【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

Fortune Insight 訪問

#FISPOTLIGHT

開始做生意的時候，有些人最懊惱就是資本不夠，所以唯有就住就住，小資本就逼自己做小市場。

但香港那標誌性的地產市場裏，最近就有兩件迴然不同的真人真事，重新定義了「資本」的意思。

第一件事叫做「波叔與孻仔」，行內行外的人應該都略有所聞。

波叔是城中數一數二的富豪，專炒工商舖，人稱「舖王」。一生運籌帷幄的波叔，就是在晚年算漏了這個孻仔，結果孻仔食嘢唔做嘢，一做就瀨晒嘢，學人做生意然後輸掉了爸爸半世心血。

原來孻仔唔止拉心肝，仲可以輸到你心慌，事實證明了大資本做大市場都可以慘烈收場。

故事的教訓，不只是叫你做人要有腦，而是叫你如果想有腦，就要有覓食本能的基礎。

何謂覓食本能？像那隻森林的萬獸之王，隱身於草叢，看準了獵物，計準那距離，三二一之後，才義無反顧地一個箭步向著目標奔跑。

覓食本能的不二法門：用心思觀察環境，有膽量重鎚出擊。

第二個故事，叫做「兆康苑長大的陳建中」。

英文名叫 Starman，無釐頭到一個點，一看便知是陳建中幫自己起的寶號。他沒有舖王爸爸，簡單點說，他的成長都沒有爸爸。除了媽媽，他愛的就只有乒乓球。

瘋狂地日練夜練，橫掃學界獎牌，後來才知道，打到會飛都冇用，因為會考只有七分。

學界獎牌，佢可以 keep 番；中六學位，就畀嗰班讀到書嘅同學 keep 番。

Starman 在別處重讀中五，痛定思痛，終於認真打開書本，發覺自己最愛的原來不是乒乓球，而是研究供求的經濟科。之後會考和高考都考出成績，順利入讀大學，在外匯行做過暑期工之後，下了一個定論——「我肯定唔會打死一世工」。

「我係一個野心大，」陳建中講嘢冇尾音，卻出奇地誠懇與真摯，「不甘於現狀嗰種人」。不甘現狀的人，通常也是不甘平庸。「細細個讀好書，出嚟搵份好工，然後就結婚生仔，個個一樣，我唔得，我唔鍾意千篇一律。」

那些不喜歡千篇一律的人都有一種弊病，就是心頭高眼角高；說得明白一點，就是好高騖遠。請問 Starman 先生，那時候的你，有想過做什麼生意嗎？

「地產。」

學梁特首話齋，有時候真係好難忍笑。

屋企多錢，有頭有面，都未必敢向香港的四大家族挑戰，更莫說是一個沒有家底沒有背景的黃毛小子。有名畀你叫，「地產霸權」呢，在這個大富翁棋盤上還未企得搵，人家那些藍籌發展商已經佈滿爪牙，普通人行過每一格都要付錢。

玩地產，憑什麼？

Starman 的答案出奇地簡單：「廢資產。」

何謂廢資產？「當時香港好多工廠大廈都叫廢資產，因為工業北移，都冇咗本身歷史遺留落嚟嘅價值。但係香港係缺乏土地，所以呢啲資產就一定有價值。」為什麼「一定」有價值？「嗰陣有個好有趣嘅現象，就係大 (工廈) 單位唔值錢，甚至乎只要你肯幫業主交管理費，佢免費租畀你都仲得。相反，細資產嘅售價係講緊二千幾三千蚊呎。」

大細單位的市值差距，因何而生？「決定物業價值嘅，往往都係租金，永恆不變嘅道理係，租值可以推算價值。」原來當時的大單位，內裏有很多工業遺留下來的大型機器，要移走，又要大裝修，所費成本不菲，把大單位租出去是一件相當困難的事。面積較小的單位，反而有裝修，一應俱全，租客願意支付較高的租金。

不過，說到天花龍鳳也好，一日未試過，一日都唔知得唔得。

租值推算價值，你話係就係？

所以，那時候的 Starman，每天大概只能做兩件事：一，儲現金；二，祈禱。

所祈的，就是千萬不要有大財團看中他一直覬覦著的「垃圾」。

直到 2013 年，Starman 的獵物終於出現，那是葵涌大連排道一個約一萬呎單位，當時叫價兩千萬。「睇中嗰個盤之後，即刻叫個則師朋友畫則，將嗰個單位拆細數十件，然後攞住個圖周圍問一班投資開物業的朋友，如果回報有七厘，有冇興趣買其中一個單位？」當時的 Starman 資本不夠，所以用了這個賣樓花的方式，去應付買下那個物業的部份訂金 (物業的 15%)，再跟業主爭取了一個長達七個月的成交期。也由於槓桿比例較大，所以他也樂意給予經紀較高的佣金「散貨」。

結果。

四兩撥了個千斤，數十個單位在四星期內售清。

個人淨賺一千二百萬，以投資比例和回報速度計算，贏得不比霸權少。

小朋友在一個本來注定被屈機的「大富翁」棋盤上，在大連排道那一小格，創造了一個皇后大道中一般的神話。

之後兩年，同類型的項目，Starman 做了二十個。

通常像 Starman 那樣的神奇小子，炒炒賣賣贏了很多個零之後，都會告訴你一個疑幻似真的道理——做人呀，只要肯努力，便一定有機會。可是，讀經濟出身的他，以經濟理論告訴大家，當下的年輕人根本看不到將來。

「零八年金融海嘯之後，成個社會扭曲咗。點解會扭曲？因為不停印銀紙，就會形成資本家高度壟斷；即係，只要你有資產，你就可以買更加多資產。原因係，不停印銀紙，結果就係超低息，喺低息環境應該點？借錢 leverage 囉。咁 leverage 嘅門檻係乜嘢？就係有資產。呢個情況係根本完全唔公平，人哋成日話霸權，就係咁嘅意思。」

所謂霸權，也是一種世襲。

「你諗吓，上一代有資產都計喎。只要你或者你父母有層樓出嚟按，借三十年，你就可以不斷享受超低息。銀紙長期貶值，代表長期貶值嘅負債。長期貶值嘅負債對長期升值嘅資產，贏梗㗎喎。」

說到這一句，Starman 大力拍了一下枱。如此激動，是因為，儘管身家以億計算，他仍然完全沒有忘記，自己也曾經是無依無靠的年輕人。

「資產繼續升，你又可以用升咗嘅資產按番出嚟，用低息環境再借錢去增值資產。咁你想像下，啱啱出嚟嘅後生仔，除非你上一代有資產，否則你根本利用唔到呢個低息環境優勢去創造你嘅財富。」貧者越貧富者越富，最後的結局會是怎樣？

「資本市場走到最終根本係一個盡頭，而呢個盡頭，就係 100% 嘅財富，會落入 0.1% 人嘅手裏面。」

財富分佈至此，如同世界末日。年輕人是否還有希望，就得看看資本家的目光可否放得再遠一點。

「呢班資本家要知道，佢哋有今日水漲船高，係因為下面有人盛載住佢哋。咁佢哋係咪要諗吓，而家下面呢班人，生唔生存到？如果有一日，呢班人係生存唔到，又點能夠繼續盛載到資本家呢個高位？所以如果我係嗰班老細，為自己為他人著想，我都一定會諗，究竟點樣可以扶持呢班年青人，令佢哋望得到前面？年輕人係要見得到希望，佢哋先會努力做嘢，繼而先可以盛載住呢班資本家。」

今時今日的 Starman，已經脫離了炒賣的階段，進軍物流市場。憑他的往績和智慧，沒有人需要擔心他可否繼續成功。唯一需要替他憂慮的，就是努力半生，最後會否步舖王後塵，輸掉給他那個算漏了的孻仔。

仍然是充滿自信的他，笑著說：「未驚過，我兩個都係女。」

投資乃後現代斬叉燒傍身之技

從前很多人在移民前，即使本身是會計等專業人士，仍擔心到外國找不到合適工作，都會多學一門手藝傍身，最流行的可能是學做燒臘斬叉燒。據聞近年移居到台灣的港人，不少也是開港式燒臘茶餐廳。

從去年暴亂開始，香港經濟已嚴重不濟，今年加上疫情，雪上加霜，經濟已衰退超過一年，第二季收縮9%，失業率亦升至6.2%！

暴亂成因有很多，近因是反修例事件，但冰封三尺非一日之寒，背後亦有長遠的房屋、經濟和社會問題。基層人士的生活固然不易過，即使中產人士，很多亦有不滿，不止樓價太貴，更對前途感到絕望。他們感覺社會在變，愈來愈難找到所謂有前途的工作，例如大型科技企業和銀行等。雖愈來愈多內地機構到香港發展，但即使港人被取錄，也未必能適應企業文化，亦覺得缺乏晉升機會。過去十年外資投行，僱用港人的數量已非常少，請的更多是內地人，在普通話和對內地情况了解，都有一定優勢。

近年也流行創業。但因寫字樓和尤其店舖租金長期高昂，加上香港市場太細，成功例子實在不多。近月加上疫情，無數餐廳、零售店和中小企都已倒閉。周末經過灣仔、銅鑼灣一帶，滿目瘡痍，周街吉舖。

不少人又再改為網上創業，在instagram和facebook等社交平台，推銷各樣食物、產品和服務，例如海膽（推薦朋友@uni_brother）、壽司、水餃、#homakase、寵物用品（推介朋友https://www.vetstepshk.com/）、美容和修甲等等。網上創業成本較低，但競爭也非常激烈，最後有多少人成功，仍是未知之數。

傳統中國人熱中房地產，認為是投資致富的不二之選。事實上過去數十年，不少人是投資地產而發達的。尤其過去20年，恒生指數停滯不前，似乎遠遠跑輸地產投資。內地情况也一樣，上證指數表現亦遠遠跑輸北上廣深等大城市樓價。

投資永遠是向前望的，正所謂過去表現不代表未來，現在的情况又如何？在美國零息和無限QE政策下，本應對任何風險資產包括股票、債券，甚至地產都有利，但今年住宅樓價仍微跌，個別成交更差，某新界別墅屋苑，業主持貨20多年，仍大蝕離場。實體經濟差，加上不少人真的在考慮移民，所以住宅樓市偏弱。商舖和寫字樓當然更差，有些已大跌三成甚至一半。何止香港，內地樓市亦已弱了一段長時間，上海、北京二手樓價都已跌兩成。美國實體經濟也很差，1300萬人仍失業，上百萬宗房屋按揭有違約風險；但同時因為很多人害怕在人口密集的城市感染COVID，而選擇搬到較空曠的郊區，屋面積較大，適合WFH和小朋友線上上課，因此出現不少買家爭奪戰。

今年美股表現異常好，好到與實體經濟脫節，簡直是對慘被疫情連累到失業甚至破產的人的一種諷刺。何止美股，恒指雖仍疲弱，但不少個別港股和A股，例如阿里（9988）、美團（3690）和A股寧德時代等龍頭股票，表現都非常好。早前台股亦創下歷史新高，近日連歐洲表現都不錯。個別美股的表現更誇張，蘋果今年升近八成，市值2.2萬億美元，成為世界一哥。Zoom更瘋狂，今年升了5倍，一如數周前所料，市值1100億美元，已超越波音，代表視像會議正式開始取代浪費資源的航空年代！

估值不廉宜 美股隨時有調整風險

美股是否已到泡沫階段，會否爆破？估值肯定不廉宜，今年標指PE超過22倍，即使經濟重開，明年PE仍必在20倍以上。3個主要指數的RSI為75至83，有隨時調整的風險。

調整肯定有，但再次大跌三分之一的股災機會不高，Don't fight the Fed的金科玉律仍有效。記得我早前的分析嗎？即使疫情嚴重加社會動亂，都未必出現股災，超寬鬆貨幣政策，加大規模財政刺激，足以撐住股市。白宮跟國會雖未能達成下一輪刺激協議，但美國聯儲局宣布新的Average Inflation Targeting政策，表明將容忍通脹超過2%一段長時間，才會開始加息。以現時通脹只有0.6%，和過去10年都低於目標來看，相信未來兩年內加息機會極低。在這政策環境下，消費通脹會否回升仍未知，但資產通脹就幾乎是肯定的！

除此之外，疫情亦成為經濟加速雲端化、遊戲化，電商崛起和WFH的催化劑，加上互聯網的Network Effect，就製造出贏家通吃的現象。蘋果、亞馬遜、微軟、Google和臉書等成為最大長期贏家。對它們的最大威脅只有《反壟斷法》，國會聽證會開了，但暫時仍是無牙老虎。中國情况亦相近，ATMX已擁有巨大優勢，但請留意中國市場的競爭比美國更激烈，有更多充滿創意的挑戰者，例如拼多多和字節跳動。

零息刺激 傳統估值方法未必適用

第三個有助延長牛巿的是新一代的投資文化。我未必完全認同，但在零息刺激下，傳統估值方法，包括P/E、P/B、Sum of the Parts、Prem /Disc to NAV等已基本上不再適用，即使較鬆的PEG、EV/EBITDA，甚至更新的growth adjusted EV/EBITDA等估值方法，都不一定有用。新投資者着重的是市場想像空間有多大的TAM，生意模式有多少disrupt傳統行業的能耐，其次就講究不擇手段增加市佔率的速度。在2000年的科網熱1.0，Pets.com的起落被當作笑話，但今日的Chewy，是一家增長非常快的真實企業！

最近CNBC訪問被譽為Dean of Valuation、NYU教授Aswath Damodaran，從前他經常批評Tesla的估值過高，但如今連Damodaran都接近投降，竟然認為FAANG等股票估值接近合理，更認為臉書和Netflix抵買！

但提醒大家，著名揭發金融騙案專家Jim Chanos在早前FT訪問中指出，炒風濃烈的時候，亦是金融騙案的黃金期，今年已出現瑞幸和Wirecard，肯定陸續有來！想深一層，各央行的QE手法，其實亦極接近「左手交右手」的經典操控市場手法，但只許州官放火，不許百姓點燈，就變成合法。

大量美國人失業，大量Free Time，政府又大派Free Money，加上Robinhood以Free Commision吸引客戶，在3Free推動下，散戶再次成為最新市場動力。當然Robinhood和其他「免佣」平台的生意模式有問題，主要倚靠出賣客人流量給大型對冲基金如Citadel，即是故意容許他人front run客戶，是另一最古老欺詐手段。去年這兩家公司已曾被SEC罰款（為何非刑事？），近日又再有新調查。Robinhood近日再融資，估值110億美元，不低但不算高，我雖不認同，但幾乎肯定仍有巨大增長空間，亦即這股散戶新勢力只是剛起步，尚未見頂。

中國高科技新經濟亦已逐漸成熟，恒生科技指數的推出非常合時，近日一些基金公司更已開始推出相關ETF。當然中國科技界深度仍略遜美國，且指數並不包括只在A股和美國上市的公司，有些成分股質素只一般，但仍是個值得鼓勵的好開始。

港人學好投資致富 毋須怨天尤人

今天的重要建議是香港人，根本毋須怨天尤人，整天投訴沒有晉升機會和創業難，少數甚至做出違法破壞社會，損人不利己的事情。勸喻大家努力學好投資，是一門能幫補收入，甚至可以發達的「手藝」！我稱之為後現代斬叉燒傍身之技！

港交所（0388）在2000年以3.88元上巿，至今升近100倍。可惜只有極少當年用會籍換為股票的經紀，至今仍持有全數股票（我認識幾位，恭喜）。反而好幾位賣了股份，轉買了當時正推出的禮頓山，有點回報，但當然跟港交所不可同日而語。騰訊（0700）是另一個更大神話，從2004上市至今，升了超過700倍。過去港股這些例子不多，但相信隨着更多優質公司來上市，將愈來愈多。美國當然更多神話，雖然大部分最富人士如Bezos、Gates和Musk等是創業家，但投資而致巨富的也不少，包括Buffett、Soros和Icahn等。其實只因早期投資了在他們的基金或公司而致富的人更多，不少亦成為了億萬富豪。

贏家通吃年代 研究龍頭企業已足夠

香港稅率低和簡單，沒有資本增值稅，是投資者天堂。沒有資本控制，資訊發達，投資全球都很方便。新投資文化對普通投資者亦非常有利，無可否認，複雜的投資分析的重要性已降低不少（有點擔心但確如此），某程度上可說遊戲變得較「平等」，專業和業餘投資者的差距縮小了。再者，投資標的也簡化了很多，在贏家通吃的年代，根本毋須花時間在中小型公司，莊家老千股更避之則吉，只需集中研究譬如全球最大的50家企業，主要在美國和中國，如有能力再加些印度、日、韓、台和歐洲的龍頭企業，已非常足夠！大家當然擔心股災，但看長線，以標指為例，從1928年起計，近百年的ERP（Equity Risk Premium，股票風險溢價）約5%，加上所謂無風險的美國國債回報，每年複式回報率高達9.7%！其間包括了世界大戰、大蕭條、大衰退、多次股災和今次獨特的疫情大流行，仍有如此可觀的長期回報，何須擔心？投資者的最經常錯誤正是過度短線和頻密的交易。

不要讓政治偏見影響投資決定

最後，我給予投資者4個實在可行建議：

（1）起步時，每個人必須奉公守法，努力工作和養成良好儲蓄習慣，逐漸建立資本。

（2）資產配置仍是最重要投資決定。從1928年至今，標指回報超過5000倍，美國國債回報只80倍。過去中國人沉迷「磚頭」，中國資本市場仍未成形，大部分人又不熟悉美國市場，可以理解。但現在全球投資非常容易方便，中國資本市場快速增長，所以股票配置比例應頗大幅提升，債券亦有平衡組合作用，但需要多一點專業知識。近日很多人討論黃金，我無特別意見，配置些少無妨，但老實講，可有可無，對長遠總回報幫助不會很大。

（3）請不要戴上政治色彩眼鏡去投資。中美修昔底德式鬥爭必然維持10年以上，如幸運地能逃過戰爭，兩邊都必出現很多好的投資機會。極大概率中國名義GDP，必在不到10年，甚至5年內超越美國，主因是人口差距超過4倍，每年中國STEM畢業生更比美國多8倍，怎可能不超越？請留意蘋果Tim Cook解釋在中國生產的原因，早已不是廉價勞工，是因為中國具有大量高質素的工程師和勞動力，美國根本沒有！

美國仍有大量如蘋果般的優質企業，加上美元仍擁有exorbitant privilege（高昂專權），Don't fight the Fed仍是對的。唯一需要小心的是數年後，當中國名義GDP逼近美國時，會否損害美元的「高昂專權」。

新加坡資深學者兼外交官Kishore Mahbubani，剛出版一本書《Has China Won？》，訂了但未收到，已知大綱。同意中美關係並非零和遊戲，大家共坐地球這條船，必須合作努力，才能克服COVID和氣候變化等挑戰。我不認為中國「已贏」，但更肯定中國不會輸，所以中國也充滿愈來愈多的投資好機會。請大家對美國和中國投資，都培養多點長期信心，不要讓政治偏見影響投資決定。

ESG投資回報好 利己利人

（4）投資者反而應戴上ESG眼鏡來投資。出發點當然包括阻止氣候變化，這目的遠比投資回報更重要。只有特朗普這類過時老人，才會想把煤礦業復興，最近連Exxon Mobil都被道指剔出了！除拯救地球外，有研究顯示過去10年，大部分ESG基金回報竟跑贏大市，殊不容易！提到ESG，一般人只想起太陽能，但我已討論了再生能源的Holy Trinity多年，包括太陽和風能、電動車和儲能，缺一不可。最快被世人接受的是電動車，我開了Tesla的車已6年，在本欄多次討論，單是今年回報已超過4倍，6年來更升了17.5倍！ESG為己為人，回報又好，何樂而不為？

（中環資產持有蘋果、亞馬遜、微軟、Google、facebook、Netflix、阿里、騰訊、美團、小米、港交所、拼多多、瑞幸、寧德時代、Zoom、Chewy及Tesla的財務權益）

中環資產投資行政總裁

[譚新強 中環新譚]

本來我想唱衰你，畀你一分，算啦！

【剛成交】陳秉志閃電沽舖 ⚡⚡⚡- 第2026成交(堅) 感覺9分，成交2350萬。 業主是陳秉志及有關人仕 (同時放售對面29號舖，音樂中心，叫價2500萬，未成交)。

地址: 粉嶺聯昌街20-44B號聯昌大樓地下5 (42)號舖連入則閣，地舖建築面積約1225呎，入則閣約1000呎，成交2350萬，回報3%，現租客陳黃記，租金HK$59,000。原業主於1987年3月用65萬買入。簽約日期是今朝，2020年10月23日。

中原做，業主免佣。這個盤在坊間好快賣了，昨日才開盤，馬上成交。我收到盤後已唔講價，直接出2300萬，我搶唔到?

買家再追俾多50萬，兼經紀免業主佣。買家必定是高手。傷心的我。

這間舖是粉嶺聯和墟罕有的大舖放售，超平。

。。。。。。。。。。。

我每日都收唔少八八卦卦的商舖新聞(堅或流)， 但好多嘢唔方便公開講。如你想知道多些市場資訊，可以whatsapp我(+852) 90361143，方便的話附上你咭卡，我可加你入 《李根興「堅堅流流」商舖資訊》 broadcast list 。??

我唔想製造謠言，只是市場第一手資訊。

今次試下新剪接?《工商舖撤銷辣招 - 首置自用做生意優先，提供按揭保險高達九成》 我建議撤工商舖辣招三部曲

錄影日期: 2020年4月21日下午3時中環蘭桂坊

多謝 Otto Chan (#日之苑)，張以郎 (#阿九根和牛拉麵屋)，Annie Kwok (#空姐牛肉飯)，Aries Lee (#好好生活百貨)，Michael So (Sooohealthy.org 親子平台)，樂師傅 (#S2_ 鐵板燒) 賞面支持。

我建議政府係時間工商舖撤消辣招， 住宅唔應該撤住，因為仲好貴。 但工商舖? 失業率九年新高，睇睇依家週街吉舖，我相信香港有史以來未見過咁多吉鋪。 依家係吉舖多到影響民生，同2012/13年辣招面世嘅時候是兩個世界。

香港有約10萬間街舖，平均每間約二三千萬。 一般人買間稍為睇得上眼，用得落嘅舖， 就好似我後面呢間皇后大道西270號地下6號舖咁，我租客 Otto 全港有4間分店， 後生仔創業幾年，瞓身落去博，算做成績唔錯。 佢一直都好想買舖自用。 我都畀佢意見唔少。

我呢間舖放盤，我都有通知佢。最後呢間舖沽咗2800萬比第三者。Otto點解唔買?

銀行由於金管局嘅種種監管，利息/收入等壓力測試，今時今日只係能夠借到約兩成。 釐印費及經紀佣金再加約一成手續費， 即係買間2800萬嘅舖，Otto 就要拎得出2500萬現金，先能夠成交。Come on .... 奈何做生意資金都要週轉，霎時間幾千萬邊個拎得起。

因此係舖頭做開生意的人， 無論點成功，想趁現在低位買舖都真係買唔起，交下交下，好容易變成一世交租。 社會更加分化。 而家經濟差，失業率將會大幅飆升，政府應該支持中小企買工商舖自用。 有自己物業，做乜生意都比心機及長遠都穩陣好多。

我建議撤工商舖辣招三部曲:

(1) 如果買家是買工商舖首置(非住宅)及自用做生意(非出租)的話，先撤消辣招。

其實政府好容易check 只要業主個名同商業登記上個名係一致的話， 就豁免額外印花稅。 甚至乎好似首置買樓一樣， 按揭保險可以高達九成，就當工商舖價上限3000萬。 咁樣計一計， 原本要拎2500萬出嚟買間單2800萬嘅舖，依家只需要拎420萬出嚟就得啦。

初步行通之後，(2) 再撤工商舖非首置嘅辣招。即係可以買多幾間用嚟自用做生意。Let's say 上限三間。

最後，(3) 先至全面性工商舖撤辣招。包括投資者(like me) 都受惠。

行以上三部曲，就可以make sure 真係買工商舖首置自用嘅競爭上比其他投資者有個優勢。 因為佢哋係真正係香港推動經濟，創造就業嗰班人。 如果一下子就全面工商舖撤辣招，遇上一間平嘅舖，佢哋永遠唔夠我呢啲咁嘅投資者搶。

翠華喺中環有兩間分店， 喺威靈頓街，租業主協成行嘅，即使租咗22年，話執就執，約90個員工失業。 喺德輔道中84號，中央街市側邊嗰間? 自置嘅，有成8000呎，肯定永遠喺度 。2001年翠華用5758萬買入， 依家仲放緊盤4億。

依家你見到執笠嘅全部都係租用嘅舖，你肯定唔會聽到中環鏞記、 蘭芳園、九記牛腩，跑馬地 Amigo，或者太平館嗰四間分店等執笠。 即使尖沙咀鹿鳴春早排傳出嚟執笠，都係流料。因為以上提及嘅全部都係自置物業。

做生意嘅擁有自己地盤， 就能進可攻，退可守。香港肯定更加穩定繁榮，國泰民安。 失業率都肯定大減。香港政府，畀條路做生意嘅行下啦。

#工商舖撤消辣招_首置自用優先