《無異之地》極樂謊園（七）
　
本來我差少少就會俾樂園嘅員工捉到。慶幸得到陳伯出手幫助，帶我去到一個秘密嘅地下室匿埋，先至暫時逃過一劫。
　
而同一時間，我亦從陳伯口中得悉某個「真相」──原來佢已經被困喺呢個樂園十四年。
　
「小妹妹，一陣仲有段路要行，妳坐低俾隻腳休息下先。」陳伯邊打開摺凳邊講：「趁仲有啲時間，我會盡量解答妳心入面嘅疑問。」
　
我照佢嘅說話做坐低。經歷咗咁多事，呢刻終於難得咁有種安心嘅感覺。
　
「唔……」陳伯思考咗一陣，「如果我冇估錯，妳應該仲未係好清楚呢個『樂園』係咩一回事？」
　
「嗯，」我點點頭，「只係知道少少……」
　
「唔奇，真係唔奇……呢度嘅員工總係鍾意故弄玄虛，想人自己去體驗。」陳伯無奈咁講：「小妹妹，『極樂園』係一個異空間，由1970年就一直存在到依家。雖然宗旨係『希望每個人都可以得到最極限嘅快樂』。但準確啲講，真實目的係滿足人類最深層嘅願望……」
　
「深層嘅願望？」我諗返起行鬼屋嗰陣，鏡入面「自己」所講過嘅嘢。
　　
＝＝＝＝＝＝＝＝＝
一至六集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
　
「最單純嘅當然係指親情、友情同埋愛情，呢度有唔少設施可以令人重拾返幸福嘅感覺；而有一部分人，就係為咗滿足自己對於金錢、權力以及性嘅欲望而嚟──『疑幻』區域裡面有間『酒店』可以俾人體驗下做有錢人嘅生活，一直都好受遊客歡迎。當然，呢度都有好似『血慾騷』咁樣嘅表演，等觀眾可以發洩下心入面嘅怒憤……」
　
聞言，我又諗返起許致衡同林振堯……仲有頭先準備俾人燒死嘅女人。
　
「因為現實世界實在有太多惡人係逍遙法外，總有人係狠不得將佢哋碎屍萬斷。」陳伯扭開保溫壺嘅壺蓋飲咗啖水，再繼續講落去：「而有啲人，就係追求緊更加極端嘅『樂趣』……譬如話係體驗『死亡』。」
　
「吓？」
　
「唔知妳頭先有冇見到。有一座過山車上面係安裝咗好多殺人機關，就係俾乘客喺過程入面體驗各式各樣嘅死亡方法……」
　
照陳伯咁講，即係頭先被割頭嘅嗰班人根本就冇死到？而佢哋當初都係自願坐上嗰架過山車？諗到呢度，噁心嘅感覺又再一次湧上心頭……
　
「呢個世界……真係會有呢啲人？」我不禁問。
　
「多到妳唔敢想像。」陳伯語氣平常咁講：「有太多人，喺現實社會抑壓得太耐。難得嚟到呢個地方，當然會好似脫韁馬咁，成為自己欲望嘅奴隸。」
　
──哈哈哈……
　
講到呢度，上方正好傳嚟一班人嘅大笑聲。明明只係一牆之隔，但個氣氛就好似係兩個世界咁樣。
　
「我曾經都抵受唔住呢度嘅誘惑……係我個女改變咗我。」
　
「到底當年發生咗咩事？」見陳伯講到眼泛淚光，我忍唔住問。
　
「我第一次嚟『極樂園』已經係二十年前嘅事。當年我老婆因為交通意外過咗身，所以剩低我同個女兩個相依為命。嗰陣我真係過得好辛苦，每日都好似度日如年咁。唯一令我撐落去嘅，就係每日放工返屋企……見到個女用笑容迎接自己。」
　
陳伯舉起手用指尖輕輕撫過合照入面細路女嘅臉頰，接住講落去：
　
「直到有一日，我公司老闆突然揸車帶咗我嚟呢度……佢話見我一直放唔低老婆，保證呢個地方可以幫到我。嗰晚，當我再一次見到活生生嘅老婆出現喺面前，我就好似搵返生存意義咁。就係咁，我深深陷入喺樂園裡面，不能自拔。一直過咗六年……直到個女八歲。」
　
陳伯拎起合照旁邊一本殘舊嘅簿仔，遞畀我之後講：「當年我哋兩父女成日都會互相比試。有時係考下讀書嘅題目、有時係IQ題、有時就係一啲解謎玩具……」
　
接過本簿仔打開其中一頁，上面有一堆用小朋友字跡寫嘅問題：譬如「蜘蛛有多少隻腳？」、「我最喜愛的毛公仔是？」、「下雨天有什麼禁忌？」等等……而答案就係用較端正嘅字跡寫成。
　
「記得有次比試我輸得好徹底，所以就應承帶佢嚟海馬公園玩。本身係諗住正正經經咁玩，冇其他諗法……係直至上到摩天輪，個女講咗一句說話……佢話：『如果媽媽可以同我哋一齊玩就好。』嗰陣我聽完之後，做咗自己人生一個最錯嘅決定。」
　
陳伯講到呢度臉色一沉，喺微弱嘅燈光下，佢臉上面嘅皺紋瞬間加深唔少，好似一下子老咗十歲咁。
　
「你帶咗你個女入嚟呢度？」我問。
　
「冇錯，我本來諗住個女見返媽媽之後，佢一定會好似我當初咁感動……」
　
「但你老婆過身嗰陣佢只係得兩歲，照計佢應該未必認得先係？」
　
「實際情況係比妳所講更加差。當時，我個女好驚，嚇到塊臉幾乎係青晒……佢指住我老婆，話眼前嘅人根本唔係佢媽媽，而係一團……不斷蠕動緊嘅人型肉塊。」
　
「肉……塊？」我聽完驚訝到不禁掩嘴。
　
實在想像唔到八歲嘅細路女見到嗰個幕會留低幾大嘅心理陰影。
　
「最初我都唔係好信呢個係事實。反而仲呃自己，只係因為佢仲細，所以先接受唔到咁大嘅衝擊。記得當時我已經諗住帶佢離開『樂園』，但一行返室外，就即刻意識到唔妥……」
　
「班員工諗住捉你個女？」我回望返自己嘅經歷，即刻得出呢個結論。
　
「嗯，一出到去我哋已經俾人重重包圍，當時甚至連園長都喺度。佢話絕對唔可以俾我個女返出去。即使我跪喺地苦苦哀求，佢哋最後都冇網開一面……最後從我手上格硬帶走咗個女。」
　
「咁你呢？」
　
「可能係見我為『樂園』貢獻過唔少，所以園長畀咗次機會我──只要我肯忘記自己個女，佢哋就可以當乜事都冇發生過。」
　
「但你做唔到……」
　
「當然做唔到。我本來朋友就唔多，父母同埋老婆都先後離開，所以個女就係我嘅一切……佢係我呢個世上唯一嘅寶物。」
　
雖然情況係有分別，但我多少係有幾分共鳴。事實上，自從出嚟社會做嘢之後，我同以前同學亦都少咗聯絡。而本來最親近嘅Alice，亦都因為呢件事而變得好陌生。至於阿海，感覺亦都離我越嚟越遠……
　
「要我徹徹底底咁忘記佢，倒不如乾脆殺咗我……我嗰陣就係咁回應，佢哋當然冇順我意。結果，就係好似妳而家所見到咁。」陳伯無奈咁望向地下室角落嘅一枝掃把，「佢哋奪走咗我離開呢度嘅權利，將『樂園』變成為我嘅牢獄……」
　
「但十四年……咁多年以嚟你都搵唔到方法離開呢度？」我難以置信咁問。
　
「搵唔到……但就算有，我都唔想咁做。」陳伯重新望返去合照，「假如我當初冇帶個女喺呢度，或者所有嘢都唔會發生。呢個罪孽，我應該要用下半生嚟還。」
　
「唔係咁！」我搖搖頭，「錯嘅係外面嗰班人，佢哋嘅思想根本就係扭曲晒。『樂園』理應係畀到人快樂，而唔係製造痛苦，更加唔應該迫人接受！」
　
「小妹妹，我諗就係因為妳仲有呢份純真，所以而家先會坐喺度。」陳伯微微一笑，「但我之所以留喺度，除咗贖罪……仲因為我始終相信我個女仲喺『樂園』裡面。佢一定係喺某個地方，等緊我去救佢。」
　
講到呢度，陳伯佢緩緩撐起身，再接住講：「好喇，等我出去睇下外面安全未……小妹妹，妳都要做好心理準備，隨時行動㗎喇。」
　
「嗯。」我點頭，然後目送陳伯離開。
　
等待嘅期間，我一直翻睇陳伯同個女互相比試嘅簿仔。字裡行間可以睇得出陳伯真係好錫自己個女。但就因為行錯一步，結果就鑄成大錯。
　
睇到中途，我又不禁諗返起阿海。唔知佢離開咗摩天輪未？定仲係沉醉喺另一個空間……同緊Zoey起埋一齊？
　
等咗大約五分鐘後，地下室嘅鐵門再一次打開，可以聽到陳伯喺地上面講：「小妹妹，上嚟喇！快！」
　
聞言，我即刻放低本簿仔行動起嚟。爬上返路面後，我即刻注意到有異樣──就係天空上面多咗好多紅色嘅氣球。
　
「呢個係危機訊號，用嚟提醒員工要加強警覺。」陳伯邊解釋邊將垃圾桶拉返原位。
　
「咁我哋點解唔遲啲先走？」我問。
　
「因為越遲情況就會越壞，呢邊……跟我嚟。」陳伯講完即刻行動起嚟，「聽住，只有兩個出口可以離開呢度，一個就係『樂園』嘅正門。但妳知道喇，喺山嘅另一邊，冇可能順利過到去……至於第二個，就係跳樓機隔離嘅一間小屋。」
　
「小屋？」我記得November曾經提起過。
　
而事實上，我同阿海佢哋啱啱嚟到『極樂園』嘅時候，亦都曾經經過一間荒廢小屋，當時仲覺得好陰森恐怖。
　
「不過，既然我會諗到，班員工都一樣諗到，所以到時可能要……」
　
啪！啪！啪！啪──上空嘅氣球突然連環爆炸，陳伯同我都不約而同望上去。
　
就喺下一瞬間，氣球嘅碎片居然聚集埋一齊，最後喺天空組合成一個巨大嘅臉部輪廓……同我個樣係一模一樣。
　
──哈囉，各位遊客，呢個係「樂園」嘅特別活動廣播、特別活動廣播……
　
接著，係現場廣播響起一把男聲，我認得出就係「血欲騷」嘅主持March。
　
──恭喜呢位叫做Cheryl嘅少女，妳正正就係「樂園」嘅第一百萬位遊客！不過妳可能玩緊設施錯過咗呢次廣播。所以成功將Cheryl帶嚟「血欲騷」嘅朋友，將會同佢一齊成為「樂園」嘅VIP會員！
　
就喺March講完一瞬間，我即刻感受到途人嘅注視目光。
　
「係咪佢？」
「有少少似，要行近啲望清楚……」
「佢就好喇，聽講VIP可以隨意玩『蛻變』區嘅旋轉木馬。」
「喂，你去唔去？」
「唔好喇，聽講上次爭到大打出手……」
　
「仲企喺度，要跑喇！」陳伯激動咁講：「最後一段路！」
　
（待續）
　
下集回憶篇結束。睇完又鍾意嘅朋友，不妨分享出去同埋留句 #留言派嬲 ～我哋 100 SHARES 繼續，下篇暫定星期四。
　
＝＝＝＝＝＝＝＝＝＝＝＝＝＝＝＝＝＝＝
　
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
　
IG: echoofheart

《無異之地》極樂謊園（七）
　
本來我差少少就會俾樂園嘅員工捉到。慶幸得到陳伯出手幫助，帶我去到一個秘密嘅地下室匿埋，先至暫時逃過一劫。
　
而同一時間，我亦從陳伯口中得悉某個「真相」──原來佢已經被困喺呢個樂園十四年。
　
「小妹妹，一陣仲有段路要行，妳坐低俾隻腳休息下先。」陳伯邊打開摺凳邊講：「趁仲有啲時間，我會盡量解答妳心入面嘅疑問。」
　
我照佢嘅說話做坐低。經歷咗咁多事，呢刻終於難得咁有種安心嘅感覺。
　
「唔……」陳伯思考咗一陣，「如果我冇估錯，妳應該仲未係好清楚呢個『樂園』係咩一回事？」
　
「嗯，」我點點頭，「只係知道少少……」
　
「唔奇，真係唔奇……呢度嘅員工總係鍾意故弄玄虛，想人自己去體驗。」陳伯無奈咁講：「小妹妹，『極樂園』係一個異空間，由1970年就一直存在到依家。雖然宗旨係『希望每個人都可以得到最極限嘅快樂』。但準確啲講，真實目的係滿足人類最深層嘅願望……」
　
「深層嘅願望？」我諗返起行鬼屋嗰陣，鏡入面「自己」所講過嘅嘢。
　　
＝＝＝＝＝＝＝＝＝
一至六集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
　
「最單純嘅當然係指親情、友情同埋愛情，呢度有唔少設施可以令人重拾返幸福嘅感覺；而有一部分人，就係為咗滿足自己對於金錢、權力以及性嘅欲望而嚟──『疑幻』區域裡面有間『酒店』可以俾人體驗下做有錢人嘅生活，一直都好受遊客歡迎。當然，呢度都有好似『血慾騷』咁樣嘅表演，等觀眾可以發洩下心入面嘅怒憤……」
　
聞言，我又諗返起許致衡同林振堯……仲有頭先準備俾人燒死嘅女人。
　
「因為現實世界實在有太多惡人係逍遙法外，總有人係狠不得將佢哋碎屍萬斷。」陳伯扭開保溫壺嘅壺蓋飲咗啖水，再繼續講落去：「而有啲人，就係追求緊更加極端嘅『樂趣』……譬如話係體驗『死亡』。」
　
「吓？」
　
「唔知妳頭先有冇見到。有一座過山車上面係安裝咗好多殺人機關，就係俾乘客喺過程入面體驗各式各樣嘅死亡方法……」
　
照陳伯咁講，即係頭先被割頭嘅嗰班人根本就冇死到？而佢哋當初都係自願坐上嗰架過山車？諗到呢度，噁心嘅感覺又再一次湧上心頭……
　
「呢個世界……真係會有呢啲人？」我不禁問。
　
「多到妳唔敢想像。」陳伯語氣平常咁講：「有太多人，喺現實社會抑壓得太耐。難得嚟到呢個地方，當然會好似脫韁馬咁，成為自己欲望嘅奴隸。」
　
──哈哈哈……
　
講到呢度，上方正好傳嚟一班人嘅大笑聲。明明只係一牆之隔，但個氣氛就好似係兩個世界咁樣。
　
「我曾經都抵受唔住呢度嘅誘惑……係我個女改變咗我。」
　
「到底當年發生咗咩事？」見陳伯講到眼泛淚光，我忍唔住問。
　
「我第一次嚟『極樂園』已經係二十年前嘅事。當年我老婆因為交通意外過咗身，所以剩低我同個女兩個相依為命。嗰陣我真係過得好辛苦，每日都好似度日如年咁。唯一令我撐落去嘅，就係每日放工返屋企……見到個女用笑容迎接自己。」
　
陳伯舉起手用指尖輕輕撫過合照入面細路女嘅臉頰，接住講落去：
　
「直到有一日，我公司老闆突然揸車帶咗我嚟呢度……佢話見我一直放唔低老婆，保證呢個地方可以幫到我。嗰晚，當我再一次見到活生生嘅老婆出現喺面前，我就好似搵返生存意義咁。就係咁，我深深陷入喺樂園裡面，不能自拔。一直過咗六年……直到個女八歲。」
　
陳伯拎起合照旁邊一本殘舊嘅簿仔，遞畀我之後講：「當年我哋兩父女成日都會互相比試。有時係考下讀書嘅題目、有時係IQ題、有時就係一啲解謎玩具……」
　
接過本簿仔打開其中一頁，上面有一堆用小朋友字跡寫嘅問題：譬如「蜘蛛有多少隻腳？」、「我最喜愛的毛公仔是？」、「下雨天有什麼禁忌？」等等……而答案就係用較端正嘅字跡寫成。
　
「記得有次比試我輸得好徹底，所以就應承帶佢嚟海馬公園玩。本身係諗住正正經經咁玩，冇其他諗法……係直至上到摩天輪，個女講咗一句說話……佢話：『如果媽媽可以同我哋一齊玩就好。』嗰陣我聽完之後，做咗自己人生一個最錯嘅決定。」
　
陳伯講到呢度臉色一沉，喺微弱嘅燈光下，佢臉上面嘅皺紋瞬間加深唔少，好似一下子老咗十歲咁。
　
「你帶咗你個女入嚟呢度？」我問。
　
「冇錯，我本來諗住個女見返媽媽之後，佢一定會好似我當初咁感動……」
　
「但你老婆過身嗰陣佢只係得兩歲，照計佢應該未必認得先係？」
　
「實際情況係比妳所講更加差。當時，我個女好驚，嚇到塊臉幾乎係青晒……佢指住我老婆，話眼前嘅人根本唔係佢媽媽，而係一團……不斷蠕動緊嘅人型肉塊。」
　
「肉……塊？」我聽完驚訝到不禁掩嘴。
　
實在想像唔到八歲嘅細路女見到嗰個幕會留低幾大嘅心理陰影。
　
「最初我都唔係好信呢個係事實。反而仲呃自己，只係因為佢仲細，所以先接受唔到咁大嘅衝擊。記得當時我已經諗住帶佢離開『樂園』，但一行返室外，就即刻意識到唔妥……」
　
「班員工諗住捉你個女？」我回望返自己嘅經歷，即刻得出呢個結論。
　
「嗯，一出到去我哋已經俾人重重包圍，當時甚至連園長都喺度。佢話絕對唔可以俾我個女返出去。即使我跪喺地苦苦哀求，佢哋最後都冇網開一面……最後從我手上格硬帶走咗個女。」
　
「咁你呢？」
　
「可能係見我為『樂園』貢獻過唔少，所以園長畀咗次機會我──只要我肯忘記自己個女，佢哋就可以當乜事都冇發生過。」
　
「但你做唔到……」
　
「當然做唔到。我本來朋友就唔多，父母同埋老婆都先後離開，所以個女就係我嘅一切……佢係我呢個世上唯一嘅寶物。」
　
雖然情況係有分別，但我多少係有幾分共鳴。事實上，自從出嚟社會做嘢之後，我同以前同學亦都少咗聯絡。而本來最親近嘅Alice，亦都因為呢件事而變得好陌生。至於阿海，感覺亦都離我越嚟越遠……
　
「要我徹徹底底咁忘記佢，倒不如乾脆殺咗我……我嗰陣就係咁回應，佢哋當然冇順我意。結果，就係好似妳而家所見到咁。」陳伯無奈咁望向地下室角落嘅一枝掃把，「佢哋奪走咗我離開呢度嘅權利，將『樂園』變成為我嘅牢獄……」
　
「但十四年……咁多年以嚟你都搵唔到方法離開呢度？」我難以置信咁問。
　
「搵唔到……但就算有，我都唔想咁做。」陳伯重新望返去合照，「假如我當初冇帶個女喺呢度，或者所有嘢都唔會發生。呢個罪孽，我應該要用下半生嚟還。」
　
「唔係咁！」我搖搖頭，「錯嘅係外面嗰班人，佢哋嘅思想根本就係扭曲晒。『樂園』理應係畀到人快樂，而唔係製造痛苦，更加唔應該迫人接受！」
　
「小妹妹，我諗就係因為妳仲有呢份純真，所以而家先會坐喺度。」陳伯微微一笑，「但我之所以留喺度，除咗贖罪……仲因為我始終相信我個女仲喺『樂園』裡面。佢一定係喺某個地方，等緊我去救佢。」
　
講到呢度，陳伯佢緩緩撐起身，再接住講：「好喇，等我出去睇下外面安全未……小妹妹，妳都要做好心理準備，隨時行動㗎喇。」
　
「嗯。」我點頭，然後目送陳伯離開。
　
等待嘅期間，我一直翻睇陳伯同個女互相比試嘅簿仔。字裡行間可以睇得出陳伯真係好錫自己個女。但就因為行錯一步，結果就鑄成大錯。
　
睇到中途，我又不禁諗返起阿海。唔知佢離開咗摩天輪未？定仲係沉醉喺另一個空間……同緊Zoey起埋一齊？
　
等咗大約五分鐘後，地下室嘅鐵門再一次打開，可以聽到陳伯喺地上面講：「小妹妹，上嚟喇！快！」
　
聞言，我即刻放低本簿仔行動起嚟。爬上返路面後，我即刻注意到有異樣──就係天空上面多咗好多紅色嘅氣球。
　
「呢個係危機訊號，用嚟提醒員工要加強警覺。」陳伯邊解釋邊將垃圾桶拉返原位。
　
「咁我哋點解唔遲啲先走？」我問。
　
「因為越遲情況就會越壞，呢邊……跟我嚟。」陳伯講完即刻行動起嚟，「聽住，只有兩個出口可以離開呢度，一個就係『樂園』嘅正門。但妳知道喇，喺山嘅另一邊，冇可能順利過到去……至於第二個，就係跳樓機隔離嘅一間小屋。」
　
「小屋？」我記得November曾經提起過。
　
而事實上，我同阿海佢哋啱啱嚟到『極樂園』嘅時候，亦都曾經經過一間荒廢小屋，當時仲覺得好陰森恐怖。
　
「不過，既然我會諗到，班員工都一樣諗到，所以到時可能要……」
　
啪！啪！啪！啪──上空嘅氣球突然連環爆炸，陳伯同我都不約而同望上去。
　
就喺下一瞬間，氣球嘅碎片居然聚集埋一齊，最後喺天空組合成一個巨大嘅臉部輪廓……同我個樣係一模一樣。
　
──哈囉，各位遊客，呢個係「樂園」嘅特別活動廣播、特別活動廣播……
　
接著，係現場廣播響起一把男聲，我認得出就係「血欲騷」嘅主持March。
　
──恭喜呢位叫做Cheryl嘅少女，妳正正就係「樂園」嘅第一百萬位遊客！不過妳可能玩緊設施錯過咗呢次廣播。所以成功將Cheryl帶嚟「血欲騷」嘅朋友，將會同佢一齊成為「樂園」嘅VIP會員！
　
就喺March講完一瞬間，我即刻感受到途人嘅注視目光。
　
「係咪佢？」
「有少少似，要行近啲望清楚……」
「佢就好喇，聽講VIP可以隨意玩『蛻變』區嘅旋轉木馬。」
「喂，你去唔去？」
「唔好喇，聽講上次爭到大打出手……」
　
「仲企喺度，要跑喇！」陳伯激動咁講：「最後一段路！」
　
（待續）
　
下集回憶篇結束。睇完又鍾意嘅朋友，不妨分享出去同埋留句 #留言派嬲 ～我哋 100 SHARES 繼續，下篇暫定星期四。
　
＝＝＝＝＝＝＝＝＝＝＝＝＝＝＝＝＝＝＝
　
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
　
IG: echoofheart

《無異之地》極樂謊園（三）
　
我同Alice識咗超過十年，比起阿海仲要耐。一直以嚟都係無所不談嘅好姐妹，佢同時係愛情路上為我作謀獻計嘅幕後軍師。所以，我從來冇諗過佢會有嘢瞞住我，更加唔好話係出賣……
　
「點解……嗌咗咁耐都冇人過嚟？」阿海慌張咁問：「Zoey，妳同Alice到底計劃緊乜嘢！？」
　
「阿海，你唔洗咁緊張喎……」Zoey笑住回應：「佢只係想我帶我哋去一個非常美妙嘅地方。」
　
「美妙？但點解係跳樓機？」阿海睜起雙眼，彷彿諗到件可怕嘅事，「唔通妳係想……」
　
講到呢度，跳樓機正好去到最高點停低落嚟。我注意到另外四位舊同學都慢慢醒返。佢哋一開始當然好驚慌，冇諗到一起身自己就身處喺半空。
　
「嘩我Ｘ……到底發生咩事！？我唔係喺鬼屋裡面嘅咩！？」慶仔講。
　
「阿廉，我呼吸唔到……好辛苦……」Bella痛苦咁講。
　
「妳唔好望落去……望住我呢邊，望實我！」阿廉憂心咁
講。
　
「點解零零舍舍得我自己坐！？救命呀！！！喂！！！」最後係朱少大喊。
　
但就喺下一瞬間，我哋幾個都俾眼前嘅狀況嚇到沉默起嚟──可以見到樂園嘅燈光開始由遠至近熄滅，最後只係剩低我哋身處呢座跳樓機仲有燈……
　
再過多幾秒後，突然有個白色氣球徐徐飄到我哋面前，接著「啪」一聲爆開。跳樓機應聲向下急墜，一股離心力瞬間襲來……
　
＝＝＝＝＝＝＝＝＝
第一集：
https://www.facebook.com/Echo.of.Heart/photos/a.144899825641842/1721244681340674/?type=3&theater
第二集：
https://www.facebook.com/Echo.of.Heart/photos/a.144899825641842/1724770934321382/?type=3&permPage=1
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
　　
雖然我唔係第一次玩跳樓機，但喺呢種毫無心理準備嘅情況下被迫去玩，恐懼感當然係前程未有咁強烈。我同身邊嘅人一齊放聲大喊，而照道理，好快就會迎接第一個急停位……
　
但事實係，跳樓機並未如我所想咁急停然後重新抽升，而係繼續跌落去。說時遲那時快，下一秒鐘已經準備落到最低點，我可以見到Alice就企喺我面前……
　
以呢個速度落去絕對係會墜毀……呢刻，我終於明白阿海頭先嘅憂慮。但一切都太遲了，我哋馬上就會迎接死亡。
　
可能知道死期將至，腦海開始不斷閃過以往嘅片段。而當中最清晰嘅，係我同阿海曾經有過嘅甜蜜時光……
　
下一瞬間，眼前一黑。有一刻我仲以為呢種就係死亡嘅感覺，但神奇在事前並冇發生過猛烈撞擊，亦都冇任何實質嘅痛苦，而我依然係睜大雙眼，換句話說只係周圍變到漆黑一片……
　
至於跳樓機，唔單止冇停低落嚟，反而越跌越急速。我開始感覺到呼吸困難、狂風擦過臉頰嗰陣亦有陣微弱嘅刺痛感。我嘗試望向腳下方，結果係乜嘢都睇唔到，彷彿跳樓機會一直跌落呢個無盡嘅深潭咁……
　
呢種情況維持咗好耐，耐到我冇辦法想像……我曾經以為自己會頂唔住，但每當我就快要失去意識嘅時候，就會有把聲音叫我要撐住……
　
──妳嘅願望好快就會實現。
　
唔知過咗幾耐，我喺意識模糊間感覺到跳樓機緩緩減速。直到終於停低，旁邊有把熟悉嘅聲音將我呼喚返嚟……
　
「Cheryl……妳有冇事？」阿海躺喺椅背，一邊大啖大啖咁呼吸。
　
而我就全身不停係咁震，要隔咗幾秒先覆到句：「冇……只係有啲頭暈……」
　
同一時間，可以聽到另一邊傳嚟有人嘔吐嘅聲音，但一時三刻分唔到係邊個人。
　
「哈……終於到喇。」Zoey雙手握住兩邊扶手，表現得非常激動，「Alice呢？快啲解開我喇！」
　
就喺佢講完一刻，安全欄果然即刻解開咗。而同一時間，有一個握住氣球嘅女人由路嘅另一邊慢慢行過嚟，最後停喺Alice剛才所企嘅位置。
　
「哈囉，咁多位朋友。」佢著住一身黑色嘅制服，十足十酒店嘅客服人員咁，「歡迎嚟到『極樂園』。我係你哋嘅接待員June，一陣我會帶各位好好參觀成個園區，等你哋可以盡情享受……」
　
「咪住先！」慶仔打斷佢，「乜鬼嘢極樂園？呢度唔係海馬公園咩！？」
　
June聽完先輕輕打量咗我哋幾個，繼而回應：「睇嚟你哋大部分人都未清楚發生緊咩事。咁就等我簡單解釋下……你哋而家身處呢個地方叫做『極樂園』，我哋樂園嘅宗旨係『希望每個人都可以得到最極限嘅快樂』。至於『極樂園』同『海馬公園』嘅關係……我只可以話位置一樣，但呢度實際上係另一個空間，你可以當係結界咁去睇。而有一班人，傾向稱呼呢度做『異地』。」
　
「結界？」阿海難以置信咁問：「就好似西貢結界咁？」
　
「相似，但又有明顯分別。」June繼續娓娓道來：「呢個結界已經存在咗好耐喇，甚至比起海馬公園更長歷史。而後者嘅出現只係作為一個掩飾，方便我哋進出『極樂園』、同帶新客人嚟呢度……即係你哋。」
　
「但Alice……仲有你哋嗰位男同事點解要格硬帶我哋嚟呢度？」我忍唔住問。
　
「唔係格硬，而係樂園選中咗你哋。」見我哋幾個聽完都目瞪口呆，June先係一笑，然後揮揮手講：「跟我嚟喇，一邊行一邊聽會容易吸收啲。」
　
Zoey率先跟上去，我同阿海先互望咗眼，最後都係選擇跟埋去，其他人亦都戰戰兢兢咁跟喺後面。但只係行咗幾步，Bella就開聲同June講：
　
「我好想走……妳可唔可以帶我離開呢度？」睇得出佢仲係好唔舒服，要阿廉扶住先勉強行到。
　
「妳真係想走？」June反問：「王小姐，妳唔係一直想變得大膽啲咩？而家個機會就擺喺妳眼前，真係想就咁放棄？」
　
Bella聽完吃驚得睜大雙眼，唔知係因為June知道佢姓王，定抑或係講中咗佢嘅心願？
　
「不過，假如你哋真係想走嘅，我當然可以帶你哋去出口。」佢繼續講。
　
「點呀……走唔走？」阿廉細聲問Bella。
　
「……都係……再睇下點。」Bella回應。
　
我哋就係咁跟住June行。作為海馬公園嘅常客，我好快就意識到兩個樂園嘅地理環境同道路設計幾乎係一樣，但設施就有相當大嘅分別……就好似跳樓機附近本來係海盜船嘅位置，呢刻變到只係得一間荒廢小屋，睇落非常陰森恐怖。
　
行咗幾分鐘後，我哋終於穿過幽暗荒涼嘅路段，嚟到一座巨大而且色彩繽紛嘅帳篷面前，篷頂有一塊廣告牌寫住「進來感受一下極致的歡愉」。雖然離入口仲有段距離，但已經可以聽到裡面非常熱鬧……
　
「極樂園總共分咗四個園區。」June豎起四隻手指，「疑幻、迴想、蛻變……同埋我哋而家身處嘅血慾。」
　
血慾……聽落同裡面嘅氣氛好似並唔相襯咁。
　
「馬上就開始另一場表演喇。等我帶你哋入場，你哋嘅朋友已經一早到咗幫你哋霸定位。」
　
「妳所指唔通係Alice？」朱少問。但June並冇回應，而係轉身行入去。
　
入到帳篷裡面，最先係見到中央一個圓形大舞台，頭頂有一個巨型吊燈，十足十馬戲團一樣。呢刻四周都已經坐滿晒觀眾，雖然當中一半都帶住面具，但都遮掩唔到佢哋眼神入面嘅狂喜同期待。
　
喺June嘅帶領下，我哋先行上幾級樓梯，然後就見到山頂位置有個熟人向我哋呢邊揮手。
　
「喂，Cheryl，呢邊吖！」果然係Alice，見佢揮手時神態自若咁，就好似之前嘅事根本就冇發生到咁。
　
雖然曾經有一秒猶豫應唔應坐埋去。但為咗可以問清楚，最後都係豁出去。
　
「唔好嬲啦。」一坐低，Alice即刻笑住講。
　
「點可能唔嬲！？妳夾埋Zoey咩都冇講清楚就帶我哋嚟到呢度……仲有，頭先喺跳樓機上面，我真係以為自己會死！」
　
「但妳最後冇死到吖？」Alice講到呢度轉過頭望向舞台嗰邊，「Cheryl，記唔記有段時間我差少少就睇唔開想自殺？」
　
「吓？」
　
雖然係呢個反應，但我當然記得……四年前，Alice同佢男友都差少少鬧分手，但最後又突然和好如初。
　
「係呢個地方改變咗我、改變咗一切。」Alice感觸咁講：「你哋好快就會明白。」
　
就喺下一刻，帳蓬周圍嘅燈突然熄滅了，只係剩低舞台位置微弱嘅燈光。觀眾亦隨住變化將音量收細。良久，一位男主持終於穿過黑暗出現喺舞台中央，迎接佢嘅係瘋狂嘅歡呼以及拍手聲……比較之下，我哋山頂位置嘅反應就顯得相當冷淡。
　
「多謝、多謝晒咁多位朋友！」男主持張開雙手，然後九十度鞠躬答謝現場嘅觀眾，「廢話就留喺熱身後先講喇！let's start the show！」
　
說罷，男主持先退後幾步。等舞台中央嘅升降裝置可以安全打開，幾秒後，有另一個男人經由升降台上到嚟，可以見到佢跪喺地，神情恍惚咁周圍望……雖然有段距離，但我都隱約睇得出係邊個……
　
「渣男！許致衡！」男主持拎起咪激動咁講：「作為一個明星，佢唔單止吸毒、偷食、仲要當街打老婆。影衰晒我哋男人，得罪晒所有女人，簡直係人人得而誅之，你哋話係咪！？」
　
「係！！」全場幾乎係一致認同。
　
「既然係咁，我就成全大家喇……」就喺下一刻，男主持突然從西裝裡面抽出一把手槍，「先殺為敬。」
　
接著一聲「呯」，對住許致衡嘅後腦開咗一槍。
　
（待續）
　
　
下集開始節奏會加快～其實我唔介意大家儲埋先睇的，始終呢個時勢，總唔係成日會有心情。不過有幸見到 POST 嘅話，都幫手留個 LIKE 呀～
　
至於睇完又鍾意嘅朋友，不妨分享出去同埋留句 #留言派嬲 ～我哋 100 SHARES 繼續，暫定星期四／五出。
　　　
＝＝＝＝＝＝＝＝＝＝＝＝＝＝＝＝＝＝＝
　
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
　
IG: echoofheart