我覺得，自己真係好幸運。我只係一個普通女仔。有一個對於音樂嘅憧憬。無大公司支持。每一次嘅製作，大家都希望用盡努力做到最好。 我永遠都覺得自己付出係最少嘅一個。 每當我企係台上面，聽到每一下琴音，每一下鼓聲，每一下結他聲，每一下bass，每一句和音。我就會覺得充滿力量，我就會覺得，我應該要努力。 阿樂，多謝你，你係一個負責任嘅band leader，好多時候出譜都係靠你，你對耳仔最靈敏，其實可以俾到好多好好既意見，但能力越大，責任越多。我知道全部都要花好多嘅精力同埋時間。 阿布，多謝你經常為我們提供笑聲，亦都多謝你總會幫我，我知道只要我需要幫忙，你肯定會幫手。 阿Lo，多謝你成日都會欣賞我嘅肌肉，哈哈哈哈。會提醒我肥咗瘦咗。當然仲有你好正嘅木結他啦。 阿花，今次第一次同你夾，見到你同大家好有火花，我真係覺得相逢恨晚。同埋經過你對我歌聲嘅讚美，我知道你份人好真心，哈哈。 Russell，你真係好重要架，雖然我講mon唔係好聽到你，但樂園同筵席，你地幾個真係好配合到我嘅情感表達，每次我都可以好投入。 Dixon，希望你唔會覺得我地班人太瘋狂，亦都希望你今次玩得好開心同埋好享受。 Cody，成堆band得你同我係女仔，成日都要你練到咁夜真係唔好意思啦！我知道為咗今次表演，你都克服咗好多嘅困難、心理關口。 Dymo,多謝你，用咁有限嘅資源，為我地設計咗一d咁好嘅燈光效果，仲要負責que show，唔簡單啊！仲有你嘅囡囡，巧悅，真係好乖巧啊！ 多謝Gigi,每次你除咗幫手化妝,基本上做埋臨時助手！仲要係好熟手果隻添。 多謝Kenny,我諗quick change最大壓力都係你啦，因為換完衫先整到頭髮，每次可能只係得果幾十秒就要轉好頭，難度系數9.9。 多謝Martin and Kinki, 今次又係好急咁樣要你地幫手搞衫，好在出嚟效果好啱每一部分嘅感覺。 多謝林燕婷，你病咗都嚟幫手，好在後來越戰越勇。多謝Idy,用你瘦弱嘅身體捱咗三日。 Troy,King,Arial,Scarlet,荔枝姐,Wing,Minnie,多謝你地好用心去學習我啲歌去演出，同你地相處嘅時間好短，但你地都花咗好多嘅時間去排練，亦都學得好快，為我嘅歌增加咗好多energy！ 石仔，Michael，多謝你地係排練嘅時候幫咗我同蝦頭好多，仲會幫我地執頭執尾，等我地可以爭取到的休息嘅時間。 多謝悲哥，成日幫我做設計都係要捱通頂，與死線搏鬥。 Kaze,Jimmy, Issac,阿強,多謝你地幫手入台,我仲好記得我地一個一個將柏斯琴行啲樂器、喇叭搬上台。 多謝我一班歌迷，好體諒我地，尤其是睇尾場嘅你地，因為我地人手非常短缺，搬野都要每一個人出動，所以真係冇無乜時間同你哋傾下計、影下相。 多謝我嘅屋企人，你地放心比我去嘗試每一個挑戰 。 今次嘅音樂劇場，大家都付出咗好多嘅努力，我知道真係好辛苦大家，場表演仲要慈善架添。多謝1/1 leather workshop 啲靚靚手帶。多謝柏斯琴行，好多人都話今個show好好聽，其實器材係好緊要架！仲有當然要多謝Jason音樂總監, 你係出邊聽得最清楚，大家聽得舒唔舒服都係靠你。仲有場館嘅Joe,大家都難以相信牛池灣可以做到咁好聲,但你做到。 係呢度特別要多謝蝦頭，因為，佢今次黎本身只係做嘉賓，但係呢個嘉賓，基本上係負責埋，導演，編劇。每日，彩排完之後，都會同我去講返有d咩地方我可以做得更加好。如果今次嘅音樂劇場冇蝦頭係度，大家睇到既，會係完全唔同。 最後就係要多謝我嘅經理人邵子風。我會扭計，有時我都會懷疑自己做唔到，有啲嘢全靠你逼我去嘗試、去面對。有你係度，我唔可以話辛苦，因為你一定係最辛苦果個。司機係你、票務係你、聯絡，宣傳又係你。 我諗前世嘅我一定係做咗好多好事，身邊先會有你地呢一班戰友。一路咁樣撐住我。如果無你地，根本無龍小菌。