🥳🥳【自家製Pizza H 蒜蓉包】🥳🥳 #附食譜
我家商場的Pizza H店舖人間蒸發差不多半年了，近日發現佢哋終於在商場另覓新舖，現正裝修中，對於Pizza H印象最深刻的不是Pizza，而係佢哋嘅蒜蓉包，一口咬落去罪惡感超重的，哈哈哈～外酥內軟，有濃郁的蒜蓉味道，雖然半口都是油，熱呼呼時也幾好味的😆😆，不過唔係每次都熱，感覺很不爽的😏
自家製蒜蓉包，想幾熱有幾熱，牛油同蒜蓉份量隨個人喜好自由配搭，『咁就為之very good喇』⬅️ 哈哈哈~#出賣年齡系列 知道呢句slogan係邊個明星講嘅，都有番咁上吓人生閱歷喔😂😂

【自家製蒜蓉包食譜】
此食譜可製作兩個蒜蓉包(各180克)及4個餐包

材料:
1.高筋麵粉 300克
2.水份 180克
3.蛋 40克
4.砂糖 45克
5.鹽 1克
6.即用依士 3克
7.無鹽牛油 16克
『溫提：這個是高水份麵糰，手搓頗黏手的，新手朋友若用機搓揉會較穩妥喔😉』

蒜蓉牛油做法:
蒜蓉2茶匙(以蒜蓉器壓成蓉，不是剁的)、有鹽牛油30克
將蒜蓉放入不黏烤模內鋪平，以180度烤5分鐘，加入牛油，放回焗爐內，以餘溫將牛油溶化，混合蒜蓉牛油後，抹上已烤好的麵包內，食用時，放入已預熱180度焗爐內烤6分鐘即成．

做法:
1.將1-6 混合成麵糰，然後加入無鹽牛油搓至光滑，將麵糰撻至起薄膜狀, 將麵糰搓圓後，置於預先鋪上保鮮紙的器皿中，然後表面蓋上一層
保鮮紙，置於溫暖處發酵約1小時，待麵糰發酵至兩倍大後，將麵糰輕壓放氣, 並分割成2等份(各180克)，「P.S.:剩下來的麵糰可另外製作小餐包」，把麵糰滾圓後，置於保鮮紙上，表面蓋上另一層保鮮紙，靜置約15分鐘．
3.將麵糰壓平排氣，造型後放入不黏模內，表面蓋上保鮮紙作第二次發酵，待麵糰發酵至兩倍大時，表面掃上蛋液，灑上白芝麻，放入已預熱至180度的焗爐內，烤焗約18分鐘即成．
(若以Toshiba東芝水波爐烤焗，選Convection preheat功能，放入預熱至180度焗爐內烤焗10分鐘，然後轉170度焗8分鐘即成)

😂😂回應鄰居洗衣機地震式嘈音(下集) #附食譜
我嘅回應係..【頂。。。。角方包】啦~😂😂
哈~原來好多朋友仔都比晚間嘅嘈音困擾，睇嚟我哋可以開番個「嘈音苦主大聯盟」喔~ XDD😆😆🤪
呢個包，代表咗我嘅心聲，半夜三更洗衣機聲浪擾人清夢，我真係想送個"頂"。。。。角方包比佢呀~😏😏
明明冇諗住咁夜撻麵糰，但一聽到佢部地震式洗衣機嘅聲浪，就忍唔住狂撻個麵糰喇~ 哈哈哈~我家大老爺就正啦，坐享漁人之利😏，冇啦啦早餐有新鮮麵包吃，佢真夠厲害，點嘈佢都瞓到，佢話下次唔好整頂角方包，叫我整豬仔包喎😏(佢完全無視我點解半夜整麵包，仲有心情選擇麵包款式，暈了🥴🤪)
平時我喜愛用湯種法整麵包，但想以最快嘅方法撻麵糰，所以用咗最直接嘅方法，咪就係直接法囉，乜種都唔落，將所有材料搓勻就是了~😏

【直接法頂角方包食譜】
材料:
1) 高筋麵粉300克
2) 雞蛋50克
3) 水份150克
4) 鹽2克
5) 糖35克
6) 即用酵母3克
7) 無鹽牛油15克

做法:

1. 將1-6 混合成麵糰，然後加入無鹽牛油，搓至光滑，將麵糰撻至起薄膜狀, 將麵糰搓圓後，置於預先鋪上保鮮紙的器皿中，然後表面蓋上一層保鮮紙，置於溫暖處發酵約1小時．

2. 麵糰發酵至2倍大，按壓排氣, 並分割成2等份，把麵糰滾圓後，置於保鮮紙上，表面蓋上另一層保鮮紙，靜置約15分鐘．

3. 麵糰壓平排氣，造型後將麵糰放入已掃固體菜油吐司模內作第2次發酵(表面蓋上保鮮紙)，待麵糰發酵約九成滿時，除去保鮮紙，合上蓋子，放入已加熱至180度的焗爐內，烤焗約30分鐘即成。(東芝水波爐選convection"須預熱" 180度焗30分鐘)(另水波爐有發酵功能，最後發酵可放入水波爐，選35度乾酵或35度蒸氣發酵)

【小貼士】

1.不同牌子的麵粉受水程度有異，水份會因應情況而有所增減．

2.冬天發酵麵包須時較長，以上食譜的麵包發酵時間，是以一般室溫為26-30度來計算．

3.不同牌子的焗爐，爐溫各有差異，如發覺成品較乾及深色，可自行更改烤焗時間及溫度．