投票決定邊個去死（上） . 我殺咗人，以一個神不知鬼不覺，甚至我自己都預料唔到嘅方式。 . 話說前幾日，我執到一本死亡筆記。 . 嗰陣我以為，呢本只係周邊產品，世上應該唔存在真嘅死亡筆記㗎嘛。 . ， 就算係假，我都唔會寫自己個名落去。 . 咁啱我嗰日俾上司鬧完，我就忿忿不平咁寫咗上司個名落去。 . 我仲幫佢設計咗一個好有特色嘅死法：俾車撞到輕傷，上咗救護車，遇到車禍而死。 . ， 點知，上司真係咁樣死咗。 . 大家都為佢嘅死法而驚訝：「佢命中注定要俾車撞死，真係點都走唔甩。」「死神纏住佢唔放。」 . 我就咁殺咗一個人，我搵咗好多個理由去安慰自己，我都唔知本死亡筆記係真，上司平時對下屬好刻薄…… . ， 但喺我參加上司喪禮嘅時候，一切嘅理由都講唔落去。 . 我見到佢年幼嘅仔女哀傷痛哭，我仲見到好多小朋友參加喪禮，原來上司助養咗好多細路。 . 上司嘅朋友逐個上台講佢嘅生平，我先意識到，喺大部份人眼中，上司都係一個好人，佢只係對下屬比較刻薄，點講都罪不至死。 . 而我，偏偏殺咗一個好人。 . 愧疚同自責，令我收埋咗本死亡筆記，並且決定，以後都唔再用呢本筆記。 . ， 但講就易，擁有咁神奇嘅力量，又點忍得住唔再用呢？ . 有一次，我睇新聞，見到有個富二代姦殺咗個女仔，明明證據確鑿，但佢利用自己嘅權勢同富貴，居然得以脫罪。 . 有良知嘅人聽到呢件事，都會憤怒，我都唔例外。 . 憤怒嘅我，將富二代個名寫咗落死亡筆記度。 . ， 富二代死後，大家都好開心，話天有眼，識得懲罰惡人。 . 而且，仲有人搵出富二代更多嘅罪證，證明佢真係死有餘辜。 . 我都好振奮，我終於做咗一件正義嘅事。 . 我意識到，我用死亡筆記殺仇人，係好容易殺錯良民，因為每個人都有好多面，即使佢對我衰，另一方面都可以係一個好爸爸、好朋友、慈善家。 . 不過，如果所有人都話一個人衰，咁佢多數都係真正嘅衰人。 . ， 為咗搵出衰人，我整咗一個「死亡投票網」，畀大家提名同投票，得票最多嘅，就會成為「本月之星」。 . 成為「本月之星」，仲有一個條件，就係佢得到「抵死」嘅票，要比「唔死」嘅票多一倍，確保佢係抵死嘅人。 . 網站初初面世，網民都冇太在意，只當成一個發洩憤怒嘅網站，隨便提名自己唔鍾意嘅人。 . 第一個「本月之星」被殺後，網站先開始受到關注。 . ， 好彩，普通人再乞人厭，最多只有幾十人想佢死。 . 成為第一名嘅，暫時都仲係一啲惡名昭彰、經常喺新聞出現、偏偏又未受法律制裁嘅大壞蛋。 . 殺咗幾個「本月之星」後，大家先真正相信「死亡投票網」。 . 網民議論紛紛：「呢個網一定係死神創造嘅。」 「死神邊有咁正義，計我話，係有個武功高強嘅武神，專幫大家殺人渣。」 . ， 哈哈，冇錯，我就係嗰個武神。 . 雖然我唔係武功高強，但亦有一顆行俠仗義嘅心。 . 雖然為咗自身安全著想，我唔可以暴露身份，但我一定會盡我所能，唔殺錯一個好人，亦唔放過一個壞人。 . 網民讚我嘅同時，都畀咗好多意見我。 . 我根據大家嘅意見，慢慢建設網站，例如網站上多咗討論區，可以公開候選人嘅惡行，等大家決定要投「抵死」定「唔死」。 . ， 「死亡投票網」擁有真實嘅殺戮能力，所以大家討論嘅熱情都高好多。 . 當然，討論區一定有打手，得票高嘅候選人為咗逃過一劫，都會請好多打手，話自己好善良好大愛，啲惡行全部都係誤會…… . 但網民嘅眼睛係雪亮嘅，邊個係好人，邊個係壞人，唔通大家唔知咩？ . 冇錯，呢個世界的確有好多灰色地帶，好多人會做吓好事，又做吓壞事。 . 但我每個月先揀一個人嚟殺，好壞參半嘅人，根本唔會成為「每月之星」。 . 待續... . #短故 #短篇 #小說 #陳美濤 #廣東話 #粵語 #tomatochan #投票決定邊個去死