【龔成問答信箱】（Q20001-Q20020）

Q20001：

你好，有樣野想請教，請問你會根據什麼準則，決定賣出股票？

龔成老師：

「企業質素」。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q20002：

早晨，龔sir，想請教下260蚊入左一手1211，依定跌到咁，如果睇長線係咪應該繼續守，還是應該止蝕等佢返到合理區再買返？

另外都想請教下心態問題，個人對於1211真係做多幾多功課，不論係行業前景、國家政策，以致於公司本身既潛力，我都覺得1211係一間優質公司，我亦都有參考過老師你講既參考價(合理區為120蚊，最多150蚊)

然而前段時間股價真係好似坐火箭咁上，睇勢頭根本冇咩可能去返合理區(120~150蚊)，而且見佢前段時間配股300億比200間機構投資者

配股價為225蚊，當時認為既然咁多機構投資者在研究完呢間公司後都願意比225蚊呢個價錢投資入呢間公司，所以認為只要係長線投資

即使比多少少(260蚊)投資亦都無任何問題，但結果投資左冇幾耐就跌到依家197蚊，其實過程中我睇圖都知道股價跌破左支持位

正常應該要止蝕，但我當時一方面幻想睇圖唔一定百分百正確，另一方面又認同價值投資唔應該睇短期波幅，但結果現實就係越跌越多

老師我投資心態係咪出現左問題

龔成老師：

你一手，持有就得。只是要預中短期仍好波動。

你最大的問題，是企業估值與心態問題。

比亞迪（1211）有潛力，長遠有發展，這點你我都知，問題是估值，就算一隻股票好優質，但在太貴的價位買入，都會大幅減低回報，因此，在合理價買入好重要。

如果無貨好想入，而見到佢處貴的水平，投資者也只能用分注、月供等模式進行。

另外，你比機構投資者影響左，以為佢地買入就應該買入，但其實好多機構投資者分析好短視，不能完全盡信。

另外，你「睇勢頭根本冇咩可能去返合理區」，這是最錯的地方，唔好比短期股價影響，要睇翻企業質素、合理價值。

你「其實過程中我睇圖都知道股價跌破左支持位」，唔好信，我持有這股12年，試過由$88跌到$12，我都長線，如果我用睇圖方法，就唔會賺到10倍回報。（巴菲特都唔信圖，你唔好行錯路）。

------------------------------------------------

Q20003：

你好龔sir ，我手持1357美圖和6060眾安在線。都洩緊錢。有需要放棄重整嗎？謝謝

龔成老師︰

美圖公司（1357）質素一般，風險較高，長遠宜投資其他股。或小小注持有。

眾安（6060）我唔敢話佢無質素，不過，估值是最大的問題，其實到目前為止，佢的實質盈利都十分少，這刻的實質業務價值不大。

但佢做這類互聯網保險公司，的確有潛力，同時背後有支持，所以有發展，這部分產生了「概念價值」。

佢無乜盈利，但市值可以去到數百億，當中大部分都是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

所以，之後的股價，仍存有相當的不確定。但以穩健的投資角度分析，這股過往一直都不平宜。

因此，這類股可能有潛力，但不適合太大注，如果你持有的數目，已佔了你投資組合一大部分的話，最好減持部分，令你的風險減少。

------------------------------------------------

Q20004：

你好 sir ，我過往主攻舊經濟股
最近先開始入3067
我想入多幾隻新潛力股 請問以下股現時入 合理嗎？

比亞迪 我想一手一手入
吉利汽車
美團
福壽園

Thanks

龔成老師︰

比亞迪（1211）現價偏貴，回到$120才算係較合理。唔建議你一手手入，如果真的想入，回翻D先月供好了。

吉利（0175）本身的質素不差，現時價位已經略貴，要回多2,3成才算合理區，才可分注入市。

美團點評（3690）佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，這類企業不是不可投資，但不能大注。

福壽園 （1448）現價合理區頂部，可分注，但未到好平，故要控制注碼。

------------------------------------------------

Q20005：

龔成sir你好：早前請教過月供股票組合，每月$5000分別：盈富$2000、領展$1500、港鐵$1500...

直至現時一共供了一年半，盈虧分別：盈富+6.33%，領展-10.3%，港鐵+0.27%...

以上組合能夠是否適合繼續月供？或者需要更改組合？請多多拍教，謝謝

龔成老師︰

我地投資重點應放係企業質素，唔好太在意中短期波動。

你月供組合有質素和增長力，若你係年青至中年人士，都係合適的。

若你係偏年青，又相加大增長力，可以考慮換入或加入一隻潛力股。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q20006：

龔sir你好，有野問你
我想問下中概股回流上市

咁我地如果睇好果隻股票 係咪可以係美股買左先？
兩者有分別嗎？

等ipo前美股買跟在港股買 有什麼風險問題 會因為回流消息被炒起 買美股買貴左嗎

龔成老師︰

我地決定否投資一隻股票，關鍵位係睇企業質素和前景。因回留而被炒起，這些跟企業本質無關架因素，我地係唔應該考慮。

我應該先考慮這隻企業是否值得投資，之後再審視佢現時估值，是否合理，來決定而一刻是否值得投資。

至於，買美股定港股，除了2地估值和投資費用成本可能有分別外，其實無太大分別。

------------------------------------------------

Q20007：

Hello 龔sir , 我今年26歲.自己啱啱開公司做小生意.收入唔穩定.但係每月至少有2-3萬收入.

每個月會儲起半份糧.擔心父母開始年紀大.到時有咩事負擔唔起醫療開支.

想財富增值但係對投資冇乜方向.應該如何部署投資？

流動資金大概有十萬左右

龔成老師︰

由於你有生意在手，十萬流動資金留住儲用會較好。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20008：

龔老師，我每月可投資$6000，個人沒什麼目標，只想財富增值，希望你能提供些意見。

現時持有：

月供股票：
2 中電：198@$84.6
5匯豐 ：578@$58.7
66 港鐵：529@$42.9
1928金沙：[email protected]
2800盈富：@$26.271
以上全停供了，因為想重整所有組合。

債券：
Ibond 30000

股票：
1398工商 9手@$5.43
5 匯豐1手@$55.7

之前買過270粵海、66港鐵、1928金沙，全部都有斬獲，不過賺了少少就心急就放了，
因為一直買股票都是抱着短線的心態。

以上應繼續持有嗎？現在想再入270、66、1928，及你近較多講的3067。謝謝！

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，要因應番你自已的人生階段。

你現時的持股，係較保守的增值組合。除了中電（0002）、港鐵（0066）、金沙（1928）和盈富（2800）外，其餘都係收息股。

若你想進行增值，未來月供用"平穏增長股"會較好，以下都係合適選擇。但由於你資金唔多，建議$2000月供盈富（2800）+ $1000供多一隻平穏增值股。其餘$3000就儲起，等大跌市機會。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

緊記，唔好停留係賺少少就沽貨，這種賺差價模式。優質股係需要長線持有，才會達至最理想的增值效果。

------------------------------------------------

Q20009：

龔成老師，你好
本人月入$13000，依家月供緊

2800@$3000
823@$3000
012@2000

然後有幾個問題想老師比下意見

1.上面3隻月供股，我應該供幾耐或者供到幾錢先停

2.然後我手頭上仲有$5000剩，我應該再供其他優質股（例如：3067, 0066 ，1810），
定係留起，等個市跌，入便貨？

3.以我呢個進度，可以5年後儲到100萬嗎？

Thanks龔成老師

龔成老師︰

1） 月供係一個長線計劃，月供最少維持3年，並持有這些股票5年以上，才會有較理想效果。

2） 現時大市只在合理區，資金唔好盡用。這$5000先儲起，等大跌市出現時，可以用來掃貨。

3） 以恆指過去年平均回報10%計（連股息再投資），你每月投資$13000，5年後都有相當機會增值至約100萬。

但你組合上有個問題，就係非常偏重地產股。建議你將其中一隻，轉為其他股票。若你年輕，可轉成潛力股。若你已近中年，可選平穏增長股。

平穏增長股︰金沙（1928）、平安（2318）、中銀（2388）、港鐵（0066）、煤氣（0003）、長建（1038）、粵海（0270）。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q20010：

你好龔sir, 我follow 左龔sir一個星期左右，但是已經改變左我嘅思維同行為

非常感謝你！係近呢一年香港發生嘅事令我好灰同覺得無咩前途，完全好似過一日得一日

自從follow左龔sir後，睇左你如何勉勵人，又好用心教人如何投資，如何為自己創造財富

我覺得你非常用心，所以我都開始醒覺我之前一直都浪費緊時間，無好好充實自己同計劃將來

所以我而家都開始改變緊自己既思維同行為，每一日都用一個鐘睇書充實自己

每一天都mark底自己嘅消費，亦開始留意投資資訊加強自己嘅投資知識，亦買左龔sir既書來睇

遲啲會買埋龔sir既網上課程進一步增加投資資識，我相信會學而致用，對我嘅人生會有好既改變

而家每一天都覺得好充實，而且利用每一天既時間來學習，對未來亦充滿希望

我真的非常感謝龔sir！我幾兄弟妺都因為龔sir既感染力而開始學投資，計劃將來可以財務自由

另外我都借機會想請教一下龔sir, 我已經35歲，我老公差不多40歲，我哋兩個每月收入差不多有5萬蚊

除咗交租，保險費，定期儲蓄（重有6年），日常開支同父母家用外，每月有$15000儲，而家月供緊中電

煤氣，呢倆只供左6個月，另外今個月開始供埋地鐵同領展

由於我睇咗龔sir話年輕人應該集中於潛力股，所以下個月我會開始供1686，而每隻股每月都供$2000

由於中電及煤氣都係穩陣收息股，我是否減少一隻，而將啲資金$2000用嚟供多一隻潛力股呢？

想請龔sir指點一下，麻煩晒同非常感謝你的時間！

龔成老師︰

以你年紀，應以增值為主。中電（0002）增長力唔係好強﹐再加上煤氣（0003）同是公用股，太集中單一行業唔係咁理想。

減少一隻與否，你可以睇翻佢地供款，如果加起達組合3成以上，就要調整。

現時，你每月5成儲蓄，可以拿去做月供，其餘先儲起，用一邊月供一邊儲蓄的策略。新意網集團（1686）作月供目標係可以，以下股票都係合適你年紀，可以參考下。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20011：

你好龔Sir. 我未有上過你堂，係最近朋友推薦我follow你同睇你著作，才知道.

有感賺錢能力逐年遞減，實在想用現有資源增值保本，想問問龔Sir意見...

本人剛到41歲，單身，月入$26K.

2017年$390萬買入屯門市中心一單位，按7成，分25年，每月供款$10K左右. 但其實物業一直租出，現租金$11K，正好cover每月供款.

而本人跟父母同住公屋.
因租客可能於3，4月退租，在想:

1. 怕租金回落，未能再以$11K租出單位，而現時銀行息口低，有意收回單位自住，或

2. 單位繼續放租，而自己想租出鰂魚涌或北角細單位，因為office返工係太古，跟老家屯門實太遠，或

3. 售出單位，資金作其他投資用途或換其他較新的大屋苑細單位...因樓齡已33年，好怕會面對大維修，而現估值$460萬。應該如何安排？

另手頭資金約$100萬，分佈如下

-約50萬高息戶口，主要用作供樓還款之用
-約10萬外幣，通常放定期
-約8萬現金流戶口
-其他為股票，分佈如下
: 0001月供了5年（2021年超停供），每月$2500，未能計出均價
: 0883月供了5年（2021年起停供），每月$2500，未能計出均價

: 0005，2手，幾年前買入，唔記得買入價
: 0066，2手，應該$20幾時入貨，唔記得確實買入價
: 0580，3手，$2.11入（之前$2.55出咗2手）
: 1810，3手，$35入
: 1979，1手，$2.45入
: 1093，1手，$8.17入
: 0175，1手，$33.1入

我都係高位入貨，應如何變陣？我係想先放咗0066同剩餘嘅0580...

另外2月份開始，想繼續月供，分佈如下可以嗎？
-2800，$3000
-2269，$2500
-2382，$2500

之前1212我$192入咗1手，hold唔住升勢，好驚，$200已放...我應唔應該月供BYD?

多謝龔Sir提供意見。感激

龔成老師︰

物業方面，除非佢升值潛力好低，否則唔建議你沽出，令自已處於沽空樓市狀態。

而是否另找租用自住單位，這個可以較從你生活角度考慮。但盡可能減少這方面支出，因為這會令你用來增值的資金減少。

投資股票方面，首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

天寶集團（1979）、中海油（0883）質素較一般，不宜持有太多。其餘都有質素，可長線持有。

而月供中，藥明生物（2269）不確定性較高，不宜月供。我唔係話佢無質素，但只宜小注投資，但月供就唔好了，畢竟潛在波動性唔細。你可以用以下平穏增長股代替。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

至於比亞迪（1211）係一隻好有質素和潛力的股票，雖然已經係貴。但只要係有質素，其實我地應該長線咁持有，先至最有利。

若你想月供，我唔建議住，最好回到$120才再開始。

------------------------------------------------

Q20012：

您好，龔成老師。我是您的忠實讀者，深受您一直以來推廣買優質股作投資增值的方針。

自追看您的書和文章以來，改變了我的選股習慣，在生活上出現質量的改變，不再花時間盯著股價炒出炒入，而是花更多心機看財報，研究一間公司的實務。

不過最近在投資路上遇到些策略問題，想請問一下。

我持有農夫山泉（9633）的股票。買入位置並不算太漂亮

在$47元左右，而且只有2手。最近市況回調，我判斷並不是公司質素出現問題，只是升幅太急出現調整。

但我的買入價又不止於低得可以漠視跌幅。我不知道應該先行獲利，以免股票由賺變蝕；還是應該觀察，若然價錢調整到不錯水平而加倉？

由於這種半新股在市場上跑不長，我不太確定如何評定$47元到底是高是低。希望在操作上請教一下。感激！

龔成老師︰

記住，我地持唔持有隻股票，唔好用"買入價"去做決定，應該用佢質素去做考量。

農夫山泉（9633）是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，都有投資價值。但始終上左市唔耐，真實面要慢慢先見到。現時真正用數據唔多，要做個好全面架值，唔容易。

我地可以睇翻佢2019年純利只有約50億，現時市值郤去到3000億。雖然佢有質素，但此刻估值唔平。

如果2手佔你總資金比重唔算高，你可以長線持有。

------------------------------------------------

Q20013：

老師，若果手頭上的舊股票，如318，348，6896等已無咩市場成交，那可怎處理呢？

2800由之前22，23元留意到，但沒有買，現時升至最高峰，是否要待回落後才入較理想?

龔成老師︰

盈富（2800）雖然已經升左唔少，但都算合理區，現價可先入一注。每回調10%左右，就再加注。

黃河實業（0318）從事金融服務業務、證券業務、物業等業務。

此股市值和收入都唔高，而且賺錢能力好一般。過往幾年，佢盈利都好波動，甚至出現虧損。

故投資價值只是一般，長線慢慢換碼至其他優質股較好。

中國智能健康（0348）年年虧損，而且仲出現過"十合一"，好大機會係財技股。此股唔見有投資價值，建議沽出。

金嗓子（6896）近年的盈利有下跌情況，其實佢不是完全無質素，但市場過往對佢有太大期望，但現時見到佢增長力只是一般。

你預這股是收息，以及有平穩增值，可以持有住先。但如果太多貨，就應該賣出一部分。

------------------------------------------------

Q20014：

龔老師你好啊！不知可否幫我解答啲問題？

本人29歲，已婚，兩公婆一個月合共約5萬，從事公務員。持有一物業

樓貸有約220萬，每月還約8200。存款約有60萬。每年兩公婆保險約3萬。

請問應該點樣投資好啲？

龔成老師︰

由於你已有物業，之後的財富配置，應著重股票類別。而存款不要太急用盡，要慢慢分注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀29歲，應用"平穏增長股" + "潛力股"的組合。現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰小米（1810）、中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20015：

老師，你好我從來未買過股票，很想學下投資，目標是5年能賺取100萬，現在有資本50萬，請教可以怎樣投資呢？

龔成老師︰

對新身來說，要5年升一倍，策略上進取點。你可以投資"平穏增長股" 和 "潛力股"，比例各佔一半。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

潛力股︰選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

大市現處於合理區，50萬資金先投入一半，用"分注"形式，慢慢儲貨。餘下一半就等大市出現，才大力掃貨。

這樣安排，相信較大機會令你達成目標。但由於你組合中潛力股佔唔少，佢雖然可提升增長力，同時波動性都會較高，令你最終回報不確性高左，你要明白這個風險。

------------------------------------------------

Q20016：

你好, 龔sir，我持有1797，均價30. X ，但近日一日低過一日，已經52週低，請問龔sir 覺得還有機會回升嗎？

定係止蝕換馬其他股票？謝謝你。

我比股票玩左15年，現在35歲，因為太信消息，亂買股票，手上仲有一大堆以前高位買入的股票

（有啲蝕到手續費都唔夠,都唔寫出來了，總之呢15年都係蝕多，超過6位數字）：
1088 33元 1000股
358 21元 2000股
698 2元 60000股

近2年保守啲
1398 4. 8元 20000股
823 59元 500股
1797 30. X元 2000股
941 49元 2000股

而家就係好擔心隻1797，唔知點好。
請問龔sir我應該之後點買股較好？

龔成老師︰

記住唔好短炒，"52週低"這些技術分析無用，唔好用佢做參考。

我地買入一隻股票，一定要分析佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，就記住先停一停，唔好投資住。

新東方在綫（1797）有潛力的，不過之前股價上得太多，就算現價仍少少貴。佢主力要線上教育。向學生所提供的在線教育課程包括大學教育、Ｋ－１２教育及學前教育。當中，大學及Ｋ－１２教育分部課程均為課外活動性質，不計入大學或中學文憑要求。

大學教育服務主要包括大學考試備考、海外備考及英語學習。Ｋ－１２教育服務包括涵蓋中國小學至高中大部分標準學校學科的校外輔導課程，及提供專為普通高等學校招生全國統一考試而設的備考課程。

長遠的潛力是有的，但股價都升左好多，比較擔心是企業估值問題，始終市場有時會過份樂觀。只可以話，這股潛力是有，若佔你組合唔多，可持有。同時，你預佢股價會較為波動。

中國神華（1088）、江西銅業股份（0358）和通達集團（0698）本質算是不過不失，若佔組合不多，可守住先。

其餘股票無問題，可持有。

整體而言，你無論定平貴和選股上﹐都唔係咁理想。我建議你再投資前，先學好正確投資技巧，咁會較好。

你可以先睇我寫架"80後百萬富翁"、"財務自由行"和"股票勝經"，都適合初學者，相信對你有一定幫助。

------------------------------------------------

Q20017：

老師你好！我想研究股票，但有以下問題，希望你可以指教我

1)點樣可以發掘到潛力股/板塊?

2)點樣可以了解市場情況 (包括現在&未來趨勢)?

3)了解一間公司除睇年報外仲可以有咩方法?

4)而家好多優質股票都偏貴，資金唔多既情況下，係咪要等跌市先好入？

5)有冇咩書籍可以推薦比我？

謝謝老師

龔成老師：

1）要用一套有系統的方法去選股，如果只睇傳媒或別人推介，很多時已經是「升左」，所以，要自己發掘。

例如利用企業的財務指標，產品的增長力，行業的發展等。這是一個好大的題目，你可以睇《選股勝經》。

2）要了解行業、產品，以及大環境的變化，要睇好多資料的，企業年報都有用。

3）年報是最有用的，該公司的年報及對手年報，另外就是網站，以及一些大行報告。

4）對，或首先投資舊經濟類股，因為這類未貴。

5）《股票勝經》《選股勝經》《50優質潛力股》。

------------------------------------------------

Q20018：

老師我想多謝你！

我4年前（35yr)開始讀你的書，後來也上你的堂！雖然我已婚，有2個孩子，月入$26000，已錯失黃金投資時間，但經儲蓄+投資，今年終於有第一個100萬！

目標15年後有400萬

龔成老師：

太好了！加油！

我相信只要保持進步，知識與儲蓄投資同時增加，你要達標無問題的。

------------------------------------------------

Q20019：

Halo 龔sir，我最近學習緊研究資產負債表，發現左樣我覺得幾有趣既野

1. 點解同樣為賭業公司，銀娛既長期負債係會比金沙少咁多，而相反短期負債就係金沙少d？

2. 有冇話長期負債或者短期負債邊樣少d係會好d？

3. 如果見到公司既現金係多過長期負債，咁係咪都代表公司既財政比較穩健？如果唔係既話現金呢項應該同邊樣對比比較適合？

問題有點長，唔好意思！謝謝你！

龔成老師：

1）每間公司的資產負債結構唔同，有時一間公司本身的長債就到期，就會變成短期債，因此不一定能比較的，仲要有好多野要分析。例如大家的發展等。

2）通常長期負債都是為企業長期發展而用的，而短期負債就是給公司營運，如果企業以短期負債去進行長線投資，就會出現了資金的錯配。

3）現金較多當然較穩定。

投資者會分析佢現金的比例是否足夠，最重要是日常的營運，同時會分析佢的現金流情況，這都會影響企業要多少現金去進行營運。

------------------------------------------------

Q20020：

老師你好 最近Saas 類別股票 2013/3888/268 邊隻會比較好？

老師你好 想買3033/3067 建議都持有 還是㨂3067？ 感謝老師

龔成老師：

這3隻都不差，都是有質素有潛力的股。

金山軟件（3888）算是這刻在3隻中無咁貴的一隻，佢主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區頂位，唔建議大注投資。

這股前景正面的。

至於3033/3067，我睇翻佢地的管理費，3067較少，所以選這個較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16341-Q16360）

Q16341：

你好，朋友介紹可以問下你一d股票意見，我依家手上主要有資源股，1733及1029，值得keep？
感謝

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

易大宗（1733）是財技股，風險高。

同埋，如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

鐵貨（1029）業務波動，經常出現虧損，加上曾有某些年份，核數師意見有少少問題，同樣不宜投資。

企業的投資價值不高，你最好找機會賣出。

------------------------------------------------

Q16342：

龔成老師：你好我想問下本人有一間樓係珠海，有一間在香港，現金大約一千萬。

我想問點投資可以做到每月有大約兩萬蚊收入？本人同太太都無工作的，謝謝

龔成老師：

如果你本身有2個物業，在財富的配置上，之後應加強其他類別的資產，這樣能有效建立一個平衡配置。

你可以將這$1000萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有6%股息

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$1000萬資金，平衡地分配在上述的項目上，對你來說是最好平衡風險，同時有穩定的現金流。

我相信上述的組合，可以建立到平均5%的利息回報，以$1000萬來說，一年就是$50萬，每月約$40000，能合到你的要求。

------------------------------------------------

Q16343：

老師，我27歲，想問：

1. 現階段希望可以增加股票投資既知識
暫時都有睇緊老師既書同經常睇老師係post係facebook既信箱回覆 去增加哩方面既知識 因為平日要番工 所以6月股票班未能報名 希望等到8-9月可以開到星期六班

係現階段 未上股票班既情況 點樣先可以令自己更具體咁樣去分析企業？係書入面其實老師都講過一啲formula (ROE, price-to-earning 哩啲既概念）

其實大學讀financial accounting都有見過哩啲公式 但當時都係死記去應付考試 完全冇諗過現實真係用得番出黎 當然當時考試所設立既情境相對上又比現實生活簡單得多

年報個篇幅咁大 初學者可以點樣去入手分析？

2. 打算今年/明年購買大約580萬左右既物業 暫時只有約30萬現金一些股票，另外屋企會預100萬首期俾我。現時係咪唔應該買股票同做月供？應該先增加自己既儲蓄能力先？

3. 我有幫爺爺嫲嫲(現時大約84-87歲)的退休金做定期 大約$16萬港幣(就到期)，2萬人民幣 (6月到期)
如果想幫佢哋做資產增值有咩方法？
十分感謝

龔成老師：

1）你暫時可以多睇年報，這是一個活學活用的方法，你睇《股票勝經》，同時睇年報與財經網站，實戰去分析。

我在股票班有一句說話經常講，就是「將財務數字意義化」，數字是死的，但如果你可以配合大環境情況，去解讀數字，這就是活用。你多從這個方向著手，點解佢當時會賺大錢？當時環境發生咩事？佢那個產品帶動盈利大增？這都是你的分析方向。

年報內容，你集中睇「主席報告」「管理層討論」「損益表」「資產負債表」。

至於星期六班，可能在年尾會再搞。

2）你應該計好要多少錢買樓先，這是第一要處理的事，餘下的資金，才可投資股票。

3）以佢地的年齡，定期是較適合，你部分資金可以投資政府發行的「銀色債券」，小部分投資收息股。

------------------------------------------------

Q16344：

老師，我已經開始月供股票了。每天也會追看老師的post,也會購買老師推薦的書籍，改變人生。

我從來也不敢相信自己會買股票，因有人說過我不適合投資，所以一直覺得自己對買股票沒有信心。多謝老師不辭勞苦地回覆我們每一位讀者，你給了我們很大的幫助和啟發。

我有個問題不太明白，想請教老師，老師經常推介讀者如不懂選股，或分散風險，就買盈富基金，但如我在強積金已有供恆指基金/香港基金，那我股票上還需要買盈富基金嗎？不太理解會否有衝突，利弊。

其實強積金，最簡單是否買恆指基金就可以了？

龔成老師：

同時在強積金投資恆指，以及你自己買盈富（2800），的確會有少少重覆，不過，問題不算好大。

因為恆指本身是一個50隻股票的組合，根據研究，當持股數量去到15隻以上，就可以有效減少「非系統性風險」，因此已做到一定的風險分散效果。

當然，會有少少重覆左。

如果你想做好D，可以在強積金，除左選恆指基金，同時選一些環球股票的基金，作一個平衡配置。部分選恆指是最簡單的。

總之你記住，我地買股票原理不是炒賣，而是儲股票，持有優質股，長線投資。

------------------------------------------------

Q16345：

老師，我開始學緊點樣去估值，去分辨股價平定貴，但計出嚟嘅同老師講嘅都有出入

暫時先記低你解答別人時講邊隻股票幾錢係平，但我發覺好難等到股票真係去到你講嘅平價

如果資金唔多，例如$10萬，可以買嘅股票已經唔多，亦都分唔到好多注，而家合理價時應該都照入貨，定係再等到平先入呢？

又或是直接攞哂去做月供，小注如每股$5000每月去入呢？

龔成老師：

估值是一個較難的動作，要長時間練習先得，就算我計算出來，都不是絕對準確的。因為企業估值只是一個概念，並不是數學1+1=2般。

不同估值會出現不同的答案，投資者都是盡力用不同的角度，去推算出企業的估值。

我十幾年前開始學估值時，逼自己每星期分析一間企業，計估值，寫低，當過了一段時間再睇翻，就會知自己對與錯。

如果你資金唔多，利用月供股票是較好的做法，整個組合會更加平衡，如果一手手買，你好多時會好集中在某些股，同埋價格無法平均。

------------------------------------------------

Q16346：

老師 請問恒地 新地 港鐵roe都偏低 在企業質素上 是否有扣分？

龔成老師：

少少，但這是好多資產型企業會出現的情況。

因為佢地的運作模式，要較大的資產去產生盈利，由於基數較大，所以計算出來的回報率，一般都會較弱，佢地的行業一般都有這個情況。

因此在增長力上，唔會太強，因為難以一下子作出好大量數投資去令業務增長。不過，由於整體行業都有這情況，所以，但由於企業本身有獨特性及賺錢能力，因此整體又不算差，只是增長力方面較難有高增長。

------------------------------------------------

Q16347：

非常感謝你的寶貴見意,這段時間很努力地看你的作品,每本最少看三次！

雖然之前看過了,但我發覺自己没有做到你教導的東西,例:價直投資企業,只入唔出,多留現金,分注慢慢買入等!

現在返省自己做錯的地方,我要調整好心態,不要賺差價,有耐性地分住買入優質股,長线持有不要理中短期股價

龔成老師：

要將知識，活學活用。你睇完書後，第一樣野就是分析翻自己的投資組合，自己現時的投資行為，有那些需要改善。

無人一開始就識，但我地一定要活用所學的野，先算真正學到，而好多知識，都要你從「經歷」中學習。保持進步！

------------------------------------------------

Q16348：

老師，唔好意思，想了解下如果暫時動用$25萬分注投資優質股，就從你平時推介的平穩增長股、潛力股、收息股裡再做研究可以嗎？

如果已打算月攻平穩增長股，還是應該主攻潛力股和收息股嗎？

龔成老師：

首先，要睇翻你年齡、負擔、風險承受能力。年輕可以較多潛力股，中年人會較多平穩類股票，年長人士則較多收息股。

所以，你可以先設計一個組合的比例，然後再在當中選取有質素的股票，月供或分注投資，長線持有。

對大部分來說，優質、平穩增長股作為組合的核心，是可以的，例如，盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q16349：

你好龔成 我係啱啱哩幾個月睇你嘅讀者 宜家20歲 大概有4萬積蓄 哩段時間都買咗你4本書想好好學習投資理財
我打算之後月供股票 你覺得如果以我每月暫時大概parttime 6000 想用$1000月供盈富值得嗎

因為手續費$25都唔算少 定係可以供多啲或者供多一隻? 假如供多一款 有冇行業值得先研究然後月供?

另外我父母有買匯豐 佢哋買入位3位數 打算$43放 但因為我未好識分析公司長線價值 唔知道係咪應該放棄(個人認為匯豐長線仲係值得投資 但唔肯定價位會唔會升唔返) 所以想聽下你意見 再俾父母參考。唔該你!

龔成老師：

如果每月供$1000，而手續費佔了$25，比率超過1%，我不太建議。因為最好將手續費佔比控制在1%以下較好。

我會建議你先儲現金，等你有一定的現金數量，之後才開始然後每月供$2000、$3000較好。

盈富（2800）是一個組合，有平穩增長，適合你的。

至於匯豐（0005），只是收息股，增長力有限，但不是無持有的價值，如果本身只想收息的話，長遠仍是可以。所以，要睇翻佢地的投資目標。

------------------------------------------------

Q16350：

想請教一下老師怎看6185？

另外，請問老師日後會否有機會星期六開班？平日下班來有點來不及。

龔成老師：

康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力，但不確定性太大，如果投資，不是不可，但一定只能小注進行。

至於星期六班，今年3月開左一次，可能年尾開多一次，你可以留意公布。或預先 WHATSAPP 55457212 我同事。打「留位星期六」，到時有星期六班，就會通知你。

------------------------------------------------

Q16351：

你好成哥，我39歲，請教你，本人發覺近期投資股票沒有方向，見低位及高息就會小注買入，結果有大大話話10隻股票,以下手揸持股票

中國電信(正股）
中國聨通(正股)
電能(月供)
長江基建(月供丶1手)
煤氣(月供)
港燈(月供丶1手)
領展(正股)
滙豐(月供)
建設銀行(正股)
盈富基金(月供)

我現在可以點樣重新分配？有邊隻可以沽或停月供？

成哥，你見唔見意，例如港交所丶阿里巴巴丶或者騰訊用月供買法？謝！

龔成老師：

投資股票不能無方向的，首先，要睇翻你的年齡及風險承受程度，設計一個財富比例分配的方向，下一步，就是當中選股，建立每隻股期望的比例，以及分析平貴，設定一套入市策略。

如果你現時39歲，其實仍是財富增值的年齡，收息股就未必適合你所以匯豐（0005）、建行（0939）、港燈（2638）、電能（0006）都只是收息股。

你先設計好組合方向先。

至於你另外想月供的3股，都是有質素，可以利用月供投資，同時有增長力，適合你。可以成為你組合其中一部分，但不能只集中投資這幾隻股。

同埋要記住，投資，不是炒賣，而是買入後長期持有，建立一個組合。

------------------------------------------------

Q16352：

成老師你好
我較早前買入

2018 $42 7000股
請問應該要繼續持有定係止蝕？
謝謝！

龔成老師：

瑞聲科技（2018）不差的，長遠仍有發展，不過就不是好強的增長力。你買入價算是合理區，唔需要太過擔心，不過，中短期一定會好波動。

如果持股佔你財富比例不過多，你持有無問題，暫時可以守住先。

------------------------------------------------

Q16353：

龔SIR，您好! 本人在0.012價位買入24萬股基石金融(8112)，之後該公司公佈先合股後拆細。

請問如果繼持有該股票，在完成先合後拆後，對我會有甚麼影響? 我會損失很多嗎? 希望能獲得解答，謝謝!

龔成老師：

如果你睇翻佢過往的「公司活動」，你會見到佢經常有合股拆股供股的情況，這類股，不建議投資，因為一般都會對小股東不利的。

基石金融（8112）我無研究，只可以話這是一些財技的動作，例如合股後，股價會增加，但你持股數會減少，之後往往股價會再向下，簡單來講，就是對你不利。這類股，建議賣出。

------------------------------------------------

Q16354：

龔成老師您好，我今年二十五歲，從事電腦行業。想請教一下應該如何實踐投資理財。

我兩三年前開始接觸股票及加密貨幣，結果過了大約一年左右損手本金30%收場。在損手之後，就決定要做好理財及投資計劃，想學習正確方法投資的方法。

我買了幾本比較多人推薦的書本: 金融怪傑, 賺錢再自然不過, 交易・創造自己的聖杯, 漫步華爾街, 窮爸爸富爸爸。當然也看了您的八十後百萬富翁，和其他一些有關經濟及金融知識基楚的書籍。

我現在的計劃是今年先做好月供計劃，然後學習基本分析去選有價值/成長空間的股票。在下一年，希望可以把選股步驟程式化。等程式成熟以後就開始涉獵技術分析。

不過看了這麼多書，感覺現在我除了有一個比較好的知識基礎外，對實戰投資並沒有太大幫助。所以，我之後應該如何踏出下一步? 有什麼網站/書本可以推薦嗎? 我想的計劃有沒有什麼問題。

另外，不知道老師可不可以分享一下你當時是如果踏出第一步? 現在的你又會如何建議其他人怎樣踏出實踐的第一步?

龔成老師：

我地進行財富累積，最重要是「長期累積資產」，投資不是炒賣，是長期，不斷買入一些有真正財富價值的資產項。

最典型有「物業」「優質股」。

所以，你利用月供股票，長期儲貨就得。

至於技件術分析，全球投資賺最多錢的人，巴菲特，已講明無用，我過往做了10年銀行、證券行，見D客用技術分析，100個有98個輸錢的。

我自己18歲開始買股票，頭5年用技術分析，輸好多錢，我好後悔浪費左5年去學技術分析。

你一定要學正確的投資知識，你唔好再行錯路！

你要思考一下，邊個買股票長期能賺大錢？就是巴菲特！

你可以睇佢的相關書，亦可以睇《股票勝經》、《年報勝經》。

------------------------------------------------

Q16355：

老師您好，我宜家讀緊大學Year4，有翻part time同幫人補習，月入10000。

我想放3000作月供股票投資盈富基金，你認為我應該全數放入盈富還是2000 盈富加1000領展？ 謝謝

龔成老師：

你這年齡可以自己有$10000，是不差的成績。

月供股票是很好的長期財富累積方法，你可以供盈富（2800）$2000，領展（0823）$1000，之後再你收入增加時，可以加大盈富金額，以及加入其他不同的股票。

------------------------------------------------

Q16356：

成哥你好，我28歲，早前理財不善，但偶爾發現了你FB，亦買了你的書，現在開始學投資，資金如下：

現金: $25,000
一手0823 @$64.2
一手1928@$30.2

月供股票:
9988: $1,000
2800: $2,000
月入: $20,000

扣除所有開支及月供股票部分，每月儲約$3,500
我呢家搵緊PT，希望搵到有約$4,000既PT收入，再將$2,000放係月供股票，其中$1,000放係2800，另外$1,000放係另一隻優質股/潛力股，咁樣應該冇問題?

因為家人最近買左樓，所以我會將淨抵既PT收入放係供樓上面，呢家有2個目標，就係4年內同另一半儲夠40萬結婚，另外就係希望35歲時買到層新樓比屋企人住

因為佢地講過想住好少少，而當我35歲時佢地都岩岩好係退休年齡，到時希望可以儲夠80-100萬，再樓換樓，請問方向是否正確?謝謝成哥!

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。你利用兼職去增加收入，很好，你要加油！先辛後甜！

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

現時你月供的盈富（2800）與阿里（9988），可以保持進行。如果加多$2000，其中$1000加盈富，另外$1000可加入另一隻潛力股。

你的方向正確。

以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16357：

老師你好！想問下我今年30歲。每月儲現金$12000、基金相連保險$4000, 舊年開始月供股票，而家供緊：

0005, 1211 各 $500
6823, 2388, 1928, 823, 388, 66, 12, 9988 各$1000
2800 $3000

以上儲蓄都係啲唔等用嘅錢（有保險、亦另外有現金應急），打算長線投資增值。
請問：

1. 月供組合ok嗎？會唔會太分散？

2. 而家預期股票可能會再平啲嘅時期，應該減少月供每個月再儲多啲現金定係而家咁都ok?謝謝！

龔成老師：

1）的確太散。我會建議你減少3分1，你可以在當中選股，集中供翻D比較優質的。另外，30歲是財富增長期，收息股未必適合，因此匯豐（0005）未必適合你。

2）首先，你現時一定要有一些現金在手，如果大市下跌，你可以出手。

不過，無人知大市會唔會跌，而你「而家預期股票可能會再平啲嘅時期」，這是不一定會出現。

因此，你保持現時的月供是最好的。

（但如果你這刻全無現金，就要增加多D先）。

------------------------------------------------

Q16358：

老師，我係你讀者。我想請教下你啊
我就27歲，剛剛有小朋友
每月人工就2萬到：分配既錢

如下：
$5000交租
$2500+$2000月供股票 煤氣同盈富基金
$5000 儲蓄保險（5年完）
可以用既錢$5500

我既股票暫時有：
3手823
2手405
5手7500做對沖

我想問如果我想再增值，資產配置應該點做到最大效果啊？

龔成老師：

現時你持有的，都是有質素的股票，但唔建議太集中在房託，因為同一行業始終有系統性風險，你要留意翻。

至於月供部分，都是有質素，可以長期進行，但最好加多少少盈富（2800）的金額，減翻少少煤氣（0003）的金額。

如果你想加大財富增值，第一，要想方法增加收入，你27歲，是財富增值的黃金時期，要好好把握，盡你一切的力量去儲蓄、投資、學投資知識。

第二，你可以加大投資潛力股的比例，但這一定會有危有機，所以你先要增加翻你的投資知識，然後才行這一步。

至於ＦＩ二南方恒指（7500），我就唔太建議投資。以正常的模式持有正股就得。

------------------------------------------------

Q16359：

老師！之前買入咗：

581 $4.3
187 $3.8
666 $0.3

想問以上幾隻股票應否繼續揸落去
定係斬攬呢？

龔成老師：

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

但如果本質差，就要賣出。

中國東方集團（0581），業務比較波動，有時生意較好，有時有出現虧損，這類股的質素只屬中等。

這股質素中等，如果持有太多，應賣出部分。

京城機電股份（0187）持續虧損多年，無乜投資價值。

新工投資（0666）之前不斷虧損，近年有少少盈利，但本質不太好，反彈後宜賣出。

------------------------------------------------

Q16360：

你好呀…如果我只可以拎到一萬元出黎買股票，可以買邊隻好

因為我租地方住無多餘錢啦…
想賺返少少生活費

龔成老師：

財不入急門，我地累積財富，要合理地進行。

我會建議你持有現金，到有足夠資金，先考慮投資。

如果真的好想將$10000投資，你可以考慮一些穩健，而入場費不高的股票，領展（0823）、港燈（2638）、領航標普五百（3140）都是可以考慮的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13481-Q13500）

Q13481：

老師，聽說過美股基金3140 成交量低，會唔會係一個隱憂？因為我想買。

龔成老師：

領航標普五百（3140）成交的確不多，這會出現兩個問題，第一，買賣差價會略闊，所以你買賣時，唔好心急，要見到合理價先買，同時，只要你長線投資，問題就不大。

另一個問題，就是最壞的情況，間基金公司唔再搞。

其實香港都出現過類似的情況，ETF最後決定唔上市，當時的情況就是，佢會比一段時間，預早通知投資者，佢唔再上市，但基金仍會存在，只是由上市變成不上市。

由於這些是指數基金，當中的股票持貨不會改變，價值不會改響，所以，對實質價值不會有影響，只是買賣的問題。由過往好方便在股市裡賣出，到要簽文件較煩去賣出。

這是最壞的情況，好少會發生的。

------------------------------------------------

Q13482：

你好，最近開始了月供股票，$2000盈富、$2000領展、$1500比亞迪、$1000煤氣、$500中國鐵塔，想問呢個組合可以嗎?

另外每個月儲3000左右以備不時之需。

龔成老師：

可以，上述都是有質素的股票，你可以進行長期月供，只要唔好理中短期股價就得。

如果你想增加組合的平衡度，可以到你日後收入再增加時，加大盈富（2800）的月供金額，這能有效平衡風險。

現時大市處合理區，可以一邊投資一邊留現金，而餘下$3000現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q13483：

龔成老師，想請教老師如何看白銀的潛力，如果我想投資白銀既相關產業，有邊d股票比較適合？

龔成老師：

黃金、白銀，我地會稱為終極貨幣，有持有的價值，可以在組合中發揮作用，因為終極貨幣有對沖大型黑天鵝的風險。不過，佢地無現金流，所以在策略上，我地只需要小注持有已得。

我自己都持有小量的實貨白銀。

由於目的是對沖大型黑天鵝的風險，所以持有實貨銀條，會比較好。

加上白銀有工業的用途，所以每年都在不斷消耗。

至於白銀相關股票，我就無特別研究了，因此不太清楚。

------------------------------------------------

Q13484：

成哥，你點睇富士高實業(927)?謝謝

龔成老師：

富士高實業（0927）主要從事設計、製造、推廣及銷售電聲產品、配件及其他電子產品。佢的核心業務包括音響產品、通訊產品、多媒體產品；非核心業務包括電聲零件、電子產品配件。

睇翻佢過往的業績，算是不過不失，業務無也增長，盈利普通，股本回報率唔太高。企業無乜特別，投資價值算是中等的類別，現時估值合理。

------------------------------------------------

Q13485：

Hello，龔Sir，想問你對台灣的股市有冇研究？會唔會考慮嚟台灣開班。

因為我知道好多香港人移民咗嚟台灣，但仲有資產响香港，好似我咁，所以希望有機會上你的投資班。

龔成老師：

我對台股無乜研究，主力在港股。
我的部分書，台灣都有得賣的。

我會研究下台灣有幾多讀者，睇下有無機會開班。暫時就未必，但將來就希望有機會。

------------------------------------------------

Q13486：

成哥你好，2星期前開始我已經用$1000 月供 2800，現在想用多 $500 供港鐵，同$500 中電。想買d收息股. 請問點睇？

龔成老師：

上述的，都是有質素的股票，你可以月供，只要長線進行就得。

現時大市處合理區，只要你每月供股後，每月仍能餘下少少現金，咁樣你就可以進行上述的計劃。基本上已經可以進行。

------------------------------------------------

Q13487：

請問零售股
有無d風險較低的介紹？

龔成老師：

香港的零售，近期處於有危有機的狀態，所以好難完全無風險的。而部分已有一定的投資值博率，只要我地集中長期分析，唔好理中短期的股價波動就得。

但有一個前題，就是我地只投資有質素的，要肯定佢地能渡過寒冬期，因此，要現金足夠，財務穩健的。周大福（1929）、六福（0590）、莎莎（0178）、利福（1212），都是可選之列。當中以六福、利福值博率會高一點。

但要留意，中短期一定會弱，香港經濟會弱，而所有分析點都是假設長期香港的零售會回到正常狀態，因此要長線投資。同時不建議太過訓身。

------------------------------------------------

Q13488：

0005咩位入好？
Thank you

龔成老師：

匯豐（0005）現價已是合理區，基本上已經夏以投資。

這股只是收息股，唔好對股價有太大期望。如果你想較好的價買入，就跌10%先，股息率回報會更吸引，但無人知能夠落到這價。

------------------------------------------------

Q13489：

龔成老師，股息再投資係能夠滾大盈利。

但想問，例如我收左三千蚊息，我應該將月供額下個月加三千啊，定應該點做會比較好？

龔成老師

我地進行投資，一定是「複息利滾存」，即是說，你將收到的股息後再投資，是大前題。

但我地唔需要太心急投資，你可以先儲起，例如將每次收到的股息後，先儲起，到了一定的數目，以及適當的投資時機才進行。

因為大市都有平貴時機，你可以等較平的時候才進行較多的投資。

因此，就算你先儲起這些股息一年都無問題。重點是「將會進行投資」。

------------------------------------------------

Q13490：

sir，計企業估值的時候，我哋會用每年嘅數據，咁其中個原因係香港嘅上市公司係一年出兩次業績。而在美國的話，佢哋係一年出四次業績，咁嘅情況下我哋應該隔幾耐去再重新評估呢？

龔成老師：

其實原理都是一樣的，公司出幾多次業績，同我地點樣分析無太大影響。我地一般都會每半年分析一次，如果間公司一年出4次，可以每半年檢視一次，同時中間每次出業績時，簡單睇下就得，唔需要重新評估，除非發生了較大的情況。

------------------------------------------------

Q13491：

老師，想了解，你指的長期進行即多少年期？
謝謝。

龔成老師：

我平時所說的長期，一般是指5年以上。

而最起碼，我都認為要投資3年。

------------------------------------------------

Q13492：

龔sir你好，我今年28歲，月入21k。本身月供緊

2800($4000)
0012($2000)
0066($2000)
2388($2000)
1177($1000)
1211($1000)
1)以上組合會唔會過多或者保守？

2)另外，我透過做兼職可以有多大約$5000收入，想利用這筆錢投資一至兩年打算結婚用。請問除左月供股票，有冇其他投資產品有穩定的回報？定係每個月月供多$5000，一至兩年先放出部分股票？

3)我媽媽56歲，剛退休，想投資股票收息養老。請問有冇推介？

龔成老師：

1）當我地進行人生財富累積，會運用「先增值，後現金流」，你28歲，的確是財富增長的黃金年期。你上述所選的股票，都是有質素，都可以進行月供，當中以平穩增長型為主，潛力股佔部分。

由於潛力股有風險，因此不能太多，加上潛力股要求你有一定的投資實力，因此這刻相信在比例上是適合的。除非你日後有較多資金，就可以加多少少。

2）由於你結婚有實際的用途，而投資一定有風險，因此只建議你持有現金，最多只能一半以下投資收息股。

3）佢可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q13493：

成哥你好，看你書，看中：金利來
想問：

1.現價是否合理區？這股換人後是否依舊穩健？

2.因為hsbc 冇佢月供，
我想現價先一注，如每跌10%入一注，長揸收息，策略如何？

3.佢成交好少，例如今日得十萬元成交額，其實係咪唔好嘅反映，即想放未必放到？

4.佢高位回落不少，於近年低位，是否因為每年純利有不斷下跌 跡象,
現價入(如長揸)有冇問題？(即不定止蝕位，每跌10%入一注)

因你講過看中優質股，股價跌反而是買入機會，而不是去擔心繼而去沽出。謝謝賜教

龔成老師：

金利來（0533）都有質素的，特別是持有的物業。但這股在業務上，增長力的確不強，近年大陸部分都減弱左。

1）現價處於合理區，股息率去到7%，換人後質素仍在，但增長力不強，因此只可以視為收息股，唔好對股價有太大的期望。

2）你可以用你所講的策略進行，只要總金額不過多就無問題。

3）這會令買賣差價有時較闊，但只要你是長線投資，同時買入時唔好強行追價就得。

4）中國業務一般，香港的經濟，都對佢盈利有所影響。現價買入可以的。

我地分析股票，要集中睇企業的業務層面，當你見到股價下跌，要睇翻業務有無一些根本性的問題，如果業務仍有質素，只是短期股價跌，就是買入時機。

------------------------------------------------

Q13494：

老師, 點解你只教人供股, 唔教炒樓？

龔成老師：

每個投資者都有佢自身的強項，而我專於企業分析。

當然，我都有講樓市的，你見《財務自由行》在多年前出版時，已建議當時的投資者，可以以一個「888模式」去累積物業，即是每8年投資一間物業，同時配合股票去滾大資金。

香港，物業與股票是最常見的資產項，因此在財富組合中配合運用，往往有不錯的效果。

由於每一類別投資，都是一個大學問，每個人時間有限，所以集中發展一項會比較好。

------------------------------------------------

Q13495：

龔sir你好，本人2018年3月份買咗800股騰訊控股<700>,股价440左右，一直持股至今日。現階段我係應該繼續持有還是全數放出？想聽下你意見，謝謝!

龔成老師：

騰訊（0700）本身有質素，你可以守。

但這股的增長力已過了最高的年代，加上你的買入價處貴水平，因此，你要守一段時間先得，耐心少少。如果你持貨佔你總股票組合不多，無問題。

但如果太多，就可以考慮賣出部分，因為以佢的股價與增長力來計算，之後只能平穩長，你部分轉其他增長力更高的股票會更加好。

------------------------------------------------

Q13496：

龔sir 你好。看到你在facebook教授投資意見，請問可否給我提供一點意見？

本人35歲，月入30000，每月可儲15000蚊，另有60萬現金。想投資股票增值資產作買樓首期，目標是一百萬

1. 請問我應該怎樣分配每月的積蓄？

2. 正在留意以下股票作月供之用，請問現在是合適時間嗎？還有什麼選擇？
盈富 （2800）
港鐵 （0067）
中銀 （2388）

3. 怎樣分配投資60萬的現金

謝謝龔sir

龔成老師：

首先，你有一個目標，就是買樓，如果這個買樓的動作，將會在2年內進行，這樣投資就不能進取，因為我地投資，一定要長年期，原理就是利用「企業的長期增長」，令財富增值，但時間太短，企業根本無法增長，你到時賣出就會面對風險。

1）我假設你是長線投資。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$10000。

2）這3隻股，都是有質素的股票，都可以進行月供，現時進行就得。盈富的金額應該較大。

3）好睇你幾時買樓，當你較近要買樓時，你動用的資金會較少，相反則較多，而我建議你投資平穩增值股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q13497：

老師您好，公司因為最近的經濟問題而倒閉，因此我剛失業，突然很迷惘，希望可以得到老師的指導。本人40歲，每月開支約4萬元(包括供樓保險養家等支出)，另有40萬元現金儲蓄。

現打算用一部份支金做網購，於韓國入貨，網上銷售，餘下的支金作股票投資。

老師您認為這樣做可行嗎？股票投資有什麼推介？麻煩您給我一些意見。謝謝！

龔成老師：

你可以用部分資金試下做網購，但你如果之前無相關經驗，你就要明白當中的風險，因為所有野都是「睇就易，做就難」。

同時你由打工，一下跳去創業，當中一定有風險的，因為我一般都建議人「一邊打工，同時創業，等發展後先跳出去」。

當然，你現時的情況，有危有機的，最重要是你明白當中的風險。

你買賣韓國貨，我相信有市場，但同時市面上都有競爭，而我建議你「專注於某類別」的產品，唔好做得太雜，同時，要有自己的獨點。如果你同市場比較，初成立，各方面都無得比，但如果你建立到你的獨特性，你就突圍得較快。

同時，宣傳都是重要的，想一些較好的宣傳方法。

你這刻應大量搜集資料，參考一些成功的例子，了解市場，學習宣傳技巧。

------------------------------------------------

Q13498：

你好，想請教一下你對新股1821，即ESR Cayman。

這股入場費不算貴，但公司整體liabilities比重是asset的六成多，雖然大部分的liabilities不是要即時償還的, 謝謝

不知老師看法如何？謝謝

龔成老師：

記住，入場費多少，股價金額大小，與這股的質素與平貴，無關。

ESR Cayman（1821）係亞太區建立現代物流基礎設施，為租戶提供現代且一流的物流設施及解決方案。

根據仲量聯行報告，按建築面積以及按投資組合資產價值計算，佢是專注亞太區的最大物流地產平台。而按2019年7月至2020年12月31日的建築面積計，亦擁有亞太區主要市場總數最多的儲備發展項目。

目前佢係中國、日本、韓國、新加坡、澳大利亞及印度營運。

睇翻佢的規模，只算不差，整體財務數據雖然不差，但由於佢上市不久，而新股只提供3年財務數據，而這些數據一定會在上市前經過「修飾」，所以參考價值太減。

整體上，企業都有質素，但價格卻處貴的水平，你要小心。

------------------------------------------------

Q13499：

老師你好！ 本人今年24歲，收入十分穩定約30000左右。現時同家人同住，沒有買樓自住的迫切性。

不過，自己一直都好想上車之後收租，而近日政府政策間接令到不少樓價上升。有見及此，想問老師現時上車的選擇是否合理。

自己有約68萬資產，父母亦能夠借出首期，根據現時自己的月薪確實不能通過壓力測試，所以打算趁父親還未退休，找他做擔保人，由自己還款。想請教下老師，現時應否入市，抑或是繼續增值資產到有需要時才上車。謝謝！

龔成老師：

簡單來講，現時香港樓有自住價值，投資價值則不算高，這刻算是合理區的頂部。

如果你「總有一天有自住需要」，這刻買左先，可以的，因為可以先收租，再自住，但最緊要，就是以合理價投資，唔好追價，政府出左新政策後，部分業主出現反價，總之，你以市場合理價買入，可以的。

長遠樓市仍會向上，但中短期樓市，一定會跟翻香港的經濟情況，社會運動等事件。

但你要留意，我唔建議太勉強去上車，如果你本身供款能力較弱，就唔好去得太盡。雖然都可利用阿爸幫手上車但所有野，都要考慮供得起原則，因此唔建議買太大金額，寧願你減少金額進行。

------------------------------------------------

Q13500：

龔成老師 ，你好，我想請問87001匯賢 是否現在 買入是可以有八厘息呢 ？

這股值買嗎？因為我想買一些固定收息的，或者你有什麼可以建議(收息5厘以上)呢？謝謝你！

龔成老師：

匯賢（87001）這股的確是不差的收息股，你見佢顯示股息率有8%，這是以「上年度的股息，除以現時的股價計」，而這股派息都算穩定，因此預期之後都有。

不過，這房託較為特別，所以我要解釋一下。

匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。

加外有新增投資，於2015年才收購的重慶大都會東方廣場。

但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。

從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。即是股價理論上，會慢慢，慢慢落少少，原理如同在股息將本金派出少少。

這股有投資價值的，現時估值合理。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。