童年看過《模型神童3四郎》，印像深刻，對我日後創作都有很大影響。比較喜歡動畫造型多過漫畫。原來我自己好少畫，多數都是簽繪，今次仔細畫一張。 #柔王丸 #模型神童3四郎 #fanart #robotsketch #drawing #illustration #RoboxSketchbook #RoboxU #tributeart

真係估你唔到，老翻LEGO人仔，竟然會打#模型神童3四郎 #柔王丸 主意。有吉屎呀吓！ #プラレス3四郎

［做不成模型專家，大可做戀愛Buffet專家！］ 香港，勝在有好多專家，例如溝女專家，反正你肯認就得，這樣便會有人搵你上電視節目（至於是否名副其實？不重要，因為名氣比名實重要）。 今時今日做專家，一定要做得好揚。唔揚，做嚟做乜？ 在我小時候，有一種好隱世的專家——我不曾見過他們，只見過他們的作品。 砌模型專家。認識他們，是透過80年代一些本地模型雜誌，我買開的那一本叫《精密模型》。名副其實，內裡收錄的模型作品都好精密，精密到不是我有能力砌到的……這些雜誌，特點是字超多圖極少——每一期大概收錄五六件作品，除了展示作品的那一張大相以及作品局部的幾張細相，餘下的，就是字。 當今時今日大家連望Facebook Po標題都嫌艱辛，實在好難想像，曾經有人願意用幾千字書寫怎樣砌一隻高達出來，而更難想像是，竟然有人真係會去睇晒呢幾千隻字，即使睇嗰條友（即係我）明知冇能力照樣砌到——但我依然願意睇，當時的我實在太愛砌模型，嚴格來說是砌高達。《模型神童狂四郎》是我最愛的漫畫。 每次大人帶我去睇模型（真係得個「睇」字），我都異常亢奮，而最最最亢奮，肯定是前往位於窩打老道的「環球」。對當時的我來說，這是模型之聖殿。睇模型，離不開在玩具舖。OK，模型的確是玩具，但模型絕不止於玩具——玩具只是即買即玩的完成品，模型卻需要你動手組裝，你的技法如何，你的完成品也必如何；模型組件盒盒一樣，但完成品件件不同；有些人注定是砌出恍如Art Piece的模型專家，亦有些人，注定只能夠「素組」（即係齋砌），Yes，即係我……但只要我身處「環球」，便自然心生一種變成專家的感覺：店內設有櫃枱，無私地讓你打開模型盒，拎出盒裡的組合說明書及塑膠組件猛咁睇——其實唔知睇嚟做乜，但這過程，卻超越了睇的層次，提升為審視、鑑賞——即係成個專家咁款。 問題是，我唔想得個殼，我要成為真的專家。於是我不再滿足於「素組」，開始練落油噴油，而每逢噴油，就不得不稍移玉步到樓梯口，貪嗰度通風以防化學物料吸入口（這算是一個愛砌模型的屋邨仔福利）。 那麼，在砌模型過程裡我究竟得到甚麼？我不知道。只知道，每逢砌模型，就需要靜下來，思考，因為這是你同面前嗰堆膠的一場糾纏、搏鬥；最終，你可能砌出一個傑作，但更多時候只是組合成一堆唔知乜膠。但在那過程，你的確暫且斷絕了跟塵世的聯繫（撇除偶爾路過嗌你的隔籬屋C9），是一場真正的自我專注歷程。 但塵世間不是任何事都保證可經由努力獲得。我始終做不成模型專家，《精密模型》亦冇再出版，坊間模型舖數目也持續減少……今時今日仍然有人砌模型，但數目，一定比我做細路時少得多。 但這不代表甚麼。只是時代更替，連玩意也隨著更替；你可以惋惜，但無需下下都提升到慨嘆今不如昔。 今天真真正正的進步在於：竟然有人自稱戀愛專家開班授徒，而又竟然有人俾錢報讀。妖我一於化身戀愛Buffet專家，張揚地高舉寓Eating於Dating（對調亦可），開設專頁提倡又食又溝；總之大前提是儘快招攬名氣（和Sponsor），反正在這時代，名氣比名實重要。 （原文刊於am730） #月巴事