有冇遇過一種假民主嘅老細？例如問你Plan A定Plan B，其實你唔係要揀A定B，而係要揀老細鍾意邊樣多啲，後生年少氣盛，硬係會拗一大輪，人大了成熟了，通常由得老細話事，你話點就點啦，唔好阻住阿叔收工就得喇！

老細：「今年聖誕Party我想搞搞新意思，每位同事有一份聖誕禮物，有咩提議？」

我：「iPhone吖，iOS出晒事佢哋都唔會介意架。」

老細：「嘩，咁貴，唔係要呢啲，要啲特別嘅，人人唔同，最緊要啱佢哋用，切合每個同事性格。」

換轉係以前，我一定爆硬佢：「老細，你又要威又要戴頭盔，咁好難做喎，iPhone咩性格都啱架啦，唔啱咪賣咗佢套現囉，唔通用開android收到iPhone做禮物會辭職咩！」

而家收晒火，最緊要準時出糧：「好提議，我因應每位同事性格畀個禮物list你啦。」

老細：「好！好！玩味濃少少都唔緊要，開心搞搞氣氛啫，價錢方面......」

我：「明白，有平有貴，有平有貴。」

唔使半日搞掂張清單，我最清楚公司班禽獸係咩性格。

秘書姐姐~~~有次佢病咗戴口罩，淨係見到對眼，成個人靚咗好多，送pack美容口罩畀佢就fit晒。

會計部同事~~~呢班好人嚟架，我份糧次次冇錯兼準時都係靠佢哋，月頭月尾最辛苦，一於送健康坐墊啦。

營業部~~~畀人捽數捽到壓力爆煲，有時我都驚佢哋喺公司中風，送嗰啲智能手環check住身體狀況包冇錯。

躁狂師奶同事~~~M巾，唔好慳，成箱上。

人事部主管~~~對住全公司都黑面，唯獨對住老細就烚熟狗頭，最叻唔係人事管理，係擦鞋，不過鞋油對佢嚟講都唔夠用，直情買嗰啲Liquiproof，無論天色陰晴都可以照刷。

康仔~~~我嘅office buddy，佢呢排冇乜動靜因為拍緊拖，我就送部即影即有相機畀佢，等佢同女朋友溫馨溫馨。

IT狗~~~求其有個「電」字嘅嘢都啱佢哋架喇。

老細：「Well Done！咁我呢？」

我：「頭盔或者垃圾筒。」

老細：「我冇電單車牌喎，垃圾筒實用啲。」

我：「我都覺，就垃圾筒啦。」

老細：「辛苦你同班手足去買喇。」

我：「辛咩苦吖，我哋一家人嚟架嘛，講呢啲！我當班同事係兄弟姐妹，買聖誕禮物畀屋企人邊會嫌辛苦架。」

老細即係腦細，清單上嘅嘢大部分可以喺LOG-ON買到，新奇嘅又有，實用嘅都有，我仲可以買埋畀阿媽同朋友，天寒地凍你估我會咁蠢同你四圍撲咩，一間LOG-ON搞掂晒啦！

#LogOnHK LOG-ON official page