【龔成問答信箱】（Q22581-Q22600）

Q22581：

成哥，最近我在考慮買保險，想請教下你買保險時會考慮什麼因素，點睇供既年期之類？

龔成老師︰

保險產品其實有好多，當中條款、保障範圍、供款方法、年期、賠償方法等等，都可以好唔同，好難一概而論點為知最好。

但你必需要明白，"保險"個本質和對我們的作用。其實"保險"主要係用來防守，買足夠保障就可以。

如果你係全無保險，你可以優先集中係人壽、住院保障、危疾，這3個較重要的範疇去考慮。

而保障範圍，如果唔知點去從不同計劃中比較，你可以較著眼一些較大數目上。(當然保障和不保事項，都要注意)

另外，儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22582：

龔sir 你好，本人43歲，月入$20000，扣除開支後，每月有$12000元剩，現有16萬現金，想每月供$4000元平穩股票。

參考你之前的資料，可否每月各供$1000，中電、盈富、港鐵、金沙，是否合適呢？謝謝你！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你43歲年紀，這個組合係可以。現時大市在合理區，我比較建議月供金額，去到每月儲蓄一半。而餘下一半儲蓄，我地就先儲起，等大跌市機會。

而你額外$2000，可以供一些平穩增長股。如果想保守D，或者你本身投資知識不高，你可以供平穏增長股。若你想進取少少，可選潛力股，但風險都會較高，你要自己衡量。

現時大市只是合理區，你現有16萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22583：

你好成哥，好鍾意睇你既分析，亦都跟你長期投資，暫時都賺咗20%，最近有個人生交叉點，想問吓投資有道既你既意見，最近發生天大嘅好事，

就係抽中咗居屋，但係好可惜應該剩返山麗苑，好抵， $5300尺，2,500,000 ，有450尺，星期三去選樓，但係真係好山旮旯，要到粉嶺站或聯和墟再轉車入去，

落車仲要行10至15分鐘，其實我係自住既，期望將來嘅交通配套，但係如果政府冇規劃就PK了，你覺得買得過嗎？

龔成老師︰

其實政府長線在新界東北，都係有發展計劃，估計未來交通會日漸完善。但估計唔會短時間內發生，所以你應用現時環境狀況去做考量。

而且，長線新界東北發展，係會以住宅為主。你可以預期人口增長，會比該區職位增長為快。所以，大部份人要工作，都要往外走。

但粉嶺始終跟市區(特別係中環和東九這2個商區)，一定距離，吸引力大減。而且在未來不少新單位供應下，你預這區樓價增長力都會較弱。

雖然投資價值，這個居屋單位唔算高。但畢竟佢入場費有折讓，令你可以有較多資金作其他投資。

而且，從自住角度，居屋都有一定價值。雖然佢位置係有點偏遠，但你要睇翻你長線生活所需，係唔係完全接受唔到。你自己要從便利度,生活所需和價格成本中，自己取個平衡。

------------------------------------------------

Q22584：

龔sir 你好，本人39歲， 太太33, 月入各8萬及6萬。均為專業人仕。 每月連按揭支出約6萬, 有個兩歲大女兒。

擁有自主物業估值約1250萬，欠房貸400萬。

流動資產分佈有大約100萬現金，股票戶口約400萬， 10% faang, 45% tesla, 10%ark etf系列， 15%中國科網，20% cash

曾經試過full time option trading, 但發覺都係打工cashflow較穩陣。如果想發點離開day job， 請問有什麼已經可以提供? 謝謝!

龔成老師︰

首先，你要明白。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

用OPTION這類工具短炒，風險十分高，可能你短期會賺，但長線多數都會係虧損收場。所以，你要先調整好你自己對投資想法，再一步步開始你累積財富計劃。

以你39歲年紀，應以增值為主。

由於你已有物業在手，我地可以先集中用優質股，去累積財富，令成個財富組合更平衡。你現持有股票，都合適，但存在2個較大問題。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你TESLA明顯係超標，如果佢出現問題，你會成個組合，受到嚴重影響。最好你沽少少，換至其他優質股，去平衡風險。

另外，你而家太偏重左係潛力股(全部持股都算係)，佢地雖然有增長潛力，同時風險都較高，不宜持有過多。

以你年紀計，潛力股可佔約4-5成，餘下應用平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市只在合理區，餘下資金先儲起，等大跌市出現時，才用來掃貨，並長線持有。

------------------------------------------------

Q22585：

龔sir你好，我係你股票班嘅學生。剛剛開始投資，每月可儲大約$20,000，現金有$600,000。想先投資8成平穩增長股票，2成潛力股。

想問吓︰

1）港鐵，盈富基金，領展，長建，金沙，騰訊，小米應該幾錢買入先算合理價錢？

2）月供咩股票會好啲？

我今年28歲，可能2年後會結婚

我有打算每月供比亞迪

龔成老師︰

1) 現時除了小米(1810)現等佢回多1,2成，才到合理區外。其餘上述股票，都已在合理區，可以分注入貨。

而月供的話，現在這些股票，已經可以開始。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時28歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

由於你未有投資經驗，現時先較集中係平穏增長股，都係可以。到你有一定經驗，建議慢慢加大翻個潛力股比重，去提升增長力。

現時大市只是合理區，你現有60萬資金可以先投入10-20萬，用"分注"形式，慢慢買貨。餘下資金和每月所儲倒的資金，就等你累積到一定投資經驗，或者大市出現較大回調，才加大力度掃貨，然後長線投資。

至於比亞迪(1211)，這股經常都處略貴水平。

如果唔夠貨或無貨，而又想買入，只建議月供，在$180以下先月供較好，但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

------------------------------------------------

Q22586：

龔成老師 請問你如何看1024和2160？

我老爸就是典型的跟風熱炒時入了很多積蓄..現蝕了75%現在我不知道可以如何幫他..不希望眼白白看他蝕了辛苦儲下的幾十萬

龔成老師：

快手（1024）最大問題是之前貴，加上監管因素，中短期仍弱。

不過從本質來說，佢係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍未平，可稱為合理區中上，但短期股仍會十分波動，這類股只宜小注，如果持貨%較多，可能要減少少，餘下再守。

至於微創心通醫療科技（2160），是有危有機類，這股如果小注就守住先，但太多都宜減部分。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業有一定獨特性，同時長遠發展不差，不過估值方面就十分難，因為這刻仍未有似樣的盈利。只可以話現價唔算平，因此，這股可長線，等佢更大收成，但要留意一定要控制注碼。

------------------------------------------------

Q22587：

金沙現價可入嗎？

龔成老師：

金沙（1928）長遠仍有質素的。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。佢長遠是收息及平穩增長型。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22588：

你好，我有点想撈1024
好平

有個燈神話 700 见400
搞到我無入货

又叫我入156-157入1772
700@425已经好低

龔成老師：

唔好信其他人，要自行分析企業，無人能預測到股價走勢，巴菲特都話自己唔得。

另外，投資要長線，建立長期組合，你要好好想清楚投資那些股，不要被人影響，不要一時一樣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

快手（1024）風險較高，但業務不是劣質，現價絕對不是平。

騰訊（0700）合理價，但中短期較一般，長遠正面。

贛鋒鋰業（1772）有質素，但風險高。

你好好設計投資組合，投資策略，不要將所有資金，都集中在高風險股。

------------------------------------------------

Q22589：

老師，想問下而家國家講炭中和,新能源等. 媒氣(3) 雖然有成本轉嫁能力 但係咪前景有威脅呢? 唔該

龔成老師：

不會有威脅的，因為佢的類別，部分都是國策支持的。

以長遠價值分析，煤氣（0003）有質素的，長遠仍有平穩增長力。

香港業務增長力未必好強，但中國部分不差，長遠仍有發展力。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，是平穩增長型，現價合理區中間至中上。

------------------------------------------------

Q22590：

龔成老師你好，本人24歲, 月入$22000, 每月儲蓄$5000

早幾個月開始月供股票:
2800 $3000
3067 $1000

而家持有:
2800 900股 $28.55
3067 340股 $16.24
1177 3000股 $7.51
1810 400股 $24.85
0823 100 股 $73.30
2638 1000股 $7.67

想請教一下暫時投資方向正確? 可以點樣繼續提升嗰投資組合? 手頭上仲有現金大概25萬, 想趁最近跌市可以入啲貨。

我知道老師你經常提及買入價唔係最重要, 但由於投資經驗尚淺, 唔係好識分咩時候可以買入, 希望老師可以俾啲意見, 多謝!!

龔成老師︰

以你24歲年紀，應以增值為主。你現時月供策略和持股，大致上係無問題。

除了港燈(2638)係收息股類，增長力唔會高，主要係收入股息，以你年紀不宜持有太多，故唔好再加注。

現時大市在合理區，你可以現時再用土5-8萬，去增持一些優質股。餘下資金，就等你有一定投資知識，或者大跌市時，才動用。

其實你現時無投資知識和經驗，對企業估值，點去定平貴未太了解。未來時間，你都係集中用月供或分注模式，去做增值，可以減低買貴貨風險，對你而言會較理想。

以下是一些優質股，都適合你，你可以參考一下。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)。如果有投資美股，可投資VOO。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22591：

我今年27歲 係一個理財非常保守既人 畢業之後一直只有儲蓄 現在有60萬現金 沒有任何信用卡 負債 物慾也很低 近來有唸法想開始投資 增值

但自己其實好怕蝕錢 龔sir認為我呢個性格係咪唔適合投資？

龔成老師︰

其實我覺得你性格未必有問題，反而係你對投資而件事架理解。

好多人都覺得，我拿住現金唔投資，就無得輸。但你唔明白，你都係在進行投資。你將你用時間和精神賺取的回報，全數投資在"現金"項目之上。

由於現金係可以無限量發行，貶值係必然結果。所以，你長線財富其實就跟住現金一齊在貶值。

你試想下，10年前100蚊可以買多少個巨無霸，現在又可以買多少個。而你收入增幅，有無巨無霸價格升幅咁大，你就明白貶值的風險。

因此，我地必需將現金，轉化成為優質資產(如物業、優質股)，去令財富不會貶值之餘，有一定增值能力。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應以增值為主，建議你用「平穏增長股」 + 「潛力股」作組合，去創造一個增值平台。

除了現有資金，我都建議你用每月空出來的錢，去做月供股票，去加大你增值能力。

現在你每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

現時大市只是合理區，你現有60萬資金可以先投入10-15萬，用"分注"形式，慢慢買貨。

餘下資金和每月所儲倒的資金，就等你有一定投資知識，或者大市出現一定程度的下跌，才大力度掃貨，然後長線投資。

同時間，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q22592：

我而家仲持有呢兩隻股票，恆大（708）去到13.7，美圖(1357) 去到1.55

不過依個禮拜佢哋真係跌得好犀利，但係我覺得都既然跌到咁，想搏一搏唔放住，我唔急住要啲錢（投資左各5萬），其實都係期望佢升返等我蝕得少啲，

你覺得係咪都冇希望呢，雖然估唔到佢地發展成點

比阿迪（1211）之前話過可以繼續揸住，而家佢升到258，其實我都仲可以繼續等佢再上，因為我都唔係等住啲錢用，你覺得我當佢長線投資好唔好啊？

我唔知我個想法有冇問題啊，謝謝成哥指點

龔成老師︰

其實這2隻股票，發展潛力係有，但不確定性都好大。特別係恆大汽車（0708）﹐佢現時連第一部車都未有，風險就更高。

所以，當大市氣氛較弱，或者有些負面因素出現，個股價就會有較大波動。

若佢地只係佔你組合好少，你係可以守住先，再觀察。相反，你就要沽少少，去減低風險。

比亞迪(1211)依然有發展空間，但現價已經係開始貴。由於佢有質素，長線持有會較好。

如果你係好保守架投資者，都可以考慮"升一倍，沽一半"，去先收回成本。但當然，長線持有，永遠都係最有效的增值方法。

------------------------------------------------

Q22593：

老師，想問下708恒大汽車近排跌得好緊要，我41.80及35.70有兩手，近期不斷跌，想問下需唔需要止蝕先？

謝謝

龔成老師︰

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

由於佢不少市值，係建基於"未來"。因此當大市較波動，或者好似現時有較多不利消息，就會出現較大調整。

我唔係話佢無投資價值，只係不確定性較高，而且母企問題，都令佢風險高左。投資時，必需控制注碼，不能太大注。

若2手佔你總投資好少部份，你可以守住先，再觀察。如果佔較多，建議你最少沽出1手，去減低個風險。

------------------------------------------------

Q22594：

你好, 成哥
1. 1883和6823誰較好?
2. 0012 恆基現價可注?

龔成老師：

香港電訊（6823）會較好。

佢在2020業績出現下跌，由於疫情關係令各國實施的旅遊限制及其他預防措施，導致漫遊收益大幅下跌。

但這個只會係中短線影響，長期業務穩定，見佢近期已正常翻好多。

加上用100%派息的政策，雖然增長力不強，但類收息，這股絕對不錯。

暫時睇唔倒佢長線質素有大改變，長線持有無問題。現價合理區中上部。

恒基地產（0012）有質素，雖然增長力不算好強，但都有平穩增長能力，不差的。

佢始終是香港大型地產發展商之一，雖然賣樓最好賺的年代過去左，但在香港賣樓仍是賺到錢，不錯的。

這股都有質素，單計佢手持農地是全港最多的發展商，就明有一定的價值，當然，農地要發展要好長時間，所以先話這股要好長線。

------------------------------------------------

Q22595：

Sir, 我手持籃月亮10000股，平均價$13.6，現時跌好多。

由於佢係囯內的P&G,所以一直跌都冇走，近期業績轉蝕4000万，好明顯之前係做好條數上市。

多間大行都調底目標價，這樣是否質素已變？是否應該止蝕離場？

龔成老師：

藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。

佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。

為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。

相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。

整體有質素，不過之前貴，現價算是合理區中上部，小注持有都可以，當守住先，但如太多貨可能要反彈減少少。

------------------------------------------------

Q22596：

你好，本人30歲，而家月入$28,000，現金有$200,000，月儲$5,000，月供股票$3,000盈富和$1,000港鐵，手持京都物流200股，平均價$45入

1) 應否加大月供股票?

2) 各月供股票應加至多少？

3) 應否再增加其他的月供股票及多少？

4) 京東物流的前景如何？幾時返家鄉啊？

謝謝。

龔成老師︰

1) 以你現時人工計，每月儲蓄佔比唔高。如果你可以的話，最好盡力加大可月供金額，去加快你財富累積速度。

但同時間，由於現時大市只在合理區，每月資金唔好盡用，要留翻部份，等大跌市時出手。

2) 以你現時每月儲蓄$5000計，股票數量已經係可以。長線計，你就要以創建一個有增長力、有質素的平衡組合。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

但指數基金係不受此限。

3) 當你未來每月儲蓄增值，你可以考慮加入一些潛力股。至於佔比重多少，要睇翻你風險承受能力和投資經驗，一般以你30歲年紀計，最多佔4-5成。

但若果你風險承受能力低，或者投資經驗較淺，最好再向下調1-2成會較好，甚至先集中在平穏增長股，都係可以。

4) 京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值。

現價計唔平，要回到招股價，唔係話無可能，但可能你較長時間。

------------------------------------------------

Q22597：

hi 你好 有少少問題想請教你

如不幸買入了老千股 應該等佢升反再賣 定點處理好

龔成老師︰

其實我地是否持有一隻股票，主要係睇佢質素和前景。

所以，如果你肯定佢係老千股，馬上全數沽出會係最好方法。若你持股較多，真係唔想一次過沽，你可以分段每有反彈少少，就沽出部份。

但最好都係盡快沽出，因為老千股和無質素股票，長線只會愈跌愈深。

------------------------------------------------

Q22598：

龔成老師，你好！本人40歲已婚，與家人擁有兩個物業，一個放租，一個與家人自住，另有一車位放租。而後期買入的自住單位是村屋（地下花園連車位）住了五年，

但一直都不太適應，長遠希望換回屋苑式住宅及有基本生活配套的社區，父母已退休，現金約20萬，每月家用收入約$8000。

而我自己由於公司變化於前年決定離職休息一下，沒有收入兩年，主力靠先生負責開支，現金約30萬，沒有股票。

最近萌生想重組資產的想法，預備到合適時機就換樓，所以想向老師請教應如何配置：

1放租物業： 父母於92年買入的自住單位，現時市值約680萬，供滿後我們於2014年將其加按並購入現時自住的村屋。貸款額290萬而目前負債約240萬，每月供款約$10500 ，
租金收入：$12500另加管理費
2.自住村屋： 於2014年以355萬購入，目前市價約620萬，樓按6成，目前負債約170萬，月供約$9000 。村屋是跟親友一起各自購買分層單位，所以全棟都是自己人，
但若要轉換的話相對也不是即時可以決定。
3. 車位：與放租物業同屋苑，以72萬買入沒有貸款，市值約150萬，租金：$3200
4. 有一間與朋友合資的清潔及維修工程公司，開業5年，第三年開始每年平均可獲分紅10-20萬，可補貼生活開支。
5. 而先生另有穩定職業月入30K，我們近年有一宿舍單位可住，因與家人感情良好，所以現時會村屋和宿舍兩邊住下。

現時想重組的情況是：

1. 由於放租單位較細，短期內都不想搬回原址住，但地理位置生活配套係有優勢，所以傾向先賣此單位，套現現金再轉去投資收息股及購入少量潛力股先增值，
希望讓父母可增加現金流收入同時，亦想嘗試把部分資金增加。然後到物色到合適單位先買，（其中意向是800尺二手單位，或父母搬回市區細單位，我與先生到宿舍住。）
然後待新單位買到後再把村屋放掉。
2. 還是應該先放村屋，負債餘額較少？但先放村屋，就不能慢慢選擇新地方。同埋要與親友分開，而且外婆也在，所以要協調的事較多。
3. 暫時兩層都不賣，到適合走時把村屋放租，再另租地方住？
4. 車位是否不應賣掉？如賣就會轉去買收息股及平穩增長股
5. 以往較少接觸股票，但近半年開始留意老師的FB，希望重組資產之餘，可利用車位及公司分紅的收入慢慢月供一些平穩增長股及潛力股，
希望開始先增值後現金流的計劃（已根據老師在FB的分享開始做了些股票分類），或者老師有甚麼意見？

篇幅頗長，謝謝回覆！

龔成老師︰

我地做財富增值，除了增長力和質素外，都講求平衡性。你現時已有不少物業資產，而優質股則全無，所以未來我地會先集中儲優質股，去令組合更平衡和多樣性。

雖然你現時財富組合，近乎100%在物業部份，但唔代表我地一定即刻去沽物業，買股票。因為香港物業買賣成本好高，除非個物業質素好有問題，或者太細(<300呎)令投資價值不高，否則我比較建議你持有。

由於你現時放租單位，相信係有一定質素，而且大致可以收支平衡，能夠以租養樓，故這物業我建議保留，讓其自行運作。

因為當你將佢換成優質股，我地唔會知道最終，股市是否一定跑嬴樓市，而且買賣成本都唔細，唔建議咁做。

車位方面，其實租金回報率唔算高。如果你覺得佢長線升值潛力不高，可這個部份，可以考慮用來套現。

如果你們宿舍，可適合你和家人中短期居住，你可以考慮將村屋放租，去令你們有更多資金去投資。

如果不可行，你可以維持現狀。純粹用每月儲蓄，去累積優質股，為財富增值。到有一定金額，才考慮賣出村屋部份，去換成目標居所。

大體上，除非你有搬離村屋的迫切性，否則一動不如一靜，因為畢竟2個物業都係資產類，有投資價值。你先用現有資源，去投入優質股增值，到一定金額才去買新屋，相信會較好。

投資優質股策略上，你可以選擇一些「平穏增長股」和「潛力股」。你每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。如果有投資美股，可投資VOO。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

大市現處於合理水平，現有資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

但由於你家庭只靠你先生一人工作，我建議先扣起半年開支，才開始投資計劃，會較穏當。

而你家人的20萬現金，同樣可先用一半投資，但目標係一些收息股。餘下一半，都係等大跌市機會。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）。

------------------------------------------------

Q22599：

龔老師 請問6608百融雲已跌超過61%，我係新股抽中，後尾又溝又跌，需要斬倉走嗎？雖然得幾手，但呢只表現最差。

龔成老師：

一般新股都以貴的價上市，因此投資新股半新股要好小心，溝貨一般都不適宜，加上佢業務風險高，有危有機類，更不宜投資太多。

百融雲（6608），係中國領先的獨立AI技術平台，為金融服務業提供服務。根據報告，按2019年收入（已計入精準營銷服務收入）計，集團為中國最大獨立金融大數據分析解決方案供應商。集團主要通過提供數據分析服務、精準營銷服務及保險分銷服務產生收入。

佢係中國累計為逾4,200名金融服務供應商客戶（包括2,438名付費金融服務供應商客戶）提供服務，包括絕大部分中國國有銀行、逾650家區域銀行、絕大部分中國消費金融公司、逾90家主要保險公 司及其他多家金融服務供應商。

佢以大數據及AI技術提供服務，支持金融服務供應商的貸前風控、貸中監控、貸後管理及保險風險管理需求，助其降低所面臨的欺詐風險，並提高其承保及風險管理的效能。

收入增長快，不過未有盈利，風險會有少少高。但長遠有發展力的。

投資價值都有，但估值難，股價上落大，這類股小注投資都可以，但就注意風險。

建議你減持，餘下再守。

------------------------------------------------

Q22600：

我有一個問題一直唔明白想請教

Warren Buffet quote “ rule #1 don’t loss money and rule #2 don’t forget number 1 “
是指one stock or the entire portfolio?

龔成老師：

巴菲特的意思，絕對不是「永遠不要賣出，蝕就不賣」，你完全唔會了他的意思。

他的意思是，投資前，要做極大量的功課，令自己有好大的贏面才出手，盡量令自己不要輸錢。

當他持有的企業質素轉差時，他會理性止蝕，面對問題，有些散戶以為「就算持有劣質股，我一日不賣，一日不蝕」，這是極錯的想法。

你要盡最大努力，去學投資。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21461-Q21480）

Q21461：

早晨龔Sir，小弟有個問題想請教下，每月扣除基本洗費之外，投資/保險/生活費，應該點樣分配較為合適？

現時23歲，每個月15K，基本洗費7500(包家用)，每個月大概可以儲7-7.5K。如果開始買重疾+人壽保險，應該每個月供幾錢合適？
謝謝！

龔成老師：

首先你要明白理財概念，理財就是令我地的資金在可承受風險狀態下，最有效去利用，配置上會要求「攻守兼備」，你要先做好防守部分，之後就考慮進攻。

第一，考慮備用現金，最好是3-6個用的基本開支。

第二，適合你的保險，至於多少，這點就好個人化。

第三，就是進攻，部分會投資，部分會等機會投資。投資的資金，一般都是中短期不需要用的。

你現時是累積財富的黃金期，支出當然最好減少，盡力將資金用於增值方面，保險方面，足夠就得，不用太多。

月供可以$3000-$5000，同時最好有部分資金留現金「等投資」，ETF或優質股都可以，但你年輕，宜加入一些潛力股（當然，這會要求你有一定的投資知識）。

------------------------------------------------

Q21462：

老師你好，我想多謝你一聲！同做少少分享，我大概一年前上過你堂既學生

見好多人話月供股票賺唔到錢啊，無用啊

之前睇你page開始月供股票，然後我簡左幾隻月供，然後自己果陣未識太多一手手買左幾隻股票到而家都渣緊

今日睇返出黎既成績，就兩個都有賺緊錢既，但月供係比較多，而上左你堂後學左野買既幾隻股票而家都有賺到錢

龔成老師：

太好了！

其實坊間人往往唔會了月供，認為月供股票無錢賺，但我地要明白，每種方法都有佢的利弊，最重要是「適合」。

月供的好處是買入價平均，能有效減少風險，而自行一手手買入的好處就是捕捉時機，因此，如果一個較有實力的投資者，自行捕捉時機可能會較好，但對大部分投資者，月供往往都有不差的回報，因為捕捉時機方法，其實不易進行的，部分散戶更會因自行一手手買而出現虧損，反而月供更能穩中求勝。

而我地投資，應該「先想風險，後想回報」。

我相信現時你已經有一定的投資知識，你可以部分資金月供，同時部分留現金等機會，相信會有不差的效果。

------------------------------------------------

Q21463：

老師，謝謝您上次給我的意見，我已聽了您的建議賣出了一些貨止蝕，之後也買了一些比較優質的股票，不過有些仍是會心急在高價買入，結果……….

以下有些問題想問問您。

0390中國中鐵、0716勝獅貨櫃、0880澳博控股、1128永利澳門、2888渣打集團、0390中國中鐵，因為都是買了很多年，一直等了很久都沒有升回，我該不該全部賣出止蝕？

另外，想買份必瘦站，但這幾天看已經升好多，現在仍合適買嗎？

0175吉利汽車 1000股 29.75入
0390中國中鐵 1000股 10.94入
0716勝獅貨櫃 16000股 1.45、1.49、1.62入
0823領展房產基金 100 70.5入
0880澳博控股 1000股 16.68入

1128永利澳門 400股 23.8入
1810小米800股 25.6入
2800盈富基金 500股 25.4入
2888渣打集團 100股 119.8入
9988阿里爸爸 100股 290入
0555御泰中彩控股 50000…忘了多少入 已停牌

龔成老師：

如果你有高追的習慣，建議你在之後多用分注，或月供模式，減少一次過高位買入的風險。

我地決定持有或止蝕，最重要是睇企業質素。

你持有的幾隻股，基本上不是無質素的，但部分質素不是高，同時無乜增長力，如果你想組合有較強增長力，可考慮賣出：中國中鐵（0390）、勝獅貨櫃（0716）、渣打集團（2888），轉其他更有增長力的。

御泰（0555）暫時無野可以做到，日後復牌都不要有太大期望，見佢之前年年都出現虧損，這類股策略一定是賣出的。

至於必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

至於其他股票，問題不大，可持有。

留意翻，你手頭上點都要有一定的現金在手，不要心急去入貨。

------------------------------------------------

Q21464：

老師，我有樣嘢想問啊，京東集團，平安好醫生，他們沒有息派？

龔成老師：

兩隻暫時都無。

因為這類潛力企業，當每年賺左錢後，都會偏向投資落自己公司裡再發展，所以一般都唔會有派息，或者派息金額好少，這都是正常的。

管理層認為公司仍處於一個增長期，因此資金留在公司發展，對企業及股東的長遠價值較為有利。

------------------------------------------------

Q21465：

龔Sir, 想請教下你對虛擬貨幣既睇法？

龔成老師：

虛擬貨幣，我不是這方面的專家，所以我太大意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

------------------------------------------------

Q21466：

Hello 龔Sir
我係90後 今年30了 要等到8月先就到時間上你既堂

月入兩萬 如果而家先由零開始會唔會太遲?
如果想係8月前先從書本入手，應該先讀邊一本?

係咩都未認識既情況下是否先暫緩買股票? 定可月供一d長線股? 謝謝

龔成老師︰

你今年才30歲，依然係十分年青。只要用努力學好投資知識，再用正確策略和方法，絕對可以做到理想的財富值效果。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇這幾本，都你課堂上吸收知識，會有幫助：

《80後百萬富翁》
《股票勝經》
《財務自由行》

之後再睇其他。

在上課堂前，你都有一些事情可以先準備。

第一，增加知識，先睇我建議的3本書。

第二，了解銀行及證券行，去開一個證券戶口，並準備做月供股票。

兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，你可以先用每月儲蓄的小部份，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

之後，到你完成課程後，你會有較完整的投資概念和選股知識。到時你才進一步計劃，如何建立一個長線增長組合，咁會較理想。

上述的月供，金額不用多，因為只是給初階者一個累積財富的方向，你要同時留有一定的現金，而正式的配置，會等你有知識，及上完堂後，先正式開始。

期待8月課堂中，見到你。

------------------------------------------------

Q21467：

龔sir,想睇下你對03382天津港發展有咩睇法？

我目前0.62 入左30手，因為都睇好佢發展潛力，但不知應否再加注，請比d意見我

(Btw,如龔sir要case分享，請遮名請頭像)

龔成老師︰

放心，我係FB分享時，不會出讀者頭像或網名等個人資料。

天津港發展(3382)主要為客戶提供港口服務，包括：集裝箱處理、貨物裝卸、儲存及配套服務等。

此股都有質素，但唔算係好高。過往幾年盈利都較波動。賺錢能力唔算係好強，加上負債偏高，都係會扣分的地方。

你投資係可以，但只宜小注。若現時持股佔你組合比重較高，除了不要加注外，更建議你減持部份。如佔比重不高，長線持有就可以。

------------------------------------------------

Q21468：

你好，想請問一下你意見.....我買左$100,000阿里巴巴，$260買的，放定keep好呢？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

阿里巴巴（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，這股可以長線投資的。

但我地投資，除左買入優質股，都要考慮成個組合的配置，最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

我地唔好成個組合，只集中係1,2隻股票身上。同一行業不能太多(不超過30%)，同一股不能太多(不超過15%)。要平衡。

因此，如果阿里巴巴(988)在你組合佔比太重，建議沽出部份，去平衡個風險。若只係超標少少，可以不用沽，用將來新資金慢慢調整，就可以。

------------------------------------------------

Q21469：

龔sir, 當初美金持續弱，又不停印銀紙，令到黃金大升，趁住黃金回調嗰時我買入咗1787山東黃金$18都有成16500股。

諗住短線炒一轉，點知後來比特幣短線取代咗黃金功能，我冇止蝕，而家得番15蚊。以你睇今年有冇機會平手走或者要止蝕?

後黎買咗你四本書，百萬富翁、股票勝經、選股勝經、財務自由行，獲益良多。覺得都係睇返企業價值比較適合我，黎緊會搵時間上你堂。

多謝解答!

龔成老師︰

記住，短炒唔係一個正確投資方法。最賺錢的永遠都是在合理，甚至平宜價去買入一些優質企業﹐並長線持有的一群。

所以，我地投資一間企業與否，應該睇翻佢企業和行業本質，來做決定。

山東黃金（1787）主要於中國從事黃金採礦及加工，以及銷售黃金產品。

佢係於中國合共控制及經營十幾座礦山，大部分位於山東省，並於中國擁有多個選礦設施及冶煉及精煉設施；當中，持有一定數量的黃金。

佢雖然有一定的資產價值，個都要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

我唔會去預計佢中短期走勢，我地一定要睇長線。因於佢質素唔算好高，若你持有比例佔組合不少，建議你沽出部份，去平衡個風險。

餘下部份，可以守。

------------------------------------------------

Q21470：

老師，我現時倉位有2158、968、1810、6885、6618、1209、941、9988，以上股票總價約40萬，另外1830約值17萬，現金10萬左右，以上股票會否太多太散？

另外每月供平保、中移、阿里、越秀房托及盈富共一萬，總體黎講有冇咩大問題，可否指教一下

龔成老師：

你持有的股票，基本上都是有質素的，可以長線持有，而金馬能源（6885）就不宜持有太多，另外，持股較集中潛力類，你最好平衡翻個組合。

至於必瘦站（1830），有質素的，可長線，我都有貨長線，但你持貨比例較多，因為單一股票佔組合比例去到15%已是上限，因此，你宜調整翻個比例。

至於月供部分，都是有質素的，因此無問題，長線進行就得。

要留意，現時市況未算平，而你手上的現金比例不算多，因此，最好留翻多少少現金，或入貨力度不要太急。

------------------------------------------------

Q21471：

龔SIR, 你好, 有事請教:

現時股票組合:
小米 200 股 買入價$29
平安好醫生100股買入價$118
香港中華煤氣5,000 股買入價$12.24
京東健康150股買入價$110
藍月亮集團3,000股買入價$ 15.3

暫時成個組合都係虧損-9.39%, 最大虧損係藍月亮, 現時每月會儲到$10000, 想問:

1. 現時既組合應唔應該調整?

2. 每月儲$10000 應該投資其他股定還是係現有組合不斷增持?

謝謝, 祝身體健康!

龔成老師：

1）現時組合裡的持股，基本上都是有質素的，問題不大，最大問題是買入價，相信你未有企業估值能力，建議你日後買股票，多用分注或月供的方法進行。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂。

除非你持貨過多，否則，這股可以守的，但就唔好心急加注。若果持貨過多，就可能要考慮賣部分。

2）由於現時你組合股票隻數不算，你投資其他股票較適合。其實最好是每一個股，佔股票組合的比例在15%以下。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21472：

老師你好
本人一路都諗唔通 我現在應怎樣處理會最好 希望老師可給本人意見 謝謝你

我和太太現在48歲
兩人月入大約$75000.
有以下資產：

1）購買時$128萬 現市值$500萬 現收租$12500.

2）購買時$225萬 現市值$750萬
現收租$14500.

3）商場舖 購買時$225. 現值$380. 現收租$9500.

4）有兩個車位購買時32萬 現值$190萬 現收租$4500.
以上全部已揸現契不用供款

但現在我用$29000.租緊樓住，但每兩三年又要搬，好煩 所以想再買多層樓 大概$900-$1500萬內

我應該怎樣做先可以最簡單完成到呢 希望老師幫幫忙比個意見。謝謝

龔成老師：

如果你再投資物業，會令你十分集中在物業類別，這會有集中風險，當然，如果你本身其他資產類別好多，同時現金好多，就問題不大。

比較好的做法，是換樓，例如賣出物業（1）及一個車位，加分現金，再做部分按揭，都可以完成你的置業物標。

建議你睇《財務自由行》《大富翁致富藍圖》。相信你會更清楚方向。

------------------------------------------------

Q21473：

你好 第一次問野 想問我現在揸住493同埋1668和3800還值得留嗎？唔該老師

龔成老師：

3隻都不是劣質，但就未必值得持有太多。

國美零售（0493），從過往分析，只是一般。

企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是黃生回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。以理性分析，這刻投資值博率，只是一般。

華南城（1668）不過不失，不過增長力比過往略有減弱，現價合理，但潛力度不足。

這股唔建議持有太多。

保利協鑫能源（3800）業務不穩，質素中等。不過不是無增長，是有危有機類。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小小注好了。

------------------------------------------------

Q21474：

老師你好，我今年30歲，月入約7萬，現有大約60萬cash。因為收入穩定又冇咩家庭負擔 所以想放多d錢落股票做資產增值。

但因為年尾就要結婚，所以而家暫時只敢再多放10幾20萬先，長遠都會打算再投放更多落去，所以想而家提前學識同埋訓練自己既技術同眼光。

持有股票: 1000股1972太古地產 1000股2388中銀香港 500股066港鐵 20股TSM 100股AAL 10服BA 30股PRNT

因為覺得3D printing會係未來快速發展 所以都想買多d PRNT ETF 老師點睇?

同埋老師建議既VOO同QQQ現價合理嗎?

見美股呢期好火熱日日升，所以怕自己高位入。

同埋老師會建議點樣adjust我而家既portfolio?

老師係之前回覆提到既阿里（9988）、騰訊（0700）、港交所（0388)同小米（1810）我都有望過同埋覺得有前景，但現價合理嗎? 老師會建議幾錢入手?

另外媽媽都放左d錢(約20萬)比我想我幫佢投資，打算幫佢老人家買d穩陣股，我自己心儀中電港燈媒氣等公用股，亦對地產商等舊經濟有興趣，老師有冇咩手水建議? 現價有邊隻合理買得過?

唔好意思，一次過問好多問題，多謝老師既教導!

龔成老師︰

記住，我地投資係要量力而為，用來投資的一定要係閒錢。如果你筆錢係有實際用途，好似短期會用來結婚，咁就唔好用來投資。

但扣除這些必要開支後，所有閒錢則盡力投入增值。特別係你年紀不大，應把握年青時間，做好累積財富部份。

你再加大在10-20萬投資係可以，其餘資金就等大跌機會。另外，你每月都可以拿一筆資金，去做月供股票，去助你累積財富。

你現時持有股票都有質素，可長線持有。

長遠計，你可以加入阿里（9988）、騰訊（0700）、港交所（0388)同小米（1810）這類潛大股，去提升組合增長力。

但由於佢地波動性大，若你投資經驗不太多，暫時只宜小注。到有一定經驗，才好加大翻個比重。

阿里（9988）現價合理區頂，可分注。但騰訊（0700）、港交所（0388)和小米（1810）都略貴，回多1,2成才入貨，會較好。

至於﹐3D打印行業，預期長線發展正面，因為這種技術，某程度上可以提高生產準確性和節省生產時間，從而減少成本。

因此，The 3D Printing ETF (PRNT) 都有佢投資價值，可持有。

VOO和QQQ現價算係合理區頂，若無貨可以小注，或者用月供去儲貨。

至於你媽媽，若想買一些穏陣股票，可以集中係「收息股」。但增長力唔高，主要係用來收息。

若想有穏定增長，可以加少少「平穩增值股」。但這類股票會有一些波動性，風險會高少少，你要自己平衡。

現時的$20萬，可先用$10萬，分注入貨。餘下的$10萬，就等大跌市機會才出手，作長線投資。

以下都係合適選擇，現價都合理區內，可以分注慢慢儲貨。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21475：

我對金沙有興趣，又見你之前有介紹埋金界，兩隻邊隻好d? 金界現價入不入得。感謝老師

龔成老師︰

金界控股（3918）都有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。另外由於市場新興，在注碼上不能投資得過多。

金界控股（3918）潛力會高少少，但風險都會偏高。而金沙(1928)會係平穏增長力 + 股息。2隻都有投資價值，視乎你風險承受能力。

但緊記，唔好太集中係個別行業或股票。個別企業和行業，佔組合最多15%和30%好了，否則會有過度集中風險。

現時大市在合理水平，以你現金和持股比例，係可以。餘下資金，等大市有明顯回調，才慢慢加注不同股票。

------------------------------------------------

Q21476：

龔成老師，上年開始一直追您既post，尤其會追睇晒你解答人地既股票問題，我覺得你好用心去同其他人分享知識，即使對方未係你既學生。好佩服你，亦都吸取到少許知識。

之前個市波動，再聽到你錄既片，愈來愈明白知識增長既重要。

我個人比較投機，因為好想好想好想趁年輕累積多d財富，所以真係睇著個價決定入唔入，忽略左買股票係買間公司既發展潛力。聽完真係會平衡到股市上落帶黎既情緒。

想請教下，如果我想學習如何從咁多板塊咁多股中揀優質股，有冇書可以介紹我睇啊？

當然我都會下期報你既班，謝謝你！

同埋想請教下你，點睇3690 & 968呢?

我覺得3690尚算有質素，雖然仍然偏貴既、受著債息影響，但相信生意上仲有增長既。請問仲有冇機會上到$400邊邊呢？

而968我自問有d衝動，投機炒國策、睇左證券行既目標價，衝動咁係$15買入左，想請教下應該如何去應對呢？

我算係年輕既群組，聽完您講，明白平衡配置既重要性，每次想入時我都一定會記著。真係好多謝你！

龔成老師：

投機好難賺錢的，不是想盡快賺到錢而投機，而是投機本身不能賺！

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你可以睇《股票勝經》《選股勝經》。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，但不是完全無投資價值，不過，一定不能大注。等回少少先開始小注，是較好的做法。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要回翻D先可以慢慢分注，但仍不是大注投資的時候。這股股價上落都大，要注意金額。

------------------------------------------------

Q21477：

龔老師,你好，我應該2年前問了你月供股票的意見。

本人現時36歲，月入大約3萬，已婚，現時扣除日常開支及自住物業供款($10,000)開支等等，每月約可儲$10000現金。

手頭上現金大概有40萬高息存款與按揭利率掛鉤, 而自住物業還有18年供款期(大約還有185萬)。

經過2年來自己買買賣賣，組合了一個股票組合, 因為上年疫情在家工作關係，作出了一些投機短炒行為，比較好運地賺了大約15萬，但知這種短炒是不健康的

另外今年工作方面較為回復正常一點，不能長期看著市場，而且自己亦想作改變令到自己做到長線投資不常看股價的習慣

所以想給老師看看以長遠來看，現時組合有沒有需要調整一下，手頭上股票現值80萬 (持有股數19隻 - 好像過多)，不知我分配水桶的類別是否合適。

用今天市值計算佔比

水桶1 (38.5%)

1. 0175 (2000股- 5.64%)
2. 0586 (56股 - 0.26% - 月供)
3. 1717 (3000股 - 4.24%)
4. 1810 (1282股 - 4.21% - 月供)
5. 3067 (3600股 - 7.64% - 月供 - 暫時想每季買一次)
6. 3918 (6000股 - 6.49%)
7. 6618 (400股 - 5.30%)
8. 9698 (500股 - 4.72%)

水桶2 (50.09%)

1. 0012 (2000股 - 8.63%)
2. 0123 (20607股 - 4.68% - 月供)
3. 0152 (4500股 - 7.28%)
4. 0270 (4140股 - 6.13% - 月供)
5. 0823 (1435股 - 13.10%)
6. 1299 (433股 - 5.19% - 月供)
7. 3188 (40股 - 0.30% - 月供)
8. 3868 (10000股 - 4.78%)

水桶3 (11.41%)

1. 0778 (5000股 - 4.86%)
2. 0941 (1000股 - 6.37%)
3. 1398 (267股 - 0.18% - 月供)

另外, 現時的月供組合是最近組合的 (HKD15,000), 請你幫我看看我的組合是否可行，還是可以加減一些股票來調整組合,

水桶1 (40%) 0586 (海螺創業 - $2,000), 1810 (小米 - $2,000), 3067 (安碩ETF - $2,000), 水桶2 (50%) 0123 (越秀地產 - $2,000), 0270 (粵海 - $1,500), 1299 (AIA - $1,500), 3188 (華夏ETF - $2,500), 水桶3 (10%) 1393 (ICBC - $1,500).

龔成老師：

短炒好難賺錢的，長遠不要再做了。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

至於你上述的持有，基本上都是有質素的，不過，隻數的確較多，如果控制在10-15隻會較好。

以你的年齡，其實水桶3類別，不用太多，或不同持有都個，你可以考慮將水桶3的幾隻股，轉到水桶2類別中。

你選股的質素無乜問題，只是配置方面可以改善。

你預中移動（0941）是水桶2-3之間。

深圳國際（0152）、粵海投資（0270）都是水桶2-3之間。

同時，月供股票也未必要供水桶3類別。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q21478：

成哥，請教股票回報率如個計算？
知道一般是：
賺錢/成本/年期x100%

但因為我月供股票所以成本會月月改變。中間又會自行買入，或賣出（比較少），咁條formula應該點樣應用？ 謝謝指導。

龔成老師：

你首先計投資的本金，再計算現時的股票+賺到的錢。

例如每月供$10000，供1年，即是投入了$12萬，現時股票市值$10萬，再加收息$1萬，再加賣部股$5萬，就是擁有了$16萬。

你的回報就是$4萬÷$12萬=33%。

就算中間經過買賣，你最重要計「總資入資金」「現時總財富價值」

------------------------------------------------

Q21479：

你好，我持有628、1091、1183、1258、3067。

龔成老師：

記住，我地是重要是睇一間公司的長期價值。

國美金融科技（0628）規模細，盈利不穩，久不久出現虧損，投資價值不高。

南方錳業（1091）經常出現虧損，業務無獨特性，投資價值不高。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但早前股價其實有點超前反映。就算近期回落，這刻投資值博率未算高，你小注好投資都可以，但不建議你持有太多。

中國有色礦業（1258）主要係非洲贊比亞經營銅開採、選礦、濕法冶煉、火法冶煉及銷售業務，主要產品為銅精礦、粗銅及陰極銅，以及粗銅冶煉工序中產生的副產品硫酸。

佢係中國有色礦業集團於銅及鈷資源開發的海外平台。

佢擁有四個營運中的礦山，即Ｃｈａｍｂｉｓｈｉ主礦、Ｃｈａｍｂｉｓｈｉ西礦、Ｂａｌｕｂａ中礦及　Ｍｕｌｉａｓｈｉ北礦。另外，Ｍｕｌｉａｓｈｉ濕法廠及剛果（金）項目亦已投產。

業務不是無質素的，見佢生意保持向上，不過，盈利就有點波動，有時盈利會大跌超過一半，相信好受成本及國際資源價值影響，反映佢有少少被動，企業質素未算最高。

過往股價上落大，要留意風險。企業質素算是中等，現價合理區中上部，都有長線投資價值，但就唔值得持有太多。你小注好投資都可以，但不建議你持有太多。

恆生科指ETF（3067），有質素，可長線。

------------------------------------------------

Q21480：

龔sir,你好想請問如果我想在網上你的《80後千萬富翁》，在哪裏可以訂購，因為我在加拿大，感謝

龔成老師：

《80後千萬富翁》
實體書：https://bit.ly/32uNJKs
電子書：https://bit.ly/3g6puKI

出版社好似話全球都送貨的，你上去了解下

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21221-Q21240）

Q21221：

老師，我聽咗你的選優質股和為何不賣出優質股覺好有道理。多謝你咁好的片，以下請假你幾個問題：

1）優質股會否因時因市而異？宜家個個都話唔好選新經濟股，但如騰信，巴巴，京東，小米（都持有）百度
，b站（目標股等待中）等我始終認為係優質股（我錯咗高追快手所以唔買，美團雖佢好但太貴）

2）最好的組合應集中買賣幾多隻優質股？定都要唔同行業優質股去平衡？

3）快手有排都未到家鄉令我反省覺以後應集中少隻優質股（80%想全買700），我是否錯？

4）我諗住係選優質中的優質，咁騰信應該係優中之優，你的優中之優係邊幾隻？

5）我之前670入過700賺唔多放咗跟住等到630再入，假期最後一日654我無放

見你答FB答話唔好放如果630買，但好多都話個市仲有機會跌，我矛盾中：覺你話唔好放啱，但又諗當日670入賺10唔放我入唔到630，我諗住短期若有機會去到660-680就放，定你都係建議我唔放嗎？

6）我205入咗比亞迪，太多信息話仲會跌（26000），我應放定唔理照長期持有？

感覺有時睇太多財經跟住個個都話會跌（之前話好多次跌真的跌），我唔理先會失手放買快手（分幾注買都係貴）

所以好矛盾（我個人都覺會再跌尤其疫情反覆，身邊見到好多行業都好差）

7）我52入咗中移動我會長揸
若跌穿50應再加注定幾多錢再加？

8）我唔會奢望3百萬變一千萬，我只要本金有一半的回報已好感恩，但感覺真的唔易，不過會努力，你要我地自己選優質股係好啱，因授人而漁，我設388@410-430入唔到因佢一跌標升，你現在建議388的買入價是多少？

9）你對來緊一個月的股市點睇？會跌至27000定會升至29000以上？

我見你叫人忍手，是否你都唔睇好後市嗎（第二季）？

龔成老師︰

1） 我地最主要都係睇企業本身質素，去確定是否一隻優質股。之後，再利用平貴，去定一個買賣策略。

現時有不少新經濟股，出現輕微過熱架情況。但唔係代表佢地無質素，唔值得買﹕只係用現時價值買入，個風險會太高，再等佢回調會較好。

我地只會係合理至平宜水平入貨，或者利用月供去儲貨。就算再好的股票，都唔好係貴價時高追，咁係好危險。

2） 一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你預大約8-10隻左右，會較理想。

3） 就算質素再好，都不要過份集中，因為咁個風險反而大左。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

4） 金沙（1928）、港鐵（0066）、比亞迪（1211）、中生（1177）、福壽園（1448）、小米（1810）等，都係一些有質素架股票。

但除了質素，我地都要考慮佢現價，到底有無值博率。好似比亞迪（1211）好有潛力和質素，但現價太貴，我地都唔會去入貨。

5） 你依然停留左係"賺差價"架思維，我地投資增值，係透過長線增有一些優質企業，去等佢自然咁升值，而唔係炒炒賣賣。

所以，只要係優質，你長線持有就可以。你見我比亞迪（1211）買左咁多年，中間升升跌，我都無賣過，現在才可以享受數倍升值的效果。

同埋，你唔好諗住自已估到個市點走。如果佢唔係好似你預期咁賣完，之後跌翻比你入，反而大升，你就會進退失據。

6） 你比亞迪（1211）個買入價係貴左，但由於佢好優質，你長線持有就可以，但現價唔好再加注。

記住，睇財經新聞，我地睇下個客觀資訊，唔係意見。

7） 中移動（0941）都有質素，但佢主要係收下息，如果你未近退休之年，唔建議持有太多。

至於再跌是否加注，就睇翻你本身預算投資此股的資金，是否已經用盡。如已用盡，就算再平也不要加注，否則只會增加風險。

如尚有資金，可每跌10-15%就加1注。

8） 其實只要你學習一套正確財富增值方法，再比些耐性，要令資產倍升，唔係話咁難做到。

港交所（0388）現價略貴，你預回多1,2成才算較合理。

9） 中短期股市走勢，我唔知道。我只係從大市水平和個別股票平貴，去定投資策略。

現時不少新經濟股，都有過熱情況，暫時不宜投資住。至於舊經濟股，普遍價格都合理，依然有投資價值。

------------------------------------------------

Q21222：

sir,可唔可以比D意見, thanks a lot!
（學員附上了6919的分析練習，但不便登出）

Sir,我有3隻蟹貨,都keep左3年,覺得唔係幾睇到未來既增長力,覺得食之無味棄力可惜

371 4.44@12000
698 0.84@40,000
315 6.44@14500
788 1.73@18,000

我覺得依幾隻質素都唔差,但睇唔到個增長力,每次出完業績就想等派息,派完息就想等業績希望有轉機,,明明其他資金買增長股回報都唔錯

但下唔到決心沽貨,從來未試過蝕錢沽貨,我係咪應該咁做,可唔可以比D意見我,THANKS!

龔成老師︰

你分析人瑞人才（6919）的練習，睇得出你花了一定的時間去進行研究，同時都有心機做的，基本資料方面無問題，至於評分方面，你的答案大致正確，你給了15分，我相信這個數與這企業優質度接近，相信你大致掌握了該評估表的指標方向。

至於你在SWOT分析，你可以寫更多（雖然評估表該格位不是很大，但你可以自行寫更多），你只簡單寫定位清、效率高，其實可以延伸這更多，佢怎樣效率高，這因素如果幫到這企業將來發展。

至於評估表第5頁，你表示負面因素是行業競爭加劇，其實可以再延伸寫更多，如果這情況發展，是否會對佢賺錢能力有所影響，你表示佢最終因經營本低而勝出，這是否佢最終能站得住腳但賺錢能力會減，到時如果真的行業競受加大，佢盈利會否減少，這企業怎樣保持現時的賺錢能力？

至於企業估值方面，你計算出的企業價值都大致正確。

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

現價算係合理區頂部，此股係可以投資，但不宜太大注。

其實整份評估表，你都做得不錯，運用得很好。你要大量這樣分析企業，實力才會大幅提高，我自己多年來，都是不斷分析企業、分析企業，去提高實力，同時以「分析好多，投資好少數企業」去提高投資準繩度。

至於你這些持股，是否沽出換碼，你要從投資回報角度去考慮。如果換至其他優質股，長線有明顯較理想的增長，我地就應該行動。

北控水務集團（0371）和數碼通電訊(0315)都有質素，但你預佢主要係收息，唔會有太明顯增長力。

通達集團（0698），算是不過不失。但就唔值得持有太多，始終質素唔算好高。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線。不過，潛力度比過往略減。

你可以睇翻自己年紀、持股比重和風險承受力，去決定是否減持。

------------------------------------------------

Q21223：

龔sir.您好我今年40歲，以前有跟家人投資新股（白表）如下：

招行 1,000
領展 2,000
工商 2,000

中行 2,000
中鐵建 500
中鐵 2,000

因為自己唔識炒，輸多贏少，最後儲蓄都係做定期多，不過近期連一厘都無，跑輸比通漲。

現在收入二萬多，供養兩位已退休家人，住私樓（唔洗供）。

手持五百萬現金，應該點開始建立資產組合？

龔成老師︰

我地投資股票，係希望買入一些優質企業，透過佢自然增長，達至財富增值目的，絕對唔係"短炒"。

而定期這類方法，在財富增值上，効果都唔高，不建議你用。

只要選股和買入策略正確，並長線持有，就會有唔錯架財富增值效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，建議你用「平穏增長股」 + 「潛力股」的組合，當中以「平穏增長股」為主。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

現時大市只是合理區，你現有500萬資金，可先扣起等同半年開支的應急錢。

餘下部份，可以先投入一半，用"分注"形式，慢慢買貨。另一半就等大市出現一定程度的下跌，才大力度掃貨，然後長線投資。

不過，你投資經驗與知識不足，加上過往投資虧損較多，我會建議你先集中「平穩增長股」，而「潛力股」，只能小注，等你有較多知識後先加大投資潛力股。

同時，買入時要慢慢分注，或用月供作策略。

暫時只建議你動用$50萬-$100萬，到你有一定知識、經驗後，先慢慢去到約$250萬作投資。

------------------------------------------------

Q21224：

你好, 本人38歲, 已婚有一個3歲小朋友
手頭現金約100萬, 而家同老公屋企人一齊住

想盡快買樓…..但兩公婆月搵4萬蚊, 問過銀行按揭只借到400萬, 要再儲多D首期先有望
上車, 現每月可儲萬五蚊

1. 點先可以滾儲到多d資金

2. 投資新手, 之前都係抽下新股咁

3. 岩岩睇多左你既FB, 想4月開始月供三千2800, 請問是否OK?

4. 知道買私人樓保值/升值潛力高D, 但budget有限, 買居屋自住係咪都OK

5. 我地住將軍澳區, 因想屋企人幫手睇小朋友,想搵番同區,但而家樓價越升越有, 真係追唔係幾到, 係咪應該搵遠d地方住呢

另現有股票組合約27萬如下, 請問有沒有重複??否需要調整

0005,1600股, 平均買入價49
0175, 1000股, 平均買入價33
1177, 3000股, 平均買入價7.63
1299, 400股, 平均買入價200股抽新股中, 200股96.5
1810, 800股, 平均買入價22.7
2388, 500股, 平均買入價15
9988, 100股, 平均買入價229.6

感謝!

龔成老師︰

1） 如果你打算1、2年內買樓，就建議留較多現金。

但若果你不打算太快買樓，就可以先利用投資，滾存更多資金先。

由於你係新手，我建議你先用月供模式，去投資一些有增長的優質股，以達至財富增值目的。

2） 抽新股係可以，但你要明白我地分析新上市企業合理價和質素時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以我地係投資新股時，就算覺得佢基本面再好好，我地都要比較保守，唔可以太取，去平衡翻參考數據不足這個風險。

3） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應用「平穏增長股」 + 「潛力股」的組合。我建議你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

由於你係新手，未有選潛力股的能力，也未必能掌握投資時機的能力。你可以簡單地先集中投資係盈富基金（2800）。到你有經驗，才選其他我建議架股票。

至於現有100萬，可先用30萬，分注咁入盈富。餘下現金和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

4） 私人樓一般情況，升值潛力都較高。但從自住角度，居屋都係有佢吸引之處。當你資金不多，而目的又係自住，居屋其實都可以考慮。

5） 除非你有迫切性要搬離現有居所，否則，你應先利用優質股增值，去先增值一筆財富。另一邊，再慢慢物悉價格較合理物業，咁會較好。

另外，其實將軍澳區已經是全香港，相對唔太貴的地區，所以日後其實唔太建議你轉其他區。

因為你手上資金不多，勉強買入單位，都會令你供款好吃力。而且，買物業後，我地都應該同時留有一定股票去做增值。所以，現時未必係咁適合。

建議你如果有較長時間，先用優質股累積起一筆財富，再慢慢換屋，會較理想。

至於現有持股，都適合你。除了匯控（0005），佢主要係收下息，唔會有太大增長力，不宜持有太多。

------------------------------------------------

Q21225：

龔sir你好，因為留意你啲post開始有買少少股收息，你嘅分析同意見都好實用！

想請教你以下情況，我應該如何理財，同埋有咩理財組員較適合我

本人28歲，
月入24k，
每月儲蓄大概15k-17k，
銀行現金20萬。

唔識理財，睇完你嘅分析先識買股票收息。多謝你嘅無私分享！！！

我個倉有:
0011一手@154.2
0006一手@45.9
1972一手@23.5

現金20萬中應該用幾多錢做投資？

另外如有每月月供股票應該每月供幾多較好，同埋哪一隻股適合？

目標期望5年內儲人生第一個一百萬，同埋一直想置業，但當有一百萬個時肯定樓價升到唔夠錢買樓。

仲有一個目標就係一直都好想創業，有好多想法，但好怕蝕哂d錢，所以一直遲遲未行岀第一步

我嘅目標係創業初期賺到嘅錢一部分捐岀去比有需要嘅人，我知失業率高企，好多人飯都無得食，有能力就要幫多啲人，平時每月都會買拉車仔買乾糧捐去食物銀行

所以如果創業我希望可以賺到更多錢，同時可以利用我嘅部分盈利再去幫人。感謝龔sir

龔成老師︰

你的想法很好，有能力時，我地係應該盡力回饋社會，這才有意義。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲，可以選擇一些「平穩增值股」+「潛力股」作投資目標。現有持股都合適，但電能（0006）增長力唔高，只係收下息，長線唔好入太多。

以現時大市合理區狀況，月供最好用一半每月儲蓄，另一半就先儲起架策略。

由於潛力股要求你有一定的投資知識，因此這刻不用急著投資，你可以集中在平穩增值股先。

每月用$7000去月供盈富（2800），餘下就儲起，等大跌市機會。其餘合適股票，到你對佢地有一定了解，才從中選股。

平穏增長股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，20萬資金，可先用7,8萬，分注咁慢慢盈富及其他平穩增長股。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

當你累積到一定資金，就可以入市買樓。若此刻資金不多，可先從小物業入手，再慢慢換成大物業。（詳細做法，你可以睇我本<5年買樓4步曲>）

至於創業，你可以從你的興趣、強項、認識的事著手。

例如你本身對某類產品很有興趣，你會在那裡買？如果你在網上買這產品，這個網站的模式如何？

初期投入唔一定要多，可以用網店模式、網上買賣這些低成本模式著手。一邊做正職，一邊創業咁試都可以。最重要係行出第一步，因為未行過，你係唔會知乜野情況。

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

記住，最好唔好做得太雜，要專注在某一範疇，等人容易記得你。

------------------------------------------------

Q21226：

龔Sir，想請教一下。

1. 522同981有潛力嗎？可以作月供選擇嗎？如可以，那一隻比較好？

2. 另外，聽你講過3067係供股好選擇，請問現價合理嗎？

龔成老師︰

1） ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。長遠有一定的發展，可長線投資。現價合理區頂位，如分注小注或月供，仍可以。

而中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，也不建議用作月供選項。

2） 安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21227：

龔sir你好。我又忍不住在反思自己的組合了，希望你能給些意見！

問題1：我現在計劃的組合比例ok嗎？（我19歲）

問題2：現在的組合內，所有都有持股，除了小米。最近見你話小米波動性大咗
（因開發電動車），我應仍選擇它嗎？（如不應該，組合比例亦會考慮調整）

我月供的金額分配ok嗎？（每月有$17000能放入股票市場）

問題3：我另外還有些以前買咗，但現在不太想加入做我的組合的股票。你覺得我對這幾隻股票的處理正確嗎？（特別是9988）

現在計劃的組合：
科技 （700, 1810） —— 22%
安碩科技 （3067） —— 30%
醫療 （1833） —— 8%
舊經濟潛力 （388） ——5%
平穩 （66, 823） —— 10%
盈富 （2800） —— 25%

一手手買股票
- 騰訊 （when drop to $520）
- 平安好醫生
- 領展
- 小米

月供股票 （至少供3年持有5年）
- 港鐵 （1k）
- 港交所 （1k）
- 騰訊 （2k）
- 盈富 （2k）
- 安碩科技指數 （每個月買1手）

組合外現持有的股票：

打算就咁擺喺到：
11恒生1手@124
12恒基162股@30.92 （放棄了月供因增值較其他慢，好似我大個啲再買翻好啲）

等賣：
883中海油1手@6.7
9988阿里巴巴2手@272 （知道有質素的，但我現在好像已有不少科技股，而個人對這股
有些失去信心） （但如果不要小米，應保留？）

謝謝你的無私幫助

龔成老師︰

1） 19歲係一個好年青架年紀，正值財富增值的黃金時期，策略上可以相對進取些。

你現時月供組合，無問題。其實恆基（0012）仍是有質素，當然增長力減少左，預期佢中短期都是弱，不過，這股是睇長線及超長線的。

如果你將來有資金多，都可以考慮月供翻佢。至於恆基（0012）和恆生（0011）現貨，可持有。

但你現有持股，有少少偏重左係潛力股，令個組合波動性略高。以你年紀，唔好超過6成。

2） 小米（1810）由新能車發展有一定不確定，故你要預佢波動性大左，但整體質素係有，你照持有係無問題。

你現時月供金額和選股，都無問題。

3） 這些股票都係有質素（包括0011, 0012, 0883,9988），唔建議你沽出，照長線持有就可以。

但留意中海油（0883）只係商品類，價格自主性低，質素只算中等，不宜再加注。

------------------------------------------------

Q21228：

龔sir，你好，本人今年46 歲，有現金 $200,000，想買公用股作長線增值投資和收息用途。
目標有：

中電（0002），煤氣 （0003），電能（0006）
請問那一隻較適合我？

龔成老師︰

若果以收息角度，中電（0002）和電能（0006）會較好。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時才46歲，都應該作一定程度上的財富增值，而唔係純收息。我建議你用「平穏增長股」，去創造一個增值平台。

現時大市只在合理區，你20萬可先用一半，分注咁慢慢儲貨。餘下一半，就等大市有明顯回調，才再出手。

------------------------------------------------

Q21229：

成老師你好呀，我現年22歲，月入21k，我學習價值投資開始了大約9月開始月供11k股票

直至現時，月供包括（均價）2800（$26.9）,0066（$41.9）,0002（$73.1）,0027（$60.1）,2013（$13.5）,0981（$21.2）,9988（$237.4），另外曾一手買入9988（$227.8）一手，0981（$20.2）一手，0823（$58.4），一手。

1.我想問一問我的投資組合風險會唔會唔太適合我這個年齡？

2.這個月供組合會唔會太保守是否需要作出轉換？

3.是否需要加大月供額？

4.我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
謝回覆

龔成老師︰

1） 以你22歲計，係財富增值的黃金時期，可以承受較高風險。

你月供組合中的股票，大部份都有質素。但中芯國際（0981）業務有增長力，質素都有，但未必稱得上最高質。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。故此股作月供，就不太適合，或最多小注月供好了。

微盟集團（2013）財務數據的增長都強勁，但波動性較高，唔建議用來月供。

但這2隻股票現貨，你照持有就可以。

2） 我不清楚你月供供款比重，故難言是否太保守。但從選股上看，都可以。你22歲，建議你用「平穏增長股」 + 「潛力股」作組合，比例約各一半。

以下都是一些適合你月供的股票，你可以用來加入。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。

現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 最好將可以動用的閒錢，都用來投資。因為你年紀，越做累積財富，個複利效果會越理想。

4） 現時大市在合理水平，現金和股票最好各佔一半。若果你現金唔多，可以先等大跌市出現，才出手。

至於投資目標，就係我2）中所講的股票。到時你可以因應自已持股情況和股價平貴，去用現金掃入這些優質股，並長線持有。

------------------------------------------------

Q21230：

老師你好，一直以來我都係對股票投資既概念都係半桶水，直至幾年前開始睇你既書，睇你係網絡

上分享你既心得同知識，慢慢學識投資係應該長線同睇企業既價值，亦都因為你，比亞迪

令我賺咗人生第一桶金，所以好想多謝你令我感受到賺錢原來咁開心，我來緊想抽居屋

同老公買樓，但係我唔知道應該點樣分配，所以想請教老師既意見

我現在持有268金鍱，9988阿里巴巴同3067，大約總供有二十萬

現金二十萬，每月可儲蓄15000，我應該月供股票令資產增值，還是應該儲蓄現金作為首期，我想兩至三年之間可以

賺多少少，幫補買樓，希望老師能夠指點一下，謝謝老師

龔成老師︰

比亞迪（1211）係有質素，雖然股價已升了不少。但由於佢有潛力和質素，最理想係繼續長線持有。

我建議你先用股票增值，但2至3年唔算係一個長架時間，增值時要保守些。

現有持股可持有，但由於佢地波動性略高，唔建議再加注住。未來以平穏增長股作為目標，去創造一個組合。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

大市現處於合理水平，20萬資金和每月儲蓄，就等大跌市機會出現，才出手掃貨。

------------------------------------------------

Q21231：

大佬，我依家股票組合係咁

Stock 5, $46.3, 14000股
Stock 386, $6, 4000股
Stock 737, $3.95, 10000股
Stock 941, $74.75, 1000股
Stock 1789, $12.77, 4000股

Stock 1810, $31.75, 2000股
Stock 2333, $27.65, 2000股
Stock 2638, $6.84, 5000股
Stock 2800, $26.5, 5000股

我想問再整合一下。有冇咩股票會放左佢會好d ?

龔成老師︰

從質素上計，這些股票都係優質，可以長線持有。

但我地財富組合，除了係優質股外，都要因應自已年紀，去做相應的配置。

我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時這個組合，主要收息股為主，係偏向保守。若你係中年或接近退休的人士，這個組合都可以。

但當中有個較大問題，就係成個組合偏重左係匯控（0005），佢佔組合近一半。緊記，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

建議你，慢慢沽出部份，換碼至以下股票，去令組合回復平衡。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金（3110），都可以。

------------------------------------------------

Q21232：

龔sir: 早前$15入咗3手藍月亮6993，之後係咁跌，買入的時候冇考慮市盈太貴，依家又冇咩息收，呢隻可
繼續持有？還是溝多兩手平倉就沽？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，唔係加注的時候。但此股有質素，現貨持有係無問題。

------------------------------------------------

Q21233：

成哥
本人38
我現在持有物業自住
每月可儲二萬
用作月供1177 及700
每月6000 供1177
8000 供700
其餘用作儲現金
手頭現金 約二十萬

手上持股
388 @ 451.6 100 股
700 @ 580 100 股
788 @ 1.2 20000 股
1211 @ 228 500 股
2158 @ 61.6 200 股
3067@ 17.83 400 股

6618@ 29.2 100 股 （因高位賣了接低成本）
9618 @330.7 100 股
9988 @ 255.2 300 股
2638 @ 7.2 8000 股
2800 @ 28.5 10000 股
3033 @ 8.3 4000 股
1177 及700 供了幾個月

目檟 ： 希望在十年後 有每月五萬被動收入

1）現在月供出這兩隻 可以嗎？
2）想增加潛力股 有那些值得投資十年後收成的倍升股？
3）現在持倉可以嗎？
4）想再集中儲倍升股 有沒有推介？ 例如 儲1448 及3067 可以嗎？
5）以上做法 能否做到十年後 有被動收入五萬？
6）現在倉位 會否太散？
7）178 好想買 值得現價大量入嗎 大約1.8

龔成老師︰

1） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時持股和月供組合，都係太偏重係潛力股。以你38歲去計，潛力股和平穏增長股最好各佔一半。否則，你個組合架波動性風險會過高。

而且，大市只在合理區，每月儲蓄最好先用一半，另一半儲起去等機會。

2） 以下股票，都係有質素架潛力股，有力可以成為倍升股。

潛力股︰中生（1177）、福壽園（1448）、小米（1810）、港交所（0388）、阿里（9988）、騰訊（0700）、比亞迪（1211）

但大部份現價偏貴，買入前要做好估值。

3） 跟月供組合一樣，偏重左係潛力股類，但情況無咁嚴重。這些股票可以持有，再利用月供和新資金，慢慢修正翻個比例。

若你想投資恆生科技股ETF，我建議用安碩恒生科技（3067），佢費用成本比3033為低。

另外，港燈（2638）係收息股，增長力欠奉，你不宜持有太多。

4） 這兩股都可以的，同時你都可以睇我本<50值博倍升股>，當中會有更多選擇，但要注意組合比重問題。

5） 要做到10年後每月有5萬蚊現金流，以股息率5%計，你需要本金1200萬。

以大市過去年平均回報10%計（連股息再投資），你每月投資$20000再加上你現有資金和持股（約值85萬），10年後大約會增值至600萬。

如果要達至你的財務目標，你要再加大投資力度。可以看看你自已的開支，有沒有一些部份可以調整來增加月供金額。

如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升。或者拉長增值年期，以助你達成10年後1200萬的目標。

6） 有少少，長線最好維持8-10隻，咁會較易管理。

7） 莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

------------------------------------------------

Q21234：

請問2186 綠葉製藥 $6入左3萬股，請問前景好何？止蝕位？待覆。謝謝

龔成老師︰

綠葉製藥（2186）主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。若佢佔你組合比重唔多，可長線持有。

至於止蝕位，我唔會用一個價格來定。

只會在其長線質素出問題，或者個市去到好狂熱，令個價異常地高，我才考慮沽貨。若質素不變，就算中短期出現波動，都需要太在意。

除非你持有貨太多，就建議你在反彈時減少少。

------------------------------------------------

Q21235：

龔Sir，想請教一下，我有10000股中國人壽是賺返嚟的, 我想賣咗佢, 換馬 買比亞迪, 請問你意見如何？

雖然換取比亞迪只係大約800 - 900股, 但前景會更樂觀嗎？

龔成老師︰

這些股票賺翻黎與否，佢始終都係你做財富增值的本錢，我地都要認真對待。

中國人壽（2628）並不是無質素，不過增長力唔強。同埋企業的賺錢能力不及過往年代。

長線持有價值都算有，但暫時唔好對股價有太大期望。你可以考慮沽出部份，換至其他優質股，都係可以。

比亞迪（1211）去年營業額1530億人幣，按年增長26%，而市場一般預期為1400億-$1500億。

至於盈利為$42億，比上年增長1.6倍，不過，這就差過市場平均預期的46億人幣。每股盈利1.47。

其實整個業績，都算同市場相差唔太遠，而我地分析時，最重要是長遠的企業發展。業績初步反映，新能源車的市場仍處增長狀態，動力仍在，不過賺錢能力這刻仍算好強，但當技術進步、市場規模增加、成本控制等因素慢慢出現，賺錢能力進一步提高。

預期佢2021年新能源車銷量，應該能達到40萬至50萬輛的水平，已經能獲得一定的市場佔有率，新能源車仍是增長動力，仍是正面。

反映比亞迪長遠仍是正面，不過我自己在估值上，暫時未有提高，始終這刻市場太著重前景因素，因此，這刻仍是略貴，初步保持我之前對這股的合理價，$120。如果想投資去翻$150先月供會較好。

當然，之後到比亞迪正式有詳細財務數據、年報、附註等資料，會正式重新估值，相信調高的機會有超過一半。

你現貨可長線持有，但想現時將中國人壽（2628）換碼至比亞迪（1211），我就不太建議。

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21236：

成sir，你好。小弟睇了《年報勝經》，書中提及經營現金流-資本開支＝自由現金流。

如果要搵上述資料，是不是在年報中的現金流量表就可以？

我想計算［215］和記電訊的自由現金流，可唔可以麻煩你指教一下。

以上是和記電訊的現金流量表，要計算自由現金流，應該用那一個金額計算呢？麻煩晒成sir。謝謝。

龔成老師：

佢2020年的資本開支，$5.93億

而佢的經營活動現金流，為$12.97億

所以，你只要將$12.97億減去$5.93億，就可以理解為佢的自由現金流。$7.04億。

------------------------------------------------

Q21237：

老師你好，我想請教一下買樓問題。我個portfolio入面己有70%係樓(澳洲投資物業），現已達正現金流狀態，睇個勢仲有機會升，真心唔想賣。

而我依家喺香港跟屋企住，都會想有更多私人空間，但稱不上係有迫切需要。

而我依家買樓唔係唔得，因為我人工穩定而且接近6萬，但要放晒所有股票做首期，就會變成All-in樓市既狀態

所以想請教老師，你認為我應否係香港買層自主樓？定係保持分散風險嘅原則，keep返三成股票？

龔成老師：

澳洲物業如果已有正現金流，同時質素唔差，其實可以持有

由於你這刻在香港，無太大的逼切自位需要，加上你在整個財富配置比例中，已經較集中在物業，因此，暫時你未必要好急在香港買樓。

你可以集中用股票作為投資工具，先將財富增值，到你有自住需要，又或樓市出現較明顯下跌，有明確機會時，才考慮買樓。

其實最好是，當你買樓時，只需賣出部分股票，買樓後仍有一定的現金及股票剩，就最平衡。

------------------------------------------------

Q21238：

龔sir 你好！我有個疑問：一般來講，投資股票越早越好，因為時間越長越有複利效果，而分注/月供就可以減低市場波動的風險。（我理解對嗎？）

但經過上年3月，我之前月供的股票（約供了兩年）帳面蝕咗好多，雖然我明白長線不用擔心，而之後今年年頭都升返啲

但好似輸咗機會成本，因為如果不月供而將儲到嘅錢大跌時入貨會賺多好多。

我知道老師你都沒有月供，而係耐心等機會。

咁其實我應唔應該停月供/分注，儲現金等到個市再大跌至入貨？

但又覺得留現金會蝕通脹及享受不到複利效應。我現在股票現金比例（2:1）（金額都好大下）......
謝謝

龔成老師：

股票愈早買愈好，這個大方向是不變的，當然，只限於優質股，但都要留意，這是講長期的，而中短期會波動，簡單來說，你今年買，會著數過5年後買，但如果以中短期計，只要我地能把握到買入時機，有機會在一年後的買入價比這刻好。

另外，月供是一個長期儲貨的策略，好處是平均了買入價，有效減少一次過在高位買入的風險，但缺點就是，無法一次過捉到低位。

因此，對於投資實力不足的人，利用月供是很好的方法。

但如果本身已有投資實力，能把握投資時機，有企業估值能力，其實不用月供都得，所以我自己都無月供。

而我一般的建議，都是部分資金月供，同時留部分現金，等機會，這是一個較平衡的做法。

你現時現金的比例，都可以的。

------------------------------------------------

Q21239：

龔sir，有幾個問題想問

第一，請問閱讀你12本著作的順序

第二，我已有1百萬流動資產，是否可以不去讀（80後百萬富翁）？

第三，你的二個面授課程，應分別在讀完你那本書的時候報讀？還是讀完你的12本書便無需報讀？

第四，看到你有一網上課程，你的12本書或面授課的內容可完全覆蓋到嗎？讀了你的12本書後是否無需報網課？

第五，我即將38歲，對於我閱讀你的書、面授課、網課的計畫會有建議嗎？

第六，網課會再推出限時優惠嗎？

第七，你的12本書中，相信大部分會是說「心態」、「經驗」，不會過時，但其中3本：50優質、50穩健、50值博，提及的股票會因時間而出現變化，現在或將來才買的話，會否過時呢？

龔成老師：

1）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

2）不是，因為書都是教你累積財富，同時無太大順序的。

3）課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

4）網上課程是配合《大富翁致富藍圖》的，你可以理解是書的實戰版。

5）我建議你先睇《80後百萬富翁》、《股票勝經》、《財務自由行》，然後可以上股票班（基礎班），這樣進取最大。

6）暫時都無推出特別優專。

7）《50股》的3本書，你要睇下出版日期，因為久不久會更新的。當中分析股票，因為都是一些大方向，因此無太大變化，但平貴度，你就要留意可能會變。

------------------------------------------------

Q21240：

老師，如果想幫港交所做估值，應該使用甚麼模型比較適合？

龔成老師：

你可以用現金流折現法，以及市盈率估值，如果用市盈率估值，可以用佢過往的市盈率作參考。

其實要深入進行估值，要考慮企業長遠的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。