過往投資架股票，都係有質素。但你在成個理財計劃上，出現左問題，令到成件事架效果事倍功半。

我建議你除了學好選股外，也要學好成個理財觀念，咁成個財富增值計劃的效果，才會更明顯。

------------------------------------------------

Q21251：

同埋好想請教老師你，納米盤如果四百幾萬係新樓但係得180尺開放式單位，或者可能最多得一房 200尺，呢啲盤好似上車容易好吸引

（因為只係比500,000左右首期，仲可以做九成按揭，又容易過到壓力測試）其實我哋應唔應該買入呢啲單位？

定抑或喺二手市場搵一個700幾萬嘅單位但係有兩房 五百幾呎，兩者比較邊一個更適合或者反而更化算？

龔成老師：

記住，唔好比「易上車」，吸引，這只是其中一樣我地的分析點，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

因為總物業金額、首期，並不是衡量物業平貴的核心。

因此，你要小心做功課，然後先決定是否投資。

另外，250呎以上的物業，一般投資價值較高，因為是一個基本家庭所需的面積。

如果以你上述的比較，二手市場搵一個700幾萬嘅單位但係有兩房，五百幾呎，會比該新樓較好（當然，你仍要作出比較）。

------------------------------------------------

Q21252：

老師想請教你剛剛見到你寫嘅文章，如果你話「真正的股災是在你想不到的情況出現，大家想到的股災就絕對不是股災」

如果照呢種講法嘅話咁係唔係你平時話價值投資嗰啲優質股都要放咗佢？

如果我哋等到自己預料唔到嘅情況突然之間出現股災咁連呢啲優質股都會瞬間貶值，咁係唔係我哋應該要早啲賣晒啲股票？連休即古都要賣晒佢？

但又好似有啲矛盾因為我哋成日話長線投資，唔應該短線獲利，

但股災又會突如其來出現？咁會唔會好矛盾？究竟應唔應該長線投資？定係短線獲利就要走啦？

需唔需要成日擔心會出現股災？
謝謝老師

龔成老師：

第一，股災無人能預測的，所以你根本做不到「預日賣出」這動作，因為無人知幾時真正大跌。

第二，股災其實是股價大幅下跌，這是指「股價」不是是「質素」。

如果一間企業有質素，股價下跌，根本不會影響到佢業務營運及企業發展，因此只是一個表面因素，對我地的核心財富，往往只是中短期的情況。

因此你唔需要太過擔心股災，只要持有的是優質股，企業運作正常，在長期角度，股災對佢無乜影響的。

------------------------------------------------

Q21253：

想問吓老師心態嘅問題
例如美團3690

剛開始睇嘅時候4XX最高位
跌下來365元入第一注
之後跌倒2XX

其實應該在跌時候溝貨（有預留資金）還是應該升返320多的時候止蝕離場。

我選擇咗後者，重新檢視返個組合同埋比例，因為如果再繼續加注會去到成個組合嘅30%

龔成老師：

首先，一定要睇企業質素，如果無質素，就不會加注，同時不值得佔組合比例太多。

第二，我地會分析平貴，如果美團（3690）在$280仍是貴，當你在$365買入，而佢現時跌到$280，你都未必值得加注，因為你本身已有一定的貨，再買入時就應該以較平或合理翻D的價位先會考慮。

至於上翻去是否離場，其實要睇翻這股佔你組合的比例，如果佔比較多，而佢上翻去時又已經貴，其實應該減持部分。

其實，一隻股票佔你組合15%以下會較好，去到30%已經是較多的水平。

------------------------------------------------

Q21254：

你好，我有意換樓，近來都有人睇樓，但本人願意出售的價錢比估價高3～4%，原因本單位有景有裝修，放售約1個月，請問以現時市況，我應該堅持，或減價加快放售呢？請俾俾意見，謝謝

出售樓：估價502萬，九龍灣區
換樓目標：750萬，何文田區

HKG:9988 阿里巴巴－ＳＷ 100 @$190
HKG:9618 京東集團－Ｓ 50 @$330
HKG:1833 平安好醫生 100 @$96.5
HKG:6618 京東健康 50 @$72
HKG:9992 泡泡瑪特 200 @$39

HKG:0522 ASM PACIFIC 200 @$111
HKG:3067 安碩恒生科技ETF 700 @$18.6
HKG:0823 領展房產基金 400 @$67.55
HKG:1299 友邦保險 200 @$66
HKG:0636 嘉里物流 500 @$23

另外, 上面係我在2020年4月開始建倉, 本人可以相對高風險, 請問是否有野要執呢?

龔成老師：

如果九龍灣區，應該有一定的質素，加上現時香港樓市其實唔算差，你唔需要太急去減價賣。建議你找多幾間地產代理代，幫你放盤，等多D客去睇樓，我相信當你貼近市價時，要賣出不難的。

如果你目標價想比市價高，就以這價開多1、2個月，睇下市場反應，之後再慢慢減價。

另外，何文田區都是有質素的地區。

你上述持有的，都是有質素的股票，基本上都可以長線持有。雖然潛力股部分有少少多，但不是過多，同時有質素問題不大。

嘉里物流（0636）你原有貨持有就得，但就不要太心急加注，因為近一年升左好多，股價較波動。這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

另外，Pop Mart泡泡瑪特（9992）暫時不宜加注，佢是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

整體而言，這企業都有質素和發展前景。睇佢數據，過往幾年增長唔錯。

但始終是新股，參考數據唔多，未來能否一直維持咁高增長，要有待觀察。所以投資時，我地要保守D，唔好太進取。

現價貴，但有潛力，你持有就得。

------------------------------------------------

Q21255：

老師我見到你上左去富途果度做節目，我自己用過幾日就del app因為果個完全係一個為短炒既人而設計既apps真係會害死人。

但我絕對理解同埋明白你叫人月供盈富基金既目的，係對於完全冇投資知識唔識選股既人而言真係一個幾好既選擇。

我都明白價值投資法係香港推廣係好難做，特別而家市場上既股評人都係技術分析為主導。但都希望你可以堅持落去

都好多謝你出現左係我人生入邊，你同埋另一個價值投資法既股評人(洪龍荃)都真係幫左我好多

特別學習估值/分析企業方面，你地兩位有好多投資理念都90%接近(當然佢可能因為基金經理真係進取好多)
另外larry其實佢係佢一個收費既理財教學節目都有建議初學者月供股票

佢都有建議月供盈富/煤氣或者買一D有質素既ETF，佢話當年屋企人都係因為月供股票，然後慢慢幾年後發現D錢竟然夠買層樓既首期。(如果有需要可以share條收費片比你)

而未來港交所亦會更加進取，會放更多有高增長既成份股入恆指，令盈富基金更有升幅。

我最近呢一兩年都不斷用價值投資法去影響我屋企人同埋身邊既朋友

希望佢地謝絕短炒同埋技術分析。
我都希望你可以繼續努力將巴菲特既投資理念推廣出去
如果有人質疑你既，你叫佢show個持倉成績出黎比較下就OK~

龔成老師：

其實，價值投資法一向是最賺錢的方法，你見全球全賺錢的人巴菲特，以及一些出名基金經理，都是用價值投資法。

不過，就算這方法已經是最賺錢，但香港散戶，仍是集中在短炒，因為佢覺得短炒會好快賺到錢，但事實就不是。

有錢人始終是少數，就是一般人的知識有限，明知有一個賺錢方法/但都唔會用。

其實，我一向都好明香港人心態，一般散戶唔中意價值投資，中意快，所以，價值投資一向在香港都唔受歡迎。其實我無乜所謂，做左要做的現財教育就得，至於散戶是否聽，就是佢自己的決定。

大家加油！繼續做好自己就得！

------------------------------------------------

Q21256：

1.運用老師上堂教的，自己嘗試計美圖（1357）的估值，大概合理範圍$2.37-4.29,這樣的估值合理嗎？老師認為合理價又是多少？

2.美圖（1357）主要收入是否廣告牌和高級訂閱？佢好似已經過左最壞時期，這股潛力好嗎？值博率高嗎？

3.見佢2018開始投資活動現金流都係正數，係咪姐係佢冇再投資發展？咁佢算唔算係水桶1？

另外睇到佢2016損益表有項（其他項目公平值變動及減值）係5606109（k¥), 令佢果年既股東應佔虧損6260880（k¥）,e項究竟點解？

龔成老師：

1）+2）美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

至於估值，坦白講，我未深入研究，同時這企業業務變化大，過往持續虧損，但見佢開好有正現金流，因此預期向好，但估值難，如果業績向好，估值可以好高，但如果差，估值都可以大跌，因為這刻的財務數據基礎不足，無盈利令到估值有好大不確定性。

3）至於投資活動報表，我睇翻只是一些定期轉換問題，其實與之前無太大變化，因此仍是有投資的。

至於損益表，我睇翻佢當年的資料，該項目為「可轉換可續回優先股」而出現虧損，而這你可以理解是一些會計上的項目，不用太過擔心，我地分析時會集中在營運上的盈利。

------------------------------------------------

Q21257：

Sir，我係你舊生，我以590計算,2015至2018中間四年市盈率為6.99-18.26, 以平均盈利在過往近四年（2016-2019）是1.97

咁我是用行業市盈率11至14定還是調高少少？

我仲係唔係好掌握到，點樣推算隻股票合理市盈率
望指教

龔成老師：

由於佢的市盈率範圍好闊，這反映市場對佢估值分歧較大，所以當運用6.99-18.26市盈率時，會較為小心。

因為太闊即是參考價值會低左，我地未必能視為好有代表性的數據

因此，會同時運用行業的市盈率，配合佢自身市盈率去運用。

你預六福（0590），如果去翻正常經營環境，大約有代表性的盈利$1.8-$2.0，可以作為參考。

至於市盈範圍，大約9-13倍都可以作為參考。

因此，你預$20是這股的合理區中間左右。

------------------------------------------------

Q21258：

龔sir,想請教一下，本人今年45歲，剛剛由於私人理由辭職，現況：

物業：第一幢剛賣出，取回現金約600萬
第2幢自住，7年前買入價1400萬，現約值1600萬 （按揭尚欠650萬）
第3個為澳洲物業，買價約為350萬，出租中，沒有按揭，每月租金約為8500）

股票約值：220萬
現金：650萬 （包括第一幢賣樓所得）
MPF: 現值110萬

現考慮移民，希望利用以往獲得的資產，在外國用低成本享高質生活，龔sir 有什麼建議？賣樓的600多萬可以如何善用（若移民可取回MPF 的110萬）

第二幢亦在放盤中，但比較難賣，若出租可能收月租大約30000左右。在外國亦在考慮應該租還是買樓？

龔sir 有何建議？可以如何善做配置？我是否應該留香港多幾年賺多些錢才可以去外國過半退休生活呢？

龔成老師：

你到外國初期，不用太心急買樓，可以租住外國樓先，等過幾年，睇到時情況及需要先決定在當地買樓。

至於現時的自住物業，不用改變狀態，可以先放租，令你得到租金方面的現金流。

至於$600萬，建議你投資物業以外的資產，並建立一個更平衡的投資組合。你可以將這$600萬，分成5部分。這些都是較低風險，著重現金流類別，相信較適合你過半退休生活。

第一部分投資收息股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21259：

即係0016繼續keep住，定係咩位放咗佢好？
因為我都屬於新手，多多指教

同03380呢隻點睇？

龔成老師：

新地（0016）仍是有質素，當然，增長力減少左，預期佢中短期都是弱，不過，這股是睇長線及超長線的。

佢較多業務在傳統經濟，增長力一定不強，但不是無質素。是平穩增長類。投資收息及少少增長，可以。但就唔好對股價有太大期望。

如果你追求平穩增長，這股可持有。

龍光集團（3380）都有質素的。

佢係中國一家於粵港澳大灣區住宅市場的一體化物業發展商，並發展長三角核心都市圈及西南、中部城市等區域。

主要於中國從事物業開發、物業投資、建築及裝飾以及一級土地開發：物業發展分部開發、物業租賃分部、建築及裝飾等。

過往業務發展不差，生意與盈利都有增長，不過負債就少少高，略有風險。這股都有長線投資價值，你可考慮，不過，由於佢同新地都是地產類，你不宜過份集中。

------------------------------------------------

Q21260：

龔sir你好,我有個問題想請教一下你,澳門供緊樓貸款餘130萬左右,每月供9千,

現金80萬左右,每月可存1萬,這狀態下,好唔好係大陸珠海香洲供個單位好?

龔成老師：

唔建議太急去集中物業。

我地建立財富組合，最重要是「平衡配置」，例如建立一個股樓平衡的組合。

你現時有物業，之後的配置，可以先考慮股票，等股票有一定的數量比例後，之後再投資物業。

至於珠海地區，有質素的，是大陸其中一個有長遠發展力的地方，如果找到一些交通配套等都不差的物業，日後都可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20861-Q20880）

Q20861：

龔sir你好，係你嘅書同你嘅fb我都學到好多野，股票問題上亦都解答我很多問題，但我今次想問的問題不關於股票。

我知你的EQ很好，我想問下你係如果訓練的？

我今年29嵗，在工作上，待人處事有時會受到很多委屈，當然亦會有時候受不住氣而爆發

事後知道很無謂，亦都無補於事，甚至會令事件更差。我知道自己EQ不是太高，想問下如果可以提升EQ?

龔成老師：

我地最重要是「做好自己」、「做正確的事」。

我大約10年前開始在網上發表文章，及接受傳媒訪問等，第一次接受傳媒訪問，就是講自己怎樣利用儲蓄投資，成功滾存到$100萬。

我當時真心教人點儲$100萬，但部分網友的留言卻是負面，例如「佢一定無比家用啦」「佢一定講大話」等等。

最初會想，我是否講錯D咩？

但好快我就明白，這個世界，原來有好多種人，無論我做得點好，都會有人不喜歡，都會有人為攻擊而攻擊。

因此我明白，我不是為其他人而活，我不用因為佢地而改變自己，這些人只是少數，我只要做好自己，行正確的方向就得。

可能你在工作上，都有不同的委屈，但你都要明白，有些事是你控制不到的。正如我第一次做訪問，網友話我「佢一定無比家用啦」，其實我是有比家用的，只是我在訪問無講。

唔通我講每一句說話，都要加10000字去補充，避免比人攻擊嗎？

其實，你只要做好你份內事就得，好多野你根本是控制唔到，亦不值得花時間去做每一件無謂事，同時，亦不值得你出現情緒問題。

好多時，別人點去想，我地控制唔到，與其花時間處理這些事，不如做好自己，你只要對得住自己，做事正確，就無問題。

------------------------------------------------

Q20862：

龔sir，我現有資產：
恒基 (00012) 1000股@27.65
長江基建 (01038) 500股@40.05
中銀 (02388) 500股@22.05
阿里爸爸 (9988) 100股@246.40
舜宇光學 (2382) 100股@146
中生製藥 (1177) 1000股@6.9
平安好醫生 (1833) 200股@95

月供 銀河(00027) & 港鐵(00066) 各$2000

另外，現價$360多萬細價樓

目標：
5年內基本財務自由
10年內退休
每月$30000現金流

1) 對呢個組合有咩意見？

2) 想重新配置，集中2隻潛力股長期分注買入，邊2隻最強更值得長期持有？或者點做會更有效達標呢？

3) 月供
港股：打算加多2隻共$5000，例如$2000 港交所 (388)，有咩好建議？

龔成老師：

1）現時你所持有的股票，都有質素，都是平穩增股+潛力股，你長期持有就得，無問題的。

至話月供股票，都是有質素的。

物業、股票，選股，基本上都平衡，你方向正確的。

2）如果你想5年有基本財務自由，可以加入恆生科指ETF（3067）你可以月供或自行分注都得，提高你組合增長力。

3）可考慮月供小米（1810）或舜宇（2382）。

------------------------------------------------

Q20863：

老師，請教一下，我的股票組合可以嗎：

823、1830、1833、1928、2845、3067、9988

有什麼需要加入或調整？我聽老師講買入一些優質的股票諗住長期持有等收成。

我36歲，是單親媽媽，小朋友今年已17歲。打算於網上嘗試做些小生意。現在的股票是資產的40%,

每月慳d大概有10000 可作股資，股票方面我應該點做先可以有比較好的回報？我想比個仔出年去外國讀書，謝謝老師。

龔成老師：

組合可以。

這些都是有質素的股票，都可以長線投資。不過，以現時你的家庭負擔情況，唔建議你投資太過進取。

你原有貨可持有，但之後應加翻D平穩增長類股，例如盈富（2800），令你組合潛力股比例減翻少少。

另外，如果你打算比小朋友去外國讀書，要計好所需資金，留一筆資金不要投資，餘下先投資。至於投資的類別，你之前的方向已正確，你可以加翻2800去平衡就得。

至於網上生意，當然可以，可以試，試完先知有無得發展。

------------------------------------------------

Q20864：

龔sir 你好 最近股市係咁跌
我手持的股票都是向下跌的趨勢
我想問下龔sir 我係繼續持有 還是要沽出轉比較有質素噶股票？

1357（美圖）4.2 （8000股）
726（築友智造科技）1.2 （20000股）
2148 （Vesync）23.5（1000股）
6690 （海爾智家）33.6（1000股）
419（華誼騰訊娛樂）0.63 （20000）股

1177 （中國生物科技）8.8 （10000股）
1530 （三生製藥） 9.1 （3000股）
1050 （嘉利國際）1.92 （50000股）

呢個投資組合其實已經出現左10萬虧損 心好慌 我現在手上係沒有現金流 龔sir 覺得我應該沽出邊d無質素股票去獲取現金流 然後等機會投資有質素噶股票

龔成老師：

最重要是睇企業質素，不是短期股價、賺蝕，或自己的買入價。

築友智造科技（0726）質素一般般，不建議持有太多。
華誼騰訊（0419）風險高。

嘉利國際（1050）質素中等，但不算差，只要不過多就得。

美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

至於其他，持有可以。

------------------------------------------------

Q20865：

龔成老師你好！近期市況波動，雖然老師你話唔駛理短期價期，但我手上有唔少蟹貨，大跌得好緊要，所以都好擔心。

916 龍源 $13.37
3319 雅生活 $36
9633 農夫山泉 $59.7

想問呢三隻股是否優質，前景如何，可否長期持有？

短期消息利淡916嘅，應該點部署？

另1830 必瘦站，$4.97有貨，高追咗，駛唔駛溝下貨？
謝謝

龔成老師：

上述的3股，都有質素，你可長線，但你不用太著重短期因素。如果見到短期利好因素就追貨，短期不利因素就賣出，你的投資成績將會很差。

你要著重企業的長期價值，當一個消息出現時，要分析，對該企業有沒有長期性的影響。這3股你都可以長線，但就唔好心急加注。

至於必瘦站（1830），你買入價略貴，有貨可持有，但就唔好心急加注，暫時仍貴。

另外提翻你一個觀念，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

------------------------------------------------

Q20866：

老師 想請教你
我差唔多40歲
原本幫朋友睇住間小食店

佢最近想唔做 講會比我頂
點知到我貸到款 佢先講 唔會比我頂
所以我宜家有廿萬現金 不過就要煩每月還款

因為一d原因 我先前嘅所有積蓄已經冇晒
所以宜家借左舊錢 不過又冇得做生意
黎緊仲要諗搵工 不過搵份工 又未必夠還款

我新借左22萬 再加先前嘅貸款
宜家每月要還大約15000一個月
分5年 0.4% 月平息

請問我應該用呢舊錢買股票嗎？
定投資其他嘢會比較好

多謝老師時間！！
另外期權可以考慮嗎？

龔成老師：

坦白講，如果你這刻處理得唔好，會好地地，變成了債務持續滾大，如果你之前的投資經驗不太多，建議你不要投資，或只投資收息股。

現時你無工作，但又負債，如果用左筆錢，你會忽然多左筆負債。

如果可以的話，當然是還錢。但如果不能提早還錢，可考慮部分收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

至於期權，要較高技巧的，同時我之前做銀行同證券行，見D客玩都是輸的佔絕大部分的。

------------------------------------------------

Q20867：

龔sir 你好 我以前曾經買過股票 不過當時完全咩都唔識就亂買 係賺左 但最後都輸番曬 我自己日常經濟壓力都勁大

但都想做投資為將來做保障 但你出左好多書 我早前去書局找你既書 都無從入手 有d好似好深 我太新手 怕買左唔識睇又浪費左

有冇邊本書可以比我由淺入深 慢慢學
謝謝你

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

------------------------------------------------

Q20868：

你好，如果投資20%落BRK.B，算不算多？

多謝你細心為各位做心理輔導，見你每次大跌市都出文，其實大市回10%好正常，就如大市可以升10%一樣，只要跟策略及風險管理行事，在加上手上留有現金，真不是一件大事。

我打算留現金，等9988回到$210, 等1038回到$41,等1928回到$33,如果不是，都想留現金，減少交易，看中加肯定先出手

龔成老師：

唔算多，因為BRK.B是一個組合，因此不會有集中風險，加上長遠有增長，所以無問題。

對，股價上上落落好正常，我地最重要是平常心面對。重點不是短期股價，是企業的長遠發展。

你照你的策略進行就得。

你的思維方向正確，只要執行就無問題。

------------------------------------------------

Q20869：

我今日已套現0066二千股，會逐漸減持轉到潛力股，我見你話1211仲未到全爆發期，心大心細想入手

可否分享你現持有的股票組合嗎？除了1177，1211，1448。多謝老師

龔成老師：

比亞迪（1211）雖然長遠仍有增長力，但這刻投資的值博率不足，所以，這刻始終唔太建議。

或者可考慮：GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

至於我的組合，講少少，仲有小米（1810）、必瘦站（1830）、金沙（1928）。

------------------------------------------------

Q20870：

老師你好，我最近係高位回落少少個陣入左2319蒙牛（46.9 2000股）同 175吉利（29.55 2000股）
之後跌左

我仲擔心緊蝕左2萬多，
岩岩睇到老師你有分析蒙牛

想問下我係咪唔應該依家入手去溝貨，
呢兩隻2319同175就咁長擺啊？

龔成老師：

蒙牛乳業（2319）有質素。

佢於中國從事乳製品生產及經售業務，乃中國領先的乳製品生產商之一，以蒙牛為主要品牌提供多元化的產品，包括液體奶（乳飲料及酸奶）、冰淇淋及其他乳製品（如奶粉等）。

無論品牌、銷售網絡、發展，都不差，長遠正面。這股有長線投資價值，不過現價就唔算平，你買入價略貴，有貨可持有，不過唔好加注。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區頂，股價波動，有貨可長線，耐心持有就得，但你預佢股價都會幾波動。

提翻你一個概念，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

------------------------------------------------

Q20871：

老師，想問下3838和1478有投資價值嗎？可以長線持有嗎？

龔成老師：

中國澱粉（3838）主要從事製造及銷售玉米澱粉、賴氨酸、澱粉糖、變性澱粉、玉米製副產品及玉米深加工產品。

近年的生意都有增長，不過盈利就唔算強，同時有少少波動，反映佢都受成本等因素影響，產品價格自主力唔強。

整體企業質素，唔算高，但未算劣質。

現價雖然合理，但投資值博率唔高。

丘鈦科技（1478）這股之前好波動，其實呢隻股本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

佢雖然有技術，但賺錢能力相當不穩。當環境逆轉，手機市場轉弱，這企業就成為較大影響的企業。

整體來說，不過不失，波動是這股最大的風險。如投資這類股，不能太大注。

------------------------------------------------

Q20872：

好多謝你的耐性解答令我有免費個案參考（亦覺你好叻及唔只專注係錢眼上，反而有用心教導讀者令其係人性的進步）

現請教：1）請問之前700@671應點佈局？[email protected]至今無放？

2）另我以前專注買銀行股（中行，建行，交行等等）和2800（因覺點跌都唔會變墙紙）睇返自己2006至今的記錄，發覺你推介的有些比當年價仲低（唔係質疑請唔好誤會），我無掛有至口，若持有至今咁點資本增值？

3）我都有重損手過就係857（諗住國企點都唔會死又高息，好在當年輸咗多都舍得放棄），咁宜家中芯有大唐支持，又信得過嗎？

4）我持有巴巴係手舊年16/3入@179，持有至今基本上若無跌穿上年我會再持有及增持2/3/2021@229（算高入但後市無人伖），我應長線定短期有賺就走？

因好多新聞及資訊都話會再調整去到26000-28000，所以雖想長線但亦想短線走再更件價入，若短線睇幾錢？

5）我有小米@24.5係入的，長線定走左再等兩低價入？

6）我想入941和66各應幾錢？邊隻更好（我已中年想用這兩隻作為退休收息及資本保/）增值 。

7）我如果設700@1千止賺會否太進取？

我係反向思維去買股，所以手上都係新經濟股多（因我中長線），以前未知有你無睇到，宜家覺自己會否太冒險，我都有比亞迪@205，應搵位止賺定真的長線？（平時工作忙所以我極少短炒），thanks a lot！

龔成老師：

1）你長線投資就得。這股有質素，我地不是買賣賺差價，而是成為你財富組合一部分。你買入價唔算平，但可長線，不過唔好心急加注。

2）因為你無建立一個平衡的組合。其實銀行股自從金融海嘯之後，增長力已不強（我當年在銀行工作，明白佢地的賺錢能力大減，現時已回不了過去好賺的情況）。銀行只是收息股，你唔應該買太多，同時唔應該對股價有太大期望，因為佢只是收息。

如果你想組合有增長力，宜將部分轉其他。

3）最重要是睇佢本身的業務，有無支持只是一些輔助位。

中石油（0857）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資。

4）阿里（9988）將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

如果有貨，可持有。

其實，你唔需要理會太多短期因素，唔需要理會太多所謂「調整到到幾多點」，唔好信！

5）小米（1810），有質素，你買入價約在合理區頂，你持有就得。

6）中移動（0941）同港鐵（0066）現價合理，你可分注投資。

7）唔好太預測目標價，無意思。

同時，你以「幾多價位止賺」的心態，證明你與90%的散戶思維一樣，停在現金概念，而有錢人是不會這樣想。建議你增加知識，例如睇《股票勝經》《財務自由行》。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20873：

龔成老師你好，很高興認識你，最近也follow你的Facebook，上星期也剛剛買了你的書《股票勝經》、《80後百萬富翁》、《50優質潛力股》，正在開始睇第一本，遲啲抽時間去上你嘅堂，好期待。

本人是一名家庭主婦，今年39歲有一個兒子，一家三口，大概在兩年前學人哋買股票，因為對股票嘅唔認識，所以朋友叫買邊隻就買邊隻

就係因為咁嘅情況底下，投咗60萬落去，一年前蝕咗15萬，本來打算以後唔再買股票，但係諗諗吓啲錢擺喺銀行又冇乜利息，唯有膽粗粗再試下，又將啲錢買落股票度。

我將45萬買咗以下股票：

00066， 2000/@44.88
00823，1000/@72.97
01177，7000/@8.38
01810，2400/@27.48
01833，500/@108.86
02800，500/29.08
03067，500/18.01
06618，50/@137.2
00700，100/@66000（另想賣掉騰訊換取2手01024可以嗎？還是保留住）
龔成老師以上組合需要調整嗎？

只得我老公一個人返工，除了家用外，現時每個月剩餘大概5000-8000可以投資，那我應該加注以上那隻股票？又或是要加多幾隻新股入嚟呢？

另外想問龔成老師，我目標想5年後有120萬，能夠做得到嗎？我還有那些需要注意的，麻煩龔成老師指點一下我，麻煩你，感恩認識到你。

龔成老師：

現時你持有的股票，都是有質素的，你長線持有無問題。不過，醫藥相關的股票，佔了一定的比例，你唔好加這類住，要建立一個平衡的組合。

騰訊（0700）可長線，但你預佢中短期會較波動。

如果你每月有5000-8000，以你的年齡，可投資盈富（2800）及恆生科指ETF（3067），可以2800$4000、3067$2000，大約的比例是這樣，你可月供或自行分注投資。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時39歲，財富仍有增長力，只要唔太進取就得。如果想5年後滾存到$120萬，要加大每月儲蓄投資先得。

------------------------------------------------

Q20874：

想請教一下，我有部分股票，你認為可以一直長揸嗎？這是好的企業嗎？

6066 $12.26
881 $53.6
968 $19.6

1316 $13.1
909 $48
175 $28
1833 $122

龔成老師：

基本上都是有質素的股票，可以長線投資。

中信建投証券（6066）係一家在中國的綜合性投資銀行。

佢主要業務包括四個分部：
（１）投資銀行業務
（２）財富管理業務
（３）交易及機構客戶服務業務
（４）投資管理業務

業務的生意與盈利都不差，長遠有上升能力，但未必是大升類，同時業務會受投資市場影響，有風險，整體質素算是不過不失。

這股都有長線投資價值，但就唔建議投資太多。

耐世特（1316）本質中等，之前業績有點弱，但又唔算好差，之後會好轉翻。

股現價合理，但就未必值得投資太多，因為質素始終不強。但相信之後能平穩增長。

至於其他，無問題。

但我見你有幾隻都是用汽車有關的，你要注意翻行業集中風險，同一行業的佔比最好在30%以下。

------------------------------------------------

Q20875：

龔sir，我真係好迷惘，計極都極唔掂條數，我又唔知可以同邊個講，幫我解決問題！

我月入22K，岩岩買左樓要開始供樓，借左銀行400萬，借左屋企80萬，每年保險4萬。開始月供股票2000.

每月支出
供樓1萬
家用4千
儲蓄3千
月供股票2千

計到呢到我已經唔知點計落去，儲蓄嘅3千其實係草黎交保費，根本已經屋企錢還唔到，私人儲蓄都做唔到！我真係有諗過放晒現有嘅股票，起碼都有11萬左右流動資金係手！

龔sir,我應該要點做！我係咪應該要放晒d股票！

龔成老師：

你賣晒D股票，變做現金，點增值？

你現時持有的資產有物業及股票，其實你都正在財富增長中。

當然，有一定的現金在手都重要，所以，現時你要盡力儲到基本的現金，等現金數目去到基本狀態後，就不用太擔心。

第一，想方法增加收入，兼職、小生意、網上生意等，要想方法，不要停在原地。

第二，減少支出，盡你更大努力去減少支出。

第三，尋找長遠增加收入的方法，你現時$22000，要想想在長遠，怎樣更進一步增加收入，轉工、升職、發展副業？

第四，如果上述幾個都唔得。就停止月供股票，等你有基本的現金在手，之後再開始翻月供。

------------------------------------------------

Q20876：

龔sir您好， 唔明點解968信義跌得咁勁。光伏業我分析是一個前景好好的行業，各國都倡議轉用環保能源

再加上前日發表財報都是好好，但無奈就是發表財報後就大跌（最近我留意原來有好多公司發表完財報，業績好，但係股價都係會發報完之後跌，真係唔明）。

我自己仍然睇好呢個行業，本身$18.6有2手，我應唔應該依家低位買多1手？多謝您的時間

龔成老師：

其實你唔需要太在意中短期股價，信義光能（0968）整個版塊，近幾個月炒得好勁，1年間升左3倍，就算大跌，都非常正常，所以，我地要懂得計企業價值。

當佢貴時，就算有少少不利消息，例如政府投資行業的力度比預期低，都有機會令股價受壓。

例如一個行業，前景正面，生意將會增長2倍，但股價升左4倍，如果股價要大跌，都是十分合理，但這大跌絕不代表行業有問題，業務發展仍是十分理想。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，你有貨可持有。如果加注，跌多15%先考慮。

------------------------------------------------

Q20877：

想請教一下
現在股市波動 手持以下股票應增持溝貨嗎？

小米 27.5
2013 29.4
1337 2.9
3800 2.9 3.08各持有
3311 5.6
謝謝指教

龔成老師：

現時持有的股票，基本上都有質素的，可持有，不過，你較集中在新經濟股或近期的焦點股，其實長遠應該調整翻個組合。建立一個更平衡的投資組合。

加上現時你手上的股，大多只是處合理區頂至略貴，因此，未是加注時間，除非你資金較多。或者等佢地回落多15%先考慮。

而雷蛇（1337）、保利協鑫（3800）唔建議持有過多。

------------------------------------------------

Q20878：

老師，想問關於買賣策略的問題。

現時大市已經有少少降溫，但又未到平。
但有啲個股又出現值博率。

所以依家係咪都可以入啲有值博率的企業？但又唔知大市會否大跌。

之前係合理和便宜買落的股票唔會放，仲有空間加倉，但又未跌到便宜區。

我現時現金有3成，都想儲少少新經濟股的貨，但唔打算滿倉。

我這個方向正確嗎？

得3成現金，但想儲多少少有值博率的貨，咁樣會唔會太大風險？

龔成老師：

首先要睇你新經濟股的比例，如果這類股比例較少，而你又想加翻D，可以，之前這類股貴，現時合理區頂，適當加翻其實都可以。

而你3成現金，都可以動用部分，但唔建議用太多，始終現價唔叫平。

你的方向正確。只要小心選股，小心運用資金，同時留有一定的現金，就可以。

------------------------------------------------

Q20879：

老師，最近真係好驚，不過就練心理質素。重組後，持股如下，老師有何意見？

比瓦迪$252.3x1000
蒙牛$44.725x2000
阿里巴巴$248.7x300
藥明$114.1x1000
海爾$32.55x2000
潤啤$66.7x2000
雅生活$32.78x2500
粵海$13.86x2000
信義光能$15.94x2000
舜宇$190.9x100
小米$24.4x1000

龔成老師：

你一定要做到「平常心」，這是成功投資者極重要的元素。我永遠是睇「企業幾年後的業務情況」，而不現「現時股價」。

你上述的持股，基本上都是有質素的，你都可以長線持有，較大的問題是你的買入價，你較多都在「貴」的價位買入，你應該用月供或分注模式，慢慢分注投資，唔應該一次過買入，特別是當你不懂掌握平貴時。

現時的組合，無問題，你可以長線持有，但之後唔好太心急加注。可用平均入市法或月供，又或等大跌先出手，唔好心急買入。

------------------------------------------------

Q20880：

老師，想請教一下恆指市盈率的問題

第二堂有教我地查恆指網頁，睇佢個市盈率。依家恆指股票數目慢慢增加，以及新經濟股比重開始增加，是否還能用那個恆指市盈率表作分析呢？

例如2月尾恆指：29500點，恆指網站顯示2月的市盈率是15.55倍，但係根據過去平均數，係11.5-12倍左右，咁得出結果：依家29000 點，那是否屬於貴的水平？

如不是，那應該如何計算和參考調整後的恆指數據呢？

龔成老師：

你提出的問題正確，恆指因為將會有較大變數，所以平貴定義都不同。公司數目由50間慢慢變為100間，當中更會加入更多新經濟類股。

你可以當30000點，是恆指的合理區中上部。33000初步貴，22000初步平。（當然，這些都會因時間而改變），所以，你要自行計出這幾個點數，當之後加入新公司至100間後，該點數最新的市盈率，而日後就以市盈率作平貴指標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

中鋼還漲的動嗎？鋼鐵高檔震盪看三訊號！彩晶快追上雙虎了！美股要拚突破前高壓力！櫃買也要一起拚？台積電融資反向減，聯電領先突破前高！2021/04/27【老王不只三分鐘】

01:17 那斯達克守住缺口支撐後昨天又突破前高壓力！董哥之前說的Ｗ底等幅測距快達標了耶！接下來怎麼觀察？
07:45 陸股真的就像董哥說的目前在區間做震盪，昨天打到區間上緣過不去就又下來了！
09:31 回到台股，真的是世界第一強！只花了兩天的時間就把歷史天量的高點突破站上！再來是要漲到兩萬點嗎？

15:32 昨天台股能夠突破歷史大量高點，應該是聯電帶動的吧？晶圓代工這族群起飛了嗎？
23:26 記憶體模組延續上周的強勢，昨天也是幾乎全面大漲，接下來該怎麼看？
35:42 面板族群波段就是看十日均線，今天又大漲創高！十日均線好好用啊！

49:35 還是很多人很關心鋼鐵這個族群，董哥可以幫大家再分析一下嗎？
01:04:05 貨櫃航運的陽明，今天又創高真的好強！長榮跟萬海有機會複製嗎？

#浦惠投顧 #老王不只三分鐘 #老王給你問 #老王愛說笑 #分析師老王 #台股

歡迎按讚臉書粉專，一天一篇免費財經解析：https://www.facebook.com/pg/winnstock
浦惠投顧官網：https://www.inclusion.com.tw/

-----------------------------------------------------------
※王倚隆（老王）為浦惠證券投顧分析師，本影片僅為心得分享且不收費，本資料僅提供參考，投資時應審慎評估！不對非特定人推薦買賣任何指數或股票買賣點位，投資請務必獨立思考操作，任何損失概與本頻道、本公司、本人無責。※