歐洲球會人工 vs 戰績：廢老指點江山篇

版務：事忙兼搞緊Patreon，出住呢啲儲稿先，咁啱歐聯又重開。圖就睇medium 版吧 （https://bit.ly/30z4hko）

1. 呢篇係上一篇嘅延續，未睇可睇（https://bit.ly/2ZXGtFC）。繼續講歐洲球會收入，同歐洲賽戰績。
2. 收入就跟Deloitte Money League（https://bit.ly/2ZksWc4），年年公佈，30間最高收入球會。有話可能睇開支或人工會好啲，但上次篇文都講過，唔同球會wage to income 唔同，賴搵。而有咗FFP後，球會開支大約都要跟返收入，不能不停年年見紅蝕住做（＊）。戰績跟UEFA Coefficient五年總數（https://bit.ly/3em7Y0H），應該冇乜更好嘅量度。

3. 再講一次，基本上都係有錢有戰績：唔使講李斯特城拎英超或鄧小平好長命嘅例外。歐聯冠軍，近九屆年都係十大富豪球會（今年收入計）拎。點解係九屆？因為2010係國際米蘭拎，國米而家唔係十大富豪，但當年就仲係！如果你係計 「當年」收入，就真係N咁多年都係十大富豪包辦冠亞軍。例外要數到2003-2004年波圖對摩納哥，最後一次嘅非富豪足球，亦有啲人話最低質嘅一屆，任你。即使唔講冠軍，睇系數，上次篇文都見到，有錢有戰績。

4. 德甲法甲意甲一隊獨大，都係因為錢：你睇國內聯賽，更加明顯。點解德甲年年拜仁，法由年年PSG，意甲年年祖雲達斯，西甲就皇馬巴塞？因為收入拋離國內其他球會太多。英超相對地好啲，但亦根本係反映返財富分佈—迫悉匙個名點嚟？係收入拋離晒其他。你見呢六隊波基本上包辦近N季頭六咁滯。亦因為咁，李斯特城捧到盃先係一時佳話。

5. 收入同戰績當然互為影響，但主要都係收入係原因：當然有趣嘅係，你可以話掉轉亦得。上次篇文話你知相關性好強，但的確不一代係有錢就帶嚟績，可能係有戰績自然吸到錢亦得。例如你見李城特城，捧完盃，又有歐聯踢，又自然多咗錢。可以話雞先蛋先，但主要都係先有收入，再有戰績，然後又有收入—其實同個社會差不多，富者越富咁。

6. 有錢有傳統，就冇戰績都搞到有：因為你就算有戰績帶到收入有歐洲賽踢，往往啲主力又會走，打後戰績又打回原型。掉轉，有錢嘅，幾屆冇戰績，都可以撥亂反正。例子係曼聯，你見過去幾季戰績差到一個點，但主要有錢，慢慢就走返上正軌。某程度上再睇遠少少嘅利物浦都係。呢啲傳統大會，頹幾季都好，唔會一沉不起（但意甲嘅就會，因為本身都冇乜錢）

7. 上次篇文都講過呢啲，咁今次做乜？上次有講，系數用五年，但收入只係用一年，好似唔太好。咁幸好，收入用五年計都唔難。今次就用五年比。系數就一定用五年了，用一年會好大上大落。另外留意，我飛起咗愛華頓同韋斯咸，佢地收入在拿坡里同里昂中間，但歐洲賽系數太低（幾分），放落圖會扭曲晒

8. 大球會錢就一切，細球會反而有得走盞：樓上個圖，哥林（Column）J係球會嘅五年平均收入。P係平均收入排名，Q係系數排名。差不多已經解晒。你睇最頭嗰堆，兩個排名差不多一樣。明顯差嘅係曼聯車路士，曼聯不用多講，收入第三，戰績第九。車路士其實都幾差下，但主要因為有一季冇歐洲賽。利物浦嘅情況相反，睇好似冇乜特別，但其實有一季冇歐洲賽，否則個分更高。跑出嘅，祖雲達斯同馬體會，後者好多人都知，前者其實唔係你想像中咁富豪。在意甲梗係勁，但出去同歐洲頂級比，唔係好多錢。但留意後面堆細啲嘅會就排名同系數差別大啲。

9. 以下係結論。樓下呢三個表，我會再不停引用，自己Save 低

10. 仲係有錢有戰績，而用5年平均收入解，反而冇咁好：今次呢個圖，同上次差不多玩法。但用嘅唔係今年收入，係過去5年平均收入。見到乜？見到個R^2，係低咗嘅，即係條線fit得差咗，解釋能力差咗。同埋要講，個R^2雖然低咗，但只係爭少少，而亦只係50咁上下。人話講，即係$只能解釋一半，仲有一半畀你走位。相比之下，之前寫過，你見聯賽，$佔因素多。亦不難解釋，首先聯賽踢咁多場，大把空間犯錯，歐聯你一兩個錯誤可以死人。當然仲有，歐聯最有錢果班球會，佢地之間相對地收入冇爭咁遠。

11. 前列冇得爭，打後仲可以爭下：你睇返，條線在右上方，係比較靚嘅。咩巴塞曼城PSG利物浦熱刺都相差唔太遠。拜仁皇馬祖雲達斯巴塞算略為好睇，阿仙奴車路士略差，馬體會神奇超卓，祖雲達斯都勁，曼聯就失望。但去到左下，冇咁富有嘅細會，就可以爭好遠，有啲好似拿坡里里昂羅馬咁跑出，史浩克AC國米李斯特城都係幾差下。留意我仲要踢走咗韋斯咸愛華頓，否則仲誇張。

12. 收入增長勁就翻生：哥林H係過去5季嘅收入複合增長（2020收入/2016收入開四次方根再減1）。首先睇，頭22間夾埋，收入大約係9%一年增長，成個市場係咪增長好好見仁見智。另外見到，都係收入增長得勁，你見到戰績改善。當然亦係雞同蛋，但一般係有錢先有戰績。你見增長最勁果幾間，里昂唔熟，但拿坡里，國米（增長第一！），馬體會，熱刺（唔計今季啦下，上屆歐聯亞軍喎），利物浦，近年歐洲賽甚至聯賽都係改善不少嘅。當然史浩克就係有收入都冇戰績嘅，其實幾離譜下，收入德甲第三，同多蒙特唔爭好遠，但近年啲戰績差到一個點。巴塞就留畀你地評，講收入增長巴塞其實贏皇馬的。反例方面，收入增長最慢嘅，阿仙奴，唔使我講啦。AC米蘭羅馬車路士歐戰都麻麻地，愛華頓就歐洲賽都冇乜點踢。例外可能係皇馬，收入增長遠遜其他球會，但戰績一樣勁。

13. 富豪一路都係富豪：留意今次個圖有少少唔同。上次我係搵歐洲系數最勁果廿間。今次呢？搵收入最勁嘅行先。咁上次都過會有乜問題：如果之前佢唔在榜上，咁點算？結果見到，個社會流動性，係好低的：今年最有錢嘅30間中，頭22間，5年前都在榜上！所以你見到啲小球會真係好難發圍。（睇表二就知）

14. 5年過去，收入排名分別冇乜變：另一角度，睇下上面個表，哥冧O，係2016收入排名（哥林N）同2020排名（哥林M）差距，分別不太大。升得多嘅，熱刺咯，所以今季摩連奴真係不知所謂的。國米拿坡里亦係升得多，近一兩季你見戰績強返（特別係國米）。跌得多嘅，AC米蘭咯，你見近年完全唔掂，阿仙奴咯，所以其實根本就冇乜錢，唔易入前四的。

15. 結論：富豪就係富豪，好少會再向下流，但你確保唔好做AC米蘭（或阿仙奴）。下篇會講下啲20位開外嘅球會，可能仲過癮。

（＊）寫果時仲未有曼城判決，而家當然得啖笑

［英超收咧睇呢啲］梗係講錢啦，唔通講波咩

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TL：DR 利物浦繼續英明，曼城都係勁的，收入其實同利物浦差不多。曼聯當然唔掂但有歐聯吹咩，有錢真係大晒架。車路士還好，林伯特可以取代雲加位置。阿仙奴係歐霸料但歐霸都冇。熱刺係歐聯料但有歐霸摩佬都會日講夜講。李斯特城狼隊好波但可惜唔夠多錢。水晶宮韋斯咸就算吧啦，不過倫敦會有慣性收視。

1. 之前寫過篇「英超人工性價比」，原來已經一年幾次前。估唔到。咁當然嗰篇係講上季。

2. 今篇仲簡單，講今季，剛收咧。但我用球會收入，唔係人工。點解？懶搵。你有嘅可以畀我做過個，但未必會寫多篇。因為收視毒藥。最多我在呢度加個update

3. 點解得11隊？點解係呢11隊？因為呢11隊就係收入最高嘅．Deloitte Money League （https://bit.ly/3iavNvB）30強。留意30隊英超佔咗11隊，好誇張。韋斯咸之類，收入多過AC米蘭。主因當然係英超廣播費高，而又分得比較勻，細球會都食唔少。當然韋斯咸嘅畸屎應該都同在倫敦有關。

4. 留意返，2020數，係2020年2月出，即係反映舊年嘅。

5. 咁呢11隊，就唔係最後拎晒聯賽11強。但其實都包咗頭8。第9係錫菲聯，收入就唔入頭11，聽聞教得幾好。

6. 當然兩篇文用唔同嘢，又唔同季，未必可比。但一般嚟講，用收入比就簡單啲。人工嘛？同一聯賽（例如英超）都仲可比，唔同聯賽啲稅榜呀，或者球員自己啲代言費肖像費點計，就很煩了。而原本我寫過，有FFP（Financial Fair Ply）之下，照計你人工同收入不能太脫勾，球會wage to income不能爭太遠，否則會蝕錢。不過而家FFP嘅嘢……

7. Anyway，上一篇，即係上一季嘅「英超人工性價比」，除咗明顯嘅「錢多終勝」，仲有個別球會嘅：曼聯水魚無誤，利鏝使得精明，阿車對得住球迷，熱刺就outferform。

8. 簡單嚟講，就係限米煮限飯。上一季，利物浦不用講。曼城係有錢但其實戰績對得住啲錢，曼聯就勁唔掂。阿仙奴車路士就同睇收入預期嘅差不多。熱刺就勁

9. 今季呢？有同有唔同。當然再強調，今季我用咗總收入。你鍾意用人工嘅，send數字畀我

10. 今季睇返，最關心嘅三隊，都係同上季一樣。利物浦拎咗冠軍，咁固然都係相當富有，其實收入真係同曼城一樣的！但後者你覺得係油王足球。但99分喎。你見到在條線上離晒罩的。利物浦繼續係勁的。收入第三拎第一，仲要係拋離咁多分（同埋拎到後已hea hea地）。可惜歐聯早早出局（對面馬體會就真係慳水慳力之鬼，其實收入好低下）

11. 曼城呢？都話，其實好有錢咩？收入同利物浦差不多咯，收入第二拎第二。不過你覺得曼城啲錢係油王流出嚟嘅就後話。但講球會收入，的確係差不多。咁當然積分落後利物浦好多—但其實，都係屈晒機的。FFP又冇事，繼續可以橫行無忌。拜仁就唔使諗哥迪奧拿回歸了。

12. 你對比下，曼聯就知。卒之碌到入前四，恭喜。咁下年收入又有保證。都係錢多終勝，so sad．曼聯係歐洲第三收入高球會（皇馬巴塞之後），英超第一，仲要拋離曼城利物浦不少。但分數最後都係第四。咁當然好過上季踢歐霸啦下。但都仲係唔掂，在條線離晒罩。不過唔緊要，錢解決唔到嘅問題，再多錢就解決到。下季有歐聯踢，更多嘅錢。聽聞今季下半季翻生，好大程度因為季中買咗般奴費南迪斯，立竿見影。咁4700萬在現金（特登打錯！）球壇唔係咩大錢（聽過祖奧菲歷斯未？）。但朋友講得啱，對曼聯曼城唔係咩錢，「但第5嗰隊係李斯特城」，就幾係嘢。即係齋講平行時空，就當李斯特城同樣都有諗過，都可能未必會中間去買。「因為買埋之後冇歐聯就仆街」

13. 仲有，倫敦三雄。阿仙奴車路士熱刺，全部都係麻麻地。但車路士好歹有歐聯，就其實都在條線上，收入第五拎第四，還好，有歐聯又幫補下收入。林伯特第一季教（好似係？），還不錯啦。唔係有乜叻，但合格。「可望以後取替阿仙奴嘅角色」「唔係諗住反勝拜仁下話？」（係嘅齊齊去恥笑拜仁）

14. 邊隊差？熱刺就梗係差。收入第四，但拎第六。幸好搏到個歐霸—雖然歐霸同歐聯收入爭太遠。睇下摩佬捧歐霸會唔會又講幾年先。

15. 人人得以誅之嘅阿仙奴呢？我好記得當年人人鬧雲格，拎第四然後歐聯分組出線然後做拜仁私家雞年年十六強出局。「而家係咪好懷念有歐聯打呢！」。寫過好多次，錢錢錢同埋錢。阿仙奴根本收入就唔係頭四材料，有歐聯係bonus，冇係正常，應該係歐霸料。但又話說回頭，今季搞到歐霸都冇，就梗係差。所以上季有歐霸，不錯。歐霸都冇，就唔掂了。個個恥笑雲格，其實當年已係最好。踢歐霸都鬧？而家歐霸都冇。不過正路地，阿仙奴應該都係歐霸位嘅。

16. 迫悉匙以外？其實都冇乜好講。你見到真係收入分開兩組。所以李斯特城同狼隊真係好嘢。可惜兩隊都功虧一簣。李城就衝刺時不停失分跌返歐聯位，都幾大劑。狼隊又係，收入係熱刺四份一咁滯，但同你同分！可惜得失球唔及，歐霸都冇。

17. 再打後嘅，都係麻麻地。不少朋友捧嘅愛華頓固然就冇乜錢，但其實收入係高過李斯特城嘅（不過之後李城有歐洲賽），可以望下有歐霸嘅。至於水晶宮韋斯咸呢啲，當然係唔掂。倫敦會（應該有關吧？），收入其實高過華倫西亞。收入中游，分數就中下游。但你咪理， Keep到英超就得。

18. 降班嗰啲呢，就好大鑊嘅。但其實又有parachute payment，有機會寫下。間接後果就係軍備競賽，英冠隊搏老命都要上英超，好多隊啲wage to income都去到近100%，蝕住玩，因為搏到上英超就神仙，衰咗咪搵人執手尾。韋根事件，都同此有關。

19. 話時話，其實睇到個R^2係唔夠50%嘅。用人話講即係你收入只係解釋表現一半左右，其實唔少會可以走箋。往年「人工性價比」呢，個R^2係近70%，人工解釋七成。點解咁大分別？至少三個可能。第一，可能用收入唔好，用人工先好。第二，可能今季因為疫情比較奇特。第三，留意今次我只係用咗11隊，上次20隊。

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145

［歐聯睇呢啲］球會收入性價比- 歐洲篇

建議你睇medium版，多圖，link 在此（https://bit.ly/2ZEtgkL）

TLDR：其實都係一分錢一分貨，但相比於聯賽，歐聯冇咁易錢多終勝。

1. 本文寫在6月尾，其實歐聯歐霸都未重開，但等唔到了，亦費事到時唔記得寫。

2. 小小說在前面。首先，足球嘅嘢，就真係金錢遊戲。唔信唔使睇，但我寫過無數咁多篇文。例如寫過英超人工性價比（https://bit.ly/2BNZFwQ）。仲有西甲（https://bit.ly/2Vqt3R4），德甲（https://bit.ly/2B8x9X5），意甲（https://bit.ly/3g6M0A6）都有寫，自己搵。球會人工開支同聯賽表現，關係極之大。

3. 背後亦都好簡單嘅原理，波士文案後（https://bit.ly/3eFRuBB），球員轉會十分自由，加埋全球化商業化仲有電視廣播，球員好大程度都睇錢，你有錢咪有球員同你賣命。而講嘅錢，其實係人工，唔係轉會費。一來受制於歐洲足協嘅財政公平競技（FFP），的確難啲做土豪玩夢幻明星隊，二來，你傾唔掂球員人工，佢間會肯放，佢自己都唔肯嚟。

4. 寫足四篇文，英西德意，都見到呢個人工同聯賽積分，有相當大嘅關係，統計上好顯著。你要做例外撚嘅當然大把，我知李斯特城捧盃，我都知鄧小平係煙鏟但好長命，但我講「整體」。

5. 咁，如果去到歐洲賽又如何？照樣計下咯。不過有少少唔同。歐聯歐霸唔係聯賽，冇分數。所以我用歐洲足協嘅系數（https://bit.ly/2NAUHqb）。唔知係乜嘅自己慢慢睇（https://bit.ly/2VqI5pO）。鍾意話唔科學唔公平嘅隨便你，但歐洲足協都係用呢套，所有球會都同意，打生打死都係為呢樣。你堅持自己最撚醒只係數冠軍，隨你。但數歐聯冠軍嘅，近九屆，都係歐洲最富有十大球會拎。最富有嘅「皇巴拜」就拎咗七屆。（所以之前國際米蘭真係勁，但持續唔到的，話咁快收皮）

6. 用人話講，歐洲足協系數，就計返所有參加歐洲賽（歐聯歐霸）嘅球會，每年表現。每贏一場又有分，和波又有分，外圍賽都有，出線又有再加分。如果你嗰年冇參賽？就零分。系數有乜用？最主要用嚟決定分組抽種子，例如拜仁皇馬就唔會分組賽抽埋一組（暫時唔會）。以前仲殘忍啲，例如系數頭三嘅聯賽，就國內頭四名都歐聯，系數第四嘅，就得三隊 — 咁好易搞到惡性循環，因為越少隊打歐聯就越難拎分。當時德甲意甲法甲都爭過下第三（英超西甲正係收入一二，亦長期係系數一二，仲話唔係睇錢？）。但後來改咗制，就三四都係四隊。

7. 咁一計，就計過去五年嘅。免得太過大上大落咁咯。呢一刻，其實今屆歐聯歐霸仲未踢完，但我已經急不及待寫埋文。反正係計五屆，死剩嘅又大熱門多，唔會太大影響計算。

8. 做法好簡單，就係球會嘅收入，同埋佢地嘅歐洲賽系數相比。收入好高但踢出嚟系數低嘅，自然係管理不善（例如曼聯），收入唔高但踢出嚟掂嘅，當然係巴閉（例如馬體會）。收入高而成績好嘅……咪恰如其份交到功貨。

9. 系數我用5年，頭20位嘅球會。講過了，人地排位都用5年，況且用一年唔太公平，總有失手之時。例如波圖今年歐聯外圍賽已香，但之前幾屆幾勁。又或者，16/17年，利物浦車路士齊齊冇歐戰，但唔通當佢地就零分？我估用5年系數冇乜大爭議

10. 收入呢？就只用單年，來源係Deloitte Money League（https://bit.ly/2ZfSuG3）。點解系數用5年加埋但收入唔係？原因好簡單，因為方便。理論上你可以加埋的，但我冇咁好心機。況且有啲會如果今年收入在歐洲頭30，但往年唔係，我就唔知去邊慢慢搵。我相信都OK嘅，因為收入呢啲嘢，幾年間好難爭太遠。你睇頭四五間會，過去5年都係嗰幾間。

11. 解釋晒後， 去片，出嚟個圖就係咁，紅色圈嘅，斜線左上方，成績相對於收入係好嘅球會。藍色嘅，斜線右下，成績相對於收入嚟講差嘅球會。以下係解說，先講整體，再講個別聯賽：

12. 都仲係有錢有戰績，但留意其實唔算極明顯。技術啲講，個R-square 54%左右。你見之前我做聯賽嘅高好多的。當然因為歐聯玩淘汰賽，同埋水平（特別係頂級嘅）比較接近，運氣或其他臨場成份多。相對地唔係真係咁易有錢玩晒。但最主要原因都係聯賽三十幾場，好多出錯空間。你睇拜仁德甲，上半季埋單落後榜首萊比錫4分，全季係領先第二多蒙特13分。李斯特城嗰啲真係奇蹟（雖然，李斯特城收入已經同AC米蘭差不多）

13. 條線上面（左上）嗰堆你可以當係outperform（性價比高，同樣收入換嚟更高分數）。留意其實好多係大會，細球會好難發為。

14. 另外睇返，左上角，呢堆outperform嘅，主要係西甲會！馬體會西維爾多人估到，但皇馬巴塞未必估到。英超呢？只係得曼城勉強叫估outperform（估唔到呢），英超其他？其實認真麻麻。所以講咩英超進步，其實講到尾都係錢，錢，同埋錢。

15. 祖雲達斯性價比高好多人都估到，但皇馬更超班。估唔到拜仁巴塞曼城都係outperform。PSG固然麻麻地，但冇你想像中咁水魚。

16. 但當然，英超球迷可以拗，英超競爭激烈 — 如果你講within big six就算係 — 例如，我想像唔到拜仁未來五季會冇歐聯，same for 巴塞皇馬祖雲達斯 — 但英超呢？阿仙奴已經由年年頭四變成畀人甩開。英超球會相對容易冇歐戰，所以individually 咪啲系數有機會低。例如16/17年，利物浦車路士齊齊冇歐戰，阿仙奴今季就歐霸，呢啲對球會自己嘅系數都好大影響。講白啲，入到歐聯分組賽，系數就已經有底分。

17. 當然最超班係馬體會，收入只係歐洲十三，但系數排到第二，所以施蒙尼都真係值咁嘅人工。西維爾亦都係堅，收入唔入歐洲頭三十，但系數十一。不過其實食緊老本，呢兩年戰績麻麻。西甲整體係堅嘅，但聽聞其實啲負債高，同埋wage to income 畀得高。肺炎後係咪仲有得玩？睇下。

18. 有錢冇成績嘅，大家都知，曼聯，近年的確廢到一個點，收入歐洲頭三，系數第九。但英超倫敦三雄其實都係差。阿仙奴反而係冇咁離譜，舊文都講過，收入英超第六（至於點解啲飛咁貴但收入都只係第六又另一問題），你期望佢年年頭四根本係不切實際。但早幾屆仲有歐聯玩，之後如果冇就再大大影響系數。而甚至利物浦都係underperform。但都講過，系數計五年，利物浦16/17係食蛋嘅。你計近三年又會幾唔同。想講係利物浦其實好富貴

19. 德甲拜仁，有一期有個term叫「皇巴拜」，拜仁嗰期連續五屆四強，而家好似頹啲，但你睇返，其實系數仲係歐洲第四，咪同佢收入排歐洲第四差不多。作為拜仁球迷，覺得球會似係進化版阿仙奴，歐聯其實幾穩定，唔會分組出局，一般都八強起碼，但你見捧盃次數就少了。講到簡單啲就係，你估真係排第三就年年四強咩。拉均差不多就係了，況且有啲隊忽然四強但又會忽然早出局。

20. 德迷或反拜仁鍾意J嘅多蒙特，其實表現係不如預期嘅。直接啲講，多蒙特要挑戰拜仁當然不太可能（收入大約得一半），但收入又勁過其他德甲會好多，基本上每年實踢歐聯。計歐洲收入十二 系數都十二，但考慮到呢個歐聯優勢，係可以好啲嘅。當然，多蒙特可以恥笑死敵史浩克，其實收入同多蒙特差不多，都排德甲第三（估唔到呢？主要係球迷多又夠死硬），歐洲收入排十五，但系數去到三十外。下季會更低，因為又冇歐洲賽了。史浩克近年真係好差。系數會被下季有歐聯嘅萊比錫趕上了。

21. 另外，德甲收入第四係法蘭克福，全歐洲叫做排到頭三十，但系數去到近五十。反而畀人話德甲之恥嘅利華古遜，其實好勁，德甲收入不入頭四，歐洲唔入頭三十，但系數廿三，踢親歐洲賽都有啲貨交，但下年只得歐霸。

22. 意甲方面，仲搞笑。祖雲達斯講左啦，係錢多，但歐戰戰績極好，歐洲收入第十，系數第五。但，其他意甲隊呢？羅馬拿坡里麻麻地，其他嗰啲？唔知去晒邊。想講，意甲雖則窮，但話晒歐洲收入頭三十，五隊意甲，甚至多過西甲德甲（咁當然意甲收入最叻只係排第十），但，系數頭三十呢？得三隊意甲。國際米蘭係五十外，AC米蘭更係八十外，呢啲就意甲之恥。

23. 另外想講薩克達。個收入係我自己篤入去的！因為根本搵唔到收入幾多，就連官網都好似冇（睇埋烏克蘭文了）。唯一應該肯定係唔入頭三十。睇返梳屎，話2017年，收入係17億烏克蘭紙，似乎係6000萬Euro 不夠，我當佢呢兩年勁升，畀夠1億Euro，賓菲加一半咁上下。

24. 最後再檢討，當然收入唔一定全部去晒人工。有啲球會嘅wage/income高，有啲低，各有原因。但我未搵到亦唔想去搵歐洲所有隊嘅人工，我亦唔知啲匯率點搞，或者唔同國家嘅人工係咪可比，甚至用稅前定稅後（似乎應用稅後？）計。你鍾意嘅可以自己整

25. 而思前想後，我覺得用收入去同戰績比，好過用人工添。固然唔同會可以唔同嘅wage/income ratio，但亦不能長期高過對手太多，否則財政會有問題。總之收入係咁多，你人工佔少啲嘅，可能你咪可以趁市差搶人地啲球員（拜仁？），或者你可以請勁嘅教練（馬體會？），甚至你可以用嚟做青訓都得 — 當然你畀唔起高人工嘅，訓完咪又係走。

---------------------------------------------------------------------------------------
收費短片第二擊，暫時斷次買。80蚊，講足半個鐘，有圖有表有筆記。
都係一周思考課題，當然唔會就咁報新聞呃錢，係講有乜啟示。
影片簡介：https://bit.ly/2ZILRwf　
或者睇置頂 post都得：https://fbook.cc/3BRq
講銀行加按息係咪睇淡樓市，美股有冇泡沫，奧地利發100年債券有乜啟示。
仲講樓，講埋Growth vs Value．

以下係報名方法：

【最新李聲揚收費影片】股市係咪真係太貴? 要買究竟邊隻係抵?
*影片下方會有內容撮要，唔想睇片可以睇字
影片/課程編號：CC003
播放平台：https://homebloggerhk.com/web-class-player/
付款及收看步驟：
1/點擊報名收看 [ 影片/課程編號：CC003 ]
2/利用信用卡網上付款
3/及後有登入資料可以立即收看
查詢：whatsapp 63832145