今年係第一年開咗學就快三個禮拜我先畫自己本schedulebook。上一年用咗陳奕迅嘅《不來也不去》一段歌詞來畫，今年都係用陳奕迅嘅歌（冇計，買唔到演唱會飛太傷心要自己邊聽邊畫抒發情緒）。 《熱帶雨林》係我其中一首好鍾意嘅歌，特別係easy ride演唱會live，好聽到暈咗。我好鍾意啲歌詞，好有畫面。 明明並非夏季 但我竟會覺得熱 呼吸到南美的暑氣 閒談被關掉了 伴奏只有那煙味 聽風扇轉得多詭秘 句句我愛你佈滿青苔 別擁抱 懶得要死 搖搖欲倒是你 像客廳裡這腹地 將駛進數輛推土機 相戀的關係猶像熱帶雨林 逐分鐘消失4.8哩 最茂盛的戀愛 靜靜蓋滿地 是否這樣的韻律 也算自然定理 這靜默的災劫 沒法可退避 像相對沒相對論 我悶還是你 封面入面日曆係十二月，「明明並非夏季」但就「呼吸到南美的暑氣」。客廳裡面好靜，一男一女冇閒談冇交流，只有煙味同詭秘嘅風扇聲（用咗音符表達風扇聲嘅詭秘）作伴奏。「句句我愛你佈滿青苔」係我最鍾意嘅一句，想形象化啲咁演繹呢句，所以枱上有張寫滿我愛你嘅紙條，上面佈滿青苔（頂畫到似草多過青苔...）。客廳嘅地板出現裂縫，有幾架推土機正慢慢駛向這腹地，但嗰對男女似乎都冇發現到呢場「靜默嘅災劫」，又或者係發現到但「沒法可退避」。唔知幾時開始，大家就愈走愈遠，相處嘅時候空氣都變得安靜。好似陳奕迅喺演唱會講過：愛情就好似熱帶雨林，每秒都喺度消失。 揀呢首歌另一個原因係近幾個月喺世界唔同地方都發生大火，有亞馬遜雨林、剛果盆地熱帶雨林、澳洲東岸森林、俄羅斯西伯利亞…… 我地未去到問題真係嚴重到失控嗰刻，都唔知道呢啲美麗嘅地方正遭遇大火肆虐，無數大自然嘅生命都喺火災裡面消逝。用熱帶雨林比喻愛情，顯得愛情難逃消失呢個自然定理嘅無奈，但更令人無奈嘅係熱帶雨林「逐分鐘消失4.8哩」。我相信愛情需要雙方去維繫，大自然更需要我地用多啲力去守護。好似亞馬遜雨林大火咁，其中一個原因係有人砍伐、焚燒清空樹木，開發土地來牧牛、種植大豆。而巴西作為全球最大的牛肉出口國，香港原來係巴西最主要嘅牛肉進口地。根據2018年嘅數據，香港係巴西牛肉出口最多嘅地區，數量比第二位嘅中國多。供應都係睇需求嘅姐，所以我宜家都慢慢試再食少啲牛肉，或者慢慢去到唔食。又或者有錢嘅可以捐下錢，再簡單啲嘅就係了解多啲呢啲大火背後發生緊咩事，提高自己對保護環境嘅意識再spread開佢提高身邊嘅人嘅意識。可以做嘅野，只要你肯做就一定有；但如果你唔想做，就會覺得自己冇野可以做。 新一個學年，就用呢本《熱帶雨林》來提醒自己，愛多啲身邊嘅人，愛多啲呢個世界。 P.S. 我仲想記低今年暑假發生嘅事，所以加咗啲彩蛋落本簿。 背面有我鍾意嘅雞蛋花，雖然唔係我最鍾意嘅品種，但因為呢隻品種襯熱帶雨林多啲，所以就畫咗佢～#staycuteschedule