等差/等比數列（A.S./G.S.）除咗喺卷一作為13分Killer題嘅時候，神憎鬼厭之外，喺卷二MC都好鬼濕陰。 . 害人之心不可有，防人之心不可無。做好學生，更加要識曳，否則畀呢啲陰濕曳仔題跣一鑊嘅時候，失分就好唔抵。 . 💡你係咪好似以下咁做法？ . 首先屈公式，無限項GS相加，等如第一個數（a），除返數與數之間嘅比例（R），即係a/(1-R)，得出： . 【a/(1-R) = 4】 . 用埋另一個線索，GS第二個數係由第一個數（a），乘個比例（R）而嚟，即係aR，得出： . 【aR = -3】 . 得到2條式，總共有2個字母唔知，立即聯想到聯立方程，消滅1個字母，將佢變成1條式1個字母。 . 方法係將第一條式左邊嘅分母，乘過去右邊： . 【a = 4 - 4R】 . 再將佢塞落第二條式，嚌啲油： . 【(4 - 4R)R = - 3】 . 落啲蒜，爆開佢，再丟埋一邊： . 【4R - 4R^2 + 3 = 0】 . 望真啲，原來係二次方程，本能反應拎部計數機出嚟，仰天長嘯：「神器在手，天下我有！」窗外一道閃電，咁啱打中【FMLA01】個掣，然後順住未知數嘅次方，由大至細輸入系數【-4】【4】【3】。 . 得出「-0.5」同「1.5」。答案到手，禮成！謝過！ . 真的嗎？ . 此乃犯夫走卒嘅答案，係唔啱嘅🤣畀個提示你：要Reject答案。 . 「我知！答案係“1.5”！要Reject “-0.5”。」 . 此乃凡夫俗子嘅答案，都係唔啱嘅😎記住我以下嘅說話：仗義每多屠狗輩，負數未必要Reject！ . 🔥“1.5”只係過眼雲煙，真正答案係“-0.5”！🔥 . 「What!? Are you kidding 我？」 . 玄機藏喺【S(無限)】，佢嘅存在已經暗示咗R係介乎於「-1與1之間」（當然唔可以0），原因： . 若然R大過1，條數列咪越乘越大？你今日溝到1條女，聽日溝到2條女，後日溝到4條女，大後日溝8條女，畀你無限日，你咪溝盡天下女？地球溝盡時，連火星女都要溝埋，都未夠！道理就係咁簡單。 . 若然R細過-1都係，只係個負號fing fing下，單雙數梅花間竹，今日溝1件大隻靚仔（正數），聽日溝2件肥矮毒醜（負數），後日溝4件大隻靚仔，大後日溝8件肥矮毒醜…… . 唯獨是R介乎-1至1之間，你就越溝越少，越溝越少先有機會加得埋。一碌竹，每日斬一半，永世你都唔會斬得曬，亦都即係話，將呢無限碌竹嘅屍骸砌返埋，剛好砌得返原本碌竹，加得埋也。 . GS嘅R成日都陰人，除咗可以陰呢個S(無限)，仲可以陰個R開雙數次方分正負（2016年MC第36題），MathMan最近開咗個Post分享，如果大家有需要可以去望望。 . 👉醉過方知酒濃 ，愛過方知情重。施主，唔中吓伏又點學精呢？若然你中咗伏，我衷心恭喜你！恭喜你學到嘢！亦都恭喜你係睇我post嘅時候中巨伏，而唔係落到考試戰場先至中巨伏。 . 若然你無中伏，我都恭喜你，誠邀你去杜氏數學YouTube Channel，挑戰更多嘅陰濕題（我拍過好幾題），可以埋報讀《終極Killer》呢Online速效課程，詳情撳去我Profile條Link： www.HermanToMath.com 👈 . 練習嘅時候中多一拳，上到擂臺你就可以撐多一秒！ . 今日分享到呢度，好多謝大家喺我設計呢一個【數學外掛懶人包】嘅時候，提議咗好多topics畀我。若然大家任何時候靈機一觸，諗到任何幫到你嘅支援，歡迎PM我，我未必覆到你，但我每一個都一定會mark低😀 . 若然你支持我嘅理念：幫年輕人花最少時間考好數學，跨過無謂嘅考試關卡，留返寶貴嘅時間發展人生，做真正自己中意做嘅事，請幫手分享畀你嘅老師and同學仔，貼去班Groups等等。多謝你！💪💪💪