［港鐵舊年蝕48億］應該史上第一次。不過，三個原因，肺炎同物業重估就預咗啦，個個月出車務數字喎，物業價亦都人人見到，頂多係沙中線整多14億撥備可能少少意外，股價影響？冇乜。分分鐘升添呀！對公司嚟講好細數字。但呢啲市，梗係睇其他嘢。唯一想知佢減唔減派息

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，3月開始失業。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。一星期至少出返六篇文，今年我已經寫咗25篇，篇篇三千字，冇苦勞都有肺癆
＝＝＝＝＝＝＝＝＝＝＝＝＝＝＝

1. 首先講歷史，連埋今次，港鐵過去18個月內都出咗3次盈警。（唔想睇歷史嘅skip去第6點），3次我都有寫文。

2. 首先係2019年7月，2019年半年業績盈警＋沙中線20億撥備（https://bityl.co/5GKd）。舊文link（https://fbook.cc/3Kdh）．唔睇都得。

3. 之後係2020年7月，2020半年業績盈警（https://bityl.co/5GKZ）。我篇舊文（https://fbook.cc/3Kdg），長，但好詳細解港鐵盤數。

4. 新鮮滾熱辣嘅係2021年1月，2020全年業績 ＋ 沙中線 （https://bityl.co/5GKO）。今篇文寫

5. （留意，2019年嘅全年業績係冇出盈警的，因為全年盈利係跌，但只係26%。所以18個月出咗3次，唔係4次。植樹問題）

6. 順手解兩隻術語，EBITDA同EBIT（識嘅skip去第6點）。EBITDA係 Earnings Before Interest, Tax, Depreciation（折舊） and Amortization（攤銷，你當係無形資產折舊，唔明有得佢）。蔡東豪嘅名句，易必打就唔係純利，你不能下個月拎EBITDA交租。某啲行業，ITBA呢四大金剛可以扣走好多嘢，港鐵都係。咁EBIT咪 Earnings Before Interest and Tax，即係EBITA 再減Depreciation and Amortization。以港鐵1H20為例，收入216億，EBITDA 102億，EBIT就73億。純利係…冇嘅。蝕3億。因為仲有舊物業重估。

7. 廢話少講，知唔知港鐵主要業務係乜？答收車費嘅，就真係冇乜常識。唔少人知係賣樓，「但其實仲有收租」。不過先定義，你講收入，定EBIT，定EBITDA，定純利先？

8. 咁快手講，即使係比較「正常」（未爆社運同肺炎）嘅1H19，客運呢啲嘢，都係佔收入多，但利錢少（開支好甘）。你睇分部EBIT應見到，客運佔EBIT不多。

9. 然後就快手講下港鐵到底有咩業務。左上角，睇EBIT breakdown見到。有經常同非經常。講非經常先，因為簡單，非經常就係物業發展，即係賣樓，借錢（如要）投地起樓賣畀你。留意非經常嘅嘢可以大過非常，正如公司嘅temp可以做得耐過長，偷情可以長久過結婚。即係咁講。賣樓主要係香港，其實大陸仲有盤架咩？

10. 經常嘅就係所有非賣樓嘅東西。香港客運，收車費。車站商務，站嘅舖租同廣告位（巧巧賺的說）。物業租賃及管理，就係啲商場租，同埋管理費，港鐵啲屋苑都好似係（巧巧賺的說）。大陸及海外，問啲鐵路愛好者（aka鐵膠）咪知，瑞典呀深圳呀悉尼呀澳洲呀都有（都幾好賺）。聯營合營？一大抽，留意包埋八達通，但並唔係好好賺。其他？咪其他，但留意黃色格，上次（1H19）沙中線嗰20億撥備應該係打咗入呢度，今次嗰14億（陣間講）都應該會。

11. 咁今次盈警，主要係講橙色格嗰堆嘢。留意呢度係純利了，純利就只係分經常業務（非賣樓）同非經常（賣樓），記住收租（不論車站定商場）都係經常。咁你見「正常時期」（未爆社運同肺炎）嘅1H19，就「經常業務」好賺啲，之後就唔係。但當然賣樓呢啲嘢，好似撞鬼咁，都要講緣份，幾時book 數就唔解了。應該係賣緊日出康城第6期

12. 但留意，除咗經常業務（非賣樓）同非經常（賣樓）（兩者夾埋你可以叫「基本業務」），仲有一舊東西叫「物業重估」，好多地產公司都會有呢舊嘢，非地產嘅如果有投資物業（有舖有寫字樓收租）都會有。咪啲物業（多數係舖同寫字樓）升跌，就有「重估」嘅賺蝕，半年計一次，會幾貼市價。會影響賺蝕。但，一般分析員呀基金經理都會剔走呢舊嘢唔睇，始終唔係核心業務，同埋可以起起伏伏好大。

13. 今次盈警，主要係講橙色格嗰堆嘢，另外話你知沙中線撥備多14億（留意1H19已撥20億），咁呢舊亦都會係在「經常」度反映，都話唔係賣樓就「經常常」。

14. 先睇經常，估都估到了，1H19時正正常常，之後社運，下半年車務收入呀，租金呀都受打擊。然後1H20仲大鑊，肺炎。你睇最頂EBIT見到，客運EBIT 2H19已係負數，1H20仲負得勁。車站商務EBIT呢？2H19微跌，1H20狂跌。反而租金係企得幾硬的。仲有，啲海外業務EBIT都係大跌，人地都要封城。咁當然，仲要打多14億沙中線落去啦

15. 返返橙色格，公司就話你知，FY20全年經常業務蝕錢11億，而1H20係賺錢，即係2H20蝕15億幾—但，當中有14億係沙中線撥備。撇走呢舊，又唔算好誇張。畢竟你有眼見多唔多人搭，商場有冇人（但禁晚市堂食當然打擊商場）

16. 咁但，唔緊要，賣樓賣得好。全年55億利潤，夠冚上面啲細數有突啦。但留意絶大部份都係1H20入咗數，日出康城6期呀好似

17. 之但又，仲要整舊物業重估嘅損失嘛。但，1H20已經有，2H20反而收窄返。況且，都話分析員基金經理多數唔多睇呢舊數。

18. 總評？除咗沙中線比較意外（但，都預咗，梗係乜嘢垃圾一鑊過爆晒架啦，企管/財務101），其他真係點都估到七八成。有冇人坐地鐵，人人有眼睇。而港鐵仲要個個月公佈數字。至於車站有冇人，同上。商場租金人流，甚至物業減值，分析員基金經理全部都可以相當精準地估到。我總唔會等到盈警甚至業績先忽然知，嘩，原來冇人坐，嘩，原來減咗租。

19. 股價表現呢？真係FC過先知，過去一排話好梗係唔好，但話差？又真係唔算極差。恒指成份股入面，你用年初至今，幾個月，或者幾年睇，佢排名都係中中間間。

20. 對公司財務穩定有冇影響？咪玩啦。1800億book呀，蝕幾十億濕濕碎。2019年都仲賺120億呀。有排未死到佢，擔心下 有線，國泰，TVB （應該大鑊指數由高至低）之類好過啦。又，公司負債比率都唔高的，況且，融資成本極低，你見利息個數都好細。港鐵舊年年中先發咗隻綠色債（＊），兩厘息咋。搵舊文見到，1998年港鐵發債？10厘息呀。

21. 我比較想睇係個派息。如果冇睇錯，公司由上市到而家，都冇減過派息（唔好計特別息）。2008 金融海嘯都冇（你有冇坐地鐵丫，講笑，咁租都係要交嘛）。亞洲金融風暴？公司未上市。咁今次會唔會盡保20年金漆招牌？冇跟開公司，亦懶計數，但似乎keep住2019派息水平唔係問題？

22. 但同樣地，公司亦係上市到而家都冇試過蝕錢。但，就冇話蝕錢唔可以派息嘅。況且仲要沙中線撥備呀，物業重估呢啲係non cash item．唔知，或者唔知點解嘅，就要訂Patreon啦（其實知都要訂）

（＊）綠色債真係同角落生物隻綠色企鵝一樣，十分奇怪，有機會再解。

＝＝＝＝＝＝＝＝＝＝＝＝＝＝
你嘅2020年點？我嘅2020年就幾好。Ivan Patreon，港美市場評點，專題號外，每日一圖，好文推介。每星期6篇，月費100唔使，5個月已1200人訂！（https://bityl.co/4Y0h）。年費仲有85折，仲係睇13個月添。

［太美好的東西　會走　還未愛夠了你　怎放手］告羅非士打，梳士非巴利。置地本無樹，記者亦非台。Bankers Club？新一代以為講粗口呢

繼續全無公共性嘅長文，亦同投資或市場無關。三千幾字，意識流，跳嚟跳去，慎入。

TLDR：人生若只如初見，或者係妻不如妾 妾不如婢 婢不如偷 偷不如偷不着。係咪得唔到嘅最好？未必。應該係得到過一次，但唔好再試第二次，咁個感覺就係最好。因為求不得。我在Bankers Club食過碟海南雞飯，16年後仲記得—而我連第一次性交係咩感覺都已經唔係好記得（睇鹹古可以著返條褲，成篇文都冇再講性交）

1. 見 職場心經 講起，我又講兩句（幾千字咁咯），相我同用埋同一張。唔係抄，係致敬。畢竟我地就真係在置地幽會過！（但唔係Bankers Club）。同咩辰衝唔同，我又唔會乜都破舊立新，話冇乜值得懷念。Bankers Club絶對係小眾嘢，有幾多人去過？三十歲以下嘅有冇？

2. 拿，本人就去過啦！呢啲就邱月清個家姐邱月感啦。去過，當然唔係咩有朋友擺酒，或者股東會，業績會之類去過啦（呢啲，我全部都去過）。

3. 就梗係要坐低叫飯食，對住個夜景指點江山（唔通推車？嗰度停車場好貴的），懷念下英殖真好，講下西德馬克之類。結尾仲要係簽返個名，但唔使畀錢。呢啲就邱月感啦

4. 「不過，我都係跟人衫尾啫」。請噓，但即係至少我試過畀球王通坑渠咁，你估人人有資格跟人衫尾？

5. 甚至嚴格嚟講都唔完全係跟人衫尾，故事係咁的，由標哥講起（長期讀者可能知）．未睇嘅，睇返medium舊文（https://bityl.co/3dH5），好長氣咁講埃汾蘇花嘅職場生涯，雖然未必順序。

6. 同本文有關嘅，呢篇（https://bityl.co/3dHA），齋睇下半截都得，講我。埃汾英國讀Master後返香港雙失，頭兩份工都係教書，然後轉投銀行，再轉股票。但邊個咁破格，在銀行請個教書佬呢？就係蕉行嘅標哥。

7. 固然人工唔高（2004年嘅萬二蚊都係唔高，之後一年被草裙到萬八，還不錯）（＊），但首先標哥教咗我唔少嘢（咁我當年都仲係一個蕃薯，勝在可塑性哥），最重要係，佢算係親手帶我入行—雖然成件事誤打誤撞，我當時乜工都搵，佢亦請咗第二個，只係再有人走，佢又懶唔想登多次廣告唔想見多次人，先搵我執二攤。我又咁啱遲咗教書份工，都未搵工，八號風球入緊機場收到佢電話，就請咗我。未必係必然，但佢就算係改變咗我大半生，畢竟佢大可拎我份CV去包橙皮（打後我成日都見佢做呢樣嘢）

8. 當時，2004年，我在蕉行香港嘅資金部，Treasury，做刁拿青衣（我知係讀D拿，你唔知即係你冇做過銀行）。部門又俗稱「炒房」，但我地炒嘅，好似小學雞啲STEM玩具咁，根本玩唔出咩樣—我唔係笑蕉行小兒科，係感恩。正係因為點玩都唔會點爆大鑊，標哥好放心畀我玩。加上佢又hea，乜都踢晒畀我做—interbank 港紙美金我又做過，外匯我又做，Interest rate swap我都成日做（＊＊），basket credit link note我買過（即係一籃子六間嘢冇一間出事就有高息）—甚至連CDO我都買過（有機會貼啲歷史文件）。

9. 所以睇你點睇，我可以扮廢老講句：有啲人覺得老細乜都唔做踢晒畀你日日白逗人工正仆街，但我覺得係學習好機會，worst situation is the best training。況且標哥只係hea，唔係廢。佢脾氣差，但唔會鬧下屬（只會掟爛自己位部公司電話）。況且佢唔hea，佢就登多輪ad，根本唔會有我。整體佢都係一個相當好嘅上司。雖則我在蕉行只係一年半。

10. 由於我乜都做晒，標哥又大牌，亦都令我要接觸好多人。例如我講過，雖則我A Level英文有個B，Master又在英國讀，但去到2004年我啲英文已經退化七八成。嗰時但凡有鬼打嚟，我都會有啲緊張，因為隔離電話有時聽唔到人講乜，加上金融界啲鬼先唔會好好耐性重覆一次你聽。但標哥例牌唔聽電話，有時望到鬼佬打嚟我接遲啲，仲會串我「聽啦，鬼佬打嚟唔敢聽呀？屌，大學生喎」。於是我唯有硬著頭皮包皮咁聽。「拿，又有進步」

11. 最重要係，佢事無大少都踢畀我，有一期只係得我同佢在刁寧房。咁我地做trade，當然可以揀好多唔同對家。所以好多時其他行嘅sales都搵我地—但標哥只得兩個原則：佢本身識嘅，就唔使傾，經我口話OK。佢本身唔識嘅，就搵我去同啲友傾一輪先，好彩嘅，你第二次先可能會見到佢本尊。擺明係扮晒嘢，好似大明星演唱會咁，推啲奀星出去暖場，我就係暖場嗰個。

12. 暖場除咗令我知道好多術語，知道啲金融人嘅氣場（並加以模彷），亦令我啲英文同普通話由極低嘅基數進步外—仲有令我有好多好嘢食。係食飯，唔係食女。

13. 頭先講過，好多其他行嘅sales嚟巴結標哥，但因為本尊唔會咁易出現，我就等於係狐假虎威。所以佢地會巴結我。點巴？都係飲茶灌水。反正2004年，pre雷曼時代，全行都仲係幾好賺，匯豐股價150蚊（後生嘅以為我講大話）。佢地仲有唔少嘅entertainment budget，衰啲講句，最大嘅當然唔係洗在蕉行身上，但食到月尾，我食餅碎都夠。

14. 餅碎食過乜？令當時萬二蚊人工嘅我，可以去Ritz Carlton（舊址，而家中環AIA定建行嗰度）食日本嘢，當然係sales請。可以請我去河內道唱K（發誓，正K，兩條佬唱，冇其他嘢）再去新東記打邊爐。可以令我有唔少月餅券，當年我阿麻好老懷安慰，覺得我卒之都捱出頭來。但對我嚟講，更重要係，演唱會飛—當然演唱會飛佢地唔會送（除非家燕媽媽），亦唔啱規矩—但，佢地會拎到拎飛。而我亦會足數畀返佢地。有乜用？就梗係，拎嚟溝女啦。睇容祖兒坐到頭幾行喎。

15. 但最重要嘅係，Bankers Club

16. 標哥，係Bankers Club會員—當然係出蕉行錢，但佢有本事叫到公司幫佢出錢，或者係公司有幾個Quota就畀咗一個佢。但我就唔係，而呢啲會員嘅嘢冇得狐假虎威，亦冇得借畀我用。不過標哥自己係會員，佢啲行家都多數係，所以，我狐假虎威做代表，都會去Bankers Club食飯。

17. 好記得第一次，對家想要我地生意，某英資銀行。標哥就叫我放工去Bankers Club，搵呢個人，「老燒豬」（係真名，不過咁多年我估佢都唔會介意，況且佢應該知道個個都咁叫），一個叫Lucille （冇錯係姓朱）嘅女人。

18. 去到Bankers Club，老燒豬當然一早到咗。見到我呢個黃毛小子，都係發下功洗下我腦，叫我記得在標哥面前美言幾句。言談間，都同我講返起，「我一入行就聽過你老細大名啦」「嗰時佢直頭係四大惡人呀，邊個唔識佢」，但弦外之音亦都係，每個人都有佢嘅時間，我老細係威過，但已經回塘，到佢地呢代上位。

19. 我衣衣哦哦咗一輪，都唔知自己講咗乜，都係話佢知其實我都話唔到事，佢話當然明白，但我美言幾句就得。

20. 然後，開始閒話家常，佢就問我有冇嚟過Bankers Club，可能係我啲行為舉止已經出賣。佢就叫我「叫嘢食啦」

21. 於是乎，我就食咗人生中最好食嘅一個海南雞飯。

22. 當然，回憶中嘅味道梗係美好。後來標哥都有再同我去Bankers Club，但就當然老細發辦點菜，好似都冇再食過海南雞飯。

23. 後來，當然仲有去過Bankers Club，股東會呀，有人擺酒呀，有人榮休呀咁。但亦真係冇再食傳說中嘅海南雞飯。

24. 所以就係人生若只如初見，或者係妻不如妾 妾不如婢 婢不如偷 偷不如偷不着。係咪得唔到嘅最好？未必。應該係得到過一次，但唔好再試第二次，咁個感覺就係最好。因為求不得。

25. 港大年代，學到嘅實在冇乜。唯一係貪得意去聽岑逸飛講佛，講貪嗔痴，「求不得苦」。食唔到，好想食—都未係最痛苦。到食到啦，念念不忘，再想食多次，已經冇機會—可能已經最好。排除萬難，再去食多次，發現拎唔返嗰種感覺，返唔到轉頭，要搵更勁嘅嘢，好似毒癮咁，越踩越深。好多嘢都係咁。海南雞飯又好，虛榮又好，愛情又好。

26. 關於Bankers Club，除咗海南雞飯，實在已經講完。不過最後容許我補多段懷念標哥（未死的，退咗休啫），畢竟佢改變咗我大半生。

27. 當時標哥，過時過節前就請我地食飯，都食唔少好嘢。亦都見識佢簽個名就走人，唔使簽卡唔使畀現水嘅豪氣。有時佢仲會請食晚飯，咁有啲同事就當然唔多願意，覺得好似加班咁。我就冇乜所謂。

28. 飯後，標哥例牌捉我地去陪佢聽歌。係聽歌唔係唱歌。去邊聽？多數係酒店，有 Live Music嗰啲。標哥同我講 Santana，講Deep Purple，講Dire Straits，講Pink Flyod，講Led Zeppelin（！）。其他後生同事當然唔多識理佢，唯獨我搭到嘴。

29. 但，點解？「因為我老豆聽！」。聽到呢句標哥就有啲唔高興，「講到我做得你老豆咁喎」。但事實係，因為我老豆十八歲生我，其實仲後生過標哥。

30. 第度唔知，但當時聽啲Live Music，十居其九都係賓佬賓妹唱。

31. 而其中一個賓佬，就係Joey Vidal．乜水？就係衞蘭嘅老豆！亦係衞詩嘅老豆！我點解知？因為我拎過衞蘭嘅CD畀佢轉交個女簽名！

32. 簡直不能相信，咁就16年前嘅事。

（＊）當年係因為有教書舊同事去咗太古城地利亞，拉我過檔，兩皮嘢個月。我返去蕉行辭職，獲標哥挽留（因為佢怕煩，咁當然亦因為我唔係十分非常差）。就match 返我個人工。點解係18500 唔係 20000？舊文有寫。但呢個短故事已經話你知三個職場法則：第一，識人好過識字（舊同事介紹我去地利亞）。第二，好多老細係怕煩嘅，又唔係佢嘅錢，加你人工冇你想像咁難。但第三，第啲行業我唔知，但金融圈，你想人工加得快，得兩條路。A，你轉工，跳嚟跳去彈出彈入。B，你拎個屙化兇你老細加人工—Either way，你都係要有個屙化在手。

（＊＊）你可以睇下日鳩日講咩港紙爆煲呀聯匯乜乜呀嘅所謂KOL呀，專家呀，記者呀，有邊撚自己炒過IRS．乜嘢IRS？稅局呀？

—————————————————————
Ivan Patreon 狼耳街華人，一星期至少三篇港美市場評點，其他免費好文推介，每日一圖，仲有FB Page post summary．一個月一舊水唔使，開張一個月已近 500人訂，仲有兩篇免費試睇：https://bit.ly/31QmYj7

——————————————————————————
［收費短片第九擊］美股科技股是否泡沫爆破？價值投資之選

課程資訊：https://homebloggerhk.com/course_detail/?code=CC009

內容:
*美股急跌點算好
*科技股係咪泡沫爆煲？
*有乜價值投資之選？

本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145

另外想買返第八擊（美國總統大選股票部署）都仲可以：https://bityl.co/3NPn

2020年9月7日(周一) 范巧茹

美股上周五大幅波動，銀行股帶動道指跌幅收窄。美匯指數企唔穩93，金價反覆，恐慌情緒睇嚟暫時舒緩。

恒指上周五跌穿上升通道(橙線)底部，不知道今次是假跌穿或是會延續跌勢。今時今日的恒指不能用以往角度來看，同股不同權正式入恒指，是繼紅籌、國企，入恒指後，另一重大變革。再次提醒大家，新恒指股息率或下降，市盈率或因科技股增加而拉高，恒指歷史PE參考作用略降。

上周五北水淨流入顯著增加。騰訊流入最多，超過11億元。

阿里巴巴(9988)上周五出陽燭，藍線263元亦是約20天線明顯有支持，見步行步。美國大選前，美股未必跌很多，傳統經濟股及科技股會輪流撐住美股。阿里巴巴一方面，會擔心係下一個比美國搞嘅企業，但又會受惠，螞蟻集團月底上市。

小米(1810)上周五由跌轉升，以長身陽燭向上，未有出現連續3枝陰燭。4粒綠燈，10天線有支持，都是見步行步。技術上是否很差？大市弱但小米拗腰跌唔落，應該有支怪。

另一隻恒指新貴：藥明生物(2269)拋離上升通道一段時間，移動平均線排列整齊，但10天線開始向下。若10天跌穿20天線，股價可能會橫行或向下一段時間。4粒線燈，有貨食糊或繼續持有都可以。

美團(3690)入唔到恒指入國指，暫時沽壓都不大。若股價回試20天線，甚至回落至上升通道底部(約240元)，會否考慮分段吸納？視乎閣下對其業務的看法，業績有驚喜但好大程度已消化。

騰訊(0700)比重會降至10%，股價接近橫行通道底部，於高台橫行整固，約500元或初步見支持。

中芯(0981)被美國針對，正檢視中芯和中國軍方關係，考慮列入美國商務部「實體清單」，一旦列入，美國供應商日後向中芯供貨前，必須向商務部申請許可證。這個情況可大可小，上周五已提醒跌穿藍線不要拗氣，20元關口頗重要，未有太大意見，燈號沒有太大意思，因為是政治事件，很難估計股價何時見底。中芯於科技指數比重增至8%，今日沽壓大或影響科技指數表現。

港股通名單變動今日亦會生效。留意微創、信達生物等等。

(純分享，請閣下對投資決定負全責，特別係閣下嘅入市價格同時機)