【龔成問答信箱】（Q22501-Q22520）

Q22501：

老師！有個問題我想問好耐！

我見你講1211 現價偏貴。咁點解你而家唔先賣出？？？

低位再買返（我絕對明白投資要長線）

但亦冇理由睇住股價由最高位跌返落去？長期持有但高位沽貨！咁又如何獲利？

龔成老師：

因為無人知股價走勢。你這句「冇理由睇住股價又最高位跌返落去」，是「預期股價走勢」的思維，即是「散戶思維」。

這種思維，令一般散戶，無法賺到10倍回報，因為佢地見到某股到了高位，就會「賣出等跌先買」，但結果是「賣出後一直升」。

如果我真的賣出比亞迪（1211），但佢股價唔跌，然後佢的企業價值不斷增加，今天的$2XX是貴，但過一年可以變成合理，我就會買唔翻。

企業的平貴，與股價的走勢，中短期可以無關。

你仍停留在「一般人思維」，你以「現金」作貨幣單位，而我以「資產」作貨幣單位。

一般人認為「持有現金」才是有財富，認為「獲利，賣出股票」才能賺錢，但有錢人思維，就明白「現金永遠貶值，持有優質股才是真財富」，根本不用賣出股票。

一般人擔心「如果高位不賣出股票，不賺錢，有機會股價跌翻」。

有錢人擔心「如果賣出優質股，有機會買唔翻，持有貶值的現金根本無用」。

------------------------------------------------

Q22502：

老師，想請教隻完美醫療

1）公司向主席授出購股權是什麼意思呢？對公司前景是好與壞呢？

2）上海市打擊非法美容服務，正路理解是如果完美醫療係正規，理論上是可以打擊其他同行違規對手，有利完美醫療做到寡頭壟斷和汰弱留強，

從而整治行業而令其受惠及增加市場競爭力及份額，實屬利好！但問題是……作為我們散戶及投資者怎樣可以知道完美醫療有沒有違規呢？？

現在我們都只是能看財經新聞消息和媒體報導，雖然暫時未见到上海市政府有點名批評（完美醫療有違規）的報導好似之前騰訊或阿里違規而遭罰款和要求改善和禁令，

但目前這兩個月從高位$10.9下跌至$6.6，會否已經提前有些預兆和隱藏一些殺機呢？

3）之前聽你講過$6是合理區間的頂部，所以我也本來打算準備$6.5左右開始分注入市的（之後近$6再加注），現階段的策略應該是怎樣呢？需要調整嗎？

觀望一下還是照原定計劃進行呢？盼龔sir指點一下！

4）另外你曾說你之前有入貨完美醫療，私人想問下你之前什麼價位入呢？如果以你自己角度，你會用咩價位再加注呢？

純粹想了解和學習多D你個人意見及做法（如果你介意的話可以唔需要講的）

謝謝龔Sir

龔成老師︰

1) 購股權，其實就係一個權證，給予持有者可以在未來時間，用特定價格買入該股。不少上市企業，都會以購股權作為管理層獎勵。

因為購股權的行洗價，是固定的。若日後企業股價提升，即管理層有機會用比市場更平宜的價錢，去買入該股。

其實這個動作，唔代表公司前景是好，定是壞。作為投資者，你只要留意購股權數量，當全數行洗，會佔已發行股量多少。

因為，當行洗購股權時，公司係會發行新股，變相令現有股東的利益被攤薄。以完美醫療(1830)為例，發行的70.9萬份購股權，只佔發行股份的約0.058%，這程度就影響不大。

2) 我地唔係行內專家或者用家，更加唔係企業一份子，的確很難去知佢現時有無違規風險。所以，我地只能用佢過去紀錄和現時質素，去作為參考，例如以現時香港情況去分析。初步睇，個風險唔算好高。

至於點解跌咁多，係因為之前股價太貴，現時純粹只係回調至一個較合理水平，當然，市場對潛在監管有擔心，都是風險。但現價未算平，只係合理區頂位，只宜小注。

3) 估值上無大變，現價係合理區頂位，如果你無貨可以先小注。但由於此股都有一定不確定性，故長線不宜持有過多。

4) 我在$2左右入，暫時唔會再加注。

------------------------------------------------

Q22503：

龔Sir，你好!我現年59岁，仍在工作，現持有以下股票，是否会适，請賜教:-

#00003 (香港中華煤氣) 2100股 @11.86
#00011 (恒生银行) 200股 @144.25
#00012 (恒基地產) 1000股 @28.75
#00066 (地鐵公司) 3,000股 @41.12
#00303 (伟易達) 500股 @60.58
#00435 (陽光房地產基金) 7000股 @3.75

#00548 (深圳高速公路股份) 2000股 @6.88
#00590 (六福集團) 3000股 @18.50
#00778 (置富產業信託) 5000股 @6.99
#00823 (领展房產基金) 600股 @70.60
#01310 (香港寬頻) 2000股 @11.04
#01448 (福寿園) 3000股 @7.70

#01928 (金沙中国有限公司) 1600股 @33.33
#01972 (太古地產) 1000股 @21.68
#02388 (中銀香港) 2000股 @25.58
#02638 (港燈) 2000股 @7.70
#02800 (盈富基金) 5500股 @27.44
#03067 (安碩恒生科技) 1300股 @17.71
#03110 (GX恒生高股息率) 1200股 @28.50

1) 老師，最终#00788 (中國鐵塔) 及#1177(中国生物製药)賣出了，前者蚀约1700元，后者賺了150多元。在这段日子裡我也按您给我的意見，

加持了部份的股票，有時間請您抽空再给我宝贵意見。

2) 老師，按以上这个组合，我这个年纪应否到价時可减持或全賣出#01448(福寿園) #03067(安碩恒生科技)，会否造成组合不平衡呢？

3) 老師，另外我想问问#01928 (金沙中国有限公司)，这年头怎麼不公佈業绩的，这情況会对企業有影响嗎？还可继續投资？

4) 而#01310(香港寬頻)，我也希望到价時賣出，加持组合內其它的股票。

老師，請抽出您的宝贵時間多多指教提醒。

龔成老師︰

1) 現時這個組合，大致上可以。但緊記，這個組合不是永遠適用。你要按自己人生階段，慢慢將收息股比例加重，至退休時應佔100%。

2) 如果佢地去到好貴水平，你就可以減持(現價只是合理區上部，跟好貴還有很遠距離)。或者到你退休前2-3年左右，慢慢分段沽出，換成收息股，咁就可以。

3) 中期報告，佢往都係8月尾先有，至於2020年全年業績己在2021年3月公布。上年受疫情影響，出現虧損，但相信只係影響集團中短期，長線投資價值依然存在。

4) 香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，雖然增長力唔算強，但作為收息股係可以。而且你持貨不算多，唔建議你沽出

------------------------------------------------

Q22504：

龔老師你好，我於去年買入了一些股票，部分買入後幾日就可以倒蝕，當時問過老師意見，希望到一定價位後放出，但一直未有機會。

直至近期差不多全倉紅了，而我亦認為月供股較適合我，但希望老師指點一下如何處理持倉的股票，謝謝

京東健康 6618 $146 ，550股
小米 1810 $28.35 ，600股
東亞銀行 0023 $16.8，600股
云想科技 2131 $12.08，1000股
清科創業 1945 $19，800股
中策集團 235 $0.25，20000股

龔成老師︰

你太在意個買入價和帳面數字，完全錯左焦點。

你唔好再用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

小米(1810)係有質素的潛力股，若你係年青至中年人士，這股適合長線持有。

京東健康(6618)、云想科技(2131)和清科創業(1945)唔係話無投資價值，只係不確定性較高，你現時只有好少貨，其實你可以長線持有都得。

但京東健康(6618)就持貨太多，就算一般優質股，我地都唔好持有過多，大約佔組合15%好了，行業上限則為30%，以免出現過度集中性風險。故你要將6618沽少少，換至其他股票，去平衡個組合。

東亞銀行(0023)和中策集團(0235)質素一般，建議你分段慢慢沽出，換至其他優質股。

其實若果你無太多投資知識和經驗，對企業估值，點去定平貴不太了解。先利用月供模式去做增值，可以減低買貴貨風險，對你而言會較理想。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22505：

謝謝老師，明白的。如果有一百萬作投資，分注的話，又估計會下跌，是如何分注？

龔老師，我老公叫我全部公積金（4成都係股票）轉現金。我覺得無必要，因為我的股票部份是港股，而且市一定會反彈的。

但是，我快退休，會於明年1月攞番公積金。請問你可以俾我意見嗎？我很不開心，因為工作多年不開心，難得做了決定，現在為賺錢又不退休，非常難受！

我身體不大好，因為多年壓力，不是一般人可以忍受的。

龔成老師︰

若你明年頭就退休，餘下可投資時間不多，公積金組合，真的不宜持有太多股票。你要開始慢慢將佢地換成較保守組合，例如債券、現金類基金。一切以保本為主，之後取回相關資金，再投資收息資產。

但記住唔洗一次過轉晒，分段咁去做會較好，可以平衡價格波動風險。

另外，我地唔好估個市走勢，無人可以估到佢中短期，幾時跌，幾時升。我地只會用股票平貴，去定我地投資策略。

現時大市在合理水平，你100萬可以先用30-40萬，慢慢分注買入我之前講的收息股。餘下資金，就等有再明顯回調，才慢慢加注。

配置比例上，唔洗諗得太複雜，平均分配在我推介你的收息股就可以。只要唔好偏重個別企業或者行業，比例控制在分別15%和30%以內，咁就可以。

辛苦日子將會過去，好好配置財富組合，去享受將至的退休人生。

------------------------------------------------

Q22506：

感謝龔sir意見！因為巴菲特都非常推薦投資者購買ETF，所以我想多了解一下ETF，龔sir在你的股票班中只有在初班有提及到ETF，

當中你提到NAV值，因為財經網站上提供的NAV值都是有延誤的，所以必須自行計算現時的NAV值。

我以安碩恒生科技（3067）做例子，想麻煩龔sir你睇睇我有冇計錯。

8/18恒生指數收市價 25867.01
8/16恒生指數收市價 26181.46

8/18 安碩恒生科技 現價 12.97

8/16 安碩恒生科技NAV 13.416

計算恒生指數8/16和8/18的差額
25867.01 - 26181.46 = - 314.45
- 314.45 ÷ 26181.46 = - 0.012 （-1.2%）

恒生指數差額為 -1.2%

再將NAV值 × 恒生指數差額
13.416 × -1.2% = -0.16

13.416 + (-0.16） = 13.256

8/18安碩恒生科技的NAV值是13.256

比較今日收市價12.97，NAV值大於收市價即代表此刻市場低估此ETF價值，是一個買入的訊號。但是我要如何得知此價是應該大手買入還是小注買入呢？

如果我想多了解一下ETF，請問有冇書籍或者網站可以介紹？

謝謝！

龔成老師︰

你唔應該用恆指去計，而要用恆生科指數數去計！

至於當中的計算模式，和得出ETF被市場低估這個結論，係正確。

但係抽取數據作比較時，就有問題。我地係決定用那個數據，同該ETF比較時，要留意有無比較意義。

你現時分析對象係安碩恒生科技(3067)，是30間科技公司的ETF組合。而恆指，則是60間藍籌企業，當中包括科技股以外，多個不同行業。故2者係有根本性的差別，用來比對其誤差，就有失穏當。

你應該用恆指科技指數，去做比對對象。因為3067，就正正係追蹤這個指數。

8/18恒生科技指數收市價 6226.69
8/16恒生科技指數收市價 6420.14

即大約 -3.0%。

而8/18安碩恒生科技股價$12.97，和8/16安碩恒生科技NAV$13.416，差距都是 -3.3%。故ETF3067跟大市，大約只有0.3%的誤差，唔算係好大。

其實一般大型ETF，好少會出現較大誤差的情況。主要係一些冷門和不活躍的ETF，才有機會出現。

如果真係有較大折讓，而個ETF本身都有投資價值。你可以因應當時平貴，去決定注碼。因為我地唔係短炒，這個折讓純粹係多個機會，令你找到別人不為意的平宜貨。

------------------------------------------------

Q22507：

龔sir 你好，已經過左半年，希望老師審視我既投資組合

2800 @ 27.5 2784股
066 @ 44.5 1402股
2388 @ 28.3 1000股
1211 @ 44 205股
1177 @ 7.7 1200股

788 @ 1.28 18000股
178 @ 2.21 6000股
1212 @ 7.6 4000股
1257 @ 3.2 5000股

1972 @ 21.05 1200股
1928@ 27.8 800股
9618 @ 290 50股
3067 @ 13.9 800股

（1） 持股組合有沒有問題？需要改善？

（2） 持股數目會否太多？

（3）月供緊788仲可以繼續？

（4）想往後賣出2388/178，再轉去其他增長股，可以嗎？

（5） 現在科技股有回落，增持3067/9618得唔得

（6）增持1972/1928/1212/1257可以嗎？

謝謝老師指導

龔成老師︰

1) 無問題，你長線持有就可以。

2) 有少少多，最好集中係10隻左右。

3) 可以，但你預佢增長力無以往咁勁，算係潛力股和平穏增長股之間，依然有長線投資價值。

4) 中銀香港(2388)有質素，唔建議咁做。而莎莎(0178)唔係無質素，但比較受經濟週期性影響，不宜持有太多。如果你想換碼，可以等大環境明顯好轉﹐佢有較大回升時，減持少少。

5) 如果你資金較充裕，現時加小注都係可以。但若資金不多，可以等佢地回多少少先，才考慮加注。

6) 這些股票，現價都合理，你最好等佢回到同你上一注，係有10-15%回調幅度，才加注會較好。

另外，中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，但不建議太過大注。始終都有風險，同時可能仍會弱一段時期。

------------------------------------------------

Q22508：

龔成老師您好，又想找您問問題。首先，好多謝您回覆所有網友的問題，又會公開俾人睇，您的每個回覆都充滿了正能量，每次我唔開心都會不停睇您的帖子。

我27歲，一事無成，靠努力有4份工，接近番足7日工，每年TOTAL放10全日假都無，雖然D工都係兼職、炒散、正職係低人工的文職，月入都係共$15,000-$17,000左右。

睇左您個page2年左右，由短炒變長渣，由輸好多錢變打和，好多謝您。

現時股票有
12(佔投資組合13%)、
257(佔投資組合7%)、
386(佔投資組合9%)、
728(佔投資組合7%)、
1448(佔投資組合8%)、

1800(佔投資組合6%)、
2388(佔投資組合15%)、
3868(佔投資組合6%)、
3320(佔投資組合6%)、
1(佔投資組合23%)

Total $250,000, 帳面(-5%)

現金$120,000(全數可投資，不用作流動現金)，每月儲$8,300左右，每年股息約$11,000，全數會再作投資

股票好似有D多，但我唔會再買新股，目標係上述10隻股票，平均每隻佔投資組合10%

因為我成日為自己工作好唔開心，所以我目標31歲左右有100萬，之後唔再儲咁多錢，再搵其它開心工作。而果100萬希望之後每年複利息6%增長，

我65歲時就有6,800,000左右，加埋MPF應該有8,200,000，而退休後每年可以用$740,000左右(如果計2021年之後每年3%通帳，我65歲的$740,000即是現時的$240,000)。

如果我現時(27歲)根據每月儲$8,300左右，股票250,000左右，現金120,000左右，再複利息投資上述10隻股票，我31歲時可以有100萬的機會大唔大?

如果我31歲時有100萬，之後不儲蓄但不停複利息增長，我65歲時有6,800,000的機會大唔大?

最後，請問老師有沒有其它財務建議?

萬分感謝，無名的支持者

龔成老師︰

其實你最需要多謝的人，是你自己。因為"改變"唔係一件容易的事，要很大力氣、意志和自律性，才可以做到。

以年均回報6%計，你31歲時100萬，應該在65歲個陣可以升值至720萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲這麼年輕的年紀，我會建議先集中係有增長力的優質股(除非你風險承受能力好低)，去累積一筆財富。

而我地以長線平均回報計，每年平均合理增值，大約可以去到10-15%。若以年均10%回報計，你這100萬到65歲，應該已經升值至2000萬以上，故成事機會很大。

我假設投資回報有10%（連股息再投資），你每月投資$8300 + 37萬資產，4年後大約會增值至100萬，配合到你目標。

但較大問題係，你現時持股中，不少是收息股(0728, 3868, 1800,0386)，佢地增長力較弱，主要係收下息，未必可以做到年均10%增長。建議你將部份換碼至以下增長股，同時月供部份，都係以有增長力股票為主。

你可以投資「平穏增長股」和「潛力股」，去創建一個增值平台。你每月5成儲蓄，即是用$4150做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有12萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你退休時，將這些股票換成收息資產，去支援你退休生活開支，咁就可以。

------------------------------------------------

Q22509：

阿sir,想問下如果想股換股，因為資金不足

1. 857中石油（賺錢）
2. 788 中國鐵塔 （蝕錢）
3. 9960 康聖環球 （蝕錢）

其實係咪應該將蝕錢的轉倉？如果按質素我覺得可能康聖會係最差？初時諗不如用中石油轉，但如果佢係呢3隻當中最好質素，即佢賺錢能力較強，又冇理由攞佢嚟轉，求賜教，謝謝

阿sir想問呢隻1799可入嗎

龔成老師︰

其實現時係賺錢，定係蝕錢，唔能夠代表佢質素好壞，最終我地都要睇翻佢企業本質而定。

3隻當中，中國鐵塔(0788)最有質素，雖然增長力比以往弱左﹐現算係水桶1至2，但長線投資價值依然存在，建議長線持有。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，只宜小注投資。

康聖環球（9960）質素同樣只算是中等。

佢主要於中國向醫院提供6個主要專科領域（包括血液學、遺傳病及罕見病、傳染病、腫瘤、神經學及婦科）的臨床檢測服務，亦提供ＣＯＶＩＤ－１９相關檢測服務及常規檢測服務。

佢亦向合約研究機構、臨床試驗贊助商、製藥公司及研究機構提供臨床檢測服務、諮詢及評估服務，以及標本儲存服務。佢係在武漢、北京、上海、成都、天津及烏魯木齊設有7個實驗室。

其實質素都有的，但不算好高，企業獨特性未算好強，以及這刻佢在虧損中，往後的發展仍有較多不確定性。這類股都一樣不宜投資太多。

如果你0857和9960持貨佔組合較多的話，你係可以沽少少，換至其他優質股。

但緊記我地創建組合時，唔好太集中係單一股票，要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22510：

老師你好，現年已經27歲，收入35k-45k左右，感謝老師一直以來的意見，現已累積超過100萬的資產現持有以下資產：

股票約60萬左右；

銀河持有2216 股，平均價為55.5；
港鐵持有1888 股，平均價為41；
中國鐵塔持有56814 股，平均價為1.22；
中生製藥持有6444 股，平均價7.7；
比亞迪持有258 股，平均價為48.5；
錦欣生殖持有1144股，平均價17.3；
盈富基金持有9148 股，平均價25.4；

現金10 萬左右；

派息基金Z07 24萬左右（五年內離場要手續費，所以至少放五年，平均每個月7%息）；

危疾（有儲蓄成份，為期25年）、醫療（消耗）以及儲蓄（為期10年，每月$3000）一年合共保費大約6～7 萬；

央積金大約4 萬（政府每年如果有盈餘會加注幾千，到65歲才能拿）；

1.請問以上股票是否有質素可以持續月供？如仍有質素，以上股票比例上需要調整或加入什麼，可以有更大收益？

2.在以上各方面配置中，老師有什麼建議？（風險承受程度中上）

龔成老師︰

1) 現時股票都有質素，但錦欣生殖(1951)不確定性較高，而且現價偏貴，不宜月供。

比亞迪(1211)現價偏貴，最好回少少先重新月供。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

2) 以上持股配置，問題不大。只要你跟我建議，調整一下月供計劃，咁就可以。

但你27歲很年青，應以增宜為主，派息基金增長力不高，其實不太適合你。但由於離場要收手續費，你照持有都可以，但唔好再加大投資。

------------------------------------------------

Q22511：

！我已經預留登記了星期六班，希望到時學到知識可以識運用！

龔sir, 可否多問一樣關於派息基金，因為這陣子很多不懂投資的同事/ 準備移民，諗住留筆錢比在港父母的朋友都向保險公司買呢類每月派息的基金當家用比父母。

請問您覺得這類型投資如何？值得作為資產配置的一部分嗎？謝謝

龔成老師︰

這類派息基金，其實分好多種，性質上可以成為退休人士資產組合的其中一員。

但問題係，你要明確知道，這些基金派息率是否保證。另外，基金本身有無賺息蝕價的風險。

用這種方法去支援留港父母生活，係一個方法，但必需了解清楚背後條款，以免失算。

------------------------------------------------

Q22512：

我努力睇你既野.可否分柝我既分配是否有問題. 我覺得無咩收息.....加唔肯定幾多錢入注。

2000sh [email protected]高價今明年內賣?
200sh -9988
200sh -1833需再入注?
600sh -0823 應幾錢再入@59.15/66.45
1000sh [email protected]應幾錢再入

以上兩隻我之前等現在升哂
3000sh -3067
500sh -6993
150sh -2807
20000sh -0788
[email protected]可再入注？

應該入金沙?0548/0778？ 收息?

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你上述股票，都係有質素(2807相信係打錯編號)，若你係年青至中年人士，這組合係可以長線持有。

除非佢地去到好貴，或者質素變差，否則係唔需要沽出。因此，你3088照長線持有就可以。

至於平安好醫生(1833)佢有質素，但不確定性大，唔建議持有太多。

而領展(0823)有質素，你每注相距大約10-15%咁入就可以。但留意任何股票，都要控制個比重。同一行業或企業，不要超過組合15%和30%，以免有過度集中性風險。

港鐵(0066)現價在合理區中上部，你有貨在手，除非你資金好充裕，否則等佢有明顯回調才加注，會更好。

ＧＸ中國電車ETF（2845）現價在合理區頂部，暫時不宜大注，你等佢回多10-15%才考慮。

另外，你有個較大問題，就係你而家太偏重左係潛力股(3088, 9988, 1833, 3067, 0788, 2845)，佢地雖然有增長潛力，同時風險都較高，不宜持有過多。

假設你年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22513：

龔SIR, 想問你關於你當時還在儲貨比亞迪既時候, 你話曾經比亞迪試過由$88跌到$12, 想問你當時有冇諗過自己既決定係錯?

因為 公司股價跌,跌左再溝, 又跌再溝, 有好多時會越溝越錯,所以先了解下你當時對比亞迪既諗法係點? 因為當時0幾年既時候

如果電動車將來因為技術上或者其他原因普及唔到, 好可能對比亞迪尼間公司成個諗法就錯唒, 所以好想知你當時考慮左咩因素去決定繼續增持?謝謝你龔SIR

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22514：

龔成老師你好，暫時冇乜錢，買住一隻先

3067係咪應該長期持有？

龔成老師︰

安碩恒生科技(3067)可以，這隻股票有質素。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現先買一隻，係可以。但長線計，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22515：

龔sir, 父母50多歲，冇任何保險，如果基本保險要每人2000蚊一個月左右，係唔係都最好買？

龔成老師︰

其實保險係我地理財中防守部份，主要係將一些健康風險，轉移比保險公司。所以，保障型的保險，我地係需要的。

至於$2000值唔值，你要睇翻本身個保障，係唔係真係切合你家人需要而定。

若係儲蓄類保險，我就不太建議，始終增長力不及優質股。除非你本身好保守，或者完全唔識投資，否則就不太建議。

------------------------------------------------

Q22516：

龔sir，你好！一直有關注你嘅post、YouTube Channel ，每日會花一小時去睇你解答問題同研究點可以令自己在股票市場進步，去學長線投資，

現時手頭上新經濟股比較多，都係年頭高位買入，想請教一下你嘅意見！

本人手持150萬左右現金，尚有250樓按要償還，月入3萬+，目標係3-5年後還清樓按再購入600-800物業，股票資產50萬，另100萬現金流

手持股票如下：

9988@270 400股
700@674 100股
388@499 100股
[email protected] 6000股
[email protected] 100股

[email protected] 7000股
6185@344 200股
[email protected] 5000股
2400@95 600股
[email protected] 3000股

好多股票都係高位買入，組合亦比較亂，想問應該如何再配置？等升返還是放部分等底位再吸納？

最後想同你講聲多謝，一直keep住睇你嘅post 令我自己都不斷去學習，以前上網無所事事咁過，依家會多思考點去進步，令將來的生活變得更輕鬆，

我相信越努力越幸運，多謝你令我思考點去做個有錢人，而唔係單單停留喺「想成為有錢人」嘅階段，呢啲都係睇你post學返嚟，哈哈，再次衷心謝謝你花時間睇我嘅留言

龔成老師︰

我地持有一隻股票與否，只會睇佢長線質素。同時我地唔會因為買貴左，就先沽出，等平D買翻。因為中短期走勢好難估，會受很不多因素影響，有些因素甚至係同企業本質無關。

如果你而家沽左，無人可以保證佢係唔係會再回，佢可能一直升，咁你就要用更高成本，才可以買回這隻優質股。

你現時持股，都係有質素，應長線持有。但有個較大問題，就係比較偏重潛力股。佢地雖然有增長潛力，同時風險都較高，不宜持有過多。

同一行業佔組合的比例，不宜多過30%，如果你上述有些行業過了這比例，就要減持。

另外，見你不少股都在貴的價位買入，你要大幅強化企業估值及投資時機的能力，又或日後多用分注、月供等投資策略。

如果你係年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

現貨可以不用沽，但未來時間，你就要加大翻平穏增長股部份，令組合更平衡。以下平穏增長股，現價合理，已可分注。

另外，微盟集團（2013）、心動公司(2400)、康希諾生物(6185)和中國飛鶴(6186)不確定性較高，不宜持有太多。

現時大市在合理水平，你可以多用30-40萬，買入一些平穏增長股。餘下資金，我地就等大跌市，才出手掃貨。

至於物業投資方面，現時按息很低，你唔洗急住清還樓按，反而應該用資金去投資，爭取更大回報。

而投資第二個物業時，緊記要確定買樓同時，你留有一定優質股作增值。否則，你成個財富組合，就會偏晒去物業個邊，造成過度集中性風險。

記住，投資路上係要一直保持學習，長線回報才會好。加油!

------------------------------------------------

Q22517：

老師，可唔可以講解下1825同2944。如果跌到0會點架？

龔sir, 我最終賣咗0136， 另外一隻1825，止蝕離埸，蝕左20万

好彩還有隻1211 保住，15x-17x 入手，入咗6 手，仲有D小注0285，1830，2388， 3319，3918 ， 坐艇。我以後都聴晒你講。

龔成老師︰

美臻集團（1825和2944）過往業務一般，之前因為有炒作，現在只係回調翻去較合理水平。不過以業務發展來分析，這股的投資價值，只是一般般。

正常股票唔好跌到零，點到有些剩餘價格。但由於這股質素好一般，你沽出都係可以。長線換至其他優質股，回報會更好。

至於餘下持股，都係有質素，你可以長線持有。

但組合現時較偏重左係潛力股(1211, 0285, 1830, 3918)，而且非常集中比亞迪系股票，佢地雖然有增長潛力，同時風險都較高，不宜持有過多。

若你偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22518：

你好龔Sir ，你對ESG 投資有咩睇法？邊隻股票好值得投資

龔成老師︰

ESG，就代表環境、社會及管治。是近年多左人討論的一個項目。

這部份係一些非會計上的因素，而這些因素，係有機會影響企業長線經營和發展。

投資者過往選擇投資項目，主要係分析企業長線盈利表現。但近年已開始愈來愈重視ESG，企業能否在賺錢之餘，對社會和環境作出一定貢獻。

而且，全球法律改變，人們對環境關注度增加，都令企業對ESG的實踐造成推動力。但現時亞洲ESG未算好普及，主要都係一些歐洲企業，佢地對ESG關注度會較高。

其實我地係分析企業時，除了財務數據，我地都會分析企業和相關行業本質，如果ESG因素係對企業有長線影響，我地都應該將佢加入估值考量之列。

而我分析無特別用ESG表現，去做分類。但ESG比較多人關注會係綠色能源，你可以向這方向找投資機會。

------------------------------------------------

Q22519：

你好， sir 1.其實700 我453入貨有無錯？

1.其實700 我453入貨有無錯？
2.下一级支持位在哪？
3.rsi 好似無乜用
4.牛熊分析恒指没乜用
5.恒指25000是否有支持？
6. 700,6618那個較好可以吸？

Thx you

可否比d意见

我又放左

龔成老師︰

1) 騰訊（0700）你買入價合理，但你預佢中短期會較弱，長線持有就可以。

2) 我唔會睇支持位，只會睇企業質素，去決定長線持有，還是要沽出。

3) RSI係一些技術分析，只係短炒架人用。我唔建議你用短炒方法去投資，因為中短期會受好多因素影響，只有長線持有，才可以有效反映企業價值出來。

你見全球最賺錢的投資人巴菲特，去都係只會長線持有優質股，唔會做短炒或者用技術分析。

4) 牛熊分析，可以作參考，但實際用途唔大。因為其走向不一定順序的，因為有好多外在因素影響，我不會用「預期」的方法，去估股市、股價點發展，

我只會用「測量狀態」這方法，分析現時處甚麼位置，從而作出策略，但就不會預測。

5) 25000點算係合理區較底位置，有一定值博率。但都要睇翻個別企業平貴，因為大市在合理水平，唔代表企業都一定係合理價，有權可以係好貴。

6) 騰訊（0700）算係合理區中部，而且整體質素都較高，值博率會較高。而京東健康（6618），不確定性較大，無貨現價可小注，但長線不宜佔組合太大比重。

------------------------------------------------

Q22520：

抱歉老師，我發現自己打錯字…是0688 （中國海外）15.3入2000股

不過謝謝老師的詳細解答 我是因為看過老師在fb的發文或閲讀過老師的書籍才有些少能力判斷某些公司的前景。縱然現在大市回落一些，但仍然二千元盈利。

我家人説很多人在這段時間都是虧損 所以還得感謝老師

其實建行是我還在在學期間聽信祖母的意見買入的 現在 家人也建議我待它升回6.X元時便會沽出所以股分。我也有這樣的打算

因為在學期間沒有很多的收入，不太敢輸錢。所以只是把積蓄放在一些收息股上

龔成老師︰

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，中短期可能因樓市一般而股價一般，但長遠，仍是可以的，你可以持有。

至於投資初期，買一些波動性較細的收息股，其實都係可以。但由於建行(0939)你持貨都唔少，為免佢過度拖低你組合增長力，你都係沽少少，換至其他我之前建議的優質股，咁會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21761-Q21780）

Q21761：

老師你好，我上堂見你有教Benjamin 選股方法，其中一個係計流動資產淨值的3分2

以港鐵#66為例

流動資產=43,495 M
流動負債=41,651 M
流動資產淨值 = 43,495 M - 41,651 M = 1,844 M
流動資產淨值x2/3 = 1,844 M * 2/3 = 1,229 M

25/6/2021 的總市值 = 2,649.53 B
已發行股本(股) = 6,183,275,373
25/6/2021 的收市價 = $42.85

1,229M 除以 6,183,275,373 = $0.19
根據Benjamin 選股方法, 港鐵股價要跌到$0.19 先算便宜

想請問以上計法正確嗎?

龔成老師︰

對，你的計算是正確，但要留意，這只是一個「以資產角度計，貪平的方法」，即是說，我地估值有好多方法，而這個方法，就是假設「就算企業業務再差都好，流動負債點都值錢的」，以爛船都有三斤釘的角度出發。

佢這個方法，只係其中一個估值方法。佢以流動資產淨值，去計算一個有安全邊際的估值。

但由於佢這個方法，只係著重於資產價值上，而港鐵(0066)係一間有潛力企業，未必能有效反映實際情況。

所以，我課堂經常會講，我地最好用多個不同估值方法，去得出一個較立體的估值結果，這個答案，才會較有參考價值。

------------------------------------------------

Q21762：

因為我和家人都有貨(完美健康1830)，但其實不多，大約1-2手，我和家人都不太認識「買賣單位降」和改名會有什麼影響，但我們擔心不知會否影響現時我們持有貨的價錢，

例如現在1手是8蚊，即32000元，但之後改名改股變成8蚊1000股的話，是不是即變成我們持有1手貨由32000變成8000蚊？那麼我們要不要在調整之前賣出，然後降股後買回？

我家人有點擔心

龔成老師︰

其實無分別，只是方便買賣，不用擔心。

我地是否投資一隻股票，重點係佢企業本身架質素。佢改名，其實唔重要，只要佢本身業務和質素係無變，咁就無問題。

完美健康(1830)於7月15日會進行拆細，每一手由以往4000股1手，轉變為1000股1手。從而，令每手買入成本少左。

但作為現有投資者，你係唔會有影響。

以你現時持有一手為例，你有4000股(即1手)，現價假設係$10，你持貨總值就係$10 X 4000股 = $40000

拆細後，你依然都係會持有個4000股，但就會變成4手(因為現時係1000股1手)。我假設現價不變，都係$10。

拆細後持貨總值︰$10 X 4000股 = $40000。

你會見到，其實拆細這個動作，對你手上的持貨價值，係全無影響。因此你唔需要因為拆細，而賣出持貨。

但留意，此股現價略貴。現貨可持有，就暫時不宜再加注。

------------------------------------------------

Q21763：

老師您好！我係您既學生，而家睇緊您本千萬富翁(一路睇放唔低)。

我想創業自己做生意，但一向呢方面既知識唔多，雖然之前返果份工都係做sales...

但覺得自己相比起其他人business sense方面唔太好..想請問有無咩方法改善？老師有無睇過啲好既書本可以推介？

另外，我都明白要認識多啲人加強人際網絡，但係我個人有啲內向型，一諗起呢啲就聯想到要去一啲function自我介紹咁識人，想問下有無咩方法會自然啲？謝謝！

龔成老師：

坦白講，創業最好的學習，就是去創業，你得到的將會比你睇書多好多。

我建議你試下一些低成本的小生意先，例如網上創業等，這是一個很好的進步機會。

你最重要是不斷試不斷試，想，是無用的，試，才可有得著。你可以寫低所有你認為有商機的生意，然後睇下那些較小本，而你又做到，就可以開始。好多時有無市場有無發展，並不是想出來，而是試出來的。

另外，有D生意要真你有較強人際網絡，但有D生意則無要求，所以唔好比這些因素限死左自己。你可以參加一些商會活動，或早餐會之類活動，去結多D人。

至於自然唔自然，其實好主觀的，你去得多就得，所有野都是熟能生巧，做，是最重要的，唔好得得想字。

------------------------------------------------

Q21764：

老師好，有5百萬cash (前幾年買賣樓賺+儲蓄）, 應該買股票好定買樓好？

背景：3字頭，同屋企人住，而家住嘅地方有d遠

人工扣除家用開支，應該儲到1萬左右，有基本嘅醫療、危疾、年金

另外有30幾萬股票：
0002 - 2500股 $73.1
1928 - 2000股 $28.43
9988 - 200股 $225
2018 - 1000股 $41.6
1038 - 500股 $47.3

如果今次再買樓，應該唔會咁輕易賣出，除非好動蕩，最多係用黎自住（近返市區方便d返工同出街）或收租。因為有自住嘅可能，都會揀d高質素少少嘅樓買，咁就會用哂d cash

樓價高，如果只係用黎收租，其實回報唔多，計埋供樓利息可以話冇，不過可以博樓市會升，而家唔買之後可能更貴。但長遠8-10年後，

我唔係太睇好香港前景，覺得會俾大灣區/其他內地城市慢慢取代，所以都驚長遠會跌20-30%

但係另一方面，我又唔敢用幾百萬黎買股票...我就係普通人心態，擁有又驚失去...咁就更加唔上唔落

如果真係唔買樓，而買股票/基金，請問有咩建議？

超長遠目標：返part time、建立1至2個可以一直玩到老嘅興趣，可能要用時間、金錢黎鑽研、再老d或者會移民

唔好意思，寫得好長

仲有一個問題，就係可謂小注？唔同資金下，小注嘅定義會唔會唔同？謝謝

龔成老師︰

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我地再睇翻眼前而一刻，由於你自住唔算有大問題，那這筆資金，我地應較集中從投資角度，去做考慮。

現時租金回報率唔算好高，投資在優質股，值博率相對較高。

你3X歲，建議你用「平穏增長股」 + 「潛力股」的組合。現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只是合理區，你現有500萬資金可以先投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

但你要注意一點，我地財富組合除左要有增長力和質素外，平衡性都好重要。你長線都要找機會加入物業類，以免成個組合過於偏重股票類。

因此，若你在此期間，發現一些租金回報率唔錯，又有質素的樓盤，你都可以出手。

至於我成日講架「小注」，如果我係講個別股票「質素或風險度」，只宜小注。代表你只宜用總資金的5%左右，投資在這隻股票上。

若我係講緊「買入價」時，現價只宜小注。就是想指出，此股現價水平唔平，建議你只能用打算投入該股資金，其中一小部份去入少少，到有明顯回調，才加大注碼。

------------------------------------------------

Q21765：

你好，我想問如果我要將啲股票分類

公用: 3， 270
地產/房託: 12，66，823，778
賭業: 27，1928
銀行: 1398，2388，3988
平衡: 2800
新經濟: 388， 788，1177，1211，1810，9988

請問新經濟嗰部分可以點分，每個分類應佔組合幾多。
謝謝

龔成老師︰

我建議你可以簡單，從「行業」和「風險度」去進行分類。

「行業」你可以主要分成公用(0003,0270)、地產相關(0012, 0066算半隻, 0823, 0778)、博彩股(0027, 1928)、銀行股(1398, 2388, 3988)、科技股(0788, 1810, 9988)、新能車(1211)、醫藥股(1177)

至於港交所(0388)業務性質特別，你可以分開。

我地投資優質股時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

就「風險度」，我地可以分成「潛力股」、「平穩增值股」和「收息股」。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

「潛力股」- 0388, 0788, 1177, 1211, 1810, 9988
「平穩增值股」- 0003, 0270, 0012, 0066, 0823, 0027, 1928, 2388, 2800
「收息股」 - 0778, 1398, 3988

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

這個部份，基本上係因應你人生階段、投資經驗和風險承受力，去作出配置。

例如你係年青人，你就可以「潛力股」、「平穩增值股」各佔50%。若你尚有5-8年就退休，就應「平穩增值股」、「收息股」各50%。到退休，就100%「收息股」。

------------------------------------------------

Q21766：

龔生你好，本人想問你一些意見。我五年前因先生生意問題賣左層樓，已租樓五年，現在想買返樓，請問是否好時機？

我有現金大約三百萬，月入41000，先生沒有穩定收入，兩個仔女一至兩年後大學畢業，本人五十歲。現在租金18500。

我只擔心退休後無屋住，而且已50歲，所以想上返車, thx

龔成老師︰

現時香港樓市，算係合理區頂部，從投資角度，未算好吸引。

但由於你目標係自住，我地考慮重點，唔係現時樓市水平，而係物業符唔符合你需要，講緊係未來10年、20年，係唔係都適合你。

如果係合適，你就堅守住"供得起"這個大原則，就算現時置業都係可以的。

但最好，你可以係置業之餘，留有一定現金，去用優質股進行增值，咁就更理想。

------------------------------------------------

Q21767：

龔老師，您好，我朋友公紹而認識您，我朋友話你分析及推介的股票很準，我初看到閣下的Facebook, 建議買2800，如果大市跌是否會跟住跌，為何會推介2800,因為我股票不太認識。

我有持
1313,9.9元買15000股
914, 45.7買，1000股
1810, 25.15買5000股

最想請教老師我上年$2.9買3988,坐足一年，重貨，跌到約$2.3，利息都補唔番差價，下星期除淨，除淨前會升些嗎？

我想除淨前賺差價，不要息可以嗎？謝謝老師

龔成老師︰

你對派息運作，似乎有點誤解。

在「除淨日」前一天，依然持有股票，就會收到股息。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在除淨前沽出，而出現任何著數。

盈富（2800）佢係一隻追蹤恆生指數的ETF，所以恆指下跌，佢都會同一比例地下跌。

佢並不是最高回報的投資，但這是一個組合，當中有58隻質素不太差的股票，對本身不懂選股的投資者來說，是一個很好的選擇，加上有平衡組合風險的效果。

就算對無乜選股能力的投資者，提供一個穩健，收息及平穩增長的組合。所以，我經常都會推介佢比讀者，特別係經驗較淺的一群。

你上述4隻股票，都係有質素，若你係年青至中年人士，都適合。

但華潤水泥控股（1313）業務較波動，佢過往的盈利數據上落都大，因此股價的變大亦會較大。

長遠計，房屋、基建發展等因素，都會利好水泥股。但就要留意股價上落會較大，自己要注碼上控制，唔好佔你組合太高比重。

至於中行(3988)佢有質素，算係收息股類，增長力唔高，主要係收下息。若你較年青，就不要持有太多。

而且，我地投資會講求成個組合的平衡性，唔應該太集中單一企業或行業，佔比要維持分別15%和30%以下，才算穏當。

因此，你現時重貨的話，建議你沽出部份，去平衡風險，咁會較好。

------------------------------------------------

Q21768：

龔成老師，您好，我係一位32歲的全職媽媽，留意您的文章有一段時間，但3月才正式入市

270 2000股$24.1
1810 800股 $24.5
1177 2000股 $8
1448 2000股 $7.8

3067 200股$19
2388 1000股$28.5
3800 5000股$2.74
1972 600股$24.3

以上是我手頭上的股票，大部分算高位入市！特別270係咁跌！

1/我們抽中了白居二，可能會在一年內盡量買來一家四口自住，未知是否需要用到此十零萬資金，所以請問我是否需要放曬所有股票？定keep一兩只？目前配置合適嗎？

2/目前住荃灣，應該買唔起附近，以您專業的眼光，如果買樓，邊一區會是個潛力股？因為我今次未必可以買到三房，想以後仔女大左可以換大間！

期待您的解答，感謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時股票，大部份都係有質素和適合你。而且除了粵海(0270)，其他都唔算好高位入，大致係合理區頂至略貴，你可以守。

雖然粵海(0270)帳面值虧損較大，但佢係有質素，你照長線持有，主要用來收息，再加上少少平穏增長。

但現回到你買入價，相信會要較長時間。

另外，保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

1) 我地成個財富組合，除左講質素外，平衡性都好重要。因此，我建議人在置業同時，必需留有一定優質股，作增值之用。

這樣才會避免到，所有資金完全側重晒係單一資產(物業)類別。

但若你生活上係有置業的迫切性，你盡用這些股票去買樓，都係可以。但緊記，你最低限度，要堅守"供得起"這個大原則，就可以入市。

之後，你再有新資金，才再慢慢累積優質股。

若你打算1年後置業，由於時間唔長。如果你確定係要動用股票部份去業，你現時就要開始，慢慢分批沽出持貨。唔好等到動用資金個一刻，才一次過去沽，以減低價格波動，對你回報造成之影響。

2) 較高升值潛力地區，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

雖然你長線有細屋換大屋打算，故新購物業(細屋)有升值潛力，對將來換大屋較有利。

但同時間，佢都係你自住樓，你都要從生活角度去考慮。2者要取得一個平衡，才算理想。

------------------------------------------------

Q21769：

龔成老師你好，我和太太均31歲，各月入$5萬，資產如下：

- 物業1，2017年買，自住，月供$15k，26年按揭
- 物業2，2020年買，收租，月供$13k，收租$11k，30年按揭
- 股票$150k，005 和 2628
- 現金$1M

每月扣除開支，儲$30k-35k，想50歲有$50k被動收入，資產應如何配置？感激！

龔成老師︰

若你想做到50歲後每月有5萬蚊現金流，以股息率6%計，你需要本金1000萬。

你現時財富組合，物業和股票都有，係理想。但比例上，明顯偏重左係物業類。因此，我地新資金應優先投放股票類，去令組合更平衡。

現時你持有股票，匯控(0005)主要收息，無乜增長力，唔適合持有太多。而中國人壽(2628)雖係增長股，但近年賺錢能力，明顯係弱左﹐不宜持有太多。

這2隻股票，建議你沽出部份，慢慢換至增長股，長線對你會較有利。

你31歲，應利用「平穏增長股」 + 「潛力股」這類增長股，去創建一個增長組合。現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

大市現處於合理水平，那100萬資金，你可以再用多30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

假設投資回報有10%（連股息再投資），你每月投資$30000 + 現有資產(15萬股票和100萬現金)，20年後大約會增值至2800萬，相信用以上計劃，很大機會達至你的財務目標。

------------------------------------------------

Q21770：

老師，我現年我33歲，兩公婆每月加埋收入得25000，有一物業供緊剩低50萬左右，但供樓及小朋友同家庭基本開支30000，户口現金剩30萬左右，

我想問下老師意見我仲適唔適合投資股票？

龔成老師︰

以你情況，由於每月係入不敷支，因此重點應先放在這財政問題上，要令你變回收支平衡之餘，也可以有一定資金作投資。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工(如SALES，一些多勞多得的工作)、找PARTTIME、網上生意等。

目標係令你可以應付生活開支同時，每月有資金空出，作投資之用。

當你可以做到這點，你就可以開始月供股票計劃，去為自己增值。

你33歲，可用「平穏增長股」 + 「潛力股」的組合。你每月可用5成儲蓄作月供，其餘先儲起，等大跌市時去掃貨。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於現有30萬資金，我建議先扣起半年生活支出，作應急之用。餘下部份，你可以先用一半，分注買入上述股票。

如果你唔係好認識這些股票，可以集中買盈富(2800)。餘下部份，都係同樣等大跌市機會出現，才出手入貨。

------------------------------------------------

Q21771：

老師，你可否給我一點建議？
我的情況：

現時37歲
每月收入：$20萬
每月開支：$17萬
現有3層樓，都要供，2層出租，一層自住
股票：$25萬（有2388、2800、3067、9888、6618、1208、941）
現金：$30萬

如果我想50歲財務自由，每月有$50000去用，我應該點做？

龔成老師︰

以你的情況，其實不難的，首先，你現時有兩層樓收租，當你50歲的時候，理論上已還了一定的借貸，加上租金在長遠會偏向上，因此，該物業能為你提供一定的正現金流。

若然到日後供款完成後，現金流將會更加明顯。

如果假設你50歲時，物業未供完，我再假設未有正現金流，你就可配合以下方向去參考。

50歲想每月有5萬蚊現金流去支援生活。我地以股息率6%去計，你就需要本金1000萬。

由於你現時已有不少物業，未來新資金應集中翻係股票類，以免財富組合過於偏重單一資產。

以你37歲，應以增值為主，可以選擇一些「平穩增值股」+「潛力股」作投資目標。

你現時持有股票，都係有質素和適合你。但百度(9888)、京東健康（6618）不確定較高，不宜持有太多。

五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際，這股不建議持有，你可以每有反彈，就慢慢沽出。

中國移動(0941)有質素，但只係收息股，增長力麻麻，同樣不要持有太多。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里巴巴（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，餘下30萬和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 30現金 + 25萬持股，50歲時大約會增值至逾1000萬。

再加上你現有物業的租金收入，相信以上增值計劃，很大機會可以助你達成退休目標。

------------------------------------------------

Q21772：

龔sir 你好 ，我本人26歲。以前買過港股，有買過小米$15.x左右，賺左小小16.x就賣左。現在持貨：

-中國鐵塔$1.5
-3兩黃金平均$18600/兩
-小量美股

近年睇多左你既Page，都覺得價值投資既重要。同埋要建立一個投資組合非常重要。

未來計劃主要想投資美股：

長線投資：
-蘋果
-BRK 伯克希爾 B
-Tesla
-微軟
-台積電

中期：
-美航
-Pala Tech

短期：
-富途
-蔚來、bilbil

我想30歲前儲到100萬，我會儲月入大約55%既人工，目前月入24K，資產大約15萬。

希望老師俾小弟建議。

另外非常感謝你回覆網友問題，post其他網友既case，俾我地見到好多層面既人既經驗，非常值得借監，你既回覆亦值得學習。多謝你！加油

龔成老師︰

美股都有質素，你用來作增值組合，都係可以。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔好再用短炒這個策略，而係用長線角度，去選擇股票。

你上述股票，都係有質素。只要你係長線投資，再用平均價格或月供去儲貨，咁就無問題。

但留意，Palantir Technologies Inc (PLTR)和Bilibili Inc (BILI)都有投資價值，不過由於佢地至今都未有盈利，不確定性較高，不宜太大注。

另外，雖然疫情開始穏定，但始終存在不少變數。加上航空業賺錢能力，已經係弱左，American Airlines Group (AAL)這類企業，唔係太建議你投資。

而黃金是貴金屬，有「終極貨幣」之稱，主要作用是對沖黑天鵝事件。

不過，黃金沒有現金流，持有無法創造出經濟價值，持有過多，反而會拖慢成個組合的增值效果，我建議佔財富比例太多，大約3%以內好了。

至於投資部份，你每月可先用5成儲蓄去做月供，其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

除了可考慮月供上述美股外，我建議你加入Vanguard標普500指數ETF〈VOO〉，是追蹤標普500指數的ETF。佢係一籃子的優質美股，有助提升你組合平衡性。

我假設投資回報有10%（連股息再投資），你每月投資$12000 + 15萬資產，30歲時大約會增值至90萬。

所以，你想提高成事機會，最好再調高少少個月供金額，會較理想。

------------------------------------------------

Q21773：

Hi，有事想請教我收到另一間公司offer

其實我好迷惘 有2個offer 一間全球top 5 會計師樓 一間係中型既list co

Top 5 個間係高壓文化 must ot 會好辛苦 但學既野會多 有朋友話不少人捱五到一個月就走 for junior 位 捱到既senior 就做得耐

另一間中型既list co manager super nice 我覺得 但學既野五太多 佢話五洗ot 兩間既人工offer 一樣

我考慮既點 係要challenge 自己入去個間高壓文化做下 捱到 就會係有料既人。定舒舒服服入去中型list co 做 利申26 years old

講多少少 我自己係能力是ok 我最大問題是情緒問題 一五開心 一驚 表現先大打折扣 有自信信心 表現超好 所以五太岩高壓既環境

但屋企人勸我入個間高壓文化捱下 捱到你咪情高提高

龔成老師：

其實你個考慮點，應該都係放係長線因素，你要知道邊度架經驗、資歷、知識、甚至做事方法，會對你投入這個行業，以至長線發展，會係最有利。

你可以問下一些行內朋友，或者同學意見。再加上你以往在中型/中小型會計師樓經驗，去綜合一個結果比自己。

高壓文化、OT，這些唔係唔可以考慮。但這些相對你成個職業生涯，只係一些中短期因素，我唔建議你睇得太重。

------------------------------------------------

Q21774：

老師, 今次真的可以實名的叫龔老師, 因為我已經報讀老師的課堂.

對上一次請教您, 已是一年多前, 很多手上的爛股都去掉, 現時入的,都是看老師您回覆, 再加上自己預估的, 買了一些股, 老師可否幫忙, 看一看有冇入錯, 謝謝您.

我現年43, 月入50000, 積蓄有80萬, 想再入啲優質股, 保留30萬在手, 所以計劃想投資50萬左右,

現時手持,
1810 x 2000股
788 x 40000股
992 x 2000股,
1478 x 2000股,
2800 x 2000股

本人計劃想買700, 2269 or 1772, 2128, 1347，想請問老師有咩高見? 謝謝您.

另外, 我老豆有些股已經跌左25%, 想請教下, 可唔可以再守? 2188 同860.

感激老師.

龔成老師︰

你現時持有股票，都係有質素，照長線持有就可以，但中國鐵塔（0788）增長力減弱左，你不要加注。

至於你計劃買入的5隻股票，都係有質素，但有幾點要留意。

中國聯塑(2128)現價偏貴，最好等有明顯回調，才入貨。

贛鋒鋰業（1772）、藥明生物（2269）不確定性較高，不宜太大注。

你以上所講的股票，除了盈富(2800)、聯想（0992）算係平穏增長股外，其餘都係潛力股，佢地雖然有增長潛力，同時風險都較高。

以你年紀，不宜持有太多，大約佔3-5成(視乎你投資經驗和風險承受能力而定)，餘下應集中以下平穏增長股，否則會令你組合風險過高。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市只在合理區，你可再投資在30-50萬，餘下資金就等大跌市機會。

當然，你可以不用急，唔洗即刻走去再投資。你可以等上完堂，對整個投資概念有較完整理解，才出手都可以。

至於你父親的持股，力世紀（0860）其實好難分析，因為佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險唔細。

泰坦能源技術(2188)規模好細，而且近幾年都係出現虧損，投資價值不高，建議沽出。股票班見!

------------------------------------------------

Q21775：

成老師，想你提供一些理財意見，現有狀況如下：
年齡： 43
職業： 企業銀行

1）現有資產共HK$16.94 Million

- 現金 ： HK$1.1 Million （remarks: 2%p.a. deposit rate for staff with deposit balance within HK$1 Million）
- Asian Currency Bond Fund : HK$0.1 Million
- 自住物業： HK$13.5 Million
- MPF : HK$1.4 Million

- Equities : HK$0.61 Million
>5 HSBC @ 3156 shares
>3988 @1,000
>1398 @1,000
>3968@650
>16@500
>700@200

>1@50012@1,000
>27@1,000
>9988@100
>1448@7,000
>3067@1,000

- 合資格年金累算權益：HK$0.105 Million （已繳兩年）
- 保單累算權益： HK$0.125 Million

2） 每月收支

- 每月收入: HK$90,000
- 每月合共開支：HK$70,000
（父母家用: HK$15,000）
（供樓：HK$39,000）
（日常開支：HK$14,500）
（MPF 供款: HK$1,500）
->每月平均盈餘 : HK$20,000

請問在50歲時能否做到每月有HK$30,000 被動現金流? 另外，如何能達成？謝謝！

另外，想補充一下, 本人現樓按結欠HK$6.9 Million, 尚餘16年期

龔成老師︰

你現時43歲，財富仍有一定增長能力，可以利用這7年時間，將財富增傳值，到了近50歲，就可轉翻一些現金流類別的資產。

如果你希望7年後每月有3萬蚊現金流，以股息率5%計，你需要本金720萬。

現時大市在合理區，現金和股票最好各佔一半，你現時持有現金水平係偏高。雖然你現金有2%員工利率收取，但這程度的增長力，唔算理想。

建議你用這筆現金和每月儲蓄，去增持一些有增長力股票，去累積這筆財富。

現時持股，大致上可以。但匯控（0005）、中行（3988）、工行（1398）都是收息股，增長力唔高，唔好持有太多。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。但佢地波動性和風險會較高，你要自己平衡。

你現有110萬資金，可以再投入多20-30萬，用"分注"形式，慢慢買貨。餘下資金和每月儲蓄，就等大市出現一定程度的下跌，才大力度掃貨，然後長線投資。

以大市過去年平均回報10%計（連股息再投資），你每月投資$20000再加上你現有資金和持股（約170萬），7年後大約會增值至560萬。如果要達至你的財務目標，月供金額必需增大至$35000。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升，以助你達成目標。

------------------------------------------------

Q21776：

因為本人媽媽不擅於投資，我剛開始接觸股票，幫佢review股票組合發現大部分都係蝕錢，我應該幫佢止蝕定由得佢等落去呢？

0042 平均價2.14
1398 平均價5.72
0998 平均價5.68
1288 平均價3.94

3988 平均價3.5
1680 平均價2.98
2628 平均價26.22
2009 平均價3.86

2866 平均價 4.35
1766 平均價11.67
0390 平均價 8.52
0005 平均價78.69

有一部分已蝕一半已上、帳面合共虧損30萬左右，我可以點幫佢調整呢？因為佢年紀都十分大，亦唔適合過高風險投資。唔該曬龔sir。

龔成老師︰

我地先要睇翻隻股票有無質素，如果佢帳面虧損，但係有質素，我地都可以守住先。若無質素，就算帳面無蝕，我地都要考慮減持，甚至全部沽出。

東北電氣(0042)、澳門勵駿(1680)投資價值不高，建議有反彈，就慢慢沽出。

中國人壽(2628)、金隅集團（2009）、中遠海發（2866）、中國中車（1766）、中國中鐵(0390)有投資價值和增長力，但增長力唔會好強，質素算係中等。

若佢唔係佔組合太多，持有係可以。若較多，可以慢慢換碼至優質的收息股。

匯控(0005)、工行(1398)、中信銀行（0998）、農行(1288)、工行(3988)、有質素的收息股，主要提供現金流的股票，適合你媽媽。

由於你目標係收息，帳面賺蝕反而唔重要，除非佢本質出現問題，否則你長線持有收息，就可以了。

但你要留意，現時你媽媽組合中，有不少銀行股。個別行業，不要佔組合30%以上，否則會有過度集中性風險。

而且，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。所以，你都要幫她調整一下個比重。

以下是一些有質素的收息股，給你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21777：

咁佢哋都有能力成為10倍股？但似乎來講指數好難升到10倍股⋯⋯水桶一指最大潛力，有冇機會係10倍嘅選股？

阿sir，唔知道你有冇留意啲細價股，汛和（1595）會比京基借殼上市，咁1595值唔值得投資？將來等收成？

另外，我想問第一視頻（82）值唔值得長線投資？因為佢改名做瘋狂體育，未來幾年係體育年份，佢係唔係一隻潛力股？謝謝阿Sir


龔成老師︰

水桶1，係指增長潛力較高股票，通常都是處於行業快速增長階段初至中期，故相對其他股票，有較大增長潛力。

但要指數ETF(如3194、3067、3032、3033)增長10倍，係會較難。

由於佢唔係單一企業，要做到10倍增長，即係要絕大部ETF中股票，出現大幅爆升，因此要ETF成為10倍股，機會較微。除非你投資一個長時間，都有可能。

京基欲借殼汛和（1591）上市，暫時未落實，無人知發展成點。若言成事，我地才可以從新業務，可判斷此股有無投資價值，現時所有都係得個估字。

以現時集團質素計，投資價值不高，唔建議持有。

第一視頻（0082）從事互聯網業務，包括在中國經營體育彩票新零售業務、網絡視聽新媒體、其他互聯網相關的投資，以及阿聯酋杜拜的衛星電視台業務。

業務持續虧損，質素一般。除非你好確認佢之後的發展正面，就可小注博下。

記住，我地投資股票，就係投資緊一間企業，要分析係長線的企業投資價值。佢用乜野名，係唔會對佢業務有影響。

另外，唔係好估走勢或者估消息。我地要用實質理據，去做投資決定。

而且，就算再優質股票，都要時間去成長。唔好用賭博心態，諗住博某股票業務突然改變，從而令其股價爆升。

這個做法，只是投機，並不是投資。

------------------------------------------------

Q21778：

老師，原來我有好朋友關注你，同埋有一個上過你堂，佢依家做到財務自由，佢隻1211原來佢40元樓下買左萬幾股，依家都冇走貨，我問佢幾時走，佢話當你見到成街都係電動車就可能會走！

我依家30歲開始學投資，算吾算遲，其實我五年前已經開始接觸股票，一直都係輸，有時可能贏小小就用晒，到最後本金都輸埋！又重新來過

我開始明白你經常講嘅一句，買股等於企業，企業慢慢去發展，企業既成長，等於我儲蓄！

我而家買入嘅股票我都唔會再輕易去走貨，因為佢係錢搵錢

我放假要再去買你一本書，你經常提我知識好重要，係邊本書係簡單容易明白

我第一本書就係睇你介紹嘅50隻優質股同埋10隻潛力股！

我想學知識，邊一本我比較容易明白
等待謝謝你的回覆

龔成老師︰

你可以睇我寫架"80後百萬富翁"、"財務自由行"和"股票勝經"，較適合初學者。

其實30歲，依然係一個財富增值的黃金時期，只要你認真學好正確的投資方法，一樣可以做到不錯的回報。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，建議你用「平穏增長股」 + 「潛力股」的組合。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄估月供，其餘先儲起，用一邊月供一邊儲蓄的策略。

而你朋友買的比亞迪(1211)，係好優質的潛力股，現時未算行業爆發時間，長線持有，待佢慢慢發展上去，回報會更理想。

但由於現價已經偏貴，要月供最好等佢回到$150才開始，會較穏當。

------------------------------------------------

Q21779：

老師，我應唔應該買樓？出面話公務員會減薪, 咁你覺得樓市之後係咪應該會下跌?

咁我係唔係應該要等多一陣先買?

龔成老師︰

若公務員會落實減薪，某程度上，都會影響到私人市場的薪酬變動。

但樓市之後會唔會下跌，係要好多因素，唔係單單睇薪酬變動咁簡單。而且，我地投資唔好太著眼1,2年架事，要諗長線少少。

香港樓長線都係供不應求，因此樓價長線都係睇升。

始終市場需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

但中短期係有機會出現波動，造就入市時機。但你唔好預佢大跌，若係自住樓，只要係合你需要，而且長線"供得起"，你就已經可以出手了。

至於你之前講的房屋政策，只係好初步，無人知會唔會成事。就算成事，又要等到幾時先可以立法執行。

因此，你在做決定時，要在現實情況和這些存在不確定的未來政策中，自己取個平衡。

------------------------------------------------

Q21780：

龔Sir，你好。想請教一下，手上有匯豐控股（00005），平均買入價$57.8；電能實業（00006），平均買入價$66.7。

早幾年買，錯過左高位賣出時機，而家帳面蝕錢，不過睇返多年收過股息算打平。而家係咪應該賣出，定等機會股價升返？（好似好難）

龔成老師：

首先，要睇翻你的年齡與投資目標，你上述持有的，並不是無質素的股票，這些都是收息股，不過，增長力就不強。

如果真的賣出，可以等過1、2年，經濟好轉，等佢地股價上翻D先賣。

如果你年輕，其實未必太適合持有，應該在適當的位置，轉其他。

如果你年長，又或風險承受能力較低，又或投資目標著重現金流，其實就可以持有的，因為這兩股都是不差的收息股，只是你買入價少少高，但如果以長期收息的角度來說，其實無問題的。

另外要留意，你不能持有同一隻股票太多，你應該建立一個組合，同一隻股票去到15%好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21421-Q21440）

Q21421：

龔sir上完你個堂，我分析左152呢間公司，因為阿Sir有推薦過548收息，而152又係548嘅母公司，我睇過佢係業務覺得佢嘅增長能力應該好過548，

所以想考慮用作收息及有所增長。現在有幾個問題唔清楚，想請阿sir解答：

1 佢2020年嘅流動負債得大增一倍幾是否係收購蘇寧易購引致呢，對佢本身有咩影響呢？

2 這股近幾年都派特別息，是否會對往後派息不穩定呢？

3 我搵左佢近5年平均市盈率係7.6-10.4，以佢最新一年嘅盈利1.1嚟剩返，得出嚟嘅估值大概係$8.4至$11.4，是否太低？阿Sir認為合理價係幾多？點計算呢？

唔好意思新手上路要勞煩阿Sir幫幫手

龔成老師︰

先講深圳國際（0152），此股係有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

過往業務穩定，生意與盈利都不差，不過就不是高增長類。這股都有長線投資的價值。現價合理，投資收息可以。

1) 此變動與收購蘇寧無關，只要你留意資產負債表，你會發現變動，主要係來自"貨款"部份。

當你再仔細睇附註25，你就會發現，其實係一些"中期票據和債券"到期日，由以往多於1年(計入非流動負債)，變成1年之內(計入流動負債)，因此流動負債才會大增。

以集團現時財務狀況，負債問題不算大。

2) 由於近年特別派息，主要來自土地轉讓的收入，這些收入都是一次性。因此，有機會往後特別派息會有波動。

3) 我地係計算合理市盈率時，會用過去10年數據，抽取中間4個市盈率7.6 - 9.6倍，作為參考。但在採用前，你先要分析，這個4個中位數，是否可以合理反映其價值。

我地睇翻過去10年的市盈率圖表，你會發現自2018年起，整體數字出現明顯回落。

因此，我地就要先去了解當中原因，點解有這樣的變化。只要你仔細留意過去幾年年報，你會發現集團近年特別派息原因，主要係來自轉讓公路資產。

集團本身收入，主要來自公路收費。而公路，自然係集團的重要資產。當這些重要資產減少，市場會預期佢賺錢能力弱左，故近年給予的市盈率估值，都會較再早幾年為弱。

因此，我地計算合理市盈率時，要作出相應調整，大約係6-8倍會較合理。再以過去5年，平均每股盈餘HKD1.846計算。

合理價值︰約為HKD11.0 - 14.7。

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。預佢現時估值合理中間至中下。

------------------------------------------------

Q21422：

Hello成哥，上完股票班真係學到好多嘢，令我更有信心選股同埋計算估值。我最記得一上堂時你叫我地分清楚urgent同埋important，我相信上堂學終身受用嘅知識一定係最important

龔成老師：

我地一定要分清「urgent」、「important」。

香港人太多趕急的事，以至一直都唔做重要的事，所以我先第一堂同大家講，課堂好重要，比你用一世的，我見個有部分同學好認真，佢地會為左唔遲到上堂，而要求公司早走。

我見過有同學為左做最後的大功課，請左公司半日假。

如果你之後的決定，都明白「urgent」、「important」，集中處理「important」，你往後會好成功。

------------------------------------------------

Q21423：

龔Sir 你好, 想請教你一個問題, 如果有一隻股票, 股價年頭7元, 入左2000股, 年尾8元, 另每股派息0.472, 咁回報係咪21%？ 見下計法：

原本： 7元 x 2000 = 14,000
一年後： (8元 x 2000) + (0.472 x 2000)
= 16000 + 944 = 16944元
回報： （16944 - 14000）/14000 = 21%

*以上所指係置富房託
如果回報有21%, 咁又唔錯喎
謝謝！

我指如果我無理解錯回報有21% , 收息股黎講好好, 對嗎？ （雖然只有2手）

龔成老師：

對，你計算正確。

以房託及收息股來說，這個回報是高回報，其中一個原因是你買入時，當時房託受疫情因素影響而向下，所以能以一個不差的價位買入。

長遠來說，房託較難每年有這個回報，你預是收息及基本增長。這股可長線，你的投資不差。

------------------------------------------------

Q21424：

成哥，你好啊朋友最近誤入佐以下股票

8083中贊@3.9×8000
3833新彊鑫礦@2.13×20000
235 中策@0.2575x150000
3321 偉鴻@5.2×15000
1357 美圖@2.94×3000
[email protected]×200000
[email protected]×50000

請問應否繼續持有？如重新規劃組合現時有咩可以選擇，謝謝成哥無私既分享

235係0.2575至岩，希望成哥能卑d意思，幫幫我朋友可以重整組合，謝謝

龔成老師：

坦白講，持股大多無質素或只是熱炒類，部分就有少少質素。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國有贊（8083）不是劣質，但不建議持有太多。
新疆新鑫礦業（3833）屬風險類股，不能持有太多。
偉鴻（3321）無質素，宜賣出。

中策集團（0235）質素唔太好。

佢主要從事投資證券、金屬礦物及產品及電子組件貿易、放債及證券經紀業務。

睇翻過往的業務情況，非常波動，生意上落大，有時大賺有時大蝕，風險高。加上企業規模不大，投資價值不高。

這股股價有時會大升，但可能只是中短期業務與消息，長遠未必一定利好。

美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

結好控股（0064）質素一般般，不宜持有太多。
英皇國際（0163）質素不太好，賣出較好。

建議之後，投資翻一些穩健類的股，如不懂選，就投資ETF。

------------------------------------------------

Q21425：

老師，你本《5年買樓》的書好正！對我這對買樓O認識的人來說，可以在很短時間內對樓市有個整體概念和有信心可以去買樓！

可措現時樓市已回升不少，很多屋苑已破頂，現在只能繼續等待！

可否請間老師，現在手頭有大约五球，在等待樓市回調才買樓，現在應如何配置這五球呢？因為不知要等到幾時，又不想令這五球繼續遍值！謝謝！

龔成老師：

如果你本身無自住樓，而自己又有這需要，其實已經可以考慮，最重要是你資金足夠，在供款方面無問題，買樓後仍有現金剩，這樣已可買。

好多人會分析樓市走勢，但我相信這是好難的，反而考慮「自己的需要及配置」，才是你買樓更大的分析點。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

如果有自住需要，只要在供款方面無問題，買樓後仍有現金剩，都可以考慮下置業。

------------------------------------------------

Q21426：

老師請問成本上升算利好定不利消息? 我最近研究紙業，點解紙材成本上升，有d賣紙既公司會賺多左? 究竟成本上升係好事定壞事?

龔成老師：

其實這是複雜的問題，往往要睇行業情況，以及企業營運情況。

有些行業，當成本上升後，能將絕大部分轉嫁比客戶的，可能因為行業的競爭有限，又或全行的營運模式都相同，因此佢地會同步加價，而客戶無太大的選擇權。

當我地分析時，往往會睇翻企業有無「成本轉嫁」能力。

當你分析時，要同時睇企業的毛利率，如果成本上升但毛利率不跌，反映企業有成本轉嫁能力，即是成本對佢無影響，往往有一定的優質度。

------------------------------------------------

Q21427：

想問老師有冇一啲儲蓄型危疾保險推介

龔成老師：

無呀，因為我不從事這方面的銷售，你可以去銀行或保險公司問下。

最重要是，你按自己的「需要」去買，保險就是將你不想承受的風險，轉嫁比保險公司。這是防守的動作，不過，我地理財最重要是攻守兼備，因為不用太多，「足夠」就得。

------------------------------------------------

Q21428：

龔Sir你好！本人3x歲，想問一下長遠收息同增長，可以考慮以下股票持有或買或增持？或龔Sir 有甚麼推介？

1. 1310 （$11買）
2. 1830 （$4.4買）
3. 331 （$4.5 買）
4. 398 （$2.5 買）

5. 1373 （$2.5 買）
6. 1523 想買
7. 1883 想買
8. 3067 （月供1/2手）做增長股票

非常感謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你3X歲，我一般會建議你用「平穏增長股」 + 「潛力股」的組合，先做好財富增值部份。

除非你個人極保守，或者本身有其他原因，需要有額外穏定現金流作支援。

否則，而一刻我唔建議你投資太多，中信國際電訊（1883）、香港寬頻（1310）這類收息股。

另外，東方表行集團(0398)質素較一般。這些股票，若持貨不多，可持有。但若太多，最好沽出部份換至其他股票。

珩灣科技（1523）主要以「Ｐｅｐｌｉｎｋ」及「Ｐｅｐｗａｖｅ」品牌從事ＳＤ－ＷＡＮ路由器的設計、開發、推廣，以及提供相關軟件許可及保修與支援服務。

ＳＤ－ＷＡＮ路由器可連接多個廣域網（ＷＡＮ）連接、智能分配流量給多個廣域網、可集中管理，以及必須利用加密技術建立安全連接。

業務及盈利都有不差的增長，發展不差，不過公司規模始終較細，因此始終都有風險。

這股長遠不是無價值的，但都要明白發展緊的，都是有變數的行業，所以股價潛在波動可以較大。

現價都算是合理的，但不建議大注投資，長線投資都可考慮。

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。業績前計佢$4是合理區頂，業績後股價升左好多。現貨可持有，但暫不宜加注。

將來你可以投資以下股票，但若果你投資知識不高，可先較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q21429：

龔成老師，您好!我見有讀者問你移民後的投資策略，但佢地冇提到一點，就係英澳等國家抽取資產增值稅，

例如股票買賣利潤，政府會抽取約30-40%税。如果考慮埋這因素，我們需要調整投資策略嗎?

例如減少平穩收息股(因為抽税後利潤所餘無幾)集中喺增長股?謝謝

龔成老師︰

我自己無對海外稅務作深入研究，比唔到太多具體意見你。但當考慮到這些增值稅項時，的確會令原先回報被打上拆扣。

但除非你不作投資增值，或者移民到低稅率地區，否則這個問題，基本上係無可避免。

投資策略基本上唔會大變，但你計算長線回報率時，要因應相關稅項作扣減，以免令預測過於樂觀。

最後，我建議你去問翻當地稅務顧問，看看有沒有一些節稅方法，從而減少這方面的影響。

------------------------------------------------

Q21430：

老師你好！

今年28歲
月薪34k
要比10k 家用
有月供2k(2800)
保險每個月1.5k (每年一次過付款)
有50k Savings

有意今年同男朋友搬出黎

啱啱開始上你既堂

想用月供/ 分注投資方法放啲錢入水桶1同水桶2。

另外，今年個市似好熾熱，身邊所有人都喺度講緊股票，如果我用計公司價值判斷佢價格係貴或平，其實係咪都可以放心入股？

今年會唔會算係一個較危險嘅買入時機？

想請教老師意見同指導。感謝

龔成老師︰

現時大市在合理區，雖然部份新經濟股，有輕微過熱架情況。但整體大市水平，尚算合理。

我地唔會去估個市點走去定買賣策略，只會繼續用企業估值，去定平貴咁買貨。

但當成個大市去到一個狂熱的情況，我地就要保守少少，現時未算去到好狂熱。

以你現時28歲，投資在水桶1同水桶2，係正確做法。但你收入計，每月月供金額太少。

如果你唔係有太多必需開支，我建議你盡量將月供金額，提升到1萬以上。因為你年青，應把握時間，盡力去做好財富增值部份。

而一刻，你唔需要急住去配置，或者新加其他股票去月供。因為投資係一個長線計劃，你可以等上完堂，有一定知識和明確概念，才去調整會較好。

------------------------------------------------

Q21431：

hi 你好 龔sir，我是一位18歲學生，沒有part time 現在一邊學習緊投資知識，

1現時我有一萬元想all in 入股票，想搵一隻股票收息邊隻最好？

2我現時打算購買你的書學習投資知識，邊一本系適合我這個BB新手，多謝

龔成老師︰

1) 你這個年紀，就算資金不多，都應努力學好投資知識，甚至小注去吸收經驗，為將來準備。所以，你做法好正確。

由於你暫時經驗和資金都不多，建議你先從以下收息股入手。如果你不太認識這些股票，可以直接買3110派息基金，都可以。

但將來到你有穏定收入，又對投資有一定了解，就要加大投資力度，改為買一些較有增長力的優質股。盡力把握年青時間，去為自已財富增值。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）或收息基金(3110)都可以。

2) 以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21432：

龔成老師，很喜歡睇你嘅影片，好多分析都講得好好，特別係價值投資法。

本人看好中國嘅保險業，隨住14億人口開始富起來，相信保險嘅需求會越黎越高。

想問問你對中國人壽2628同財險2328嘅睇法？同業中，長遠有高升值潛力嘅股票又可以推介一下嗎？期待你嘅回覆，多謝

龔成老師︰

我自己都係用「價值投資法」，巴菲特用左這方法賺大錢好多年，這是公開的。

但一般散戶就是貪賺快錢，而不用這方法，因此，令到一般散戶仍是輸多贏少，我們仍是賺大錢的一群。

中國隨著人口增加，城鎮化、人均收入增升等，都對保險這類產品需求，只會有增無減，故長線中國保險叢係正面。

中國人壽(2628)不是無質素，但近年有質素下滑情況。現價合理，但投資價值只係中等。

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股現價合理，可長線，但就主要預係收息，唔好對股價有太大期望。

如果你看好中國保險業和其增長潛力，平安(2318)會係較理想選擇。佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中上部，分注投資就可以。

------------------------------------------------

Q21433：

老師你好，我最近幾個月開始留意你page，我以往只有3次買賣股票經驗。

但有一次錯信股票group輸了幾萬蚊，加上13元買入石油股，依家跌到得番8蚊左右，真心輸到怕。

想請教依家石油股係咪唯有繼續持有？
求指教

龔成老師︰

近期好多網上騙案，就好似你所講股票group，要小心。

記住，我地買入一隻股票，一定要知道佢質素、行業前景、財務狀況等，才去投資。

如果你連間公司點賺錢、行內有乜優勢、點解未來有發展和增長潛力，都答唔倒自已，純粹係聽消息，甚至係某某群組意見。咁你就要停一停，唔好投資住。

石油股，好似中石油(0857)、中石化(0386)、中國海洋石油（0883）質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業，不要大注。

如果佢佔你組合好多，你可以每有反彈，就慢慢沽出部份。

------------------------------------------------

Q21434：

成sir 您好！小弟年29。已經有想財務自由的目的。不想再浪費自己的人生了。

最近學習窮人與有錢人的態度及資產與負責的分別。

月入17000
扣除一切開支可以儲1萬元。
銀行有70萬。

有留意你大推盈富 港鐵 領展等等。

以最終目標財務自由及每月被動收入約20k.

小弟投資經驗0。有睇過下成sir 教導以月供模式較適合初學者。留部份現金流等大市跌時可以大手購入長線投資收息股？

小弟會睇書學習如何去計算公司的真正價值。多留意不同公司的年報表等。

有一個最不明白的是睇財經新聞。是否留意新聞介紹公司背景及行業發展？長遠是會否留意公司會否接觸新行業等？

另一個最大問題是如分配70萬去錢滾錢達到 金錢為你工作。

小弟已經開始睇投資書。增值自己才是最大的財富。長遠需要報讀會計課程？好人一生平安

龔成老師︰

如果你希望最終可以每月有2萬蚊現金流，以股息率6%計，你需要本金400萬，這就是你初步目標。

你現時29歲，係財富增值黃金時期，除了增值外，也緊記要努力提升自己投資知識。

由於你未有投資經驗，好易會買貴貨，所以用月供或分注入貨模式，對你這類初學者，會較安全。

以你29歲，可以選擇一些「平穩增值股」+「潛力股」作投資目標。

以現時大市合理區狀況，月供最好用一半每月儲蓄，另一半就先儲起架策略。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你不懂選股，可以先用盈富(2800)作目標。其餘合適股票，到你對佢地有一定了解，才從中選股。

現時大市只是合理區，你現有70萬資金可以先投入15-30萬，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

由於你很年輕，相信要達成400萬目標不難。

我假設投資回報有10%（連股息再投資），你每月投資$10000 + 70萬本金，大約10年多後，就會增值至400萬。

至於投資知識方面，新聞主要係睇有無一些事情，對企業本身質素，或者長線發展有影響。例如早前內地監管政策收緊，就令阿里巴巴(9988)等企業的風險度增加左，這就是要留意地方。

我地要不斷吸收「資訊」，例如宏觀經濟情況，企業發展，各行業的情況。但我地睇新聞不是要知道所謂的「意見」。

除了看書、年報、新聞外，你可以報讀一些投資相關課程，去提升相關知識。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21435：

Hi 阿sir你好，想聽下你意見，本人38歲，女，月收入$53000，現時有兩個物業，供款分別15000及18000，租金收入為$15000。每月開支$15000左右。

另一單位明年亦打算出租，大概收$11000租金左右。

睇左你好多資訊，有做月供股票，每月$13000，分別銀娛$2000、比亞迪$2000、中銀香港$2000、小米$1000、阿里巴巴$2000、友邦保險$2000、港鐵$2000。

現時股票有11萬左右，現金$25萬，手上保險有50儲蓄。

想10年後，可以有500萬，想問下你意見？我現時股票組合投資是否正確？

希望得到阿sir回覆

龔成老師︰

以你38歲計，應先做好增值部份，你現時持股都係合適合。但留意，比亞迪(1211)現價偏貴，要回到$120左右水平，才建議再開始月供。

此期間，你可以用ＧＸ中國電車基金（2845）- 這基金的目標是追蹤Solactive中國電動車指數NTR「相關指數」表現緊密相關的投資回報。

或其他潛力股代替，如中生(1177)、福壽園(1448)、安碩恒生科技(3067)、港交所(0388)、騰訊（0700）。

現時大市只係合理水平，現金和股票最好各佔一半，你可以多5-10萬去分注入多少少貨。餘下資金，就等大跌市出現，才加大力度掃貨。

另外，"保險"主要係用來防守，買足夠保障就可以。儲蓄成份架保險，我就唔建議太多，增值最好都係留比優質資產(如優質股、物業等)去做。

我假設投資回報有10%（連股息再投資），你每月投資$13000 + 本金36萬，10年後大約會增值至340萬。如要達至500萬目標，你要將月供加大至$22000，才較大機會成功。

所以，我建議你利用明年新增租金收入，加大投資力度，以助你達成目標。

物業方面，你現時已經持有兩個物業，之後就暫時唔好增加固定資產類別，令財富組合更平衡。同時，如果可以的話，盡快將手上物業出租能有助你提高現金流。

------------------------------------------------

Q21436：

龔成老師，你好呀！現年40歲女，剛離婚無業，賣了樓有200萬現金。現在有以下股票，請問我有買啱嗎？

應該長期持有或是到一定嘅時候賣掉獲利？ 909跌了一半，我應該怎樣呢？

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

我嘅目標係可以在短時間內買一個細單位300～500萬內自住，唔駛再租屋，請問我嘅投資方向啱嗎？

應該怎麼樣更好呢？ 麻煩老師解答，萬分感謝！

龔成老師︰

我想先要你明白少少財富增值概念，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

所以，只要係優質的股票，我地一定會長線持有，而唔會半路中途去沽貨。除非成個大市好狂熱(現在未算)，或者個企業長線質素轉壞，我地先會賣出。

回到你本身情況，首先，你有一個明確目標，就係短時間內購買物業自住。同時間，你現時在待業狀態，故中短期內對現金需求不少。

以你40歲計，應以增值為主。你持有股票，大致上係可以。

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但你買入價唔平。現時回落近半，但初步分析，依然都係屬於貴水平。始終市場現時對這類股有好大期望，此類股票，波動性較大。

此股可持有，但由於你持股比重有點高，我建議你每有反彈，沽出部份，去平衡風險。

另外，華潤啤酒（0291）都有質素，但佢佔你組合近半，太過高。緊記，個別股票比重不要超過組合15%，否則會出現過度集中性風險。所以可考慮賣出部分。

你可以用沽出部分以上2隻股票資金，再加上30-50萬，去分注慢慢買入以下優質股，並長線持有。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你投資知識不高，可先集中在平穩增長類股，至於潛力股，只宜小小注。到你提高了投資知識，才慢慢增加翻潛力股比例。

餘下資金，主要係用作你置業基金。再加上，你還未有工作，最少都要留有半年基本生活開支的應急錢，作為後援。

若將來股市有明顯調整，你也可以考慮用部份資金來入市。這樣安排這200萬，相信會較有彈性之餘，當你都會較有保障。

至於置業方面，你係用來自住。緊記要堅守一個準則，就係「供得起」。

現時香港樓市算係合理區頂，你可以慢慢物悉目標，到有較理想價錢，又有信心可以供得到，就可以考慮出手。

------------------------------------------------

Q21437：

你好 龔sir。睇左你fb一段時間 先買入必瘦站 會繼續持有 多謝你既分享。

另外亦留意到你之前講既粵海投資 本身想入手 但最近參股嘉誠環保工程 但網上不多關於嘉誠環保工程資料。

消息公報後 股價有所下跌 請問你對於呢個公司行動有咩睇法?

會否影響你本身對呢個股票既評價呢? 謝謝

龔成老師︰

必瘦站（1830）長遠有發展，這股有長線投資價值。

但現價已經係偏貴，有貨可持有，就唔好加注住。

粵海(0270)宣布收購嘉誠環保工程註冊股本總額合共 53%的股權，在該收購完成後，嘉誠環保工程將成為其非全資附屬公司。

嘉誠環保工程是一家在中國成立的有限責任公司，其於 2005 年成立，主要從事環境工程工作，並為工程相關工程提供投資、設計、建造、運營、諮詢、設備研發和製造服務。

嘉誠環保於中國河北省及河南省的市政給排水工作，相信集團想進一步提升在華北地區的市場份額和品牌影響力，初步睇係正面。

至於中短期股價走勢，未必一定跟企業質素和發展潛力有關。我地分析時，一定要集中用長線質素去做判斷。

現價計，算是合理水平，可分注入貨。

------------------------------------------------

Q21438：

Hello 龔Sir, 最近1638佳兆業跌了很多，值得入嗎？

另外，1503招商局有成8厘息，係咪值得入當收息？ thanks!

龔成老師︰

佳兆業集團（1638）主要從事物業發展、物業投資、物業管理、酒店及餐飲業務、戲院、百貨店及文化中心業務，以及水路客貨運業務等。

業務發展不差，不過盈利就較為波動。另外，由於負債較高，因此都有風險。現價合理的，但唔建議太大注。

招商局商業房託（1503）佢持有及投資中國相關的物業組合，物業組合有深圳市蛇口的多項物業，包括寫字樓綜合物業新時代廣場、數碼大廈、科技大廈及科技大廈二期，以及購物中心物業花園城。

物業有質素，不過較受經濟週期因素影響，租金會有少少波動，令到這股的股價較為波動。現價合理，有投資收息價值，不過唔建議太過集中在這房託。

------------------------------------------------

Q21439：

你好～～老師，我有少少問題希望你幫到我

1）想問一下康希諾6185 我400（200股）同260（200股）都有貨，呢兩日我見升返唔少，今日心大心細諗緊放唔放～～我唔係好識分析呢間公司前景好唔好？

2）我買咗中國電動車2845，138元400股～～有見過你講過買呢一個股票都不錯，我要唔要而家低價再入多少少

3）快手362 有200股，241元又入了200股

4）藥明康德189元 入了200股

我有啲股票分開兩次入，我應該取一個中間價，等升返上去放晒佢，定係低價入嗰啲，覺得升到一個價位可以先放咗佢，高價位嗰啲就照放喺度？

謝謝

龔成老師︰

你好著重個帳面數，其實你放貴個1手先，定平個1手先，係無實質分別。只係心理上，覺得放平個1手，你就賺左。貴個手就放係度，當無事，這種想法好錯。

你要明白一個概念，我地投資唔係賺差價。而係想將一些長遠只會貶值的現金，換成會增長的優質資產(如優質股、物業等)，並長線持有。

因此我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

1) 康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。

如果持有係可以，但一定只能小注。若2手佔組合比重都唔少，建議沽出1手，去平衡個風險。

2) 中國因為能源問題，長遠一定要發展電動車，這是大方向，故此股有一定投資價值。

現價依然係合理區頂區，你已有一定貨係手，唔建議你加注。除非你資金好充裕，就可以而一刻加小小注。

3) 快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。現貨可持有，但你預短期股仍會十分波動。

4) 藥明康德（2359）都有d質素。

佢主要從事藥物研發平台業務。係藥物開發過程，主要分為藥物發現、臨床前開發、臨床研究及商業化生產共四個階段。

睇翻佢的資料，佢的服務對應各個階段，可分為以下四個分部：（１）中國區實驗室服務（２）合約生產組織（３）美國區實驗室服務（４）臨床研究服務。

佢的客戶包括美國、中國、歐洲及全球其他地區的製藥公司及及生物技術公司。

業務其實不差的，過往的生意與盈利增長理想。

當中最大的風險，就是市場估值，現時的市盈率過百倍，就算有增長力，都計都貴，股價上落一定會好大。市場現時對佢前景有好大期望，但如果增長力比市場略減，股價都會調整。

只可以話這企業有增長，同時有風險。現貨可持有，但唔好加注了。

------------------------------------------------

Q21440：

阿sir, 我尋日入3690美團，今日跌

0285 同 2382 應該幾時入呀

剛剛$31入咗3319，係咪都高呀？

龔成老師：

你唔需太著重短期股價走勢，最重要是長期的企業發展。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴，不過，一定不能大注。小小注，是較好的做法。

只要你持貨不過多，都可持有的。

至於比亞迪電子（0285）去翻$40會好少少。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

雅生活服務（3319）合理價，有質素，可長線。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。