浪漫月巴睇女星（45） 明辨是非！我撐Ali！ 已經開學了，Why我喺中大校園仲未遇上「是非擂台」——的是非精Ali？ 1.我認，我有睇《學是學非》。這大概是我每星期唯一會睇的本地製作電視節目。 2.老實，喺屋企，我冇乜開電視，開親，不是打機就是睇碟。 3.但我總不會成日匿在自己屋企。每逢周日，會返老家吃飯。食飯時段，難免開著電視（這是不少家庭的自行選擇），而又注定離不開睇TBB（這是迫不得已的選擇）。以前我會覺得好煩，因為播親的都是飲食節目。你不妨數番在星期日（所謂）黃金時段出現過幾多飲食節目吧……當然，唔使好用心去計算，也會知道答案：喪多。 4.我從來都不明白這些飲食節目的作用。A.讓你增加食慾？B.串緊你在現實中食緊嗰餐唔夠豪唔夠矝貴？C.冇乜原因，純粹見播咗咁耐都冇人嘈咯，咪繼續播囉笨。 5.「學是學非，明辨是非！」——我終於聽番這句Slogan了！而且更是在那個周日食飯黃金時段Yeah！問題是，我已經太耐冇睇電視（嚴格來說是太耐冇睇TBB），以致我對電視界有一種陌生感，很多新紮姐仔、又或在坊間算是掀起過話題的姐仔，我統統唔識——唔識就是認唔出樣或講唔出名，又或認唔出樣兼講唔出名。除了Ali。 6.Yes，除了Ali。我叫得出佢個英文名之餘還知道她中文名叫「李佳芯」但這不是真名因為她的原名其實是「李嘉馨」（以上一句一定要一口氣講）。知道塵世間有Ali這麼一個人，是因為我曾經有追睇《體育王》和《空間大改造》這兩個有線節目。 7.在屋企仲睇到有線時，明明冇乜體育意識的我，會好神心咁捕實電視睇《體育王》；屋企已經冇任何空間容許改造？好神心的我依然堅持要睇《空間大改造》……這份神心，自然是因為Ali。佢好靚嗎？我唔知點樣界定「好靚」中的那個「好」字，而只著眼於「靚」，咁，我的確覺得Ali靚，靚得親切，靚得不會拒人於千里之外（這當然是感覺，畢竟我未接觸過佢，未能進行較科學的了解）；但我更欣賞的是她的口才。例如《體育王》，記得有個環節叫「Ali話你知」，由她向觀眾講解水蛇春咁長的體育知識，全程獨腳戲，即使她講的內容全都應該有專人寫定稿，但聽在我敏銳的耳裡，我聽得出她不是在齋讀稿，而是在嘗試演繹一段稿——讓那一段其實好老正（和頗悶）的稿，變得有趣。後來，她更會分裂成兩個人，兩個性格特質不同的人（即使不是甚麼深奧的性格設定），Ali一人分飾兩角，以偽對談方式，自己同自己做一場獨腳戲。OKOK我知道這不是甚麼劃時代做法，但在一個（未必咁多人會睇的）例行公事式節目，我看到一種非例行公事式的工作態度。除了負責面對鏡頭的Ali，在鏡頭見不到的幕後工作人員，也有功勞。 8.直至有一天我在有線突然見不到Ali。我問天：Ali去咗邊？但天，保持緘默，懶型地……直至有一天返到屋企，本能地開著電視好讓寂靜的家有一點人造聲響，我聽到一把熟悉的聲音，Ali的聲音——噢原來過檔了TBB。那個讓我再次聽到Ali把聲的節目就是《學是學非》。Ali，依然好睇，她的拍檔梁嘉琪和黃心穎都唔錯（尤其梁嘉琪，前身同樣是有線人，故意以一種懶靚女的姿態示人，OK突出，演出時往往交出一份非傳統電視台姐仔所能擁有的幽默和節奏感）。 9.我應該開心？可惜那時候的我已經完全喪失了一份睇電視的神心。所以後來那些讓Ali終於得到坊間留意的劇集，我一集都冇睇過——只係唔覺意睇咗半集，Ali演一個偏執的第三者，Well……演得太用力了，但這是很多電視演員通病，以為七情上面做戲咁做就代表好戲。不過，對於Ali得到這份遲來的嘉許，我開心。 10.也擔心。擔心她除了注定做是非精，更被定型為狐狸精。但現實是工作有太多身不由己，你一係唔撈，一係盡力做到最好，能夠演到一個叫天下C9憤恨的狐狸精，也是一種成功。那麼，Ali，惟有繼續努力吧。我不知道妳在將來能否成為一個星，但我始終認為妳的才華不止於一個是非精。 （原文刊於am730） #浪漫月巴睇女星 #aliaime