【龔成問答信箱】（Q22061-Q22080）

Q22061：

龔sir, 本人52歲，早年對股票市場沒有深入認識，便跟朋友一起買入股票，97年全部變晒蟹貨，朋友話同佢鬥長命，所以全部都沒有放出，

但有些已100合1，變為單位數股票，想放出也蝕手續費。

最近這兩個月開始睇你Facebook, 覺得應該要整合一下手上的股票，不應採取放任不管態度，要選擇一些適合自己年齡的投資組合。想問以下股票是否應全部放出？

0604(深圳控股）
0622(威華達控股）
0697(首程控股）
0759(CEC國際控股）
0887(英皇鐘錶）

0910(中國三迪）
1168(百仕達）
1339(中國人民保險）
1387(中國地利）

1466(錢唐控股）
8173(萬亞企業）
8178(中國訊息）
8311(圓美光電）

手上還有以下賺的股票，是否應繼續持有？

0354(中軟國際）
0700(騰訊）
1810(小米集團）IPO
2158(醫渡科技）IPO
6618(京東健康）IPO

睇左你facebook後，上月買入以下股票。

2382(舜宇光學）月供$2000
2800(盈富基金）月供$2000
6823(香港電訊）2000股

月入3萬，扣除開支後可儲蓄$5000，.流動資金$1,200,000. 應怎樣運用現有資金，來選擇適合的投資組合。

龔成老師︰

我地投資一隻股票，就如投資一間企業。如果你係無質素架股票，不論而一刻係賺定蝕，你都應該要沽出。

唔好諗住同佢鬥長命，因為無質素架股票，可以越跌越深，去到一個低賤的你估唔到的水平。所以要果斷，無質素就要沽出，將資金收回，用於有價值的股票身上，才是正確做法。

另外，你唔好再單係聽朋友講，或者聽消息就去買貨。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

以你52歲計，現時月供的股票都無問題。至於，你現有持股方面。中國人民保險(1339)有質素，你可以長線持有。

深圳控股(0604)、首程控股(0697)都可持有，但質素較一般，不宜持有太多。

中國軟件國際(0354)、騰訊(0700)、小米(1810)、醫渡科技(2158)、京東健康(6618)係有質素的潛力股，由於佢地風險較高，以你年紀不宜持有太多，最多只可佔組合2成。

其餘股票，質素較弱，甚至係無投資價值，建議最好沽出，換至其他優質股較好。

未來時來，你可以用以下股票作目標，當中以平穏增長股為主力。但隨著年齡增加，慢慢增加收息股的比例。到退休時，你收息股比例，應提升至100%。

現時大市只係合理水平，現金佔比重大約3-5成。你可以睇翻自已現金和股票比重，決定是否再投入更多資金入市。若然係再入市，緊記係分注慢慢入，唔好一次入晒，以減低買貴貨機會。

------------------------------------------------

Q22062：

老師， 8367 倩碧是麻孫樂控股公司，上月見價位低殘，買一百萬股都是十一萬左右。 之後減磅兩次，仍有六十餘萬，繼續揸擔心一天瀉九成。 可以點處理？

龔成老師︰

倩碧控股(8367)集團於香港以「麻酸樂╱嫲孫樂」、「峇峇娘惹」及「泰巷」三個自營品牌經營。另外，有提供特許經營商經營，供中式麵食、泰國菜式，日本菜式及馬來西亞菜式。

此規模唔算大，營業額唔算多，而且有按年下跌的情況。過去企業多年虧損，2021年表面上係轉虧為盈。但實際上，只係公平值變動(一些會計數字，而非實際收入)會造成。

實際上，佢過去4年都係維持虧損狀況(包括2021年)。睇唔倒有乜明顯因素，支持佢近期大升。

遇到這些情況，我地就要好小心。而且企業本身無明顯投資價值，建議盡快沽出較好。

------------------------------------------------

Q22063：

龔成老師，你好呀！之前問過你有關投資股票嘅問題，因為等佢價格高啲先放，所以現在冇變動過。仍然係以下咁：

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

現在問題是我嘅租約差唔多滿，有現金和以上股票200萬左右。請問我應唔應該賣晒啲股票，用我190萬左右嘅錢去做down-payment 買樓，做6成按揭呢？

因為供樓同我現在租金一樣。我想買嘅係一個272呎嘅元朗開放式單位自己住，供樓連管理費會是$12000內。請問我嘅投資方向啱嗎？

因為份工剛剛做，要到出年才有稅單可以做8到9成按揭，又怕出年更貴，應該怎麼樣更好呢？ 麻煩老師解答，萬分感謝！

龔成老師︰

現時貸款息率唔高，其實盡借長線只會貶值的現金。之後，再將空出來的資金做投資增值，咁會較好。

至於明年樓價會點，無人知。但從長線投資角度考慮，你用低成數按揭，長線可以投資資金會縮細，在現時市況，對你係不利。

現時持有股票，都係有質素，長線持有就可以。

明源雲(0909)和美團(3690)不確定性較高，不宜持有太多。

另外，你非常集中係華潤啤酒（0291），佔組合近一半。記住，個別企業和行業，不要佔組合15%和30%以上，否則會有過度集中性風險。

因此，你要沽出停份，去平衡風險。

------------------------------------------------

Q22064：

龔SIR你好~~我係上年PM問你供股既建議，供左大概九個月，一開始你叫我拎5K月供真係好心痛，後來我減少開支再諗辦法做副業，真係比我做到月供5K!!!

見到有正數增長真係好開心(大概8%)!! 呢一年努力抗疫唔出街，總共儲左10零萬(拎左8萬左右投資)，自己做副業賺左萬零蚊,

雖然好少錢，拎去入左一手IBOND打算賺少少，錢搵錢呢個感覺真係好好。

加上好好運咁逆市升職，加左家用比父母，佢地又開心左～我覺得自己好適合做月供，個心好定，唔洗成日望住個市影響心情！可以用多D時間專注正副職/讀書。

本來手上有5萬左右現金，不過拎左去大學交學費， 再學埋電單車， 比我用晒了…而家無錢入市啦, 只可以月供， 不過D錢投資自己身上我覺得值得既!

未來打算加大個月供計劃！每個月總共可以儲1萬至1萬3～

而家調整緊個計劃，想問下你既意見～

1. 我應該繼續用5K月供,定加到6K?

2. 月供2800 價位約$27, 我可唔可以停左等到價位回落先再供?用筆錢供其他股票?

3. 如果已經有1810, 1211, 9988, 2158, 6618呢幾隻股票係手, 我應唔應該供3067?

9988而家月供緊, 其他暫時無供. 1810, 1211等價位低先再供. (暫時主力供823, 9988, 1177, 2638, 2800)

4. 最近考左電單車牌, 打算買車送外賣/送貨之類.（期望每月賺多$3-5K, 因為我係女仔, 第一比人話危險, 二黎比人笑我無出息, 但我唔理旁人既眼光, 我要賺錢呀!!!!)

a. 假設我手上有四萬現金:
i. 直接全數買車
ii. 兩萬蚊去分注月供股票, 留兩萬係手, 用信月卡分期12個月供車, 利息大約0.15-0.18% . 如果供股票想揀2638, 打算派息可以cover信用卡大部份既利息.

5. 思想上唔夠進取, 唔敢100%拎晒去買潛力股, 所以揀月供2638, 咁樣係咪好蝕底呀?

多謝老師花時間睇我既問題!!

龔成老師︰

現時你理財方向，都正確，要保持住。同時，你努力學習，去提升自己投資知識。

1) 如果每月係可以穏定儲到$12000，你就應將月供加大至$6000

2) 唔建議，首先，我地只會係去到好貴架水平，才會考慮減供款或停供。但現價計，盈富(2800)只在合理水平，不需要調整供款。

另外，你投資經驗不多，我唔建議你咁快自行決定調整供款策略。因為如果你調整時機不對，會大大影響長線平均價格效果，令長線回報受影響。

除非你對定平貴，係好有信心。否則一直不理價格，去長線月供，反而對你係最有利。

3) 港燈(2638)係收息股，增長力不高。你現時29歲，應以增值為主，故此股不適合你作為月供目標。

至於安碩恒生科技(3067)，你去月供係可以。只要你科技股(9988, 1810, 3067)，唔好佔超過組合3成。同時間，潛力股(1810, 1211, 9988, 2158, 6618, 3067, 1177)唔好高於組合4-5成，咁就可以。

小米(1810)現價略貴，但月供還是可以。而比亞迪(1211)現價係貴，月供最好等回到$17X才考慮。

4) 其實工作，都無性別之分。你唔洗太理別人眼光，做正確的事，永遠都是對的。

以利息率計，用分期買車，再去投資收息股，係會較理想。但你要明白，股票始終會有價格波動，有機會賺息蝕價，你要明這個風險。

另外，你都要了解清楚，這個是否真正總年息，會否有其他潛在費用，才去做決定。

5) 我地投資，除左年紀係考慮因素外，投資經驗和風險承受能力，都係一個考慮。所以，無話絕對的對與錯，重點係是否適合你。

以你年紀，港燈(2638)的確會係較保守。但要去到100%潛力股，你個組合風險，又會出現過高情況。

你可以用一半平穏增長股，一半潛力股作組合，這樣組合平衡性會較好。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22065：

龔Sir，感謝你在股票班最後一堂的個人分享，聽到我眼濕濕。實在太有共鳴，亦自愧不如。

我嘅成長環境同老師你有啲似，都係成長於公屋家庭，居住環境擠逼，由於長期缺乏私人空間，非常渴望擁有自己居住的房屋單位，

但礙於香港樓價高企，個人經濟能力有限，一直處於半放棄（人生）狀態。

自愧不如的是比老師你行慢好多好多步。老師在十多歲嘅時候已經定下目標，立定決心，付出超乎常人嘅努力，28歲嘅時候賺到第一個100萬，反觀現時27歲嘅自己才剛剛起步。

不智嘅我都曾經怪責父母嘅不努力，甚至抱怨不想被生下來，傷害了彼此。

現在明白父母給予自己最寶貴的禮物是生命，財務知識可以自己學，錢應該自己搵，人生掌握在自己手中，將來由自己親手構建。

當人立志成為優質股、潛力股、倍升股，定必增長迅速，回報驚人。深願能夠運用所學，日後向老師你匯報成果。

龔成老師︰

你現在才27歲，現在努力去做好財富增值，未算遲。這是你最大的本錢，只是你這刻努力，一定能完成到目標！

其實，好多外在的客觀環境，唔到我地去改變。但我地可以改變自己，調整自己的心態。

你唔好覺得不如我，我都只係一個普通人，我做到的事，你都可以做得到，只要你相信自己。

上完課程後，你就當係一個新起點。努力去為自己人生定好計劃，比心機學好理財，相信很多你過往覺得的「不可能」，都會慢慢變成為看得見的「無限可能」。

同學，加油!

------------------------------------------------

Q22066：

老師，上年開始FOLLOW你的PAGE，亦很同意要買優質企業的看法。我亦已閱讀了你的4-5本書籍，亦閱讀了格雷厄姆、彼得林區、巴菲特的一些書籍。

透過購買優質股，我曾經浮收益超過6位數，我非常感謝！

然而，今年分析了968 後，認為該股是優質，故分注入了3手，分別是15、13及12，然而卻不斷下跌，收益不斷減少，令我反思是否應該斬倉...亦令我覺得不應該持續望住股票...希望將來可以好似老師甘可以令利財產增值。謝謝老師

老師，均價13.8入了3手968 信義光能，請問是否應止蝕？

老師，一直都想入完美醫療，但見佢業績持續向好，股價亦不斷上升。想問下老師，此隻股是否仍然5蚊左右才是合理區頂？

龔成老師：

其實，你保持用「價值投資法」就得，但要留意，這是長期性的，你中短期會有好多考驗。

信義光能（0968）是有質素的股，但你犯了幾個錯。

第一，你在貴的價位買入。

第二，你每次買入價相差太近，起碼要有10%以上，如果股價較波動的類別，要差15%。

第三，你應該等回去合理區先分注加注。

第四，你唔應該因為「股價下跌，就認為企業質素轉差」。

這股可以守的，但就要耐心點，如果你持貨不過多，無問題。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q22067：

Coinbase我係咪應該放手？

龔成老師︰

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

若你只係好少注，同時又睇好虛擬貨幣長遠發展，你可以守。若佢佔你組合較多，最好沽出部份，去平衡風險。

------------------------------------------------

Q22068：

您好，龔sir.，我想問您對Pre IPO有了解嗎？

我朋友佢話私募基金的回報高過股票，她提及到她將20萬本金放在系一個私募基金的項目裡，三到四個月連埋本金已賺40萬，她問我有冇興趣？

因為我的投資都是放系股票，對於Pre IPO相關資訊真是不太了解，而且回報率禁高，會不會有很大風險呢？

因為我聽她講就好似好低風險，但我始終都不太相信。按常理，高回報就高風險，但她提及的IPO好似有點有悖常理，所以想請教一下您，謝謝！

龔成老師︰

Pre IPO就係指企業在上市前(即IPO前)，進行的集資。

由於正式上市申請，係需要一段時間，有些企業就會用這個方法，去提前得到一些資金，用作上市前支援營運之用。

而Pre IPO基金多數會在上市時，就沽出這些股票獲利。由於上市前，一般估值較低，故潛在升幅會較大。一般這類股票基金，投資時間都唔長，可能講緊只係1,2年時間。

但你有留意我FB，我經常都會話，唔太建議投資IPO。因為可以參考數據好少，好難進行一個合理估值。而且好多時，企業真正表現，要1,2年先會睇得到，故投資風險會較大。

Pre IPO是未正式發表上市的企業，其可參考資訊，就更加少。甚至連佢最終能否上市，都會係一個問號。

我唔係話這類基金，全無投資價值。但你要明白當中潛在風險唔細，是否值得投資，你要自己衡量。

當然，我不是話這類項目不值得投資，只是「有風險，有回報」的類別，你要明白這點。

就算你最終決定投資，你都要控制注碼。永遠我地都要係「先知風險，後想回報」。

------------------------------------------------

Q22069：

老師你好！我跟咗你嘅投資方法三年，而家手上有超過一半係潛力股。我有限住自己每個月至少要供幾多錢，但有時手上嘅股票價格又偏貴唔想再入住，久而久之就越買越多隻股票，而家已經有14隻。

除咗股票數量太多之外，有時咁啱果個月得某一隻股票係合理價我就會買晒佢，好似而家9988已經佔我嘅投資18%。

我知道老師講過單一股票唔好超過15%，但而家佢係喺我手上已有嘅股票中價格最合理嘅。我唔想再增加股票嘅數量，但又無理由買其他貴貨。

龔成老師：

如果你出現愈買愈多的情況，反映你買入前，無經過仔細思考、研究，小心作決定，我在股票班，會派一份6頁紙的「企業評估表」

要求學員，每次買股票之前，都要填好先買，目的是希望令佢地，確保買入的都是有質素的股，以及睇得好準先會買。

阿里（9988）這刻，你只有不要再增持，到之後你有資金，慢慢配置到其他股票，阿里的%自然會減少。這動作不用急，長遠進行就得。

------------------------------------------------

Q22070：

老師你好，我兩三個月前開始見到你FB, 見到你教投資，有看你回答大家嘅問題，睇咗你嘅80後百萬富翁，而家睇緊股票勝經，

我47歲，有幫爸爸和女兒投資，持有以下股票。另外1063唔識點處理，結果而家價值得返$300幾，而家見到6808又跌到$5個幾，應該繼續長遠持有還是換出？

請你指導吓，謝謝老師！

本人持人
1. 9988 阿里爸爸 200股 $245.80
2. 9618 京東 500股 $397.40
3. 3690 美團 400股 $389.80
4. 0909 明源雲 2000股 $54 + 1000股 $45.80
5. 2013 微盟 4000股 $26.05

6. 2318 中國平安 2000股 $97.15 + 500股 $89.10
7. 1211 比亞廸股份 500股 $150.80 + 500股 $147.30
8. 6808 高鑫零售 3000股 $10.20
9. 3738 阜博集團 1000股 $32
10. 1398 工商 19000股 $5.73
11. 1063 新確科技 60000股 $1.38

爸爸80歲
1. 2888 渣打 300股 $105 + 300股 $77.80
2. 0003 中華煤氣 2000股 $14.88 + 100股 送嘅
3. 2318 中國平安 1000股 $95.70 + 500股 $91.30

用女兒利是錢幫佢投資
1. 2800 盈富 500股 $25.88
2. 3067 安碩恒生科技 200股 $17.83

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你地3個人的人生階段不同，所以投資方法和目標，都會有分別。

先講你女兒，佢年輕，可以增長為主。你現時這個組合，已經係可以。

若你想增長力較高，可以多儲安碩恒生科技(3067)。但此股波動性會較大，要睇翻你自已風險承受能力。

至於你父親，由於已經係退休人士，重點唔會再係增值部份，應以收息股為主。透過股息的現金流，去支援佢退休生活上支出。

渣打集團（2888）質素只是一般，建議換碼。而煤氣(0003)和平安(2318)都有質素，可持有。

未來若你加大你父親投資，應集中收息股。以下都係有質素的收息股，你可以從中參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

至於你本人組合，以你47歲計，增長係需要，但要慢慢轉得保守點。

高鑫零售(6808)質素較中等，不宜持有太多。

新確科技(1063)主要於香港從事電話及相關產品之設計及銷售等業務。

這股規模細，加上多年出現虧損，暫時睇唔倒有投資價值，建議你沽出。

中國平安(2318)、工行(1398)有質素，可持有。

較大問題，係潛力股類股票(9988, 9618, 3690, 0909, 2013, 1211, 3738)你持有太多。以你年紀，最多只可以佔4成，而且要慢慢開始下調至2成。

現有持股，可以唔洗沽。但將來，你投資上應較集中平穏增長股部份，令組合風險水平，慢慢回復平衡。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22071：

老師最近睇緊千萬富翁， 內容話到如果依家工作發展前景有限 就要轉工轉職位 尋求突破。

關於哩點 我想問下 如果我覺得我依家工作唔會有好大突破

但係我本身工作經驗唔多同時又岩岩得到哩份工冇耐， 咁嘅情況下要繼續留待 或者 搵機會轉工會好d？

龔成老師：

你要以5年、10年，作為思考的單位，現時的工作，對你長遠有無用？

如果無用，就要轉，轉是大方向，但是否這刻轉，或一年後轉，就要睇你自己的情況。

如果你本身工作經驗唔多，就可以先在現時工作，做1年先，等你有工作經驗先轉。又或者，你繼續翻現時工作，同時，尋找自己想發展的工作，如果找到，就辭工。

總之，你要思考你的大方向。然後就要想想，現時選擇那些工，最有機會完成到你的大方向。

------------------------------------------------

Q22072：

你好，我見恆安國際1044 數據都不差，現價入是否值得長線渣？

Pe 純利 股東資金回報都好
唯早前亦回購了數次

龔成老師：

對，恆安國際（1044）的財務數據不差的，不過，企業的發展與增長力就不強，佢主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

------------------------------------------------

Q22073：

龔成老師，請問5M可以買什麼樓來放租？可以考慮那些區域？6年後退休，現在應否做按揭？謝謝！

龔成老師︰

其實無話特定乜野樓會較好，藍籌屋苑會加分，尺寸最好近300呎，符合一個家庭基本需要。

你要睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

現時息口低，承做按揭，再用多出資金去投資，相信會較好。

但由於你已近退休之年，按揭未必批倒好長年期，故壓力測試上，可能要求會因此而高左。在選擇物業時，你要考慮埋這因素，具體你要問清楚地產經網、銀行，了解清楚先。

------------------------------------------------

Q22074：

老師你好，我黎緊有計劃生完2胎就辭職，因為無人湊BB。你會建議我現階段應該點樣投資？

(先生份糧 + 被動收入可以支撐大部分家庭開支) 我之前買既增長股依家都係負數居多，現階段我應該考慮買返d內銀/ 公用股 收息嗎？

或係我應該買3067/2845 呢類etf嗎？ (手上大約有10萬可投資)

龔成老師︰

我地投資，係應先處理好防守部份(日常生活)，才去進攻(財富增值)。

由於你會做全職媽咪，家庭收入會少了一部份，故首要任務，是要先做到收支平穏。因此，現時支援緊你日常基本開支的收息股，我建議你就唔好變動。

若收支平衡上，依然有一定缺口，你可以將部份平穏增長股，轉移至收息股，去增加家庭現金流。

若已經大致收支平衡到的話，你那些平穏增長股，照持有就可以，讓其繼續為你財富增值。除非佢質素係有問題，否則唔好太在意中短期波動，一直長線持有就可以。

至於3067/2845這類較有增長力的潛力股，到你家庭收支平衡之餘，每月都可以空出一定資金，才作考慮。

至於你手上10萬，我建議你留在身邊，作為應急錢，會較為理想。

------------------------------------------------

Q22075：

你好老師，萬分感謝你的回覆和提供詳細的資訊及分析！

不好意思，這麼遲回覆你，因技術性問題今日先開通富途牛牛戶口。

交代小小我的個人資料，我現43歲，自住物業沒有按揭(已供完)，有物業放租(但租金全數比按揭，按揭還有8年)，現60萬現金，

另20萬要6年後先可取出(兒子出世時買的小狀元儲蓄保險)，現每月可儲HKD13000，現計劃分階段投入20萬作投資股票。

如我選擇五隻平穩增長股作為我開始、首次投資股票，我會以"分注"形式，以下每隻股票先買一手，然後留意價位再每手每手入?

1）盈富(2800)
2）金沙(1928)
3）中銀(2388)
4）港鐵(0066)
5）粵海(0270)

這樣可行嗎？以上這5隻股長揸的話最少多少年較好？這5隻股現在入貨是合理區嗎？

另想問中國鐵塔00788你點睇？

謝謝老師！麻煩晒你！感謝

龔成老師︰

你現時已持有2個物業，成個組合係物業類比重好高。未來時間，應集中投入股市，令組合更平衡。

以你年紀，都有一定增值需要，你現時這個組合係可以。如果你想再進取少少，可以加入少少潛力股。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

至於你目標的5隻平穏增長股，都在合理區，現價可以先入一注。每再回10-15%，就再加注，直至資金用完。

另外，每月儲起的$13000，都可以做月供股票。每月先用一半儲蓄做月供，另一半就儲起，等大跌市機會。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。長遠仍算有發展力，可長線。不過，潛力度比過往略減。

這股都適合你年紀，現價可以分注入貨。

------------------------------------------------

Q22076：

你好，老師，有個方法想問你可唔可行，小弟有一層自住樓，已供完，銀行估值600萬，現想加按360萬，分10年還，連本金利息400萬

我計劃：

買1隻穩陣收息股100萬(做膽)，買10隻穩陣不同行業優質股做腳20萬x10隻，淨番60萬一半定下期一半慢慢還款，用曬之後將1隻腳賣走，用來還款，用曬再賣，用曬再賣咁

(當然首選揀隻賺的腳賣啦)10年後，淨反個膽100萬

這方法可行嗎？可以叫做無本生利嗎？

10年叫做無本賺100萬

謝謝老師解答

龔成老師︰

現時息率低，透過借貨去投資，從而賺取息差，係可以。

但有兩大風險，你一定要明白。

第一，借貸創造，表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

所有借貸投資，都不是無本生利，而是背後承受了一定的風險，我不是叫你不能做，而是做進行前，一定要明白當中風險，不要視為穩賺項目。

第二個風險，就是你個配置，有問題。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你膽拖這種模式，個膽一定會超過這個標準，令你出現過度集中性風險。

另外，定期本身回報不高，很大機會回報低於你本身借貨利息。變相，你已有一部份貸款，係無效率地運用，拖低了整個組合回報。

若你想用個定期，去平衡個組合風險。我建議你直接不借定期個部份資金，反而仲有利。

餘下資金，我建議你投資一些「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想組合增長力高一些，可以較集中「平穩增值股」。相反你想平穏少少，可以集中係「收息股」。

但成個計劃，你要明白一點。你係投資緊股票，就算最穏陣架收息股，都會有波動，有機會出現賺息蝕價情況，故你計劃係唔會100%穏賺。

而且，現時大市只在合理區，唔算係好平，這個風險就會更高。

現時大市只是合理區，你借款得來資金，可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

投資增值，其實唔洗諗到好複雜。只要你用我上述計劃，並長線持有這些優質股，其實已經很大機會，得到一個唔錯回報。

------------------------------------------------

Q22077：

你好 老師，又想麻煩你提點下我。

手頭只有各一手而已

-小米
-3067
-6618

我有10萬

1/ 應該繼續集中月供現有嘅小米，3067 ？

2/6618應該keep定放？其實擺起度都無所謂作長線？

3/ 依家手頭嘅好偏埋一邊 或應入手其他類別 （福壽園/金沙/銀娛/中電/地鐵/領展/比亞迪電子/700）

4/ 新能源股 可以建議邊啲我去study多啲？

再次感謝

龔成老師︰

1) 你現時3X歲，雖然投資上可以進取少少，但都不建議全部買晒潛力股。

佢地雖然有增長潛力，同時風險都較高，不宜持有過多。

以你年紀，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。以下平穏增長股，現價都在合理水平，可以分注入貨。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

月供你可以小注潛力股，較大注係平穏增長股，就可以做到平衡效果。

2) 京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大。但由於你只係小注，照持有就可以，但暫時唔好加注了。

3) 係偏向左潛力股，故應加大平穏增長股，去平衡翻個組合。

4) 信義光學(0968)和福萊特玻璃（6865）你可以研究下，但現價都在略貴水平，回多1成左右，值博率會較高。

------------------------------------------------

Q22078：

老師你好，我係投資新手，20歲。我看好未來奢侈品會有更大的市場，所以想投資相關股票，但香港相關股份較少。

我留意到美國有一隻LV ADR股票，LV集團覆蓋性廣，有品牌價值，全球通關後預期業績也會有增長，股價也每年穩步上升中，想問可以以分注買入的方法每月購入嗎？

除奢侈品股，我也看好未來醫美板塊，科技板塊和新能源板塊的發展，想問大方向正確嗎？我應該如何開始部署這些板塊的資產呢？有什麼股份老師比較推介？

謝謝，希望老師能抽空解答

龔成老師︰

LVMH Moet Hennessy Louis Vuitton SE(LVMUY)是一家法國的奢侈品集團，業務涉及六個領域：葡萄酒及烈酒、時裝及皮具、香水及化妝品、鐘錶及珠寶、精品零售及其他業務。

企業有一定品牌，都有投資價值。但畢竟業務以消費類奢侈品為主，較受經濟大環境，盈利會較波動。

這股票都有投資價值，但現價唔平，最多只宜好小注。利用月供儲貨，會較好。

至於你所講的板塊(醫藥業會係重點，醫美都有市場，但無醫藥類咁高潛力)，都係有潛力，同時會係未來大方向之一。

以下都是一些我較睇好的相關行業潛力股，你可以參考下。

潛力股︰安碩恒生科技(3067)、信義光能(0968)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你每月大約用一半儲蓄月供，另一半就儲起，等大跌市機會。

另外，潛力股雖然有增長潛力，同時風險都較高，不宜持有過多。

以你20歲年紀，潛力股可佔約5成，餘下應用以下平穏增長股。但由於你投資經驗較淺，潛力股比重，先用3成以下這個指標。到你學到一定投資知識，才慢慢調高。

餘下投資比重，你就配置在平穏增長股上，會令你組合更平衡。

------------------------------------------------

Q22079：

你好啊，龔成老師，我今年27歲，月入兩萬，每個月儲$5000，無月供股票。現時手頭上持有呢三隻股票：

1）中國移動0941 $47.9：1000
2）龍光集團3380 $11.7：2000
3）香港寬頻1310 $9.3：1000

因為我以前係短炒輸過錢，所以我現在就吾想再走回頭路。就想試下建個收息倉，慢慢打造被動收入。

但我見龔成老師通常都叫學員「先增值、後收息」咁我現在呢個想法是否太慢或者吾適合現在的我？求老師賜教

龔成老師︰

短炒係一個不正確投資方法，就算全球投資最賺錢的巴菲特，都唔會做短炒。

其實投資股票，就係等同投資一間企業，只要係有質素，你長線持有比時間佢自行增值，咁已經會有唔錯的回報。

我經常都會叫讀者和股票班同學，用「先增值，後現金流」作方法，去做投資增值。

意思係，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，就應以增值為主。中國移動(0941)和香港寬頻(1310)係收息股，增長力欠奉，不適合你。但由於持股不多，你可保留，但不要再加注。

龍光集團(3380)適合你，都有增長力，但負債佢比較多，風險會略高。現貨可持有，但暫時不要加注。

你現時這個組合，增長力太低。未來時間，我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股或潛力股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，你現在還很年青，應盡力去做去財富累積部份。我建議你每月最好可以空出一半薪金，去做月供，咁會較理想。

------------------------------------------------

Q22080：

龔成老師您好，本人之前高位買了中國財險（2328), 一路坐艇, 暫時賬面蝕了幾萬蚊。請問你覺得這股票前景如何，應繼續持還是換另一只股票。

本人心水完美醫療(1830)。求指導

龔成老師︰

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

若佢只係佔你組合不多，你可以持有。但若較多，你可以沽少少，去平衡翻個風險。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。如果本身有貨，就長線持有，但這刻就不要心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q12641-Q12660）

Q12641：

吖sir，我買齊你d書睇，依家睇緊選股聖經，書中有小小野想請教你，你話「高速增長」同「大環境」，高速增長定義是什麼，大環境意思是什麼，謝謝你

另外吖sir，太多問題好唔好意思，請問一間上市公司發行購股權在你角度看法是正面定負面？有人話係財技一種，thx

龔成老師：

長遠增長即是業務有好快速的增長，營業額的數字，每年都超過20%以上，而且你會見到佢的產品發展快速，用家人數快速增長，數年間的盈利以倍計增長。

至於大環境，即是整個經營環境，例如經濟、行業的情況，都對佢有利，令佢可以在一個有利做生意的情況下，高速發展。

一間上市公司，發行股權可能是運用財技，因為原理就是向原有股東集資，同時會攤薄左原有股東每一股的利益。

當然，我地要睇翻正式的情況，先可以下定論是否有問題，因為好多公司都會這樣做，可能企業真的要集資，令企業發展，但亦有些公司是對小股東不利的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12642：

唔該老師 自己都對會計有一定認識
有關潛力股 準則大約如何？

龔成老師：

潛力企業的分析，會比一般企業困難，因為分析點重「將來」多過「過去」，財務數據上，負債不能太多，最好有正現金流，至於生意與盈利，最好有較高的增長。ROE最好處高水平。

不過，好多時潛力股會著重產品及市場變化的分析，所以我在股票班中，會教5種選股方法，因為潛力股唔能夠單靠一些過往的指標分析。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12643：

龔成老師,唔知你點睇日清食品1475呢？
算唔算係有質素既股票？
有冇機會係倍升股？

龔成老師：

日清食品（1475）主要於香港及中國內地從事生產及銷售即食麵、冷凍食品及其他食品。

中國市場是佢增長的部分，現時佔佢營業額約半，相信將來有增長好間，前景不差，但要留意，股價都上升了少，要衡量投資值博率。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12644：

老師你好。本人今年已50歲，工作穩定，亦有穩定收入。今年4月份開始在中銀月供5隻股票，每隻$2000，合共供款$10000。

分別是恆生、港交所、長建、平保及盈富基金。本人打算每月再加供款$10000多供5隻股票。請問有何推介？

另外，本人現時強積金每月自願供款$5000至永明香港股票基金。如果再想享用政府強積金自願性供款扣稅優惠(即仍會繼續每月自願供款$5000至永明香港股票基金，雖然這部分並不能享用扣稅優惠)，本人有以下心水:

⑴ 月供$5000至永X港股基金，收費约為1.8%

⑵ 月供$5000至hsXX恆指基金，收費約為0.8%
你認為哪一個選擇較適合本人呢?

可否給一些意見？謝謝

龔成老師：

你可以加盈富（2800）至金額$6000，另外，可以加上金沙（1928）、港鐵（0066）、領展（0823），長期月供就得。

至於強積金，雖然有扣稅優惠，但強積金當中的基金管理費較貴，如果要投資港股，反而投資盈富會更好，當中的管理費只是0.1%。

所以，我相信（2）是較好的，你可以選這個。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12645：

龔成老師你好，我已報了你的投資班
非常期待，期望能好好學習你的投資知識和態度！:)

想請問：
如果銀行可借一個為期五年的私人貸款給我
120萬 實際年利率為3.5%
每月定期固定還$22,xxx
沒有其他手續費

請問你覺得我分注投資在一些相對穩健但有固定派息的股票(如港燈, 匯豐, 置富等)
是否可行？

此外，我在銀行同時有個mortgage link account
就算不投資都可放在ML acct裡賺Hibor + 1.235 (i.e. 2.375%)來抵銷供樓利息

請問你覺得借這個貸款風險會太高嗎
上述安排是否可行？

我45歲, 入息75k, 供樓22k/mth
謝謝你的回覆！

龔成老師：

私人貸款3.5%，雖然不能說好高，但你自已都有數得計，佢的息率比你的mortgage link account貴，即是你自己動用account的資金，雖然少收2.375%，但就唔需要比3.5%。

因此，你先動用mortgage link account的資金，甚至利用加按得來的資金，支付的利息成本會更加低。

暫時，我會建議你先用原有的資金，儲蓄等，去作投資，唔好心急加按或借私人貸款，等你上完堂後，你會更具體掌握選股及買賣的技巧，到時先考慮借貸，會更加好。

現時可利用自有資金，分注投資優質股，長線持有。

遲d見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12646：

你好！我今年33⋯未結婚！每月可儲蓄3000作未來退休使用，請問現在這3000可作什麼投資？

我跟女朋友每月各儲蓄3000作結婚基金，現有15萬結婚儲備，但完全沒有投資，請問此金額可作什麼投資？

我持有939及788，雖然唔多，請龔先生指引
謝謝

龔成老師：

如果你地打算在2、3年內結婚，你地的結婚基金，就最好唔好動用，持有現金就得。如果較長時期先打算結婚，就可以動用小部分，去投資較優質、穩健的股，盈富（2800）、香港電訊（6823）、置富（0778）都可以。

至於你每月的$3000，可以將其中的$2000去作月供股票，供盈富，長期進行就得。

至於你現時持有的股票，都有質素的，可以長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12647：

本人打算買些REIT, 現階段買入邊隻2778,405,435, 823比較理想？823會否太貴？

龔成老師：

上述都是不錯的房託，股價比高位已有思落，現處合理區，都有投資價值，如果你想增長多D，就領展（0823），現時在合理區上部。

如果你想風險低少少，股息率高D，就陽光（0435），合理區，可分注投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12648：

龔sir，大市回落左，很多貨回到合理區較低水平，
我看了幾隻股票，想老師給予意見

178莎莎： 受本地示威影響及銷售下跌，長遠質素仍在，pe現回至12倍，股息約有8厘，現價（1.9）開始收集

939建行：之前看過你的書，6厘息以上可吸納，現價已可收集

2018瑞聲：現價pe 10倍左右，比同業2382舜宇估值較平，擁有一定技術，現價為合理區較低水平，是否可收集等待？

龔成老師：

莎莎（0178），我相信中短期仍會弱，但長期而言，這股有投資價值，不過賺錢能力的確比過往年代弱左。香港零售將進入較弱時期，但長線的投資值博率反而增加，只要控制好注碼，買入後長線投資就可以了。

建行（0939），是不錯的收息股，但不要對股價有太大的期望，你只能以「這個價買入得到這個股息」的角度去投資。

瑞聲科技（2018）的賺錢能力比過往有所減弱，加上手機行業無過往強，都令這股將持續弱一段時間，但長線投資值博率，有的，但唔能夠預期增長力好強。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12649：

老師，我現在27歲，剛剛儲到少少積儲，不懂股票的，請問可以從那些途徑可以學到選股的技巧？可以建議一下嗎？

龔成老師：

你可以睇書，上堂都得，《股票勝經》、《80後百萬富翁》都是適合初階者的。

另外，我的股票班【投資倍升股課程】，亦是適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12650：

你好, 龔SIR, 又打擾你了。今次想請問投資股票與樓宇的抉擇。

本身想儲3-4年錢, 夠200萬就買樓收租(本身有自住樓, 而澳門非首置需4成首期, 8% 印花稅, 目標買400萬多D 的二手樓收租，故需儲200萬)。

不過諗深一層，如果200萬到股票市場投資, 保守回報率5%, 咁一年都10萬收入，仲未計股票增值。

而澳門租務市場得約2厘，而且需裝修, 管理費等, 回報率不及股票，所以而家諗緊買樓收租係咪真係一個好的投資工具?

另外，我明白先增值, 後現金流，如果諗住唔買樓, 咁投資方向都唔同，會以增值為主。

龔SIR可俾D 意見嗎? 第二個問題, 如果真係買樓收租, 同一價錢, 應買新樓全開放式, 定係兩房大面積D的二手樓呢?

新樓就還款期長, 二手樓就呎價低, 間格實用。老實講，我自己就寧願住舊樓都唔想住開放式類的龍床盤, 對人歡笑背人愁, 不過投資方面就唔知點睇, 感謝賜教

龔成老師：

我地要進行的，其實是一個財富配置，首先，要選真財富例如物業、車位、優質股，長線投資並不是炒賣。

然後要分析當中的回報率，這包括升幅與現金流。澳門樓的租金回報率不高，除非你預期升幅明顯，否則將同一筆資金，投資在優質股，股息回報率方面會更好。

另外，我地會考慮財富的配置，即是如何建立一個平衡的財富組合，如果你太集中在物業，這就會為你帶來集中風險。

所以，比較好的做法，你這刻先利用股票作增值，平衡配置，這樣會令你的組合股樓平衡。如果日後股票升幅，同時樓市的租金回報率去到較高水平，你才將股票轉投資到物業，這樣的配置會較好。

你可以先集中在「平穩增值類」的股票，例如盈富（2800）、金沙（1928）、長建（1038）、中銀（2388）、港鐵（0066）、恆基（0012），分注投資就可以。

至於新樓與舊樓，新樓一般都要比較高的溢價，同時較易買貴貨不太建議。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12651：

老師你好~本人大概月入只有$20000頭
,黎緊會計劃大概有$25000-$30000的收入,而家每月支出用1500要供樓,

$2500要準備明年結婚開支準備開始做月供股票,
而家呢個不隱定嘅時勢,應該點樣分配去買/投資?

另外如果想7-8年內努力有$100萬
應該建議點樣部署?
謝謝老師

龔成老師：

我相信，你可以每月儲到$1萬的，甚至更多，以你的年齡，希望你盡你最大的能力去儲錢，先苦後甜！

雖然經濟不穩定，但只要我地用長線投資的角度，就無問題，這反而是入市的機會。

你可以將其中$6000，去做月供股票，盈富（2800）、恆基（0012）、銀娛（0027）、港鐵（0066）都可以。

餘下的資金，就在大市平宜區時，適當地運用。

投資後，可能中短期股價仍會跌，這點無人知，但我地從5年的角度，這反而是不錯的投資時機。如果當情況明朗，經濟向好，股價又會上左，你又買唔到平貨，所以我地要善用短期不利機會。

只要你保持進行，我相信你一定能達標的！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12652：

你好，0001 你點睇？
可以嗎？

龔成老師：

長和（0001）有質素的，但賺錢能力比過往年代略有減弱，不過仍有投資價值，但企業的增長力不強，你只可以當佢收息股，同埋有少少增長力，唔好對股價長期增長有太大的期望。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12653：

龔成老師：想問問 現時 直接購入 或 月經供386 中石化 和 3988 中國銀行， 作平穩作收息合理嗎？

龔成老師：

兩隻都是收息股，都有投資價值，但不要對股價有太大的期望。

中行（3988），你可以分注投資，但中國經濟有可能令中短期略有風險，特別是壞賬問題，不過股價基本上已經反映，只是有可能小小波動。

但只要你集中長期收息，就無問題。

至於中石化（0386），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

所以，然股價回左，但只是合理水平，不過作為收息股投資，都可以，但由於優質度不算好強，因此不會太大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12654：

龔成老師你好，我和先生入市買了一層約8百萬的二手樓了。

因此令手上現金大幅減少（餘一百萬左右；另股票市值1.2M，現蝕約10%），以致最近跌市也不敢動用現金入市。

本來想在股市套現現金備用，但最近市況令我卻步了。樓價中長線我們也不太擔心，所以最近淡市我們心態上仍能應付。

想請教的是709及1333。我明白老師所說的買股票=買公司的理論。

只是最近經濟下行，零售前景一般，早前709發出盈警後股價大跌，不禁令我想是否及早（其實已經遲了）賣出止蝕為佳。

至於1333（倉位較大，爸爸幫忙投資時買入），早前突然出現美國控告其創辦人的新聞後股價也是插水，前景未明。

公司的業務未見有大影響但不排除稍後案件正式審理會令股價繼續受壓。到底如何斷定該股票是時候止蝕換出？

最後感謝老師提醒要做好分注，因為我一開始買股票的模式是幾手幾手買（以為可減少一點手續費）。

但嘗試過分注後便明白較好控制情況，雖然價位低時未必能大手購入但最少不會於高價入大手貨。謝謝！

龔成老師：

現時你持有$100萬現金，如果你備用方面已足夠，就唔需要特地賣出股票去套現備用。

除非你持有的是無質素的股票，就要賣出，但如果是有質素的，就應該長線持有，不要理中短期的情況。

佐丹奴國際（0709）是不錯的收息股，但增長力方面則較弱。你睇翻佢的財務數據，可以見到佢近幾年的生意幾乎無增長，雖然盈利有上升，但不多，只是一些基本的增值。

至於近期的情況，對佢的確不利，中短期仍會令佢較弱，但以長遠來說，又不是太差，大家最終都要消費的，佢不會永遠都無生意。

所以，只要唔理中短期波動，集中在長期收息，就無問題。

至於中國忠旺（1333），的確有點問題，因為佢現時的情況，不一定只是短期問題，企業的賺錢能力都有可能受影響。

這股本質算是不過不失，但現時面對的風險較大，最好在有較大的反彈後，賣出部分先，餘下則守住，等之後事情的發展。

另外，我地投資，其實是建立一個「平衡的財富組合，長線持有」，買入時最好分注投資，令買入價平均。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12655：

你好 龔成老師 想請教一下股票以外的問題
本人現職做緊一份合約工 下年年中會完約 暫時公司重未講會唔會續我約/轉長工

剛剛有一份公務員的工請了我 但人工會少幾千元 不過政府工每年跳point及加人工，相信很快會追回現時人工水平，而且長遠計（10年後）政府工做到頂薪人工會很高

請問龔老師我是否應該放棄現時的合約工 轉做政府工？

龔成老師：

我地所有野，都是從長遠的角度出發。

即是你以5年後、10年後的角度分析，你想當時做那類工作，人工如何，過的生活如果。然後就要分析，那一份工最能助你達成長遠的目標。

暫時睇，兩者間，政府工的長遠情況較好。當然，你的長期目標，只有你自己先知，所以只有你自己先答到。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12656：

龔成您好，好鐘意睇您經一的龔成信箱，希望得到指點：

本人與女友今年26，金融業，2人月儲合共2萬（佔月入40%左右），目標1年內結婚，2年內置業。

短期目標係希望一齊儲約60-70萬結婚+首期。
目前我地既資產大約有3萬現金+14萬月供股票。以下係我地既月供組合：

6、27、700、823、1299、1313、2007、2388，供左1年左右 大部分都仲未供到1手；月儲2萬當中會大約用1.6萬做以上8隻月供。

分別月供既amount 每月會主動做reallocation，太貴會留多啲現金，或將多啲分配係較平既股上。

希望麻煩龔成評點一下以上既組合，同埋對達成我地目標有冇咩其他建議（因為環球經濟問題對達成目標有啲保留）？麻煩哂！

龔成老師：

由於你地打算1、2年內會結婚置業，這都要你一定的現金的，而我地投資股票，原理就是買企業，等企業成長，但1、2年並不是一個長年期，當中的升跌因素，好大程度受市況及外圍等因素影響，當中會有一定的不確定性。

所以，你宜持有較多的現金，較少的股票，而股票會偏向穩健類為主。

雖然都可以月供股票，但金額就不能太過多。

你現時的現金比例不多，可以在1年內，先賣出風險較高的類別套現。之後，可以儲現金較多，月供股票不是不可，但比例上不能太多。

碧桂園（2007）風險較高。如再有需要，騰訊（0700）、華潤水泥控股（1313）都算是略波動的類別，可能要停一停（具體情況，你要計算自己將會要多少現金）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12657：

53 歲，已退休，之前都係短線投資，仍有20萬人民幣同42萬股票如下：

189東岳集團10000股 $4.26入
769中國稀土 14000股 $0.475入
1114華晨中國 10000股 $8.62入
1728正通汽車 20000股 $2.96入
1766中國中車 16000股 $6.19入
1888建滔積層板 10000股 $6.52入
2312中國金融租賃 220000股 $0.119入

呢7隻股票應該保留定賣出？
如果賣出，建議轉那些股票？
目標係每個月有$10000被動收入 可以點達成？

唔好意思問題有d長，感謝你既寶貴時間

龔成老師：

首先，短線操作根本無法賺錢，之前我做銀行及證券行多年，見盡散戶的賺蝕情況，短炒者是輸得最多的一群。

上述持有的股票，大部分質素一般，持有的價值算是中等，而我地投資，應該集中有有更優質的股票。以下3隻更是有較大的問題。

東岳集團（0189），3年前核數師出過「保留意見」，反映賬目曾經有問題，不宜投資。

中國稀土（0769），企業年年虧損，睇唔到有投資價值。

中國金融租賃（2312），企業年年虧損，睇唔到有投資價值。

對53歲的退休人士來說，上述的7隻持股，無不適合。

應該建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12658：

龔老師你好，都follow左你一排，有d股票問題想問下：
1）手持大約10萬股匯豐，但未到價，請問繼續持有當收息有無問題？會唔會跌到收唔到？

2）之前3988開始跌，入左d貨，但佢而家跌到$3.02，可唔可以再入貨溝淡d? 收息穩陣嗎？

先多謝你嘅意見! 繼續支持!

龔成老師：

1）我地繼續持有一隻股票與否，並不是睇「買入價」而是睇企業的質素、前景。匯豐（0005）都有質素的，但賺錢能力比過往年代已減，這類股不適合佔組合的比例太多。

另外，這股只是收息股，不要對股價增長有太大期望。

所以，你要考慮，如果之後一直收息這個股息，但股價基本上無乜增長力，是否合你的投資目標。

2）如果你本身的股票組合，銀行股的比例已超過了3成，就唔好再加銀行類別。

本質上，中行（3988）不算差，但同樣增長力有限，只是收息股，不要對股價有太大的期望。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12659：

龔成老師，你好！我係澳門人，收入40k，丈夫收入相約，現時33歲，現時住一層樓另有一層樓收租，兩間屋都供緊。我扣除所有開支、保險及供樓後，每月可存約16k元（未計先生的儲蓄）。

本身對股票幾乎零投資經驗，最近聯名戶口儲蓄了近450k元，希望開始學習投資，由於讀了你的年報勝經、股票勝經等。

打算先月供股票，目前希望每月供8000元，我問過銀行每供一隻股票，每隻每月收50元手續費，未計交易的各項手續費，想問月供金額太少的話，月供費用會否讓回報大減？一般建議每隻股票的月供金額達到多少錢，效益才比較高？

選股方面，希望供盈富基金(2800), 港鐵(0066), 銀娛(0027), 恆基(0012), 領展(823), 比亞迪(1211),恒生(0011)，由於月供只有8000，不多，應該選幾多隻及邊幾隻，這樣資金效益大一點？（因為每多供一隻就要俾多一隻的費用）

另外，聯名的錢打算這一至兩年內趁低吸納，雖然看了你的部分書籍，但暫時還是不懂估值，這階段有什麼股票可以留意嗎？

關於月供股票，本人在澳門，月供股票費用都是這樣，沒有香港銀行的優惠。

謝謝回答！不勝感激！

龔成老師：

如果手續費去到佔成本1%的話，就是較高，因此，建議你唔好分散去月供，只集中在一隻盈富（2800）$7000，因為這本身是一個50隻股票的組合，所以就算集中這基金，都無問題。

同時，你每月不斷儲現金，而其他的股票，就以一手手模式去入，只要在時間上有效分注，其實都能達到平均買入價的效果。

你上述的選股，都是有質素的，慢慢一手手模式去入就得。

現時大市處合理區，可以一邊投資一邊留現金，$45萬的資金，慢慢入貨，最好有$20萬等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12660：

你好，我呢排見到你的分享，覺得很有道理同時不用經常留意股市影響我工作，想開始買你的書看，你會建議先看那本嗎？

同埋想請教吓你，我之前在網上見到人用狗股理論方法，你覺得有用嗎？

另外，我現在有500股02，30000股386,8000股939，500股941，4000股6823，15000股3988,10000股1398，5400股1810，40000股3337。

都是係呢排入，股價跌在5％左右，現金還有60萬左右，過多半年還會多70萬左右，想問下你有什麼建議給我，thx

補充一下，因為現在收入比支出小，怕坐食山崩

龔成老師：

你可以睇《股票騰經》、《80後百萬富翁》。

至於所謂的狗股理論。就是指每年年底，在指數成份股中選出股息率最高的股票，如果你有上過我堂，都知企業估值有好多方法，分析平貴有很多方法，利用股息率都是其中之一。

這理論的原理是找股息率最高的股票，即是找較平的企業（從股息角度分析），這方法並不是無道理，但就忽視了企業的基本面基礎。

例如，之前利豐（0494）仍是恆指成份股時，股價因大環境回落了不少，令股息率很高，但如果之前買入，現時虧損十分大，所以，這方法只能作為參考，要同時考慮企業質素及前景等因素。

你現時持有的股票，質素並不差，而這是我地選股的第一要求。

不過，有些質素並不算好高，例如安東油田服務（3337）。

同時，你有集中在內銀的情況，這會令你出現集中風險，自己要平衡翻。

另外，建議你多增加投資知識，在選股、企業估值、投資時機上落功夫，對你長遠財富有好大影響。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

[社企說早安] 全球經濟下的開放式教育

http://www.seinsights.asia/news/131/527

畢業季即將到來，很多職場新鮮人都想知道自己所學是否會與就業市場脫節？

ALISON是免費的線上職業訓練平台，提供約4百種職業認證和文憑課程，提供辦公室技能訓練，例如專案管理、會計、客戶服務、人力資源等。