【阿公講鬼】（前傳） . .呢一日，我帶埋子聰上阿公屋企，畀佢試吓阿公特製嘅符水特飲，不過子聰就死都唔肯飲，話食中藥都起碼有根有據，而家叫佢食張紙！有冇搞錯啊！ . .「嗱，問你一個問題，答啱唔使你飲符水。邊種符紙食得，邊種唔食得，一定要揀一種…」阿公拎咗一張白色符紙，一張黃色符紙畀子聰揀。 . .子聰拎起兩張符紙打量咗好耐，就連曾經食用過嘅我都睇唔出有咩分別。 . .「白色！兩款都係紙，黃色有染料嘅！」子聰。 .「錯，飲！」阿公。 .「點解啊？」 .「黃色嘅符紙，又稱土黃紙，係用禾稈草製成，除咗可以驅邪，仲可以食落肚治病。」阿公。 . .「都廿一世紀啦…食藥咪好囉…」子聰一邊講，一邊死死氣飲咗杯符水。 . .我好奇問阿公，上次佢講過今次係第二次用黑色符紙。咁第一次用到底係因為咩事…？ . .等子聰走咗之後，阿公就沖咗壺茶，同我講咗一個故事。 . .阿公講呢個故事，足足飲咗三壺茶，比平時講故飲得多。 講嘅時候斷斷續續，我望住阿公眼框不時有淚水打轉。 呢個故事，可以算係【阿公講鬼】嘅起源。 因為無發生嗰件事，阿公就唔會落嚟香港。 佢無落嚟香港結婚，就唔會結婚生仔，有我女朋友呢個孫女… 如果我無遇上女朋友，根本就唔會有「藍橘子」出現。 . .阿公：「而家都廿一世紀，周街都係科技。但如果將一個現代人，帶佢返去我以前嗰個年代，一定嚇到佢腳都震埋。」 . .之前都提過，道士呢行有條潛規則，一條村只會有一個道士，免得爭生意傷和氣，道士鬥起上嚟，傷害到嘅一定係身邊人。 . .當時我學滿師，師父同我講：「我年紀都大喇，過多幾年連屍都搬唔起，仲點上山趕殭屍啊？」 .簡單交代咗幾句說話，師父話要搵一條更大嘅村，唔想留喺呢條窮村莊就離開咗… . .我喺道教入面係屬於「正一派」。正一派簡單嚟講就係實用派嘅道士，唔使剃頭出家，唔使戒肉戒色，只需要日行一善，專心修道就可以。 . .道教雖然現時無乜人識，但其實用途最廣泛，醫病有符水亦有煉丹。武打嘅相信大家都一定識得「太極張三豐」，太極就係道教出品～ . .我細細個就跟師父學道，原因為乜？都係為咗搵啖飯食，幸好平時我有跟住師父出入，村民對我都好信任，有咩特別事發生都識得搵我。 . .我由細就喺條村度長大，生活無憂無顧。無錯係窮咗啲，但以前我都未正式離開過條村，唔知外面世界係點，就自然無咁多渴求。 . .之後我仲喺條村度結埋婚，收咗個叫阿旺嘅徒弟。佢阿媽係我醫返好佢嘅，嗰次之後阿旺就一直想跟我學法。 . .呢個年輕人好有天份，細細個學識靈魂出竅。對於修道嘅人嚟講，能夠控制自己嘅魂魄能量係好重要。 . （下圖續）