月老畀三個願望我（下）
.
第二日上fb，見到好多富二代、靚仔都俾人拋棄咗。
.
再睇下啲女仔fb，無再講咩靚仔明星、名牌，
而係講埋啲好哲學嘅野，有人講詩詞歌賦、有人講音樂、有人講畫畫......成個世界充滿咗清泉！
.
我躊躇滿志咁出去，搵我嘅真命天女。
.
我倚住架跑車，用最英俊瀟灑嘅姿態，向...
月老畀三個願望我（下）
.
第二日上fb，見到好多富二代、靚仔都俾人拋棄咗。
.
再睇下啲女仔fb，無再講咩靚仔明星、名牌，
而係講埋啲好哲學嘅野，有人講詩詞歌賦、有人講音樂、有人講畫畫......成個世界充滿咗清泉！
.
我躊躇滿志咁出去，搵我嘅真命天女。
.
我倚住架跑車，用最英俊瀟灑嘅姿態，向路上嘅靚女搭訕。
.
我曾經百發百中，今日居然不斷被拒絕，搞咗成日，先拎到兩個電話號碼。
.
唔緊要，貴精不貴多嘛。
. ，
第一個女仔，同佢傾咗成日，氣氛都幾好。
.
講講下，佢問我點睇達文西嘅畫作。
.
我唯一識姓達嘅，就係達哥......唔係，達哥都唔係姓達，達爾文先姓達！
兩個都係出名鬼佬，一定係啦！
.
我即刻回應：「你講緊達爾文個兄弟？」
.
個女仔反問：「你好熟達爾文架？」
.
我記得讀書果陣，講過咩達爾文同猴子，
「係啊，達爾文發明咗馬騮，好偉大架。」
.
之後個女仔就無再覆我。 . ，
第二個女仔就講音樂，今次我醒目啦，佢每講一樣野，我都Google過先。
.
但傾咗一陣，我就心力交瘁，唔通我成世帶住個Google？
.
呢個時候，月老又出現：「感覺點啊？」
.
我嘆氣：「好唔掂，啲女仔個個好似大學教授咁，問呢樣問果樣。」
.
月老攤手：「咁女人唔被物質同外表吸引，就講才華架啦。」
.
「得，我知我無才華，可唔可以改下個願望，加埋唔被才華吸引？」
.
「唔係唔可以......」
月老笑瞇瞇咁答：「不過唔講才華，就講努力、耐性，半夜送宵夜，包接包送，你無問題掛？」
.
「果啲係觀音兵做嘅！」
唉，我身嬌肉貴，講到尾，原來都只有靠錢吸引女人。
. ，
不過，我比較關心我嘅最後一個願望，認真諗一諗，我決定腳踏實地。
「我希望同一個相愛嘅人結婚，幸福快樂咁生活一世。」
.
聽落最普通嘅句子，原來係我最渴望嘅幸福。
.
月老點頭，然後......除衫？
.
準確黎講，佢一路除衫一路脫皮，好快就變咗一個絕色美人。
.
「我靚唔靚？」美人含羞答答咁望住我，搞到我個心卜卜跳。
.
「靚，但係...... 你唔係要設計一段姻緣畀我咩？」
同埋你三十秒前仲係一個猥瑣阿伯喎？
.
「設計咁麻煩，不如我自己上啦。」
美人愈行愈近：「咁你鍾唔鍾意我？」
.
結果，我抵受唔住誘惑，我亦深深愛上咗佢。
. ，
原來，以前我一直搵唔到真愛，唔係因為啲女仔貪慕虛榮，
而係佢地唔夠靚，未靚到令我動心，我比自己想像中更膚淺。
.
不過，老豆又同意我地結婚，就幸福快樂咁過咗一世。
到我好老好老，臨死前，我望住我老婆，佢仲係好靚女。
.
雖然喺外人面前，佢個樣慢慢老，
但兩個人果陣，佢永遠都會變番靚女，令我無比慶幸佢係神。
.
我只係唔明：「其實，你點解要嫁畀我？」
.
「有無聽過『天上一日，人間一年』？天帝放咗我兩個月大假，叫我落人間體察民情。」
月老嘆氣：「我唔通住六十年劏房？又唔想打工，最好就嫁個有錢仔。」
. ，
即係由頭到尾，佢只係鍾意我啲錢？
.
我嬲到想彈起：「我個願望話要『相愛嘅人』，你違反商品說明條例！」
.
「咁愛一個人肯定有原因，愛你嘅才華、愛你嘅性格，同愛你嘅錢有咩分別？」
.
「梗係有分別，愛錢，呢個世界一定有人有錢過我。」
.
「哦，如果愛才華，呢個世界無人有才華過你？」
月老繼續問：「呢大半世人，你過得開唔開心？」
.
我點頭。
.
月老笑一笑，無再講野，含情脈脈咁捉住我隻手，陪我走完人生嘅最後一段路。
. ，
愛情，講到尾，都係為咗開心啫。
.
開心咪得囉，使乜尋根究底。
.
－完－
.
#短故 #短篇 #小說 #陳美濤 #廣東話 #粵語 #月老 #月老畀三個願望我 #tomatochan
