【龔成問答信箱】（Q20681-Q20700）

Q20681：

龔sir, 你好
1. 記得之前你教我計算股票的息率係派息➗現時股價✖️100% = 現時股票的應有息率

2. 見到你推介Facebook 的人現時應同時長線持有新經熱及舊經濟股，但係你之前同我講新經濟股不適合我,因為我重有6年退休,

但問題係為何唔應該在這幾年持有20%或以下新經濟股較好呢，咁可以同經濟增長同步？
感激不盡

龔成老師：

1）公式正確。

2）如果你就退休，就不適合你。加上你的性格保守，我認為新經濟股對你唔太適合，始終這類股較為波動，你見最近股市大上大落，部分新經濟股從股價高位跌了3成，你可以想象當中的波動。

如果你認為自己能承受風險，投資10%-15%都可以的。

如果不懂選股，就安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20682：

龔sir, 手上帶2269，6098，8083，9988，近期跌左好多

想問加息會吾會令高估值股票持續下跌？另外REITs處於低位，應否開始建倉， 如405

龔成老師︰

加息會對企業估值，造成一定影響。但我地分析一隻股票時，除左息口，更重要係佢本身質素。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

其餘3隻都有質素，唔洗太在意中短期波動，長線持有就可以。

不過要留意，你持有的股，不少都是近期有炒作的，即是之前價位都貴，其實唔應該持有太多。如果你貨好多，可能要減。

現時不少本地REITs，都處於合理區中下部，係有一定吸引力。但佢地主要係收息用，增長力唔高。若你係年青至中年人士，就唔建議買太多這類股票。

------------------------------------------------

Q20683：

老師點睇1478呀？
有貨者好冇繼續持有呢？

龔成老師：

丘鈦科技（1478）這股之前好波動，其實呢隻股本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

佢雖然有技術，但賺錢能力相當不穩。當環境逆轉，手機市場轉弱，這企業就成為較大影響的企業。

整體來說，不過不失，波動是這股最大的風險。如果你持貨太多，宜減。但如果不多，長線是無問題的。

------------------------------------------------

Q20684：

阿sir.. 我本身係一個文職，人工$16000蚊，老公收入$18500左右，有一層自住，供左2年幾，每月供樓$8000，請工人姐姐$4700

有一個小朋友，就讀小學

哩兩筆錢係固定支出，未計家庭洗費同水電煤，生活費等，由於兩個人收入都不多，積蓄只有10萬，每月尾幾乎月月清，可儲既錢都唔多，哩兩年遇到社運同疫情，我都無加到人工

一直停留，令到我想轉行去做保險經紀，做一份多勞多得既人，但我朋友唔多，保險一開始都係做自己身邊既人，我又怕開唔到單

我無份穩定既收入，因為我老公份糧，唔足以支撐屋企支出，我應該要點做，轉唔轉去做保險經紀，而家係人生交叉點，你可唔可以比d意見我

龔成老師：

長遠，你地的確要開發新的收入來源。

保險經紀係其中一個方法，但不是唯一的方法。

你應該更闊去想，怎樣增加收入，例如一些小生意、網上收入等等，最初可能只是副業，希望日後能化成正職，提高總收入。

至於保險經紀，要睇你份人本身的特質，如果本身性格主動、積極，就算這刻朋友唔多，其實都有機會發展的，你可以向一些從事這行的朋友了解下。

思維會闊少少，想不同的可能性，唔好太快出現限制思維。

------------------------------------------------

Q20685：

阿sir,941 可以長線投資嗎？現價在合理區嗎
1313 在9.92的貨是否也可以長揸

其實我都明白你講嘅長線投資道理但有時真係會因為啲價位上落波動而擔心

龔成老師：

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理。

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，但就要留意股價上落會較大，自己要注碼上控制，如果你持貨不多，無問題，長線就得。

長線投資，最重要就是睇企業，減少睇股價。比亞迪（1211）我持有了12年，都試過由$88跌落$12，之後先慢慢上翻去，中間經歷好多年，最重要是「企業」，平常心睇股價。

------------------------------------------------

Q20686：

龔sir，地產板塊係唔係時機,同埋邊一隻會好啲

3081到合理價位未?
1810又回到咩位先合理

如我先可買一隻買邊隻先會好啲
之前聽完你講3067已經慢慢收集,已經好好

龔成老師：

現時地產股價合理，可以投資，作為財富組合的其中一部分。恆基（0012）合理的。

價值黃金（3081）算是合理區頂。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，不過現價唔平，去翻$22以下合理，最好都$24先投資會較穩健。

恆生科指ETF（3067）以慢慢收貨模式是最好的，因為長遠不差，但經常貴，所以要慢慢分注收貨。

------------------------------------------------

Q20687：

龔sir, 黎緊月尾, 我會辭職返內地一段時間, 未必可以留意到個市況. 我消化左你之前比我既建議,

選擇左一個月供組合（盈富$3000+中生$1000）. 因為暫停收入, 但又唔想停止增加資產, 所以注碼較少. 想問下你覺得可唔可行？

龔成老師：

其實股市根本不用成日睇，我地只要睇「企業」就得，不是「股價」。

如果你這刻無收入，就要睇你的現金是否足夠，如果有現金，保持月供或減少金額去供，可以。

------------------------------------------------

Q20688：

龔成老師，我而家月入5萬左右
月儲兩萬多。

有啲積蓄，但係近期股市波動令我損失左差唔多7-8萬
我可以做啲咩嚟對沖風險？
同埋點部署之後嘅投資？

現時持股
6060 眾安在線 10000 股

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

佢做這類互聯網保險公司，的確有潛力，同時背後有支持，所以有發展，這部分產生了「概念價值」。

現時市值有部分是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

初步睇，企業有發展力的，不過風險同時存在，因此唔建議太大注投資，這股都可考慮長線持有的。現價勉強合理區頂。

這股如貨不多，可守。但你不能只集中在一隻股票的。

------------------------------------------------

Q20689：

Hello啊Sir，拜師左你一年，睇左你既書同上左你既堂，對自己係選股上有好大幫助。成個組合跟左你之後都有10-14%升幅。多謝你

不過我發覺自己仍然有兩大問題，希望啊Sir可以比啲意見。

1. 我每日都會不斷開個app睇，明知股價唔重要，但都會係咁睇，搞到心情會有影響。我係一個長線投資者，對選擇左既公司好有信心唔會放。但係我定左每年都要投入新資金擴大成個組合，所以其中一個原因成日睇app係怕錯過適合既買入價，驚因為自己睇漏咗而入唔反。

2. 我現有組合目標既股票都已有貨。但每次為自己訂左下一次既買入價，好多時候都會心急，驚唔會跌落個個價位而早入左。

呢兩個問題困擾左我好耐，我覺得要提升投資能力一定要克服呢兩個問題，好希望老師可以指導我。除左心理調整仲有冇其他實際方法解決

我現有組合共15隻，市值$170萬左右:
3, 27, 66, 788, 823, 1177, 1299, 1448, 1810, 1928, 2382, 2800
3067, 3319, 9988

龔成老師：

1）強烈建議你刪去個app。

你唔會因為睇少左股價而錯過左某些位，反而可以更冷靜去分析。

例如股價$100以下是平，當你見到佢由$300跌到$200，你由於每日睇股價，你已經會忍唔住入貨，但如果不常睇股價，反而更有耐性去等，到最後可能股價跌到$80，你先發現，到時先入貨。

雖然，有時真的會錯過某些價位，但總體計，好處一定比壞處多。

2）你要制定一套更有效的買賣策略，要自己強制去跟。

一年只比自己最多買5隻股票（我平均一年是1、2隻），要自己睇到好準先出手。

現時組合，基本上都是優質股，其實方向無問題，而是你的心態及投資策略有改進空間。

------------------------------------------------

Q20690：

老師 對之前美國債息有什麼看法，我手上的科技股 跌超過40% 我應該止蝕嗎

還是繼續持有 都是9911 3738 ，其實我是想長線持有 但這次波動有點怕 我心有點慌

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

所以，如果你同一股，佔組合比例太多，你配置就出了問題。

赤子城科技（9911）主要從事開發一系列移動應用程式、健身應用程式、遊戲應用程式等。佢長遠有發展的。

業務上，係有吸引力的，但就仍未算好穩定，盈利上落較大，但長遠增長力是有的，加上業務規模細，發展力強，不過風險都會有。質素中等。

這股不宜持有太多。如果你貨多宜減持。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20691：

老師你好..想請問下我35蚊入左1558

之後8蚊入左3662

再 6.5入左552 但全部都輸緊好多 我應該點部署好

龔成老師：

東陽光藥（1558）不是零質素，但業務有少少轉弱。

佢係一家專注於在抗病毒、內分泌、心血管、抗腫瘤等疾病的製藥企業，是東陽光集團旗下的國內製劑平台。

行業及企業長遠仍有增長。但企業都有少少風險，加上2019年發行4億美元可轉換債券後，令負債增加不少，都會令佢扣分。

現時回歸合理價值，這股都可長線投資，但業務都有少少風險，因此唔可以太大注。

你有貨可守，但唔好加注。

奧園健康（3662）由中國奧園（3883）分拆上市，主要在中國從事物業管理服務及商業運營服務。

例如提供住宅及非住宅物業管理服務（安保、清潔、園藝、維修與維護服務）等，業務穩定，現金流不差，但上市年期不算耐，以及現價合理區中上部。

這股前景是正面的，但平貴問題則要小心，同時不建議太大注。這股可守，除非你持貨太多，就要減。

中國通信服務（0552）仍是有質素的公司，不過增長力弱左。

佢中國電信（0728）的子公司，是中國一家具領導地位的服務供應商，為信息化領域提供一體化支撐服務。

主要客戶包括國內電信運營商客戶，以及政府機構、行業客戶、中小企業等國內非運營商集團客戶，亦有海外客戶。業務範圍包括電信基建服務、信息技術設施管理維護、軟件開發及系統支撐、增值服務及其他。

見佢近期的業務有下跌情況，增長力弱左，相信中短期仍未必好，長遠來說，算是平穩型，收息可以，不過就唔好對股價有太大期望。現價合理。

相信你的投資時機出左問題，不懂分析企業價值，在貴的時候買入，建議你提高企業估值方面的知識。又或日後買股，用月供模式進行。

------------------------------------------------

Q20692：

老師
目前我持有01299 / 01810/ 02800， 亦有做月供股票 ，00027 只有月供。另外我有用保險單做儲蓄。

如果我按以上組合，我需要再分散投資嗎？

龔成老師：

持有的都是有質素的股票，可以長線投資。

建議你在月供股票，加入盈富（2800），可以更有效平衡你的組合。

長遠，你應再加多幾隻股，總股數去到5-10隻會較適合（當然，不能胡亂分散，要選優質股）。

如果你較年輕，可承受風險，就加入安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20693：

龔成老師，我手上持左幾隻股，都坐艇中啊，所以要揾你求救睇下要點處理

327 係8.88有10000股
1093係8.84有10000
1137係15.1有20000

1478係16.32有5000
1929係11.38有2000
9988係262.8有500
想睇下我要點部署，無限感激！

龔成老師︰

你要了解一件事，就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

這些股票都有質素，係可以長線持有，但想你留意翻以下3隻企業。

百富環球（0327）和丘鈦科技（1478）質素較中等，只宜小注。

香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？另外就是估值方面，我都好難講這刻的估值。投資係可以，但同樣不建議大注。

------------------------------------------------

Q20694：

老師，想問中國海洋石油都潛力嗎？

咁2314 現價入係未合理價範圍？

龔成老師：

中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

理文造紙（2314）主要從事生產及貿易原紙、木漿及衛生紙產品。本質不算差，但又唔算係好好。

過往的生意，雖然都有增長，但不算強，同時近年有回落情況，現價合理的，投資價值都算有，但又唔值得投資太多。

整體的投資價值，可算是中等，買入收下息都可以，但就唔好對股價有太大期望。

------------------------------------------------

Q20695：

你好龔sir！175.520.636.968.1177.1810.3067.6993以上都高位入。什麼價位可再加注呢？

還是不加注等市再跌買1211.388.什麼價位可買？以上股票可以長缐投資？阿Sir點看謝謝你感恩

龔成老師：

上述的股票，選股無問題，但如果買入價都在高位，反映你在把握投資時機、企業估值上，技巧不足，要強化這方面。

另外，你唔好心急加注，大市波動，等跌多D先，唔好急。

至於比亞迪（1211）、港交所（0388），仍貴，建議月供好了。港交所跌多1成可考慮小注。

------------------------------------------------

Q20696：

你好，我持有：
62/2018瑞聲入左2000股
175/6618京健入左200股
13.5/1789愛康入左4000股
我應該点做好

龔成老師：

其實持股不是無質素，不過買入價都處貴。

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

現價合理，長線持有。

京東健康（6618）由京東（9618）分折出來京東健康，將會來港上市。這股可長線。

質素上，京東健康是有的。但由於估值難，不確定性大，同時經常貴，這股你小注較好，不要心急加注。

愛康醫療（1789）本身不是無質素的，只是之前炒作太多。

這股經常處於少少貴的水平，這是最大風險，就算現時，都成30倍市盈率。

睇翻最近情況，自2018年「4＋7帶量採購」開始後，令醫療材料開始降價，降幅基本在50%左右，甚至更高，預計未來3年帶量採購在醫用耗材領域會持續，會常態化，影響佢的賺錢能力。

從長遠發展，這股仍是正面，但就算現價仍唔平。你這股小注持有就好了，不要心急加注。

暫時都可守住先。
但有心理準備會較波動。

------------------------------------------------

Q20697：

今次大鍋！股市近期回左唔少，救下我應該點處理
快手 500股 $400
華虹半導體 2000股$60
京東 500股 $412
心動2000股$90
龍源 10000股 $14.5
阿里 1000股$302
現在怎麼算？蝕$250000

龔成老師：

其實你上述持股，不是無質素，但你集中在新經濟股及近一年熱炒類別，這是最大的風險！

加上你的買入價，全部都是貴，反映你有核心的投資問題。

第一，選股問題，你應該建議更平衡組合，你之後應加入盈富（2800）。

第二，買入時機，相信你會在最好短期利好消息，大市最好氣氛時投資。而這時卻是最貴的！

至於現時的情況，由於你集中在新經濟類別，你最好在反映後，減持部分，持有現金或轉去盈富。

平衡翻組合風險後，餘下先慢慢守。

------------------------------------------------

Q20698：

阿sir你好，本人係做生意，分店有10多間，每月可動用流動現金有100萬，自住樓1，家族收租樓2，股票知識0，只跟風20蚊買左2000股Tilray

準備投資50-100萬做其他行業生意/買股票，投資年期4-5年，目標每月賺5-10萬，回本期一年至年半，目標投資回報400-500萬，請問股票/生意邊樣會較穩定認識目標

龔成老師：

你應該建立一個更平衡的財富組合：生意、物業、股票。

所以，現時你應該用資金，投資股票。當然，股票的回報，未必及你投資資金做生意，但相對地，優質股的風險都較少。同時可以助你建立一個平衡的財富組合。

投資股票，我地最重要是建立一個長期的「股票組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。長線持有。

你可以投資「平穩增值股」，暫時唔好投資「潛力股」，因為潛力股要求你有一定知識。

暫時可動用$20萬-$40萬。

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20699：

丫sir，我都在人生交叉口
可以點

我在做梗一份不喜歡的工作
這個工作時間合約是10至7，一天
有萬六，其他時間要扮工

一天我實際工作的時間是兩至3小時， 其餘時間有做副業，正職穩定，但要經常扮在工作中
副業主要是做銷售大概可以有2萬3萬左右

我有2個小朋友，老公剛失業
他現在批法自己生產的食品
因為我經常都在街上

我都會幫他順便做銷售
你認為我辭掉穩定的工作好嗎？
有時覺得穩定工作好似仲限制咗自己

但疫情下
又怕失去穩定
我應該如何是好？

龔成老師：

你在長遠計，辭工是最好的。

你現時副業有發展，甚至可以你地二人合作發展，從長遠角度，這是大方向，一定最適合你地的。

問題只是時機。

如果你地現時現金較少，較擔心，就暫時唔好辭住，你要盡力儲錢，等你有足夠的現金，就辭工

如果你現時有一定現金，就可辭工。

------------------------------------------------

Q20700：

老師你好，想問問關於買樓事宜，假設我和女朋友想買樓，在價值觀大前提下，用一個人名，之後用一個做擔保

理論上可以做到九成按揭，但感覺上對另外一個層樓冇名但同樣要比錢及月供好像不公平，但如果用聯名去買，會安心d

但之後再買樓時又用唔到首次置業，請問如這程況，應該如何處理比較適合？

另外想問如用了首次置業，是可以自住，但如果想出租是否違法？可有其他途經放租又安全嗎？

龔成老師：

正路來說，用一個人名會較好的，因為有名可以日後有機會買多一層。

雖然表面上唔公平，但根據過往的法庭案例，只要佢都有持續供樓，其實到時打官私都有機會二人平分的。

當然，如果好想聯名先較安心，都可以的，到日後有需要，其實可以比錢上律師樓去搞拆名。

至於首置，可照放租的。

只是金管局定明，5成以上按揭不能放租的。（當然，坊間有部分人仍會9成按放租的，但當然有風險，你可自行上網找多D資料，這裡不便講太多）。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18621-Q18640）

Q18621：

你好！有追蹤你fb！睇過你的支持者留言！相信你的善心助人！才敢私訊你！因現在太多欺騙個案了！

我是一位單親媽媽（42歲了）有2個女兒（中六丶中三），多年前剛有左細女的時候…老公便有第三者而離開了這個家

夫家叫我將2個女送（孤兒園），當冇事發生從新行過人生路…如果我唔聽指示便會永遠不理我們⋯還説明（生死不相往來）！

但我覺得錯的丶承擔後果的也不是小孩子丶錯的負責任的係父母，為什麼要小孩成受永遠冇了親人的折磨和傷痛！留住2個女自己照顧成長…我知道日後條路一定好難行.…但我願意承擔責任。

我一日返2份工⋯10:00am-7:00pm做售貨員（$8000冇假放）丶7:30pm-11:55pm做樓面$180日兼職），放工後還要接回2女回家教功課，已經沒有多餘時間返到第三份工了，就這樣過了15年了

大女將快考Dse了（一直成績中上）大有可能入到大學，我想買股票希望可以增加收入！

買了1211（$185）
9988（$221）
700 （$509）

我一直收入不高、還有2個女要照顧，所以好難丶好辛苦才儲到這些錢，但返第三份工真的冇時間再分身了（女兒已沒有了父愛，我不想連咁微小的母愛都比不到女兒

所以我令願睡小啲也要做好家務丶關愛和照顧好女兒，所以希望用股票這方法去（財富增值），求指引丶指教一下，怎樣可以改變生活！！

一日只有24小時丶得一雙手丶想再做多啲丶努力多啲去改變生活，但15年來總是（無論我幾咁拼命向上丶總是吃力也上不到）

沒有其他資產，現住公屋
我也留意到你出的書，我應該怎樣開始看的次序

我現在持有的股，應該點做？中長線持有…會大風險嗎？要轉嗎？轉什麼？

龔成老師：

坦白講，你很堅強，你好勁！我相信這15年不易過，我相信你之後會無過往咁辛苦。

我相信兩個女都會見到你的堅強，這對佢地來說都是一個學習。

首先，你要提高收入，一個人的時間有限，你就算用盡，也不過是24小時，所以，著眼點要在「提高收入」。試下找時薪更高的工作，或從長遠角度去想，怎樣可以有較高收入的工作，不要只著重這刻，而是長遠，不要只解決眼前問題，而是要長遠。

另外大女中六，考完Dse後，鼓勵佢做兼職，就算日後讀大學都要做兼職，例如私人補習，起碼可以減輕負擔，同時令佢明白大家都是這個家一份子，希望大家一同努力。

至於股票方向，我見你買的都是潛力股，這反而令我擔心，這些股雖然可長線，但你唔好太過集中，始終潛力股的風險比一般股票風險較高。

之後建議你平穩增長股，例如盈富（2800）。

恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

書方面，你可首先睇：

《80後百萬富翁》
《股票勝經》
《財務自由行》

之後再睇其他。

我相信你已經過了較難的時期，之後會開始好翻d，加油！

------------------------------------------------

Q18622：

阿Sir , 我係股票班的同學。好想衷心感謝你，你多次提醒我們要著重企業價值，有耐性，不要短炒，以自己的故事激勵我們，用心良苦。

我們最後一堂有好多問題，留到你咁夜，你也一一解答，你真心為同學好，謝謝你。有少少唔捨得，覺得自己未學滿師，課程就完了，對自己揀股無乜信心，不過我會努力溫習，多用企業評估表，將來再請教你。

感激！祝你也早日達成自己的終極目標。

龔成老師：

其實我都好開心，所以我都好願意同大家講到好夜。

保持學習，多溫書，同評估表。

知識要慢慢累積的，你已經行在正確方向，加油呀！

------------------------------------------------

Q18623：

老師，我月供以下，可以嗎？

港鐵公司 4,000 - 2,000
粵海投資 3,000 - 3,000
中國鐵塔 1,000 - 1,000
領展房產 4,000 - 3,000
長江基建 4,000 - 3,000
中生製藥 3,000 - 3,000
盈富基金 8,000 - 6,000
南方A50 3,000 - 3,000
小米 - - 2,000
美團 - - 2,000
阿里巴巴 - - 2,000

龔成老師：

上述都是有質素的股票，基本上是可以的，如果之後想優化，可以加大盈富（2800）的金額，以及加入追蹤恆生科技指數的ETF，長期月供就得。

你上述選股無問題，可長線月供，當然，最好你能夠每月有現金剩，等大市如果出現較大的回落，可以把握機會。

------------------------------------------------

Q18624：

呀sir~你係點訓練自己定力？
同點樣令自己對事更加平常心。

我最近想買270粵海，雖然知道12.x應該算合理區，可以入一注。

但係我就好執著d細價位，想12.3樓下先入，等左兩日又怕自己set得太低，改價做12.66入。

過程中不斷睇，好唔平靜呀！怕自己為左幾百蚊差價，錯過左入手既時機，又怕買貴左少少唔抵。

最後12.66入了，想等12.3再入一手。因為呢隻股派息好，有前景，而且我對佢股價一年內重上13-14有信心。

我反思自己既行為，覺得我唔夠成熟，而且好浪費時間。

希望阿sir教我點樣可以心態更加進步，多謝呀sir。

1211之前聽你講買了，96.7覺得太熱，所以放左。

我而家將舊錢加少少換左做 0270粵海同66港鐵。

因為呢兩隻最近價錢都在合理區，受經濟周期影響少，而且有潛力。
唔知岩唔岩

雖然比亞迪我無等到過百蚊，但都叫賺錢。
多謝呀sir之前不斷分享比亞迪，感謝你。

龔成老師：

當你好集中分析企業價值，好明白自己買入的是企業，佢有無股價，股價多少已經無關。

同埋，有好多時我的心態是「買入後假設自己永遠都唔賣出」，如果你這樣想，你就不會想股價升，只會想股價跌，等你可以買入更多。

你可以做一個訓練：「一個月唔好睇股價」。

如果你停在你上述的買賣模式，只會同香港一般的散戶一樣，「贏粒糖，輸間廠」，所以，你要著重企業，唔好著重細數，唔好太急賣出優質股。

粵海（0270）港鐵（0066）有質素，現價合理，可長線。

比亞迪（1211）都算幫你賺到錢，都唔錯！

------------------------------------------------

Q18625：

你好，近排巴菲特先生破例大手買入ipo, snowflake 。之前老師講過ipo定價會比真實價值為高，而巴菲特先生更以高於定價買入。再者snowflake過往依然係虧蝕嘅狀態。

請問snowflake投資價值高唔高？
可否分析一下呢？謝謝

龔成老師：

Snowflake，佢主要提供企業可在雲端上儲存，以及一些管理資料的數據倉庫服務。

佢的強勁之處是增長快速，客戶增長快速（佢主要做公司客，如Sony），相信有一定的潛力。

不過我無特別研究這公司，但相信巴菲特睇好雲端的長遠發展。

------------------------------------------------

Q18626：

老師，想再問一個問題，我預計今年12月前會存到第一個十萬，而且準備2022年中移民。

因為有兩年後移民的打算，所以未必能把資金放長線（3年以上）請問老師仍會建議我月供盈富/港鐵的股票嗎？
我的目標是10年後可以不用打工，靠投資賺取生活費
謝謝老師

龔成老師：

你都可以月供，但就不能太進取，始終這只是一個中線投資，因此，你有兩L點要注意。

第一，唔好全部資金去月供，要部分月供，同時留現金。

第二，一定要供一些穩健、優質股，盈富（2800）與港鐵（0066）可以的。

你到左2年後，安頓好後，到時先再進一步開始10年的財務自由目標。

------------------------------------------------

Q18627：

想問下若果想分散風險揀買etf還是月供股票會比較好？

因為我現在是一手手甘買股 但岩岩出泥做野 一手手甘買甘多都會有點負擔 不過現在又吾太方便沽出拎反甘多現金

我有睇過一d有關月供股票的影片

但比較concern的是每月固定日期甘入有時明知係高位個價都好似要局住買 聞說係可以改組合作調整 但若果成日都調每次收手續費都感覺不太化算

而且大家月供股票係米若果d股票跌吾可以沽出收翻現金先？明知已買入的股票個價係甘貶值都無得做止蝕？

基於以上想法
我不太肯定會不會趁價低買不同類型的ETF 例如追蹤科技股加其他指數股

再定期入正股甘既投資方法會比較好？
etf就長期keep

正股就留dd keep住等十幾廿年 有d岩既時機就沽出

不過d個方法我可能不同類型的股票只可入一兩手
所以想請教龔sir既睇法 謝謝

龔成老師：

我會建議你月供指數基金，例如盈富（2800）+安碩恒生科技ETF（3067），長期進行。

只要你每次月供的金額不太多，就算這刻好似有少少貴，多年後睇翻，可能是平，月供的作用，除了可以平均買入價減少我地的風險外，另一個就是減少「人為主觀的因素」。

好多散戶以為自己好勁，但其實不是，利用月供如用程式般進行，往往有更好的效果。當然你不用所有資金都用供，可以每月同時留少少現金。

當見到大跌市，就可以動用現金，平價買入優質股。

------------------------------------------------

Q18628：

成哥，我係分析時候有小小野唔明，關於巴菲特所講ge自由現金流折現法，例如2382同669，需要兩個唔同行業要比較唔係咁岩，但我重點想問

因為e個方法著重自由現金流，2382比669多自由現金流，但計完到最後，兩間ge市值除以股數，遠遠低於現時ge時值

所以想問下 係米我當中計得唔太岩定係有野未了解到，假設兩間企業增長率同折現率風險都唔高，都差唔多水平，但就因為低現金流，咁因為咩原因？

因為兩間企業我都認為優質，但計唔岩數

感覺兩間企業過千億市值，但本身自由現金流近年都小，e重情況我唔識點樣計得比較準確d

龔成老師：

其實，估值有好多方法，你唔好只用一種方法就認為是答案，因為，估值其實只是一個概念，並無絕對的。

我一般以多種方法同時進行，原理就是以不同角度去估值，這就更立體。

另外，每間公司的折現率計算並不一樣，因此你不能這樣比。

同時，你要「預計」之後的現金流，並不是只集中過往數據，這將會成為影響你能否計算正確的關鍵。

------------------------------------------------

Q18629：

老師，follow老師都有兩年時間。好感謝老師，令我在比亞迪，小米，中生制平宜區都有入貨。

而家升到貴區，反而有d失落，因為入得唔夠多貨。而家要發掘其他潛力股

暫時得金界3918 有值搏率(8蚊均價)。其他潛力股(853微創, 2168佳兆業, 3316濱江, 6186飛鶴)都合理區中上或頂部，買唔落手。

唯有再等下機會。
老師加油

龔成老師：

「而家升到貴區，反而有d失落」，這證明你已經是一個價值投資者，你的想法正確，我自己都是，持有的股票，並不想股價升，而是希望股價跌，等自己可以不斷入貨，將貶值的現金轉成優質資產。

我地投資，唔好心急，耐心等合理價先入，金界（3918）有質素的，的確可以留意下。不過股市近期波動，我建議點都要有一定的現金在手。

------------------------------------------------

Q18630：

龔sir，想請教下你少少問題
我依家同屋企人一齊住

今年疫情見到樓價有所回落，如果啱就想買樓，短期3年內租出去先以後有小朋友先再自住或者換樓，係咪唔應該買45年樓齡以上樓，如果3年後要換樓接近50年樓齡樓會唔會比較難賣出？

同埋如果油尖旺區同觀塘區邊區會比較值得投資？我地預算係430-500萬左右，唔該曬龔sir

我係今年年初無意中關注咗你facebook，覺得你好好不停耐心解答大家投資問題，都學到好多關於股票知識

好有正能量
我都開始買你嘅書來睇

龔成老師：

你的確可以把握樓市下跌機會買樓，先出租，後自住。

觀塘都有投資價值，但就未算最好的地區，不過，你都可以考慮，始終商業區開始成熟，加上長遠啟德的發展。

45年是較高的樓齡，你要睇翻當中的維修問題，成本等，以及日後你如果賣出，到時的樓齡問題。最好當然找翻D樓細無咁高，例如30年會較為接受。

------------------------------------------------

Q18631：

龔成你好，想同你請教下銷售手法。

之前你po文提到，想事業有突破，可以試下銷售工作，例如地產經紀，我自己都心思思想試。之前你有篇文提到兩種銷售手法：

有2個學生做金融產品銷售，一個會hard sell；另一個會幫客戶客觀分析，唔會一味叫客戶買，反而令客戶更信任佢。

我ge問題係，做地產固然有跑數壓力，似乎難免要將唔好ge樓盤講到天花龍鳳；以你經驗嚟講，應該點樣喺呢兩種銷售巧取得平衡呢（等自己良心好過啲）？
謝謝賜教

龔成老師：

其實，我在約20年前，都有短時間做過地產經紀。

一個成功的經紀，是做「配對」。

你並不是將一個不適合佢的盤，強行賣比客，而是幫你的客，找到最適合的盤，只要你做好配對，你的生意就會最多，長遠做得最好。

當然，有時在銷售一個盤時，你可以避重就輕，但唔能夠將不適合佢的盤賣比客，同時，你唔能夠亂講，要將事實講出來，但技巧地包裝。

------------------------------------------------

Q18632：

你好 龔sir 點睇儲蓄保險同盈富基金或美國voo
唔該

龔成老師：

我地理財，要攻守兼備，要做好配置，所以，上述3個項目，都有佢的作用，你同時持有都得。

儲蓄保險是防守部分，這在理財中不是無用，但「足夠」就得，不用過多，餘下資金應該要進攻。

盈富（2800）及VOO，都是有增長力的，你都可以投資，盈富針對中港，VOO針對美國，同時持有可以令財富組合更平衡。這些都適合你長期月供。

------------------------------------------------

Q18633：

龔成老師你好
一直很欣賞你的努力 和無私教導
讓很多人受惠
我仍然在努力閱讀你的書籍中 希望能增加投資知識
但因為學習中從來沒有接觸投資/金融方面

所以很多地方在看起來都較難明白或記住 請問有沒有什麼地方或你的書藉能先教入門學習這些知識呢？

另外在較早前曾以53.15買入1手0005
後來認識你後知道是錯誤的決定
本想在股價回一點的時候再賣出
但它一直再下試谷底⋯⋯

現時已不斷跌 而且不利因素還有很多
本人28歲
留作收息股也並不適合
你認為現階段賣出換作另一增長股適合嗎？

我明白老師教導投資其中一樣最重要的是耐心
但眼見它虧損快約50%
又沒有升值潛力
收息股也不是我這歲數的選擇

所以想忍痛放掉
雖然價值並不多 才一萬多元
但老師教導 錢是自己的
要著緊才是

我也想早點學會自己捉魚！
希望龔成老師能作出指導
謝謝

還有一件事
本人是一位護士
雖說是一種專業
但除此以外

我完全沒有其他技能和特別興趣
我也很想學習老師增加收入
但完全無從入手

好想早日財務自由
請問老師有無啲咩建議？

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

如果你想財務自常，但無其實專業或做生意的技能，最好的方法就是利用投資，一邊打工，同時努儲錢，利用投資都可以將資金滾大。

你應該大量增加你的投資知識，努力研究股票，都可以幫你財務自由。

你28歲，匯豐（0005）並不適合你，你等佢上翻多少少，應該轉其他。

匯控（0005）賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差（但當然不好），近期停派息，主要原因係接獲英倫銀行透過審慎監管局發出的書面通知，要求匯豐取消派息。

所以，在派息方面，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線來說，並不是零質素（當然，質素比過往差左）。而銀行業的賺錢能力，已不及過往年代。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題（同時，不能集中在銀行股）。

記得，唔好佔比太重就得。同時明白這只是收息股，唔好對股價有太大期望。同時不能持有太多，記住，這股唔建議持有太多。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q18634：

老師，我買你的書，由0慢慢開始學習，看完有些地方想問問

《大富翁致富藍圖》中提到現金換小資產，小資產再變大的

因為書是2017年，現今不論車位、樓價都處於高位，想問

1）公式還可繼續套用嗎？將現金換資產

2）之後的資產還是會不幾升值嗎？還是升值的潛力，差距而不再？

3）我是身處澳門的，澳門樓價太貴，買樓必須借貸，但如果將澳門買樓的錢（首期）放回大陸（新會）自己的家鄉買樓投資，同樣將現金變資產，可以嗎？

新會的新樓，一百萬葡幣左右便買到
不過每月要交水電管理費，亦不打算租出去，如果買，或者買埋車位，約二十萬人仔一個
所以買了，會是消耗性的

但升值潛力比澳門高嗎？

自從睇完你出的書，我打算幫屋企人投資收息股（58歲），收息股比放銀行存款高息，諗住先試10萬，如果分散投資，那隻股票和什麼價位入市，才比較好？謝謝老師！

1.盈富基金 （1500股）首選
2.中電（500股）/中華煤氣（3000股）
/港燈（4500股）/粵海投資（2000股）
3.陽光房產（6000股）/領展房託（400股）

龔成老師：

1）放心，《大富翁致富藍圖》當中大部分的方法，只要是大方向，原則可用，但我地要有配合現時的分析技巧。

「小資產追大資產」，這是長遠正確的，但要考慮當刻情況去運用。

因此，我地要分析資產的平貴度，不是盲目去用，車位的確不平，因此當我地運用時，可考慮用股票先。

2）資產長遠仍會不斷升值，但你要有選資產的能力。

尋找有潛力，能長遠成長的資產項。

3）你最重要是分析「利息成本」與「回報」之間，有無正差距，如果利息低，而你租金回報高過利息，就可以考慮。另外，你要同時分析升值的可能性，升值都是回報的一種，但就有較大的不確定性。

如果計好這些後，你有正回報，就可考慮進行。

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18635：

老師你好，我之前都係享樂為主，冇點投資，2018年開始接觸股票，當初都係買收息股為主，我手上有15000股939，均價好高，差唔多7.2

依家建行跌到新低我應唔應該再買黎溝下？

最近又$9.27買左1177 8000股，又應唔應該再買溝下？求指點

龔成老師：

建行（0939）本身不是零質素，佢有一定的規模，在全球都有網絡。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。

而長遠，會慢慢穩定的，不過，增長力不強。

唔建議你加注，你加注只會令新資金「投資的回報率只得到股息」，你應該善用新資金去投資其他更有增長力的項目。

至於中生（1177）有質素，你可以持有，$8以下先合理，你現價唔好心理加注。

------------------------------------------------

Q18636：

你好，想問下2018前境如何？49蚊有貨可以繼續等下嗎？

還有想問12/1972邊隻更值博呢？
謝謝

龔成老師：

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

你如果持貨不過量，無問題的，這股可以長線持有。

至於恆基（0012）、太古地產（1972）都是有質素的股票，兩隻都可以長線，現價都合理。如果想較平衡，就選恆基。

------------------------------------------------

Q18637：

你好，我在2019年年初高位開始買股票，持有以下股票成本77萬，現在蝕左18萬，期望在兩三年內套現置業，現在狀況應否套現部份股票止蝕？應選哪隻股票套現？

0012
2388
0066
435
737
6823
659
778
2800
823
1928
1038
1398
0005

龔成老師：

如果你2、3年內要置業，其實要睇下邊D股票，需要賣出，或等上翻D賣出。

我地持股的原則，不是買入價，不是賺蝕。而是「優質」、「增長力」，有質素的股票你可長線，無質素要賣，質素轉弱要減。

上述的銀行股，要較優先賣出，你可以等上翻D就分段賣。中銀香港（2388）可留。

之前，你要考慮賣出增長力較一般的，新創建集團（0659）、灣區發展（0737）。

------------------------------------------------

Q18638：

你好,請問老師點睇1611及2899
謝謝

龔成老師：

火幣科技（1611）無特別研究，但見佢的生意好普通，幾年都無增長力，加上中期業績出現虧損，投資價值唔算高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

------------------------------------------------

Q18639：

龔成老師您好！感謝您一直以來的分享及鼓勵，讓我也跟著老師不斷加強自己對學習的熱誠，非常感謝。

想請教一下有關最近市場上追蹤恒生科技的幾種ETF。
3032及3088在誤差率及管理費均較3033的為好，但以成交量相比，3033的卻遠勝3032及3088。

在此情況下，若以長遠的投資角度而言，該選擇成交量較多的好，還是以低誤差率及管理費作優先考慮為宜？謝謝！

龔成老師：

我地一般會考慮管理費及誤差率為先。

當然，成交都是一個因素，如果成交太少，買賣差價可能較闊，而成交活躍，一般都反映該基金現時的價格，能夠有效反映當中的真正價值。

------------------------------------------------

Q18640：

老師你好，請問我如果買股每三個月買一手1038或2800好嗎？因為資金有限，你提及到啲股我買吾到咁多，澳門月供股票手續費較貴，所以想每三個月買一手作投資，謝謝老師！

因為我吾太識計，我見1038股息較好

同埋我害怕長和系涉及政治因素，似匯豐

龔成老師：

如果手續費較貴，你的確可以自行分注，每隔幾個月入一手。

盈富（2800）無問題，你可以每隔2、3個月入一手。

至於長建（1038），由於是單一股票，因此佔你組合的比例，唔應該太多，所以買入的速度應該比盈富較慢。

我地要建立一個平衡的組合，因為所有企業都有自身的風險。

長建是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16341-Q16360）

Q16341：

你好，朋友介紹可以問下你一d股票意見，我依家手上主要有資源股，1733及1029，值得keep？
感謝

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

易大宗（1733）是財技股，風險高。

同埋，如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

鐵貨（1029）業務波動，經常出現虧損，加上曾有某些年份，核數師意見有少少問題，同樣不宜投資。

企業的投資價值不高，你最好找機會賣出。

------------------------------------------------

Q16342：

龔成老師：你好我想問下本人有一間樓係珠海，有一間在香港，現金大約一千萬。

我想問點投資可以做到每月有大約兩萬蚊收入？本人同太太都無工作的，謝謝

龔成老師：

如果你本身有2個物業，在財富的配置上，之後應加強其他類別的資產，這樣能有效建立一個平衡配置。

你可以將這$1000萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有6%股息

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$1000萬資金，平衡地分配在上述的項目上，對你來說是最好平衡風險，同時有穩定的現金流。

我相信上述的組合，可以建立到平均5%的利息回報，以$1000萬來說，一年就是$50萬，每月約$40000，能合到你的要求。

------------------------------------------------

Q16343：

老師，我27歲，想問：

1. 現階段希望可以增加股票投資既知識
暫時都有睇緊老師既書同經常睇老師係post係facebook既信箱回覆 去增加哩方面既知識 因為平日要番工 所以6月股票班未能報名 希望等到8-9月可以開到星期六班

係現階段 未上股票班既情況 點樣先可以令自己更具體咁樣去分析企業？係書入面其實老師都講過一啲formula (ROE, price-to-earning 哩啲既概念）

其實大學讀financial accounting都有見過哩啲公式 但當時都係死記去應付考試 完全冇諗過現實真係用得番出黎 當然當時考試所設立既情境相對上又比現實生活簡單得多

年報個篇幅咁大 初學者可以點樣去入手分析？

2. 打算今年/明年購買大約580萬左右既物業 暫時只有約30萬現金一些股票，另外屋企會預100萬首期俾我。現時係咪唔應該買股票同做月供？應該先增加自己既儲蓄能力先？

3. 我有幫爺爺嫲嫲(現時大約84-87歲)的退休金做定期 大約$16萬港幣(就到期)，2萬人民幣 (6月到期)
如果想幫佢哋做資產增值有咩方法？
十分感謝

龔成老師：

1）你暫時可以多睇年報，這是一個活學活用的方法，你睇《股票勝經》，同時睇年報與財經網站，實戰去分析。

我在股票班有一句說話經常講，就是「將財務數字意義化」，數字是死的，但如果你可以配合大環境情況，去解讀數字，這就是活用。你多從這個方向著手，點解佢當時會賺大錢？當時環境發生咩事？佢那個產品帶動盈利大增？這都是你的分析方向。

年報內容，你集中睇「主席報告」「管理層討論」「損益表」「資產負債表」。

至於星期六班，可能在年尾會再搞。

2）你應該計好要多少錢買樓先，這是第一要處理的事，餘下的資金，才可投資股票。

3）以佢地的年齡，定期是較適合，你部分資金可以投資政府發行的「銀色債券」，小部分投資收息股。

------------------------------------------------

Q16344：

老師，我已經開始月供股票了。每天也會追看老師的post,也會購買老師推薦的書籍，改變人生。

我從來也不敢相信自己會買股票，因有人說過我不適合投資，所以一直覺得自己對買股票沒有信心。多謝老師不辭勞苦地回覆我們每一位讀者，你給了我們很大的幫助和啟發。

我有個問題不太明白，想請教老師，老師經常推介讀者如不懂選股，或分散風險，就買盈富基金，但如我在強積金已有供恆指基金/香港基金，那我股票上還需要買盈富基金嗎？不太理解會否有衝突，利弊。

其實強積金，最簡單是否買恆指基金就可以了？

龔成老師：

同時在強積金投資恆指，以及你自己買盈富（2800），的確會有少少重覆，不過，問題不算好大。

因為恆指本身是一個50隻股票的組合，根據研究，當持股數量去到15隻以上，就可以有效減少「非系統性風險」，因此已做到一定的風險分散效果。

當然，會有少少重覆左。

如果你想做好D，可以在強積金，除左選恆指基金，同時選一些環球股票的基金，作一個平衡配置。部分選恆指是最簡單的。

總之你記住，我地買股票原理不是炒賣，而是儲股票，持有優質股，長線投資。

------------------------------------------------

Q16345：

老師，我開始學緊點樣去估值，去分辨股價平定貴，但計出嚟嘅同老師講嘅都有出入

暫時先記低你解答別人時講邊隻股票幾錢係平，但我發覺好難等到股票真係去到你講嘅平價

如果資金唔多，例如$10萬，可以買嘅股票已經唔多，亦都分唔到好多注，而家合理價時應該都照入貨，定係再等到平先入呢？

又或是直接攞哂去做月供，小注如每股$5000每月去入呢？

龔成老師：

估值是一個較難的動作，要長時間練習先得，就算我計算出來，都不是絕對準確的。因為企業估值只是一個概念，並不是數學1+1=2般。

不同估值會出現不同的答案，投資者都是盡力用不同的角度，去推算出企業的估值。

我十幾年前開始學估值時，逼自己每星期分析一間企業，計估值，寫低，當過了一段時間再睇翻，就會知自己對與錯。

如果你資金唔多，利用月供股票是較好的做法，整個組合會更加平衡，如果一手手買，你好多時會好集中在某些股，同埋價格無法平均。

------------------------------------------------

Q16346：

老師 請問恒地 新地 港鐵roe都偏低 在企業質素上 是否有扣分？

龔成老師：

少少，但這是好多資產型企業會出現的情況。

因為佢地的運作模式，要較大的資產去產生盈利，由於基數較大，所以計算出來的回報率，一般都會較弱，佢地的行業一般都有這個情況。

因此在增長力上，唔會太強，因為難以一下子作出好大量數投資去令業務增長。不過，由於整體行業都有這情況，所以，但由於企業本身有獨特性及賺錢能力，因此整體又不算差，只是增長力方面較難有高增長。

------------------------------------------------

Q16347：

非常感謝你的寶貴見意,這段時間很努力地看你的作品,每本最少看三次！

雖然之前看過了,但我發覺自己没有做到你教導的東西,例:價直投資企業,只入唔出,多留現金,分注慢慢買入等!

現在返省自己做錯的地方,我要調整好心態,不要賺差價,有耐性地分住買入優質股,長线持有不要理中短期股價

龔成老師：

要將知識，活學活用。你睇完書後，第一樣野就是分析翻自己的投資組合，自己現時的投資行為，有那些需要改善。

無人一開始就識，但我地一定要活用所學的野，先算真正學到，而好多知識，都要你從「經歷」中學習。保持進步！

------------------------------------------------

Q16348：

老師，唔好意思，想了解下如果暫時動用$25萬分注投資優質股，就從你平時推介的平穩增長股、潛力股、收息股裡再做研究可以嗎？

如果已打算月攻平穩增長股，還是應該主攻潛力股和收息股嗎？

龔成老師：

首先，要睇翻你年齡、負擔、風險承受能力。年輕可以較多潛力股，中年人會較多平穩類股票，年長人士則較多收息股。

所以，你可以先設計一個組合的比例，然後再在當中選取有質素的股票，月供或分注投資，長線持有。

對大部分來說，優質、平穩增長股作為組合的核心，是可以的，例如，盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q16349：

你好龔成 我係啱啱哩幾個月睇你嘅讀者 宜家20歲 大概有4萬積蓄 哩段時間都買咗你4本書想好好學習投資理財
我打算之後月供股票 你覺得如果以我每月暫時大概parttime 6000 想用$1000月供盈富值得嗎

因為手續費$25都唔算少 定係可以供多啲或者供多一隻? 假如供多一款 有冇行業值得先研究然後月供?

另外我父母有買匯豐 佢哋買入位3位數 打算$43放 但因為我未好識分析公司長線價值 唔知道係咪應該放棄(個人認為匯豐長線仲係值得投資 但唔肯定價位會唔會升唔返) 所以想聽下你意見 再俾父母參考。唔該你!

龔成老師：

如果每月供$1000，而手續費佔了$25，比率超過1%，我不太建議。因為最好將手續費佔比控制在1%以下較好。

我會建議你先儲現金，等你有一定的現金數量，之後才開始然後每月供$2000、$3000較好。

盈富（2800）是一個組合，有平穩增長，適合你的。

至於匯豐（0005），只是收息股，增長力有限，但不是無持有的價值，如果本身只想收息的話，長遠仍是可以。所以，要睇翻佢地的投資目標。

------------------------------------------------

Q16350：

想請教一下老師怎看6185？

另外，請問老師日後會否有機會星期六開班？平日下班來有點來不及。

龔成老師：

康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力，但不確定性太大，如果投資，不是不可，但一定只能小注進行。

至於星期六班，今年3月開左一次，可能年尾開多一次，你可以留意公布。或預先 WHATSAPP 55457212 我同事。打「留位星期六」，到時有星期六班，就會通知你。

------------------------------------------------

Q16351：

你好成哥，我39歲，請教你，本人發覺近期投資股票沒有方向，見低位及高息就會小注買入，結果有大大話話10隻股票,以下手揸持股票

中國電信(正股）
中國聨通(正股)
電能(月供)
長江基建(月供丶1手)
煤氣(月供)
港燈(月供丶1手)
領展(正股)
滙豐(月供)
建設銀行(正股)
盈富基金(月供)

我現在可以點樣重新分配？有邊隻可以沽或停月供？

成哥，你見唔見意，例如港交所丶阿里巴巴丶或者騰訊用月供買法？謝！

龔成老師：

投資股票不能無方向的，首先，要睇翻你的年齡及風險承受程度，設計一個財富比例分配的方向，下一步，就是當中選股，建立每隻股期望的比例，以及分析平貴，設定一套入市策略。

如果你現時39歲，其實仍是財富增值的年齡，收息股就未必適合你所以匯豐（0005）、建行（0939）、港燈（2638）、電能（0006）都只是收息股。

你先設計好組合方向先。

至於你另外想月供的3股，都是有質素，可以利用月供投資，同時有增長力，適合你。可以成為你組合其中一部分，但不能只集中投資這幾隻股。

同埋要記住，投資，不是炒賣，而是買入後長期持有，建立一個組合。

------------------------------------------------

Q16352：

成老師你好
我較早前買入

2018 $42 7000股
請問應該要繼續持有定係止蝕？
謝謝！

龔成老師：

瑞聲科技（2018）不差的，長遠仍有發展，不過就不是好強的增長力。你買入價算是合理區，唔需要太過擔心，不過，中短期一定會好波動。

如果持股佔你財富比例不過多，你持有無問題，暫時可以守住先。

------------------------------------------------

Q16353：

龔SIR，您好! 本人在0.012價位買入24萬股基石金融(8112)，之後該公司公佈先合股後拆細。

請問如果繼持有該股票，在完成先合後拆後，對我會有甚麼影響? 我會損失很多嗎? 希望能獲得解答，謝謝!

龔成老師：

如果你睇翻佢過往的「公司活動」，你會見到佢經常有合股拆股供股的情況，這類股，不建議投資，因為一般都會對小股東不利的。

基石金融（8112）我無研究，只可以話這是一些財技的動作，例如合股後，股價會增加，但你持股數會減少，之後往往股價會再向下，簡單來講，就是對你不利。這類股，建議賣出。

------------------------------------------------

Q16354：

龔成老師您好，我今年二十五歲，從事電腦行業。想請教一下應該如何實踐投資理財。

我兩三年前開始接觸股票及加密貨幣，結果過了大約一年左右損手本金30%收場。在損手之後，就決定要做好理財及投資計劃，想學習正確方法投資的方法。

我買了幾本比較多人推薦的書本: 金融怪傑, 賺錢再自然不過, 交易・創造自己的聖杯, 漫步華爾街, 窮爸爸富爸爸。當然也看了您的八十後百萬富翁，和其他一些有關經濟及金融知識基楚的書籍。

我現在的計劃是今年先做好月供計劃，然後學習基本分析去選有價值/成長空間的股票。在下一年，希望可以把選股步驟程式化。等程式成熟以後就開始涉獵技術分析。

不過看了這麼多書，感覺現在我除了有一個比較好的知識基礎外，對實戰投資並沒有太大幫助。所以，我之後應該如何踏出下一步? 有什麼網站/書本可以推薦嗎? 我想的計劃有沒有什麼問題。

另外，不知道老師可不可以分享一下你當時是如果踏出第一步? 現在的你又會如何建議其他人怎樣踏出實踐的第一步?

龔成老師：

我地進行財富累積，最重要是「長期累積資產」，投資不是炒賣，是長期，不斷買入一些有真正財富價值的資產項。

最典型有「物業」「優質股」。

所以，你利用月供股票，長期儲貨就得。

至於技件術分析，全球投資賺最多錢的人，巴菲特，已講明無用，我過往做了10年銀行、證券行，見D客用技術分析，100個有98個輸錢的。

我自己18歲開始買股票，頭5年用技術分析，輸好多錢，我好後悔浪費左5年去學技術分析。

你一定要學正確的投資知識，你唔好再行錯路！

你要思考一下，邊個買股票長期能賺大錢？就是巴菲特！

你可以睇佢的相關書，亦可以睇《股票勝經》、《年報勝經》。

------------------------------------------------

Q16355：

老師您好，我宜家讀緊大學Year4，有翻part time同幫人補習，月入10000。

我想放3000作月供股票投資盈富基金，你認為我應該全數放入盈富還是2000 盈富加1000領展？ 謝謝

龔成老師：

你這年齡可以自己有$10000，是不差的成績。

月供股票是很好的長期財富累積方法，你可以供盈富（2800）$2000，領展（0823）$1000，之後再你收入增加時，可以加大盈富金額，以及加入其他不同的股票。

------------------------------------------------

Q16356：

成哥你好，我28歲，早前理財不善，但偶爾發現了你FB，亦買了你的書，現在開始學投資，資金如下：

現金: $25,000
一手0823 @$64.2
一手1928@$30.2

月供股票:
9988: $1,000
2800: $2,000
月入: $20,000

扣除所有開支及月供股票部分，每月儲約$3,500
我呢家搵緊PT，希望搵到有約$4,000既PT收入，再將$2,000放係月供股票，其中$1,000放係2800，另外$1,000放係另一隻優質股/潛力股，咁樣應該冇問題?

因為家人最近買左樓，所以我會將淨抵既PT收入放係供樓上面，呢家有2個目標，就係4年內同另一半儲夠40萬結婚，另外就係希望35歲時買到層新樓比屋企人住

因為佢地講過想住好少少，而當我35歲時佢地都岩岩好係退休年齡，到時希望可以儲夠80-100萬，再樓換樓，請問方向是否正確?謝謝成哥!

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。你利用兼職去增加收入，很好，你要加油！先辛後甜！

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

現時你月供的盈富（2800）與阿里（9988），可以保持進行。如果加多$2000，其中$1000加盈富，另外$1000可加入另一隻潛力股。

你的方向正確。

以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16357：

老師你好！想問下我今年30歲。每月儲現金$12000、基金相連保險$4000, 舊年開始月供股票，而家供緊：

0005, 1211 各 $500
6823, 2388, 1928, 823, 388, 66, 12, 9988 各$1000
2800 $3000

以上儲蓄都係啲唔等用嘅錢（有保險、亦另外有現金應急），打算長線投資增值。
請問：

1. 月供組合ok嗎？會唔會太分散？

2. 而家預期股票可能會再平啲嘅時期，應該減少月供每個月再儲多啲現金定係而家咁都ok?謝謝！

龔成老師：

1）的確太散。我會建議你減少3分1，你可以在當中選股，集中供翻D比較優質的。另外，30歲是財富增長期，收息股未必適合，因此匯豐（0005）未必適合你。

2）首先，你現時一定要有一些現金在手，如果大市下跌，你可以出手。

不過，無人知大市會唔會跌，而你「而家預期股票可能會再平啲嘅時期」，這是不一定會出現。

因此，你保持現時的月供是最好的。

（但如果你這刻全無現金，就要增加多D先）。

------------------------------------------------

Q16358：

老師，我係你讀者。我想請教下你啊
我就27歲，剛剛有小朋友
每月人工就2萬到：分配既錢

如下：
$5000交租
$2500+$2000月供股票 煤氣同盈富基金
$5000 儲蓄保險（5年完）
可以用既錢$5500

我既股票暫時有：
3手823
2手405
5手7500做對沖

我想問如果我想再增值，資產配置應該點做到最大效果啊？

龔成老師：

現時你持有的，都是有質素的股票，但唔建議太集中在房託，因為同一行業始終有系統性風險，你要留意翻。

至於月供部分，都是有質素，可以長期進行，但最好加多少少盈富（2800）的金額，減翻少少煤氣（0003）的金額。

如果你想加大財富增值，第一，要想方法增加收入，你27歲，是財富增值的黃金時期，要好好把握，盡你一切的力量去儲蓄、投資、學投資知識。

第二，你可以加大投資潛力股的比例，但這一定會有危有機，所以你先要增加翻你的投資知識，然後才行這一步。

至於ＦＩ二南方恒指（7500），我就唔太建議投資。以正常的模式持有正股就得。

------------------------------------------------

Q16359：

老師！之前買入咗：

581 $4.3
187 $3.8
666 $0.3

想問以上幾隻股票應否繼續揸落去
定係斬攬呢？

龔成老師：

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

但如果本質差，就要賣出。

中國東方集團（0581），業務比較波動，有時生意較好，有時有出現虧損，這類股的質素只屬中等。

這股質素中等，如果持有太多，應賣出部分。

京城機電股份（0187）持續虧損多年，無乜投資價值。

新工投資（0666）之前不斷虧損，近年有少少盈利，但本質不太好，反彈後宜賣出。

------------------------------------------------

Q16360：

你好呀…如果我只可以拎到一萬元出黎買股票，可以買邊隻好

因為我租地方住無多餘錢啦…
想賺返少少生活費

龔成老師：

財不入急門，我地累積財富，要合理地進行。

我會建議你持有現金，到有足夠資金，先考慮投資。

如果真的好想將$10000投資，你可以考慮一些穩健，而入場費不高的股票，領展（0823）、港燈（2638）、領航標普五百（3140）都是可以考慮的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。