［金融掃盲］祖雲達斯冇蝕到趴，曼聯（同所有球會）最大開支唔係轉會費，賣波衫唔好賺，贊助刁都冇你想像中咁多。但，依然有金融上嘅考慮。就係開心樂園餐！人地睇嘢，唔係一兩季，係十年甚至幾十年。

TLDR：相信全香港第一個人講C朗as a 開心樂園餐

1. 其實足球嗰部份都可以掃盲，C朗雖然肯定好好好好波，但由於太靚仔太霸氣，往住有好多myth．例如以為佢射罰球好勁（對上一球幾時？好似講到而家），或者以為佢射門命中率好高—例如蘇斯克查話，呀C朗禁區外射門呀，100球都99球中龍。事實？C朗在祖雲達斯，所有射門，唔夠四成中龍。當然你可以話蘇斯克查只係做個比喻，唔係真係話99%。

2. 反正呢篇文唔係要攻擊C朗（＊），而係講，好多你以為嘅「常識」，係錯嘅。

3. 不過既然係Financial Times，當然都講返錢銀。以下係幾個關於C朗轉會嘅 financial myth：

4. 祖雲達斯蝕到趴：唔算。轉會費1500萬歐（加埋表現頂多2500萬）。祖雲達斯2018年1億買返嚟。不過球員係會「折舊」嘅，正式嚟講，係舊「轉會費」會攤銷（Amortize），你當好似機械咁折舊啦。每年個「折舊」先係開支，然後個球員嘅「價值」（＊＊）在公司個資產負債表每年就減低，同你會計101讀嘅差不多。一般個「壽命」就係合約年期，咁佢在祖雲達斯4年約，1億歐就攤4年，今年最後一年，在祖雲達斯本薄度，佢最新carrying value 係3000萬左右。咁所以祖雲達斯蝕讓都要輸錢，但唔係輸8500萬，輸1500萬啫。

5. 有趣地，曼聯簽C朗係2年約，但個「折舊」用5年，我就唔知點解啦，都唔係一般做法，問返核數師點解肯簽，可能預佢退休做埋高層啩。上市公司喎，不能太亂嚟的，核數師肯簽，咁…….咪得咯。

6. 咁所以曼聯買得好抵？ — 又唔係。球場上唔知，但我地講財務。同好多人嘅理解唔同，球會最大嘅開支，唔係轉會費（可以攤N年，同埋有機會賣出去收返啲），而係人工！C朗份糧同在祖雲達斯比只係減少少，過到嚟變咗係英超最高薪球員（＊＊＊）。即使曼聯係英超最高收入嘅球會，佢老哥份糧都佔咗間會收入嘅5%— 一條友佔收入5%，你可以諗下幾咁誇張，應該冇乜其他公司可以咁。

7. 車，賣波衫同拎筫助都賺得返 — 不客氣地講：講得呢句，就知你完全唔識了。最好都係STFU。再講一次，絶大部份波衫收入嘅錢，係Adidas或Nike拎晒。唔信嘅，你睇兩樣嘢。曼聯30億美金市值，Adidas 600億，Nike 2600億，你話邊個好賺？另外，如果賣波衫咁好搵，咁巴塞叫美斯賣返件特別版已經夠。但明顯唔係咁，你睇球會啲商業收入，都見到個數字唔係 波衫件數Ｘ零售價。至於贊助？亦唔會忽然多咗好多，好多一早傾咗。

8. 咁到底有乜財政效益？ — 球場上嘅不講，但球場外嘅，都仲係有嘅。冇錯就係Brand Building．軟實力，細細個導你食開心樂園餐（原文冇呢句，我加嘅），大個咪日日食。文中提到，曼聯近年戰績麻麻，固然班死忠不離不棄，「但大家都知熟客唔值錢」，咁點搵新粉絲？點同曼城爭？（你諗下，廿幾三十年前我睇曼聯時，all due respect，曼城有幾多球迷？嗰時在英國見有個廣告串曼城：Manchester Worldwide，City Nationwide）．地球上最多ig follower嘅C朗，就係答案啦。

9. 仲有，正如上面講，球迷一般嘅loyalty 都高，係好客，唔會因為隔離會件波衫平三十蚊你就買對家（你對比下，UBER，或者做電訊商）。所以，就係我樓上講嘅，開心樂園餐。細細個導你捧曼聯，大個自然科水。

10. 曼聯睇嘅唔係一季，兩季，而係未來幾十年呀！好大盤棋。應該係咁。當然幫到戰績更好．咁點都要有球場上嘅作用嘅，唔係買條友做親善大使嘛。發唔發現，唔落場踢嘅代言人，影響力低好多？你而家仲碧咸傑斯咩，我知係名宿（奧雲係咪名宿？）。但新一代無感嘛。至於啲老嘢？係咪都捧架啦，即係電話或寬頻啲舊客，唔使對佢咁好的。

（＊）有冇話你知英超如果要捧，我係捧曼聯的？我唯一買過嘅英超波衫就係曼聯，唯一一次現場睇英超亦係曼聯。

（＊＊）插嘴講句，咩公司係員工嘅資產，廢話。閣下有冇在公司資產負債表出現？冇。你嘅地位低過張枱，係等同公司用嘅condom（妓院上市都得啩？好似澳洲有）。你去到球星咁，在公司資產負債表度出現，你就真係公司嘅資產啦！

（＊＊＊）呢度插播，原文冇講，係我意見。C朗居然減埋人工仲係英超最高，可見祖雲達斯畀得幾咁豪。我舊文有寫過，C朗一條友嘅人工，高過意甲十幾隊波，亦即係佢份人工夠搞一隊可以踢歐霸嘅意甲隊。最正係—即使唔計C朗，祖雲達斯都仲係意甲最高人工！

＝＝＝＝＝＝＝＝＝＝＝＝＝＝
已烴2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

C朗重返曼聯，對我呢個利迷都有好深感受。

十八年前，一班朋友仲打緊PS2，winning入面嘅球員名仲要自己落手落腳改，施丹未收山，我嘅世界仲係只有打機同足球。一次聚會，成班兄弟望住初出茅盧嘅C朗呢條濕水毛巾，俊俏得嚟又有少少鄉味，好波之餘又偶有波車出現，睇睇吓我都忍唔住講咗句：

「仆街丫，好似畀佢哋買到件好嘢。」

「18歲，葡萄牙仔，聽講堅尼一踢完士砵亭場友賽就叫費Sir買佢。」

「利都有冼拿馬邦高尼，勁。」我機械底咁回應，做一個敵對球迷就係要咁，你有個橙我一定要有個桔，輸人唔好輸陣。

後來C朗點同朗尼合壁，喺曼聯過完一關又一關，轉會皇馬，去到生涯頂尖，然後每個人以為佢會慢慢退下時再出走意甲，帶住祖雲達斯一直安全航行，雖然年紀唔細，但從來都冇退步嘅感覺。

佢嘅足球生涯同目標一如以往，講好咗嘅就一走到底，但當年我哋一齊睇波一齊玩嘅波友，老早就已經四散。

有人遠走他方，有人為口奔馳，又有人視而不見，每一個人都逐日逐日咁磨蝕，曾經諗過嘅「永遠」已經唔知去哂邊，你覺得生活「就係咁架啦」，我都認為你講得好好。

不過今日C朗轉會，重返曼聯，其實大家都知道，36歲嘅佢可以帶畀曼聯嘅事唔會太多，跟住嘅後續未必係一個完美嘅童話故事，不過C朗就係想話畀我哋知

「世界唔一定係咁」。

老咗嘅球員唔一定要以不變應萬變，唔一定要安守既有嘅安全範圍，正因為球場本來就係一個戰場，只要你望到有興趣嘅目標，你就要即時動身，將目標完成。

就算生活同世界已經不如18年前，但你仲係咪有你自己想做但未做嘅目標？

見一個朋友又或者係問一句 你好嗎？

18歲前陪你一齊睇C朗首次幫曼聯落場嗰幾位波友，宜家仲喺唔喺你身邊？

我有兩位好好嘅兄弟，咁多年嚟都同我鬥生鬥死，佢哋都係陪住我成長嘅曼迷。前兩年利記拎英超，我第一個反應就係想佢哋出現我面前，等我可以耀武揚威一下。

今次C朗回家，唔知點解我都好想出現喺佢哋面前，好好咁感受一下佢哋呢份感動，佢哋兩個入面，有一個八年前已經去咗澳洲，疫情之下，只可以用Whatsapp插科打諢咁恭喜吓佢；另一個四年前已經上咗天堂，下次去探佢時，等我私人整件紙製曼聯C朗波衫畀佢威吓。

你哋有冇人想搵吓？去啦，唔好等嘞。

免費冇好嘢？！
轉自 @《眼光毒Ｌ到》

訂閱「何Wayne」頻道，欣賞所有和足球有關的節目：
「何Wayne測波經」- 預測未來一周大賽+粵語評述
「何Wayne賽後評」- 分析評論比賽，研究得失。
「何Wayne消息」- 為你分析預測比賽以外，球壇的各種消息。
「何Wayne說經典」- 為你分析及回味經典比賽，認識歷史、名宿、借古諷今。

訂閱「Howayne Live」頻道
Watch LIVE match with 何Wayne

加入 'FIFA HONG KONG' facebook group NOW!!!
何WaynePSN：howayne07
FIFA 遊戲教學
FIFA 遊戲生涯模式