#gfmurmur9127 我和男友係正經交友app識嘅，我22佢25，我哋都係認真搵穩定交友對象，同埋覺得大家性格好夾，所以見面第4次、識唔夠1個月就一齊咗。 我同佢一齊之前係A0，佢就A2，佢之前兩次拍拖都係交友app搵嘅。咁佢同第2個ex一齊咗3個月就冇咗，散咗都有1年，而個ex就鍾意用名牌香水。之前上佢屋企個陣就聽佢抱怨過話佢係個ex生日個陣買咗個名牌香水俾ex做生日禮物，但佢因為買錯味就俾個ex鬧到傻，之後要再買返啱個支俾佢，咁原本錯個支我男友就俾佢媽咪用，但佢媽咪都係擺嘅姐。我係好頹好宅嘅女仔，唔好名牌，連個個牌子嘅香水都係第一次聽，所以聽到佢講呢件事時我真係好震驚，支香水都成$1000支，我冇諗過一個女仔嘅任性就可以唔要成支咁貴嘅香水。 佢生日個陣我就好用心咁整咗個銀包俾佢，但佢依㗎用緊個銀包係佢個ex送俾佢嘅名牌銀包，佢覺得咁貴+仲用得就唔好晒繼續用。其實我覺得佢都講得啱嘅，但因為我整咗個銀包俾佢就想佢用，但佢都係繼續主要用個ex嘅銀包，我個個就得閒用下算。 咁拍拖3個月左右到我生日啦，我就好期待佢會送咩俾我，點知佢話冇準備，但個晚佢有同我食生日飯，所以我就算，當生日飯係禮物。但後尾我真係好唔開心就認真同佢講，因為由細到大生日都冇俾屋企人重視過，所以唔想佢都係咁，咁佢就話會補送返生日禮物俾我。 有日我就上佢屋企食飯，佢就攞袋嘢出嚟話係我生日禮物。咁我就好期待咁拆禮物，一打開見到係個個牌子嘅香水就好疑惑，就不斷問佢係咪你ex唔要個支，佢仲不斷笑笑口、玩嘢咁話一定係啦。我一打開見到隻味一樣，仲要支嘢係99%滿就知係個支🙄我真係完全冇嘢好講，同埋成件事太shocked，我連嬲嘅心理機制都未反應到。咁啱佢屋企人叫出去廳食飯，我就😐樣咁想行出去食飯，但佢feel到我唔開心就即刻攬實我，唔俾我行出去，我就只係沒好氣咁講話媽媽叫出去食飯啦，過咗陣佢都放開我同我出廳食飯，見佢個樣都feel到佢驚同內疚嘅。食完飯見到佢咁就唔忍心，覺得佢送同一支香水兩次都俾人鬧好慘咁，同埋覺得自己好似公主病咁，人地送嘢俾我仲要嬲人好任性，就話好啦我收咗佢啦。 但返到屋企之後越諗越嬲，佢個ex唔要嘅嘢就俾我，仲要係當生日禮物。你話屋企冇人用就俾我用唔好晒都好d，但我諗真係冇人會想收到人地唔要嘅嘢做生日禮物，真係好冇誠意好唔尊重，仲要個個係你個ex唔要嘅嘢，更加唔尊重我呢個女朋友。同埋係我身上聞到你個ex隻牌子嘅香水係想點，方便回憶過去？我本身又唔係鍾意名牌，我真係寧願收張卡都唔想要支香水🙄 後尾有個fd訴過苦，佢地都shocked到不行，覺得不可理喻，然後我就覺得自己其實都嬲得有道理。之後就同男友講返我對佢處理佢個ex嘅嘢嘅感受咁，佢都即刻道歉同換銀包，仲即刻送返另一樣我一直想買但覺得好貴唔買嘅豆袋梳化俾我。而個支香水我都俾返佢，我問佢會點處理支香水，佢話收埋咗遲d再諗。 其實情侶之間點都有摩擦、間隙和裂痕，在乎雙方願唔願意去溝通和改善。每一段感情不會都是完美無瑕、四季如春，問題在於大家會否珍惜對方，願意在這段感情出現問題時去修理佢，而不是一出現問題就想換新的。經歷呢件事之後，我都開心我同佢過咗呢個小小嘅里程碑，雙方更加了解大家，同埋交友app都有真愛㗎！ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig