［悶悶地贏］市值大過高盛，純利拍得住麥當勞！8舊水啦喂！唔好講舊年3月買咁屈機啦，但肯定舊年7月 5舊幾水時已經在HomeBlogger拍片講啦。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝

TLDR：幾鍾意呢類公司，悶悶地，冇乜新聞，最開心就係好似做賭場咁，每單抽你少少水，話知你班友點施薩，The House Always Wins。港交所固然係賭場，反而澳門股唔止係賭場，而VISA似BlackRock呢種摸式，每單交易食你少少，你銀行毒害啲客變債仔唔關我事，債仔還唔到錢變爛數唔關我事，商戶同客同銀行嘈唔關我事，總之碌一單就畀我舔幾滴。舊年BlackRock　50億美金純利，麥當勞賣到甩包皮都係咁上下純利咋！（不過ASML仲過份，賣幾部機就有咁嘅純利）

1. 實情呢排好多隻愛股都創新高，股災？股乜災？當然亦冇乜咁特別，「道指標指都創新高啦」。係喎，即係你堆嘢同指數同步咁之嘛（嚴格嚟講唔係咁理解，但大約明我講乜），「指數破頂佢地咪又破頂」，「有乜咁特別？」。其實冇乜好特别，「特別在好多人連跟住個市都做唔到」

2. 之前都貼過下，拗咗幾廿年，最後種種學術研究話你知，多數基金扣除回報後，根本跑輸標普500指數，亦係畢菲特同人賭嘅嘢。所以唔少人話你知，買基金真係搵笨—但個盲點係：根本「同指數同步」已經不易。舊Post都貼過，第一季，美股港股六大指數，五個升一個跌，當你全部買晒，拉勻都3.3%，一年就14%，pretty good了。你身家有冇年年升14%？（＊＊）

3. 嚟嚟去去講嗰啲嘢，「但你見畢菲特陸東黃子華嗰啲都係咁上下」。

4. 呢隻BlackRock，都不用多講，悶到出汁（忽然好肚餓）。全世界最大嘅ETF嘛（iShares正係佢），每年舔你少少，就夠發達。最緊要長做長有，過去三五七年，ETF嘅AUM（asset under management）不停升，亦因為大家發現基金經理真係跑輸大市（但，都總好過好多人自己炒）．

5. 咁做生意嘅嘢，「可以好簡單」，收入咪「價X量」。量就升得勁快，但價其實跌緊，不過唔緊要，量升得更快，夠補返。更重要嘅係，利潤等於收入減成本，而啲成本，係遠遠冇收入升得咁快的。

6. 呢個就係最煞食嘅地方啦。基金，特別係ETF，係一門相當　是基拿普　嘅生意。我做飲食嘅，多幾倍堂食客，我就要多幾倍位，租又幾倍，（所以點解要做外賣），樓面都可能要多啲幾倍，叉燒佬都可能多幾件，叉燒成本又多幾倍。但我做基金嘅，1億生意我租咁多地方，5億生意我肯定唔使租5倍咁大。仲有啲客服呀，孖劇停呀，IT呀，肯定唔會要多5倍（例如啲系統嘢，好可能近乎係固定成本，你幾多億生意都係咁多錢）。

7. 呢啲咁嘅landscape，大公司就最鍾意。因為佢只要將個fee定得夠低，保證就可以練死你，令到新公司好難入場。亞馬遜差不多玩法，以前百佳都係咁玩法（RIP蘋果速銷）。例如你亞馬遜收到咁平仲即日送貨，傳統啲書店或實體舖，點競爭？

8. 消費者往往見到加價就鬧，減價就開心，人之常情。但在公司層面，基本經濟嘢啦，我maximize profit之嘛，有時根本連income 都唔使 maximize．減價先好，因為冇人入到場，有時免費更好，zero is the best price，你見Facebook Instaram 一個仙都唔分畀你班友，但個個咪又係爭住貼啲夾波相寫埋啲廢文（例如呢篇）。

9. 當然啦，其實幾踩界嘅，遲早就畀人搞話反競爭（壓到個 cost好低唔畀新玩家入場喎），但暫時未到佢。實情Larry Fink香港冇乜人提，但在美國金融圈，佢同甚麼 高盛 大摩嘅 CEO平起平坐，係喎，剛剛Black Rock市值就已經超越咗高盛。

10. 而BlackRock仲要係唔少公司嘅重要股東（被動基金嘛），已經有啲再極端啲嘅左翼（膠？）話ETF應該要禁！咁都得？但個原因話，其實呢啲ETF係反競爭。唔止話BlackRock同佢行家，而係講令到所有行業都反競爭。此話何解？例如你當，平時英航同德航係對手，咁大家當然會鬥平鬥質素，大家都冇乜錢賺。但，如果兩間都係BlackRock做股東，咁就不如唔好價格戰啦，齊齊搵大錢，對股價好嘛。所以呢啲ETF其實害咗消費者喎，係咁講的（＊＊＊）

11. 但你話股價做乜升？就真係考起，可能偷步炒業績（呢個理由都幾廢）。實情間嘢平日唔會有乜新聞，正如ASML咁，做乜早排跌呢排先升？唔知喎。

12. 唔好講舊年3月跌到350蚊咁極端啦（而家800蚊，130%回報）。但你睇6個月前，6舊水，今年年頭就7舊，去到1月中已經近800蚊—之後就冇乜料到，上個月頭見過680蚊，高位都跌15%，又要畀你啲網友屌冇料到，「要止蝕」。然後一個月之間咪上返800蚊嘅歷史高位

13. 教訓？冇乜喎，但，比較易嘅玩法，其實都係月供ETF。個撚個恥笑人，但你跑得贏指數先講。當然咁係好悶嘅，而絶大多數人（包括我）都冇咁好恒心，所以on top of that 都搵啲嘢玩下，咁在合理估值，買入好公司，長期持有，就都係比較易嘅玩法。當然啦，講就易，何謂「合理估值」，何謂「好公司」，有時都未必咁易定義，有時事後先知（但，老老實實，問良心，有啲公司買嗰時你都知垃圾撚同埋貴到癲架啦）。況且，「長期持有」呢四隻字都唔係咁多人做到。今日買完聽日跌3%已經鬧你啦，然後300點又話股災啦。

（＊）當然，都有啲中伏嘅，但整體肯定贏多輸少。

（＊＊）記住係成副身家喎，即係你10萬蚊身家然後拎咗1000蚊買巴黎聖日耳門回報300%嗰啲，你嘅回報唔係3000/1000，係3000/100,000

（＊＊＊）Implication？既然畀費咗機票錢，當然你要買股票，更好就係買BlackRock

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折
＝＝＝＝＝＝＝＝＝＝＝＝＝＝

［微軟特權］FAAMG，微軟在歷史上，政治上，都係有啲唔同的。買抖音喎！你仲唔買？！

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TLDR：明月裝飾了你的窗子， 你裝飾了别人的夢。微軟買抖音，你買微軟。你站在橋上看風景，看風景的人在樓上看你。今日你笑我窮，他日我同你一齊笑其他人窮。

1. 每個人有佢嘅「時代教主」。唔止一次提過蘋果教主Steve Jobs，我年代嘅必定係佢，愛佢恨佢都好，戲都拍埋。但畢竟教主香咗十年，新一代唔識唔奇。而家繼任人，到底邊個？可能唔係Facebook嘅小朱（都有套戲），而係Tesla 嘅 Elon Musk。

2. 但Steve Jobs之前，仲數漏咗個人。

3. 我人生第一個教主，真正嘅科技奇才，當然係—標基。可惜嗰個年代未有Facebook（！），資訊又冇咁流通。但，不礙佢成為最早嘅一個nerd，最早一個睇樣就知毒撚（教主中後期執返正好多架），但又好勁好有錢嘅，標基。有佢咁毒冇佢咁富貴，有佢咁富貴又冇佢咁毒。

4. 標基有幾有錢？冇乜特別，世界第二有錢之嘛。佢要嘅，佢真係可以做首富。微軟市值同亞馬遜叮噹馬頭，但標基早就無心搵錢做慈善，自己亦渣得唔多，亦都肯派畀佢嘅手足（陣間講）。

5. 我細個（小學嗰陣，1984-90年間）嗰時當然未有咩Windows，隔離屋個同學有部IBM（好似係），本人有部蘋果！好似係Apple IIe，證明屋企對我幾好，當然當年拎舊錢買股票更好（不投資向下流！）。但不重要。總之嗰時只係知IBM同蘋果。標基微軟等等，唔知乜水。當時識買股票，應該都係買IBM。

6. 轉眼去到中學，我繼續係電腦盲。未到上網年代，就忽然去咗微軟標基嘅年代。就係佢賣Windows賺咗好多錢。

7. 標基，就係我認知中，第一個科技奇才變富豪。再講一次，亦都係極nerd 極geek極毒撚極有錢嘅始祖。幾多毒撚以佢為偶像。

8. 標基勁到一個點，連中午貼《新戀愛世紀》（https://fbook.cc/3DMn）（＊），黎明個角色都叫Bill姬。勁到一個點，我成日貼嘅德國股神科斯托蘭尼本書入面話，窮人發達呢，三個方法：第一，同有錢人結婚。第三，投機（佢書嘅主題）。第二，係「商業點子致富」，但佢話，除咗標基外，佢都諗唔到第二個（科氏99年死咗，冇見到後來光頭佬）
9. 講咁多，想講，所謂嘅FAAMG，微軟，我認為微軟係特別唔同嘅。唔係講業務上（業務上蘋果幾唔同，賣硬件為主），係講歷史上。微軟係最老嘅—雖然你講公司本身，微軟唔係老過蘋果好多。但都話，當年《新戀愛世紀》已經有Bill姬，當年佢已經係超級富豪。SJ時代教主，係十年八年後嘅事，況且SJ根本唔富有（同標基比）。

10. 對，雖然標基其實仲後生過SJ（估唔到呢！），但佢就好似再上一代嘅人咁。佢發達最早，交棒亦都最早。冒犯講句，教主如果唔係身體唔好，可能今日都仲出嚟玩緊。但你諗下，標基早早已經退下，教主未死標基已經全退。其他嗰幾間？仲係創辧人玩緊。

11. 所以在傳承角度，微軟係唔同的。Windows好賣，Office好賣，但係咪就印銀紙？我寫過幾次，可以再重覆。微軟咁多年就3個CEO，標基不用多講，但2000年佢已經退下，繼任嘅係Steve Ballmer，標基嘅大學同學（讀名校幾緊要！），微軟第一個非技術人員。

12. Steve Ballmer有嘅幾個巴仙微軟股票，令佢有錢過畢菲特（震驚未？），做埋NBA快艇班主。但此人任內表現認真麻麻，亦可以話標基信錯人—其實好合理，邊個話大學同學就會掂啲？此人由2000做CEO到2014，佢走人時股價狂升，擺明市場向佢竪中指。

13. 話佢唔掂，點唔掂？我地講上市公司CEO，唔係諾貝爾獎。我地只講一樣嘢，股價。冇錯佢接手時係科網爆煲前，但即使唔計個頂位，佢任內微軟股價，十幾年都只係原地踏步（https://bit.ly/31g0O9s）。死未。公平地講，其實佢任內收入同純利都升幾倍嘅，但股價就係唔生性。

14. 所以，並唔係話標基打落個江山後人就享福咁。科企再勁，一樣每日面對競爭（標基正係同SJ鬥到火紅火綠）

15. 更大對比嘅係，2014 Steve Ballmer起身後，而家嘅CEO Satya Nadella接手。微軟股價當時40蚊，而家200。Steve Ballmer就14年原地踏步，Satya Nadella就6年股價升5倍，你話邊個做得好？固然同大環境都有關（但，14年夠晒長啦），但你計相對指數，結論都係一樣，亦唔係好多隻股票過去6年升5倍。所以抵Satya Nadella拎咁高人工（但遠不及Steve Ballmer富貴），你估真係你啲網友咁，以為「CEO冇嘢做開下會吹下水我去做都得」咩．你睇麥當勞亦都係咁，咪又係賣包，但上任CEO（搞同事起身嗰位）任內就係叻過再上手好多。

16. 講到呢度，就要講Satya Nadella最新嘅搞作　—Tik Tok美國！抖音海外版
17. 背後政治云云不多講，唔係就咁禁晒唔出奇，要賣畀美國公司都唔係好奇怪（即係委內瑞拉啲外資油廠收歸國有咁）。但，點解係益微軟？

18. 唔想太過陰謀論，但我覺得呢，微軟係同政府關係特好嘅（＊＊）。至少同侵侵政府係。

19. 證據一：上星期美國科技巨頭在聽證會（好彩只係視像）被議員搞足幾粒鐘。但嚟嚟去去只見四大天王（https://fbook.cc/3DMp），FAAG，就係爭咗M。固然你可以話微軟N咁多年前已經畀人搞過—又畀你見到微軟歷史真係唔同！你地未發蹟，微軟已經被人針對拆骨。

20. 證據二：眾所周知，其實咁多科企，同侵侵最大仇口只得一間。就係亞馬遜。光頭佬旗下嘅華盛頓郵報，日日鬧侵侵，好似東方功夫茶咁，鬧足咁多年。而又咁啱，美國國防部嘅合約，就唔畀亞馬遜，畀咗微軟。

21. 證據三：當然係今次Tik Tok。固然，如果個玩法係被美國公司沒收，似乎益微軟幾合理。畀Facebook買埋仲得了？聽證會先話佢反競爭，買埋instagram 仲買Tik Tok？然後，更加唔會益光頭佬。微軟似乎係比較正路嘅。

22. 本人唔玩抖音，但偶然睇下朋友傳嚟嘅嘢，有啲都幾好睇（唔止睇女）。用家說明一切，你香港人點鬧低智無聊都好，大把人玩—而唔係講大陸人。係講日本妹，鬼妹，印度人，美國人。呢個東西成功到不得了

23. 而家微軟咩都唔使做，就可以賤價（斷估Tik Tok冇乜異價能力）買返嚟。雖然可能只買美國業務，但，實在係十分之筍。

24. 況且，四眼定六眼聯盟嘛。今日美國封得，聽日英國點解唔封得？到時就都係益晒盟主架啦，唔通英國又畀你搵間公司買？

25. 所以，買微軟啦。「如果買唔成Tik Tok呢？」。咪買唔成咯，意外之財嚟之嘛，唔通你估會跌兩成？

（＊）《新戀愛世紀》（https://ggle.io/3I1l），呢套片真係爛到不能。黎明，雷頌德，王晶。你完全估到係乜，回歸前後嘅香港文化，就係咁。當然食住日劇條水，英文名就咁叫Love Generation Hong Kong，仲有水晶蘋果，死未。劇本其實就《甜蜜蜜》，外景居然係同王晶套《龍在江湖》一樣，明顯佢兩套戲一齊拍。唯一可取嘅，呢套應該係最後一套在啟德拍嘅戲。仲有，Lee Ann（唔係Ang Lee）．

（＊＊）呢度講多少少。冇錯，矽谷科企，至少在僱員層面，絶大多數都偏左。美國嘅左。講BLM，平權，女權之類。留意嗰堆未必係白左，但唔少係移民背景。不過首先，都講過，微軟歷史長好多。另外，其實睇嘢唔好咁表面，有良心又好，法治制衡又好，表面扮唔妥實則背後一齊打邊爐都好，你見侵侵上任咁多年，到底有冇咩嘢真係打擊過科企？近乎冇。隻隻升到七彩。你睇日日鬧佢嘅亞馬遜升幾倍，正面睇嘅咪民主自由真好，唔會因為總統偏好打壓。仙力啲嘅，咪話畀你知，大家做場戲之嘛。咪又係班精英統治你。你估真係抄科企家咩。

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145

我的移民台灣心路歷程（下）- 最終回。

1. 可以睇返第一集（https://bit.ly/3gHTxWU），同第二集（https://bit.ly/3eFJYpB）。我強烈建議你睇。因為我好撚怕啲人唔爬文，唔知情況然後仲嚟鬧。

2. 再講一次（因為真係好多人唔會爬文），只係心路歷程，同經驗分享。本文冇話你聽點解我搞移民台灣（我唔介意講，但係另一課題），亦幫唔到你做決定（條命你嘅）。只能話你知當年我係點做，而其實家陣例都改咗。

3. 重要嘅講多次，正路地，任何人拎台灣護照，都要坐一年。當然有人講過用偷渡等嘅方法，首先犯法，二來，移民啫，唔好搞到好似葉繼歡咁啦。坐一年，基本上意味著，你就要辭咗份工，呢個就係最大問題。

4. 如果你失業嘅，或者剛畀人裁走嘅，或者反正都想爆老細樽辭佢老母職嘅，就正好。或者你係freelance 在家工作嘅，你啲工作搬到去台灣都做到嘅（例如你係寫稿佬），十分好。但其他情況，就等於你辭咗份工。而你坐移民監嗰時，係不能打工嘅。況且，台灣嘅人工，算吧啦。你在香港搵開幾皮嘢人工（中產嘛），你在台灣為搵八千蚊同人朝早迫車？多數人都唔會。所以坐監，一係自己搞生意，一係就休息下，感受下台灣。或者日日上網做廢老指點江山都得。

5. 所以呢度嘅安排先最深。點解係我太太去台灣坐，唔係我坐？其實人人都估到：因為我人工高過佢。呢個唔係hard rule，但我認識多數夫妻都係咁。(BTW，如果係拍拖或同居嘅，記得要簽紙了，否則法律上你咩都唔係。至於同性伴侶，我就唔熟，遲下研究）。又或者係睇下邊個對份工不滿啲，睇下邊個返到嚟都仲可以易搵工，人工又唔會爭太遠。睇下邊個可以停薪留職（如果仲有咁好嘅事），或者睇下邊個可以申請公司relocate（但我見好少，而relocate同時係咪可以搞居留都要研究下）（係呀我乜都要研究下，都話唔係移民顧問，而你一個仙都冇畀。用免費版仲要咁多功能？至少都請我食飯上學生版啦）。

6. 太太拎完又點？好似我嘅情況，其實唔複雜。佢拎到護照，咪返嚟咯。公司舊錢都會拎得返，當然唔好一拎護照第二日就取消咁核突。情感上太肉酸之餘，可能都會影響續證，如是我聞。

7. 然後我又點？我冇喎，我咪等第時畀人炒，或者我炒人，或者搵夠退休，然後用團聚身份過去住咯，到時先坐一年。正路地就改例都唔會改到夫妻團聚唔到。

8. 咁當然了，又唔該，咁大件事，夫妻共同進退啦。諗離婚嘅，你就都煩過梵蒂岡（但真係遇過嘅畸屎）。或者你諗下，我當舊錢係你出，或者一人出一半，但你太太搞移民嘛，當然間公司係佢名。理論上佢拎咗你舊錢走人去台南搵個台仔過埋下半世都得嘅。呢啲嘢本人就幫你唔到，自行評估風險。

9. 另一種方法，其實煩，但都可行。兩公婆都唔想辭工嘅，踢老豆老母or both去坐咯，退休人士更好。台灣對老人家幾好，生活指數又低，社會氣氛又唔緊張，如果雙親適應力強係OK的。咁但當然家家有本淫賤的經，你老豆你老母咩情況，你先知。佢住到一半喊晒口同你講阿仔我要返嚟，我都唔知你點算。況且，情況都迂迴啲。要你老豆老母拎咗護照，然後你用中華民國公民仔女嘅身份去，又坐一年。再之後你老婆老公先用閣下中華民國公民配偶嘅身份又坐一年，都有點煩。不過公司就只搞一次，不幸中之大幸。

10. 仲有更多奇難雜症，保護朋友私隱唔在呢度公開。例如老豆老母冇簽紙點呀，老母離婚而家個老公唔係你老豆點呀（我嘅情況），所以真係要一個個畸屎咁討論。

11. 提埋你，真係唔同地方唔同例。有個畸屎呢，兩公婆，簽咗紙結婚。好似生咗幾個仔。但個問題係，嗰幾個仔，係結婚前生嘅。留意喎，都仲係呢兩條友生，而家簽咗紙。在香港冇乜咁出奇丫，有啲人都唔簽紙。但台灣呢，呢啲畸屎，就好多時唔畀你過。過都要搞一大輪，又驗DNA又乜。所以唔好話簽紙唔重要。你生嗰時唔係簽咗紙，之後兩公婆結返都冇用。夠煩未？

12. 唔係廣告，我甚至唔開名唔會貼link。但我強烈強烈建議你搵移民顧問搞。你唔鍾意我推介嗰間，你可以搵第間。但你想自己搞，我會叫你唔好。

13. 移民顧問收你幾錢，我真係唔知。佢地可能都係睇人開價，或者睇下你個情況有幾複雜。但首先，我覺得係值。我同我地嘅顧問公司交手幾年，多數都係讚，冇乜彈佢地。講緊我當年係六萬蚊港紙左右，但唔該唔好拎呢個價同人拗，做人唔好咁low 。

14. 點解我覺得值？固然事後我知道服務都係好，但最初唔知嘛。但我嘅理由好簡單，中產嘛。中產係乜？有啲錢，但冇時間。你話你失業人士，或者學生哥，或者好有錢，你可以成日飛去台北，甚至在嗰邊長駐，日日去外交部乜乜部補嘢嘅，當然冇問題。但否則呢，呢度又漏一個印，嗰邊又漏一張form，你都幾唔得閒。第二，你當我小人之心都好。我都係覺得，經移民顧問搞，係比較容易的。台灣有佢十分人治十分官僚嘅一面，你話唔係嘅我唔會堅持同你拗，但我係咁感受到。我去台灣搞公司時，移民顧問約好晒銀行，話咁快開到戶口，約埋公證行，話咁快搞掂。到官方批時亦冇乜咩問題預到，佢地亦知道點樣去deal with 各樣東西。衰啲講句真係有急事你要交嘢但你在香港飛唔到去，都有人可以幫你手。甚至你啲邊個去先邊個去後嘅問題，佢地都或多或少幫到手。咁當然你唔好問完人地然後去第二檔平啲嘅搞咁賤啦下。你唔鍾意畀錢人賺，堅持自己搞係得的，好多人都自己搞。但我唔係，隨你。

15. 再講一次，呢篇唔係移民指南。之後仲有好多麻煩嘢。搞間公司啦，唔好以為空殼就得，亦唔好以為拎嚟買樓買股票（香港人最叻），或者搞間網店咁。有啲人得，有啲人唔得。但我作為一個中產，同上面講嘅一樣，我寧願用多啲錢，但要certainty．我同太太搞咗間公司，開咗間舖，係賣衫的。有實體店，真係有人嚟過望。我地只係開頭請咗個台灣人，公司生意當然亦都麻麻，加上老闆娘成日都東主有喜休息一天。但至少係正當打開門有得你睇嘅生意，冇乜可能會唔批。其他咩搞網店嘅，你諗你，我唔係顧問唔係台灣官員，唔敢兇你。但，真係，你諗你。得就你叻仔，但我寧願畀錢買certainty

16. 我間舖在新北板橋（提醒唔熟台北嘅朋友，其實台北外圍已經係新北，去咗你都唔知），固然唔大，只係初頭請個台灣人，但亦唔係格仔舖樓上舖。月租大約港紙四千。咪當經營成本。當然仲有啲頂手費呀，貨尾呀，就唔知點計。但都係有限錢，你叻嘅亦唔使好似我咁搞。

17. 仲有另一種成本，咁我太太在台灣都要住丫，我又冇在台北買樓（個人覺得台灣點都係租樓抵，況且太太之後都返嚟）。租屋其實亦都唔貴，透明度好高。我地在中山區租，都係相當好嘅地段，極方便，有四五百尺，大過我香港間屋。月租連管理費講緊五千港紙。你肯住遠啲住細啲（其實絶對可以），三千都搞得掂掛。不過提定你，台灣人好多其實唔太願意租畀非本地人，亦可能因為啲港仔又殺人港女又搞爛人間屋之類。佢可能要你一次交半年，甚至一年租。而我嘅睇法都係：唔鍾意，唔好租咯，搵第間（我就係一次交半年嘅）。但唔好又玻璃心上網鬧人，畢竟你在人地嘅地方，當然係跟人地慣例。

18. 其實要講仲有好多，銀行開戶啦，搞公司啦，匯錢啦，搵保證人啦（極其老味嘅一件事）。但，一來唔方便講得太多，二來其實正如我所講，最難係做決定嗰下，同埋決定邊個去坐。你搞得掂呢啲嘢，打後嘅唔會難到你。錢解決到大部份問題，你有埋移民顧問（即係，畀多啲錢）就應該大多數金錢以外嘅問題佢都幫你解決到。

19. 循例講多次，本人並非移民顧問，個人經驗分享。如有錯漏實係正常。人生大事，請問專業人士，貴客自理。
20. 系列完。

21. 如果你睇晒嘅，都多謝你。成萬字，咁你嘅時間都寶貴的。你見到呢，成個過程，我最扯火嘅，居然係搞掂之後 — 係搞掂之後啲友嚟問我或者批評我。所以你話，我幾咁厭惡香港人。亦都其實話到畀你知，點解我其實原本唔係極鍾意台灣（住落就幾鍾意），但2014已經鐵定搵後路

________________________________________
22. 另外，最新情況（呢段同上一篇一樣的，睇過唔使再睇，但唔貼又有人問）：講咗了，台灣改例，梗係收緊啦，等你班友趙完唱咁過癮。另一方面，又好似話「收容」香港人。隨你信唔信，我就當然唔鍾意蔡英文，但你選擇信嘅，咁你可以唔睇呢篇文。不過我認為，幾時都係自己掌握自己命運好，做乜要等佢發落？而家搞投資移民，就煩咗了。我亦都預移民顧問加價。但我仲識有朋友照樣去。都係嗰句，嫌煩嘅，唔好去咯。真係冇人迫你。而另一方面，亦有可能台灣會取消對香港嘅特別優待。咁如果當你係大陸人咁玩嘅，就煩好多了，我都可能被影響，變成「陸配」（台灣公民的大陸配偶）。唔好問我台灣會唔會，我唔知，你都唔知。所以最好都係主動出擊。

23. 另外，本人情況。結果我去咗拎良民證，成功。去咗台北做體檢，好似三百蚊港紙，又成功，冇梅毒。另外講返，要你有德國麻疹抗體的！如果我年代呢，細個只有女仔打，男仔冇打，所以要去到打多次，好似一舊水港紙。但打埋針你就可能預多一日了。

24. 驗完身後，我仲搞埋居留證。原本係要去台灣留七個工作天（佢會收咗你本護照，出唔到境的）。咁我原本係想復活節過去，但因為肺炎就冇得去了。所以而家都係未有居留證。而留意返，要拎護照，就點都要坐一年。但我個情況係叫做「依親」，因為我老婆已經係台灣公民（拎護照的），咁我個情況好似香港啲阿伯申請件北姑嚟團聚咁咯。所以我唔使又再搞一次投資移民之類。

第一集（https://bit.ly/3gHTxWU）
第二集（https://bit.ly/3eFJYpB）

———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。

請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。