【我依家先至睇《教父》、《教父續集》】

#晞Netflix記事

說來慚愧，作為一個影迷，我從來冇睇過呢兩套影史經典，唔差在講埋imdb影史第一最佳嘅《刺激1995》... 我指《月黑高飛》我都未睇過，等緊經典重映，終於用咗兩日，睇咗加埋六個半鐘嘅兩套經典。

好老實講，以今時今日嘅節奏，呢兩套作品絕對係慢，都相信習慣節奏快嘅觀眾甚至片商，都幾難接受到有套戲長達三個半鐘，仲要齋講咁拍落去，但你靜靜地喺Netflix度睇，又唔係想像中咁慢（《愛爾蘭人》我就真係麻麻），尤其第一集真係好有戲味。唔難睇出，後期有好多同類電影學緊佢，但地位同icon都幾難超越，尤其Marlon Brando個look久仰大名，終於一睹風彩，嘆為觀止。仲有個你想像唔到後生曾經咁靚仔嘅Al Pacino，官仔骨骨由個公子哥兒做到黑幫大佬，點會想像到佢老咗竟然崩壞去演《Jack n Jill》。

人在江湖身不由己，上一代係盜亦有盜，下一代為咗喺更艱難社會生存，都要不擇手段，最親嘅人都可以犧牲，心狠手辣先可以鞏固到地位。好多人更鍾意《教父續集》，個人覺得長咗少少同講得太白，但無可否認兩個時空、兩種性格對照，咁樣拍法都好好睇。故事又處處呼應返第一集，寫個黑幫家族興衰史，唔係近年為個「IP」，拎個名拍套同第一集關係不大故事，堅係認真度過，好多場面同小動作都好有心思，成為經典絕非浪得虛名。珠玉在前，我都係鍾意第一集多啲。

除咗Al Pacino，仲有個Robert De Niro，你同樣想像唔到幾十年後佢會崩壙演個「打飛機咸濕爺爺」，但睇住佢唔駛用CG執（《愛爾蘭人》CG硬係覺得執到有少少怪），曾經原來都幾俊朗，成件事好難以想像。

據聞《教父第三集》唔掂？抖抖遲啲再睇。

《愛爾蘭人》觀後感可看留言連結。

【‼️留意‼️】
「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie

📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei

🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu

【IG請follow】www.instagram.com/travelerwithmovie