冇寫新嘢，又Po舊嘢～
————————————
【你的鼻環是如此的難以忘記～】

兩個問題：1.梁朝偉唱歌好唔好聽？2.梁朝偉戴鼻環好唔好睇？

1.瀟瀟灑灑的給我瀟灑的相機——吓？相機？相機點瀟灑法？
2.Oh I’m so sorry，不是「相機」是「上機」。這一句來自梁朝偉名曲《一生一心》。
3.唔知點解地，梁朝偉唱歌總是令我感到怪怪哋。像他第一首名曲《朦朧夜雨裡》，每逢唱Live，硬係覺得他入慢了半拍或四分一拍——總之就慢咗啲啦，但聽得多，又覺得，入慢咗又點啫？好大問題咩？冇計，因為唱的是偉仔。我自細就鍾意偉仔——全因《新紮師兄》的杰仔。我不知怎樣形容當年《新紮師兄》給我的震撼，而我萬料不到，梁朝偉唱歌給我的震撼，竟然是《新紮師兄》的十二萬倍。
4.嗱嗱嗱我唔似其他人咁，覺得梁朝偉唱歌難聽，我只是覺得怪，一種好難形容的怪，一種愈聽下去會慢慢習慣甚至迷上的怪。
5.怎樣才算唱歌好聽？曾幾何時，有人把喉核好似有靈性咁識得郁上郁落，視為唱歌好聽的附帶表象；也有人認為，唱歌稱得上好聽的歌手，就是無論聽錄音帶 / 黑膠 / CD抑或現場，佢把聲都要一樣。以上，一概被統稱為唱功。
6.那麼梁朝偉肯定冇乜唱功。我好似從未見過他唱歌時喉核會生性地郁上郁落。而聽他唱現場，又同錄音室版本唔多同（例如唱《朦朧夜雨裡》硬係好似入慢咗）。
7.離奇是他在上世紀90年代出過多張專輯。不計1993年的粵語精選《難以忘記的你》，同年就先有張國語大碟《一天一點愛戀》（係呀，一個被認為唱廣東歌都唱不好的人竟然挑戰國語歌）；跟住，1994年，《重慶森林》上映那一年，直情出夠三隻你歎，《一生一心》、《為情所困》、《日與夜》（《一生一心》是EP）。而自小就鍾意偉仔的我，自然三隻買晒！尤其愛《一生一心》和《為情所困》——歌暫且不說，單是封套已經無可抗拒！《一生一心》上的朝偉大頭，幾執頭髮在有點偏色的情況下，有意無意間垂在他雙眼之間，心心眼！《為情所困》，不玩大頭，玩一格格電影菲林，格內除了他，還有周嘉玲——兩位就像在重演《重慶》中的激情，心心心心眼！我可以好大膽咁講：即使以今時今日目光去看，這兩個封套依然經典，依然贏晒市面上九成廣東專輯封套（嗰九成簡直完全喪失美學觀念的核突嘔心示範）。
8.咁，啲歌呢？Well，歌曲本身，其實都是很典型的中慢板情歌套路，但全仗朝偉的深情和深情及深情，每一首，都被Add了無盡的深情Value，明明再直白再冇嘢的一句歌詞，由他去唱，定必化成情深的一句：《為情所困》的「這一生為情所困 / 只為當初妳的心太真」（你睇，強如朝偉都會為情所困！）；《一天一點愛戀》的「一天一點愛戀 / 一夜一點思念 / 給我一句真的誓言 / 讓我可以期待永遠」——把聲已夠深情，睇埋個MV，全程就咁影住朝偉獨坐木凳，Keep住把不羈的髮Fing來Fing去，有時又含吓條頸鏈……最後，望住你，甜笑，完。連性好AV的我也被打動。
9.要唱Live時，朝偉就以一身當年的我難以名狀的時裝風格示人（後來才知道源自Grunge），而最最最最最最最最最最最最勁的是：他．戴．鼻．環。今天回看，你或者會笑，但在當年，是多麼的出類拔萃驚世駭俗——連四大天王都冇個敢戴。可以說，90年代的朝偉以歌聲和衣著（別忘記他還有著裙！），創造了一個只有他自己才Carry到Handle到的歌手形象。前無古人，也應該後無來者。
10.回到一開頭兩個問題。1.好聽。好聽不基於喉核識唔識郁呢啲門面嘢，而在於看不見的感情，我們是聽人唱歌而不是聽Machine唱歌。2.好睇——肯定比你同我以及大部分男歌手戴得好睇。

（戴鼻環相在留言。）

【容祖兒新歌首次執導MV】容祖兒出道廿二周年，趁着這個別具意義的紀念日，祖兒乘勢推出全新廣東作品《不配》。

《不配》MV：https://youtu.be/vmcSiA1ZOQk
《不配》MV 製作花絮：https://youtu.be/KfomUrSXE-s

歌曲紀錄祖兒成長的真實情感，詮釋了一段感情從淺到深，再到分道揚鑣的無奈至釋懷的抽絲剝繭。為了完整和深刻的表達旋律優美的「不配」，這次祖兒更首次親自操刀執導MV，「一切都係嚟自我對呢首歌嘅感情，我好喜歡呢首歌嗰種無奈同埋成長嘅智慧，所以我喺度諗，要搵一個好明白我對呢首歌嘅感情嘅人，其實都比較難，與其係咁，不如我自己做番導演，去令到呢首歌有一個喺我腦海裏面嘅影象出嚟。」

雖說是「處女」執導，不過原來她首次「執導」是二十年前，更找來吳彥祖任男主角，「啱啱有歌迷俾我睇，嗰陣時參加商台活動，拍咗一首叫《何苦》嘅歌，不過係比較玩票形式，今次係認真嘅一次。與其話執導，不如話我用多個身份將呢首歌想表達嘅情緒完整咁呈現出嚟，令聽眾、樂迷更加明白我想唱啲乜嘢。」首次擔任導演，為了令過程更加流暢，祖兒選擇男女主角以現代舞的方式去完成這一次關於遺憾之美的表達，「全部都好優美，因為每個動作其實都係根據番歌詞的起承轉合，同埋嗰種好努力但最後都無奈要放低，嗰個感情我都覺得好動人。」

而為了讓故事意境的藝術美感能提升到另一個緯度，MV採用LED環幕拍攝，建造出一個寒冷凜冽的極地世界，「氣氛上係令到我覺得好震撼！喺一個極寒、極嚴峻嘅環境裏面，兩個人靠住對方的體溫互相取暖、去俾大家嘅愛，呢一份感覺我覺得好配合呢首歌。大家都曾經好努力去令到呢一份感情行落去，但就係因為大家努力過，所以更加唔捨得。」

問到歌曲是否自己的親身經歷，祖兒表示「你話冇經歷過都好難說服到自己」，「我相信一百個人聽呢首歌都有一百種對號入座的方法。愛情更多嘅唔係同唔同到對方行到去最後，其實係令對方成長，更加清楚自己係一個需要啲乜嘢嘅人。雖然唔能夠一齊，但係可以互相祝福，希望大家仍然活得快樂，我覺得係一個成熟嘅相處。」

入行廿二年，祖兒亦感觸甚深，「其實要堅持二十二年真係一件唔容易嘅事，喺呢二十二年入面繼續遵守自己諾言、繼續成長，好多謝身邊每一個去幫助我嘅人、我嘅歌迷、我屋企人。所以我成日都會覺得用自己嘅作品去代替自己想講嘅所有說話，希望將來每一日都可以比之前每一日進步，繼續做好啲自己，希望鍾意聽我唱歌嘅人仍然聽到我好用心演繹每一首歌。」

#容祖兒 #不配
#香港製造 #MadeInHongKong #香港人撐香港音樂
#2021新歌 #新歌 #廣東歌 #2021廣東歌
----------------------------------------------
👍🏻 Facebook：https://bit.ly/2HZAgDL
♥️ IG：https://bit.ly/34PhuYx
⭕ YouTube：http://www.youtube.com/c/谷Live
🏆 谷撐音樂流行榜：https://bit.ly/3q6yB0l

Posted @withregram • @stupidmusichk

[ 論盡樂評：9.5/10 ] J.Arie《判官之印》
MV: https://www.youtube.com/watch?v=WDD72nyOSrA
.
SMART review: 豁到盡處了？
.
今年到目前為止，最驚喜、最驚嚇 (我真係被個 MV 嚇親)、最意外嘅派台歌，應該都係呢首。
.
好多時一個歌手做咗一首精彩嘅作品，我嘅分數都會先放響九分。一來，留個空間比以後嘅作品，因為我嘅分數係歌手同自己過去作品比較嘅分數，所以萬一以後有更精彩作品，但上一首又已經去到滿分，咁下一首點算呢？唔通個分數冇上限咁提高咩？但今次實在冇辦法唔俾到 9.5 分甚至我覺得比 10 分都不為過，因為呢首歌實在太有驚喜以及意外，精彩到我都唔知應該點樣讚，或者從邊一度開始讚。
.
一首歌要融合唔同曲風，當然諗吓都知道唔簡單。但要有唔同曲風之時，歌詞之間要轉變而又要 make sense 其實更加難，以往鍾舒漫鍾舒褀有《SS14》，已經係一個相當唔錯嘅示範，尤其係 Remix 版本。但我覺得 J.Arie 今次呢一首《判官之印》，實在有過之而無不及，甚至呢個 project 由第一首《雙面哈菲》，經過《陰陽道具》去到今次呢首，係一次比一次俾到更大驚喜我。
.
可能你會覺得，驚喜係來自於歌曲題材上嘅直接，但我覺得係整個 project 入面，每一個參與嘅音樂人，都落力地突破香港樂壇現有界限，尤其響主流之上，好多想探討嘅話題，大家都唔夠膽寫得過於直接，又或者曲風想玩又未夠膽玩得太過盡，變咗雖然有創新，同時又感覺到有掣肘。J.Arie 今次完全無視呢啲事情，我諗都算係豁出去兼豁到盡處一樣，要憤怒佢搵 BennyKing 用 screaming 去加強效果；要白癡可以將歌詞寫到最淺白甚至配上唔啱音嘅和音去表達；要甜又可以跳躍，好似少女歌曲一樣；仲有一開始自大得神聖不可侵犯嘅 opening 等等，總之毫無保留地將每一種情感都表現到100%，再將咁多種情感集合，先可以真正表達到分裂嘅感覺。
.
如果你問我，呢一隻歌有咩要彈，或者有乜嘢地方需要改進。Sorry，我真係諗唔到，或者響部分人心中，呢首歌唔係完美嘅歌曲，但呢一刻我認為，呢首歌冇咩要去挑剔，尤其從佢嘅題材出發點，去考慮創作原因以及聽完製成品之後，除咗佩服呢一首歌所有製作單位外，我都唔知應該仲可以講啲咩，唯有講一句，呢首就玩到咁盡，下首仲可以點玩呢？一句講晒：非常期待。
.
.
《判官之印》主唱：J.Arie @jarielui feat. BennyKing @bennykingscream
作曲：雷深如 J.Arie
填詞：梁栢堅 @leungpakkin
編曲：Perry Lau @_perrylau / 留香瓊 @lauheungking
監製：Perry Lau / 雷深如 J.Arie
.
#JArie #雷深如 #判官之印 #梁栢堅 #PerryLau #留香瓊 #派台歌 #新歌 #廣東歌 #SMARTreview #論盡樂評

影片來源：fb.com/suppermoment/posts/337738987711105

文字來自瓊姐娛樂台：Supper Moment 今年成軍 15 週年，準備開演唱會紀念。近幾年佢地聲勢大不如前，一直受網民批評，佢地就決定拍片反擊，更激動爆粗，回應網民各樣指控。

指控一：上開心大綜藝做小丑
佢地早前上 TVB 開心大綜藝，同修哥合唱《舊歡如夢》等老餅歌，被網民形容為「淪落到做馬騮戲」「慘不忍睹」。佢地喺片段入面食住飯回應：「真係好嬲，可惡呀！點解要話修哥！要話我地！」Sunny 同阿雞就串爆回應：「食飯啦，有飯好食喇！啲飯仲暖，定人情冷暖呀？」鼓手阿達就話：「呢啲唔係電視啲飯（指拍劇道具飯）」阿雞就回應：「邊個電視台？咩電視台我都上！」

指控二：潛水
有網民指佢地近年默不作聲，佢地喺片入面就解釋呢兩年嚟都做緊音樂，唔明點解俾人話潛水，亦指樂隊好蠢：「唔識喺 social media 經營自己形象。」成員 CK 就話：「明就明。」佢話花咗好多時間做嘅新碟，最後俾網民「話 X 你新碟唔 X 貼社會議題」，主音 Sunny 亦和應，話佢地都有自由想做自己鍾意嘅音樂，而阿達更指樂評同社評應該分開，而 CK 就覺得網民期望佢地唱「嗰啲嘢」、「你無唱佢想聽嘅嘢，佢就可以隨意 X X 你。」

指控三：違背初心
Supper 嘅成名作《無盡》入面嘅熱血歌詞經常被人引用，不過佢地近年就被網民指對唔住《無盡》呢首歌，被標籤為「搖滾叛徒」，佢地就狀似輕鬆地回應：「搖滾精神係咩？係反叛？係一定要反一啲制度？咁鬧我地『搖滾叛徒』都係另一種稱讚！」Sunny 就自說自笑，話：「連搖滾都背叛埋，咁真係無人夠我地搖滾！哈哈哈！」

指控四：搵人仔
曾有網民指控佢地 2019 年北上搵人仔，佢地四個就反擊，話好耐以前演唱會一樣有內地巡演，唔係今時今日事：「當年大家又冇唔高興？」佢地亦解釋 2019 年有去加拿大、日本、西班牙、美國等地，CK 就話：「啲人而家話我地剩係搵人仔呀！我都想搵港紙呀，加紙、美金、日圓都想搵！」Sunny 就覺得大家可能忘記咗做音樂要錢：「無錢點錄音？」

佢地更講到有人鬧埋佢地已故經理人 Gary，四子好大反應，話做人要有同理心，唔好鬧埋佢：「我地對唔對得住 Gary，好多事我地自己知，唔需要話俾人聽。」

本地Christian Hip Hop 耶膠系列 2021年全新作品《基督教明星老海鮮坊》，延續批判風格，今集來談談老海鮮現象 (??Old Sea Food Phenomenon)

無論親身經歷、聽故仔、睇新聞，大家都見過基督徒群體也有不少一成不變、離地脫節、安於留在comfort zone的人。親眼見證過有唔少人希望推動教會、各種組織改變，而當中失望、死心的例子屢見不鮮~

Just let the song speaks for itself.
Share if you like it.

（Typo: 應該係標"楷"體, sor :P)

Other Songs from 耶膠系列:
https://youtube.com/playlist?list=PLX24hlXlmFZ8ygFcwxquKPfMKOME1lH2w

FB: http://www.facebook.com/passionmusichk
Ig: http://www.Instagram.com/eddie_sir

曲/詞/編: 何振賢
影像製作: 何振賢

歌詞:
*點解你哋可以仲係用緊 標楷體
可能買隻新既字體會有 少少貴
穩中求變循序漸進呢句 少少廢
教會人數已經直插跌落谷#

Seafood~ o
Seafood~ i like it
Seafood~ old
Seafood~ I love it

歡迎光臨明星老海鮮坊
我哋將會一站式闡述唔理想嘅情況
帶定頭盔宣告耶穌永遠為王
唔好讓昔日嘅熱情冷淡 使命遺忘

教會本來唔係一間中古博物館
敬拜上帝嘅地方唔一定鬼咁悶
可能你哋嘅性格有時係太樂觀
唔介意人數 每年少左一半

習慣咗做開嘅嘢 每年都重複嘅嘢
無意去改變一些 批評嘅全部借咩
敷衍話我明白嘅 意見係會接受嘅
態度會係照舊啫 揸住㗎名貴房車

佢話嘅 呢啲係叫做傳統
依家啲後生一輩知唔知 乜野叫莊重
講開傳統 改革其實係基督教嘅傳統
我服侍嘅唔係你係外面尚未得救嘅群眾

Repeat *

@點解由你決定我地可以 唱啲乜
Tempo 70加鋼琴個mood係太憂鬱
大是大非既面前你表現 太縮骨
順服權威係咪先至合乎道徳@

Verse 2
教會唔係一間depressing嘅 診所
俾啲新意生氣唔係一種 罪過
白色光管加上八十年代 新歌
一成不變是否需要相傳 薪火

你要與世隔絕 (無人阻你)
你要叫人入來 (無人理你)
你要我去跟你 (好難睬你)
何不嘗試放權 (俾人打理)

Eh 你要接受時代變遷
Eh 今時已經非同舊年
Eh 經驗唔係通書字典
Yeah 讓新世代帶動改變

Repeat # @

聽講有人話要放棄而家嘅年青人
Sorry 我跟唔到係來自邊段經文
諗起聖經收左一千兩既僕人
長年恃老賣老如何廣傳福音

#HKchristianhiphop
#耶膠系列

陳柏宇（Jason）與Serrini兩位歌路截然不同的歌手，於早前首度合作，拍攝Serrini作品〈網絡安全隱患〉合唱版。二人興之所致，打算日後若有機會再度合作，就想一同灌錄兒歌。

Jason近期走有型感性情歌路線，Serrini的曲風則調皮搞鬼，估不到首度合作，二人已拍出超級默契，Jason大讚今次合作好玩，更說：「一齊合作，要做就做啲好唔同嘅嘢，〈網絡安全隱患〉呢首歌唔似一般ballad曲式，只能做到好簡潔或者好華麗，唱返差不多嘅版本。」Serrini也大表認同，並表示：「如果唱ballad，我哋就要跳舞㗎喇！」Jason也即時附和點頭，說：「或者拍個有愛情故事元素嘅MV。」

經過這次合作，Serrini發現Jason原來是冷面笑匠，她笑說：「鏡頭前佢好老正好專業，鏡頭後其實係佢自己建議要一本正經去演繹呢首歌，哈！」過去曾自封「indie界一姐」的Serrini，更即興想到二人可組成組合「茵宇のSing」，日後再次合作，更可一起創作兒歌，送給Jason的女兒Abigail。Jason聽罷Serrini的提議，即說愛女最愛跳舞及愛跟歌詞內容做動作，Serrini即認真道：「例如：記住急就要去廁所？」Jason想不到Serrini竟這麼有諗頭，也不禁大讚「Very Nice」！

遇上這麼有趣的Serrini，Jason也忽發奇想，假如女兒會如Serrini一樣這麼多鬼主意就很好，他解釋道：「創意係冇得學，所以天生有係好事。我個女已經好有創意，尤其是要求你俾嘢佢時，佢嘅創意係會無限發揮。」


特別鳴謝：MOOV


立即到各大數碼平台收聽：https://sonymusichk.lnk.to/CyberRiskAY

Follow 陳柏宇 Jason Chan
▶ IG: https://www.instagram.com/ckw720/
▶ Facebook: https://www.facebook.com/JasonChanPakYuOfficial
▶ MeWe: https://mewe.com/p/jasonchan

⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆

〈網絡安全隱患〉
曲：Serrini / Yeung Tung
詞：Serrini
編：Frankie Yip
監：Edward Chan
唱：Serrini, Jason Chan


Jason：餘情無謂再講 講多有更尷尬的對望
誰是對 誰是錯 定還是對仍是錯 通通都不講

Serrini： 人人投入說謊 編一個更諷刺的盼望
迷惑你 迷惑我 定迷惑眾人是我 今天不想講

合：Ooo......ah~~
一雙手 來驗證我
一親嘴 全力攻破
Serrini：扭轉惡劣命運 不妒忌恨 咬著疑問 請抱緊
Jason：請抱緊壓迫裡的你的我的網絡緣分
合：假天真 回味上癮
一手撕開 全部封印
Serrini：一吻你就達陣 不用遺憾 繼續行近 我就會
令你令你令你令你令你令你 感覺很安全

Jason：仍然期待曙光 等一個有勇氣的碰撞
合：期待對 期待錯 定期待有人道破 今天不想講

合：一雙手 來驗證我
一親嘴 全力攻破
Serrini：扭轉惡劣命運 不妒忌恨 咬著疑問 請抱緊
Jason：請抱緊壓迫裡的你的我的網絡緣分
Serrini：假天真 回味上癮
合：一手撕開 全部封印
Serrini：一吻你就達陣 不用遺憾 繼續行近 我就會
令你令你令你令你 感覺很安全

合：Ooo......ah~~
親手 來驗證我
點起火 餘燼的錯
今晚我做獵物 歡度末日 繼續淪陷
Serrini：請抱緊
Jason：請抱緊壓迫裡的你的我的網絡緣分）
合：等一等 提煉亢奮
Serrini：虛假開心 仍是興奮
一吻煽動末日 激動投入 數字迷陣 我就會
令你令你令你令你
合：感覺很

⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆⋆

All Instruments by Frankie Yip
except Guitar by Ariel Lai

Protools Edited by Edward Chan / Bertha Ngai / King Kong
Recorded by Edward Chan / Bertha Ngai@nova
Mixed by King Kong


#陳柏宇 #JasonChan #Serrini #網絡安全隱患 #CyberRisk #SonyMusicHK