【Event Helper被拖糧，個客同Agency都有責任】

書展搞到灣仔人頭湧湧，書迷梗係開心死啦，但係一班場地同埋攤位助理，仲有啲Event Helper，辛苦咗幾日之後究竟有冇得到回報呢? 帳面係有嘅，只係唔知份糧幾時落袋，甚至收唔收到啫。

聶瞳並唔係做Event Helper或臨時工呢個部門 (好慶幸，#感恩)，但都略有所聞，有汗出冇糧出嘅幕後黑手，個商戶 (以下簡稱為「客」) 當然係最PK啦，不過Agency責任一樣咁大，冇咁大個頭唔好戴咁大頂帽，收唔到個客錢，冇理由叫班臨時工埋單，然後自己置身事外，咁樣同幫兇冇分別。

會展一年365日幾廿個展覽活動，婚紗展都幾個，仲有Fashion Week、科技展、書展乜乜物物，突然要招募大量人手做活動助理，包括維持秩序、分流登記、宣傳、問卷、呃你Like佢facebook，同埋要人著住啲性感服裝造勢等等，好多商戶都唔識點樣喺短時間內請咁多人，佢哋平時請個會計文員都搞成個月，你叫佢一次過請幾廿人，我諗全公司放低手上工作一齊做Interview都趕唔切，所以啲客就會搵Agency幫手，因為有固定班底同埋Database，三兩下手勢就可以「Call行馬」，既方便又快捷。

成件事好合理係咪? 問題係啲客唔找數俾Agency，當中好多客仲係幾出名嘅大商戶，佢哋會持住自己有名氣，搵Agency招攬大量Event Helper時唔俾按金，加上有啲Agency做壞規矩，真係選擇唔收錢唔收按金先，為咗馬住個客而學人講個信字，做壞個市同制度，到個活動完咗，個客拖數，Agency就冇糧發放俾一眾Event Helper臨時工，惡性循環嘅源頭就係咁。

咁Event Helper都係幾廿蚊一個鐘，通常做幾日啫，有幾多錢呀? 點解啲Agency唔出咗先? 一個Event Helper就梗係啦，但係每個Event幾廿個、一百個，甚至百幾個Event Helper，條數就好大，啲Agency出咗先，又收唔返個客，最後就輸Double。

拖糧3個月或者半年呢啲成日都聽到，有啲Agency甚至要透過法律程序去告個客，最過份聽過一個例子，係個客請Event Helper，總消費百幾萬港紙，拖咗超過半年，唔止Event Helper冇糧出，負責嘅Agency亦冇佣出，告上法庭搞完一大輪，最後個客執笠著埋草，Agency自掏腰包出糧俾班Event Helper，呢鋪輸得甘，一來一回應該硬蝕三百幾粒！

而家Agency精咗好多，企硬要收按金或要個客俾晒錢先，唔肯就寧願唔接，不過衰客依然無處不在，有啲客真係有種一將功成萬骨枯嘅概念，佢哋要搵好多人幫佢做嘢，但之後就唔出糧，過橋抽板，祝呢啲公司早日倒閉。

圖片來源: 會展官網

#書展 #eventhelper #拖糧 #有糧出冇糧出 #可恥 #會展 #臨時工 #炒散