https://www.patreon.com/posts/50278937

從車路士球迷角度看歐超聯爭議

由於有98年親身經歷第一次主催歐超聯成立，最終卻以歐聯改制而不了了之嘅經驗，所以今次早有預感第二次主催歐超聯係會重覆一次歷史，只係諗唔倒今鑊「球會抗爭運動」維持咗兩日就草草收場。

當然，歐超聯雖然冚檔，但仲有好多嘢值得討論。事實上呢兩日已有好多專業評論提過好多歐超聯嘅利弊，但我想用一個比較特別嘅切入點，亦即係車路士球迷角度去看待呢件事。

反對歐超聯嘅人最常針對嘅有兩點，一樣係呢堆傳統班霸為咗利潤最大化不擇手段，另一樣則係將足球競技全面國際化，會將足球嘅地緣元素、社區網絡完全剝離。

咁首先我要講，作為海外球迷，我對於車路士本身嘅社區聯繫嘅認同感一向薄弱──呢個真係無辦法，首先我唔係倫敦人，認識車路士更係由衛星電視轉播、互聯網開始，所以就算有日球隊搬離富咸區，相信我都唔會好似當地人一樣憤怒。我會對車路士球會嘅一啲歷史感到興趣，例如對阿仙奴、熱刺同列斯聯嘅仇視，但相比起黎我更討厭嘅卻係曼聯同利物浦。

另外好重要，亦都令我感情複雜嘅一點就係，車路士就係「金錢足球」最初嘅得益者。其實好耐以前我曾經追捧過愛華頓同熱刺，但真正令我成為車路士球迷嘅契機，卻係由Ken Bates大灑金錢開始。由引入古烈治、維埃里、蘇拿、迪馬迪奧，車路士係英超透過大舉引入國際球星，將過往果種英式球風完全掃除，改成強調組織性嘅歐陸踢法之餘，粒粒皆星更令技術水平大大提高，嘗心悅目。

日後Ken Bates因為投資地產失敗陷入經營困難，油王阿巴莫域治入主，更響短短兩年間組成奢華組合奪取英超，如果我今時今日走去同你講「金錢不是一切」、「追逐利潤令足球死亡」，就實在太偽善鳥。

好多人對歐超聯嘅憂慮，老實講我並唔太擔心：例如話無咗升降班制度令到球賽失去競爭性真係Bull Shit，自從球會收入大增後，歐超聯呢Big12對上一次嘅降班紀錄係幾時？至於批評呢種無升降制度嘅封閉式聯賽，必須依靠選秀制度去保持平衡，我覺得歐超聯十劃都未有一撇，到真係成事，其實有一百種方法可以平衡彼此間實力，只係呢班班主願唔願意做而已。

唯一可以肯定嘅係，歐超聯要實行球員薪酬以至轉會費封頂，係一定會比歐洲足協容易，因為無咗失去歐聯資格嘅恐懼，球會間一定更願意達成財政上嘅共識以避免惡性競爭。

作為被歐洲足協恐嚇懲罰過唔止一次嘅車路士，對一眾足協嘅反抗亦唔係單單因為金錢問題咁簡單。例如而家球隊要求減少賽事令球員多啲休息時間，偏偏歐聯改制就要增加賽事；因應賽績壓力要收購多啲球員應付唔同戰線，偏偏UEFA同FIFA就成日響外借球員、國際球員配額諸多限制，甚至連轉會費多寡都要限制埋──但偏偏呢個主持公道嘅兩大足協，本身卻充滿住保守、腐朽同官僚主義，透過成立歐超聯去警惕一下佢地，未嘗唔係一件好事。

所以對住我呢個車路士球迷，真係唔好講乜嘢「金錢破壞足球競技」，掉番轉，今時今日嘅足球世界多姿多采，正正係資本主義市場推動嘅結果；亦唔好話歐超聯破壞各地聯賽，我反而覺得如果歐超聯真係成功將各地聯賽班霸獨立出黎，係會令本地二三線球隊更容易出頭。今時今日成日講「破壞性創新」，就係要先破後立。

有人話歐超聯勢必令賽事運作美國化，亦即係好似NBA、NFL咁將啲規則改到鬼五馬六：但問題NFL你都可以話得美國搞嘅美式足球聯賽值得一睇（雖則我無乜聽人對NFL有投訴，MLB問題反而大啲），但係NBA你覺得唔好睇，咪走去睇歐洲籃球聯賽囉（我又識得唔少人真係轉咗睇歐聯）。

不過好諷刺地，最終車路士竟然係歐超聯入面加入得最不情不願嘅，同時亦係最早退出嘅球隊之一。原因好簡單，油王阿巴莫域治買車，從來為名多過為利，歐超聯強調分紅比歐聯更多，但卻遠遠不及佢作為班主受到球迷同社區愛戴嘅名聲。

有人分析話經此一役，一眾班霸球會響足壇嘅話語權將會大大下降，但我唔係咁睇，反而認為只係星火燎原嘅開始。第一次歐超聯收皮，都係由於歐聯改制上面從善如流作出讓步；但假若平時蝦蝦霸霸慣嘅足總、UEFA、FIFA如果仍然一意孤行，發起第三次歐超聯終有一日會出現。

歐洲球會人工 vs 戰績：廢老指點江山篇

版務：事忙兼搞緊Patreon，出住呢啲儲稿先，咁啱歐聯又重開。圖就睇medium 版吧 （https://bit.ly/30z4hko）

1. 呢篇係上一篇嘅延續，未睇可睇（https://bit.ly/2ZXGtFC）。繼續講歐洲球會收入，同歐洲賽戰績。
2. 收入就跟Deloitte Money League（https://bit.ly/2ZksWc4），年年公佈，30間最高收入球會。有話可能睇開支或人工會好啲，但上次篇文都講過，唔同球會wage to income 唔同，賴搵。而有咗FFP後，球會開支大約都要跟返收入，不能不停年年見紅蝕住做（＊）。戰績跟UEFA Coefficient五年總數（https://bit.ly/3em7Y0H），應該冇乜更好嘅量度。

3. 再講一次，基本上都係有錢有戰績：唔使講李斯特城拎英超或鄧小平好長命嘅例外。歐聯冠軍，近九屆年都係十大富豪球會（今年收入計）拎。點解係九屆？因為2010係國際米蘭拎，國米而家唔係十大富豪，但當年就仲係！如果你係計 「當年」收入，就真係N咁多年都係十大富豪包辦冠亞軍。例外要數到2003-2004年波圖對摩納哥，最後一次嘅非富豪足球，亦有啲人話最低質嘅一屆，任你。即使唔講冠軍，睇系數，上次篇文都見到，有錢有戰績。

4. 德甲法甲意甲一隊獨大，都係因為錢：你睇國內聯賽，更加明顯。點解德甲年年拜仁，法由年年PSG，意甲年年祖雲達斯，西甲就皇馬巴塞？因為收入拋離國內其他球會太多。英超相對地好啲，但亦根本係反映返財富分佈—迫悉匙個名點嚟？係收入拋離晒其他。你見呢六隊波基本上包辦近N季頭六咁滯。亦因為咁，李斯特城捧到盃先係一時佳話。

5. 收入同戰績當然互為影響，但主要都係收入係原因：當然有趣嘅係，你可以話掉轉亦得。上次篇文話你知相關性好強，但的確不一代係有錢就帶嚟績，可能係有戰績自然吸到錢亦得。例如你見李城特城，捧完盃，又有歐聯踢，又自然多咗錢。可以話雞先蛋先，但主要都係先有收入，再有戰績，然後又有收入—其實同個社會差不多，富者越富咁。

6. 有錢有傳統，就冇戰績都搞到有：因為你就算有戰績帶到收入有歐洲賽踢，往往啲主力又會走，打後戰績又打回原型。掉轉，有錢嘅，幾屆冇戰績，都可以撥亂反正。例子係曼聯，你見過去幾季戰績差到一個點，但主要有錢，慢慢就走返上正軌。某程度上再睇遠少少嘅利物浦都係。呢啲傳統大會，頹幾季都好，唔會一沉不起（但意甲嘅就會，因為本身都冇乜錢）

7. 上次篇文都講過呢啲，咁今次做乜？上次有講，系數用五年，但收入只係用一年，好似唔太好。咁幸好，收入用五年計都唔難。今次就用五年比。系數就一定用五年了，用一年會好大上大落。另外留意，我飛起咗愛華頓同韋斯咸，佢地收入在拿坡里同里昂中間，但歐洲賽系數太低（幾分），放落圖會扭曲晒

8. 大球會錢就一切，細球會反而有得走盞：樓上個圖，哥林（Column）J係球會嘅五年平均收入。P係平均收入排名，Q係系數排名。差不多已經解晒。你睇最頭嗰堆，兩個排名差不多一樣。明顯差嘅係曼聯車路士，曼聯不用多講，收入第三，戰績第九。車路士其實都幾差下，但主要因為有一季冇歐洲賽。利物浦嘅情況相反，睇好似冇乜特別，但其實有一季冇歐洲賽，否則個分更高。跑出嘅，祖雲達斯同馬體會，後者好多人都知，前者其實唔係你想像中咁富豪。在意甲梗係勁，但出去同歐洲頂級比，唔係好多錢。但留意後面堆細啲嘅會就排名同系數差別大啲。

9. 以下係結論。樓下呢三個表，我會再不停引用，自己Save 低

10. 仲係有錢有戰績，而用5年平均收入解，反而冇咁好：今次呢個圖，同上次差不多玩法。但用嘅唔係今年收入，係過去5年平均收入。見到乜？見到個R^2，係低咗嘅，即係條線fit得差咗，解釋能力差咗。同埋要講，個R^2雖然低咗，但只係爭少少，而亦只係50咁上下。人話講，即係$只能解釋一半，仲有一半畀你走位。相比之下，之前寫過，你見聯賽，$佔因素多。亦不難解釋，首先聯賽踢咁多場，大把空間犯錯，歐聯你一兩個錯誤可以死人。當然仲有，歐聯最有錢果班球會，佢地之間相對地收入冇爭咁遠。

11. 前列冇得爭，打後仲可以爭下：你睇返，條線在右上方，係比較靚嘅。咩巴塞曼城PSG利物浦熱刺都相差唔太遠。拜仁皇馬祖雲達斯巴塞算略為好睇，阿仙奴車路士略差，馬體會神奇超卓，祖雲達斯都勁，曼聯就失望。但去到左下，冇咁富有嘅細會，就可以爭好遠，有啲好似拿坡里里昂羅馬咁跑出，史浩克AC國米李斯特城都係幾差下。留意我仲要踢走咗韋斯咸愛華頓，否則仲誇張。

12. 收入增長勁就翻生：哥林H係過去5季嘅收入複合增長（2020收入/2016收入開四次方根再減1）。首先睇，頭22間夾埋，收入大約係9%一年增長，成個市場係咪增長好好見仁見智。另外見到，都係收入增長得勁，你見到戰績改善。當然亦係雞同蛋，但一般係有錢先有戰績。你見增長最勁果幾間，里昂唔熟，但拿坡里，國米（增長第一！），馬體會，熱刺（唔計今季啦下，上屆歐聯亞軍喎），利物浦，近年歐洲賽甚至聯賽都係改善不少嘅。當然史浩克就係有收入都冇戰績嘅，其實幾離譜下，收入德甲第三，同多蒙特唔爭好遠，但近年啲戰績差到一個點。巴塞就留畀你地評，講收入增長巴塞其實贏皇馬的。反例方面，收入增長最慢嘅，阿仙奴，唔使我講啦。AC米蘭羅馬車路士歐戰都麻麻地，愛華頓就歐洲賽都冇乜點踢。例外可能係皇馬，收入增長遠遜其他球會，但戰績一樣勁。

13. 富豪一路都係富豪：留意今次個圖有少少唔同。上次我係搵歐洲系數最勁果廿間。今次呢？搵收入最勁嘅行先。咁上次都過會有乜問題：如果之前佢唔在榜上，咁點算？結果見到，個社會流動性，係好低的：今年最有錢嘅30間中，頭22間，5年前都在榜上！所以你見到啲小球會真係好難發圍。（睇表二就知）

14. 5年過去，收入排名分別冇乜變：另一角度，睇下上面個表，哥冧O，係2016收入排名（哥林N）同2020排名（哥林M）差距，分別不太大。升得多嘅，熱刺咯，所以今季摩連奴真係不知所謂的。國米拿坡里亦係升得多，近一兩季你見戰績強返（特別係國米）。跌得多嘅，AC米蘭咯，你見近年完全唔掂，阿仙奴咯，所以其實根本就冇乜錢，唔易入前四的。

15. 結論：富豪就係富豪，好少會再向下流，但你確保唔好做AC米蘭（或阿仙奴）。下篇會講下啲20位開外嘅球會，可能仲過癮。

（＊）寫果時仲未有曼城判決，而家當然得啖笑

［英超收咧睇呢啲］梗係講錢啦，唔通講波咩

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TL：DR 利物浦繼續英明，曼城都係勁的，收入其實同利物浦差不多。曼聯當然唔掂但有歐聯吹咩，有錢真係大晒架。車路士還好，林伯特可以取代雲加位置。阿仙奴係歐霸料但歐霸都冇。熱刺係歐聯料但有歐霸摩佬都會日講夜講。李斯特城狼隊好波但可惜唔夠多錢。水晶宮韋斯咸就算吧啦，不過倫敦會有慣性收視。

1. 之前寫過篇「英超人工性價比」，原來已經一年幾次前。估唔到。咁當然嗰篇係講上季。

2. 今篇仲簡單，講今季，剛收咧。但我用球會收入，唔係人工。點解？懶搵。你有嘅可以畀我做過個，但未必會寫多篇。因為收視毒藥。最多我在呢度加個update

3. 點解得11隊？點解係呢11隊？因為呢11隊就係收入最高嘅．Deloitte Money League （https://bit.ly/3iavNvB）30強。留意30隊英超佔咗11隊，好誇張。韋斯咸之類，收入多過AC米蘭。主因當然係英超廣播費高，而又分得比較勻，細球會都食唔少。當然韋斯咸嘅畸屎應該都同在倫敦有關。

4. 留意返，2020數，係2020年2月出，即係反映舊年嘅。

5. 咁呢11隊，就唔係最後拎晒聯賽11強。但其實都包咗頭8。第9係錫菲聯，收入就唔入頭11，聽聞教得幾好。

6. 當然兩篇文用唔同嘢，又唔同季，未必可比。但一般嚟講，用收入比就簡單啲。人工嘛？同一聯賽（例如英超）都仲可比，唔同聯賽啲稅榜呀，或者球員自己啲代言費肖像費點計，就很煩了。而原本我寫過，有FFP（Financial Fair Ply）之下，照計你人工同收入不能太脫勾，球會wage to income不能爭太遠，否則會蝕錢。不過而家FFP嘅嘢……

7. Anyway，上一篇，即係上一季嘅「英超人工性價比」，除咗明顯嘅「錢多終勝」，仲有個別球會嘅：曼聯水魚無誤，利鏝使得精明，阿車對得住球迷，熱刺就outferform。

8. 簡單嚟講，就係限米煮限飯。上一季，利物浦不用講。曼城係有錢但其實戰績對得住啲錢，曼聯就勁唔掂。阿仙奴車路士就同睇收入預期嘅差不多。熱刺就勁

9. 今季呢？有同有唔同。當然再強調，今季我用咗總收入。你鍾意用人工嘅，send數字畀我

10. 今季睇返，最關心嘅三隊，都係同上季一樣。利物浦拎咗冠軍，咁固然都係相當富有，其實收入真係同曼城一樣的！但後者你覺得係油王足球。但99分喎。你見到在條線上離晒罩的。利物浦繼續係勁的。收入第三拎第一，仲要係拋離咁多分（同埋拎到後已hea hea地）。可惜歐聯早早出局（對面馬體會就真係慳水慳力之鬼，其實收入好低下）

11. 曼城呢？都話，其實好有錢咩？收入同利物浦差不多咯，收入第二拎第二。不過你覺得曼城啲錢係油王流出嚟嘅就後話。但講球會收入，的確係差不多。咁當然積分落後利物浦好多—但其實，都係屈晒機的。FFP又冇事，繼續可以橫行無忌。拜仁就唔使諗哥迪奧拿回歸了。

12. 你對比下，曼聯就知。卒之碌到入前四，恭喜。咁下年收入又有保證。都係錢多終勝，so sad．曼聯係歐洲第三收入高球會（皇馬巴塞之後），英超第一，仲要拋離曼城利物浦不少。但分數最後都係第四。咁當然好過上季踢歐霸啦下。但都仲係唔掂，在條線離晒罩。不過唔緊要，錢解決唔到嘅問題，再多錢就解決到。下季有歐聯踢，更多嘅錢。聽聞今季下半季翻生，好大程度因為季中買咗般奴費南迪斯，立竿見影。咁4700萬在現金（特登打錯！）球壇唔係咩大錢（聽過祖奧菲歷斯未？）。但朋友講得啱，對曼聯曼城唔係咩錢，「但第5嗰隊係李斯特城」，就幾係嘢。即係齋講平行時空，就當李斯特城同樣都有諗過，都可能未必會中間去買。「因為買埋之後冇歐聯就仆街」

13. 仲有，倫敦三雄。阿仙奴車路士熱刺，全部都係麻麻地。但車路士好歹有歐聯，就其實都在條線上，收入第五拎第四，還好，有歐聯又幫補下收入。林伯特第一季教（好似係？），還不錯啦。唔係有乜叻，但合格。「可望以後取替阿仙奴嘅角色」「唔係諗住反勝拜仁下話？」（係嘅齊齊去恥笑拜仁）

14. 邊隊差？熱刺就梗係差。收入第四，但拎第六。幸好搏到個歐霸—雖然歐霸同歐聯收入爭太遠。睇下摩佬捧歐霸會唔會又講幾年先。

15. 人人得以誅之嘅阿仙奴呢？我好記得當年人人鬧雲格，拎第四然後歐聯分組出線然後做拜仁私家雞年年十六強出局。「而家係咪好懷念有歐聯打呢！」。寫過好多次，錢錢錢同埋錢。阿仙奴根本收入就唔係頭四材料，有歐聯係bonus，冇係正常，應該係歐霸料。但又話說回頭，今季搞到歐霸都冇，就梗係差。所以上季有歐霸，不錯。歐霸都冇，就唔掂了。個個恥笑雲格，其實當年已係最好。踢歐霸都鬧？而家歐霸都冇。不過正路地，阿仙奴應該都係歐霸位嘅。

16. 迫悉匙以外？其實都冇乜好講。你見到真係收入分開兩組。所以李斯特城同狼隊真係好嘢。可惜兩隊都功虧一簣。李城就衝刺時不停失分跌返歐聯位，都幾大劑。狼隊又係，收入係熱刺四份一咁滯，但同你同分！可惜得失球唔及，歐霸都冇。

17. 再打後嘅，都係麻麻地。不少朋友捧嘅愛華頓固然就冇乜錢，但其實收入係高過李斯特城嘅（不過之後李城有歐洲賽），可以望下有歐霸嘅。至於水晶宮韋斯咸呢啲，當然係唔掂。倫敦會（應該有關吧？），收入其實高過華倫西亞。收入中游，分數就中下游。但你咪理， Keep到英超就得。

18. 降班嗰啲呢，就好大鑊嘅。但其實又有parachute payment，有機會寫下。間接後果就係軍備競賽，英冠隊搏老命都要上英超，好多隊啲wage to income都去到近100%，蝕住玩，因為搏到上英超就神仙，衰咗咪搵人執手尾。韋根事件，都同此有關。

19. 話時話，其實睇到個R^2係唔夠50%嘅。用人話講即係你收入只係解釋表現一半左右，其實唔少會可以走箋。往年「人工性價比」呢，個R^2係近70%，人工解釋七成。點解咁大分別？至少三個可能。第一，可能用收入唔好，用人工先好。第二，可能今季因為疫情比較奇特。第三，留意今次我只係用咗11隊，上次20隊。

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145