*嚴禁劇透* *粗口自行過濾* *可瘋狂話戲屎但免人身攻擊* *[方以文問兩句][監製方駿釗 Part1] 出咗喇，可以去Facebook IG睇* [1230隔夜超短劇評][TVB][跳躍生命線 EP06] [讚] 張曦雯喺琴晚台慶亮燈節目話自己係第二次拍劇，我記得《律政強人》，但真係唔肯定佢今次係第二次拍。到佢講嘅時候都打個突，因為佢今次嘅表現真係好大進步。Kelly一向都係畀人性感又有女人味嘅感覺，今次做暉仔整車，收起咗少少呢種味道，多咗啲爽朗但又不失佢本身嗰媚態，中間位掌握得好好。呢個設計亦都要讚下幕後團隊，啲典型性格睇到悶，例如係車房女一定係粗魯污糟，運輸人一定粗聲粗氣，少啲寫會好啲。演員同監製成日喺訪問話馬神帶戲好勁，之後再睇吓張曦雯同其他演員嘅場口，嚟個比較，就知馬神神力有幾強大。 今集講得與失，在哥對於部車嘅引擎又得又失然後再得。黑摩利以為會失去傑仔，但最後又得到一班團結嘅學員。傑仔以為會冇咗個老豆但好彩佢落咗街食嘢避過一劫。不過全套劇又唔係老套到個個失去都可以搵得返，雄姐冇咗隻狗，在哥冇咗老婆，都係失之不能重得。但劇本都畀咗啲希望畀啲角色，在哥開始得到暉仔嘅關注，雄姐就有傑仔嘅安慰支持。最尾夜闌人靜處六號好似冇咗佢爸爸嗰幕，再加埋音樂情人完美讀白做總結，係好正。 紀律部隊面對工作時要撇開自己情緒呢件事其實玩咗好多次，今集都有講到，但就連帶得之失之去講，拎返個平衡係好聰明。 羅天宇今次做黑口黑面嘅角色，係轉型喎，希望佢做到。 [彈] 譚sir喺槍火達自殺之後，返到局洗臉，王sir入洗手間講嗰段金句，話救護員只能夠為病人爭取時間，但有啲人嘅時間總係行快啲，係好金嘅，但真係冇乜氣氛去托住，成件事好odd。諗諗吓最後用旁白兜底呢個設計係好，啲金句有幾肉麻都好，都可以f當係心聲咁講出嚟，而唔係直接用角色把口去講，容易接受好多，唔會太肉麻。 [演員表] 馬德鐘 飾 麥在田 / 何廣沛 飾 卓家傑 / 郭子豪 飾 陸昊然/ 張彥博 飾 呂劍雄 / 張曦雯 飾 文暉 / 劉佩玥 飾 章可祈 / 陳瀅 飾 向滿月 / 羅天宇 飾 譚家俊 / 韋家雄 飾 高行仁 / 張文慈 飾 麥愛花 / 李成昌 飾 卓裘 / 歐瑞偉 飾 王海 / 鄭子誠 飾 刑峰 / 陳偲穎 飾 麥諾兒 / 李佳芯 飾 章蕙芯 / 李霖恩 飾 常朗天 / 陳偉洪 飾 余國榮 / 李日昇 飾 張啟冠 / 崔建邦 飾 羅應佳 / 張國強 飾 魯永健 / 楊卓娜 飾 游子嵐 / 羅蘭 飾 李英愛 / 黃德生 飾 黃迪生 / 李啟傑 飾 達 #1230隔夜超短劇評 #無綫 #TVB #跳躍生命線 #馬德鐘 #何廣沛 #郭子豪 #張彥博 #張曦雯 #劉佩玥 #陳瀅 #韋家雄 #張文慈 #李成昌 #歐瑞偉 #鄭子誠 #陳偲穎 #李佳芯 #李霖恩 #陳偉洪 #李日昇 #崔建邦 #張國強 #羅蘭 #黃德生 #李啟傑