//支持本Page請Click入內文比Clap，已為Medium收費會員請直接Click入內文閱讀，謝謝！//

//響講一切之先，潑一下冷水先：好多人而家不停吹話要成立呢樣果樣工會同團體攻陷功能組別議席，但無論係勞工界、 體育、演藝、文化及出版界定係批發及零售界，全部都至少要響出年5月前12個月經已成立相關註冊團體、公司然後再入指定工會，換言之就算比你而家種倒入去，都要響2024年選舉先可以投倒票──到時都唔知仲有無普選//

基於區選會選舉大勝，開始有唔少人諗，可唔可以食住呢個勢，響2020年贏倒立法會過半數議席呢？本身作為一個焦土派權威，當然同時對目前嘅議會形勢有相當認識（唔係點制訂焦土策略？），由我黎講唔敢講係最準確，但必然係最客觀。

首先要答呢個問題，我地一定要有三大前設條件：

一係政府唔會響響選舉入面作出嚴重舞弊、同埋響選舉過後駛橫手DQ當選議員──呢個機會係極大，尤其係共產黨唔會容忍失去立法會控制權；

二係當選後嘅非建制議員唔會響關鍵投票時變節──其實呢樣嘢直頭係現在進行式，陳沛然支持一地兩檢、梁繼昌李國麟莫乃光投票支持水炮車撥款……而當你有愈多非建制議員當選，意志薄弱、容易被收買嘅機率亦愈高；

三係焦土派唔發動焦土行動──雖然焦土派票數係少，但響立法會過半數呢個每票掹掹緊嘅情況入面，卻係扮演致命嘅關鍵少數。老實講，如果呢個問題係響6月9日前問我，焦土行動係一定會進行，但經過6個月嘅抗爭，飯民主派似乎係覺醒咗少少，所以焦土派都仲可以觀察一輪先再作決定，但而家個情況最多只係未決定；

但點解要有呢三個前設呢？因為如果連呢三個前設都無，條問題經已唔駛再答落去，個機會率就經已等如零。

其次立法會過半數都有兩種情況：一種係功能組別同直選組別過半，另一種側只係單純過半數，功能組別仍然比建制派控制住。

兩種情況嘅分別就在於分組點票問題。如果直選、功能組別都過半數，咁立法會就真係實質上比非建制派控制咗，因為連私人法案都可以經分組點票通過；

但如果只係純粹總議席過半數，但功能組別唔過呢？咁建制派就可以響功能組別上面阻撓所有私人草案通過，而政府則控制住政府法案嘅提案權。然而即使係咁，擁有過半數議席嘅非建制派都經已有好多嘢玩：

1. 立法會主席將會有非建制派人士擔任（同票則抽籤，有一半機會），整個會議議程將會有非建制派操控；

2. 財委會將會由非建制派控制，換言之撥唔撥款將會由非建制派決定；

3. 所有事務委員會正副主席由非建制派控制，議案排期、討論形式、討論時間，全部都係由非建制派決定；

4. 雖然建制派響功能組別仍然可以扮演關鍵否決權角色，阻止所有私人草案通過；但掉番轉非建制派亦可以擁有「絕對否決權」，否決任何政府呈交嘅立法條例同撥款申請，換言之個政府做乜都要同非建制派傾過先

咁答番頭先個問題：究竟非建制派有無可能奪得議會過半數呢？功能組別同直選同時過半係無可能；至於單純過半就係數字上有可能，機會好微──只係比完全無多少少，但至少唔係好似上幾屆咁，個或然率係0。

做成呢個差別係因為響區議會選舉非建制大勝，立刻令區議會功能組別多咗一席；同時大勝令好多香港人覺得選舉有番希望，開始會有心機花時間響功能組別玩嘢、用唔同方式成為界別選民，令到有幾個建制派控制嘅界別立刻鬆動咗；基於立法會議員唔係建制派就係非建制派，70席幾來幾回就可以成個控制權出現逆轉。

先講比較簡單嘅地區直選先。2016年選舉其實都算贏得幾盡，除咗新西李卓人比雷動害死、九東黃洋達快必互隊而死，基本上其他區都叫做應贏嘅議席都已贏哂番黎──尤其係港島陳淑莊幾乎比雷動累9死，只係贏2000幾票，（當然你都可以當王維基係非建制派），九東排最後一名係譚文豪而唔係黃國健。

基於比例代表制好難響陣營上面有咩激烈變動，最多都係尾果一兩席互換咁樣，所以你可以預期區選大勝效應就係令到原先贏咗嘅非建制議席更加穩陣，假如九東今次黃洋達真係如佢所言唔再參選，又或者快必尊重上次選舉票數比黃洋達低而主動退出嘅一席，以及新西咪撚再搞雷動靠害，將何君堯踢出局，咁非建制就會響直選攞倒最理想嘅21席，距離過半數目標仲有15席，單純要半數嘅則係14席。

至於功能組別就複雜得多。目前非建制派響功能組別係有8+2席，因為支持高鐵撥款、曾經為龐愛蘭助選嘅李國麟，自稱中間派、支持一地兩檢嘅陳沛實在太鬼，根本係連飯民都不如。除此之外，包括有3席超級區議員、教育界、法律界、會計界、社福界、資訊科技界，咁計埋就有10席非建制。

有唔少人話下屆姚松炎可以選番被DQ嘅建築測量界，又話超區可以選到4比1，我只能夠話佢地係痴心妄想。建築測量界當日係因為有兩位建制派出黎互鎅先輸比你，之後補選司馬文已大敗比謝偉銓；另外就算區議會大選個得票比率都係非建制58% vs. 建制41%，比例代表制點都無可能贏倒4席──更何況你要調走啲選民去其他功能界別添？

咁仲爭5席表面上睇係好遙遠，但因為區議會非建制過半數，換言之功能組別果個區議會（一）變咗係非建制派囊中物，換言之要過半數只差4席，只求35席半數更只差3席。

咁剩番果22席功能組別入面，有邊幾席係比較鬆動架呢？首當其衝當然就係飲食界，因為而家大家都講黃色經濟圈嘛，咁只要你擁有超過12個月嘅飲食牌照，就可以立刻擁有一票，而當日張宇人都只係有2400票就當選，要擊敗佢好似就唔係咁難──

所以點解唔好成日鬧人係「扮藍店」就係咁解：唔比人轉黃，又點響選舉投你一票呢？如果真係想贏呢席，所有食客都應該落去啲自稱黃店嘅食肆度，迫個老闆登記做咗選民，同埋應承之後只會幫非建制候選人助選先，你去幫襯佢，其實就係「派蛇齋餅糭」比啲食肆東主投你一票。

再之後呢？Sorry，無啦。因為無論係勞工界、 體育、演藝、文化及出版界定係批發及零售界，全部都至少要響出年5月前12個月經已成立相關註冊團體、公司然後再入指定工會，換言之就算比你而家種倒入去，都要響2024年選舉先可以投倒票。

結果剩番果半數果3票（一半就係2票），你都係要走番去祈求深藍界別嘅建築及測量界、體育、演藝、文化及出版界現有嘅選民會唔會良心覺醒；又或者地區直選九西、港島會有咩奇跡發生令只存在於數字上可能性嘅結果出現偷多一席，唔係的話，非建制33席(地區21+功能12)vs建制派37(地區14+功能23)應該就係出年立法會選舉嘅最合理戰果。

去到呢度可能有人會話：「咁多都係爭兩席啫，再努力啲邊個話無可能過半？」

咁我又要響度潑下冷水：而家個重點唔係努力唔努力，而係當你只重視議席多寡、而完全唔理選出黎嘅議席質素的話，就算真係比你飯民過半又如何？記唔記得當日梁耀忠點樣棄兵曳甲將個主席位拱手讓比梁君彥？陳沛然多番為政府護航護到響連我都唔會再當佢係飯民黎抽稱。只不過因為佢響D100做主持、同埋響6月之後多講幾句公道話，又比人當番係民主派；

莫乃光梁繼昌李國麟點樣以狗屁不通嘅「公共財政原則」為理由，幫政府護航通過水炮車撥款？係咪無人記得，當葉建源收咗林鄭額外科水四十幾億嘅教育經常性開支後，就響施政報告致謝動議投贊成票公然勾結？仲有當日民主黨走入中聯辦密室談判呢？你點保證佢地響立法會過半後唔再出賣選民比共產黨？

所以你班飯民與其日日發住白日夢，濕哂咁諗住有日立法會過半數可以點點點，其實更加應該做嘅，係認真咁監察番你地選出黎嘅議員究竟響上屆有無盡力守護香港、唔撚合格嘅議員：好似陳沛然、李國麟、莫乃光、梁繼昌、葉建源之流，趁住而家民意情熾熱，就好應該換番啲意志堅定、真係有心抗爭嘅行業素人取而代之清瘀血，否則，純粹過半又好，直選功能組別同時過半也罷，轉過頭只係比呢班政棍吊高黎賣港嘅機會。