【龔成問答信箱】（Q20201-Q20220）

Q20201：

你好，龔SIR。我係之前上過你基礎班既學生。我用左市盈率去估值02382 舜宇光學科技。

市盈率，我用左2016至2020 既每股盈利既平均數去做合理每股盈利，之後再去你比的價網揀左2016至2020既市盈率，因為我見2010-2015個市盈率好低，有少少吾夠代表性。

所以就用左2016-2020再排大至細，抽中間3個。 就用左32.12 同37.06。再乘番每股盈利$2.28。 之後計出黎再加減10%。

計到出黎就係65同92，我想問我係咪應該調高番少少個市盈率，定我計錯左?

係咪可以參考番02018 瑞聲科技既市盈率去做市盈率參考?

龔成老師：

其實你計算無錯，我地估值無絕對的方法，不同角度會有不同的結果，有時我會同時同幾個角度去估值。

而「2010-2015個市盈率好低，有少少吾夠代表性」，你正確的。

你計算的方法，是一個較為保守的方法，而我認為保守是無問題的。但好多時我會同時用另一情景去估值，就是假設佢有較高的增長。

雖然瑞聲（2018）同舜宇（2382）是同行，但增長力及技術發展好唔同，因此，強行比較未必適合。

舜宇以佢最新的增長力及長遠發展，同30倍市盈率是可以的，只是運用EPS時，可以有較多的預期因素，根據不少大行分析，佢2021年的每股盈利，平均預測去到$5。

當我地為高增長股進行估值時，過往的數據參考價值會低左，反而同將來數據會多D。如果以$5及30倍市盈率作基礎，$150都是合理價。

------------------------------------------------

Q20202：

一直留意，你所揀嘅每隻都好有抗跌力，而且總係倍升！

最近個市回咗好多，個個都想從中尋寶，但點先可以做到你咁百發百中，百分百準確呢？？？

龔成老師：

大量分析，小心出手。

我平均一年分析50間公司，這些公司都是經過選股過程後，確認了是基本的優質股，然後再每個星期，花6-8小時去睇一間，以了解佢的優質度、平貴。

雖然一年分析50間公司，但我會好耐心，等佢地跌到平，或接近平的水平，先會出手。買入後就長線持有。

而一般的散戶，實在太心急，第一，唔做功課，第二，好心急就下決定，唔會耐心等靚價先買，第三，無耐性持有，升少少就賣。

------------------------------------------------

Q20203：

老師你好,我在172入了（6618）京東健康現跌了，你認為應該放長線還是早走早著呢 前景如何？

另外也想入1610 中糧家佳康 如果中短線的話現價可以嗎。謝謝老師

龔成老師：

京東健康（6618）由京東（9618）分折出來京東健康，將會來港上市。這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的，我相信前景是正面的。但由於估值難，不確定性大，同時暫時略貴。如果你持貨不過多，持有就得，有得守，但就預股價上落較大，因為現時股價始終唔平。

中糧家佳康（1610）主要從事飼料生產及生豬養殖、生產及銷售生鮮豬肉及肉製品（以「家佳康」和「萬威客」品牌出售）等。

佢亦於家佳康專賣店及透過大型電商營運商銷售部分產品。

整體質素中等，唔算差，但又唔算好好，佢會受肉價的上落影響，影響左盈利，令佢盈利上落大，有試過出現虧損。因此，佢會比較被動。

現價算是合理，但質素未算好高。長遠發展都有，但預佢中短期波動，這類股又唔太值得持有好多。

------------------------------------------------

Q20204：

老師想問多樣問題, 謝謝老師

我而家持有2013, 6186, 175, 6690請問可以長線持有嗎？

龔成老師：

可以，但部分股要留意風險。

微盟集團（2013）業務的確是將來發展的大趨勢，從業務潛力上，的確是有的，見佢財務數據的增長都強勁。但在估值上都略貴，股價可以好波動，不建議太大注。

至於另外3隻，都有質素，但現價都唔算平，都要注意風險，可長線的。

------------------------------------------------

Q20205：

龔成老師，請問你熟悉台灣股票市場嗎？台灣股票市場有如香港市場般月供股票嗎？

如果有，台灣有沒有月供股票如你常推介的盈富基金呢？

因如冇意外，將於5-6年後移居台灣，想趁在香港能揾多個錢既時候，可以係台灣投資一下，制造生活費💪🏻

感謝你的寶貴時間解答

龔成老師：

我不熟識台灣股市，但我相信都有這類月供服務的，你可以去銀行問下，但唔清楚台灣有無得月供盈富（2800）。

其實，你可以供其他指數基金，我相信台灣是有的。又或你可以供美股指數基金，例如VOO，都是可以長期月供，長線投資的。

------------------------------------------------

Q20206：

龔成老師，想請問一些理財疑惑？

現在我有一個車位，一次過買的，價值約100萬，我希望再攞去貸款，但銀行只可以我係佢哋銀行買投資產品才可以貸（例如基金），貸款利息現在約為2.2，可貸10年，最多20年，本人現時40歲，有穩定收入。

現在懷問是我應該憑月薪月供股票（都是老師建議那些其中一隻），或貸款用一大筆錢買銀行建議的基金，佢話三個月有一次息，回報大約7%，主要大陸的內銷，當然仲有多基金選擇，這個只是其一推薦的。

龔成老師：

最重要是睇「質素」，不要為借而借，不要為買而買。

你要睇翻銀行的產品，當中是否有真正的質素，長遠有無增長力。你要睇翻佢的投資策略，過往回報，風險度，如果你認為不差，就可以進行。

------------------------------------------------

Q20207：

龔sir你好，我有嘢想請教你，因為我老公太衝動買咗掃管笏一房310呎低層，呎價大概$169xx。同區隔離一年樓呎價都係萬一至萬三，我好貪心蝕多。我同佢講好唔好撻訂，冇咗廿幾萬就算。

第一次買樓，佢成日聽身邊朋友樓市一定向上。

但掃管笏太隔涉，同埋青山公路樓價水平都係低，萬一至萬二，但佢而家買咗萬六七一呎，仲要不是會自住的，風險好似好大吖？

我知你係股票專家，不過我都希望你俾少少意見，我心好煩，成日訓得差

龔成老師：

我先從香港樓市分析，在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

至於你的樓，你要比較同區同類單位，大家的呎價，以及預期租金回報率情況，如果你的單位明顯貴，就要小心。如果差不多，就問題就不大。而我見你的的呎價比同區較貴，的確有點煩。（不過新樓有少少呎價高是正常的）

另外，買樓最大的原則，就是「供得起」，只要這方面你地無問題，其實是有得守的，如果你在供得起方面無問題，就勉強可以照進行，但你預一開始，你地已經用了較高價格買了該物業。

其實現時，撻訂與否已經是兩難，如果供得起可照供。最大問題不是樓市，是該樓盤你地買貴左。

------------------------------------------------

Q20208：

您好！
新手你那本比較好

因為太遲才明白您教的真理（資產vs現金)工作多年只有儲現金，今年7月開始（51高齡失業）才開始整理公積金及買股票

但今天一手都是蟹貨如下：
(9988有20手@285，
002有4手@73，
001有1手@58，
1810有1手@30，
2158有2手@60，
1055有7手@4.3。

請問如何是好

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）

至於你現時的組合，以你的年齡，可投資一些平穩增長型的股票，例始盈富（2800）、港鐵（0066）等。

至於你現時的持股，阿里（9988）可守，但就不要加注。

醫渡科技（2158）可守，但不宜持有太多。

中國南方航空股份（1055）質素都有D，但不算強，不宜持有太多。

------------------------------------------------

Q20209：

龔Sir，您好，我有一個財務需要個案，想聽取您的寶貴意見，想在現在的財務狀況底下達致每月額外享有被動收入HKD10-15萬。

一家五口財務狀況如下:

>>>>家庭balance sheet
Assets: 1） 現金、定期存款、保險產品、基金:　 約HKD25,000,000
2） 自置物業1單位市值: 約HKD20,000,000
Liabilities: 1） 按揭貸款結餘: -約HKD7 百萬 （負債）

>>>>>>5 人家庭，3 未成年在學子女，幼子患長期病每月需付7-8 萬醫藥費，只有夫（46歲）工作每月總收入約HKD18萬

現為公司高管人員，但行業是傳統行業，正在受新經濟模式衝擊，恐式微，未來10年內有失業危機，到時一家經濟必定相當困難

而妻（44歲）是家庭煮婦照顧屋企。夫月入即家庭總月入HKD18萬已是剛好滿足家庭每月總開支包括保險供款、按揭還款。

>>>>>>目標: 想達致每月額外享有被動收入HKD10-15萬，令家庭開支可以鬆動些，應付開支之餘也不需要支取備用現金

定期存款，這些本來預備幼子突發醫療額外開支、子女出國升學開支與及兩夫婦日後年老的生活費。謝謝!

龔成老師︰

你每月已無資金可用作投資，故只可在你資產中，抽出部份來做投資增值。

若你預期你先生，大約十年後收入會有大變動。我地就好好把握這十年，去為未來架風浪做好準備。

如果你希望每月有10萬蚊現金流，以股息率5%計，你需要本金2400萬。你可以動用你現金和定期去增值，至於基金，你可以睇翻佢本身回報如何。你可以用盈富（2800）年平均8-10%去做比較，決定是否值得投資。

但由於你家庭未來收入有不確定性，投資前必需預留最少半年開支（包括日常支出和小朋友醫藥費，你可因應自己情況調整。），才開始投資。

現時大市在合理區，你可以將扣除應急錢後的一半資金，用分注形式，慢慢投入以下優質股。餘下一半，就等大跌市，才大力入貨。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

當你財富累積到2400萬，你就將佢慢慢轉換成一些優質收息股（目標係有5-6%股息率），咁就可以創造每月額外10萬現金流，來支持生活開銷。

------------------------------------------------

Q20210：

你好！首先真係好多謝你！你是我在投資方面的啟蒙老師！仲記得兩年前我剛剛開始投資時的得一兩萬，然後在你的指導下，開始開源節流！不斷睇書學習！

直到上年3月疫情大跌，就不斷入貨買入優質股，賬面獲利不少，財富終於有6位數，雖然只是一個小數目，但係意義重大，我深信我會在4年後 我畢業時會賺到人生第一個100萬！真係好多謝你！

另外有幾個關於投資問題想問下老師

1.小米。因為公司已有淨利，可以用市盈率推算合理價，根據Q3 每股盈利0.57，預測全年盈利0.8，過去平均市盈率30，推算合理價24，這樣對嗎？

2.以peg推算合理價，現在小米市盈率為47，peg等於1為合理，小米要做到盈利增長率47%，應該比較困難，所以當市盈率為30時，股價會較為合理？

3.關於指數基金，我認為是一個對新手非常好的投資產品，一直不明白為什麼有人會批評啊sir，另外如果想買追蹤中國股票市場的指數基金，3188還是2822好，3188好似更分散，2822比更集中金融行業？

4.由於市場越來越有效率，要找到價值比價格嚴重低估的股票越來越困難，如果遇上非常優質的股票是不是值得以高於合理價的價位買入？

問題有點多，麻煩龔sir了，再一次多謝老師一直以來的指導！！！

龔成老師：

太好了，累積財富是一個過程，你只要保持儲蓄，投資優質股，長線持有，財富就能保持增值，我相信你一定能累積到$100萬！

1）當我地分析時，會考慮企業現時的盈利去得出市盈率，以及預測下年度的盈利，去進行推算。

如果推算的全年盈利為$0.8，假設股價$30，預測市盈率就是38倍。

2）你都可以咁講。

但PEG只是一個輔助工具，只是參考下，不能成為估值的核心。

3）因為我已收到風，有行家請左打手攻擊我，我搶左人生意。

其實我無所謂，我唔會用這些手法，我地做好自己就得。

連巴菲特都叫，如果無選股能力的投資者，應該投資指數基金。

你可以考慮3188。

4）如果是有增長力的優質股，就算略貴，都可以小注買入，之後先等跌到合理區正式入。因為如果一直等跌，有機會等唔到。

------------------------------------------------

Q20211：

龔sir, 多謝你之前的指點。近排大市都幾熾熱，你認為應該在現時的股票加碼好，定係買多隻唔同的股票好？

個人睇好舜宇（136入得1手）,AIA（1手ipo). 3033就5手@7.79

定係入吉利汽車？

我覺得瑞聲增長慢，好似唔太郁，都返唔到53水平。移卡我就覺得貴，唔捨得加注

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述持有的都是有質素的股票，可持有，如果你想加，可加吉利（0175）。瑞聲（2018）增長力唔算強。如果你想加潛力股，就3033，但要慢慢分注入，因為現價唔平。

------------------------------------------------

Q20212：

我想問下組合-需加?
有01833 06993 0788 3088

以下不定時入
3067 1810
09988 0006 0823

2800 太高.我應該入嗎?什麼價位好?
2802/2809/2826-現價位是否太高? 小米仲應該入？
2802/2809/2826-是否可以只選一個?

龔成老師：

你現時持有的，都是有質素的股票，你持有就得。

至於你不定時加入的，都可以，都是有質素的，只要你不要太急一次過入，慢慢分注同時留現金就得。

至於盈富（2800），仍是處於合理價，可分注。

至於上述3隻ETF，你同時投資都可以，都有潛力的，如果3選1就2826。

------------------------------------------------

Q20213：

Hello 龔sir真係好開心呀！雖然我哋大家彼此未見過面，但我真係當你係我嘅老師 ！

你可以睇睇我哋上次嘅對話係七月 果次我講要喺30歲前上車 但結果26嘅我同先生喺上年九月買左我地人生第一層樓 今個月仲收埋樓添！係難以掩飾嘅興奮同埋喜悅

睇左你嘅書 睇你Facebook ，人生、財富、投資思維大大改變 發夢都諗唔到竟然可以喺咁短時間之內上到車，全部都係靠我哋自己！

真係非常非常非常多謝感謝你！我當左你係我嘅人生教練 ，都希望可以同你分享呢一份喜悅 。

我們的暫時現況：

先生工作非常穩定 但我受於疫情關係 已經足足一年 收入超級不穩 只有8、9千蚊每月 我們暫時可以話係負債累累（因為要供樓同應付裝修費還有日常） 我哋嘅積蓄淨剩返幾萬蚊

我哋仲有計劃遲下生小朋友 所以我哋想好好建立返我哋嘅儲蓄組合/計劃 睇咗你好多書 所學到嘅

我哋而家應該由月供股票開始儲起 這樣做正確嗎你認為

最後
祝你新年快樂 新一年搵多啲
盡快達成你嘅目標 無論事業愛情家庭都好好好！
萬分感激！一切盡在不言中

龔成老師：

太好了！恭喜！

這是你努力的成果！繼續加油！

你都要記住，「供得起」原則是最重要的，你要預留資金去供樓。特別你話收入不穩。

我建議你儲多D現金先，唔好太心急投資，做好防守，先做進攻。不要急。

到你有一定的現金，就開始月供或分注投資優質股，以「先增值，後現金流」的模式進行。

加油！保持進步！

------------------------------------------------

Q20214：

老師，我今年三十二歲，乜嘢都無既女人仔一個，假設我以後無男人無仔女養，有八十歲命，做野做到五十幾歲生產力下降

咁我仲要交租食飯醫療到底要用幾多錢？我估計最起碼要四百萬。

意思即係我呢二十八年每個月都要儲萬二蚊呢個計法有冇問題？

如果依家首先朝住一個目標去買三百萬以下既新界村屋當養老，暫時唔係自住既，係呢二十八年入面實現咗先，放租又好放係度都好，去到以後既生活係咪過得輕鬆啲？我唔識計劃可唔可以教下我？

龔成老師：

你32歲，醒覺到有這問題，有些人到50歲先醒覺，你現時仍有時間準備，可以以$400萬為目標。

你只要利用儲蓄、投資，其實是可以做到的，不用太過擔心。

而你考慮投資物業，都可以的，因為物業是資產項，長遠有租金，就能提供現金流比你。

我會建議你唔好只考慮單一資產，而是建立一個財富組合。

第一步，你要儲蓄。

第二步，要學投資，利用一些穩健工具，例如穩健股票，月供模式去滾大財富。

第三步，利用增值後的財富去投資物業。

第四步，如果有閒錢，同時投資股票，進入「股樓並行」狀態。

第五步，到年齡大時，再進行財富配置，集中在現金流類別資產。

另外，我建議你睇《5年買樓4部曲》這書，幫到你的。

------------------------------------------------

Q20215：

龔成老師，我呢幾日諗唔通想請教你心態問題。由2020年8月開始我投資幾隻平穩增長股：領展、粵海、阿里巴巴、小米等，平均都有8%增長，賺了一萬左右；美股方面就只夠膽買了幾隻加埋都唔夠50股。

這兩天朋友炒2隻美股，容易賺了2萬蚊。知道你叫人唔好炒股，我自問也沒有膽量和時間去炒。但我用了半年時間也比她只用數日賺得少...很難不去比較。

1. 因為我本金不多加上港股升幅不及美股，看見朋友也沒有甚麼投資知識，只看股票app討論區資訊，心思思令我都想玩幾隻短線的美股是否未嘗不可？很需要加快在幾年內儲夠首期...

2. 說回港股方面，我每隻股現只敢最多投資3萬...有興趣的股又實在很多，零願找一隻新的投資也沒有加注在現有的。想問你應該如何決定何時加注？

3. 還有不論美股還是港股，等了一段時間都總覺得是高位難以入場，QQQ/VOO/ARKK等也是，即使回少少都係唔敢入得多，等又好像浪費時間的...亦有很多評論至2021年將會大跌。我應該繼續耐心等，還是不要理這些預測繼續分注入場？

很想加快賺錢儲錢...不想再無了期交租

龔成老師：

1）有時，短炒你會見到有較好的回報，有時，長線會較好回報，我只能夠用大數去同你講，在我過往做10年銀行與證券行，短炒者，大多輸多贏少，當然，有人贏的。

人很喜歡以短期、當刻的或績作為指標，但你可睇下巴菲特，70年經驗，久唔久都有人話佢的方法不及短炒，但時間證明，佢的方法是最好的。

你的方向其實正確，但你都要明白，你投資的，大部分都是平穩增長股，你財富平衡增長，是正常的。

如果你學你朋友，有可能財富有較快增長，但背後就承受了較高風險，你要理性問自己，自己的風險承受程度如何？

你唔好睇表面，要睇核心，睇長期。

你見人賺錢多過你，但要同時想想，佢承受的風險比你多，這點你一定要明白！如果投資只想回報，不想風險，好大獲！

2）我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你想組合有較好增長，可考慮月供3067。

3）唔好信「預測」，我投資20年，見預測都是一半半準，即是同買大細無乜分別。

建議你分注投資，同時留現金就得。

------------------------------------------------

Q20216：

老師，想告訴你一個好消息！我媽媽之前成日炒炒賣賣，之前我不斷叫佢跟你既方法。佢終於在幾個月前建立左收息，同平穩組合。佢今日同我講，佢好多謝你

佢個portfolio 都因為夠平衡，所以呢幾日升左好多

龔成老師：

太好了！

記住，我地是「配置」，同時這是長期過程，唔好太在意短期股價。方向已正確，集中收息就得。

------------------------------------------------

Q20217：

現時有45萬現金,阿里巴巴229入左兩手，上個月開始月供2000(2800),每月人工扣除供樓等其他開支另外可儲3000，想每月買一手3067做投資可5可行

定係有其他更好既儲錢方法？
想2年內儲到100萬

龔成老師：

財不入急門，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

你可以照上述方向進行，現時$45萬，部分可投資舊經濟股，而新經濟股如3067，慢慢買入就得。

總之，要留有一定的現金，如果大市有較大的下跌，你就可以把握機會入市，能有效提高你回報的。因此，平衡組合都很重要。

------------------------------------------------

Q20218：

老師，以下係我之前買入嘅股票，輸多過贏，依家我應該點做，如果要重新部署，應該要點？
求指導

5、455、745、755、1469、1776、2389

龔成老師：

記住，你最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

天大藥業（0455）、中國國家文化產業（0745）、結好金融 （1469），質素不佳，建議賣出。

至於其他，質素都不是最高，不過就未算差，可以持有。但如果日後有資金，應該投資其他更優質的股。

------------------------------------------------

Q20219：

老師，你時常叫人月供2800,或買入，長揸３至５年，但佢 估價唔係成日上上落落，咁 淨係賺去息口， 咁我要買好多錢先可以， 因為我屋企有個準備退休嘅長者， 請指教

龔成老師：

我地永遠要睇「風險與回報」。

盈富（2800）並不是高回報類，是收息加基本增長，而好處是風險不高，有「穩中求勝」的作用，因此適合大部分投資者。

如果你想有較高回報，你可考慮安碩恒生科技（3067），當然，風險度會高左，你要自己衡量投資多少。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

記住，我地要「先想風險，後想回報」，如果是退休用，就要保守D，可能投資一些收息股更好。

------------------------------------------------

Q20220：

龔sir, 我睇咗你幾本書。我好同意你講將幾章節要將冇升值能力既股票沽出。我手頭上有30000股[email protected]平均入，而家賬面已經-50%

其實應該由佢放喺度定應該放棄，可以指教一下嗎？

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。

現價合理，但你預佢增長力唔算強，長遠算是不過不失。

所以，如果你想組合提高增長力，可以賣出。或賣出部分轉其他。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20021-Q20040）

Q20021：

龔sir，我有啲概念野唔太明，股票係買賣，賣都要有人接貨，如果有人賺錢，係咪應該意有人蝕？

龔成老師：

「有人賺錢，係咪應該意有人蝕」，這只會發生在零和遊戲的項目。

舉例說，如果四人打牌，有人賺一定有人蝕，這是零和。

如果股價今年$10，20年後股價不變都是$10，這就是零和，當中股價可以大上大落，有人賺有人蝕。

但如果股價今年$10，20年後$500，就是賺的人較多。當企業的實質性的長期增長，就不是一個零和，而是財富增值。隨著貨幣系統的運作，以及經濟成長，有些優質企業會得到較大的利益，增長力較強。

------------------------------------------------

Q20022：

老師，如果你是政府，你會如何收縮貧富差距的問題?

龔成老師：

如果我是政府，會推行理財教育，以及教學生做生意。近幾十年的財富，不斷偏向了資產增值及生意成長，懂得投資物業、股票、懂做生意，愈來愈有錢，打工仔愈來愈無錢，這是最大的核心問題。

------------------------------------------------

Q20023：

你好 想問以下問題

1.想問下由於仲係學生暫未有收入，每月只有大約1000～2000的資金，咁少錢可以有咩投資方法選擇？

2.由於資金少，投資新手冇經驗
呢排剛接觸買美股，但仍未知點選擇投資組合，一啲股貴只能夠買一兩股，平嘅股又上上落落

上網有見話買實一兩隻優質股，同埋月供其實係點？

因為買實一隻優質股、佢個價位越嚟越高時之後都繼續照買照供？定係賣左再重新再買？

3.咁少錢建唔建議分散投資去唔同好平嘅股等佢幾年升？

4.現時有咩複息回報產品回報%好啲嘅推介/多人會選擇用？係咪買香港銀行啲儲蓄計劃定係咩基金？
thankyou

龔成老師

1）如果你想穩陣，就月供盈富（2800），如果你能承受風險，就久不久，例如每隔2、3個月，買入一手安碩恒生科技（3067），可長線的。

3067這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

2）所謂的買實1、2隻股，即是每月，不理價照入，長期進行，如果企業成功，你的回報會最大。不過，如果你未有選股能力，就唔建議，因為萬一選錯股，你集中1、2隻，損失會好大。

所以，我會建議投資ETF較好，如果美股，可考慮VOO。

3）最重要是投資「優質股」，建立一個組合。

你小注投資一些潛力股可以，但這類股要求你都有一定的分析力。

另外，唔好因為資金小，刻意買一些無質素但入場費低的股票。

4）我建議你投資ETF，2800、3067、VOO、QQQ，長遠好過你買儲蓄計劃，從學習及提升投資實力角度都是。

------------------------------------------------

Q20024：

龔sir 想問下你點解覺得華潤醫療潛力未到十倍股。

因為我見到佢依家既六大專科發展（腦病學科，康復學科，腫瘤學科，消化學科，骨創學科，心臟學科）
好有潛力。將旗下醫院打造成各個專科醫院。

如果成功的話，起碼是千億級別（海吉亞，錦欣生殖只是專做一個專科醫院已值幾百億）

而且佢又有華潤健康既資產注入，依個都值得期待。

政策是長期利好，我見之前中國政策傾斜既行業，都發展得好好，例如電商，乳業等。

所以華潤醫療既專科發展成功機會都大。
仲未講佢如果發展互聯網醫療，應有一定優勢。

龔成老師：

我相信這股有增長力的，至於能否成為10倍股，就要睇佢之後的業務發展，大環境能否配合。

華潤醫療（1515）其實本質唔錯，不過業務波動與中短期因素，令股價波動。

佢是華潤集團在醫療版塊的主平台。主要在中國從事綜合醫療服務、提供醫院管理、諮詢服務、醫院集團衍生業務。

旗下擁有過百家醫療機構，提供臨床診療、健康管理、公共衛生、醫養結合等全方位、多層次的醫療健康服務。擁三級醫院、二級醫院、一級醫院、社區機構，總床位數超過1萬張。

本身有一定的企業優勢，長遠企業發展仍是正面，此刻價格大約在合理區中上部。

------------------------------------------------

Q20025：

龔sir，我今年32歲，月入$25000-$30000，手上現金20萬，我從未試過投資，我想下一年生寶寶，所以現在想賺多啲錢，我應該投資哪一股票？

月供哪些？
直接買入哪些？
謝謝你的分享

龔成老師：

如果你無投資經驗，月供會較好，雖然回報不及把握時機，但起碼能減少你的風險。

你現時可以利用每月月供股票，將手上的資金，慢慢轉為股票，例如每月供$5000-$8000。當你的現金開始到達較低水平，如$5萬-$10萬（要視乎你的家庭情況），你就可能要減月供金額。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），如果無得月供就自己隔2、3個月入一次。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20026：

Hi 老師 手持十萬中國電信 728 平均2.15入
之前比制裁既時候覺得抵入 中間有溝貨 見佢都有5厘息 打算長揸

請問哩隻股質素如何 哩個價可以長揸嗎？

龔成老師：

中國電信（0728）有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，唔好對股價有太大期望，增長力不算強，這股有長線投資價值。

你可以將這股，成為你投資組合其中一部分，但不能過多。

------------------------------------------------

Q20027：

Hello 龔Sir!第一次send message 給你，想來多謝你及問小小問題，希望你在百忙中能抽空一點時間給我們一些建議。

一年前開始深入看你的著作及Facebook專頁，剛好身邊積累了一點閒錢又遇上疫情跌巿，參考你的建議後分注入巿，這一年都賺了一點利潤，很多謝你無私的分享。
因此成績並非全靠自已的分析，很多是聽從你的建議及策略，為了令自已更明白什麼是股票投資，我已報讀你3月的課堂，期待從中學到更完整及深入的股票知識及方法，為未來增加投資能力，同時減少投機取巧。

你書中指上完你的課程正常能在股巿中賺回學費，但我估計很多學生未上你的堂，只留意你的專頁及書藉，不盲目投機，應該已經賺夠了學費，哈哈!

我的朋友(35歲)有一個問題是關於自願性可扣稅強積金。他的收入已達17%的稅階(假設跟往年一樣有稅務寬減2萬後仍要交約2萬稅)，如果將收入放入強積金，相等於節省了17%的稅款。

但因為強積金必須要到65歲才能取出，相等於該筆錢只能一直放在強積金戶口滾存，相反如果不放入強積金，即時會被收17%稅。

因為他的股巿經驗不多，未知能否賺多於強積金的回報，他過往8年強積金的年化收益率約為8%。請教呀SIR 給點建議。

最後，很喜歡你不定時上載一些正面的句子，鼓勵大家一齊進步。祝大家身體建康。股票班見。

龔成老師：

我相信知識與財富成正比，你擁有的知識愈多，長遠財富都會愈多。

至於自願供款扣稅強積金，有好有壞，好處是稅項的優惠，但要留意，佢都會有個上限。

如果你朋友原本都是儲蓄投資，比起自己做，參加自願可扣稅，這的確是好處。

當然，都有壞處，首先是管理費，盈富（2800）的管理費只是0.1%，但坊間的強積金，就算是追蹤指數的基金，管理費都唔低，要計下數睇下有無著數。

另外，你要到65歲先可以取到，靈活性會大減，因為佢人生裡不同的階段，都可能會需要資金，而不一定等65先，所以，這方面要留意。但如果佢本身都想這筆錢65歲作退休先用，咁都可以考慮。

加油！股票班見！

------------------------------------------------

Q20028：

Hi 想請教一下 我幾年前開始月供股票 中途有斷續地供唔同組合

66、175、823、939、1038、1113、2318、2800、3988

所以有啲散收收 如果我想集中供其中3-4隻 有咩建議呢？

龔成老師：

你現時所月供的，都有基本質素，不過有些同類就唔需要供太多，例如銀行、長和系。

如果你想組合有基本增長，可以停供一些收息股，只供：盈富（2800）、港鐵（0066）、吉利（0175）、平安（2318）。

------------------------------------------------

Q20029：

成哥 有樣野想唔明 我驚阻你時間 如你有空先回應我 中海油 近期港股通北水好強買入

成交又大 買盤長期多過賣盤 點解股價唔暴漲 雖則漲了不小。 謝謝！

龔成老師：

這些是一些中短期的分析，其實你唔好太在意，最重要是睇翻「企業本質」。

所謂的成交，要有「買入」「賣出」，所以當有資金買入，如果同時股價已貴，就自然會有一定數量的賣出。即是買入的人多，賣出都多，而你所見到的買入多過賣出，只是一些短期現象，會變得好快的，因此唔好盡信。

------------------------------------------------

Q20030：

龔老師，你點睇一個做咩都唔成功既人
做每一樣野..係咪意志力唔夠

龔成老師：

我手機中有一句用了多年的金句：「成功不是比能力，而是比毅力」！

我睇左好多成功人士、有錢人的傳記，佢地的共通點，就是「不會輕言放棄」。好多時，佢地同失敗者在能力上分別不大，但佢地會好堅持，每件事都堅持。

如果你記得我早前FB的貼文，當日好凍，但8度，但我都會堅持去跑步。

其實跑步只是一個好微少的動作，但我會堅持每星期跑1、2次步，當我定了當天要跑，就要落雨、打風、好凍，我都照跑，這動作持續了20年。

成功不是一下子做一件大事，而是堅持做小事。試下定左目標後，「無論如何」都要做到，當習慣了這情況，做事就會好成功！

------------------------------------------------

Q20031：

老師你好，近期經朋友介紹接觸到你，投資知識係0. 本人38歲，專業人士，私人執業，月入不穩。平均每月有6-8萬。

本人最大問題係收入有時以幾個月作結算，例如半年會有18萬收入，是每月3萬的總和。但每月至少會有3萬現金流。

儲蓄約20萬。

期望2022年12月31日前增加儲蓄到100萬，想了解一下，若收入不穩定，一時很多錢，有時無現金流情況應該如何投資？想問下月供小米和迪比亞是好選擇嘛？

請老師指教

龔成老師：

只要用平均的概念進行就得，無問題的。

首先，由於你收入不穩，因此現金唔建議用盡，最好點都有$10萬現金剩，暫時只用$10萬去投資好了。

你可以用分注，或月供股票的模式進行，不過，比亞迪（1211）現價貴，唔太建議。小米（1810）都唔平，部分資金月供好了，不要大手買。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20032：

龔sir,你好，我今年三十幾歲，有家庭，兩公婆月入大概6萬左右，有兩個唔夠3歲既小朋友，一直都無乜有效既儲錢方法，加上宜家家庭開支加大，想為未來打算一下。

自己20歲出黎返工已經每月拎千幾蚊左右買左份投資雙連既保險，儲左10幾年，宜家睇返都有30幾萬。

呢幾個月有個諗法，就係拎呢30幾萬出黎股票市場投資，希望財富增值。

如果計劃實行，我打算將呢筆錢分散投資放係以下股票（1810小米，941中移動，3067安碩恆生，1177中生製藥，2158醫渡，869信義光能），想問有冇意見俾到我？謝謝

龔成老師：

如果將投資雙連既保險，轉去股市，有危有機，其實好睇你風險承受能力。

長遠來說，股市回報會較高，但風險度都較高，加上現時股市已唔平，投資要更加小心。

你上述選的，除了中移動（0941）外，其他都是潛力類股，但最大的問題是現價大多唔平，甚至部分貴，你將會將對股價波動的風險。

我會建議你一半是平穩型，如盈富（2800）、港鐵（0066）等這類，一半是潛力類，你會較平衡，同時，潛力類入貨時，要慢慢分注入，不要一次過大手入。

------------------------------------------------

Q20033：

你好成哥，我係你的讀者，想請教你關於置業揀樓的問題

我本人單身，約30歲，最近我中左白居二得到置業機會，想買來自住+當係投資

第1個問題係考慮我財政能力，首期40-50萬應該無問題，再多既都只有大約1年洗費預算，現時工作穩定，月入3萬儲2萬，如果供400-500萬樓，供款大約2萬，每月就會無錢剩之餘另外仲有約$1000-$2000/月 家居洗費

正路每年我可以加人工，將來如有機會結婚亦可同另一半分擔生活費，所以暫時可以頂住先

我咁諗會唔會好有問題? 其實係咪唔應該買?

第2個問題，如果買的話，白居二可以買二手市場未補地價居屋，如果樓齡20年內可以借足9成錢 + 還款期25年，否則需要在政府擔保期內還到4成錢

好處係政府做擔保，可以唔洗做壓力測試。睇過現時比較多既居屋屋苑大多都係20年左右，有平有貴，範圍大約$9xxx - $11xxx/尺

我有個擔心，如果我現時買左20年樓齡居屋，將來賣出既難度可能會大大提高。因為買完10年內已無政府擔保，將來白居二買家需要直接比4成首期(以500萬樓計，大約200萬)先能夠買到

或者我需要另補地價先可以係二手市場賣樓，如果我係買家，有200萬其實已經過左資產上限申請唔到白居二，或者跟本唔需要用白居二名額買樓。我亦無咁多錢用來補地價。

所以樓齡細(約1-10年)，但係比較貴($12xxx/尺)既樓比較值得買?

我先用可承受樓價->買值得投資既居屋作為考慮條件正確嗎? 或者有咩其他我諗唔到既因素可以建議一下?

感謝你抽空解答!

龔成老師：

1）你最好預多少少首期，除了可能更穩陣買到樓外，當你完成買樓後，不要令到現金變為零，要留有一定的防守力。

另外，要計清楚供樓情況，每月供款方面是否無問題，因為現時你的情況有點盡，供款佔入息過多。

我地買地，最重要是「供得起」原則，如果這方面未能好安全地過關，那不如儲多少少資金先，或買一些金額更細的樓。

2）居屋最大的作用，基本上自住，投資價值不算好強，所以你可以先從自住的角度考慮。

當然，我認為你現時的供款情況買樓是較進取的。

你應該考慮左供款、樓價這些問題先。

------------------------------------------------

Q20034：

龔Sir, 你好，我係你股票班學生，因為近黎個市場非常波動，我亦暫未睇到有咩股票係平可以買。所以想做番月供計劃

因此想問下而家阿里巴巴（9988）受到中國政府嚴密既監控，股價不斷受壓，未知幾時會完，而我長遠都睇好阿里巴巴既發展，而家係咪一個合適既時機去做月供股票（太約每個月$5000）

慢慢儲貨，等佢未來爆上去呢？ 另外想問下去到幾多錢就暫停一下月供計劃呢？謝謝你

龔成老師：

近期的新經濟股股價回落，加上阿里（9988）將面對內地監管可能收緊，都令佢股價上落大左。新經濟股股價回落只估值問題，由之前的貴，去翻合理水平，反而要從一些核心因素分析。

例如內地監管可能收緊，相信對佢中短期有影響，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

你現時開始月供，適合。$5000無問題。

由於月供是一個長期計劃，除非佢升得太多，如$280、$300，否則，你可以一直進行的。

------------------------------------------------

Q20035：

龔成老師你好，想問下買盈富2800的策略是應該升到高位放部份，再等跌市底位入翻賺差價，還是不理現價一直長揸？

之前睇過老師建議長揸好似3-5年以上才有回報，但有少少疑問因2800跟恒指，咁若果5年後的恒指和現在一樣，咁若不計派息，可能賺不到股價？

另外我是每月看現價盡量捕低位一手手入，但呢2個月都價位偏高無入到，想知應如何應對

另外想問問3067有無咩建議價位入，呢排一味升，難以揾到位入手，謝謝老師!

龔成老師：

盈富（2800）最大的作用是幫我地平衡組合，以及爭取基本的回報。所以，盈富最大目的不是賺價。

建議你點都有一定的貨在手，如果再升到貴，你賣部分是可以的。現價唔算平，月供好了。

如果你想組合有增長力，可以投資安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

現時大市，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20036：

老師您好
想問下保險業前景

而家考慮緊AIA(1299)同中國平安(2318）
邊隻更值得長線持有。感謝！

龔成老師：

兩隻都是有質素的，都可以長線持有。

中國平安（2318）會略略好，這股有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

------------------------------------------------

Q20037：

老師 0981同美股強生現價值得入嗎

同6690

龔成老師：

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，回翻D較合理。

美股強生無特別研究，基本上是有質素，有增長力的，不過唔知現價平貴。

至於海爾智家（6690）主要從事生產及銷售家用電器，並以３個自主發展的品牌（包括海爾、卡薩帝、Ｌｅａｄｅｒ）及４個收購的品牌（包括ＧＥ　Ａｐｐｌｉａｎｃｅｓ、Ｃａｎｄｙ、Ｆｉｓｈｅｒ＆Ｐａｙｋｅｌ及ＡＱＵＡ）營運業務。

佢家電產品涵蓋冰箱、冷櫃、廚房電器（包括油煙機、灶具、消費櫃及烤箱）、家用空調、商用空調、淨化器、新風系統、洗衣機等。

業務不差的，有質素，長遠有發展，現價合理區頂位。

------------------------------------------------

Q20038：

你好，想問1931同978 呢2隻股係咪唔ok.978放左好多年了，唉

啱啱去書局見到你本50值博倍升股。。。2018年著。咁係咪應該d股升曬了。。使唔使轉買50潛力優質股係咪update d

龔成老師：

華檢醫療（1931）業務波動，加上企業獨特性不強，整體的投資價值只是一般。

現時股價算是合理，但又未見有增長力。

招商局置地（0978）集團主要從事開發、銷售、租賃、投資及管理房地產，其實過往業務不過不失，不過增長力就唔強。

現價處合理區，不過這股收息較增長為佳，因此唔好對股價有太大期望。這股都有長線投資價值。

至於《50優質潛力股》，最新版是（2020年-2021年度）。

------------------------------------------------

Q20039：

老師 如供3067潛力係咪應該大過388
因388現價已經很高？

再請教3067現價已貼近52週最高 應該等回落至咩價位開始入貨呢？因銀行沒有月供此股

另收息股如想把939換成另一隻 請問有那些建議？

非常感謝你

龔成老師：

恆生科技ETF（3067）與港交所（0388）現價都略貴。

由於3067是一個組合，風險度會比港交所較低。如果銀行無得供，你自行分注去儲貨就得，例如每2個月入幾手手。

如果收息股想轉，可轉香港電訊（6823）或置富（0778）。

------------------------------------------------

Q20040：

成哥，想係度多謝你！我係大學上過一個personal finance嘅course，因此對財務自由、投資等已經有基本概念同認識。

不過由於只係短短一個sem個課程，而當中亦包括稅制等其他課題，令我對投資嘅認識非常有限，亦令我唔敢行出第一步，因為驚會蝕錢收場。

但自從上年認識咗你，睇完你百萬富翁系列之後，令我財務知識倍增，亦令我有信心同興趣開始投資同埋研究相關資訊。

依家小弟唔可以話自己好叻，但起碼因為成哥令我對呢一方面有正確、專業嘅知識，相信令我日後達成財務自由相當有幫助。多謝成哥！你日後嘅著作同埋課程，小弟一定會大力支持！

龔成老師：

太好了！

記住要保持知識增長，我深信，我地長遠的財富，一定同我地的財務知識，成正比！

加油！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19401-Q19420）

Q19401：

阿sir, 開始理解你的書話人生是可以創造的意思。我越來越睇會到，我會努力的！

龔成老師：

對，一般人安於現狀，認命，不認為自己能做大事，最後只會作為有限。

我2012年出版《80後百萬富翁》，當時身家$100萬，在書的最後我寫住「會同讀者一起在千萬富翁俱樂部相見」。其實這句說話，是同時寫給我自己睇的，因為當時我正以$1000萬為目標。

之後我不斷努力，到了近年，身家過千萬，將會出版《80後千萬富翁》，有好多野，我地相信自己就可以做到。

我從來唔信命運，我只相信自己，人生絕對可以憑努力創造！你都要加油！加油！

------------------------------------------------

Q19402：

成哥 好多謝你！令我唔洗五年就儲到一百萬！我知道其實唔多，但係第一次見到自己銀行有七位數字真係好感動

我睇過你好多書又上過你既股票班，你教既選股技巧固然受用，但我最佩服既係你既學習精神同埋對資產個種追求，真係非常多謝你！

令我到依家只相信價值投資，睇股票全部睇長線，眼光放遠左好多！

好多人同我講係香港唔好諗買樓，但我會學習你既思維，同自己講我一定會做到，只要肯堅持，我覺得總會成功

我都會再set目標比自己，希望黎緊既五年，資產可以滾存到三百萬以上！

龔成老師：

我自己當年擁有第一個$100萬！都好開心的！呢個係你知識與努力的成果！恭喜你！

第一個是最難，但有左第一個，第二、三個就會好快。

你保持進步！堅持目標，我等你在5年內同我講，你已經擁有$300萬！加油！

------------------------------------------------

Q19403：

龔sir，你好！只有3萬蚊可以投資，請問買咩股票比較好？ 小米可以嗎？

龔成老師︰

如果你係年輕人或中年人士，小米集團（1810）都可以。此股有質素，因為佢的產品的確受歡迎，同時處於增長狀態中。

此股係有佢潛力，前景都算正面，只是有較多不確定因素。

但現價計，已經處貴的水平。最好要回調2成進入合理區才分注入貨。或月供都得。或小小注。

由於你資金唔多，你可以簡單些，買入盈富（2800）。盈富基金（2800）其實背後有一藍子成份股作支持，當你買入盈富基金，佢就會係市場買入相對比例的52隻成份股。

此股現價合理，你可先入一注。到有較大回調，再入另一注，並長線持有。

------------------------------------------------

Q19404：

成哥，已經睇左你FB page成年，真係令我獲益良多，謝謝你！一直都無問過你問題，但今日真係忍唔住要問下，我本身想買隻1177，諗住6.5入一手先，但我最低只見到6.57

因未到價，所以都無入到，跟住今個禮拜突然爆升左成蚊，車尾燈都見唔到。

我之前都有類似惰況，跟緊隻1928同2382，隻1928 諗住到心水價26蚊先入

點知又係差幾亳就掉頭升哂上去。隻2382又係咁，set左110入，點知最低又係去到114就爆升返上去。

最後留意左咁多隻，一隻都買唔到，見財化水！想請教成哥你應該點解決呢個問題，係咪我心態出現問題？　希望成哥抽時間解答，謝謝！

龔成老師︰

你下次可以因應自己持貨情況，去調整策略。

如果你無貨，而隻股票又係好優質。其實好多時都唔會回得太多，如果無貨，就算同你個價差少少（只要都係合理區內），都可以入一注先。

之後，就等佢每回調1成左右，就再加注咁去儲貨。

因為投資係睇長線，其實買貴幾蚊和你長線潛在回報比，只係好少架錢，唔值得因為咁而失去增值機會。

或者，用月供模式，有可能更適合你。

------------------------------------------------

Q19405：

老師你好, 最近都在看你的文章, 覺得你人很好,也有很遠大的目光, 開始跟你學習.

我一直在留意6969跟6933 這2隻股票, 也買了,成本分別是44 跟43, 想問問可以長線嗎 ?

謝謝老師

龔成老師︰

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、ＲｅｙｎｏｌｄｓＡｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。只要佢唔係佔你組合太多，一直持有就可以。

新娛科控股（6933）主要係內地從事發行及開發手機遊戲，好似角色扮演遊戲（RPG）、模擬遊戲（SLG）和一些休閒遊戲。

此股上市不久，參考性數據唔多，估值較難。而業務本身不確定性較大，手機遊戲業是變化好大的行業，這種不確定性可以令企業好勁或好弱，你要明白這點。

這股都有投資價值，但不確定性較高，故不宜大注。

------------------------------------------------

Q19406：

成老師，我喺2017年睇咗您嘅網頁，激勵咗我中年轉工同埋供股，多謝您！而家人工跳升咗，生活改善咗，但大壓力

我今年52，成老師我希望可以在55後半退休，轉做半職工作。

現在持
012（3500股）10萬
066（1900股）8萬
939（6000股）3.5萬
1038（1000股）4.3萬
1212（4000股）2.5萬
1211 （500股）1萬

供緊
003 供$1000
012 $2000
027 $1500
066 $1500
175 $1000
1928 $1500
1038 $1000
2800 $4000 （2000幫哥哥供股）
自己供$11500

請教您：
1.1212：在2018時以$11.56 購入，當時睇中零售業前景，同時佢有地皮，覺得有潛力。而家擔心企業前景。

2. 012, 939, 1093: 購入時以投資穩陣嘅有增長嘅收息股心態。未來呢一類股票喺咪應該減少投資嘅百份比呢？

3. 由2018年10月開始供股，計劃供3年，同時學習投資知識。自己每月可儲17000，現在供款11500，是否需要減少供款，
令手上現金更多，以利於未來投資？

4. 我嘅供款組合，請問可以點整合更有利呢？

55後半退休，轉做半職工作。疫情前有意假日教playgroup, 而家就諗緊做網站... 喺半退休前做準備。

龔成老師︰

1） 利福國際（1212）這股有質素的，只是中短期疫情令佢較弱，佢可以守到，但你預中短期股價都會較一般，長遠仍是不差。

2） 恆基（0012）、長建（1038）和建行（0939）依然係有質素，前2者都有增長力，也適合你年紀。

但由於恆基（0012）佔你組合比重較高，個別企業最好保持15%以內，故此股不要加注了。

3） 現時大市在合理區，月供和儲蓄比例最好各佔一半。在你扣除月供恆基（0012）的$2000後，投資百分比就會無問題。

餘下資金，就等大跌市出現，就加大力度入貨。

4） 你現時組合都係平穏增長型，可助你先累積財富，係合適的。到你想進入半退休狀態前1年左右，開始慢慢將佢地部份換成"收息股"，透過股息去支援你半退休生活。

但你要留意一點，3年唔係一個長時間（一般5年以上會較理想），有機會會有波動，影響回報，你要明白這個風險。

------------------------------------------------

Q19407：

龔sir你好啊...有睇你本股票勝經同年報勝經，明白買公司個陣合適既價位入貨既重要性...

想請教下如果覺得個市貴冇野岩買住，你會買大市（index fund）定係留番啲現金彈藥？

有個迷思就係個市跌有機會重槌出擊執平貨所以要儲定彈藥出擊，但係齋擺係到又好似有time cost

會miss左中間增長機會...有少少唔知點

利申：錢唔多每個月有幾千一萬預左係投資儲備，謝謝

龔成老師︰

如果個市明顯係貴，咁我地大部份資產用現金持有，會較理想。但現時大市未算貴，只係在合理區，資金和股票比例最好各一半。

但如果個市一直貴，入唔倒貨，的確會有個成本係度。若你勉強入貨，其實係會影響左個長線回報（因為買入價高左）。長線計，只會得不償失。

所以，我地著眼點唔好放係短線成本，而係現長線咁睇，就會發現等機會才是正確。

------------------------------------------------

Q19408：

想請問一下，點樣可以做到無貨望住股價升，仍保持著平常心~~因爲我成日心情好囉囉，會怨自己之前又唔買~~！升左唔知買唔買好
會有挫敗感

好似宜家咁，我都落唔到手，會覺得:
下~前幾日6個幾唔買，宜家7個幾先黎買？
有種蝕左既感覺

龔成老師：

第一，少d睇股價，你要慢慢習慣唔睇股價，試下一星期唔睇先。

第二，你一定要明白，就算最強的基金經理，都無可能捉到低位，所以，你唔好產生一些不合理的假設，認為自己能在某個價買到。

第三，你要多花時間分析企業，試下買入股票前，用1、2小時做分析。當你用「買股票就是買企業」的角度投資時，你的著眼點就唔同。

第四，用策略投資，不是主觀。

例如用分注、月供等方法，而不是主觀去睇住個價。

------------------------------------------------

Q19409：

自從follow 丫sir 的貼和書後，對投資的認識多左，以前似賭的形式買股，人買我買，經常摸頂，所以虧吾少，而家偏向走長遠

雖然要長時間d,但踏實感高，而家都仲學緊調節心理，吾比個市上落帶動自己的情緒，希望未來三年可以將資金滾儲多一百萬，到時再決定買dream house.謝謝丫sir.

丫sir你都要有充足的休息，保重身體

龔成老師：

好呀！

你保持知識進步就得。

我地投資，不是賭博，而是有系統地進行，平衡風險，合理回報。要建立一個長期的組合。

------------------------------------------------

Q19410：

老師，假設組合中只有匯控一隻收息股，繼續持有獲得的只是股息，但能拿回全數本金的機會甚微。

如果賣出而轉換另一隻收息股，起碼有股息之餘，本金有機會會有增長，這樣想對嗎？

龔成老師：

其實要睇你轉到那一隻收息股，你轉去另一隻，不一定是有增長力的。而匯豐，可能有少少上升，但不是大升。

其實最重要是建立一個組合，每一股在你組合的%。

匯豐（0005）是收息股，佢增長力不強，將資金轉去另一隻收息股，可能都是這樣，但如果你本身想增長，就應該轉去增長類企業。

首先，你唔好比過往買入價影響，你思維上有「回全數本金的機會甚微」然後作出比較，是無意思。

你最重要分析組合之後的分配，以及收息與增長力。

因此，你要建立平衡組合，同時持有多隻股票都得。

------------------------------------------------

Q19411：

龔sir, 早排買左1177、1928、2382，唔知點解買左之後有種怪想法，就係成日都想個股價再跌多啲再入貨，明明我係想資產增值，我咁諗好似有啲奇怪

另外想問問你對1772既想法

龔成老師：

這樣想是正確的，我地用價值投資，是希望企業價值升，股價跌，我地就算有貨，也希望股價得，令我地可以買更多貨，因為最重要是企業價值向上，只要業務優質，我地從來不擔心。

這證明你已掌握了價值投資的概念，明白企業是財富，股價只是表面因素。

贛鋒鋰業（1772）是潛力股，但估值較難，其實這股在2020年3月時的進階班有推介過。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價貴，等佢回落先正或入，始終行業有一定的變化。

------------------------------------------------

Q19412：

剛上完老師課程，感覺自己增加了不少投資知識，謝謝老師。

盤點了一下自己的資產，計埋股票既市值382K，總資產只有875k，雖然同一百萬仲有唔少既距離，但諗返老師最後叮噣唔好放棄，即刻去溫書，希望可以搵多D水桶一返黎。

龔成老師：

加油！

永遠記住，你的知識與財富成正比，你現時已增加左知識，財富都會保持增長的！繼續努力！

------------------------------------------------

Q19413：

咁其實巴菲特果套係咪out左？

龔成老師：

我我1999年已經聽到有人話巴菲特out，因為當年科網股個但大賺，但佢一個無得睇。點知一年後，納指由5000點跌到1000點，之前炒科網股的人好多輸身家，巴菲特是極少數無事的。

我相信佢套方法仍是有效的。

------------------------------------------------

Q19414：

老師你好，早前同你講過有十多萬既現金流想投資用，但而家因為營運小生意中所以有部份錢用左來入貨，另一部分用來還之前的債務等等。

因為銀行早前有筆借貸我覺得幾低所以便借了來用。本身唔想再打算借錢因為之前就係信錯人借錢買股搞到total lose。

但今次銀行offer了每1萬就29元手續費(借了18萬分5年還每月本金連利息$3522, 每月利息支出為$522)。

有呢個決定係因為我已經睇晒你本財務自由行，好想利用呢個天使工具黎做投資增值。

先講講我既諗法，因為而家整個股票市場都係平貨，我自己亦會建立一個股票組合作持續增長及倍升股(1113, 1448, 00175)。

因為我認為呢三隻股背景同業務都係較為穩陣，特別係1113，呢隻亦係重點投放因為現處於平價位（早前亦於38元購買左)。

我唔想太過分散投資因為怕買錯所以想重點放係呢到風險較低，另外我會待金價回跌後會買入一部份金條，睇過呢幾年最低位大概係1100~1200蚊左右所以我估計如去到1300蚊我會慢慢入手。

我早前目標係還清債務後仲可以有40萬現金，但可惜我而家現金流係極低（原先既十多萬已變為生意貨品，及還債用）。

所以好想老師幫手分析因為我實在唔想再浪費太多時間，老師睇返我過往問你既野你應該會記得我係咩事，時間緊迫我亦希望老師可以優先回覆我，多謝你！我會繼續購買你既書不斷學習

龔成老師：

《財務自由行》的確有講，借貸是重要的工具，但你同時會見到書中講左一項好重要的事項，就是你本身要有一定的投資實力，先可以用。

如果你投資經驗少過5年，過往的回報並不是贏多輸少，就不能進行借貸投資。

所以，我會建議你用翻最基本的方法，儲蓄，投資，保持財富增長。

你要盡力想方法去增加收入，提高你的本金。至於上述的幾隻股，正面的，不過未到平的區域。

------------------------------------------------

Q19415：

啊sir 你好，雖然暫時未學如何選擇股票，但以學生愚見，聽說最近電子遊戲行業有很大發展，而我預期在疫情之下會有持續業績？

不知老師怎麼看這行業（出售遊戲機和電子遊戲）以及其相關股份？

龔成老師：

這行業的範圍機好大，有從事手機遊戲的，有與電競相關的。

例如雷蛇（1337）就是從事電競的，佢有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

如果你的投資實力未必高，要注意這股一定不能大注，同時這類股對你來說較高風險。

------------------------------------------------

Q19416：

龔sir現在點樣睇144 招商局港口？

我睇左佢十年業績
見到佢十年經常性盈利都無增長

但每股經常性盈利由十年前2.幾跌到上年1.2左右
依幾年全靠賣資產托起個利潤同派息
系佢依家甘高負債下，派息比率4-5成
就算疫情過去都只能派0.5-0.6

系政策影響下，已降費兩次，十年來每股利潤減半，而且大幅跑輸通脹。好似無長期持有價值

而且一帶一路，15年至今投資左甘多錢，但利潤都無增長過，可見系為左完成中國任務，多於希望帶給投資者回報。

龔成老師：

招商局港口（0144），本身都算是有質素，不過，近年有關貿易的行業，賺錢能力低左，同埋風險大左。

先講佢的基本面，佢係中國最大，世界領先的港口開發、投資和營運商，係中國沿海主要樞紐港建立了完善的港口網，並成功布局南亞、非洲、歐洲及地中海等地區。

佢有龐大的港口業務，於中國處領先地位，絕對有其優勢。不過，貿易因素受全球及中國經濟情況影響，將令業務出現略波動情況。

另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。

過往股價一般般，長遠來說將平穩，股息則十分穩定，但增長有限，現價有投資價值，但貿易問題對佢股價有波動。

如投資作收息股，可以，但就唔好對股價有太大期望。

我相信經濟好轉會對佢利好，不過，整體增長力始終不能太大期望。

------------------------------------------------

Q19417：

老師，想請問一下現時我持有以下數隻股票是否值得長線持有?

樂享互動(6988) 4000股@2.82
永勝醫療(1612) 8000股@1.56
日清食品(1475) 4000股@6.69
恒大物業(6666) 2000股@8.7

另外想請問一下以下股票現價值博嗎?
中國光大綠色環保(1257)
中國軟件國際(354)
平安好醫生(1833)

龔成老師：

樂享互動（6988），不過不失，增長力有少少，但就唔平，小注持有可以。

永勝醫療（1612） 業務為製造各種醫療產品，主要包括呼吸產品、造影劑壓力注射器一次性產品以及骨科支護具康復器具。

佢過往幾年收入都好波動，加上賺錢能力唔算太強，質素一般。

雖然佢盈利有增長，但股價都上升了不少，現價都有少少貴，這刻投資都有所保留。如果你有貨不太多，就無問題。

日清食品（1475）有質素，可長線。

恒大物業（6666）有質素，可長線。

至於另外3隻股，都有質素的，中國光大綠色環保（1257）要耐心持有才有回報。中國軟件國際（0354）都可考慮，不過不宜太大注。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，初步分析，$100以上是貴的價位，$100以下開始為合理區頂。現價算是合理區中上部。

------------------------------------------------

Q19418：

Hi 龔Sir, 今年28歲，現時手持股票總額大約10萬多少少，組合如下：

#1928 x800股 @ $34.35
#9988 x100股 @ $259
#3718 x8,000股 @ $2.4
#548 x2,000股 @ $8.03
#939 x2,000股 @ $6.07
#6060 x200股 @ $43.75

現時正職月入3萬，副業不穩定但平均每月都有3-4千，扣除交租同生活費用會每月有5000-7000 saving，過去儲咗現金10萬

有見而加個市好唔穩定，呢10萬應該揸住等大跌入市，定係分注放落去穩定收息好，我嘅目標係想用呢筆錢2-3年前增值到一半或以上。

另外都想問龔Sir，我計過數去銀行做一筆10幾萬、24個月個人貸款，每月還款同我月儲都差唔多，係你嘅角度有冇咩需要注意或者高風險嘅地方？麻煩晒龔Sir！

龔成老師：

你唔好理「而加個市好唔穩定」，我地投資，最重要是建立一個平衡，長遠優質的組合，你最重要是分析企業，業務理想有前景，之後長線持有就得。

你上述都是有質素的股票，不過，未必完全適合你28歲的年齡。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你部分股姐建行（0939）、深圳高速公路股份（0548）只是收息股，未必最適合你。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

至於銀行借貸，原理如同預先得到資金，如果現時大市好平，好多機會，都可考慮，但現時的市況，根本唔值得這樣做。

同時，借貸投資始終是有風險的行為，如果你投資經驗少過5年，過往的回報並不是贏多輸少，就不能進行借貸投資。

所以，我會建議你用翻最基本的方法，儲蓄，投資，保持財富增長。

------------------------------------------------

Q19419：

你好成哥，想請教一下你

32歲 月入$33K, 現金只有一萬蚊，股票20萬，黎緊每月可儲$18K，而家原本每個月儲$10K月供股票

1.來緊2021年6月，要比20萬首期，黎緊呢半年係咪唔應該再月供股票(即使係2800 或者收息股)？ 全儲18K現金？

2. 如果比完首期再兩年之後要儲40萬裝修，請問你意見係咪應該儲$8000現金？$10000月供股票（但就買2800+收息股）？想請教你意見點做比較好呀
唔該晒成哥

龔成老師：

1）如果你要比首期，其實要開始儲足夠的現金，若果這刻現金數目仍未足夠，你最好停月供，儲下現金先。加上買樓按揭有好多不確定性，你應該留多D現金先，等買完樓後，之後先啟動翻累積財富過程。

2）完成買樓後，你可以用這方法，部分儲現金，部分投資中低風險的股票，保持財富增長。這方向無問題。

反而最重要是你完成左首期部分先。

------------------------------------------------

Q19420：

老師，想問一下，我看完年報勝經，認真看過大公司如騰訊阿里巴巴的年報（幾百頁個種，唔係大行網站分析晒個種）

內容很多數字很複雜，感覺仲係唔識拆解年報，如果上完初級班會識拆解一堆數字嗎，但又擔心初級班有好多我已係書睇識既野

龔成老師：

股票初班就是教你點樣重點分析企業，可能你已經有某些基礎知識，但你唔知點樣找重點，唔知點樣去分析。

都幾肯定同你講，初班對你會有用，雖然部分野你可能聽過，但你上完一定會實力提升，你會掌握「運用」的方法。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。