【全民媒體】東亞銀行 棄守海味街搞邊科？（中環客）
一直以嚟，海味街一帶都係銀行界兵家必爭之地，幾間大銀行實喺德輔道西海味街一帶整分行，無他，海味鋪現金交易大，個個都係工商好客，老牌銀行尤其係。只不過， 東亞銀行近排關閉咗海味街一帶分行，同港澳碼頭分行合併，就令唔少銀行界中人對東亞銀行狀況有所揣測。

東亞銀行
東亞銀行算係數一數二嘅老牌華資行，所以海味街一帶唔少老字號，都係東亞銀行嘅客，正如HSBC雖然喺海味街有間好大分行，但隔離都留住間恆生分行一樣，海味鋪用開果間銀行，係唔會隨便轉。但依家東亞銀行放棄成棚老客戶，你叫啲老人家去分分鐘成個地鐵站咁遠嘅港澳碼頭入現金同支票，你知呢班客有幾多仲係依賴傳統櫃檯服務，講笑咩。

由此可見，東亞銀行嘅經營狀況應該好唔樂觀，去到縮皮縮無可縮嘅地步，至搞到要棄守海味街。如果東亞銀行持續咁縮水落去，中環客真係好懷疑東亞銀行仲可以點吸客。大家都知，喺中國收緊大額匯管情況下，係無乜可能吸納中國大豪客嘅存款。 東亞銀行嘅狀況，真係持續令人擔心。

中環客