天鵝湖（下）

上集：http://bit.do/e2ayM
　　
鴨族族長用一句話總結：「真正嘅靚，係由外到內，再由內去番外嘅。」

點樣先可以「由外到內，再由內去番外」？

我哋開會傾咗好耐，最後，有隻天鵝拎出一張海報，係意外夾喺人類書籍裡面嘅。

嗰張係「天鵝湖」嘅宣傳海報，但「天鵝湖」無天鵝，似乎係人類仿傚天鵝嘅姿態，排練咗一隻舞。

傳說，呢隻舞喺人類世界好出名，係美嘅典範。
　　

人類都要扮天鵝，證明天鵝幾咁靚。

重點係，如果我哋都排練一隻舞，用舞蹈展現我哋優美嘅身姿，咪就係「由外到內，再由內去番外」咁樣靚囉？

呢個提議一致通過，我哋決定，要排練一隻正宗嘅「天鵝湖」！

到時，我哋喺大家面前嚟一場驚艷嘅表演，到時鴨族都要承認，天鵝係真心靚。
　　

我哋搵咗一個僻靜嘅地方，每日除咗搵食之外，就集體去練舞。

用優美嘅頸項，潔白嘅翅膀，加埋團隊合作，舞出最美麗嘅弧度。

為咗精益求精，我哋都會練到好夜。

有時我哋練舞嗰陣，會見到附近有鴨仔探頭探腦。

不過唔緊要啦，就算鴨族早知我哋要跳「天鵝湖」，佢哋都無辦法搵出瑕疵。

以佢哋粗笨嘅身體，唔通可以跳番一隻「鴨仔湖」，東施效顰咩？
　　

直到有一晚，夜已深，我哋仲好努力咁排緊舞。

突然間，一陣奇怪嘅拍翼聲從空中傳來，似係鷹嘅拍翼聲，但鷹拍翼無咁大聲㗎。

我哋紛紛抬起優美嘅頸項，只見天空中密密麻麻，有幾十隻凶猛嘅老鷹。

佢哋俯衝落嚟，一隻鷹捕一隻天鵝，好似早有準備一樣。

利爪狠狠插入我哋條頸，血、疼痛、迷茫、不甘......
　　

遠處傳來鴨族難聽嘅笑聲：「哈哈哈，你哋流晒血，仲靚唔靚啊？」

老鷹搭嘴：「多謝鴨族通風報訊，呢羣天鵝無端端聚集喺呢個僻靜嘅地方，擺明係送上門嘅大餐。」

我勉力一睇，鴨族停留喺遠處嘅湖面，既防止鷹嘅突襲，又可以睇到我哋嘅醜態。

天鵝族長奄奄一息，用盡最後嘅力氣大叫：「點解？」

我哋咁靚，咁努力增值自己，你哋鴨族點解要先以言語羞辱，再通敵報訊，為我哋招來滅頂之災？
　　

「呢個湖又唔係好大，係得咁多空間、咁多食物，多咗你哋天鵝族，我哋鴨族就少咗資源啦。」

鴨族族長冷笑：「本來只係睇你哋唔順眼，寸你哋兩句，點知你哋嚟排舞，提供咗一個咁好嘅機會。」

湖面已經染滿晒天鵝嘅血，臨死前，我忽然諗起我負責嘅舞步，1、2、3、4、2、2、3、4......幾咁優美。

可惜，天鵝湖，唔再有天鵝。
　　

有利益衝突嘅人，永遠都會討厭你。

討厭一個人，好多時都係先有態度，後有理由。

因為憎你，你做咩都係錯，做好事係偽善，做壞事係果然。

與其嘗試勸服憎你嘅人，不如多啲同愛你嘅人相處。
　　
－完－
　　
將專頁設定為「搶先看」/ "See first"，最新故仔馬上睇！
　　
新書《寓言地府動物園》書展有售，
詳情可點擊這裡：http://bit.do/e2azq
你的支持是我最大的動力！
　　
#短故 #短篇 #小說 #陳美濤 #廣東話 #粵語 #tomatochan #天鵝湖