【龔成問答信箱】（Q21421-Q21440）

Q21421：

龔sir上完你個堂，我分析左152呢間公司，因為阿Sir有推薦過548收息，而152又係548嘅母公司，我睇過佢係業務覺得佢嘅增長能力應該好過548，

所以想考慮用作收息及有所增長。現在有幾個問題唔清楚，想請阿sir解答：

1 佢2020年嘅流動負債得大增一倍幾是否係收購蘇寧易購引致呢，對佢本身有咩影響呢？

2 這股近幾年都派特別息，是否會對往後派息不穩定呢？

3 我搵左佢近5年平均市盈率係7.6-10.4，以佢最新一年嘅盈利1.1嚟剩返，得出嚟嘅估值大概係$8.4至$11.4，是否太低？阿Sir認為合理價係幾多？點計算呢？

唔好意思新手上路要勞煩阿Sir幫幫手

龔成老師︰

先講深圳國際（0152），此股係有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

過往業務穩定，生意與盈利都不差，不過就不是高增長類。這股都有長線投資的價值。現價合理，投資收息可以。

1) 此變動與收購蘇寧無關，只要你留意資產負債表，你會發現變動，主要係來自"貨款"部份。

當你再仔細睇附註25，你就會發現，其實係一些"中期票據和債券"到期日，由以往多於1年(計入非流動負債)，變成1年之內(計入流動負債)，因此流動負債才會大增。

以集團現時財務狀況，負債問題不算大。

2) 由於近年特別派息，主要來自土地轉讓的收入，這些收入都是一次性。因此，有機會往後特別派息會有波動。

3) 我地係計算合理市盈率時，會用過去10年數據，抽取中間4個市盈率7.6 - 9.6倍，作為參考。但在採用前，你先要分析，這個4個中位數，是否可以合理反映其價值。

我地睇翻過去10年的市盈率圖表，你會發現自2018年起，整體數字出現明顯回落。

因此，我地就要先去了解當中原因，點解有這樣的變化。只要你仔細留意過去幾年年報，你會發現集團近年特別派息原因，主要係來自轉讓公路資產。

集團本身收入，主要來自公路收費。而公路，自然係集團的重要資產。當這些重要資產減少，市場會預期佢賺錢能力弱左，故近年給予的市盈率估值，都會較再早幾年為弱。

因此，我地計算合理市盈率時，要作出相應調整，大約係6-8倍會較合理。再以過去5年，平均每股盈餘HKD1.846計算。

合理價值︰約為HKD11.0 - 14.7。

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。預佢現時估值合理中間至中下。

------------------------------------------------

Q21422：

Hello成哥，上完股票班真係學到好多嘢，令我更有信心選股同埋計算估值。我最記得一上堂時你叫我地分清楚urgent同埋important，我相信上堂學終身受用嘅知識一定係最important

龔成老師：

我地一定要分清「urgent」、「important」。

香港人太多趕急的事，以至一直都唔做重要的事，所以我先第一堂同大家講，課堂好重要，比你用一世的，我見個有部分同學好認真，佢地會為左唔遲到上堂，而要求公司早走。

我見過有同學為左做最後的大功課，請左公司半日假。

如果你之後的決定，都明白「urgent」、「important」，集中處理「important」，你往後會好成功。

------------------------------------------------

Q21423：

龔Sir 你好, 想請教你一個問題, 如果有一隻股票, 股價年頭7元, 入左2000股, 年尾8元, 另每股派息0.472, 咁回報係咪21%？ 見下計法：

原本： 7元 x 2000 = 14,000
一年後： (8元 x 2000) + (0.472 x 2000)
= 16000 + 944 = 16944元
回報： （16944 - 14000）/14000 = 21%

*以上所指係置富房託
如果回報有21%, 咁又唔錯喎
謝謝！

我指如果我無理解錯回報有21% , 收息股黎講好好, 對嗎？ （雖然只有2手）

龔成老師：

對，你計算正確。

以房託及收息股來說，這個回報是高回報，其中一個原因是你買入時，當時房託受疫情因素影響而向下，所以能以一個不差的價位買入。

長遠來說，房託較難每年有這個回報，你預是收息及基本增長。這股可長線，你的投資不差。

------------------------------------------------

Q21424：

成哥，你好啊朋友最近誤入佐以下股票

8083中贊@3.9×8000
3833新彊鑫礦@2.13×20000
235 中策@0.2575x150000
3321 偉鴻@5.2×15000
1357 美圖@2.94×3000
[email protected]×200000
[email protected]×50000

請問應否繼續持有？如重新規劃組合現時有咩可以選擇，謝謝成哥無私既分享

235係0.2575至岩，希望成哥能卑d意思，幫幫我朋友可以重整組合，謝謝

龔成老師：

坦白講，持股大多無質素或只是熱炒類，部分就有少少質素。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國有贊（8083）不是劣質，但不建議持有太多。
新疆新鑫礦業（3833）屬風險類股，不能持有太多。
偉鴻（3321）無質素，宜賣出。

中策集團（0235）質素唔太好。

佢主要從事投資證券、金屬礦物及產品及電子組件貿易、放債及證券經紀業務。

睇翻過往的業務情況，非常波動，生意上落大，有時大賺有時大蝕，風險高。加上企業規模不大，投資價值不高。

這股股價有時會大升，但可能只是中短期業務與消息，長遠未必一定利好。

美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

結好控股（0064）質素一般般，不宜持有太多。
英皇國際（0163）質素不太好，賣出較好。

建議之後，投資翻一些穩健類的股，如不懂選，就投資ETF。

------------------------------------------------

Q21425：

老師，你本《5年買樓》的書好正！對我這對買樓O認識的人來說，可以在很短時間內對樓市有個整體概念和有信心可以去買樓！

可措現時樓市已回升不少，很多屋苑已破頂，現在只能繼續等待！

可否請間老師，現在手頭有大约五球，在等待樓市回調才買樓，現在應如何配置這五球呢？因為不知要等到幾時，又不想令這五球繼續遍值！謝謝！

龔成老師：

如果你本身無自住樓，而自己又有這需要，其實已經可以考慮，最重要是你資金足夠，在供款方面無問題，買樓後仍有現金剩，這樣已可買。

好多人會分析樓市走勢，但我相信這是好難的，反而考慮「自己的需要及配置」，才是你買樓更大的分析點。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

如果有自住需要，只要在供款方面無問題，買樓後仍有現金剩，都可以考慮下置業。

------------------------------------------------

Q21426：

老師請問成本上升算利好定不利消息? 我最近研究紙業，點解紙材成本上升，有d賣紙既公司會賺多左? 究竟成本上升係好事定壞事?

龔成老師：

其實這是複雜的問題，往往要睇行業情況，以及企業營運情況。

有些行業，當成本上升後，能將絕大部分轉嫁比客戶的，可能因為行業的競爭有限，又或全行的營運模式都相同，因此佢地會同步加價，而客戶無太大的選擇權。

當我地分析時，往往會睇翻企業有無「成本轉嫁」能力。

當你分析時，要同時睇企業的毛利率，如果成本上升但毛利率不跌，反映企業有成本轉嫁能力，即是成本對佢無影響，往往有一定的優質度。

------------------------------------------------

Q21427：

想問老師有冇一啲儲蓄型危疾保險推介

龔成老師：

無呀，因為我不從事這方面的銷售，你可以去銀行或保險公司問下。

最重要是，你按自己的「需要」去買，保險就是將你不想承受的風險，轉嫁比保險公司。這是防守的動作，不過，我地理財最重要是攻守兼備，因為不用太多，「足夠」就得。

------------------------------------------------

Q21428：

龔Sir你好！本人3x歲，想問一下長遠收息同增長，可以考慮以下股票持有或買或增持？或龔Sir 有甚麼推介？

1. 1310 （$11買）
2. 1830 （$4.4買）
3. 331 （$4.5 買）
4. 398 （$2.5 買）

5. 1373 （$2.5 買）
6. 1523 想買
7. 1883 想買
8. 3067 （月供1/2手）做增長股票

非常感謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你3X歲，我一般會建議你用「平穏增長股」 + 「潛力股」的組合，先做好財富增值部份。

除非你個人極保守，或者本身有其他原因，需要有額外穏定現金流作支援。

否則，而一刻我唔建議你投資太多，中信國際電訊（1883）、香港寬頻（1310）這類收息股。

另外，東方表行集團(0398)質素較一般。這些股票，若持貨不多，可持有。但若太多，最好沽出部份換至其他股票。

珩灣科技（1523）主要以「Ｐｅｐｌｉｎｋ」及「Ｐｅｐｗａｖｅ」品牌從事ＳＤ－ＷＡＮ路由器的設計、開發、推廣，以及提供相關軟件許可及保修與支援服務。

ＳＤ－ＷＡＮ路由器可連接多個廣域網（ＷＡＮ）連接、智能分配流量給多個廣域網、可集中管理，以及必須利用加密技術建立安全連接。

業務及盈利都有不差的增長，發展不差，不過公司規模始終較細，因此始終都有風險。

這股長遠不是無價值的，但都要明白發展緊的，都是有變數的行業，所以股價潛在波動可以較大。

現價都算是合理的，但不建議大注投資，長線投資都可考慮。

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。業績前計佢$4是合理區頂，業績後股價升左好多。現貨可持有，但暫不宜加注。

將來你可以投資以下股票，但若果你投資知識不高，可先較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q21429：

龔成老師，您好!我見有讀者問你移民後的投資策略，但佢地冇提到一點，就係英澳等國家抽取資產增值稅，

例如股票買賣利潤，政府會抽取約30-40%税。如果考慮埋這因素，我們需要調整投資策略嗎?

例如減少平穩收息股(因為抽税後利潤所餘無幾)集中喺增長股?謝謝

龔成老師︰

我自己無對海外稅務作深入研究，比唔到太多具體意見你。但當考慮到這些增值稅項時，的確會令原先回報被打上拆扣。

但除非你不作投資增值，或者移民到低稅率地區，否則這個問題，基本上係無可避免。

投資策略基本上唔會大變，但你計算長線回報率時，要因應相關稅項作扣減，以免令預測過於樂觀。

最後，我建議你去問翻當地稅務顧問，看看有沒有一些節稅方法，從而減少這方面的影響。

------------------------------------------------

Q21430：

老師你好！

今年28歲
月薪34k
要比10k 家用
有月供2k(2800)
保險每個月1.5k (每年一次過付款)
有50k Savings

有意今年同男朋友搬出黎

啱啱開始上你既堂

想用月供/ 分注投資方法放啲錢入水桶1同水桶2。

另外，今年個市似好熾熱，身邊所有人都喺度講緊股票，如果我用計公司價值判斷佢價格係貴或平，其實係咪都可以放心入股？

今年會唔會算係一個較危險嘅買入時機？

想請教老師意見同指導。感謝

龔成老師︰

現時大市在合理區，雖然部份新經濟股，有輕微過熱架情況。但整體大市水平，尚算合理。

我地唔會去估個市點走去定買賣策略，只會繼續用企業估值，去定平貴咁買貨。

但當成個大市去到一個狂熱的情況，我地就要保守少少，現時未算去到好狂熱。

以你現時28歲，投資在水桶1同水桶2，係正確做法。但你收入計，每月月供金額太少。

如果你唔係有太多必需開支，我建議你盡量將月供金額，提升到1萬以上。因為你年青，應把握時間，盡力去做好財富增值部份。

而一刻，你唔需要急住去配置，或者新加其他股票去月供。因為投資係一個長線計劃，你可以等上完堂，有一定知識和明確概念，才去調整會較好。

------------------------------------------------

Q21431：

hi 你好 龔sir，我是一位18歲學生，沒有part time 現在一邊學習緊投資知識，

1現時我有一萬元想all in 入股票，想搵一隻股票收息邊隻最好？

2我現時打算購買你的書學習投資知識，邊一本系適合我這個BB新手，多謝

龔成老師︰

1) 你這個年紀，就算資金不多，都應努力學好投資知識，甚至小注去吸收經驗，為將來準備。所以，你做法好正確。

由於你暫時經驗和資金都不多，建議你先從以下收息股入手。如果你不太認識這些股票，可以直接買3110派息基金，都可以。

但將來到你有穏定收入，又對投資有一定了解，就要加大投資力度，改為買一些較有增長力的優質股。盡力把握年青時間，去為自已財富增值。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）或收息基金(3110)都可以。

2) 以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21432：

龔成老師，很喜歡睇你嘅影片，好多分析都講得好好，特別係價值投資法。

本人看好中國嘅保險業，隨住14億人口開始富起來，相信保險嘅需求會越黎越高。

想問問你對中國人壽2628同財險2328嘅睇法？同業中，長遠有高升值潛力嘅股票又可以推介一下嗎？期待你嘅回覆，多謝

龔成老師︰

我自己都係用「價值投資法」，巴菲特用左這方法賺大錢好多年，這是公開的。

但一般散戶就是貪賺快錢，而不用這方法，因此，令到一般散戶仍是輸多贏少，我們仍是賺大錢的一群。

中國隨著人口增加，城鎮化、人均收入增升等，都對保險這類產品需求，只會有增無減，故長線中國保險叢係正面。

中國人壽(2628)不是無質素，但近年有質素下滑情況。現價合理，但投資價值只係中等。

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股現價合理，可長線，但就主要預係收息，唔好對股價有太大期望。

如果你看好中國保險業和其增長潛力，平安(2318)會係較理想選擇。佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中上部，分注投資就可以。

------------------------------------------------

Q21433：

老師你好，我最近幾個月開始留意你page，我以往只有3次買賣股票經驗。

但有一次錯信股票group輸了幾萬蚊，加上13元買入石油股，依家跌到得番8蚊左右，真心輸到怕。

想請教依家石油股係咪唯有繼續持有？
求指教

龔成老師︰

近期好多網上騙案，就好似你所講股票group，要小心。

記住，我地買入一隻股票，一定要知道佢質素、行業前景、財務狀況等，才去投資。

如果你連間公司點賺錢、行內有乜優勢、點解未來有發展和增長潛力，都答唔倒自已，純粹係聽消息，甚至係某某群組意見。咁你就要停一停，唔好投資住。

石油股，好似中石油(0857)、中石化(0386)、中國海洋石油（0883）質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業，不要大注。

如果佢佔你組合好多，你可以每有反彈，就慢慢沽出部份。

------------------------------------------------

Q21434：

成sir 您好！小弟年29。已經有想財務自由的目的。不想再浪費自己的人生了。

最近學習窮人與有錢人的態度及資產與負責的分別。

月入17000
扣除一切開支可以儲1萬元。
銀行有70萬。

有留意你大推盈富 港鐵 領展等等。

以最終目標財務自由及每月被動收入約20k.

小弟投資經驗0。有睇過下成sir 教導以月供模式較適合初學者。留部份現金流等大市跌時可以大手購入長線投資收息股？

小弟會睇書學習如何去計算公司的真正價值。多留意不同公司的年報表等。

有一個最不明白的是睇財經新聞。是否留意新聞介紹公司背景及行業發展？長遠是會否留意公司會否接觸新行業等？

另一個最大問題是如分配70萬去錢滾錢達到 金錢為你工作。

小弟已經開始睇投資書。增值自己才是最大的財富。長遠需要報讀會計課程？好人一生平安

龔成老師︰

如果你希望最終可以每月有2萬蚊現金流，以股息率6%計，你需要本金400萬，這就是你初步目標。

你現時29歲，係財富增值黃金時期，除了增值外，也緊記要努力提升自己投資知識。

由於你未有投資經驗，好易會買貴貨，所以用月供或分注入貨模式，對你這類初學者，會較安全。

以你29歲，可以選擇一些「平穩增值股」+「潛力股」作投資目標。

以現時大市合理區狀況，月供最好用一半每月儲蓄，另一半就先儲起架策略。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你不懂選股，可以先用盈富(2800)作目標。其餘合適股票，到你對佢地有一定了解，才從中選股。

現時大市只是合理區，你現有70萬資金可以先投入15-30萬，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

由於你很年輕，相信要達成400萬目標不難。

我假設投資回報有10%（連股息再投資），你每月投資$10000 + 70萬本金，大約10年多後，就會增值至400萬。

至於投資知識方面，新聞主要係睇有無一些事情，對企業本身質素，或者長線發展有影響。例如早前內地監管政策收緊，就令阿里巴巴(9988)等企業的風險度增加左，這就是要留意地方。

我地要不斷吸收「資訊」，例如宏觀經濟情況，企業發展，各行業的情況。但我地睇新聞不是要知道所謂的「意見」。

除了看書、年報、新聞外，你可以報讀一些投資相關課程，去提升相關知識。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21435：

Hi 阿sir你好，想聽下你意見，本人38歲，女，月收入$53000，現時有兩個物業，供款分別15000及18000，租金收入為$15000。每月開支$15000左右。

另一單位明年亦打算出租，大概收$11000租金左右。

睇左你好多資訊，有做月供股票，每月$13000，分別銀娛$2000、比亞迪$2000、中銀香港$2000、小米$1000、阿里巴巴$2000、友邦保險$2000、港鐵$2000。

現時股票有11萬左右，現金$25萬，手上保險有50儲蓄。

想10年後，可以有500萬，想問下你意見？我現時股票組合投資是否正確？

希望得到阿sir回覆

龔成老師︰

以你38歲計，應先做好增值部份，你現時持股都係合適合。但留意，比亞迪(1211)現價偏貴，要回到$120左右水平，才建議再開始月供。

此期間，你可以用ＧＸ中國電車基金（2845）- 這基金的目標是追蹤Solactive中國電動車指數NTR「相關指數」表現緊密相關的投資回報。

或其他潛力股代替，如中生(1177)、福壽園(1448)、安碩恒生科技(3067)、港交所(0388)、騰訊（0700）。

現時大市只係合理水平，現金和股票最好各佔一半，你可以多5-10萬去分注入多少少貨。餘下資金，就等大跌市出現，才加大力度掃貨。

另外，"保險"主要係用來防守，買足夠保障就可以。儲蓄成份架保險，我就唔建議太多，增值最好都係留比優質資產(如優質股、物業等)去做。

我假設投資回報有10%（連股息再投資），你每月投資$13000 + 本金36萬，10年後大約會增值至340萬。如要達至500萬目標，你要將月供加大至$22000，才較大機會成功。

所以，我建議你利用明年新增租金收入，加大投資力度，以助你達成目標。

物業方面，你現時已經持有兩個物業，之後就暫時唔好增加固定資產類別，令財富組合更平衡。同時，如果可以的話，盡快將手上物業出租能有助你提高現金流。

------------------------------------------------

Q21436：

龔成老師，你好呀！現年40歲女，剛離婚無業，賣了樓有200萬現金。現在有以下股票，請問我有買啱嗎？

應該長期持有或是到一定嘅時候賣掉獲利？ 909跌了一半，我應該怎樣呢？

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

我嘅目標係可以在短時間內買一個細單位300～500萬內自住，唔駛再租屋，請問我嘅投資方向啱嗎？

應該怎麼樣更好呢？ 麻煩老師解答，萬分感謝！

龔成老師︰

我想先要你明白少少財富增值概念，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

所以，只要係優質的股票，我地一定會長線持有，而唔會半路中途去沽貨。除非成個大市好狂熱(現在未算)，或者個企業長線質素轉壞，我地先會賣出。

回到你本身情況，首先，你有一個明確目標，就係短時間內購買物業自住。同時間，你現時在待業狀態，故中短期內對現金需求不少。

以你40歲計，應以增值為主。你持有股票，大致上係可以。

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但你買入價唔平。現時回落近半，但初步分析，依然都係屬於貴水平。始終市場現時對這類股有好大期望，此類股票，波動性較大。

此股可持有，但由於你持股比重有點高，我建議你每有反彈，沽出部份，去平衡風險。

另外，華潤啤酒（0291）都有質素，但佢佔你組合近半，太過高。緊記，個別股票比重不要超過組合15%，否則會出現過度集中性風險。所以可考慮賣出部分。

你可以用沽出部分以上2隻股票資金，再加上30-50萬，去分注慢慢買入以下優質股，並長線持有。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你投資知識不高，可先集中在平穩增長類股，至於潛力股，只宜小小注。到你提高了投資知識，才慢慢增加翻潛力股比例。

餘下資金，主要係用作你置業基金。再加上，你還未有工作，最少都要留有半年基本生活開支的應急錢，作為後援。

若將來股市有明顯調整，你也可以考慮用部份資金來入市。這樣安排這200萬，相信會較有彈性之餘，當你都會較有保障。

至於置業方面，你係用來自住。緊記要堅守一個準則，就係「供得起」。

現時香港樓市算係合理區頂，你可以慢慢物悉目標，到有較理想價錢，又有信心可以供得到，就可以考慮出手。

------------------------------------------------

Q21437：

你好 龔sir。睇左你fb一段時間 先買入必瘦站 會繼續持有 多謝你既分享。

另外亦留意到你之前講既粵海投資 本身想入手 但最近參股嘉誠環保工程 但網上不多關於嘉誠環保工程資料。

消息公報後 股價有所下跌 請問你對於呢個公司行動有咩睇法?

會否影響你本身對呢個股票既評價呢? 謝謝

龔成老師︰

必瘦站（1830）長遠有發展，這股有長線投資價值。

但現價已經係偏貴，有貨可持有，就唔好加注住。

粵海(0270)宣布收購嘉誠環保工程註冊股本總額合共 53%的股權，在該收購完成後，嘉誠環保工程將成為其非全資附屬公司。

嘉誠環保工程是一家在中國成立的有限責任公司，其於 2005 年成立，主要從事環境工程工作，並為工程相關工程提供投資、設計、建造、運營、諮詢、設備研發和製造服務。

嘉誠環保於中國河北省及河南省的市政給排水工作，相信集團想進一步提升在華北地區的市場份額和品牌影響力，初步睇係正面。

至於中短期股價走勢，未必一定跟企業質素和發展潛力有關。我地分析時，一定要集中用長線質素去做判斷。

現價計，算是合理水平，可分注入貨。

------------------------------------------------

Q21438：

Hello 龔Sir, 最近1638佳兆業跌了很多，值得入嗎？

另外，1503招商局有成8厘息，係咪值得入當收息？ thanks!

龔成老師︰

佳兆業集團（1638）主要從事物業發展、物業投資、物業管理、酒店及餐飲業務、戲院、百貨店及文化中心業務，以及水路客貨運業務等。

業務發展不差，不過盈利就較為波動。另外，由於負債較高，因此都有風險。現價合理的，但唔建議太大注。

招商局商業房託（1503）佢持有及投資中國相關的物業組合，物業組合有深圳市蛇口的多項物業，包括寫字樓綜合物業新時代廣場、數碼大廈、科技大廈及科技大廈二期，以及購物中心物業花園城。

物業有質素，不過較受經濟週期因素影響，租金會有少少波動，令到這股的股價較為波動。現價合理，有投資收息價值，不過唔建議太過集中在這房託。

------------------------------------------------

Q21439：

你好～～老師，我有少少問題希望你幫到我

1）想問一下康希諾6185 我400（200股）同260（200股）都有貨，呢兩日我見升返唔少，今日心大心細諗緊放唔放～～我唔係好識分析呢間公司前景好唔好？

2）我買咗中國電動車2845，138元400股～～有見過你講過買呢一個股票都不錯，我要唔要而家低價再入多少少

3）快手362 有200股，241元又入了200股

4）藥明康德189元 入了200股

我有啲股票分開兩次入，我應該取一個中間價，等升返上去放晒佢，定係低價入嗰啲，覺得升到一個價位可以先放咗佢，高價位嗰啲就照放喺度？

謝謝

龔成老師︰

你好著重個帳面數，其實你放貴個1手先，定平個1手先，係無實質分別。只係心理上，覺得放平個1手，你就賺左。貴個手就放係度，當無事，這種想法好錯。

你要明白一個概念，我地投資唔係賺差價。而係想將一些長遠只會貶值的現金，換成會增長的優質資產(如優質股、物業等)，並長線持有。

因此我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

1) 康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。

如果持有係可以，但一定只能小注。若2手佔組合比重都唔少，建議沽出1手，去平衡個風險。

2) 中國因為能源問題，長遠一定要發展電動車，這是大方向，故此股有一定投資價值。

現價依然係合理區頂區，你已有一定貨係手，唔建議你加注。除非你資金好充裕，就可以而一刻加小小注。

3) 快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。現貨可持有，但你預短期股仍會十分波動。

4) 藥明康德（2359）都有d質素。

佢主要從事藥物研發平台業務。係藥物開發過程，主要分為藥物發現、臨床前開發、臨床研究及商業化生產共四個階段。

睇翻佢的資料，佢的服務對應各個階段，可分為以下四個分部：（１）中國區實驗室服務（２）合約生產組織（３）美國區實驗室服務（４）臨床研究服務。

佢的客戶包括美國、中國、歐洲及全球其他地區的製藥公司及及生物技術公司。

業務其實不差的，過往的生意與盈利增長理想。

當中最大的風險，就是市場估值，現時的市盈率過百倍，就算有增長力，都計都貴，股價上落一定會好大。市場現時對佢前景有好大期望，但如果增長力比市場略減，股價都會調整。

只可以話這企業有增長，同時有風險。現貨可持有，但唔好加注了。

------------------------------------------------

Q21440：

阿sir, 我尋日入3690美團，今日跌

0285 同 2382 應該幾時入呀

剛剛$31入咗3319，係咪都高呀？

龔成老師：

你唔需太著重短期股價走勢，最重要是長期的企業發展。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴，不過，一定不能大注。小小注，是較好的做法。

只要你持貨不過多，都可持有的。

至於比亞迪電子（0285）去翻$40會好少少。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

雅生活服務（3319）合理價，有質素，可長線。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18421-Q18440）

Q18421：

Hi老師，我今年19歲，上年比媽媽介紹左股票呢樣野，由完全唔識就去抽9988，之後無意中睇到你個page，
認識價值投資，買咗兩隻潛力股，到而家得到一個可觀嘅回報

呢年經歷唔少起伏，有3月股災，果時"輸"唔少，因為明白價值投資而冇擔心過，想多謝你先。

你成日叫人Strong hold優質股，我明白佢如果有個特點係可以永遠優質，理論上係可以唔放

但係唔放咪一直入錢入錢而冇得享受？要直至足夠金額財務自由咪好耐？其實聽咁耐財務自由，
姐係有幾多（錢/收息股）先叫財務自由？

另外想請教潛力股，點樣去判定佢唔再有潛力？例如你所講嘅1211，你話要等電動車普及，先考慮放出，
咁其他行業呢？小米就可以等佢將平價手機引入啲生活用品比人購買，製造一個生活圈都用小米

同樣道理係咪姐係當佢生活圈普及就代表佢潛力會減左（同時亦代表佢成功左普及）到時就可以放？咁樣你認為點先為止普及？

有咩準則？你之前隻六福點解放左？因咩事/因素/準則你覺得佢潛力唔及1211？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

在初期會投資較有潛力股票，去令財富增值加快。到一定金額後，可轉較平穩增值的股票。最後有相當財富時，才換成收息股去為自已創造穏定現金流。

而中間係唔係一定唔會沽貨，又唔一定。如果你無定平貴能力，咁一直持有一隻優質股，會係最安全架做法。

若你有一定投資經驗，當發現個大市好狂熱，估值已經異常地高。咁我地就應該增加現金持有架比例，因而要沽出部份優質股。

而點樣去判斷一隻優質股，已經無潛力。就正如你所講，現在投資比亞迪（1211），因為好大程度係由於佢係行內有很高技術，而且電動車未普及。當電動車普及，佢就會由潛力股，變成平穏增長股。

每個企業都會有不同原因，你要自已細心去研究，到底間企業架獨特優勢在那裡（可能係技術、品牌、壟斷性優勢等），從而知道點去衡量一隻股票潛力是否尚存在。

例如投資潛力股，好多時的原理是「由細間公司開始投資，等佢變大」，到佢真正變大左，就可以賣出。

而六福（0590）我個時賣出係好早期架事，當時係因為見佢升唔少，比亞迪（1211）又在$1X水平。其實要考慮好多值博率的問題，但原則上，會建議長線為核心。

------------------------------------------------

Q18422：

龔成，前幾日發生咗一件事，想分享一下同埋同你講聲多謝!

話說前幾日去銀行遇到個RM，都預咗佢會sell產品但見仲等梗就聽吓啦！佢一開始係sell年金，記得你經常強調「先增值後現金流」，我覺得以我年紀可以接受增值力強啲既投資所以推咗佢。

佢見我嫌回報低，就推界高息股票掛鈎xx(唔記得最尾幾個字），我突然閃出「大富翁致富藍圖」入面講既銀行高息產品陷阱，所以就用風險太高嚟推佢。

點知佢再解釋，果然就係期權，但呢兩個字完全冇出現過。

我就直接答佢：咁咪即係期權囉...佢呆咗5秒就答：期權？唔係...！佢可能係咪俾我拆穿之後唔知點反應...之後佢屢敗屢試，見我話風險太高就叫我買債券，但睇吓都係BB級別，何況而家低息環境債券都唔太吸引啦所以又再推咗佢

短短20-30分鐘我感覺好似係個考試，考梗我喺本書度學到啲咩

所以好多謝你，$168既書可以咁長知識

龔成老師：

哈哈，好呀，證明你的基礎知識不差。

銀行與坊間的投資公司，都會包裝產品去出售，不是話佢地的產品有問題，而是我地要有自己的知識，先可以「避免比佢地帶住走」。

2008年金融海嘯，當年好多高薪一族，就是買左大量累計期權（Accumulator），最後輸左好多錢。所以，你有知識，就可以有獨立分析能力。

就算到近年，唔少銀行賣債券基金，話裡面投資「高息債券」，所以派息穩定，但高息債券另一價名就是「垃圾債券」，所以，我地有知識是十分重要的。

保持進步啦！

------------------------------------------------

Q18423：

龔sir你好，我今年35歲，正常月入35000，另加bonus，唔穩定，因為我有家庭，減去家用、工人等等基本上每個月都無得淨。疫情前有bonus才有得淨。

有計劃置業但現在經濟差，打算買d有質素股票等多d資金再置業。想問如何建立一個健康的股票組合？麻煩晒龔sir

基本資料如下
現金500000
月薪 35000
股票 9988 $239 400,
700 $521 100,
1810 $23.8 1000

多謝指教！

龔成老師：

由於你收入與支出相等，未能儲到現金，因此要較小心運用$50萬，唔好太進取。

你現時持有的股票，都有質素的，可以持有。

你之後可考慮平穩增長股，由於市況唔特唔平，因此你動用$25萬好了，慢慢分注入優質股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18424：

龔成老師
我在手頭上

有 2手1號長和 平均價$51.75
有 2手5號匯豐 平均價$42.5
有 2手2018 瑞聲 平均價$55.22

你覺得我可否長期持有？
有無升值潛力？

希望得到你少少意見

龔成老師：

長和（0001）有質素，有收息及少少增長能力，不過增長力就比過往年代弱。

瑞聲（2018）有質素，增長力會比0001好，你可以長線持有。

至於匯控（0005），賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。同時不能持有太多。

------------------------------------------------

Q18425：

你好，我今年34歲，之前一直幫屋企人還錢，完全冇積蓄，月月清

終於今年還哂，我好想要有多啲錢
我月入35K, 每個月應該係可以有18K儲蓄嘅⋯
我想問

完全冇投資經驗，點開始好？
多謝！

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

你現時可開始，每月供$8000盈富（2800）。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q18426：

龔老師，在現有的數隻房地產信託基金中，是否以領展最有發展潛力，並且收息較佳？

若想買領展，現在的價格是否合理呢？
謝謝！

龔成老師：

領展（0823）在當中，增長力較高，但股息率卻不是最好，如果要股息高少少及穩定D，置富（0778）會較好。

領展現價合理，分注投資，長線持有，可以的。

------------------------------------------------

Q18427：

你好，龔老師，我今年32歲，想幫小朋友做一個讀書基金，每月儲5000

而家開始，18年後可以用，請問股票可以月供邊隻同埋供幾多隻，等到18歲既時候有一筆錢，謝謝你

龔成老師：

最好就是月供ETF，你可以供盈富（2800）$3500、華夏恒生科技（3088）$1500，長期進行，這是一個較平衡，長遠有基本增長力的做法。

------------------------------------------------

Q18428：

龔成老師你好，我而家做緊餐廳生意，我生意唔錯搵到一舊錢，黎緊租約滿唔續租，我有以下打算
而家二選一

1.買樓+開間小型餐廳
2.同股東開間大型餐廳

如果是老師會點揀？那個風險較高？

龔成老師：

1）會較低風險，你可以平衡左你的財富，同時有基本的物業持有，對你來說較穩陣。

2）風險會較高，不過，如果你較年輕，想進取D，而你對你及股東又好有信心，就可以做。

------------------------------------------------

Q18429：

龔成老師 我47歲有2個20,14歲仔女，有工作，老公同我分開投資，想問呢個組合可以長期持有嗎？合適嗎？

我樓已經供完，有一份年金剛買每月供＄1000供10 年，亦有儲蓄保險連危疾供＄1000 現金有10萬如大跌市再可入貨

股票30萬,如下778佔15%,2388佔15%,1177佔15%,1448佔7%,14佔8%,1972佔15%,1928佔10%,270佔15%望到時退休财富已經纍積唔該

另仲想問強積金如恒指升到高位需要轉保本基金?

龔成老師：

儲蓄保險連危疾供＄1000，可保持進行。

現金有10萬如大跌市再可入貨，方向正確。

至於股雲組合，都是有質素的股票，而你的年齡，財富仍有增長的能力。你可以用「先增值，後現金流」的方法。

你現時的股票組合，基本上都適合的，但個股去到15%佔組合，已經是上限你最好增長翻一些ETF，例如盈富（2800）、恒生科技（3088）（盈富佔較多），對你的組合平衡度會較好。

當你到近退休年齡時，你可以轉到收息類資產

至於強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

------------------------------------------------

Q18430：

1）老師你好，我是澳門的，今年27歲，現金約有十萬，亦因疫情關係未來薪金每月只有1萬多，扣除所有洗費月供基金年金供款等每月能儲2千

想累積財富未來兩年結婚或必要時用，但對股票不太認識，想了解老師常推薦的盈富基金適合嗎，月供多少比較好？及有其他推薦來分散風險嗎？如入手現在可入嗎？

2）可推薦新手投資的書藉嗎？

龔成老師：

1）如果你的資金，將會在1、2年內動用，投資股票未必是最好的選擇，因為買股票原理如同買企業，企業增長需時，而中短期股價只會因當時市況而波動，而無人知你1、2年後動用資金時，市況如何，因此，你應該持有較多現金，以「所需的現金」作最大的考慮，如果有資金剩，就可以投資股票。

當然，你不用100%持有現金，但就會大部分都是。你可以按你可承受的風險，小部分投資股票，盈富（2800），是可以的，這是一個組合，對未有選股能力的投資者來說，是較好的選擇。月供$2000可以，但你要先考慮現金情況。

2）你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q18431：

老師你好，我今年19歲，今年讀大二，外地讀書冇收入，積蓄有7萬元左右，想未來畢業後10年內草到第一桶金，請問可以點做？

龔成老師：

你最好試下做生意，這年齡最適合試，多d發掘身邊的機會，一些你地年輕人先見到的商機，好好把握。

如果你唔想做生意，都可以善用這筆資金，投資股票，$25000可以開始投資，另外$25000就等投資機會，要大跌市才動用。$20000就是備用。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18432：

龔成老師您好，由2018年初至今follow 你FB 已經2年多了，睇住你由2年前得5-6萬follower，到今日既16萬follower，真係好戥你開心

多謝您2年幾前推介既1211，令我而家整個股票組合升值了不少（平均買入價4x蚊）。我諗我會繼續長期持有。
（不過估唔到既係0285升得仲勁、因為1211和0285如果同時持有就會有集中風險，所以我最後揀左1211）

龔成老師：

近幾年我的確發展得好快，比較有趣的是，當我FB的人數上到大約10萬，開始多行家針對我，其實我都唔知點解，但有趣的地方，反而係我因為咁樣而多人識多，有網友同我講就係因為咁樣而跟左我。

比亞迪（1211）可以保持長線持有，比亞迪電子（0285）都有質素，但有時我地投資，都要先從風險角度考慮。

------------------------------------------------

Q18433：

老師早晨，Q1. 看了你比亞迪短片，覺得應該持續長線持有此股。

不過，查返資料幾年前比亞迪試過來港搞電動的士，不過因為充電及電池續航性問題而失敗並徹出香港，擔心能否再在香港卷土重來

始終充電站設施不足在香港土地問題下是一個阻礙，如果香港始終難以普遍，對此股票會否有深遠影響？

Q2. 百勝中國質素如何？

龔成老師：

1）潛力企業在發展過程中，總會遇到好多問題，產品未得，這是正常的，如果產品已好成熟，就不是潛力股。

由於佢技術仍不斷進步，好多問題慢慢會解決。而佢主要市場在大陸，發展正面，因此香港市場對佢來說貢獻不會大。

2）百勝中國（9987）有質素，不過由於本身已好大隻，並不是快速增長的類別。

佢主要係中國大陸經營餐廳業務，旗艦餐廳品牌包括快餐品牌肯德基與休閒餐飲品牌必勝客（都係利用獨家經
營和授權經營權）。

佢另外仲有其他品牌代理，包括小肥羊（專營火鍋）、黃記煌（燜鍋品牌）、東方既白（中式快餐品牌）、ＣＯＦＦｉｉ　＆　ＪＯＹ（咖啡店品牌）、Ｌａｖａｚｚａ（授權咖啡店品牌）等。

睇翻佢的資料，佢係中國的1400多個城市，共有約1萬間家餐廳，當中約85%餐廳由集團擁有及自營。

可見有一定的規模與經營網絡，過往的業務都不差，增長力都有。相信長遠能利用當中的優勢保持發展。

不過，現價都唔算平，加上本身已有一定的規模，所以預期佢只是平穩增長類，如果投資，要分注入，適合長線的。

------------------------------------------------

Q18434：

老師 我依家讀緊大學 我想問下你覺得如果邊讀書既話做咩副業會比較好？定還是專心讀書呢？

同埋我發現好多時候一啲優質股未去到好平，通常喺合理區中下部就開始回升，太貪心搞到錯失左機會。

咁係咪應該只留一半錢等待便宜價位，然後另一半喺合理區入手長期持有會比較好？

龔成老師：

你是大學生，應該有能力進行副業，單靠讀書在現時社會無用的。

你可以試下做生意，由你身邊人、年輕人的需求與商機開始尋找。總之，唔好想太多，「做」是最好的，不斷試就有機會。

有關優質股，的確有時會有這情況，因為優質股市場都好重視，好多時唔會跌得太多，所以去到咁上下已經會回升。

因此，我都會建議優質股在合理區，分注買部分（例如買入3-5成），同時留現金，等自己有一些貨，如果大跌就加注。如果唔跌上升，起碼都有基本的貨。

------------------------------------------------

Q18435：

老師想請問一下你

1.你當年離職，成為全職投資者，會唔會突然間冇左固定收入而不安，係咩原因令你決定係當時離職？

2. 3718北控制城市資源管理，會唔會係一個有潛力的股票，我覺得垃圾處理回收係一個大趨勢

龔成老師：

1）因為當時我的被動收入，以足以支持我的日常支出，所以不安感減少左。但最初都有少少的，因為賺錢模式變左，但我地都要克服的。最重要知道是大方向正確，就要自己大踏步進行。

當時我外面的業務發展理想，同時被動收入已足夠，所以辭職。

2）北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。

------------------------------------------------

Q18436：

老師你好，本人平均價$7買入建設銀行三萬股

建設銀行現在的業務狀況你認為我將來$6.5 出售還是在低價購入拉低平均價好？

龔成老師：

建行（0939）有質素的，不過銀行業的賺錢能有所減少，加上壞賬問題，都影響企業的質素。

你原有的貨，可以持有。如果加注，你要先計算加注後，這股佔你股票組合的比例會否太多，銀行股佔股票組合的比例會否太多。

如果你計加注後仍不多，就可加少少。

記住，重點不是「拉低平均價」，而是組合比例與配置。

而這股只是收息股，增長力不強。

另外，你要在加注後，仍有現金剩。

如果你長遠想收息，可一直持有，如果想組合有增長力，就上翻$6以上考慮轉其他。

------------------------------------------------

Q18437：

你好！龔先生，本人因理財不善，今年二月申請了46萬貸款，供6年，每月供$9571，我計算了6年須付多二十多萬利息。

我現手頭有50多萬現金，想請教龔生我直接一次過清貸款好還用投資生財好，約須付42萬左右，已付6萬多利息，自己心想還未付那麼多利息，不如一次過清。

如果你建議我不清，50多萬用可建議我作什麼投資好？

請龔生指教，因本人是不善投資，感謝及等候你回覆！

龔成老師：

第一，你要先找翻資料，了解你這筆貸款的「實際年利率」，如果實際年利率太高，就應該盡快清還。

這個就是你的「資金成本」，除非你的「投資回報率」，能大過這個成本，否則，早點清還是有著數的。

另外，借貸投資是高階投資者才能用的方法，如果你在過往的投資經驗中，10年有8年都有錢賺，平均回報不差，就可以考慮將資金投資。

否則，盡日還錢會較著數。

------------------------------------------------

Q18438：

老師，我手上有400股9988,平均價195. 請問什麼價位可以增持？

另外手上有1211, 590($13x7000),1810($13.4x3000)

同問什麼價位可以增持？
唔該老師

龔成老師：

阿里（9988）有質素，你可以長線持有，至於增持，由於你本身有貨，加上現價唔算平，所以唔需要太急去增持。去翻$230以下，最好$200先考慮會較好。

或者你利用月供，長期入都得。

另外的幾隻，六福（0590）是合理價，你可以首先考慮這股加注（但要記住同一股不能佔組合比例太多）。而比亞迪（1211）、小米（1810），等回翻10%-15%先加注會較好。

同時，大市這刻唔算特別平，所以你加注後，最好有現金在手。

------------------------------------------------

Q18439：

Hi龔sir! 近來科技股一直熱炒，之前月供開嘅1211都有賺到D錢，但此版塊已被熱炒，所以我此刻反而唔想再月供，睇番舊經濟股覺得值搏率更高，我咁諗正確嗎？

龔成老師：

有不少科網股的確有點熱，雖然未到完全狂熱的狀態，但的確要小心。你停供是可以的，持有的貨，可以暫時繼續持有。

而你將資金轉到舊經濟，是可以的。

------------------------------------------------

Q18440：

老師，我之前買賣小米，有短炒情況，發覺好似行錯路。

之前，我心郁郁用左10000左右入左兩手小米，當時24.6，收市又有成25.6，賺左幾百，算係人生第一次買股用真錢，係有種興奮感覺。

但係之後開市26.6一開就即刻跌落25蚊就嚇左一下，即刻放左一手，之後又見佢升返又即刻買返一手

之後成日都心不在焉，時時刻刻都開手機睇股價，最後收市跌返落25.7。

冷靜落黎諗下，發現自己犯左好多新手毛病，終於明白你當初點解講跟市太貼唔係好事。

我個人第一次買成個人都好緊張，明明知要睇長期，但當時就係冇耐性，又有少少跟討論區既人風向行事，同埋俾個股價少少地影響左自己心情。

當交左小小學費攞經驗，純粹同你分享一下，我覺得真係要落一落場試下水溫先有呢種經驗，係幾有挑戰。我依家諗緊好唔好繼續留住兩手好，你有冇咩睇法？

龔成老師：

這些要你自己經歷的，想像投資，同用真錢投資，是完全不同的兩回事，這要你自己感受才得。

這都是學習。

希望你之後學識長線投資，因為成功的投資者、基金經理，都是好有耐性，同時能夠平常心面對股價。

而一般的散戶，好易會被股價上落影響左投資決定，例如在優質企業質素無變，但股價下跌的情況下，因為心理因素而賣出。

總之你記住，我地不是炒股，是配置，將你的現金轉為優質股，長線投資。小米（1810）有質素，但相信股價會好波動，平常心。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17381-Q17400）

Q17381：

老師，如果溝貨係優質股是可以？thz

龔成老師：

有3大因素。

第一，要優質股，無質素的股票絕不能加。
第二，現價要合理或平。
第三，加注後這股佔你股票組合比例不能過多，最好這動作在你預算的範圍，而你加注後仍有現金剩。

記住，唔好因為想「拉低平均價」就加注，你要用「這筆新資金得到的投資回報率」角度，去分析是否值得加。

------------------------------------------------

Q17382：

1038係入手時機？
其實長江同長和又冇分別？

因我問嘅都係收息股，如果選一隻不是，你會介紹邊隻？同埋想問下月供係點？
定可以各入一手？非月供？

想問下盈富基金，我見你好推介，但我睇返升幅，波動唔大，所以想問下點解選這隻？真心想了解⋯身手

龔成老師：

長建（1038）與長和（0001）都是有質素的股票，都可以投資，不過，持有的業務並不是高增長類別，所以，投資這兩股，應該以「收息」為主，唔好對股價有太大期望。

而長和就是母公司，業務會較廣泛，至於長建，就較多在基建與公用事業類。

其實兩隻都得。以收息來計，這刻的長建值博率會高D。

至於盈富（2800），是平穩增長及收息股，特別是佢有平衡風險的作用，因為這是一個50股的組合，對不少投資者來說，就算不懂選股，投資盈富都已是一個很好的選擇。

你可以以盈富作核心，再投資長建等其他股。

如果你未有把握平貴，未有把握時機的能力，就用月供，或自行分注的模式投資。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17383：

你好，我想問下，我現在有20萬可以作投資用途，但我從來未試過投資，對投資沒有經驗

想買一些穩陣啲收息股當儲蓄用途，有什麼意見給我呀？萬分感激

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

如果你不想月供，就自行分注。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

如果你想投資收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）都可以。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17384：

Hello 成Sir，本人現有7隻股票，分別係煤氣、港鐵、領展、友邦、金沙、太古、盈富。全部都在水桶二或三。我想趁年輕增加進取度。

上次問完你如何優化現在組合，但仍然未知加邊隻潛力股好，睇完你既書有好幾隻都有興趣，(小米、比亞迪、中國鐵塔、平安好醫生、中生製藥、阿里)。

每一間潛力都唔錯，所以請你比意見小弟應該先選邊一、兩隻較好。同埋佢地既合理區或平宜區。

謝謝成老師。

龔成老師：

對，你現時的組合是較為保守，在配置上反而唔夠平衡，因此增加翻潛力股是應該的。

上述你講的，都是有質素，可長線投資的股票，不過部分已有少少貴，你這刻可以考慮中國鐵塔（0788），小米（1810）小注仍可。

不少都要回落1、2成先合理，要大跌先會算平。

------------------------------------------------

Q17385：

龔老師，你好！本人40歲左右；由去年開始月供股票：
0003: $1500
0066: $2000
0669: $2000

不知這幾隻月供股票如何？
打算停供 0003，改供：
1177: $1500
9988: $1500

這改變好嗎？
謝謝你的解答！

龔成老師：

以質素來說，你現時所供的3隻股，都是有質素的。不過，煤氣（0003）與港鐵（0066）的增長力的確不算強，只是平穩增長型，以收息類。

如果你想增加組合的增長力，將煤氣改為阿里（9988）及中生製（1177）去月供，的確是可以的。

至於你原有的貨，可以長線的。

現時大市波動，因此唔好用盡現金，要有現金留作等機會投資。

------------------------------------------------

Q17386：

請問如果而家想開始月供股票。每月$10000。 應選哪隻？

阿里巴巴？港交所？騰訊？
但三隻而家都升得好勁。
還應作月供嗎？你有咩提議？謝

龔成老師：

上述3股，都是有質素，有增長力的股票，可長線投資。其實月供都無問題，不過現價的確唔平，所以，你可以減少金額。

例如，你可以這刻供盈富（$5500）、這3股每隻供$1500。如果這3股的股票下跌，就加大翻個月供金額。

另外，你要留有現金，唔好完全將資金供晒。有現金當大市出現較大回落時，就可以把握到機會。

------------------------------------------------

Q17387：

龔成老師，我$44買了第一注1211（2手），原打算再跌10%再入第二注，但未跌夠10%就已回頭升上去，心態上好似要低於第一注買入價才能再買，但我發覺這樣做就買不了第二注。

想問如果買了第一注後，向上升幾多就要入第二注？應如何部署？如果只得兩手，是否不適合「升一倍，放一半」？就這樣一直持有？

P.S. 好開心接觸到老師的post及書，十幾年買股經驗，才第一次買啱股。

從前不懂得遊戲規則，還敢去買股，平時自己好慳，不知道從何而來的勇氣，可以忍受不停倒錢落海。老師令我學到好多嘢，令我有動力去學投資賺錢。從前的我，只滿足於現狀，覺得能到此已覺得不錯。

在看了你的故事後，才發覺自己不能滿足於現狀，更加要不斷提升自己，賺更多的錢才對。真的十分欣賞老師的上進心同努力，你是值得成功的。

現在正努力看老師的書，當看完老師的所有著作，有齊基本投資知識，就有信心報老師的班了。（因為唔聰明，所以書本上有些地方還是不太明白，要反覆閱讀同思考。）

龔成老師：

你已行在正確的方向，只要保持學習就得。

買優質股長線投資，說點是不變的，由於我地無人能估到幾時先係最低位，所以會建議用分注投資的模式進行。

無一種投資策略是完美的，我地只有用較平衡的做法。你分注投入，已經是正確的方法。不過，就算分注，也分好多種，例如時間平均法（唔理價，每隔一段時間入一次），價格平均法，你運用的就是其中一種。

當我地運用時，可以配合平貴去做。你每跌10%入一注，可以，如果當佢升上去，而有實質的利好消息，令佢要跌落去便宜區不易，只要佢是優質，同時在合理區，都可以投資，但力度就比之前便宜區買入時較少。

如果你只有兩手，佔你組合比例不多，可持有。除非升得再多，就考慮賣一手，餘下長線。

------------------------------------------------

Q17388：

早晨師傅，2018瑞聲我之前$38 入了一注，之後一直升未有再入，現時54 值博率少咗，未知此價合理嗎？
近日實體經濟未上，股市返而行快

學你所講，唔理短期市況，在乎平貴， 企業質素

1211 $34 入，一定一直長缐持有，我都相信國內電車將有好發展⋯⋯耐心等佢成長

龔成老師：

股市會行先過經濟，所以分析時都要考慮前景因素。

瑞聲（2018）有質素的，長遠有增長力，$5X已經是合理區較上部，雖然未算貴，投資價值相對較少。原有貨就耐心持有，但就唔需要太急入貨。

至於比亞迪（1211）有質素，可長線。當然近期股價升了不少，但我會大部分貨長線的。

------------------------------------------------

Q17389：

老師，可否講解下隻1830咁高息，但老師你又覺得好有潛力，吾係通常派高息的股票都吾會留資金去發展嗎？謝謝

龔成老師：

對大部分企業，你上述所講是正確的。

但必瘦站（1830）現金流強，佢管理層想發展國內業務，就算有不少資金用作派息，仍有一定的現金，佢的增長力都仍在。

當然，我地會認為佢不夠進取。

但如果從業務發展角度分析，這股有潛力的。

------------------------------------------------

Q17390：

龔sir你好，我是澳門人，今年40歲，澳門工作，家庭情況一家三口，我本身有固定職業，年薪約72萬，太太剛開始做兼職網購

收入不穩定，一家人工資加政府派錢及其他收入，一年收入＞75萬，有居住物業，不用供款，支出為每月父母家用4000

小孩學費每月2000，興趣班約3000，（另有網課已預繳1-2年費用），每月保險支出6000，基本每月固定支出為15000

貯蓄方面：月供股票8000(包括港鐵，恆基，盈富），另每月存款23000，餘款為餐飲及旅遊等日常生活開銷，現金存款有25萬葡幣及75萬人民幣。

本身沒有投資習慣，去年開始以月供股形式買入港鐵及恆基各2000，看了你的fb後近日月供4000盈富。

想請教這類型的收入及支出結構，還有哪一方面的投資可以加強，改善退休生活呢？

同時亦有考慮購置物業自住，現時物業放租，如需購置物業，首期大概可以準備250萬左右，現自住物業租值約8000-10000，謝謝。

龔成老師：

你這刻可以先利用股票作為財富增值，好好利用這刻持有的現金，至於物業，可以下一步先進行，等你利用現時的資金盡力滾大財富先。

你可以運用「先增值，後現金流」作方法，初期應投資較多增值類資產，當財富已增值後，則應投資較多保守類項目。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，未必適合太進取，可投資平穩增長股。

你可以好好利用現金，要適當投資，分注投資，同時留有一半現金，已經是一個好方法。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少，注碼要控制，又或等回少少先入。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17391：

老師，幫朋友問的，如果想主攻內地股：
阿里巴巴
小米集團
騰訊
中芯國際
中興通訊
中國人壽
中國平安
再加隻港交所的話，八隻入面想選五隻做月供，以長期買入為目標投資。應如何選擇？感謝

另外我自己一直月供緊的十隻：

煤氣，恒基，港鐵，中國鐵塔，領展，華潤置地，中國生物製藥，比亞迪，金莎，盈富。

現時是否需作一些調整？例如部分換成一些上面問到的內地股？感謝老師

另外想問埋閱文同眾安，依類新經濟上既股票，又適唔適合月供持有呢？十分感激。

龔成老師：

無論是你還是你的朋友，都要明白一點，我地要建立一個平衡的組合，當中要優質股，同時要利用平衡去減少風險。內地股、本地股、新經濟股、舊經濟股，都有當中的價值，唔好太集中某一類，但都唔好沒有某一類。

你朋友的選股，都是有質素的，但不少都是近期較熱的，所以要留意。

可以選阿里（9988）、小米（1810）、平安（2318）、港交所（0388），如果加一隻盈富（2800）會更好。

至於你自己的組合，的確可以加翻少少新經濟的類別。

至於閱文（0772）同眾安（6060），未必值得月供，反而自行入部分的貨就得。

------------------------------------------------

Q17392：

你好啊SIR 我今年29歲 有100萬 我現時已有樓自住 我組合左個餅
我打算月供3萬元 分別係:

盈富基金 9000元 佔組合30%

潛力股: 中生 比亞迪 鐵塔 各3000元 佔組合30%

優質股: 中華煤氣 恒基 領展 港鐵 銀娛 港交所 各2000元 佔組合40%

請問我以上既配至可以嗎?
定還是要集中返小小?
期待你既回覆!

龔成老師：

你上述所供的，都是有質素的股票，都是適合月供的股。

29歲，其實可以進取少少，如果你能承受風險，可以將潛力股比例加至40%。

另外，你優質股部分，股數有點多，你可以考慮集中翻少少。

你現時有$100萬，每月供$3萬去慢慢將資金投資到股票，是很好的方法，同時，當你見到大市有較大的回落時，其實可以動用現金，以一手手模式去入貨。

------------------------------------------------

Q17393：

龔老師你好，大市最近都升，你說過 「別人喜悅時，我擔憂」，這第一次以合理價錢 （2.24） 買入楓葉教育

本身打算長期持有，但每今天它又升至2.8 以上。我明白放出的原因只會企業質素改變才賣，但這次不明白為何市場會如此升幅，令我反而十分擔心。

希望老師指教，可以如何面對突然的股價升幅或者過分樂觀的經濟環境？ 我目前 是以2成現金 8成股票的資產比例，我想增持現金，令下次入貨可以有更充裕的資金，麻煩老師。

龔成老師：

大市升了不少，我地的確要提高風險意識，不過，這刻未到全面地過熱。同時，我地都要每隻股，從業務基本面去分析的。

楓葉教育（1317）有質素的，但升翻除了因為整體大市氣氛好轉外，另一原因是佢之後跌得較多，加上市場對中國經濟的負面情緒減，佢業務亦不算差，都帶動這股向上。這股暫時仍是合理價。

現時你2成現金，並不算多，如再買入股票就不要急，甚至當見到某些股升得較多，可以賣少少。

------------------------------------------------

Q17394：

你好老師 前排1810大概$10水平時本身考慮買入，可惜佢財報之前唔算靚，而又比較少數據去分析，所以最後猶豫了幾日都係冇買入

點知出左新聞佢係手機公司行業內收益增長最高，之前想買入時股價都升左10-20%了

宜家直程升左50%，好後悔當時冇買入，如果宜家先高追買入，會唔會係不智既決定?

龔成老師

小米（1810）有潛力的，當我地分析潛力股時，雖然都會睇過往的財務數據，但會更著重將來的情況，這股在《50優質潛力股》都有推，你會見到不少分析點都是一些長遠的方向。

例如這股現時的賺錢能力不強，但卻是建立一個「小米生態圈」，而當中的潛力要時間發揮的。

現價處合理區頂，大約處最初上市價水平，當初我都有講過這上市價略貴。近年企業價值略有增加，所以這個價大約由貴，去到合理區頂。

如果想入，可以少少地一注先，之後等跌先正式入，到時都要分注。

------------------------------------------------

Q17395：

你好呀龔生，上星期我放哂 比亞迪，由上年4月月供，到今日賺咗兩萬蚊左右，因為眼見佢升得太勁

見到收市價再升多D，不過冇得後悔，我聽你講是潛力股，所以上年月供，但隻月供2800 輸緊我 4萬幾蚊

龔成老師：

比亞迪（1211）是潛力股，其實我會建議更長線的投資，雖然近期升了不少，但我會建議最多只賣部分，餘下要有貨長線，這樣會更好。

至於盈富（2800），你保持長線月供就得，無野擔心。

------------------------------------------------

Q17396：

我想問，如果我想攪網店代購泰國產品，我何從入手，我有個泰國朋友係泰國

龔成老師：

第一，你要想「市場需求」，你不是賣你想賣的野，而是要賣「市場需要的物業」，如果你是賣給香港人，你就要想想，香港人想買那些野，你怎樣幫佢地買到，可能是現時市面上沒有，又或較難找到的。

找到方向後，下一步你就要找供應，如果能找到對手找不到的供應，你就可以搶到市場。

你最初可以試水溫先，你未必知道香港人喜歡那一類產品，但可以試，有時好多野，試試下就找到，當找到基一類別後，就再加大力度發展。

------------------------------------------------

Q17397：

你好龔成老師，剛接觸好多野在摸索中，我想從收息股開始我既理財計劃。
如何分收息股？

是否買入該公司股票就能獲得派息？

龔成老師：

買入股票就是買入一間企業的部分擁有權，當這企業賺到錢，就有機會派息，你就會收到股息。

當然，這些派息並不是固定，有可能派或唔派。

如果你想買入收息股，最好找一些業務穩定，盈利穩定，派息穩定的公司。例如港燈（2638）、香港電訊（6823）、置富（0778）、陽光（0435）都可以。

你買入後，就會按你持股，在派息日派息，例如你買入了1000股，而佢每股是派$1，你就會收到$1。有些股票會一年派幾次息，有些則會一年一次，這些都可以在財經網站找到。

另外，佢有一日叫「除淨日」，這日子是用作界定你有無息收，你要在這日之前一日的收市，有貨，佢就會派息比你。

------------------------------------------------

Q17398：

老師你好，想請教一下
我同先生今年33歲
家庭現有現金120萬，另有788股值大概40萬（1.8買入）
已有自置物業

我有2個歲幾2歲既小朋友
希望買股票投資，讓2位小朋友長大後有錢買樓比首期

1. 我應該單純買收息股or潛力股or穩定增長股？
可推介一下嗎？

2. 如低位買入，見到該股票升，應該沽出賺左先嗎？
Or 長線放係度唔好搞佢？

當然除左幫小朋友儲首期外，自己亦想增加現金流

3. 可推介一下嗎？

另外我見老師你有好多著作
我係一個新手，之前都係短炒賺下外快
想學習如何選股

4. 請問買邊本著作適合我？

先謝謝老師你的指教

多問一個問題，939建行老師建議買嗎？

龔成老師：

1）以你的年齡，可以加多少少潛力股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以投資「平穩增長股」+「潛力股」，如果你投資能力不算強，潛力股比例就唔好太多。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少，買入金額唔好太多。

2）如果有質素的股，應該長線。

或者當你見到升得較多時，而你又唔識分析平貴，可以用「升一倍，賣一半」的策略。

3）唔建議短炒，因為根本就唔會賺到錢，這是我多年經驗之談，以及過往做銀行及證券行，見證客戶成績的結論。

4）《股票勝經》。

建行（0939），可投資，但未必最適合你，因為只是收息股。

另外，你太集中在單一股票，雖然中國鐵塔（0788）有質素，但都不能太集中，這會有一定的風險。

------------------------------------------------

Q17399：

你好 龔成老師想請問 005匯豐 現價是否合理區?

股價因不派息同受制裁而降低，若然預期市況好轉，公司應該不會一直不派息，到再派息一刻應該會有較大上升空間，該分析是否合理?

龔成老師：

匯控（0005）之前宣布取消派發2019年第四次股息，在過往經濟較差時期，其實都無試過停止派息，今次有少少突然。

睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。

------------------------------------------------

Q17400：

龔先生，你好！在facebook睇到你寫的經濟投資文章，對於你所分析的資訊覺得非常精彩

本人現在還有5年退休，上年承繼了母親遺產，想用部份100萬投資股票，其餘定期，我單親有4子女，三個女兒已工作

兒子剛考完DSE,成績難直上大學，現住公屋，想請教本人可以如何安排投資

本人想將來可換居屋，但是我已退休，兒子又不知將來會有冇能力供，另外我如果買居屋，退休後又沒有了積蓄，該如何是好，煩請龔先生指教。謝謝你

龔成老師：

以你的情況，暫時唔太建議買樓。你可以投資現金及一些低風險類別的資產，這在配置上會較好。

簡單來說，你的配置方向，就是「低風險，現金流類別」。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

第二，你亦可投資銀行低風險類的產品，你可自行到銀行了解下，總之是「低風險，持續現金流」的。

第三，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。